|
4.5.2012 |
MT |
Il-Ġurnal Uffiċjali tal-Unjoni Ewropea |
C 129/3 |
DEĊIŻJONI TA’ IMPLIMENTAZZJONI TAL-KUMMISSJONI
tat-3 ta’ Mejju 2012
dwar il-finanzjament tal-programm ta’ ħidma 2012 għat-taħriġ dwar is-sikurezza fl-ikel u fl-għalf, is-saħħa tal-annimali, il-benessri tal-annimali u s-saħħa tal-pjanti fil-qafas tal-Programm ta' “Taħriġ Aħjar għal Aktar Sikurezza fl-Ikel”
2012/C 129/03
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (1) (minn hawn ’il quddiem ir-“Regolament Finanzjarju”), u b’mod partikolari l-Artikolu 75,
Wara li kkunsidrat ir-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jippreskrivi regoli ddettaljati għall-implimentazzjoni tar-Regolament tal-Kunsill (KE, Euratom) Nru 1605/2002 fuq ir-Regolament Finanzjarju li jgħodd għall-baġit ġenerali tal-Komunitajiet Ewropej (2) (minn hawn 'il quddiem ir-“Regoli Implimentattivi”), u b’mod partikolari l-Artikolu 90 tiegħu,
Wara li kkunsidrat ir-Regolament tal-Kunsill (KE) Nru 58/2003 tad-19 ta' Diċembru 2002 li jfassal l-istatut għall-aġenziji eżekuttivi li jridu jiġu fdati b'ċerti kompiti fit-tmexxija tal-programmi tal-Komunità (3), u b'mod partikolari l-Artikolu 12(3) tiegħu,
Wara li kkunsidrat id-Direttiva tal-Kunsill 2000/29/KE dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-pjanti u għall-prodotti tal-pjanti u kontra t-tixrid tagħhom ġewwa l-Komunità (4) u b’mod partikolari l-Artikolu 2(1)(i) tagħha,
Wara li kkunsidrat ir-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi tal-għalf u l-ikel, mas-saħħa tal-annimali u mar-regoli dwar il-welfare tal-annimali (5), u b'mod partikolari l-Artikolu 66(1)(b) u (c) tiegħu,
Billi:
|
(1) |
Ir-Regolament (KE) Nru 882/2004 jistabbilixxi regoli ġenerali għat-twettiq ta’ kontrolli uffiċjali biex tiġi vverifikata l-konformità mar-regoli maħsuba sabiex, b'mod partikolari, jipprevjenu, jeliminaw jew inaqqsu r-riskji għall-bnedmin u għall-annimali għal livelli aċċettabbli, u jiggarantixxu prassi ġusta fil-kummerċ tal-għalf u l-ikel, u jħarsu l-interessi tal-konsumatur. L-Artikolu 51 ta’ dan ir-Regolament jistipula li l-Kummissjoni tista’ torganizza korsijiet ta' taħriġ għall-persunal tal-awtoritajiet kompetenti tal-Istati Membri responsabbli għall-kontrolli uffiċjali msemmija f'dak ir-Regolament, liema korsijiet jistgħu jinfetħu għal parteċipanti minn pajjiżi terzi, b’mod partikolari pajjiżi li qegħdin jiżviluppaw. Dawn il-korsijiet jistgħu jinkludu b'mod partikolari, taħriġ fil-liġi Komunitarja tal-għalf u tal-ikel u fir-regoli dwar is-saħħa u l-benessri tal-annimali. |
|
(2) |
L-Artikolu 2(1)(i) tad-Direttiva tal-Kunsill 2000/29/KE dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-prodotti tal-pjanti u kontra t-tixrid tagħhom ġewwa l-Komunità, jipprovdi l-istrument legali għall-organizzazzjoni ta' korsijiet fil-qasam tas-saħħa tal-pjanti. |
|
(3) |
Il-“Programm ta' Taħriġ Aħjar għal Aktar Sikurezza fl-Ikel” ġie mwaqqaf mill-Kummissjoni biex jintlaħqu l-miri stipulati fir-Regolament (KE) Nru 882/2004. Il-Komunikazzjoni tal-Kummissjoni COM(2006) 519 finali (6) tesplora l-possibilitajiet għall-organizzazzjoni ta' taħriġ fil-ġejjieni. |
|
(4) |
Għaldaqstant il-programm ta' ħidma 2012 għall-implimentazzjoni ta' Programm ta' “Taħriġ Aħjar għal Aktar Sikurezza fl-Ikel” għandu jiġi adottat. |
|
(5) |
Id-Deċiżjoni tal-Kummissjoni 2008/544/KE (7) tal-20 ta’ Ġunju 2008 bidlet “L-Aġenzija Eżekuttiva għall-Programm tas-Saħħa Pubblika” fl-“Aġenzija Eżekuttiva għas-Saħħa u l-Ħarsien tal-Konsumatur” (minn hawn 'il-quddiem imsejħa l-“Aġenzija”). Id-Deċiżjoni tal-Kummissjoni C(2008) 4943 tad-9 ta' Settembru 2008 ddelegat ċerti ħidmiet ta' ġestjoni u implimentazzjoni tal-programmi lill-Aġenzija li għandhom x'jaqsmu ma' miżuri ta' taħriġ għas-sikurezza fl-ikel imwettqa skont ir-Regolament (KE) Nru 882/2004 u d-Direttiva 2000/29/KE. Għaldaqstant għandu jingħata sussidju lill-Aġenzija għas-sena 2012 biex din tiffinanzja l-ispejjeż operattivi tal-attivitajiet marbuta mal-Programm ta' “Taħriġ Aħjar għal Aktar Sikurezza fl-Ikel”. |
|
(6) |
B’konformità mal-Artikolu 75 tar-Regolament Finanzjarju u l-Artikolu 90(1) tar-Regoli ta' Implimentazzjoni, l-impenn ta’ nfiq mill-baġit tal-Unjoni Ewropea għandu jkollu qablu deċiżjoni finanzjarja li tistabbilixxi l-elementi essenzjali tal-azzjoni li tinvolvi l-infiqu li hija adottata mill-istituzzjoni jew mill-awtoritajiet li l-poteri tagħhom ġew delegati mill-istituzzjoni. |
|
(7) |
Billi l-programm ta’ ħidma 2012 huwa qafas dettaljat biżżejjed, id-deċiżjoni attwali tikkostitwixxi deċiżjoni ta’ finanzjament fit-tifsira tal-Artikolu 90(2) u (3) tar-Regoli ta' Implimentazzjoni, |
|
(8) |
Għall-applikazzjoni ta' din id-Deċiżjoni, huwa xieraq li jiġi mfisser it-terminu “bidla sostanzjali”, fi ħdan it-tifsira tal-Artikolu 90(4) tar-Regoli ta' Implimentazzjoni. |
|
(9) |
Skont l-Artikolu 83 tar-Regolament Finanzjarju, il-validazzjoni, l-awtorizzazzjoni u l-ħlas tan-nefqa għandhom isiru fil-limiti ta' żmien stabbiliti fir-regoli ta' implimentazzjoni. Dawk ir-regoli għandhom jispeċifikaw ukoll iċ-ċirkostanzi li fihom il-kredituri li jitħallsu tard jkunu intitolati li jirċievu l-imgħax fil-każ ta’ nuqqas ta’ pagament impost fuq il-linja li minnha tħallset is-somma ewlenija. |
|
(10) |
Għalhekk, din id-Deċiżjoni għandha tipprovdi r-regoli dwar il-pagament tal-imgħax minħabba pagamenti tard marbuta ma’ azzjonijiet inklużi fil-programm ta' ħidma 2012, |
IDDEĊIDIET KIF ĠEJ:
Artikolu 1
Il-programm ta' ħidma għall-implimentazzjoni tal-Programm ta' Taħriġ Aħjar għal Aktar Sikurezza fl-Ikel fl-2012 kif stipulat fl-Anness huwa adottat hawnhekk. Dan jikkostitwixxi deċiżjoni ta’ finanzjament skont it-tifsira tal-Artikolu 75 tar-Regolament Finanzjarju.
Artikolu 2
1. L-ammont totali tal-kontribuzzjoni finanzjarja għall-implimentazzjoni tal-programm ta' ħidma għandu jkun ta' EUR 16 170 000 u għandu jiġi ffinanzjat mil-linji baġitarji li ġejjin tal-Baġit Ġenerali tal-Unjoni Ewropea għall-2012:
|
(a) |
linja baġitarja Nru 17.04.07.01: EUR 14 090 000 |
|
(b) |
linja baġitarja Nru 17.04.04.01: EUR 660 000 |
|
(c) |
linja baġitarja Nru 17.01.04.05: EUR 250 000 |
|
(d) |
linja baġitarja Nru 17.01.04.31: EUR 1 170 000. |
2. L-ammont stipulat fil-paragrafu 1(d) jitħallas lill-Aġenzija Eżekuttiva għas-Saħħa u l-Konsumaturi u għandu jikkostitwixxi sussidju operattiv.
3. Imgħax meta ma jsirx ħlas minħabba pagamenti b'lura wkoll jista' jitħallas mil-linji baġitarji msemmija fil-punt 1(a) u (b) skont l-Artikolu 83 tar-Regolament Finanzjarju.
Artikolu 3
Bidliet kumulattivi tal-allokazzjonijiet għall-azzjonijiet speċifiċi koperti mill-programm ta' ħidma li ma jaqbżux l-20 % tal-kontribuzzjoni finanzjarja massima prevista fl-Artikolu 2(1) ma għandhomx jitqiesu bħala sostanzjali fit-tifsira tal-Artikolu 90(4) tar-Regolamenti ta' Implimentazzjoni, sakemm dawn ma jaffettwawx b'mod sinifikanti n-natura u l-għan tal-programm ta' ħidma.
L-uffiċjal awtorizzanti jista' jadotta tali bidliet skont il-prinċipji ta' ġestjoni finanzjarja soda u dawk ta' proporzjonalità.
Magħmul fi Brussell, it-3 ta’ Mejju 2012.
Għall-Kummissjoni
John DALLI
Membru tal-Kummissjoni
(1) ĠU L 248, 16.9.2002, p. 1.
(2) ĠU L 357, 31.12.2002, p. 1.
(4) ĠU L 169, 10.7.2000, p. 1.
(5) ĠU L 165, 30.4.2004, p. 1.
(6) SEC(2006) 1163 u SEC(2006) 1164, 20.9.2006.
(7) ĠU L 173, 3.7.2008, p. 27.
ANNESS
Il-programm ta' ħidma 2012 għat-taħriġ fil-qasam tas-sikurezza tal-ikel u tal-għalf, is-saħħa u l-benessri tal-annimali u s-saħħa tal-pjanti fil-qafas tal-Programm ta' Taħriġ Aħjar għal Aktar Sikurezza fl-Ikel
1.1. Introduzzjoni
Dan il-programm ta’ ħidma fih tliet miżuri ta' implimentazzjoni għall-2012. Id-distribuzzjoni tal-baġit u l-azzjonijiet ewlenin skont l-għanijiet stipulati fir-Regolament (KE) Nru 882/2004 u d-Deċiżjoni 2000/29/KE, huma kif ġej:
| 1.2. Għall-akkwist (implimentat f’ġestjoni ċentralizzata diretta): |
|||
|
EUR 14 750 000 |
||
|
EUR 250 000 |
||
|
EUR 1 170 000 |
||
|
TOTAL |
EUR 16 170 000 |
||
1.2. Akkwist
L-ammont baġitarju globali riżervat għall-kuntratti tal-akkwisti fl-2012 jammonta għal EUR 15 000 000.
1.2.1. Taħriġ: Kuntratt estern għat-twettiq tal-programm ta’ taħriġ
IL-BAŻI LEGALI
Ir-Regolament (KE) Nru 882/2004, l-Artikolu 51 u l-Artikolu 66(1)(b)
Id-Direttiva 2000/29/KE, l-Artikolu 2(1)(i)
IL-LINJA BAĠITARJA
Il-linji baġitarji: 17.04.07.01 u 17.04.04.01
IN-NUMRU INDIKATTIV U T-TIP TA’ KUNTRATTI PREVISTI
Għal kull waħda mill-kwistjonijiet tekniċi msemmija hawn taħt se jiġi ffirmat kuntratt wieħed ta’ servizz, jew aktar. Huwa stmat li se jiġu ffirmati madwar 18-il kuntratt ta’ servizz. Il-kuntratturi esterni huma involuti l-aktar fl-aspetti organizzattivi u loġistiċi tal-attivitajiet ta’ taħriġ.
IS-SUĠĠETT TAL-KUNTRATTI PREVISTI (JEKK POSSIBBLI)
Għall-2012, l-azzjoni ta’ taħriġ se tkun dwar is-suġġetti li ġejjin:
|
L-attivitajiet |
L-ammont f’EUR |
|
Il-prodotti sekondarji mill-annimali |
880 000 |
|
Il-benessri tal-annimali |
1 400 000 |
|
L-ispezzjonijiet ta' kontroll f'Postijiet ta' Spezzjoni fil-Fruntiera |
860 000 |
|
Il-liġidwar l-għalf |
1 000 000 |
|
Il-kontrolli tal-importazzjonijiet fuq ikel li ma jorġinax mill-annimali |
930 000 |
|
L-awditjar intern tas-sistemi uffiċjali tal-kontroll |
900 000 |
|
L-iskemi ta’ kwalità (agrikoltura organika u indikazzjonijiet ġeografiċi) |
1 000 000 |
|
Il-kriterji mikrobijoloġiċi għall-oġġetti tal-ikel |
750 000 |
|
TRAĊĊI (l-aspetti sanitarji u fitosanitarji) |
650 000 |
|
L-investigazzjoni dwar tifqigħat li jkunu ġejjin mill-ikel |
1 500 000 |
|
L-ittikkettar tal-ikel u l-klejms |
1 500 000 |
|
L-analiżi tal-OĠM |
420 000 |
|
Il-kontroll tal-movimenti kummerċjali u mhux kummerċjali tal-klieb u l-qtates |
630 000 |
|
Il-kontroll tal-kontaminanti |
1 000 000 |
|
L-appoġġ fl-infurzar fl-oqsma sanitarji u fitosanitarji |
800 000 |
|
Kwistjonijiet oħra dwar is-saħħa u l-benessri tal-annimali, is-saħħa tal-pjanti u s-sikurezza tal-ikel, il-konferenzi, l-għajnuna, l-għodod ta' tagħlim u l-valutazzjonijiet |
530 000 |
|
TOTAL |
14 750 000 |
IMPLIMENTAZZJONI
EUR 14 120 000 (finanzjament ta’ miżuri tas-sikurezza fl-ikel skont ir-Regolament (KE) Nru 882/2004 u d-Direttiva 2000/29/KE) se jiġu ġestiti u implimentati mill-Aġenzija Eżekuttiva għas-Saħħa u l-Konsumaturi (id-Deċiżjoni tal-Kummissjoni 2008/544/KE). Is-EUR 630 000 li jibqa’ se jintużaw mill-Kummissjoni biex ikopru l-programm dwar l-OĠM (EUR 420 000) u fuq studji, konferenzi u stimi (EUR 210 000, mill-partita “oħrajn”).
IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWIST
Bejn wieħed u ieħor minn April sa Ġunju biex il-kuntratti jiġu ffirmati fl-2012.
L-AMMONT INDIKATTIV TAS-SEJĦA GĦALL-OFFERTI
EUR 14 750 000.
1.2.2. Taħriġ: Tagħmir tal-IT, għodod u appoġġ, materjal promozzjonali, tagħrif u appoġġ fil-komunikazzjoni u konferenzi
IL-BAŻI LEGALI
Ir-Regolament (KE) Nru 882/2004, l-Artikolu 66 (1)(c)
IL-LINJA BAĠITARJA
Il-linja baġitarja: 17.01.04.05
IN-NUMRU INDIKATTIV U T-TIP TA’ KUNTRATTI PREVISTI
Huwa stmat li madwar tliet kuntratti speċifiċi se jiġu ffirmati dwar il-kuntratti tal-qafas eżistenti.
IS-SUĠĠETT TAL-KUNTRATTI PREVISTI (JEKK POSSIBBLI)
L-azzjonijiet li se jkunu ffinanzjati minn dan il-baġit huma maħsuba għall-organizzazzjoni tal-programmi ta’ taħriġ, għall-IT u t-tagħmir tat-tagħlim elettroniku, għall-għodod u l-appoġġ, għall-materjal promozzjonali, għat-tagħrif u l-appoġġ fil-komunikazzjoni kif ukoll għall-konferenzi.
L-IMPLIMENTAZZJONI
Din l-azzjoni se tkun implimentata direttament mid-DĠ għas-Saħħa u l-Konsumaturi.
PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWIST
Bejn wieħed u ieħor minn April sa Ottubru.
AMMONT INDIKATTIV TAS-SEJĦA GĦALL-OFFERTI
EUR 250 000.
1.3. Azzjonijiet oħra: Sussidju operattiv għall-Aġenzija Eżekuttiva dwar is-Saħħa u l-Konsumaturi
IL-BAŻI LEGALI
Ir-Regolament tal-Kunsill (KE) Nru 58/2003, b'mod partikolari l-Artikolu 12(3).
IL-LINJA BAĠITARJA
Il-linja baġitarja: 17.01.04.31
AMMONT
EUR 1 170 000
ID-DESKRIZZJONI U L-GĦAN TAL-MIŻURA IMPLIMENTATTIVA
Dan il-baġit jiffinanzja s-sussidju operattiv tal-Aġenzija għas-sena 2012 marbut mal-programmi skont l-“FP Intestatura 2”. Il-linja baġitarja 17.01.04.31 tiffinanzja s-sussidju operattiv tal-Aġenzija għall-2012 għall-parti marbuta mal-programm Taħriġ Aħjar għal Aktar Sikurezza fl-Ikel. Skont l-Artikolu 12(3) tar-Regolament tal-Kunsill (KE) Nru 58/2003, is-sussidju operattiv għandu jittieħed mill-allokazzjoni finanzjarja għall-programmi tal-Unjoni mmexxija mill-Aġenzija. Fil-baġit tal-2012 inħolqu żewġ linji baġitarji separati għas-sussidju li jrid jitħallas lill-Aġenzija, wieħed għall-programmi skont l-intestatura 2 u ieħor għal programmi skont l-intestatura 3b tal-Perspettivi Finanzjarji.