|
6.6.2008 |
MT |
Il-Ġurnal Uffiċjali ta’ l-Unjoni Ewropea |
L 147/65 |
DEĊIŻJONI TAL-KUMMISSJONI
tat-30 ta’ Mejju 2008
li t-temenda d-Deċiżjoni 2008/377/KE dwar ċerti miżuri ta’ protezzjoni marbuta mad-deni klassiku tal-ħnieżer fis-Slovakkja
(notifikata taħt id-dokument numru C(2008) 2262)
(Test b’relevanza għaż-ŻEE)
(2008/419/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Direttiva tal-Kunsill 90/425/KEE tas-26 ta’ Ġunju 1990 dwar l-iċċekkjar, veterinarju u zootekniku applikabbli għall-kummerċ intra-Komunitarju ta’ ċertu annimali ħajjin u prodotti bil-ħsieb tat-tlestija tas-suq intern (1), u b’mod partikolari l-Artikolu 10(4) tagħha,
Billi:
|
(1) |
Seħħew tifqigħat tad-Deni Klassiku tal-Ħnieżer fis-Slovakkja li minħabba l-kummerċ fi ħnieżer ħajjin u ċerti prodotti tal-majjal aktarx jipperikolaw il-merħliet porċini ta’ Stati Membri oħra. |
|
(2) |
Id-Deċiżjoni tal-Kummissjoni 2008/377/KE tat-8 ta’ Mejju 2008 dwar ċerti miżuri ta’ protezzjoni marbuta mad-Deni Klassiku tal-Ħnieżer fis-Slovakkja (2) ġiet adottata sabiex issaħħaħ il-miżuri meħuda mis-Slovakkja fi ħdan il-qafas tad-Direttiva tal-Kunsill 2001/89/KE tat-23 ta’ Ottubru 2001 dwar il-miżuri tal-Komunità għall-kontroll tal-marda ta’ l-Infafet Vesikolari (Deni Klassiku) tal-Ħnieżer (3). |
|
(3) |
L-Artikolu 2(2)(p) tad-Direttiva tal-Kunsill 64/432/KEE tas-26 ta’ Ġunju 1964 dwar il-problemi tas-saħħa ta’ l-annimali li jaffettwaw il-kummerċ ta’ annimali bovini u suwini ġewwa l-Komunità (4) jiddefinixxi “kraj” bħala r-reġjun amministrattiv tas-Slovakkja li hu għallinqas 2 000 km2 u li huwa soġġett għal spezzjonijiet mill-awtoritajiet kompetenti. |
|
(4) |
Abbażi tar-riżultati ta’ l-istħarriġ epidemjoloġiku mwettaq mill-awtoritajiet kompetenti fis-Slovakkja jixraq li jkun hemm dispożizzjonijiet għal miżuri ta’ protezzjoni marbuta mad-Deni Klassiku tal-Ħnieżer fis-Slovakkja li għandhom japplikaw f’ċerti reġjuni amministrattivi (“kraj”). |
|
(5) |
Id-Deċiżjoni 2008/377/KE għandha għalhekk tiġi emendata skond dan. |
|
(6) |
Il-miżuri stipulati f’din id-Deċiżjoni huma skond l-opinjoni tal-Kumitat Permanenti għall-Katina Alimentari u s-Saħħa ta’ l-Annimali, |
ADOTTAT DIN ID-DEĊIŻJONI:
Artikolu 1
L-Anness tad-Deċiżjoni 2008/377/KE jinbidel bit-test fl-Anness ta’ din id-Deċiżjoni.
Artikolu 2
Din id-Deċiżjoni hija indirizzata lill-Istati Membri.
Magħmula fi Brussell, 30 ta’ Mejju 2008.
Għall-Kummissjoni
Androulla VASSILIOU
Membru tal-Kummissjoni
(1) ĠU L 224, 18.8.1990, p. 29. Id-Direttiva kif emendata l-aħħar bid-Deċiżjoni 2006/965/KE (ĠU L 397, 30.12.2006, p. 22).
(2) ĠU L 130, 20.5.2008, p. 18.
(3) ĠU L 316, 1.12.2001, p. 5. Id-Direttiva kif emendata l-aħħar bid-Deċiżjoni tal-Kummissjoni 2007/729/KE (ĠU L 294, 13.11.2007, p. 26).
(4) ĠU 121, 29.7.1964, p. 1977/64. Id-Direttiva kif emendata l-aħħar bid-Deċiżjoni 2007/729/KE.
ANNESS
“ANNESS
Ir-reġjuni amministrattivi fis-Slovakkja li ġejjin:
|
— |
Ir-Reġjun ta’ Banská Bystrica (Banskobystrický kraj) |
|
— |
Ir-Reġjun ta’ Nitra (Nitriansky kraj)” |