(1)

Tá sé beartaithe leis an Ionstraim Sholúbthachta go mbeifear in ann caiteachas a mhaoiniú, ar caiteachas é a shainaithnítear go soiléir agus nach bhféadfaí a mhaoiniú faoi na huasteorainneacha a bheadh le fáil le haghaidh ceann amháin nó níos mó de na ceannteidil eile.

(2)

Is é EUR 600 000 000 (praghsanna 2011), mar a leagtar síos in Airteagal 11 de Rialachán (AE, Euratom) Uimh. 1311/2013 (2), ón gComhairle, uasteorainn an mhéid bhliantúil a bheidh ar fáil le haghaidh na hIonstraime Solúbthachta, agus í sin arna méadú, i gcás inarb infheidhme, le méideanna gan chaitheamh a chuirtear ar fáil i gcomhréir leis an dara fomhír de mhír 1 den Airteagal sin .

(3)

Chun aghaidh a thabhairt ar na dúshláin i gcomhthéacs ráig COVID-19, ní mór méideanna a shlógadh chun bearta iomchuí a mhaoiniú mar ábhar práinne.

(4)

Tar éis scrúdú a dhéanamh ar na féidearthachtaí uile i ndáil le leithreasuithe a ath-leithdháileadh faoi na huasteorainneacha caiteachais do cheannteideal 3 (Slándáil agus Saoránacht), is gá an Ionstraim Sholúbthachta a shlógadh chun forlíonadh EUR 243 039 699 a chur leis an maoiniú i mbuiséad ginearálta an Aontais don bhliain airgeadais 2020 thar uasteorainn cheannteideal 3 chun bearta láithreacha a mhaoiniú i gcomhthéacs ráig COVID-19. Comhlánaíonn an méid sin maoiniú ón Ionstraim Sholúbthachta a slógadh i gcomhthéacs bhuiséad leasaitheach Uimh. 1 a ghabhann le buiséad ginearálta an Aontais do 2020.

(5)

Ar bhonn na próifíle íocaíochta lena bhfuiltear ag súil, na leithreasuithe faoi chomhair íocaíochta a chomhfhreagraíonn do shlógadh na hIonstraime Solúbthachta, ba cheart iad a leithdháileadh thar roinnt blianta airgeadais.

(6)

Tá an cinneadh seo nasctha le maoiniú a áirítear i mbuiséad leasaitheach Uimh. 2 a ghabhann le buiséad ginearálta an Aontais don bhliain 2020. Chun an comhleanúnachas leis an mbuiséad leasaitheach a áirithiú, ba cheart feidhm a bheith ag an gCinneadh seo ar dháta a ghlactha,