Iris Oifigiúil
an Aontais Eorpaigh
GA
Sraith L
|
|
Iris Oifigiúil |
GA Sraith L |
|
2025/2369 |
20.11.2025 |
CINNEADH (CBES) 2025/2369 ÓN gCOMHAIRLE
an 20 Samhain 2025
lena leasaítear Cinneadh (CBES) 2023/2135 a bhaineann le bearta sriantacha i bhfianaise gníomhaíochtaí lena mbaintear an bonn de chobhsaíocht agus d’aistriú polaitiúil na Súdáine
TÁ COMHAIRLE AN AONTAIS EORPAIGH,
Ag féachaint don Chonradh ar an Aontas Eorpach agus go háirithe Airteagal 29 de,
Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,
De bharr an mhéid seo a leanas:
|
(1) |
An 9 Deireadh Fómhair 2023, ghlac an Chomhairle Cinneadh (CBES) 2023/2135 (1). |
|
(2) |
An 27 Samhain 2023, d’eisigh Ardionadaí an Aontais do Ghnóthaí Eachtracha agus don Bheartas Slándála ráiteas thar ceann an Aontais inar cháin an tAontas agus a Bhallstáit go láidir arís an troid leanúnach idir Fórsaí Armtha na Súdáine agus na Fórsaí Mear-Thacaíochta agus a mílístí cleamhnaithe faoi seach. Cuireadh in iúl leis an ráiteas sin freisin gur saoth leo gur tháinig géarú suntasach ar an bhforéigean agus gur cailleadh daoine in Darfur agus ar fud na tíre, agus gur saoth leo na sáruithe ar an dlí idirnáisiúnta um chearta an duine agus ar an dlí daonnúil idirnáisiúnta. |
|
(3) |
I bhfianaise a thromchúisí atá an staid, ba cheart duine aonair amháin a áireamh i liosta na ndaoine nádúrtha agus dlítheanacha, na n-eintiteas nó na gcomhlachtaí a leagtar amach san Iarscríbhinn a ghabhann le Cinneadh (CBES) 2023/2135. |
|
(4) |
Dá bhrí sin, ba cheart Cinneadh (CBES) 2023/2135 a leasú dá réir sin, |
TAR ÉIS AN CINNEADH SEO A GHLACADH:
Airteagal 1
Leasaítear an Iarscríbhinn a ghabhann le Cinneadh (CBES) 2023/2135 i gcomhréir leis an Iarscríbhinn a ghabhann leis an gCinneadh seo.
Airteagal 2
Tiocfaidh an Cinneadh seo i bhfeidhm ar dháta a fhoilsithe in Iris Oifigiúil an Aontais Eorpaigh.
Arna dhéanamh sa Bhruiséil, an 20 Samhain 2025.
Thar ceann na Comhairle
An tUachtarán
K. KALLAS
(1) Cinneadh (CBES) 2023/2135 ón gComhairle an 9 Deireadh Fómhair 2023 a bhaineann le bearta sriantacha i bhfianaise gníomhaíochtaí lena mbaintear an bonn de chobhsaíocht agus d’aistriú polaitiúil na Súdáine (IO L, 2023/2135, 11.10.2023, ELI: http://data.europa.eu/eli/dec/2023/2135/oj).
IARSCRÍBHINN
San Iarscríbhinn a ghabhann le Cinneadh (CBES) 2023/2135, faoi cheannteideal ‘A. Liosta na ndaoine nádúrtha dá dtagraítear in Airteagal 1(1) agus in Airteagal 2(1)’, cuirtear an iontráil seo a leanas leis:
|
|
Ainm |
Faisnéis aitheantais |
Cúiseanna |
Dáta an liostaithe |
|
‘13. |
Abdelrahim Hamdan DAGALO dá ngairtear freisin Abdul Rahim DAGALO |
Dáta breithe: 1.1.1972 Náisiúntacht: Súdánach Inscne: fireann Feidhm: Leas-Cheannasaí na bhFórsaí Mear-Thacaíochta Eintitis a bhfuil baint acu leis: na Fórsaí Mear-Thacaíochta; Al Junaid Multi Activities Co Ltd Daoine aonair comhlachaithe: Mohamed Hamdan Dagalo |
Is é Abdelrahim Hamdan Dagalo Leas-Cheannasaí na bhFórsaí Mear-Thacaíochta agus deartháir Mohamed Hamdan Dagalo (Hemedti), Ceannasaí na bhFórsaí Mear-Thacaíochta. An 15 Eanáir 2024, shainaithin Painéal Saineolaithe na Náisiún Aontaithe maidir leis an tSúdáin go raibh “ról lárnach ag Abdelrahim Hamdan Dagalo i bhfeachtas na bhFórsaí Mear-Thacaíochta in Darfur, ag déanamh maoirseacht phearsanta ar na hoibríochtaí míleata sna cúig Stát [in Darfur], ó mhí Dheireadh Fómhair [2023]”. I mí Dheireadh Fómhair 2025, d’ordaigh sé sibhialtaigh a mharú agus a chur chun báis agus stiúir sé gníomhaíochtaí na bhFórsaí Mear-Thacaíochta i gcoinne sibhialtach in El Fasher. In éineacht lena bheirt mhac, tá cuideachta sealbhaíochta Al Junaid Multi Activities Co Ltd (“Al Junaid”), eintiteas atá faoi réir bearta sriantacha ag an Aontas as trealamh míleata a sholáthar do na Fórsaí Mear-Thacaíochta, faoi úinéireacht Abdelrahim Hamdan Dagalo. Bhí ról lárnach ag Abdelrahim Hamdan Dagalo i bhfeachtas na bhFórsaí Mear-Thacaíochta in Darfur, trí mhaoirseacht phearsanta ar na hoibríochtaí míleata a dhéanamh agus trí oibríochtaí na bhFórsaí Mear-Thacaíochta a mhaoiniú trí Al Junaid. Tá baint aige, dá bhrí sin, le heintiteas a thugann tacaíocht do ghníomhaíochtaí na bhFórsaí Mear-Thacaíochta a chuireann síocháin, cobhsaíocht nó slándáil na Súdáine i mbaol. Dá bhrí sin, tá Abdelrahim Hamdan Dagalo freagrach as gníomhaíochtaí a stiúradh sa tSúdáin ar sáruithe nó mí-úsáidí tromchúiseacha ar chearta an duine nó sáruithe ar an dlí daonnúil idirnáisiúnta iad. Tá sé freagrach freisin as gníomhaíochtaí a chuireann síocháin, cobhsaíocht nó slándáil na Súdáine i mbaol. |
20.11.2025’. |
ELI: http://data.europa.eu/eli/dec/2025/2369/oj
ISSN 1977-0839 (electronic edition)