(1)

Ir-Regolament (UE) 2016/429 jistabbilixxi regoli dwar il-mard tal-annimali li huwa trażmissibbli lill-annimali jew lill-bnedmin, inklużi rekwiżiti għaċ-ċertifikazzjoni uffiċjali tas-saħħa tal-annimali għal diversi movimenti ta’ annimali, prodotti ġerminali u prodotti li joriġinaw mill-annimali inklużi r-rekwiżiti għad-dħul fl-Unjoni. Dawk ir-rekwiżiti relatati mad-dħul fl-Unjoni ta’ annimali ħajjin, ta’ prodotti ġerminali u ta’ prodotti li joriġinaw mill-annimali huma speċifikati aktar fir-Regolament Delegat tal-Kummissjoni (UE) 2020/692 (3).

(2)

Ir-Regolament (UE) 2017/625 jistabbilixxi regoli għat-twettiq ta’ kontrolli uffiċjali u attivitajiet uffiċjali oħra mwettqa mill-awtoritajiet kompetenti tal-Istati Membri biex tiġi żgurata l-konformità mar-regoli msemmija fl-Artikolu 1(2) tiegħu, fost l-oħrajn, regoli dwar is-sikurezza tal-ikel fl-istadji kollha tal-produzzjoni, l-ipproċessar u d-distribuzzjoni, u r-rekwiżiti tas-saħħa u t-trattament xieraq tal-annimali u l-prodotti sekondarji tal-annimali.

(3)

Ir-Regolament ta’ Implimentazzjoni tal-Kummissjoni (UE) 2020/2235 (4) jistabbilixxi mudelli taċ-ċertifikati uffiċjali/tas-saħħa tal-annimali għad-dħul fl-Unjoni ta’ annimali, ta’ prodotti ta’ oriġini mill-annimali, ta’ prodotti komposti, ta’ prodotti ġerminali, ta’ prodotti sekondarji mill-annimali, ta’ nebbieta għall-konsum mill-bniedem u ta’ żrieragħ maħsuba għall-produzzjoni ta’ nebbieta għall-konsum mill-bniedem

(4)

Madankollu, ir-Regolament ta’ Implimentazzjoni (UE) 2020/2235 ma jinkludi l-ebda mudell ta’ ċertifikat biex ikopri d-dħul fl-Unjoni ta’ dawk il-prodotti u l-oġġetti li joriġinaw fl-Unjoni u li jiġu mċaqalqa lejn pajjiż jew territorju terz, u mbagħad jiġu mċaqalqa lura lejn l-Unjoni minn dak il-pajjiż terz jew territorju wara li jinħattu, jinħażnu u jitgħabbew mill-ġdid. Huwa għalhekk meħtieġ li dak ir-Regolament ta’ Implimentazzjoni jiġi emendat biex jipprevedi t-tali tip ta’ mudell ta’ ċertifikat u jevita interruzzjonijiet kummerċjali mhux dovuti f’każijiet bħal dawn.

(5)

L-Artikolu 229 tar-Regolament (UE) 2016/429 jirrikjedi li l-konsenji ta’ annimali, ta’ prodotti ġerminali u ta’ prodotti li joriġinaw mill-annimali li jidħlu fl-Unjoni jridu jkunu ġejjin minn pajjiż terz jew minn territorju, jew żona jew kompartiment tiegħu, elenkati skont l-Artikolu 230(1) ta’ dak ir-Regolament.

(6)

Ir-Regolament Delegat (UE) 2020/692 jissupplimenta r-Regolament (UE) 2016/429 fir-rigward tar-rekwiżiti tas-saħħa tal-annimali għad-dħul fl-Unjoni ta’ konsenji ta’ annimali, prodotti ġerminali u prodotti li joriġinaw mill-annimali minn pajjiżi terzi jew territorji jew żoni tagħhom, jew minn kompartimenti tagħhom fil-każ ta’ annimali tal-akkwakultura. Il-punt (a) tal-ewwel paragrafu tal-Artikolu 3 tar-Regolament Delegat (UE) 2020/692 jipprevedi li kunsinni ta’ annimali, prodotti ġerminali u prodotti li joriġinaw mill-annimali li jaqgħu fil-kamp ta’ applikazzjoni tiegħu jistgħu jitħallew jidħlu fl-Unjoni biss jekk ikunu ġejjin minn pajjiż terz jew territorju, jew żona jew kompartiment tiegħu, elenkati għall-ispeċijiet partikolari ta’ annimali, prodotti ġerminali u prodotti li joriġinaw mill-annimali f’konformità mar-rekwiżiti tas-saħħa tal-annimali stipulati f’dak ir-Regolament Delegat.

(7)

Ir-Regolament ta’ Implimentazzjoni tal-Kummissjoni (UE) 2021/404 (5) jistabbilixxi l-listi ta’ pajjiżi terzi, territorji jew żoni tagħhom, jew kompartimenti tagħhom fil-każ ta’ annimali tal-akkwakultura, li minnhom huwa permess id-dħul fl-Unjoni ta’ dawk l-ispeċijiet u l-kategoriji ta’ annimali u ta’ dawk il-kategoriji ta’ prodotti ġerminali u prodotti li joriġinaw mill-annimali li jaqgħu fil-kamp ta’ applikazzjoni tar-Regolament Delegat (UE) 2020/692.

(8)

L-Anness XXII tar-Regolament ta’ Implimentazzjoni (UE) 2021/404 jipprevedi l-lista ta’ pajjiżi terzi awtorizzati għad-dħul fl-Unjoni ta’ kunsinni ta’ annimali, ta’ prodotti ġerminali jew ta’ prodotti li joriġinaw mill-annimali li joriġinaw fl-Unjoni u li jirritornaw lejha wara li jkunu ġew ittrasportati minn pajjiż terz jew minn territorju. Jenħtieġ li dak l-Anness jiġi emendat biex jelenka l-pajjiżi jew it-territorji terzi awtorizzati għad-dħul fl-Unjoni ta’ kunsinni ta’ prodotti li joriġinaw mill-annimali li joriġinaw fl-Unjoni li, wara l-ħżin f’dawk il-pajjiżi jew territorji terzi, jiġu mċaqalqa lura lejn l-Unjoni u jassenja l-kundizzjonijiet speċifiċi li jeħtieġ li jiġu ssodisfati f’każijiet bħal dawn.

(9)

Ir-Regolament (UE) 2017/625 jistabbilixxi wkoll li l-kunsinni ta’ ċerti annimali u oġġetti għandhom jidħlu biss fl-Unjoni minn pajjiż terz jew reġjun tiegħu li jidher fuq lista mħejjija mill-Kummissjoni għal dak l-iskop.

(10)

Ir-Regolament Delegat tal-Kummissjoni (UE) 2019/625 (6) jissupplimenta r-Regolament (UE) 2017/625 fir-rigward ta’ kundizzjonijiet għad-dħul fl-Unjoni ta’ kunsinni ta’ ċerti annimali u oġġetti maħsuba għall-konsum mill-bniedem minn pajjiżi terzi jew reġjuni tagħhom biex jiġi żgurat li dawn jikkonformaw mar-rekwiżiti rilevanti stabbiliti mir-regoli msemmija fl-Artikolu 1(2)(a) tar-Regolament (UE) 2017/625 jew mar-rekwiżiti rikonoxxuti li huma tal-inqas ekwivalenti.

(11)

Ir-Regolament ta’ Implimentazzjoni tal-Kummissjoni (UE) 2021/405 (7) jistabbilixxi l-listi ta’ pajjiżi terzi jew reġjuni tagħhom li minnhom huwa permess id-dħul fl-Unjoni ta’ prodotti li joriġinaw mill-annimali u ċerti oġġetti, li jissupplimentaw il-listi stabbiliti fir-Regolament ta’ Implimentazzjoni (UE) 2021/404. Sabiex jippermetti d-dħul fl-Unjoni ta’ prodotti li joriġinaw mill-annimali li ma jaqgħux fil-kamp ta’ applikazzjoni tar-Regolament Delegat (UE) 2020/692, jenħtieġ li r-Regolament ta’ Implimentazzjoni (UE) 2021/405 jiġi emendat biex jelenka l-pajjiżi terzi jew ir-reġjuni awtorizzati għad-dħul fl-Unjoni ta’ kunsinni ta’ dawn il-prodotti li joriġinaw mill-annimali u ċerti oġġetti li joriġinaw mill-Unjoni li, wara l-ħżin f’dawk il-pajjiżi jew reġjuni terzi, tiġi ttrasportata lura lejn l-Unjoni u tikkonforma mal-kundizzjonijiet stabbiliti fir-Regolament Delegat (UE) 2019/625.

(12)

Għalhekk jenħtieġ li r-Regolamenti ta’ Implimentazzjoni (UE) 2020/2235, (UE) 2021/404 u (UE) 2021/405 jiġu emendati skont dan.

(13)

Fl-interess taċ-ċertezza tad-dritt, jenħtieġ li dan ir-Regolament jidħol fis-seħħ b’urġenza.

(14)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

L-Artikolu 30a li ġej jiddaħħal bejn l-Artikoli 30 u 31:

2.

L-Anness III hu emendat skont l-Anness I ta’ dan ir-Regolament.