(1)

Ir-Regolament ta’ Implimentazzjoni tal-Kummissjoni (UE) 2022/1941 (2) jelenka l-pesti li, skont l-Artikolu 30(1) tar-Regolament (UE) 2016/2031, huma temporanjament ipprojbiti milli jiġu introdotti, jiġu mċaqilqa, jew miżmuma, immultiplikati jew rilaxxati fit-territorju tal-Unjoni.

(2)

Minn Ġunju 2021 sa Diċembru 2023, diversi Stati Membri nnotifikaw lill-Kummissjoni dwar il-preżenza kkonfermata uffiċjalment, fil-kunsinni ta’ pjanti, prodotti tal-pjanti u oġġetti oħrajn li joriġinaw minn pajjiżi terzi, ta’ pesti li mhumiex elenkati bħala pesti ta’ kwarantina fl-Unjoni, pesti ta’ kwarantina f’żona protetta jew pesti regolati mhux ta’ kwarantina fl-Unjoni, fir-Regolament ta’ Implimentazzjoni tal-Kummissjoni (UE) 2019/2072 (3), u mhumiex regolati skont l-Artikolu 30(1) tar-Regolament (UE) 2016/2031.

(3)

Homona magnanima huwa fost il-pesti li għalihom ittieħdu miżuri mill-Ġermanja, skont l-Artikolu 29(1) tar-Regolament (UE) 2016/2031. Ġie interċettat xi drabi fil-fruntieri tal-Unjoni u mhux magħruf li huwa preżenti fit-territorju tal-Unjoni.

(4)

Il-Ġermanja wettqet valutazzjoni preliminari tar-riskju għall-Homona magnanima (4) għat-territorju tal-Unjoni. Tikkonkludi li l-pest jissodisfa l-kriterji għall-pesti ta’ kwarantina fl-Unjoni stabbiliti fit-Taqsima 3, is-Subtaqsima 2 tal-Anness I tar-Regolament (UE) 2016/2031 u għalhekk jenħtieġ li jkun soġġett għal miżuri temporanji f’konformità mal-Artikolu 30(1) tar-Regolament (UE) 2016/2031. Peress li l-pjanti ospitanti ta’ dak il-pest jibqgħu jiġu importati minn pajjiżi fejn ikun magħruf li huwa preżenti, dan jippreżenta riskju fitosanitarju għat-territorju tal-Unjoni. Madankollu, hija meħtieġa valutazzjoni tar-riskju ulterjuri biex jiġi ddeterminat jekk Homona magnanima jikkwalifikax bħala pest ta’ kwarantina fl-Unjoni u għandux jiġi elenkat fl-Anness II tar-Regolament ta’ Implimentazzjoni (UE) 2019/2072. Għalhekk huwa xieraq li jiġu pprojbiti temporanjament l-introduzzjoni, il-moviment, u ż-żamma, il-multiplikazzjoni u r-rilaxx fl-Unjoni, sakemm titwettaq analiżi tar-riskju sħiħa.

(5)

Barra minn hekk, il-pest Leucinodes orbonalis inizjalment ġie inkluż fl-Anness tar-Regolament ta’ Implimentazzjoni (UE) 2022/1941, abbażi ta’ kategorizzazzjoni tal-pesti mwettqa mill-Awtorità Ewropea dwar is-Sigurtà fl-Ikel (“l-Awtorità”). L-Awtorità tat opinjoni xjentifika dwar valutazzjoni sħiħa tar-riskju tal-pesti tal-Leucinodes orbonalis (5) fl-2024. L-Awtorità kkonkludiet li l-probabbiltà tal-istabbiliment u l-impatt mistenni tal-pest fl-Unjoni, kienu baxxi ħafna. Fid-dawl tal-opinjoni tal-Awtorità, jixraq li jiġi konkluż li l-pest Leucinodes orbonalis ma joħloqx riskju fitosanitarju inaċċettabbli għat-territorju tal-Unjoni u għalhekk ma jissodisfax il-kriterji għall-pesti ta’ kwarantina fl-Unjoni stabbiliti fit-Taqsima 1, u lanqas fit-Taqsima 3 is-Subtaqsima 2 tal-Anness I tar-Regolament (UE) 2016/2031, fir-rigward tat-territorju tal-Unjoni. Għalhekk, jenħtieġ li ma tibqax soġġetta għall-miżuri temporanji adottati skont l-Artikolu 30 tar-Regolament (UE) 2016/2031.

(6)

Għalhekk, l-Anness tar-Regolament ta’ Implimentazzjoni (UE) 2022/1941 jenħtieġ li jiġi emendat skont dan.

(7)

Id-dispożizzjonijiet ta’ dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,