(1)

L-Artikolu 4 tar-Regolament (KEE) Nru 2075/92 tat-30 ta’ Ġunju 1992 dwar l- organizzazzjoni komuni fis-suq tat-tabakk mhux maħdum ( 4 ) jiddisponi għall-iffissar ta’ l-ammont tal-premium u l-ammonti supplimentari għal kull ħsad ta' tabakk, waqt li jikkunsidra b’mod partikolari possibiltajiet ta' l-imgħoddi u prevedibbli għar-rimi tad-diversi tipi ta’ tabakk, f'kondizzjonijiet normali ta’ kompetizzjoni. Il-premiums għandhom għalhekk ikunu ffissati u marbuta ma’ l-għetiebi ffissati għall-2002, 2003 u l-2004.

(2)

Skond it-tieni paragrafu ta’ l-Artikolu 8 u l-Artikolu 9(2) tar-Regolament (KEE) Nru 2075/92, l-għetiebi ta' garanzija għal kull grupp ta’ varjetà u Stati Membri għandhom jiġu ffissati għall-ħsad ta’ l-2002, l-2003 u l-2004, waqt li jiġu kkunsidrati b’mod partikolari l-kondizzjonijiet tas-suq u l-kondizzjonijiet soċjo-ekonomiċi u agronomiċi fl-inħawi kkonċernati ta’ produzzjoni. Il-livelli ta’ l-għetiebi jiġu ffissati kmieni sabiex il-produtturi jistgħu jippjanaw il-produzzjoni tagħhom għall-ħsad in kwistjoni.

(3)

L-Artikolu 6(5) tar-Regolament tal-Kunsill (KEE) Nru 2075/92 jippermetti lill-Istati Membri li japplikaw skema ta’ rkant għal kuntratt ta’ kultivazzjoni. Skond id-disposizzjonijiet fis-seħħ fil-preżent, jekk din l-iskema tiġi applikata jkollha tkopri l-gruppi kollha tal-varjetajiet ta' tabakk prodotti fi Stat Membru. Is-sistema għadha ma ġietx applikata għar-raġuni li l-Istati Membri jemmnu li l-irkant huwa ġustifikat biss għal ċerti gruppi ta’ varjetajiet u biss għal kuntratti ta’ gruppi produtturi li juru interess. Bl-iskop li jinkoraġġixxi l-irkanti bħala mezz biex jogħla l-prezz kummerċjali ta’ tabakk mhux maħdum, għandhom jiddaħħlu disposizzjonijiet aktar flessibbli sabiex l-Istati Membri jistgħu jirrestrinġu dan il-mekkaniżmu għal ċerti gruppi ta’ varjetà biss u għal gruppi produtturi li jixtiequ jieħdu sehem.

(4)

Ir-riservi tal-kwota nazzjonali magħmula skond l-Artikolu 9(5) tar-Regolamenti (KEE) Nru 2075/92 fallew milli jiksbu l-bidla jew l-għanijiet ta’ ristrutturar ta’ l-irziezet li għalihom kienu saru. L-applikazzjoni f’livell nazzjonali, b’mod partikolari l-kriterji stabbiliti mill-Istati Membri għat-tqassim mill-ġdid tar-riservi u l-ammonti żgħar involuti fl-istabbiliment tagħhom, uriet bil-provi li mhumiex biżżejjed biex jiksbu r-riżultat mixtieq. Barra minn hekk, l-arranġamenti amministrattivi għall-ġestjoni tar-riservi nazzjonali ħolqu ammont ta’ xogħol eċċessiv u kkumplikaw b’mod eċċessiv il-ġestjoni tal-kwoti, li rriżultaw f’dewmien serju fit-tqassim tagħhom. Madankollu l-possibbiltà għandha tibqa’ miftuħa għall-Istati Membri li jixtiequ jagħmlu dan biex jirrikorru għal din is-sistema fejn huma jikkunsidrawha utili.

(5)

It-Trattat jirrikjedi li livell għoli ta’ ħarsien ta’ saħħet il-bniedem ikun assigurat fid-definizzjoni u l-implimentazzjoni tal-politika u l-attivitajiet kollha tal-Komunità. Fil-qafas ta’ l-istrateġija għal żvilupp sostenibbli fl-Unjoni Ewropea, il-konsegwenzi ekonomiċi, soċjali u ambjentali ta’ kull politika għandhom jiġu kkunsidrati. Fir-reġjuni li jipproduċu tabakk mhux maħdum, ikun aħjar minħabba f’hekk li jimplimentaw azzjonijiet bl-għan li jiżviluppaw għejun ġodda ta’ dħul u attività ekonomika għal dawk li jkabbruh. Sabiex jinkiseb dan l-għan, huwa propost li l-attivitajiet tal-Fond Komunitarju tat-Tabakk ikunu emendati u r-riċerka agronomika għandha tinbidel b’miżura biex twieżen inizjattivi speċifiċi li jippermettu lil dawk li jkabbru t-tabakk li jaqilbu mit-tabakk għal uċuħ u attivitajiet ekonomiċi oħra li joħolqu l-impjiegi.

(6)

Ta’ min ukoll iżid it-tnaqqis użat biex jiffinanzja l-Fond għal 3 % fl-2003 sabiex jissaħħu l-mezzi tan-nefqa disponibbli għall-iffinanzjar tal-miżuri ta’ informazzjoni fuq l-effetti ta’ ħsara tal-konsum tat-tabakk u inizjattivi biex jibdlu l-produzzjoni. Din il-miżura ta’ l-aħħar, li hija prijorità ġdida, tista’ tkun implimentata b’mod nazzjonali bħala parti minn miżuri ta’ konverżjoni speċifiċi u tkun takkumpanja u tiżviluppa sinerġiji mal-programm ta’ kwoti tax-xiri għall-ħażna. Għall-ħsad ta’ l-2004, jekk ikun hemm bżonn, it-tnaqqis jista’ jiżdied sa 5 % skond l-użu ta’ l-approprijazzjonijiet tal-Fond, fuq il-bażi ta’ rapport magħmul mill-Kummissjoni.

(7)

Ir-Regolament (KEE) Nru 2075/92 għandu għalhekk jiġi emendat,