(1)

Liostaítear i Rialachán Cur Chun Feidhme (AE) 2022/1941 ón gCoimisiún (2) na lotnaidí a bhfuil toirmeasc sealadach orthu, de bhun Airteagal 30(1) de Rialachán (AE) 2016/2031, a thabhairt isteach i gcríoch an Aontais, a ghluaiseacht laistigh di, nó a choinneáil, a iolrú nó a scaoileadh inti.

(2)

Ó mhí an Mheithimh 2021 go dtí mí na Nollag 2023, maidir le lotnaidí nach liostaítear mar lotnaidí coraintín de chuid an Aontais, mar lotnaidí coraintín de chuid na gcriosanna cosanta nó mar lotnaidí neamhchoraintín rialáilte de chuid an Aontais, thug roinnt Ballstát fógra don Choimisiún go raibh na lotnaidí sin deimhnithe i gcoinsíneachtaí plandaí, táirgí plandaí agus réada eile de thionscnamh tríú tíortha, i Rialachán Cur Chun Feidhme (AE) 2019/2072 ón gCoimisiún (3) agus nach rialaítear faoi Airteagal 30(1) de Rialachán (AE) 2016/2031.

(3)

Tá Homona magnanima ar cheann de na lotnaidí a bhfuil bearta déanta ag an nGearmáin ina leith, de bhun Airteagal 29(1) de Rialachán (AE) 2016/2031. Rinneadh í a idircheapadh cúpla uair ag teorainneacha an Aontais agus ní heol go bhfuil sí i láthair ar chríoch an Aontais.

(4)

Rinne an Ghearmáin réamh-mheasúnú riosca ar Homona magnanima (4) do chríoch an Aontais. Tagtar ar an gconclúid ann go gcomhlíonann an lotnaid na critéir le haghaidh lotnaidí coraintín de chuid an Aontais a leagtar amach i Roinn 3, Foroinn 2 d’Iarscríbhinn I a ghabhann le Rialachán (AE) 2016/2031 agus gur cheart, dá bhrí sin, í a bheith faoi réir bearta sealadacha i gcomhréir le hAirteagal 30(1) de Rialachán (AE) 2016/2031. Ós rud é go leantar de phlandaí óstacha na lotnaide sin a allmhairiú ó thíortha arb eol go bhfuil sí i láthair iontu, tá riosca fíteashláintíochta ag baint léi le haghaidh chríoch an Aontais. Tá gá le measúnú riosca breise, áfach, chun a chinneadh an gcáilíonn Homona magnanima mar lotnaid choraintín de chuid an Aontais agus an bhfuil sí le liostú in Iarscríbhinn II a ghabhann le Rialachán Cur Chun Feidhme (AE) 2019/2072. Dá bhrí sin, is iomchuí toirmeasc sealadach a chur ar an lotnaid sin a thabhairt isteach san Aontas, a ghluaiseacht laistigh den Aontas, a choinneáil, a iolrú agus a scaoileadh san Aontas, go dtí go mbeidh anailís riosca iomlán déanta.

(5)

Thairis sin, áiríodh an lotnaid Leucinodes orbonalis ar dtús san Iarscríbhinn a ghabhann le Rialachán Cur Chun Feidhme (AE) 2022/1941, ar bhonn catagóiriú lotnaide a rinne an tÚdarás Eorpach um Shábháilteacht Bia (‘an tÚdarás’). Thug an tÚdarás tuairim eolaíoch uaidh maidir le measúnú iomlán riosca lotnaide ar Leucinodes orbonalis (5) in 2024. Tháinig an tÚdarás ar an gconclúid gur an-íseal a bhí an dóchúlacht go mbunófaí an lotnaid agus go mbeadh tionchar ionchasach an-bheag aici san Aontas. I bhfianaise thuairim an Údaráis, is iomchuí teacht ar an gconclúid nach bhfuil riosca fíteashláintíochta do-ghlactha ag baint leis an lotnaid Leucinodes orbonalis le haghaidh chríoch an Aontais agus, dá bhrí sin, nach gcomhlíonann sí na critéir maidir le lotnaidí coraintín de chuid an Aontais a leagtar amach i Roinn 1, ná i Roinn 3, Foroinn 2 d’Iarscríbhinn I a ghabhann le Rialachán (AE) 2016/2031, a mhéid a bhaineann le críoch an Aontais. Dá bhrí sin, níor cheart é a bheith faoi réir na mbeart sealadach a thuilleadh arna nglacadh de bhun Airteagal 30 de Rialachán (AE) 2016/2031.

(6)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2022/1941 a leasú dá réir.

(7)

Tá forálacha an Rialacháin seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,