6.6.2013   

MT

Il-Ġurnal Uffiċjali tal-Unjoni Ewropea

C 161/64

1.1

Din il-proposta hija estensjoni għall-perjodu 2014-2020 tal-programm imniedi mill-Kummissjoni fl-2009, għall-finanzjament tal-korpi li jaħdmu fil-qasam tar-rappurtaġġ u l-awditjar finanzjarju. Minn meta beda l-programm s’issa, is-settur kellu ħafna tibdil. Il-korpi tnaqqsu għal tlieta biss: l-IFRS: l-Istandards Internazzjonali għall-Irrappurtar Finanzjarju, l-EFRAG, il-Grupp Konsultattiv Ewropew għar-Rappurtar Finanzjarju, u l-PIOB, il-Bord tas-Sorveljanza tal-Interess Pubbliku.

1.2

Il-KESE japprova l-programm inġenerali u jirrikonoxxi l-valur għoli tar-rappurtaġġ u l-awditjar finanzjarju bħala bażi ta’ suq b’saħħtu u trasparenti. Min-naħa l-oħra, m’għandux biżżejjed informazzjoni biex jiġġudika l-adegwatezza tal-ammonti attribwit, għall-ħidma ta’ kull programm, u lanqas jista’ jkollu opinjoni propja dwar l-adegwatezza tal-”prodott” ta’ kull istituzzjoni għall-ħtiġijiet tal-utenti, li jidher li għandhom opinjoni pożittiva għall-aħħar tiegħu.

1.3

Il-kriżi finanzjarja, li għadu jħabbat wiċċu magħha s-suq, uriet il-bżonn dejjem jikber ta’ informazzjoni iktar preċiża u ta’ standards ta’ verifika dejjem iktar effettivi; iżda għalxejn ikun hemm dawn l-istrumenti jekk l-”utenti” ta’ dawn is-servizzi ma jkunux kapaċi jużawhom sew. Għalhekk meħtieġ taħriġ ta’ esperti ta’ livell għoli fis-settur pubbliku u privat; l-UE, l-Istati Membri u l-intrapriżi għandhom jiddedikaw kull sforz għal dan, b’impenn adegwat ta’ fondi.

2.1

Fid-19 ta’ Diċembru 2012, il-Kummissjoni ppubblikat proposta għal Regolament tal-Parlament Ewropew u tal-Kunsill maħsuba biex tappoġġja l-attivitajiet tal-korpi involuti fl-iżvilupp tal-prinċipji u l-istandards fil-qasam tar-rappurtar finanzjarju u l-awditjar, għall-perjodu bejn l-1 Jannar 2014 u l-31 ta’ Diċembru 2020. Il-pjan preċedenti, tal-2009, jiskadi fil-31 ta’ Diċembru 2013. Uħud mill-korpi previsti fil-pjan oriġinali ġew assorbiti minn oħrajn; din il-proposta tkopri għalhekk il-uniċi benefiċjarji li jifdal, jiġifieri l-Fondazzjoni IFRS (is-suċċessur legali tal-IASCF), l-EFRAG u l-PIOB. Din it-tema tapplika għas-settur privat. Is-settur pubbliku huwa suġġett għar-Regolament (KE) Nru 2223/96 tal-Kunsill tal-25 ta’ Ġunju 1996 dwar is-Sistema Ewropea tal-kontijiet nazzjonali u reġjonali tal-Komunità (SEC 95) li jistabilixxi l-prinċipji tat-tfassil tal-bilanċi pubbliċi.

2.2

Din il-proposta, bħar-rapport li jakkumpanjaha, tant għandha akronimi, li diffiċli jinftehmu l-akronimi kollha u r-relazzjonijiet bejn l-entitajiet differenti li jissemmew fit-test. Għalhekk hemm bżonn ta’ gwida għall-akronimi u l-organigrammi biex id-dokumenti jinqraw iktar faċilment, billi dawn, għalkemm imfassla bl-użu ta’ terminoloġija teknika preċiża, huma ta’ sfida biex jinftehmu anke għal dawk li jaħdmu f’dan il-qasam stess.

2.3

Il-gwida tiddeskrivi b’mod mill-iktar issemplifikat il-korpi benefiċjarji li ġejjin:

2.4

L-entitajiet, li jingħataw finanzjament sostanzjali, jittrattaw suġġett tekniku ħafna u diffiċli jiftiehem jekk mhux mill-ispeċjalisti fil-qasam. Għaldaqstant, il-Kummissjoni m’għamlitx konsultazzjonijiet esterni u llimitat ruħha li tevalwa l-adegwatezza tal-kontribuzzjonijiet fid-dawl tal-esperjenza u l-għarfien tagħha. Il-valutazzjoni tal-impatt ikkonfermat li l-programm ta’ finanzjament laħaq l-aspettattivi u l-miri previsti.

3.1

Il-KESE diġà kkummenta (2) dwar il-programm oriġinali, fejn ta appoġġ lill-proposti tal-Kummissjoni, b’xi riżervi u proposti li se jerġgħu jissemmew f’dan it-test fejn meħtieġ. Bħal f’dak iż-żmien, nerġgħu naqblu ma il-prinċipju tal-ħtieġa li jkunu ffinanzjati attivitajiet ta’ istituzzjonijiet li jaqdu rwol delikat ħafna u ta’ importanza kbira. Madanakollu, mhux possibli opinjoni dwar il-livell tal-finanzjamenti, billi l-kejl ta’ dawn jiddependi minn għarfien speċifiku, li għandhom biss grupp żgħir ta’ speċjalisti.

3.2

Diġà kienet bdiet il-kriżi finanzjarja fl-2009, meta nħoloq il-programm, iżda forsi dak iż-żmien kien għadu kmieni wisq biex issir analiżi fuq livell wiesa’, li tinkludi l-inqas aspetti evidenti tal-kawżi, jew aħjar tal-fatturi li kkontribwew, għal dak li ġara. Iż-żmien li għadda u dak li ġara sadanittant, iħalluna nagħmlu xi riflessjoni ulterjuri.

3.3

Ir-rappurtaġġ finanzjarju u t-tekniki tal-kontabbiltà iqumu l-flus: jiswew iktar meta din il-ħidma trid issir minn speċjalisti li diffiċli jinstabu fis-suq u meta l-istudju universitarju huwa biss bażi biex jintlaħqu kompetenzi għoljin permezz tal-esperjenza. Mhux hekk biss: dawn l-ispeċjalisti jrid ikollhom kwalità morali għolja, sabiex tkun garantita r-riżervatezza tal-informazzjoni u n–newtralità tal-analiżi tagħhom; dan kollu jwassal għall-konklużjoni li l-finanzjament tal-entitajiet operattivi huwa ċertament utli, iżda huwa meħtieġ ukoll taħriġ ta’ speċjalisti, mħallsa u inċentivati kif xieraq.

3.3.1

Meta nitkellmu dwar “speċjalisti” normalment naħsbu f’dawk li huma responsabbli mill-ipproċessar tal-informazzjoni jew tar-regoli, iżda utenti tagħhom, dawk li għalihom l-informazzjoni hija għodda għall-ħidma u l-istandards huma gwida għall-attivitajiet tagħhom irridu nqisuhom ukoll bħala speċjalisti. Huwa ċar li d-disponibbiltà ta’ riżorsi umani mħarrġa b’mod adegwat hija prijorità, mhux biss għal dawk li jipproduċu l-informazzjoni, iżda wkoll għal dawk li jridu jużawha: l-awtoritajiet regolatorji u superviżorji, il-leġiżlaturi, in-negozji, l-istituzzjonijiet ta’ riċerka.

3.4

Għalhekk flimkien mat-taħriġ, l-aspett tal-kwalità tal-informazzjoni huwa importanti: fil-punt 3.1 intqal li huwa diffiċli jsir ġudizzju dwar il-livelli ta’ finanzjamenti proposti, saħansitra aktar diffiċli u każwali jkun ġudizzju bbażat fuq il-valur miżjud tal-utilità li huma jikkostitwixxu għall-utenti. Nistgħu biss naċċettaw il-proposta tal-Kummissjoni rigward l-ammont ta’ kontribuzzjonijiet, ibbażat biss fuq il-fiduċja u l-apprezzament tar-raġunijiet.

3.5

Fl-opinjoni (3) preċedenti ppreżentat fl-2009, waqt it-tnedija tal-programm, il-Kumitat kien irrakkomanda li tingħata attenzjoni speċjali sabiex tiġi evitata influwenza mhux xierqa jew interferenza fis-suq tat-titoli  (4) regolati mill-IASCF u l-EFRAG, l-argument kien tqajjem mill-Kummissjoni nnifisha, li kienet talbet kontribuzzjoni Komunitarja sabiex tiġi evitata “influwenza mhux xierqa tal-partijiet interessati.” Din il-kwistjoni importanti u sensittiva ma tidher imkien fir-Regolament il-ġdid propost; il-Kumitat jistieden lill-Kummissjoni tikkonferma l-fiduċja sħiħa tagħha fl-indipendenza ta’ dawn il-korpi. L-istess japplika għall-PIOB  (5).

3.6

Fir-rigward tal-EFRAG, huwa nnotat li l-Kummissjoni tikkofinanzja dan il-korp f’isem l-Istati Membri ż-żgħar (l-akbar jikkontribwixxu direttament). Probabbilment il-kontribuzzjoni tal-Kummissjoni ma tinbidilx wisq jekk l-Istati ż-żgħar iħallsu s-sehem tagħhom, forsi anke simbolika. Iżda l-ġest jindika involviment responsabbli tal-pajjiżi kollha tal-Komunità0 fil-korpijiet ta’ importanza komuni, irrispettivament mid-daqs ta’ kull membru.

3.7

L-istandards tal-IFRS (Standards Internazzjonali għall-Irrappurtar Finanzjarju) jistabbilixxu l-valur tal-intrapriżi bil-valur tas-suq (mark-to-market). Matul il-kriżi finanzjarja ġie osservat li dawn l-istandards jista’ jkollhom effett proċikliku u li ma jippjanax għat-tul. Il-KESE jissuġġerixxi li ssir valutazzjoni tal-ispejjeż/benefiċċji ta’ dawn l-istandards, pereżempju fil-qafas tal-programm inkwistjoni.

3.8

Bħala nota finali, il-KESE jixtieq jenfasizza għal darb’oħra l-importanza tal-ġbir u l-ipproċessar tad-data, iżda fuq kollox il-ħtieġa li tkun taf kif suppost tifhimhom u tużahom: filwaqt li huwa meħtieġ li jkunu rikonoxxuti l-livell għoli ta’ professjonalità tal-“fornituri”, ħafna għad irid isir fir-rigward tal-kategorija multiformi tal-utenti, permezz tat-taħriġ u l-aġġornamenti xierqa tar-riżorsi umani.