(1)

L-Artikolu 4 tar-Regolament (UE) Nru 978/2012 jistabbilixxi l-kriterji għall-għoti tal-preferenzi tariffarji skont l-arranġament ġenerali tal-Iskema Ġeneralizzata ta’ Preferenzi (“SĠP”).

(2)

Il-punt (a) tal-Artikolu 4(1) tar-Regolament (UE) Nru 978/2012 jipprevedi li pajjiż li jkun ġie kklassifikat mill-Bank Dinji bħala pajjiż b’introjtu għoli jew medju superjuri għal 3 snin konsekuttivi jenħtieġ li ma jibbenefikax mis-SĠP.

(3)

Il-lista tal-pajjiżi benefiċjarji taħt is-SĠP hija stabbilita fl-Anness II tar-Regolament (UE) Nru 978/2012. Skont dak ir-Regolament, il-Kummissjoni għandha tirrieżamina l-Anness II sal-1 ta’ Jannar ta’ kull sena sabiex temenda l-istatus tal-pajjiżi elenkati f’konformità mal-kriterji stabbiliti fl-Artikolu 4 ta’ dak ir-Regolament.

(4)

Skont l-Artikolu 5(2) tar-Regolament (UE) Nru 978/2012, pajjiż benefiċjarju tas-SĠP u l-operaturi ekonomiċi għandhom jingħataw biżżejjed żmien għal adattament xieraq għar-reviżjoni tal-istatus tas-SĠP tal-pajjiż. Għalhekk, id-deċiżjoni li pajjiż benefiċjarju jitneħħa mil-lista tal-pajjiżi benefiċjarji tas-SĠP abbażi tal-Artikolu 4(1)(a), għandha tapplika minn sena wara d-data tad-dħul fis-seħħ ta’ dik id-deċiżjoni.

(5)

L-Indoneżja ġiet ikklassifikata mill-Bank Dinji bħala pajjiż b’introjtu medju superjuri fl-2023, fl-2024 u fl-2025. Għaldaqstant, l-Indoneżja ma għadhiex tikkwalifika għal status ta’ pajjiż benefiċjarju tas-SĠP f’konformità mal-Artikolu 4(1)(a) tar-Regolament (UE) Nru 978/2012 u jenħtieġ li titneħħa mil-lista tal-pajjiżi benefiċjarji tas-SĠP fl-Anness II ta’ dak ir-Regolament, b’applikazzjoni mill-1 ta’ Jannar 2027.

(6)

Skont l-Artikolu 17(1) tar-Regolament (UE) Nru 978/2012, pajjiż li jkun identifikat min-Nazzjonijiet Uniti (“NU”) bħala pajjiż l-anqas żviluppat jenħtieġ li jibbenefika mill-preferenzi tariffarji previsti skont l-arranġament speċjali ta’ Kollox Minbarra Armi (“KMA”) għall-pajjiżi l-anqas żviluppati. Il-lista tal-pajjiżi benefiċjarji tal-KMA hija stabbilita fl-Anness IV tar-Regolament (UE) Nru 978/2012.

(7)

In-NU ggradwat lil São Tomé u Príncipe mill-kategorija ta’ pajjiż l-anqas żviluppat fit-13 ta’ Diċembru 2024. Għalhekk, São Tomé u Príncipe ma għadhomx jikkwalifikaw għal status ta’ benefiċjarju tal-KMA skont l-Artikolu 17(1) tar-Regolament (UE) Nru 978/2012 u jenħtieġ li jitneħħew mill-Anness IV ta’ dak ir-Regolament. F’konformità mal-Artikolu 17(2) tar-Regolament (UE) Nru 978/2012, l-att delegat li jneħħi lil São Tomé u Príncipe mil-lista tal-pajjiżi benefiċjarji tal-KMA jenħtieġ li japplika wara perjodu tranżitorju ta’ 3 snin mid-data li fiha jidħol fis-seħħ dak l-att delegat. São Tomé u Príncipe, għalhekk, jenħtieġ li jitneħħew mill-Anness IV, b’effett mill-1 ta’ Jannar 2029.

(8)

Skont l-Artikolu 9(1), il-punt (a) tar-Regolament (UE) Nru 978/2012, pajjiż li jibbenefika mis-SĠP jista’ jibbenefika mill-preferenzi tariffarji mogħtija skont l-arranġament speċjali ta’ inċentivi għal żvilupp sostenibbli u governanza tajba jekk jitqies bħala vulnerabbli minħabba nuqqas ta’ diversifikazzjoni u integrazzjoni mhux suffiċjenti fis-sistema tal-kummerċ internazzjonali, kif definit fl-Anness VII tar-Regolament (UE) Nru 978/2012.

(9)

Skont il-punt 1(b) tal-Anness VII tar-Regolament (UE) Nru 978/2012, kif emendat bir-Regolamenti Delegati tal-Kummissjoni (UE) 2015/602 (2) u (UE) 2020/129 (3), biex pajjiż jitqies vulnerabbli, l-importazzjonijiet ta’ prodotti elenkati fl-Anness IX fl-Unjoni minn dak il-pajjiż jenħtieġ li jirrappreżentaw inqas mil-limitu ta’ 7,4 % fil-valur tal-importazzjonijiet totali mill-pajjiżi benefiċjarji tas-SĠP fl-Unjoni, bħala medja matul l-aħħar 3 snin konsekuttivi.

(10)

F’konformità mal-Artikolu 9(2) tar-Regolament (UE) Nru 978/2012, fejn il-lista tal-pajjiżi benefiċjarji tas-SĠP fl-Anness II tiġi emendata, il-Kummissjoni għandha s-setgħa li tadotta atti delegati biex temenda l-Anness VII sabiex tirrieżamina l-limitu ta’ vulnerabbiltà definit fil-punt 1(b) tal-Anness VII. Tali rieżami għandu l-għan li jżomm proporzjonalment l-istess piż tal-limitu ta’ vulnerabbiltà kif ikkalkolat f’konformità mal-Anness VII, filwaqt li jqis l-emendi preċedenti tal-lista tal-pajjiżi benefiċjarji tas-SĠP.

(11)

L-aħħar rieżami skont ir-Regolament Delegat (UE) 2020/129 żied il-limitu ta’ vulnerabbiltà minn 6,5 % għal 7,4 % applikabbli mill-1 ta’ Jannar 2019.

(12)

Bejn l-1 ta’ Jannar 2019 u l-1 ta’ Jannar 2023, il-lista tal-benefiċjarji tas-SĠP fl-Anness II tar-Regolament (UE) Nru 978/2012 ġiet emendata sostanzjalment, peress li ħames pajjiżi tneħħew mill-Anness II. Għalhekk huwa meħtieġ li l-limitu ta’ vulnerabbiltà stabbilit fil-punt 1(b) tal-Anness VII tar-Regolament (UE) Nru 978/2012 jiġi rieżaminat.

(13)

B’riżultat tal-emendi tal-lista tal-benefiċjarji tas-SĠP fl-Anness II tar-Regolament (UE) Nru 978/2012 bejn l-1 ta’ Jannar 2019 u l-1 ta’ Jannar 2023, l-importazzjonijiet totali fl-Unjoni tal-prodotti elenkati fl-Anness IX mill-pajjiżi benefiċjarji kollha tas-SĠP meħuda bħala medja naqsu bi 17,5 %. Żieda fil-limitu ta’ vulnerabbiltà minn 7,4 % għal 9 %, applikabbli minn meta bdew japplikaw l-emendi tal-Anness II, jiġifieri mill-1 ta’ Jannar 2023, iżżomm proporzjonalment l-istess piż tal-limitu ta’ vulnerabbiltà kif stabbilit fl-Anness VII tar-Regolament (UE) Nru 978/2012,

(1)

Fl-Anness II, taħt l-intestatura “Pajjiżi benefiċjarji tal-arranġament ġenerali msemmi fil-punt (a) tal-Artikolu 1(2)”, il-kodiċijiet alfabetiċi u l-pajjiżi korrispondenti li ġejjin jitneħħew mill-kolonni A u B, rispettivament:

“ID L-Indoneżja”;

(2)

Fl-Anness IV, taħt l-intestatura “Pajjiżi benefiċjarji tal-arranġament speċjali għall-pajjiżi l-anqas żviluppati msemmi fil-punt (c) tal-Artikolu 1(2)”, il-kodiċijiet alfabetiċi u l-pajjiżi korrispondenti li ġejjin jitneħħew mill-kolonni A u B, rispettivament:

“ST São Tomé u Príncipe”;

(3)

Fil-punt 1(b) tal-Anness VII, il-limitu “7,4 %” huwa sostitwit b’“9 %”.