(1)

It-Tabella 1 tal-Anness tar-Regolament tal-Kummissjoni (UE) Nru 37/2010 (2) tistabbilixxi s-sustanzi farmakoloġikament attivi u l-klassifikazzjoni tagħhom fir-rigward tal-limiti massimi ta’ residwi (MRLs) fl-oġġetti tal-ikel li ġejjin mill-annimali.

(2)

Is-sustanza saliċilat tas-sodju hija inkluża f’dik it-tabella bħala sustanza permessa.

(3)

Fit-30 ta’ Settembru 2022, skont l-Artikolu 3 tar-Regolament (KE) Nru 470/2009, Dopharma B.V. ressqet applikazzjoni lill-Aġenzija Ewropea għall-Mediċini (“l-Aġenzija”) għall-estensjoni tal-entrata eżistenti għas-sustanza saliċilat tas-sodju għat-tiġieġ.

(4)

Fil-5 ta’ Ottubru 2023, abbażi tal-opinjoni tal-Kumitat għall-Prodotti Mediċinali Veterinarji, stabbilit skont l-Artikolu 139 tar-Regolament (UE) 2019/6 tal-Parlament Ewropew u tal-Kunsill (3), u wara li qieset l-applikazzjoni ta’ Dopharma B.V., l-Aġenzija rrakkomandat l-estensjoni tal-limiti massimi ta’ residwi għas-sustanza saliċilat tas-sodju fit-tiġieġ u l-istabbiliment ta’ MRLs numeriċi.

(5)

L-Aġenzija kkonkludiet ukoll li l-estrapolazzjoni tal-MRLs għas-saliċilat tas-sodju mit-tessuti tat-tiġieġ għat-tessuti ta’ speċijiet oħra tal-pollam għajr għad-dundjani hija xierqa.

(6)

Fid-dawl tal-opinjoni tal-Aġenzija, il-Kummissjoni tqis li huwa xieraq li jiġi stabbilit l-MRL rakkomandat għas-saliċilat tas-sodju fit-tessuti tat-tiġieġ u li jiġi estrapolat għal speċijiet oħra tal-pollam għajr għad-dundjani, iżda ristrett għall-annimali li ma jipproduċux bajd għall-konsum mill-bniedem peress li ma ġiet ipprovduta l-ebda data dwar ir-residwi għall-bajd.

(7)

Għaldaqstant, ir-Regolament (UE) Nru 37/2010 jenħtieġ li jiġi emendat skont dan.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Prodotti Mediċinali Veterinarji,