(1)

Tá an tAontas ina pháirtí sa Chomhaontú Idir-Rialtasach um Adhmad Trópaiceach (‘CIAT 2006’) in éineacht lena Bhallstáit.

(2)

Thug an tAontas CIAT 2006 i gcrích le Cinneadh 2011/731/AE ón gComhairle (1) agus tháinig sé i bhfeidhm an 7 Nollaig 2011 ar feadh tréimhse 10 mbliana. Cuireadh síneadh le CIAT 2006 ar feadh tréimhse 5 bliana ar dtús agus ansin ar feadh tréimhse 3 bliana eile. Ní dhéantar foráil in CIAT 2006 maidir le haon síneadh tar éis an 6 Nollaig 2029.

(3)

Is é is aidhm do CIAT 2006 bainistiú inbhuanaithe agus caomhnú foraoisí trópaiceacha a chur chun cinn, mar aon le leathnú agus éagsúlú thrádáil idirnáisiúnta an adhmaid thrópaicigh a thagann as foraoisí a bhainistítear go hinbhuanaithe agus as foraoisí ina ndéantar baint go dleathach. Dá bhrí sin, cumhdaítear le CIAT 2006 ábhair a bhaineann le beartais a thagann faoi Airteagal 192(1) den Chonradh ar Fheidhmiú an Aontais Eorpaigh (CFAE) chomh maith le beartais a thagann faoi Airteagal 207(4), an chéad fhomhír, CFAE.

(4)

D’fhéadfadh an chaibidlíocht maidir le comhaontú idirnáisiúnta chun teacht in ionad an Chomhaontaithe Idirnáisiúnta um Adhmad Trópaiceach (‘an comhaontú nua’) tarlú i gComhdháil na Náisiún Aontaithe ar Thrádáil agus Forbairt nó i samhail rialachais mhalartach ar choinníoll gur féidir cuspóirí na caibidlíochta a bhaint amach ar bhealach éifeachtúil agus costéifeachtach.

(5)

Ba cheart raon feidhme an chomhaontaithe nua a bheith comhionann nó comhchosúil le raon feidhme CIAT 2006. Dá gcuirfí leis an raon feidhme, ba cheart údar maith a bheith leis sin agus ba cheart a sheachaint leis go mbeadh forluí ann le hionstraimí nó próisis idirnáisiúnta eile.

(6)

Ba cheart don Aontas páirt a ghlacadh sa chaibidlíocht maidir leis an gcomhaontú nua, chun a áirithiú go bhfuil sé i gcomhréir le beartais an Aontais, lena n-áirítear bainistiú inbhuanaithe agus caomhnú ar fhoraoisí trópaiceacha agus éascú trádála adhmaid thrópaicigh. Leis an gcomhaontú nua, ba cheart ionadaíocht chothrom do thíortha is táirgeoirí agus do thíortha is tomhaltóirí a áirithiú, tacú le bainistiú inbhuanaithe ar fhoraoisí, trádáil dhlíthiúil agus inbhuanaithe an adhmaid thrópaicigh a chur chun cinn, agus creat airgeadais agus rialachais éifeachtach cothrom a bhunú.

(7)

Is féidir leis na hábhair a chumhdaítear leis an gcaibidlíocht teacht faoi réimsí inniúlachta an Aontais agus faoi réimsí inniúlachta na mBallstát chomh maith.

(8)

Ba cheart, dá bhrí sin, an Coimisiún a údarú chun caibidlíocht a dhéanamh, thar ceann an Aontais, maidir leis na hábhair a thagann faoin gcomhbheartas tráchtála chomh maith le hábhair a thagann faoin mbeartas comhshaoil, a mhéid atá comhrialacha glactha ag an Aontas a a bhféadfadh an comhaontú nua difear a dhéanamh dóibh nó a bhféadfadh a athrú leis an gcomhaontú nua.

(9)

I gcomhréir le prionsabal an chomhair dhílis agus le prionsabal aontacht na hionadaíochta seachtraí, agus i bhfianaise na staide sonraí ina bhfuil an tAontas agus a Bhallstáit araon ina bpáirtithe in CIAT 2006, ba cheart don Choimisiún agus do na Ballstáit comhoibriú go dlúth le linn phróiseas na caibidlíochta, lena n-áirítear trí chomhordú rialta le saineolaithe teicniúla agus ionadaithe na mBallstát, chomh maith le rannpháirtíocht na saineolaithe teicniúla agus na n-ionadaithe sin i gcruinnithe d’fhonn tacú le seasamh an Aontais.

(10)

Ní dochar an comhordú le saineolaithe teicniúla agus ionadaithe na mBallstát do ról an choiste speisialta mar a leagtar amach in Airteagal 218(4) CFAE.

(11)

De réir mar a thagann forbairt ar an gcaibidlíocht, ba cheart na treoracha caibidlíochta a thabhairt cothrom le dáta, más gá.

(12)

Tá an Cinneadh seo gan dochar do roinnt na n-inniúlachtaí idir an tAontas agus a Bhallstáit maidir le síniú agus tabhairt i gcrích an chomhaontaithe nua, agus do chineál an chomhaontaithe nua, ós rud é gur cheart cineál an chomhaontaithe nua a chinneadh ag an gcéim sin,