Brussell, 18.3.2024

COM(2024) 122 final

RAPPORT TAL-KUMMISSJONI

Rapport tal-Kummissjoni skont l-Artikolu 12(3) tar-Regolament (UE) 2019/631 dwar l-evoluzzjoni tad-diskrepanza tal-emissjonijiet tas-CO2 fid-dinja reali għall-karozzi tal-passiġġieri u għall-vetturi kummerċjali ħfief u li fihom is-settijiet tad-data anonimizzati u aġġregati tad-dinja reali msemmija fl-Artikolu 12 tar-Regolament ta' Implimentazzjoni tal-Kummissjoni 2021/392




{SWD(2024) 59 final}


1.INTRODUZZJONI

It-trasport bit-triq huwa responsabbli għal madwar għoxrin fil-mija tal-emissjonijiet tal-gassijiet serra tal-Unjoni Ewropea (UE). Fl-emissjonijiet tat-trasport bit-triq, il-vetturi ħfief (karozzi tal-passiġġieri u vetturi kummerċjali ħfief) huma responsabbli għal madwar 70 % tat-total ( 1 ).

Sabiex tintlaħaq in-newtralità klimatika fl-UE sal-2050, il-Patt Ekoloġiku Ewropew ( 2 ) jitlob tnaqqis ta’ 90 % fl-emissjonijiet ta’ gassijiet serra mit-trasport meta mqabbla mal-livelli tal-1990. Ir-Regolament (UE) 2019/631 ( 3 ), li jistabbilixxi l-istandards ta’ rendiment għall-emissjonijiet tas-CO2 għal vetturi ħfief ġodda, huwa wieħed mill-istrumenti ta’ politika ewlenin stabbiliti biex jintlaħaq dan l-għan.

Il-valuri uffiċjali tal-emissjonijiet tas-CO2 tal-vetturi, kif stabbiliti matul l-approvazzjoni tat-tip, jintużaw biex jiġi ddeterminat jekk il-manifatturi jikkonformawx mal-miri skont ir-Regolament. Bħala tali, l-effettività ta’ dawn il-miri fit-tnaqqis tal-emissjonijiet tas-CO2, kif ukoll ir-robustezza tas-sistema ta’ monitoraġġ tal-emissjonijiet tas-CO2, jiddependu fuq kemm dawk il-valuri uffiċjali tat-test jirrappreżentaw l-emissjonijiet “fid-dinja reali” tal-vetturi fit-triq. Din ir-rappreżentattività hija importanti għall-integrità ambjentali, it-trasparenza u l-affidabbiltà tas-sistema ta’ monitoraġġ u, għalhekk, anki għall-fiduċja tal-konsumaturi.

Matul dawn l-aħħar snin iddaħħlu fis-seħħ diversi miżuri biex jiġi żgurat li l-valuri tat-test ikunu qrib kemm jista’ jkun tar-realtà. Fl-2017, ġiet introdotta l-Proċedura ta’ ttestjar armonizzata fuq livell dinji għall-vetturi ħfief (WLTP) ( 4 ), li tfasslet biex tirrappreżenta aħjar il-kundizzjonijiet tas-sewqan fid-dinja reali. Bħala parti mill-proċeduri l-ġodda, il-vetturi l-ġodda għandhom ikunu mgħammra b’apparat għall-monitoraġġ abbord tal-konsum tal-fjuwil (“apparat OBFCM”). Dan ir-rekwiżit japplika għal vetturi M1 (karozzi) ġodda rreġistrati mill-2021 u vetturi N1 (vannijiet) ġodda rreġistrati mill-2022. Barra minn hekk, ir-Regolament (UE) 2019/631 introduċa rekwiżit għall-awtoritajiet nazzjonali biex jivverifikaw il-korrettezza tal-valuri uffiċjali tas-CO2 tad-WLTP permezz tal-ittestjar ta’ vetturi diġà fis-servizz, jiġifieri użati fit-toroq.

Ir-Regolament (UE) 2019/631 inkariga wkoll lill-Kummissjoni biex timmonitorja l-emissjonijiet tas-CO2 “fid-dinja reali” tal-vetturi fit-triq, bl-użu tad-data li tinqara mill-apparati tal-OBFCM, u billi din titqabbel mad-data uffiċjali korrispondenti tad-WLTP ( 5 ).

 

Dan ir-rapport huwa l-ewwel wieħed dwar l-implimentazzjoni ta’ dak il-monitoraġġ tal-emissjonijiet tas-CO2 “fid-dinja reali” , li jiffoka fuq id-data rrapportata fl-2022, għall-vetturi rreġistrati għall-ewwel darba fl-2021. Id-data uffiċjali tad-WLTP użata għat-tqabbil ġiet iffinalizzata u adottata f’Awwissu 2023 ( 6 ).

Dan ir-rapport jinkludi ħarsa ġenerali lejn id-data riċevuta u pproċessata mill-Kummissjoni (it-Taqsima 2), ir-riżultati ewlenin tal-analiżi (it-Taqsima 3), valutazzjoni ta’ kif id-data tad-dinja reali tista’ tintuża fil-futur (it-Taqsima 4), u l-konklużjonijiet li jistgħu jittieħdu f’dan l-istadju (it-Taqsima 5).

Id-Dokument ta’ Ħidma tal-Persunal ( 7 ) li jakkumpanja dan ir-rapport jistabbilixxi l-metodoloġija użata għall-ipproċessar u l-analiżi tad-data tad-dinja reali u fih riżultati aktar dettaljati. Huwa fih ukoll l-ewwel wieħed mis-settijiet ta’ data annwali anonimizzati u aggregati għal kull manifattur li jifformaw il-bażi għall-Kummissjoni biex timmonitorja d-diskrepanza bejn il-valuri tad-WLTP u dawk tad-dinja reali ( 8 ).

2.Sett ta’ data 

2.1.Sorsi tad-data u pproċessar tad-data

Skont ir-Regolament ta’ Implimentazzjoni (UE) 2021/392, id-data tad-dinja reali trid tinġabar kemm mill-manifatturi tal-vetturi kif ukoll mill-Istati Membri u tiġi rrapportata lill-Aġenzija Ewropea għall-Ambjent (EEA). Il-manifatturi jistgħu jiddependu fuq it-trasferiment tad-data ‘over-the-air’ direttament mill-vettura jew jiġbru din id-data permezz tan-negozjanti jew is-sewwejja awtorizzati tagħhom meta l-vetturi jiddaħħlu għal manutenzjoni jew tiswijiet. L-Istati Membri kienu meħtieġa jiġbru d-data tad-dinja reali waqt it-testijiet tal-affidabbiltà stradali mill-20 ta’ Mejju 2023.

Dan l-ewwel rapport huwa bbażat fuq id-data tad-dinja reali miġbura mill-manifatturi tal-vetturi matul l-2021 dwar il-karozzi u l-vannijiet tagħhom mgħammra b’apparat tal-OBFCM. Ġiet riċevuta data tad-dinja reali għal 988 231 vettura minn total ta’ 9 821 479 vettura rreġistrati għall-ewwel darba fl-2021 fl-UE, fl-Iżlanda jew fin-Norveġja ( 9 ). Dawn kienu jinkludu 916 216-il karozza u 12 301 vann ( 10 ), li jikkorrispondu għal 10,6 % u 1,0 %, rispettivament, ta’ dawk il-vetturi rreġistrati għall-ewwel darba fl-2021 ( 11 ).

Qabel ma ġiet analizzata, id-data ġiet ipproċessata u aggregata f’diversi passi. Tneħħew id-data mhux rappreżentattiva, id-data inkonsistenti, l-outliers u l-vetturi barra mill-kamp ta’ applikazzjoni. B’mod partikolari, il-vetturi b’kilometraġġ taħt il-500 km ġew iffiltrati, u dan wassal biex tneħħew 27 % tal-karozzi fis-sett tad-data. B’mod ġenerali, 63 % tal-vetturi rrapportati nżammu fis-sett tad-data finali. Aktar dettalji dwar il-proċess jistgħu jinstabu fid-Dokument ta’ Ħidma tal-Persunal ta’ akkumpanjament.

2.2.Is-sett tad-data finali tad-dinja reali tal-2021

Is-sett tad-data finali, li ntuża għall-kalkoli ulterjuri, huwa ppreżentat fit-Tabella 1 hawn taħt. Dan jinkludi 617 194 karozza (7,2 % tal-karozzi rreġistrati għall-ewwel darba fl-2021) u 6 667 vann (0,6 % tal-vannijiet irreġistrati għall-ewwel darba fl-2021).

B’mod ġenerali, għadd żgħir biss ta’ manifatturi rrapportaw data minn sehem sinifikanti tal-vetturi tagħhom irreġistrati fl-2021. Se jkunu meħtieġa aktar sforzi mill-manifatturi biex itejbu b’mod sinifikanti l-kopertura tal-flotta fis-snin li ġejjin. Filwaqt li, għall-karozzi, dan is-sett ta’ data huwa biżżejjed biex jinsiltu konklużjonijiet preliminari, kien hemm distribuzzjoni mhux uniformi bejn id-data ppreżentata mill-manifatturi (ara t-Taqsima 3.2.1 ). Għall-vannijiet, il-kopertura tal-flotta hija limitata ħafna, li hija spjegata mill-fatt li l-vannijiet tal-Klassijiet II u III (jiġifieri dawk li jiżnu aktar minn 1 305 kg), li jirrappreżentaw il-maġġoranza kbira tal-flotta, huma meħtieġa biss li jkollhom apparat tal-OBFCM mill-2022. Bħala tali, is-sett ta’ data tad-dinja reali għall-vannijiet ma jistax jitqies bħala rappreżentattiv tar-reġistrazzjonijiet tal-2021, u l-analiżi ta’ dan ir-rapport tiffoka biss fuq il-karozzi.

Fost il-karozzi, il-vetturi diżil u l-vetturi elettriċi ibridi plug-in jirrappreżentaw sehem ogħla mis-sett tad-data tad-dinja reali milli mir-reġistrazzjonijiet kumplessivi tal-2021. Għalhekk, isiru aktar kalkoli u analiżijiet tal-lakuni għal kull tip ta’ sistema tal-motopropulsjoni/fjuwil.

Tabella 1: Sett tad-data finali tad-dinja reali

Tip ta’ sistema tal-motopropulsjoni/ fjuwil

Għadd ta’ vetturi rrapportati

Għadd ta’ vetturi wara l-ipproċessar (% miżmuma)

Total ta’ reġistrazzjonijiet tal-2021 skont it-tip ta’ sistema tal-motopropulsjoni/ fjuwil

Sehem ta’ reġistrazzjonijiet tal-2021 miżmuma għal kull tip ta’ sistema tal-motopropulsjoni/ fjuwil

Karozzi

Petrol

391 329

274 451 (70,1 %)

5 495 708

5,0 %

Diżil

301 995

219 003 (72,5 %)

2 229 388

9,8 %

E85

2 084

0

6 026

0 %

Karburanti oħrajn

697

0

215 798

0 %

Ibridi plug-in (petrol)

191 197

98 847
(51.7 %)

848 251

11,7 %

Ibridi plug-in (diżil)

28 914

24 893
(86.1 %)

55 805

44,6 %

TOTAL
karozzi

916 216

617 194
(67.4 %)

8 629 152

7,2 %

Vannijiet

Petrol

1 891

988
(52.3 %)

44 475

2,2 %

Diżil

10 053

5 593
(55.6 %)

1 139 405

0,5 %

Karburanti oħrajn

30

0

58 488

0 %

Ibridi plug-in (petrol)

326

86
(25.8 %)

1 501

5,7 %

Ibridi plug-in (diżil)

1

0

4

0 %

TOTAL
vannijiet

12 301

6 667
(54.2 %)

1 185 385

0.6%

2.3.Ir-rappreżentattività tas-sett tad-data finali tad-dinja reali tal-2021

Sabiex jiġi vvalutat jekk il-karozzi koperti mis-sett tad-data finali tad-dinja reali tal-2021 humiex rappreżentattivi tal-vetturi rreġistrati għall-ewwel darba fl-2021 (għal kull tip ta’ sistema tal-motopropulsjoni/fjuwil), jitqabblu l-emissjonijiet u l-massa medji tas-CO2 tad-WLTP tagħhom, kif muri f’ Table 2 . 

Dan jindika li, bħala medja, il-karozzi petrol u diżil fis-sett tad-data tad-dinja reali huma madwar 7 % itqal mill-karozza ġdida medja rreġistrata fl-2021, u l-emissjonijiet tas-CO2 tad-WLTP tagħhom huma madwar 6-8 % ogħla. Xejra simili hija osservata għall-karozzi elettriċi ibridi plug-in li jieħdu l-petrol. Dan jista’ jippreġudika r-riżultati.

Dan huwa relatat mal-fatt li s-sett ta’ data tad-dinja reali tal-2021 huwa ddominat minn vetturi minn għadd żgħir ta’ manifatturi (ara t-Taqsima 3.2.1 ), li ħafna minnhom għandhom kapaċitajiet ‘over-the-air’ li jippermettu t-trażmissjoni tad-data direttament lill-manifatturi. Fl-2021, tali vetturi kienu preżenti b’mod aktar prominenti fis-segmenti tal-flotta itqal.

Tabella 2: Ir-rappreżentattività tad-sett tad-data tad-dinja reali meta mqabbel mal-vetturi rreġistrati għall-ewwel darba fl-2021 (karozzi) ( 12 )

Tip ta’ sistema tal-motopropulsjoni/fjuwil

Emissjonijiet medji ta’ CO2 tad-WLTP (g CO2/km)

Massa medja fi stat ta’ tħaddim (kg)

sett ta’ data tad-dinja reali

L-ewwel reġistrazzjonijiet tal-2021

sett ta’ data tad-dinja reali

L-ewwel reġistrazzjonijiet tal-2021

Petrol

145,0

134,8

1 404

1 317

Diżil

153,0

144,7

1 747

1 627

Petrol + Diżil

148,5

137,7

1 554

1 407

Ibridi plug-in (petrol)

40,3

37,7

1 955

1 899

Ibridi plug-in (diżil)

37,2

37,2

2 281

2 291

Ibrida plug-in (kollha)

39,6

37,7

2 021

1 923

3.Riżultati

Il-medja tal-emissjonijiet ta’ CO2 fid-dinja reali u fid-WLTP u l-konsum tal-fjuwil, kif ukoll id-diskrepanza bejn il-valuri tad-dinja reali u dawk tad-WLTP jiġu kkalkolati fil-livell tal-flotta u għal kull manifattur separatament.

Il-metodoloġija u r-riżultati tal-kalkolu huma ppreżentati f’aktar dettall fid-Dokument ta’ Ħidma tal-Persunal, li fih ukoll id-data fil-livell tal-pajjiż, u informazzjoni rigward il-konsum tal-enerġija elettrika tal-vetturi elettriċi ibridi plug-in.

3.1.Valutazzjoni mal-flotta kollha tal-emissjonijiet medji ta’ CO2, tal-konsum tal-fjuwil u tad-diskrepanza fid-dinja reali

Table 3 tiġbor fil-qosor is-sejbiet ewlenin għall-karozzi. Hija turi, għal kull wieħed mill-gruppi tat-tipi ta’ sistema tal-motopropulsjoni/fjuwil, il-medja tal-konsum tal-fjuwil u tal-emissjonijiet ta’ CO2 fid-dinja reali, kif ukoll il-valuri korrispondenti tad-WLTP, u d-diskrepanza relattiva bejn dawk il-valuri medji tad-dinja reali u tad-WLTP. Għad-diskrepanza, jiġu ppreżentati kemm il-medja aritmetika kif ukoll il-medja ponderata f’km, minħabba li din tal-aħħar għandha tipprovdi indikazzjoni aħjar tal-konsum totali tal-fjuwil addizzjonali u tal-emissjonijiet ta’ CO2 minħabba d-diskrepanza fid-dinja reali.

Tabella 3: Il-konsum medju tal-fjuwil fid-dinja reali u tad-WLTP, l-emissjonijiet ta’ CO2 u d-diskrepanza bejn il-valuri tad-dinja reali u tad-WLTP (karozzi)

Konsum medju tal-fjuwil
(l/100 km)

Emissjonijiet medji ta’ CO2 (g/km)

Diskrepanza (%) ( 13 )

Tip ta’ sistema tal-motopropulsjoni/fjuwil

id-dinja reali

WLTP

id-dinja reali

WLTP

medja

medja ponderata f’km

Petrol

7,89

6,38

179,8

145,3

23,7

20,4

Diżil

6,88

5,82

181,0

153,2

18,1

16,7

Petrol + Diżil

7,44

6,13

180,3

148,8

21,2

18,1

Ibridi plug-in (petrol)

5,97

1,76

135,9

40,2

238

251

Ibridi plug-in (diżil)

5,83

1,41

153,3

37,2

312

318

Ibrida plug-in (kollha)

5,94

1,69

139,4

39,6

252

267

Fl-ewwel sena tal-użu tagħhom, id-diskrepanza medja fid-dinja reali għall-vetturi ġodda rreġistrati fl-2021 kienet ta’ 23,7 % (34,6 g CO2/km) għall-karozzi petrol u 18,1 % (27,8 g CO2/km) għall-karozzi diżil, li tagħti diskrepanza medja kkombinata ta’ 21,2 % (31,6 g CO2/km). Id-diskrepanzi medji ponderati f’km huma kemxejn aktar baxxi: 20,4 % (30,4 g CO2/km) għall-karozzi petrol u 16,7 % (25,3 g CO2/km) għall-karozzi diżil.

Din id-diskrepanza osservata għar-reġistrazzjonijiet tal-2021 tindika li l-qalba mill-NEDC (Ċiklu ta’ Sewqan Ewropew Ġdid) l-antik għall-proċedura l-ġdida ta’ ttestjar tad-WLTP naqqset madwar bin-nofs id-diskrepanza bejn l-emissjonijiet fid-dinja reali u dawk imkejla permezz ta’ ttestjar fil-laboratorju. Sal-2017, id-diskrepanza bejn l-emissjonijiet ta’ CO2 fid-dinja reali u l-emissjonijiet ta’ CO2 imkejla skont il-proċedura tal-NEDC żdiedet għal madwar 40 % ( 14 ). Din id-diskrepanza dejjem tiżdied immotivat il-qalba mill-NEDC għad-WLTP, u r-rekwiżit li l-vetturi jiġu mgħammra b’apparat tal-OBFCM.

Għall-Valutazzjonijiet tal-Impatt ( 15 ) li jirfdu r-reviżjoni tal-istandards ta’ rendiment għall-emissjonijiet ta’ CO2 għall-karozzi u l-vannijiet, il-Kummissjoni assumiet li l-emissjonijiet ta’ CO2 tad-WLTP tal-karozzi b’magna ta’ kombustjoni kienu bħala medja 21 % ogħla minn dawk ikkalkolati bl-NEDC, li aktar tard kien ikkonfermat minn studju tal-JRC ( 16 ). Dan il-proporzjon jimplika diskrepanza fl-emissjonijiet ta’ madwar 16 % bejn l-emissjonijiet fid-dinja reali u dawk tad-WLTP. Għas-sena 2021, id-diskrepanza osservata hija kompatibbli mad-diskrepanza tal-2021 preżunta għall-Valutazzjonijiet tal-Impatt. Tali diskrepanza kienet antiċipata, minħabba li hemm fatturi differenti li jaffettwaw l-emissjonijiet fid-dinja reali li ma jistgħux kollha jiġu replikati bis-sħiħ f’test fil-laboratorju.

Id-diskrepanza osservata tfisser ukoll li l-konsum tal-fjuwil fid-dinja reali esperjenzat mis-sewwieqa jibqa’ bħala medja 1-1,5 l/100 km ogħla minn dak indikat fid-dokumenti uffiċjali.

Analiżi skont il-massa wriet li filwaqt li l-vetturi eħfef li jieħdu l-petrol u d-diżil għandhom diskrepanza fid-dinja reali bejn 20-40 g CO2/km, għall-vetturi tqal, bħal SUVs u vetturi lussużi, id-diskrepanza hija 1,5-2,5 darbiet akbar, li żżid mal-emissjonijiet diġà ogħla tagħhom ta’ CO2 tad-WLTP.

Għall-karozzi elettriċi ibridi plug-in ġodda rreġistrati fl-2021, l-emissjonijiet medji ta’ CO2 fid-dinja reali (139,5 g CO2/km) kienu biss 23 % inqas minn dawk għall-karozzi konvenzjonali (180,3 g CO2/km), u 3,5 darbiet (100 g CO2/km) ogħla minn dawk indikati mit-test tad-WLTP (39,5 g CO2/km) – ara l-Illustrazzjoni 1 . Għal dawk il-vetturi, il-kalkolu tal-konsum tal-fjuwil tad-WLTP u tal-emissjonijiet tas-CO2 tagħhom iqis fattur ta’ utilità, li huwa s-sehem mistenni tad-distanza misjuqa fil-modalità elettrika. Fit-triq, l-emissjonijiet tas-CO2 ta’ dawk il-vetturi se jiddependu ħafna mis-sehem reali tad-distanza misjuqa kompletament bl-elettriku, li min-naħa tiegħu jiddependi mix-xejriet attwali tal-irriċarġjar u tal-użu, u mit-teknoloġiji speċifiċi tal-vetturi. Id-diskrepanza kbira li nstabet għal dawn il-vetturi bejn id-dinja reali u l-valuri tad-WLTP turi li dawn jiġu ċċarġjati u misjuqa f’modalità elettrika ħafna inqas minn kif kienu mistennija li jintużaw u li s-suppożizzjonijiet użati għall-kalkolu tar-riżultat tat-test tad-WLTP ma jgħoddux fil-kundizzjonijiet tad-dinja reali.

Illustrazzjoni 1: Medja tal-emissjonijiet tas-CO2 fid-dinja reali u tad-WLTP (karozzi)

3.2.Valutazzjoni fil-livell tal-manifattur

3.2.1.Kopertura 

L-Illustrazzjoni 2  tipprovdi ħarsa ġenerali lejn l-għadd ta’ vetturi rrapportati għal kull manifattur fis-sett tad-data tad-dinja reali, kemm qabel kif ukoll wara l-ipproċessar, u sa liema punt tkopri l-vetturi tagħhom irreġistrati għall-ewwel darba fl-2021.

Din turi l-varjabbiltà sinifikanti ħafna fost il-manifatturi. Dan jista’ jiġi spjegat mill-grad differenti sa fejn intużaw l-għażliet disponibbli għall-ġbir tad-data, bi ftit manifatturi biss li jagħmlu użu komprensiv mit-trażmissjoni tad-data ‘over-the-air’. Manifatturi oħrajn ġabru biss data mill-għadd limitat ta’ vetturi li ddaħħlu għal manutenzjoni jew tiswijiet fl-ewwel sena wara r-reġistrazzjoni tagħhom. F’konformità mar-Regolament (UE) 2021/392, il-manifatturi se jkunu meħtieġa jipprovdu raġunijiet għad-data nieqsa dwar il-vetturi bħala parti mir-rapportar tagħhom għas-sena ta’ wara.

Wara l-ipproċessar tad-data, il-kopertura tal-flotta tal-2021 kienet pjuttost ħażina f’din l-ewwel sena tar-rapportar, ħlief għal Jaguar Land Rover (43 %), Ford Werke GmbH (34 %), Mercedes-Benz AG (27 %), Ford Motor Company (27 %) u Volvo (24 %). Il-biċċa l-kbira tal-manifatturi l-oħrajn irrapportaw data għal inqas minn 5 % tal-vetturi tagħhom irreġistrati għall-ewwel darba fl-2021. Għal ċerti manifatturi b’kopertura inizjali għolja qabel l-ipproċessar tad-data, il-filtru ta’ kilometraġġ baxx naqqas għadd sinifikanti ta’ vetturi. Dan kien il-każ għal Volvo u Jaguar Land Rover, li kellhom l-ogħla kopertura inizjali, iżda 70 % u 31 % tal-vetturi rrapportati rispettivi tagħhom kienu nstaqu għal inqas minn 500 km.

Is-sett tad-data finali huwa ddominat minn għadd żgħir ħafna ta’ manifatturi, b’mod partikolari Ford Werke GmbH (22 %) u Mercedes-Benz AG (21 %). Flimkien ma’ Volkswagen (9 %), Volvo (8 %), Renault (7 %) u BMW AG (6 %), dawn jirrappreżentaw 73 % tas-sett tad-data finali għall-karozzi. Is-sett tad-data ta’ vetturi ibridi plug-in jikkonsisti primarjament minn vetturi Mercedes-Benz AG (39 %), Volvo (19 %), u Ford Werke GmbH (16 %).

Illustrazzjoni 2: L-għadd ta’ karozzi għal kull manifattur, qabel u wara l-ipproċessar tad-data: l-għadd totali (xellug) u l-perċentwal tar-reġistrazzjonijiet ġodda totali tal-manifattur fl-2021 (lemin) ( 17 )

3.2.2.Il-medja tal-emissjonijiet ta’ CO2, tal-konsum tal-fjuwil u d-diskrepanza fid-dinja reali

Għal kull manifattur, ġew ikkalkolati l-medja tal-konsum tal-fjuwil u tal-emissjonijiet ta’ CO2 fid-dinja reali, kif ukoll id-diskrepanza mal-valuri medji tad-WLTP.

F’din it-taqsima, ir-riżultati huma ppreżentati biss għal dawk il-manifatturi b’aktar minn 500 vettura rrapportati (għat-tip ta’ sistema tal-motopropulsjoni/fjuwil ikkonċernat). Id-Dokument ta’ Ħidma tal-Persunal jipprovdi dettalji addizzjonali.

Ir-riżultati għal manifatturi differenti jistgħu jiddependu fuq diversi fatturi, li se jeħtieġu analiżi ulterjuri, ibbażata wkoll fuq settijiet ta’ data sussegwenti.

Kif muri fl- Illustrazzjoni 3 , Figure 3id-diskrepanza medja fid-dinja reali għall-karozzi petrol tvarja b’mod pjuttost sinifikanti bejn il-manifatturi, minn 10 % għal 32 %, b’medja ta’ 23,7 %.

Illustrazzjoni 3: Il-medja tal-emissjonijiet ta’ CO2 fid-dinja reali u tal-konsum tal-fjuwil (xellug) u d-diskrepanza (lemin) għal kull manifattur (karozzi petrol)

L-Illustrazzjoni 4 turi li għall-karozzi diżil hemm inqas varjazzjoni bejn il-manifatturi fid-diskrepanza fid-dinja reali, li tvarja minn 15 % sa 27 %, b’medja ta’ 18,1 %.

Illustrazzjoni 4: Il-medja tal-emissjonijiet ta’ CO2 u tal-konsum tal-fjuwil fid-dinja reali (xellug) u tad-diskrepanza (lemin) għal kull manifattur (karozzi diżil)

Għall-vetturi ibridi plug-in li jieħdu l-petrol, kif muri fl- Illustrazzjoni 5 , id-diskrepanza medja għal kull manifattur tvarja minn 170 % sa 345 %, b’medja ta’ 238 %.

Illustrazzjoni 5: Il-medja tal-emissjonijiet ta’ CO2 u tal-konsum tal-fjuwil fid-dinja reali (xellug) u d-diskrepanza (lemin) għal kull manifattur (karozzi elettriċi ibridi plug-in li jieħdu l-petrol)

4.Il-valutazzjoni tal-użu futur tad-data tad-dinja reali

Din it-taqsima tar-rapport tikkostitwixxi l-valutazzjoni tal-Kummissjoni skont l-Artikolu 12(3) tar-Regolament (UE) 2019/631 ta’ kif tista’ tintuża d-data tad-dinja reali biex jiġi żgurat li l-valuri tal-emissjonijiet ta’ CO2 u tal-konsum tal-fjuwil jew tal-enerġija tad-WLTP jibqgħu rappreżentattivi tar-rendiment fid-dinja reali maż-żmien għal kull manifattur.

F’dan l-istadju, għandhom jiġu kkunsidrati l-użi ulterjuri li ġejjin tad-data tad-dinja reali.

4.1.L-iżgurar li l-valuri tad-WLTP jibqgħu rappreżentattivi tal-emissjonijiet fid-dinja reali

L-objettiv ewlieni tal-monitoraġġ tad-data fid-dinja reali huwa li tiġi segwita l-evoluzzjoni tad-diskrepanza fid-dinja reali biex jiġi żgurat li l-valuri tal-emissjonijiet ta’ CO2 tad-WLTP jibqgħu rappreżentattivi tal-emissjonijiet tal-vetturi fid-dinja reali maż-żmien. Jekk id-diskrepanza tikber maż-żmien, din ix-xejra għandha tiġi identifikata mill-aktar fis possibbli u għandhom jittieħdu miżuri biex jiġi żgurat li d-diskrepanza dejjem tikber jew tissolva jew ikkunsidrata b’mod adegwat. Dan jista’ jsir, pereżempju, permezz tal-aġġustament tad-WLTP, il-korrezzjoni tad-data ta’ monitoraġġ tad-WLTP, jew l-iffissar ta’ miri bbażati fuq l-emissjonijiet fid-dinja reali.

Madankollu, f’dan il-punt għadu kmieni wisq biex jiġu identifikati x-xejriet fid-daqs tad-diskrepanza minħabba li d-data hija disponibbli biss għal sena waħda. Għas-snin ta’ wara, se jkun meħtieġ li tinkiseb kopertura aħjar u aktar rappreżentattiva tal-flotta tal-vetturi biex tiġi segwita d-data tad-dinja reali u tinkiseb analiżi adegwata ta’ din id-diskrepanza maż-żmien.

4.2.Reviżjoni tal-fattur ta’ utilità għal vetturi elettriċi ibridi plug-in

L-analiżi tad-data tad-dinja reali tikkonferma li d-diskrepanza fid-dinja reali għal vetturi ibridi plug-in hija ferm ogħla minn dik għall-vetturi konvenzjonali. Raġuni ewlenija għal tali diskrepanza hija l-ispariġġ bejn il-fattur ta’ utilità użat matul l-approvazzjoni tat-tip u x-xejriet attwali tal-iċċarġjar u tas-sewqan tal-vettura.

Sabiex jindirizza dan, ir-Regolament tal-Kummissjoni (UE) 2023/443 diġà introduċa bidliet fil-kalkolu tal-fattur ta’ utilità biex jinġieb eqreb lejn il-kundizzjonijiet tad-dinja reali. Dawn il-bidliet se japplikaw f’żewġ passi konsekuttivi, mill-2025 u l-2027 ’il quddiem. Barra minn hekk, sal-aħħar tal-2024 u abbażi tad-data tad-dinja reali miġbura sa dak iż-żmien, il-Kummissjoni se tirrieżamina l-fattur għat-tieni stadju.

4.3.L-użu ta’ data tad-dinja reali biex tiġi appoġġata l-verifika fis-servizz tal-emissjonijiet ta’ CO2

Fir-rigward tal-verifika fis-servizz, l-Artikolu 13(2) tar-Regolament (UE) 2019/631 jipproponi li jsir użu mid-data mill-apparati tal-OBFCM. Ir-Regolament Delegat (UE) 2023/2867 li jistabbilixxi l-prinċipji gwida għal din il-verifika fis-servizz tal-emissjonijiet ta’ CO2 u r-Regolament ta’ Implimentazzjoni (UE) 2023/2866 li jispeċifika l-proċeduri ta’ verifika ġew adottati reċentement. Dawn jistabbilixxu li d-data tad-dinja reali tista’ tintuża bħala parti mill-valutazzjoni tar-riskju biex tappoġġa l-identifikazzjoni għal liema familji ta’ vetturi jagħmel l-aktar sens li jiġu vverifikati l-emissjonijiet ta’ CO2 tad-WLTP tagħhom.

5.Konklużjonijiet

Ir-rappreżentattività tal-valuri tal-emissjonijiet ta’ CO2 mill-vetturi hija essenzjali għall-integrità ambjentali, it-trasparenza, l-affidabbiltà tas-sistema ta’ monitoraġġ, u għalhekk ukoll għall-fiduċja tal-konsumaturi.

Dan l-ewwel rapport, li jiffoka fuq id-data għall-vetturi rreġistrati għall-ewwel darba fl-2021, jibda proċess ta’ monitoraġġ u rapportar dwar l-implimentazzjoni tal-emissjonijiet ta’ CO2 fid-dinja reali. Fl-ewwel sena, inġabret data tad-dinja reali minn 988 124 vettura, li jkopru 10,6 % tal-karozzi u 1,0 % tal-vannijiet irreġistrati għall-ewwel darba fl-2021. Wara l-ipproċessar tad-data, twettqet analiżi fuq sett ta’ data finali li jikkonsisti f’617 194 karozza (67 % ta’ dawk irrapportati) u 6 667 vann (54 % ta’ dawk irrapportati).

Id-data miġbura f’din l-ewwel sena tippreżenta għadd ta’ limitazzjonijiet f’termini ta’ kopertura, rappreżentattività u kwalità. Skont id-definizzjoni, il-vetturi rrapportati fl-ewwel sena kienu ilhom fit-triq għal inqas minn sena. B’hekk, ħlief għall-manifatturi li jagħmlu użu estensiv mit-trażmissjoni ‘over-the-air’, id-data nġabret biss mill-għadd limitat ta’ vetturi li ddaħħlu għal manutenzjoni jew tiswijiet. Għall-karozzi, is-sett tad-data finali jkopri 7,2 % tal-karozzi l-ġodda rreġistrati għall-ewwel darba fl-UE fl-2021, iżda jikkonsisti prinċipalment minn vetturi minn erba’ manifatturi biss. Huwa għandu wkoll sehem relattivament ogħla ta’ vetturi itqal u vetturi diżil. Għall-vannijiet, fl-2021 ġiet irrapportata data tad-dinja reali limitata ħafna, minħabba li l-maġġoranza l-kbira tagħhom kienu meħtieġa biss li jirreġistraw tali data mill-2022. Għalhekk, l-ebda analiżi rappreżentattiva għall-vannijiet ma kienet possibbli għal din is-sena.

B’mod ġenerali, għall-biċċa l-kbira tal-manifatturi, il-kopertura tal-flotta kienet taħt l-aspettattivi u għandhom jittieħdu passi ulterjuri sabiex din tittejjeb b’mod sinifikanti fis-snin li ġejjin, kemm għall-karozzi kif ukoll għall-vannijiet. F’konformità mar-Regolament (UE) 2021/392, il-manifatturi se jkunu meħtieġa jipprovdu raġunijiet validi għal kwalunkwe data nieqsa dwar il-vetturi bħala parti mir-rapportar tagħhom għas-snin ta’ wara.

Id-diskrepanza medja osservata bejn l-emissjonijiet ta’ CO2 u l-konsum tal-fjuwil fid-dinja reali u tad-WLTP ta’ karozzi ġodda rreġistrati fl-2021 kienet ta’ 23,7 % (34,6 g CO2/km) għall-karozzi petrol u 18,1 % (27,8 g CO2/km) għall-karozzi diżil. Dan jikkonferma li l-qalba mill-NEDC għad-WLTP għad-determinazzjoni tal-valuri uffiċjali tal-emissjonijiet ta’ CO2 u tal-konsum tal-fjuwil naqqset bejn wieħed u ieħor bin-nofs id-diskrepanza fid-dinja reali għall-vetturi konvenzjonali. Għas-sena 2021, id-diskrepanza osservata hija kompatibbli mas-suppożizzjonijiet għad-diskrepanza tal-2021 li saru fil-Valutazzjonijiet tal-Impatt li jirfdu r-reviżjoni tal-istandards tas-CO2.

Madankollu, il-konsum tal-fjuwil fid-dinja reali esperjenzat mis-sewwieqa għadu madwar għoxrin fil-mija ogħla minn dak li juru d-dokumenti uffiċjali tal-approvazzjoni tat-tip, u huwa importanti li l-pubbliku jiġi informat b’dan.

Din id-diskrepanza tidher li hija partikolarment wiesgħa għal vetturi itqal, bħal SUVs u vetturi lussużi, li l-emissjonijiet tagħhom huma diġà ferm akbar minn ta’ karozzi oħrajn. Din id-diskrepanza akbar tista’ taggrava l-impatti ta’ xejriet usa’ tal-flotta osservati, fejn id-daqsijiet u l-piżijiet medji tal-vetturi kienu qed jiżdiedu, u b’hekk jitnaqqsu l-effetti tat-titjib fl-effiċjenza fl-użu tal-fjuwil. Ir-rabta bejn id-diskrepanza u l-massa tal-vetturi se jkollha tiġi mmonitorjata mill-qrib fis-snin li ġejjin.

Għal vetturi elettriċi ibridi plug-in rreġistrati fl-2021, l-emissjonijiet ta’ CO2 fid-dinja reali kienu bħala medja tliet darbiet u nofs (100 g CO2/km) ogħla minn dawk tad-WLTP, li jikkonferma li dawn il-vetturi bħalissa ma humiex qed jilħqu l-potenzjal tagħhom, b’mod partikolari minħabba li mhux qed jiġu ċċarġjati u misjuqa kompletament bl-elettriku kif preżunt ta’ spiss. Sabiex tkun tirrifletti aħjar is-sitwazzjoni tad-dinja reali, il-Kummissjoni diġà introduċiet bidliet fil-kalkolu tal-fattur ta’ utilità użat għall-proċedura tal-ittestjar uffiċjali, li se tapplika mill-2025, u jista’ jkun li jkollha bżonn tiġi aġġustata aktar abbażi ta’ data tad-dinja reali.

Filwaqt li din l-ewwel data għadha ma hijiex wiesgħa jew rappreżentattiva biżżejjed biex jinsiltu konklużjonijiet sodi, hija tipprovdi għarfien preliminari siewi għall-emissjonijiet tal-karozzi, fil-mod kif l-emissjonijiet tas-CO2 uffiċjali u tad-dinja reali jitqabblu bejn it-tipi ta’ vetturi u l-manifatturi.

(1) ()     https://www.eea.europa.eu/data-and-maps/data/data-viewers/greenhouse-gases-viewer  
(2) ()    COM/2019/640 final, 11.12.2019
(3) ()    Ir-Regolament (UE) 2019/631 tal-Parlament Ewropew u tal-Kunsill tas-17 ta’ April 2019 li jistabbilixxi standards ta’ rendiment fir-rigward tal-emissjonijiet ta’ CO2 tal-karozzi ġodda tal-passiġġieri u tal-vetturi kummerċjali ħfief ġodda, u li jħassar ir-Regolament (KE) Nru 443/2009 u (UE) Nru 510/2011 (ĠU L 111, 25.4.2019, p. 13)
(4) ()    Ir-Regolament tal-Kummissjoni (UE) 2017/1151 tal-1 ta' Ġunju 2017 li jissupplimenta r-Regolament (KE) Nru 715/2007 tal-Parlament Ewropew u tal-Kunsill dwar l-approvazzjoni tat-tip ta' vetturi bil-mutur fir-rigward tal-emissjonijiet ta' vetturi ħfief għall-passiġġieri u ta' vetturi kummerċjali (Euro 5 u Euro 6) u dwar l-aċċess għal informazzjoni dwar it-tiswija u l-manutenzjoni tal-vetturi, li jemenda d-Direttiva 2007/46/KE tal-Parlament Ewropew u tal-Kunsill, ir-Regolament tal-Kummissjoni (KE) Nru 692/2008 u r-Regolament tal-Kummissjoni (UE) Nru 1230/2012 u li jħassar ir-Regolament tal-Kummissjoni (KE) Nru 692/2008 (ĠU L 175, 7.7.2017, p. 1).
(5) ()    Il-proċeduri għall-ġbir u r-rapportar ta’ din id-data “fid-dinja reali” u għat-tqabbil tagħha mad-data korrispondenti tad-WLTP huma stabbiliti fir-Regolament ta’ Implimentazzjoni tal-Kummissjoni (UE) 2021/392 (ĠU L 77, 5.3.2021, p. 8)
(6) ()    Id-Deċiżjoni ta’ Implimentazzjoni tal-Kummissjoni (UE) 2023/1623 tat-3 ta’ Awwissu 2023 li tispeċifika l-valuri relatati mal-prestazzjoni tal-manifatturi u tal-konsorzji ta’ manifatturi ta’ karozzi ġodda tal-passiġġieri u ta’ vetturi kummerċjali ħfief ġodda għas-sena kalendarja 2021 u l-valuri li għandhom jintużaw għall-kalkolu tal-miri tal-emissjonijiet speċifiċi mill-2025 ’il quddiem, skont ir-Regolament (UE) 2019/631 tal-Parlament Ewropew u tal-Kunsill, u li tikkoreġi d-Deċiżjoni ta’ Implimentazzjoni (UE) 2022/2087 (ĠU L 111, 25.4.2019, p. 13.)
(7) ()    SWD(2024) 59
(8) ()    F’konformità mal-Artikolu 12 tar-Regolament ta’ Implimentazzjoni (UE) 2021/392.
(9) ()    L-għadd totali ta’ karozzi u vannijiet ġodda msemmija ma jinkludux vetturi li ma humiex fil-kamp ta’ applikazzjoni għall-OBFCM (vetturi elettriċi puri, vetturi elettriċi b’ċellola tal-fjuwil, vetturi li jaħdmu bil-gass naturali), u vetturi E85.
(10) ()    59 714-il vettura ma setgħux jitqabblu mad-data tad-WLTP tal-2021.
(11) ()    Id-data għandha tinġabar mill-manifatturi jew “over-the-air” permezz ta’ trasferiment dirett tad-data mill-vettura, jew, meta d-data ma tinġabarx b’dan il-mod, id-data għandha tinġabar kull darba li l-vettura tiddaħħal għal manutenzjoni jew tiswijiet, sakemm is-sid tal-vettura ma jirrifjutax espressament li jagħmel dik id-data disponibbli. Ara wkoll it-Taqsima 3.2.1.
(12) ()    Ara n-nota 9, il-paġna 2.
(13) ()    Id-diskrepanza hija espressa hawnhekk bħala devjazzjoni f’% tal-emissjonijiet tas-CO2 tad-dinja reali mill-valur tal-CO2 tad-WLTP, fejn devjazzjoni posittiva tindika li tal-ewwel ikunu akbar. Hija l-istess kemm għall-emissjonijiet tas-CO2 kif ukoll għall-konsum tal-fjuwil, ħlief għall-każijiet li jikkombinaw il-valuri tal-petrol u tad-diżil, fejn tintwera d-diskrepanza tas-CO2.
(14) ()    Pavlovic, J., Clairotte, M., Anagnostopoulos, K., Arcidiacono, V., Fontaras, G. u Ciuffo, B., Characterisation of real-world CO2 variability and implications for future policy instruments, EUR 28734 EN, l-Uffiċċju tal-Pubblikazzjonijiet tal-Unjoni Ewropea, il-Lussemburgu, 2017, ISBN 978-92-79-72096-3, doi:10.2760/839690, JRC107796.
(15) ()    SWD(2017)650 final u SWD(2021)613 final.
(16) () Chatzipanagi, A., Pavlovic, J., Ktistakis, M., Komnos, D. u Fontaras, G., Evolution of European light-duty vehicle CO2 emissions based on recent certification datasets, Riċerka dwar it-Trasport, il-Parti D-It-Trasport u l-Ambjent, ISSN 1361-9209, 107, 2022, p. 103287, JRC127295.
(17) ()    Fl-Illustrazzjonijiet kollha fit-Taqsima  3.2 , il-manifatturi jintwerew f’ordni dejjem tonqos tal-għadd ta’ vetturi tagħhom fis-sett tad-data finali.