(1)

L-infezzjoni bil-virus tal-marda tal-infafet fil-ġilda hija marda infettiva li tinġarr minn vettur u li taffettwa lill-annimali bovini. L-okkorrenza tagħha tista’ tħalli impatt sever fuq il-popolazzjoni tal-annimali kkonċernati u fuq il-profittabbiltà tal-biedja, u tikkawża disturb fil-movimenti ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi.

(2)

Fil-każ ta’ tifqigħa tal-infezzjoni bil-virus tal-marda tal-infafet fil-ġilda fl-annimali bovini, hemm riskju serju li dik il-marda tinxtered fi stabbilimenti oħra tal-annimali bovini, b’mod partikolari minħabba l-mod ewlieni ta’ trażmissjoni tagħha permezz tal-vetturi.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-marda tal-infafet fil-ġilda, u ċerti miżuri li għandhom jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi mill-inqas żona ta’ protezzjoni, żona ta’ sorveljanza, u, jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni (UE) 2025/1336 (4) ġiet adottata abbażi tar-Regolament (UE) 2016/429 u tistabbilixxi ċerti miżuri ta’ emerġenza interim relatati mal-infezzjoni bil-virus tal-marda tal-infafet fil-ġilda fi Franza.

(5)

B’mod aktar partikolari, id-Deċiżjoni ta’ Implimentazzjoni (UE) 2025/1336 tirrikjedi l-istabbiliment ta’ żoni ristretti skont it-tifsira tar-Regolament Delegat (UE) 2020/687 f’dak l-Istat Membru, u li jiġu determinati ż-żoni elenkati fl-Annessi rispettivi tagħhom bħala tali żoni.

(6)

Mill-adozzjoni tad-Deċiżjoni ta’ Implimentazzjoni (UE) 2025/1336, Franza nnotifikat lill-Kummissjoni dwar 33 tifqigħa addizzjonali tal-infezzjoni bil-virus tal-marda tal-infafet fil-ġilda fi stabbilimenti li jżommu l-annimali bovini fil-muniċipalitajiet ta’ Chambéry u Annecy, id-départements ta’ Savoie u Haute Savoie, ir-reġjun ta’ Auvergne-Rhône-Alpe, li ġew irrapportati bejn 4–23 ta’ Lulju 2025. B’reazzjoni għal dawn it-tifqigħat, Franza stabbiliet żoni ta’ protezzjoni u ta’ sorveljanza fid-dipartimenti ta’ Ain, Isere, Savoie, u Haute Savoie, reġjun ta’ Auvergne-Rhône-Alpe, fejn jiġu applikati l-miżuri ta’ kontroll tal-mard stabbiliti f’konformità mar-Regolament Delegat (UE) 2020/687.

(7)

Id-daqs taż-żoni indikati bħala żoni ta’ protezzjoni u ta’ sorveljanza fl-Anness I ta’ din id-Deċiżjoni, kif ukoll id-durata tal-miżuri li għandhom jiġu applikati fihom, huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, kif ukoll fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żona ta’ protezzjoni u taż-żona ta’ sorveljanza, kif ukoll tad-durata tal-miżuri li għandhom jiġu applikati fihom, ma jqisux biss is-sitwazzjoni epidemjoloġika fir-rigward tal-infezzjoni bil-virus tal-marda tal-infafet fil-ġilda fiż-żoni milquta minn dik il-marda, iżda anke fatturi epidemjoloġiċi oħra, fosthom il-parametri ġeografiċi u r-riskju li l-marda tkompli tinxtered fid-dawl tal-preżenza ta’ insetti vetturi. Anke meta ntgħażlet id-durata tal-miżuri previsti f’din id-Deċiżjoni tqiesu l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (5).

(8)

Ir-Regolament (UE) 2016/429, b’mod partikolari l-Artikolu 69, jipprevedi li l-awtorità kompetenti ta’ Stat Membru tista’ tuża tilqim protettiv ta’ emerġenza fejn meħtieġ għall-kontroll effettiv ta’ marda elenkata fl-annimali miżmuma. Għal dak l-għan, l-awtorità kompetenti għandha tistabbilixxi żoni ta’ tilqim u timplimenta pjan uffiċjali ta’ tilqim li jissodisfa rekwiżiti speċifiċi. Ir-Regolament Delegat tal-Kummissjoni (UE) 2023/361 (6), li jissupplimenta r-Regolament (UE) 2016/429 jistabbilixxi, inter alia, ir-regoli speċifiċi li għandhom jiġu implimentati mill-Istati Membri meta jużaw tilqim protettiv ta’ emerġenza fl-annimali bovini għall-prevenzjoni jew għall-kontroll ta’ marda elenkata. Dak ir-Regolament Delegat fih ukoll il-kundizzjonijiet li fihom jista’ jiġi permess il-moviment ta’ annimali mlaqqma u tal-prodotti tagħhom. Il-kundizzjonijiet speċifiċi għat-tilqim protettiv ta’ emerġenza kontra l-infezzjoni bil-marda tal-infafet fil-ġilda huma stabbiliti fl-Anness IX ta’ dak ir-Regolament Delegat.

(9)

Ir-Regolament ta’ Implimentazzjoni tal-Kummissjoni (UE) 2022/140 (7) jistabbilixxi r-regoli għall-applikazzjoni tar-Regolament (UE) 2016/429 fir-rigward tal-banek tal-Unjoni tal-antiġeni, tal-vaċċini u tar-reaġenti dijanjostiċi. B’mod partikolari, jistabbilixxi r-rekwiżiti proċedurali u tekniċi skont l-Artikolu 8 għall-Istati Membri biex jitolbu aċċess ta’ emerġenza għall-vaċċini, inklużi dawk għall-marda tal-infafet fil-ġilda, mill-banek tat-tilqim.

(10)

Fl-1 ta’ Lulju 2025, Franza ssottomettiet lill-Kummissjoni l-pjan ta’ tilqim uffiċjali tagħha għat-tilqim protettiv ta’ emerġenza kontra l-infezzjoni bil-marda tal-infafet fil-ġilda. Il-pjan jinkludi informazzjoni dwar l-ambitu ġeografiku u amministrattiv taż-żona ta’ tilqim, l-għadd ta’ stabbilimenti u l-annimali li jridu jitlaqqmu, u d-durata tat-tilqim, kif meħtieġ mill-Artikolu 6(4), il-punt (a), tar-Regolament Delegat (UE) 2023/361. Talbu wkoll dożi suffiċjenti ta’ vaċċini mill-bank tal-vaċċini tal-Unjoni, f’konformità mal-Artikolu 8 tar-Regolament ta’ Implimentazzjoni (UE) 2022/140 sabiex jibdew it-tilqim protettiv ta’ emerġenza fit-territorju tal-erba’ départements ta’ Ain, Savoie, Haute-Savoie u Isère fir-reġjun ta’ Auvergne-Rhône-Alpes ta’ Franza.

(11)

Il-kundizzjonijiet li fihom Franza għandha tapplika tilqim protettiv ta’ emerġenza kontra l-infezzjoni bil-virus tal-marda tal-infafet fil-ġilda, kif ukoll il-miżuri ta’ mitigazzjoni tar-riskju li għandhom jittieħdu għall-moviment ta’ annimali mlaqqmin u l-prodotti tagħhom huma stabbiliti fl-Anness IX tar-Regolament Delegat (UE) 2023/361. F’konformità ma’ dawn il-kundizzjonijiet, it-tilqim jista’ jiġi implimentat fiż-żoni ta’ tilqim I jew II, skont il-konferma tal-infezzjoni bil-virus tal-marda tal-infafet fil-ġilda.

(12)

It-tip, id-daqs u d-durata taż-żoni ta’ tilqim I u II jista’ jkollhom bżonn jiġu aġġustati fid-dawl tas-sitwazzjoni epidemjoloġika li qed tevolvi u l-progress tal-kampanji ta’ tilqim, b’mod partikolari filwaqt li jitqies il-livell li qed jevolvi tal-kopertura tat-tilqim miksub. Fejn xieraq jew meħtieġ, żona ta’ tilqim II jew parti minnha jista’ jkollha bżonn tiġi kkonvertita f’żona ta’ tilqim I u viċi versa, f’konformità mal-kriterji stabbiliti fir-Regolament Delegat (UE) 2023/361 u abbażi tal-informazzjoni pprovduta mill-awtoritajiet kompetenti tal-Istati Membri affettwati. Għaldaqstant, huwa meħtieġ li jiġu indikati, fl-Anness ta’ din id-Deċiżjoni, id-dati għall-konverżjoni ta’ tip wieħed ta’ żona ta’ tilqim għal oħra.

(13)

Fid-dawl tas-sitwazzjoni epidemjoloġika attwali u r-riskju li l-infezzjoni bil-virus tal-marda tal-infafet fil-ġilda tista’ tinfirex minn annimali bovini infettati b’mod subkliniku, jeħtieġ li jiġi pprojbit il-moviment ta’ dawn l-annimali minn kwalunkwe post fiż-żoni ta’ protezzjoni u sorveljanza, lejn destinazzjonijiet barra mill-perimetri esterni ta’ dawk iż-żoni fi Franza jew barra minn dak l-Istat Membru.

(14)

Sabiex jiġi evitat kwalunkwe tfixkil bla bżonn għall-kummerċ fl-Unjoni, u biex jiġi evitat li pajjiżi terzi jimponu ostakli mhux ġustifikati għall-kummerċ, iż-żoni identifikati bħala żoni ta’ protezzjoni u sorveljanza u ż-żona ta’ tilqim, jenħtieġ li jiġu stabbiliti fl-Anness ta’ din id-Deċiżjoni, u tiġi stabbilita d-durata ta’ dawk il-miżuri, f’kollaborazzjoni ma’ dak l-Istat Membru.

(15)

Sabiex tiġi żgurata ċ-ċarezza legali, iż-żoni ristretti u ż-żoni ta’ tilqim jenħtieġ li jiġu definiti b’mod ċar f’termini tal-ambitu ġeografiku tagħhom u d-durata tagħhom biex jiġi evitat it-tixrid ulterjuri tal-marda fi Franza lejn Stati Membri oħra jew lejn pajjiżi terzi. Fid-dawl tas-sitwazzjoni epidemjoloġika, id-dispożizzjonijiet ta’ din id-Deċiżjoni jenħtieġ li japplikaw malajr kemm jista’ jkun.

(16)

Għalhekk, jenħtieġ li d-Deċiżjoni ta’ Implimentazzjoni (UE) 2025/1336 titħassar u tiġi sostitwita b’din id-Deċiżjoni.

(17)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(a)

żona ristretta, li tinkludi ż-żoni ta’ protezzjoni u ta’ sorveljanza, tiġi stabbilita minnufih mill-awtoritajiet kompetenti ta’ dak l-Istat Membru f’konformità mal-Artikolu 21 tar-Regolament Delegat (UE) 2020/687 u skont il-kundizzjonijiet stabbiliti f’dak l-Artikolu;

(b)

l-awtoritajiet kompetenti ta’ dak l-Istat Membru jistabbilixxu minnufih żoni ta’ tilqim f’konformità mal-Parti 1 tal-Anness IX tar-Regolament Delegat (UE) 2023/361, u skont il-kundizzjonijiet stabbiliti f’dak l-Anness;

(c)

iż-żoni ta’ protezzjoni u sorveljanza msemmija fil-punt (a) kif ukoll iż-żona ta’ tilqim imsemmija fil-punt (b) jinkludu mill-inqas iż-żoni elenkati fl-Annessi ta’ din id-Deċiżjoni;

(d)

il-miżuri li jeħtieġ jiġu applikati fiż-żona ta’ protezzjoni u sorveljanza kif ukoll fiż-żona ta’ tilqim jibqgħu jiġu applikati mill-inqas sad-dati elenkati fl-Anness ta’ din id-Deċiżjoni.