LM2007118MT.01024801.xml

DEĊIŻJONI TAL-KUMMISSJONI

tat-13 ta' Frar 2006

li teħtieġ li l-Istati Membri temporanjament jieħdu miżuri kontra t-tixrid tal-Bursaphelenchus xylophilus (Steiner et Buhrer) Nickle et al. (in-nematodu tal-pini) f'dak li jirrigwardja żoni fil-Portugall, apparti minn dawk li fihom huwa magħruf li ma teżistix

(innotifikata taħt dokument numru C(2006) 345)

(2006/133/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità, ta' organiżmi ta' ħsara għall-prodotti tal-pjanti, u kontra t-tixrid tagħhom fil-Komunità (1), u b'mod partikolari l-Artikolu 16 (3) tagħha,

Billi:

(1)

Fejn Stat Membru jikkonsidra li hemm periklu imminenti ta' l-introduzzjoni fit-territorju tiegħu tal-Bursaphelenchus xylophilus (Steiner et Buhrer) Nickle et al., (in-nematodu tal-pini (the pine wood nematode (PWN)), minn Stat Membru ieħor, għandu temporanjament jkun awtorizzat li jieħu kull miżura addizzjonali meħtieġa biex tħarsu minn dak il-periklu.

(2)

Il-Portugall informa lill-Istati Membri l-oħra u lill-Kummissjoni fil-25 ta' Ġunju 1999 li xi kampjuni ta' siġar tal-pini li oriġinaw fit-territorju tiegħu kienu identifikati b'infestazzjoni tal-PWN. Il-Kummissjoni adottat id-Deċiżjonijiet 2000/58/KE (2) u 2001/218/KE (3) li jiddefinixxu l-miżuri li għandhom jittieħdu kontra l-PWN.

(3)

Fuq il-bażi tal-valutazzjonijiet mill-Uffiċċju Alimentari u Veterinarju, l-aktar reċenti dik ta' Novembru 2004, ta' l-informazzjoni addizzjonali ppreżentata mill-Portugall u ta' l-istħarriġ uffiċjali mwettaq minn Stati Membri oħra dwar l-injam, il-qoxra iżolata tas-siġar u l-pjanti tal-Abies Mill., Cedrus Trew, Larix Mill., Picea A. Dietr., Pinus L., Pseudotsuga Carr. u Tsuga Carr., jidher li bħala riżultat ta' l-applikazzjoni ta' programm ta' eradikazzjoni fil-Portugall, it-tixrid tal-PWN jibqa' limitat fiż-żoni demarkati fil-Portugall. Madankollu, is-siġar li juru s-sintomi ta' infestazzjoni mill-PWN baqgħu jinstabu matul l-istħarriġ ta' dawk iż-żoni.

(4)

L-implimentazzjoni tal-pjan ta' eradikazzjoni Portugiż tal-PWN ta' Frar 2003 għal medda ta' żmien medju, hekk kif emendat f'Ġunju 2003, ġie evalwat mill-Kumitat Permanenti dwar is-Saħħa tal-Pjanti fil-laqgħat tiegħu f'Lulju 2004 u Mejju 2005. Matul l-aħħar laqgħa ġie konkluż li t-tnaqqis immirat fil-livell ta' infezzjoni fiż-żoni demarkati għadu ma nkisibx.

(5)	Għalhekk, jeħtieġ li l-Portugall ikompli jieħu miżuri speċifiċi fir-rigward taċ-ċaqliq ta' l-injam, il-qoxra iżolata tas-siġar u l-pjanti ospitanti fi ħdan iż-żoni demarkati fil-Portugall u minn dawn iż-żoni f'żoni oħra tal-Portugall u fi Stati Membri oħra.

(6)	Jeħtieġ ukoll li l-Portugall ikompli jieħu miżuri speċifiċi biex jikkontrolla t-tixrid tal-PWN bil-għan li jinqered. Għalhekk, għandu jitressaq pjan aġġornat ta' eradikazzjoni fuq medda ta' żmien medju biex itejjeb il-kontroll tat-tixrid tal-PWN bil-għan li jinqered.

(7)	L-Istati Membri l-oħra għandhom ikomplu jkollhom il-possibilità li japplikaw miżuri addizzjonali biex jipproteġu t-territorji tagħhom mill-PWN.

(8)	Ir-riżultati tal-miżuri speċifiċi u ta' l-implimentazzjoni tal-pjan fuq medda ta' żmien medju għandhom ikunu valutati kontinwament, b'mod partikolari fuq il-bażi ta' informazzjoni pprovduta mill-Portugall u mill-Istati Membri l-oħra.

(9)	Il-miżuri stipolati f'din id-Deċiżjoni huma f'konformità ma' l-opinjoni tal-Kumitat Permanenti dwar is-Saħħa tal-Pjanti,

ADOTTAT DIN ID-DEĊIŻJONI:

Artikolu 1

Għar-raġunijiet ta' din id-Deċiżjoni, id-definizzjonijiet li ġejjin għandhom japplikaw:

(a)	“in-nematodu tal-pini (PWN)”: Bursaphelenchus xylophilus (Steiner et Buhrer) Nickle et al.;

(b)	“injam u qoxra tas-siġar suxxettibbli”: injam u qoxra tas-siġar iżolata tal-koniferi (Coniferales), ħlief għal dawk ta' Thuja L.;

(c)	“pjanti suxxettibbli”: tfisser pjanti (ħlief għal frott u żrieragħ) ta' l-Abies Mill., Cedrus Trew, Larix Mill., Picea A. Dietr., Pinus L., Pseudotsuga Carr. u Tsuga Carr.;

Artikolu 2

Sal-31 ta' Marzu 2008, il-Portugall għandu jassigura li jintlaħqu l-kundizzjonijiet stabbiliti fl-Anness ma' din id-Deċiżjoni fir-rigward ta' l-injam, il-qoxra tas-siġar u l-pjanti suxxettibbli, li għandhom jiċċaqalqu fi jew minn żoni demarkati fil-Portugall u definiti skond l-Artikolu 5, lejn żoni oħra fil-Portugall jew Stati Membri oħra.

Sal-15 ta' Frar 2006, il-Portugall għandu jressaq pjan aġġornat ta' eradikazzjoni fuq medda ta' żmien medju biex jikkontrolla t-tixrid tal-PWN bil-għan li jinqered. Dak il-pjan għandu jinkludi dettalji dwar il-ġestjoni, f'żoni demarkati, ta' speċijiet ta' siġar magħrufa bħala suxxettibbli ħafna għall-PWN skond il-kundizzjonijiet fil-Portugall. Dam il-pjan għandu jiġi rivedut sat-30 ta' April 2007 u t-30 ta' Marzu 2008.

Artikolu 3

L-Istati Membri destinatarji għajr il-Portugall jistgħu:

(a)	jissottomettu l-konsenji ta' injam, qoxra tas-siġar u pjanti suxxettibbli, li ġejjin minn żoni demarkati fil-Portugall u li ċċaqalqu fit-territorju tagħhom, għat-test għall-preżenza tal-PWN;

(b)	jieħdu iktar passi xierqa biex iwettqu monitoraġġ uffiċjali fir-rigward ta' dawn il-konsenji, biex jaċċertaw jekk jikkonformawx mal-kundizzjonijiet relevanti speċifikati fl-Anness.

Artikolu 4

L-Istati Membri għandhom imexxu stħarriġ uffiċjali annwali għall-PWN, fuq injam u qoxra tas-siġar suxxettibbli u pjanti suxxettibbli li joriġinaw minn pajjiżhom, biex jiddeterminaw jekk hemmx prova ta' infestazzjoni mill-PWN.

Mingħajr preġudizzju għall-Artikolu 16(1) tad-Direttiva 2000/29/KE, ir-riżultati ta' dawk l-istħarriġiet għandhom jiġu nnotifikati lill-Istati Membri l-oħra u lill-Kummissjoni sal-15 ta' Diċembru 2006 u l-15 ta' Diċembru 2007.

Artikolu 5

Il-Portugall għandu jistabbilixxi żoni li hu magħruf li fihom hemm il-PWN, u jiddemarka żoni (minn hawn 'il quddiem imsejħa żoni demarkati) li jikkonsistu f'parti fejn hu magħruf li hemm il-PWN u parti indikata bħala żona buffer ta' mhux anqas minn 20 km ta' wisa' madwar dik il-parti, filwaqt li jitqiesu r-riżultati ta' l-istħarriġ imsemmija fl-Artikolu 4.

Il-Kummissjoni għandha tiġbor f'lista ż-“żoni” li huwa magħruf li fihom hemm il-PWN u twassal din il-lista lill-Kumitat Permanenti dwar is-Saħħa tal-Pjanti u lill-Istati Membri. Kull żona fil-Portugall li ma tinsabx fil-lista msemmija hawn fuq, għandha titqies bħala żona demarkata.

Il-lista għandha tiġi aġġornata skond ir-riżultati ta' l-istħarriġiet imsemmija fl-ewwel paragrafu ta' l-Artikolu 4 u s-sejbiet notifikati skond l-Artikolu 16(1) tad-Direttiva 2000/29/KE.

Artikolu 6

Id-Deċiżjoni 2001/218/KE hija revokata permezz ta' din id-Deciżjoni.

Artikolu 7

Din id-Deċiżjoni hija indirizzata lill-Istati Membri.

Magħmula fi Brussell, 13 ta' Frar 2006.

Għall-Kummissjoni

Markos KYPRIANOU

Membru tal-Kummissjoni

(1) ĠU L 169, ta' l-10.7.2000, p. 1. Direttiva kif emendata l-aħħar bid-Direttiva tal-Kummissjoni 2005/77/KE (ĠU L 296, tat-12.11.2005, p. 17).

(2) ĠU L 21, tas-26.1.2000, p. 36.

(3) ĠU L 81, tal-21.3.2001, p. 34. Deċiżjoni kif emendata l-aħħar bid-Deċiżjoni Nru 2003/127/KE (ĠU L 50, tal-25.3.2003, p. 27).

ANNESS

Għar-raġunijiet ta' l-Artikolu 2, għandu jkun hemm konformità mal-kundizzjonijiet li ġejjin:

Mingħajr preġudizzju għad-dispożizzjonijiet imsemmija fi (2) fil-każ taċ-ċaqliq minn żoni demarkati f'żoni fil-Portugall, għajr żoni demarkati jew fi Stati Membri oħra ta':

(a)

pjanti suxxettibbli li għandhom ikunu akkumpanjati minn passport għall-pjanti mħejji u maħruġ skond id-dispożizzjonijiet tad-Direttiva tal-Kummissjoni 92/105/KEE (1), wara li:

—	il-pjanti ġew uffiċjalment spezzjonati u misjuba ħielsa minn sinjali jew sintomi ta' PWN u

—	l-ebda sintomu ta' PWN ma ġie osservat fil-post ta' produzzjoni jew fil-viċinanzi immedjati mill-bidu ta' l-aħħar ċiklu komplut tal-veġetazzjoni;

(b)

injam suxxetibbli u qoxra tas-siġar iżolata, għajr l-injam fl-għamla ta':

—	laqx, partiċelli, skart ta' l-injam jew skart miksub fi sħiħ jew f'parti minn dawn il-koniferi,

—	kaxxi ta' l-ippakkjar, qratel jew tankijiet,

—	palletta, palletti tal-kaxxa jew load boards oħra,

—	serratura, spacers u irfid,

iżda li jinkludi dak li ma żammx il-wiċċ tond naturali tiegħu, għandu jkun akkumpanjat minn passport għall-pjanti msemmi fil-punt 1(a) hawn fuq, wara li l-injam jew l-qoxra tas-siġar iżolata jkun/tkun għadda/għaddiet minn trattament xieraq ta' sħana biex jilħaq/tilħaq temperatura minima fil-qalba ta' l-injam ta' 56 oC għal 30 minuta sabiex ikun assigurat il-ħelsien minn PWNs ħajjin;

(c)	injam suxxettibbli, fl-għamla ta' laqx, partiċelli, skart ta' l-injam jew skart miksub fi sħiħ jew f'parti minn dawn il-koniferi għandu jkun akkumpanjat mill-imsemmi passaport għall-pjanti wara li jkun għadda minn trattament xieraq ta' fumigazzjoni sabiex jkun assigurat il-ħelsien minn PWNs ħajjin;

(d)

injam suxxetibbli, fl-għamla ta' serratura, spacers u rfid, inkluż dak li ma żammx il-wiċċ tond naturali tiegħu għandu:

—	jiġi mqaxxar mill-qoxra tiegħu,

—	ikun mingħajr toqob magħmula mill-insetti li jkunu ikbar minn 3 mm fil-wisa',

—	ikollu kontenut ta' umdità rrappreżentat f'perċentwali ta' materja niexfa ta' anqas minn 20 % milħuq fi żmien il-manifattura;

(e)

Injam suxxettibbli, fl-għamla ta' kaxxi ta' l-ippakkjar, kaxxi, qratel, tankijiet, jew ippakkjar simili, palletta, palletti tal-kaxxa jew load boards oħra, injam tat-tagħbija, kemm jekk jintuża effettivament fit-trasport ta' oġġetti ta' kull tip u kif ukoll jekk le għandu jgħaddi jew minn trattament xieraq ta' sħana biex jilħaq temperatura minima fil-qalba ta' l-injam ta' 56 oC għal 30 minuta, trattament taħt pressjoni (imprenjata), jew minn fumigazzjoni sabiex ikun assigurat il-ħelsien minn PWNs ħajjin u jew juri marka ta' trattament approvata uffiċjalment li tippermetti l-identifikazzjoni ta' fejn u minn min twettaq il-trattament jew inkella jkun akkumpanjat mill-imsemmi passaport li jiċċertifika l-miżuri mwettqa.

F'każ ta' ċaqliq fi ħdan iż-żoni demarkati fil-Portugall:

(a)

pjanti suxxettibbli:

—

imkabbra f'postijiet ta' produzzjoni fejn ebda sintomu ta' PWN ma ġie osservat, jew fil-viċinanzi immedjati mill-bidu ta' l-aħħar ċiklu komplut ta' veġetazzjoni u misjuba ħielsa minn sinjali jew sintomi ta' PWN matul l-ispezzjonijiet uffiċjali, għandhom ikunu akkumpanjati mill-imsemmi passaport għall-pjanti meta mċaqalqa mill-post ta' produzzjoni;

—	imkabbra f'postijiet ta' produzzjoni fejn ebda sintomu ta' PWN ma ġie osservat, jew fil-viċinanzi immedjati mill-bidu ta' l-aħħar ċiklu komplut ta' veġetazzjoni jew identifikati bħala infettati mill-PWN m'għandhomx ikunu mċaqalqa mill-post ta' produzzjoni u għandhom jinqerdu bil-ħruq;

—

imkabbra f'postijiet, bħalma huma foresti, ġonna pubbliċi jew privati, jew li huma identifikati bħala infestati mill-PWN, jew li juru sintomi ta' mard jew li jinsabu f'żoni protetti, għandhom:

—	jekk huma identifikati fil-perjodu mill-1 ta' Novembru sa l-1 ta' April, jitqaċċtu f'dak il-perjodu, jew

—	jekk huma identifikati fil-perjodu mit-2 ta' April sal-31 ta' Ottubru, jitqaċċtu minnufih u,

—	jekk jinsabu fil-parti taż-żoni demarkati indikati bħala żona buffer skond id-dispożizzjonijiet ta' l-Artikolu 5, ittestjati għall-preżenza tal-PWN. Jekk il-preżenza hija kkonfermata, id-delimitazzjoni taż-żoni demarkati għandhom jinbiddlu kif jixraq;

(b)

matul il-perjodu bejn l-1 ta' Novembru u l-1 ta' April, l-injam suxxetibbli fl-għamla ta' injam tond jew isserrat, bil-qoxra jew mingħajrha, inkluż dak li ma żammx il-wiċċ tond naturali tiegħu:

(i)

miksub minn siġar identifikati bħala infestati mill-PWN, jew misjub f'żoni protetti, jew li juri xi sintomu ta' mard, qabel it-2 ta' April għandu:

—	jinqered bil-ħruq taħt kontroll uffiċjali f'postijiet xierqa, jew

—

jiċċaqlaq taħt kontroll uffiċjali lejn jew:

—	impjant ta' pproċessar biex jiġi mlaqqax u użat fi ħdan dan l-impjant jew

—	impjant industrijali biex jintuża bħala injam kombustibbli fi ħdan dan l-impjant, jew

—

impjant ta' pproċessar, fejn l-injam għandu jew:

—	ikun ittrattat bis-sħana b'tali mod li tintlaħaq temperatura minima fil-qalba ta' l-injam ta' 56 oC għal 30 minuta, jew

—	ikun imlaqqax jew iffumigat sabiex jiġi assigurat il-ħelsien minn PWNs ħajjin.

(ii)

miksub minn siġar barra dawk imsemmija fis-subparagrafu (i) għandu jkun ttestjat uffiċjalment għall-preżenza ta' PWN u ta' Monochamus spp.; jekk il-preżenza ta' PWN jew ta' Monochamus spp. hija kkonfermata l-injam għandu jkun suġġett għad-dispożizzjonijiet imsemmija fis-subparagrafu (i); jekk il-preżenza tal-PWN u tal-Monochamus spp. hija miċħuda, l-injam jista' jkun imċaqlaq taħt kontroll uffiċjali lejn impjant ta' pproċessar għal użu ulterjuri bħala injam għall-bini, jew permezz ta' deroga, imċaqlaq f'żoni fil-Portugall, apparti miż-żoni demarkati taħt kontroll uffiċjali lejn impjanti ta' pproċessar approvati notifikati lill-Kummissjoni, fejn l-injam jew il-laqx magħmul minn injam bħal dak, fil-perjodu ta' bejn l-1 ta' Novembru u l-1 ta' April, għandu jkun jew:

—	fil-każ ta' laqx, sabiex ikun użat għal skopijiet industrijali fi ħdan l-impjant ta' pproċessar approvat, jew

—

fil-każ ta' injam:

—	ikun ittrattat bis-sħana b'tali mod li tintlaħaq temperatura minima fil-qalba ta' l-injam ta' 56 oC għal 30 minuta. Ċaqliq ulterjuri ta' injam bħal dan ittrattat bis-sħana jista' jkun permess meta l-injam ikun akkumpanjat mill-passaport għall-pjanti, jew

—	ikun imlaqqax jew iffumigat sabiex jiġi assigurat il-ħelsien minn PWNs ħajjin. Ċaqliq ulterjuri ta' injam iffumigat bħal dan jista' jkun permess meta l-injam ikun akkumpanjat mill-passaport għall-pjanti, jew

—	ikun imlaqqax u użat għal skopijiet industrijali fi ħdan dan l-impjant, jew

—

ikun imċaqlaq taħt kontroll uffiċjali lejn impjant, fejn l-injam għandu jkun jew:

—	ittrattat bis-sħana b'tali mod li tintlaħaq temperatura minima fil-qalba ta' l-injam ta' 56 oC għal 30 minuta, jew

—	imlaqqax jew iffumigat sabiex jiġi assigurat il-ħelsien min-nematodi ħajjin tal-pini, jew

—	imlaqqax u użat għal skopijiet industrijali;

(c)

matul il-perjodu bejn t-2 ta' April u l-31 ta' Ottubru, l-injam suxxetibbli fl-għamla ta' injam tond jew isserrat, bil-qoxra jew mingħajrha, inkluż dak li ma żammx il-wiċċ tond naturali tiegħu:

(i)

miksub minn siġar identifikati bħala infestati mill-PWN, jew misjub f'żoni protetti, jew li juri xi sintomu ta' mard, għandu jew:

—	jinqered minnufih bil-ħruq taħt kontroll uffiċjali f'postijiet xierqa, jew

—

titqaxxarlu minnufih il-qoxra f'postijiet xierqa barra mill-foresta qabel ma jiġi mċaqlaq taħt kontroll uffiċjali lejn postijiet għall-ħażna fejn l-injam jiġi ttrattat b'insettiċida xieraq jew f'postijiet għall-ħażna f'atmosfera umda approvati, disponibbli talanqas matul il-perjodu msemmi hawn fuq, bil-għan ta' ċaqliq ulterjuri lejn impjant industrijali:

—	biex minnufih ikun imlaqqax u użat għal skopijiet industrijali, jew

—	għal użu immedjat bħala injam kombustibbli fi ħdan dan l-impjant, jew

—	biex minnufih ikun ittrattat bis-sħana b'tali mod li tintlaħaq temperatura minima fil-qalba ta' l-injam ta' 56 oC għal 30 minuta, jew

—	ikun minnufih imlaqqax jew iffumigat sabiex jiġi assigurat il-ħelsien minn PWNs ħajjin;

(ii)

miksub minn siġar barra dawk imsemmija fis-subparagrafu (i) għandha titneħħielu l-qoxra minnufih f'post ta' tqaċċit jew fil-viċinanzi immedjati u jkun jew:

—

ittestjat uffiċjalment għall-preżenza ta' PWN u ta' Monochamus spp.; jekk il-preżenza ta' PWN jew ta' Monochamus spp. hija kkonfermata l-injam għandu jkun suġġett għad-dispożizzjonijiet imsemmija fis-subparagrafu (i); jekk il-preżenza ta' PWN jew ta' Monochamus spp. hija miċħuda, l-injam għandu jkun imċaqlaq taħt kontroll uffiċjali lejn impjant ta' pproċessar għal użu ulterjuri bħala injam għall-bini, jew

—

ikun imċaqlaq taħt kontroll uffiċjali lejn impjant, fejn l-injam għandu jkun jew:

—	imlaqqax u użat għal skopijiet industrijali, jew

—	ittrattat bis-sħana b'tali mod li tintlaħaq temperatura minima fil-qalba ta' l-injam ta' 56 oC għal 30 minuta, jew

—	imlaqqax jew iffumigat sabiex jiġi assigurat il-ħelsien minn PWNs ħajjin;

(d)

il-qoxra suxxetibbli tas-siġar għandha

—	tinqered bil-ħruq jew tintuża bħala kombustibbli f'impjant industrijali ta' pproċessar, jew

—	tkun ittrattata bis-sħana b'tali mod li tintlaħaq temperatura minima ta' 56 oC għal 30 minuta fil-qoxra kollha kemm hi, jew

—	tkun iffumigata sabiex jiġi assigurat il-ħelsien minn PWNs ħajjin;

(e)

injam suxxetibbli fl-għamla ta' skart prodott fil-mument tat-tqaċċit, għandu jinħaraq f'postijiet xierqa taħt kontroll uffiċjali:

—	fil-perjodu mill-1 ta' Novembru sa l-1 ta' April, f'dak il-perjodu, jew

—	fil-perjodu mit-2 ta' April sal-31 ta' Ottubru, minnufih;

(f)	injam suxxetibbli, fl-għamla ta' skart prodott matul l-ipproċessar ta' l-injam, għandu jew jinħaraq minnufih f'postijiet xierqa taħt kontroll uffiċjali, użat bħala injam kombustibbli f'impjanti ta' pproċessar jew iffumigat sabiex jiġi assigurat il-ħelsien minn PWNs ħajjin;

(g)

injam suxxetibbli, fl-għamla ta' kaxxi ta' l-ippakkjar, kaxxi, qratel, tankijiet u ppakkjar simili, palletta, palletti tal-kaxxa jew load boards oħra, injam tat-tagħbija, spacers u rfid, inkluż dak li ma żammx il-wiċċ tond naturali tiegħu għandu:

—	jiġi mqaxxar mill-qoxra tiegħu,

—	ikun mingħajr toqob magħmula mill-insetti li jkunu ikbar minn 3 mm fil-wisa',

—	ikollu kontenut ta' umdità rrappreżentat f'perċentwali ta' materja niexfa ta' anqas minn 20 % milħuq fi żmien il-manifattura.

(1) ĠU L 4, tat-8.1.1993, p. 22, Direttiva kif emendata mid-Direttiva tal-Kummissjoni 2005/17/KE (ĠU L 57, tat-3.3.2005, p. 23).