1

Permezz tar-rikors tiegħu, ir-rikorrent, CQ, jitlob, minn naħa, abbażi tal-Artikolu 263 TFUE, l-annullament tad-deċiżjoni tal-Qorti Ewropea tal-Awdituri tal‑11 ta’ April 2019 dwar konstatazzjoni ta’ kreditu u rkupru fir-rigward tiegħu, li permezz tagħha hija kkwantifikat is-somma ta’ EUR 153 407.58 bħala ammont indebitament irċevut abbażi tal-ispejjeż tal-missjonijiet u tal-allowances ta’ kuljum, tal-ispejjeż ta’ rappreżentanza kif ukoll tal-użu ta’ servizzi ta’ xufiera u ordnat l-irkupru ta’ din is-somma (iktar ’il quddiem id-“deċiżjoni kkontestata”) u, min-naħa l-oħra, abbażi tal-Artikolu 268 TFUE, il-kumpens għad-dannu morali li huwa ġarrab.

I.

Il‑kuntest ġuridiku

A.

It‑Trattat FUE

2

L-Artikolu 285 TFUE jipprovdi:

3

L-Artikolu 286(3) u (6) TFUE huwa fformulat kif ġej:

B.

Ir‑Regolament (UE, Euratom) Nru 883/2013

4

L-Artikolu 1(1) tar-Regolament (UE, Euratom) Nru 883/2013 tal-Parlament Ewropew u tal-Kunsill tal‑11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal-Kunsill (Euratom) Nru 1074/1999 (ĠU 2013, L 248, p. 1) huwa fformulat kif ġej:

5

L-Artikolu 4(1) u (2) tar-Regolament Nru 883/2013 jipprevedi kif ġej:

6

L-Artikolu 5(1) sa (3) tar-Regolament Nru 883/2013 jipprovdi kif ġej:

7

L-Artikolu 7(2) tar-Regolament 883/2013 jipprovdi kif ġej:

8

L-Artikolu 9(4) tar-Regolament Nru 883/2013 jippreċiża kif ġej:

9

L-Artikolu 11(4) tar-Regolament Nru 883/2013 huwa fformulat kif ġej:

C.

Ir‑regoli interni adottati mill‑Qorti tal‑Awdituri

1.

Id‑Deċiżjoni Nru 1‑2003 dwar l‑ispejjeż tal‑missjonijiet tal‑Membri tal‑Qorti tal‑Awdituri

10

L-Artikolu 1 tad-Deċiżjoni tal-Qorti tal-Awdituri Nru 1‑2003 tas‑16 ta’ Jannar 2003 dwar l-ispejjeż tal-missjonijiet tal-Membri tal-Qorti tal-Awdituri, applikabbli fiż-żmien tal-fatti msemmija f’dan ir-rikors (iktar ’il quddiem id-“Deċiżjoni Nru 1‑2003”), kien jispeċifika kif ġej:

11

L-Artikolu 3 tad-Deċiżjoni Nru 1‑2003 kien redatt kif ġej:

12

L-Artikolu 5 tad-Deċiżjoni Nru 1/2003 kien jipprovdi kif ġej:

13

L-Artikolu 6 tad-Deċiżjoni Nru 1‑2003 kien ifformulat kif ġej:

2.

Id‑Deċiżjoni Nru 7‑2004 dwar l‑ispejjeż ta’ rappreżentanza u ta’ ospitalità tal‑Membri tal‑Qorti tal‑Awdituri

14

L-Artikolu 2 tad-Deċiżjoni tal-Qorti tal-Awdituri Nru 7‑2004 tat‑22 ta’ April 2004 dwar l-ispejjeż ta’ rappreżentanza u ta’ ospitalità tal-Membri tagħha, applikabbli fiż-żmien tal-fatti msemmija f’dan ir-rikors (iktar ’il quddiem id-“Deċiżjoni Nru 7‑2004”), kien jipprovdi kif ġej:

15

L-Artikolu 6 tad-Deċiżjoni 7‑2004 kien jipprevedi kif ġej:

16

Id-Deċiżjoni Nru 7‑2004 kienet akkumpanjata min-nota indirizzata lill-Membri tal-Qorti tal-Awdituri, tat‑22 ta’ April 2004, li tinkludi “suġġerimenti dwar l-ispejjeż ta’ rappreżentanza u ta’ ospitalità” (iktar ’il quddiem in-“nota tat‑22 ta’ April 2004”). Skont din in-nota, kien indikat b’mod partikolari dan li ġej:

17

L-Anness 1 tan-nota tat‑22 ta’ April 2004 kien jispeċifika li “ir-rappreżentanza/ir-riċevimenti barra mill-Qorti [tal-Awdituri] [kellhom] bħala regola ġenerali jikkonċernaw persuni li jeżerċitaw funzjonijiet ewlenin fi ħdan l-Unjoni […], l-Istati Membri jew pajjiżi oħra” [traduzzjoni mhux uffiċjali] u li l-ispejjeż ta’ rappreżentanza/riċevimenti fir-residenza privata tal-Membru “ma [kellhomx] jeċċedu dak li [kien] neċessarju għal dan il-għan, inklużi l-arranġamenti ta’ fjuri”. [traduzzjoni mhux uffiċjali]

18

Dan l-anness kien jipprovdi wkoll li, “[m]eta l-lista tal-mistednin [kienet] tinkludi, minbarra l-persuni esterni għall-istituzzjoni, uffiċjali tal-Qorti [tal-Awdituri], [kellu] jinżamm bilanċ ġust bejn iż-żewġ kategoriji” [traduzzjoni mhux uffiċjali] u li “l-ħbieb personali u l-membri tal-familja (bl-eċċezzjoni tal-konjuġi/imsieħba) [kellhom] ikunu s-suġġett ta’ stedina privata bi spejjeż tal-Membru”. [traduzzjoni mhux uffiċjali]

3.

Id‑Deċiżjoni Nru 33‑2004 dwar il‑ġestjoni u l‑użu tal‑flotta ta’ vetturi bil‑mutur tal‑Qorti tal‑Awdituri

19

L-Artikolu 1 tad-Deċiżjoni tal-Qorti tal-Awdituri Nru 33‑2004 tal‑15 ta’ Ġunju 2004 dwar il-ġestjoni u l-użu tal-flotta ta’ vettura bil-mutur tal-Qorti tal-Awdituri, applikabbli fiż-żmien tal-fatti msemmija f’dan ir-rikors sad-dħul fis-seħħ tad-Deċiżjoni tal-Qorti tal-Awdituri Nru 19‑2009 tal‑20 ta’ April 2009 dwar il-ġestjoni u l-użu tal-flotta ta’ vetturi bil-mutur tal-Qorti tal-Awdituri (iktar ’il quddiem id-“Deċiżjoni Nru 33‑2004”), kien jipprovdi kif ġej:

20

L-Artikolu 4 tad-Deċiżjoni Nru 33‑2004 kien ifformulat kif ġej:

–

il-vjaġġi koperti minn ordni ta’ missjoni,

–

il-vjaġġi l-oħra marbuta mal-eżerċizzju tal-funzjonijiet evalwati bir-rata fissa ta’ 15 000 km/sena.” [traduzzjoni mhux uffiċjali]

21

L-Artikolu 5 tad-Deċiżjoni Nru 33‑2004 kien redatt kif ġej:

22

L-Artikolu 6 tad-Deċiżjoni 33‑2004 kien jipprevedi kif ġej:

23

Id-Deċiżjoni Nru 33‑2004 kienet akkumpanjata minn dokument bit-titolu “Kummenti dwar id-Deċiżjoni Nru 33‑2004 dwar il-ġestjoni u l-użu tal-flotta ta’ vetturi bil-mutur tal-Qorti tal-Awdituri” (iktar ’il quddiem il-“Kummenti dwar id-Deċiżjoni Nru 33‑2004”).

24

Skont il-Kummenti dwar id-Deċiżjoni Nru 33‑2004 fir-rigward tal-Artikolu 4 ta’ din id-deċiżjoni, kien previst kif ġej:

–

il-vjaġġi bejn id-dar (fil-post ta’ assenjazzjoni) u l-post tax-xogħol,

–

il-vjaġġi bejn il-post ta’ assenjazzjoni jew ir-residenza u l-ajruport,

–

l-obbligi protokollari li jseħħu f’distanza qasira u li ma jkunux koperti minn ordni ta’ missjoni,

–

il-każijiet ta’ forza maġġuri (mard, kontrolli mediċi, impossibbiltà tas-sewqan, eċċ.)” [traduzzjoni mhux uffiċjali]

4.

Id‑Deċiżjoni Nru 19‑2009 dwar il‑ġestjoni u l‑użu tal‑flotta ta’ vetturi bil‑mutur tal‑Qorti tal‑Awdituri

25

Il-formulazzjoni tal-Artikoli 1 u 4 sa 6 tad-Deċiżjoni Nru 19‑2009 tal‑20 ta’ April 2009 dwar il-ġestjoni u l-użu tal-flotta ta’ vetturi bil-mutur tal-Qorti tal-Awdituri, irriproduċiet dik tal-artikoli korrispondenti tad-Deċiżjoni Nru 33‑2004.

26

L-Artikolu 7 tad-Deċiżjoni Nru 19‑2009 kien jipprovdi kif ġej:

27

Id-Deċiżjoni Nru 19‑2009 kienet akkumpanjata minn dokument bit-titolu “Kummenti dwar id-Deċiżjoni Nru 19‑2009 dwar il-ġestjoni u l-użu tal-flotta ta’ vetturi bil-mutur tal-Qorti tal-Awdituri” (iktar ’il quddiem il-“Kummenti dwar id-Deċiżjoni Nru 19‑2009”).

28

Il-formulazzjoni tal-Kummenti dwar id-Deċiżjoni Nru 19‑2009 dwar l-Artikolu 4 ta’ din id-deċiżjoni kienet tirriproduċi dik tal-Kumment dwar l-Artikolu 4 tad-Deċiżjoni Nru 33‑2004 li jinsab fil-Kummenti dwar din l-aħħar deċiżjoni.

5.

Il‑Kodiċi ta’ Kondotta għall‑Membri tal‑Qorti tal‑Awdituri tal‑2012

29

L-Artikolu 2(1), (2) u (4) tal-Kodiċi ta’ Kondotta għall-Membri tal-Qorti tal-Awdituri, adottat minn din l-istituzzjoni fit‑8 ta’ Frar 2012 (iktar ’il quddiem il-“Kodiċi ta’ Kondotta tal‑2012”), kien ifformulat kif ġej:

30

L-Artikolu 4 tal-Kodiċi ta’ Kondotta tal‑2012 kien jipprovdi kif ġej:

II.

Il‑fatti li wasslu għall‑kawża

31

Ir-rikorrent kien Membru tal-Qorti tal-Awdituri mill‑1 ta’ Marzu 2006 sat‑30 ta’ April 2018, meta ntemm it-tieni mandat tiegħu. Qabel ma nħatar fil-Qorti tal-Awdituri, huwa okkupa diversi funzjonijiet politiċi fir-Renju tal-Belġju sa mis-snin 1980. Sal‑2002, huwa kien membru ta’ partit politiku u, mill‑2002, huwa kien jappartjeni għal partit politiku ieħor (iktar ’il quddiem il-“partit politiku inkwistjoni”).

32

Matul il-mandati tiegħu, huwa kien assenjat lill-Awla III tal-Qorti tal-Awdituri li hija responsabbli għall-awditjar tal-ispejjeż tal-Unjoni Ewropea fil-qasam tar-relazzjonijiet esterni, tat-tkabbir u tal-għajnuna umanitarja. Għal madwar seba’ snin, ir-rikorrent eżerċita l-funzjoni ta’ dekan ta’ din l-awla.

33

Wara opinjoni favorevoli tal-kumitat responsabbli għall-evalwazzjoni tal-attivitajiet esterni tal-Membri tal-Qorti tal-Awdituri, ir-rikorrent ġie awtorizzat, permezz ta’ deċiżjoni tat‑30 ta’ April 2015, jeżerċita l-Presidenza ta’ fondazzjoni ambjentali tar-reġjun ta’ oriġini tiegħu.

34

Bħala Membru tal-Qorti tal-Awdituri, ir-rikorrent ibbenefika mir-rimbors tal-ispejjeż ta’ rappreżentanza u ta’ ospitalità u ta’ spejjeż varji sostnuti matul missjonijiet awtorizzati, fuq talba tiegħu, mill-President tal-Qorti tal-Awdituri, kif ukoll mill-ħlas ta’ allowances ta’ kuljum relatati ma’ dawn il-missjonijiet.

35

Ir-rikorrent kellu karozza uffiċjali. Bejn is-sena 2006 u Marzu 2014, il-Qorti tal-Awdituri assenjat xufier għad-dispożizzjoni tiegħu. Minn April 2014, ir-rikorrent seta’ jitlob it-tqegħid għad-dispożizzjoni ta’ xufier assenjat lill-“grupp tax-xufiera” taħt ir-responsabbiltà tad-Direttur tal-Finanzi tal-Qorti tal-Awdituri.

A.

Il‑miżuri preliminari adottati mill‑Qorti tal‑Awdituri

36

Matul is-sena 2016, informazzjoni dwar diversi irregolaritajiet serji imputati lir-rikorrent waslu quddiem il-Qorti tal-Awdituri. Fit‑18 ta’ Lulju 2016, is-Segretarju Ġenerali tagħha informa oralment lir-rikorrent bid-denunzja li kienet saret fil-konfront tiegħu.

37

Id-dipartimenti tal-Qorti tal-Awdituri wettqu, matul is-sajf tal‑2016, analiżi tal-missjonijiet tar-rikorrent u ta’ dawk tax-xufiera tal-Qorti tal-Awdituri li għalihom huwa kien stabbilixxa ordnijiet ta’ missjoni, bil-għan li jiġu identifikati eventwali irregolaritajiet. Sussegwentement, ġew skambjati diversi ittri bejn dawn id-dipartimenti u r-rikorrent, fir-rigward tal-allegata irregolarità ta’ ċerti missjonijiet tiegħu jew ta’ dawn ix-xufiera u fir-rigward tat-talba tal-Qorti tal-Awdituri għar-rimbors tas-somom mitluba. Ir-rikorrent qies li l-irregolarità allegata kienet infondata u rrifjuta li jirrimborsa s-somom mitluba mill-Qorti tal-Awdituri.

38

Barra minn hekk, fis‑26 ta’ Lulju 2016, il-Qorti tal-Awdituri ġiet informata dwar allegazzjonijiet li jirrigwardaw it-twettiq mir-rikorrent ta’ frodi tal-assigurazzjoni matul is-sena 2011, wara inċident bejn il-karozza uffiċjali tiegħu u l-karozza personali tiegħu. Fl‑1 ta’ Settembru 2016, is-Segretarju Ġenerali tal-Qorti tal-Awdituri indika oralment dawn l-allegazzjonijiet lir-rikorrent. Permezz ta’ nota tal-istess jum, ir-rikorrent sostna li l-inċident inkwistjoni kien irriżulta minn ħabta bejn il-karozza uffiċjali tiegħu, misjuqa mix-xufier assenjat lill-uffiċċju tiegħu, u l-karozza privata tiegħu, misjuqa minn ibnu.

B.

L‑investigazzjoni tal‑OLAF

39

Fl‑14 ta’ Ottubru 2016, is-Segretarju Ġenerali tal-Qorti tal-Awdituri, li kien qiegħed jaġixxi fuq istruzzjonijiet mill-President tal-Qorti tal-Awdituri, bagħat fajl lill-Uffiċċju Ewropew ta’ Kontra l-Frodi (OLAF) dwar l-attivitajiet tar-rikorrent li kienu wasslu għal spejjeż possibbilment indebiti min-naħa tal-baġit tal-Unjoni. L-OLAF ħa d-deċiżjoni li jiftaħ investigazzjoni f’dan ir-rigward fil‑15 ta’ Novembru 2016.

40

Fil‑31 ta’ Marzu 2017, id-Direttur Ġenerali tal-OLAF innotifika formalment lill-President tal-Qorti tal-Awdituri dwar il-ftuħ ta’ investigazzjoni dwar eventwali irregolaritajiet, li kienu jinvolvu lir-rikorrent u li kienu jaffettwaw l-interessi finanzjarji tal-Unjoni, fl-użu tal-assi tal-Qorti tal-Awdituri u fil-missjonijiet imwettqa jew awtorizzati bi ksur tar-regoli applikabbli.

41

Fit‑22 ta’ Settembru 2017, ir-rikorrent ġie informat mill-OLAF dwar il-ftuħ ta’ din l-investigazzjoni u dwar l-istatus tiegħu ta’ “persuna kkonċernata” għall-finijiet ta’ din l-investigazzjoni.

42

Fl‑20 ta’ Novembru 2017, l-OLAF wettaq spezzjoni fl-uffiċċju tar-rikorrent u ġabar, f’din l-okkażjoni, diversi dokumenti. Wara l-ewwel analiżi tagħhom, l-OLAF, fil‑15 ta’ Diċembru 2017, informa lir-rikorrent li s-suġġett tal-investigazzjoni kien ġie estiż għal possibbiltajiet ta’ kunflitti ta’ interessi u għal ksur ieħor tal-Artikoli 285 u 286 TFUE kif ukoll tad-dispożizzjonijiet tal-Kodiċi ta’ Kondotta tal‑2012.

43

Ir-rikorrent instema’ oralment mill-investigaturi tal-OLAF fit‑22 ta’ Diċembru 2017. Wara li l-OLAF ikkomunikalu sunt tal-fatti stabbiliti fi tmiem l-investigazzjoni, ir-rikorrent bagħat lill-OLAF, fil‑15 ta’ Mejju 2018, osservazzjonijiet bil-miktub.

44

Fit‑2 ta’ Lulju 2018, il-Qorti tal-Awdituri rċeviet ir-rapport finali tal-OLAF bil-konklużjonijiet tal-investigazzjoni (iktar ’il quddiem ir-“rapport tal-OLAF”). Dan ir-rapport ikkonkluda, fir-rigward tar-rikorrent, li kien hemm abbuż tar-riżorsi tal-Qorti tal-Awdituri fil-kuntest ta’ attivitajiet li ma kinux marbuta mal-funzjonijiet tiegħu, abbuż ta’ karti tal-fjuwil, abbuż mill-kuntratt ta’ assigurazzjoni ta’ vetturi bil-mutur fuq il-karozza uffiċjali tiegħu, assenzi inġustifikati, nuqqas ta’ dikjarazzjoni ta’ attivitajiet esterni, it-trażmissjoni ta’ informazzjoni kunfidenzjali u l-eżistenza ta’ kunflitti ta’ interessi.

45

Fid-dawl tal-konstatazzjonijiet magħmula fir-rapport tiegħu, l-OLAF irrakkomanda lill-Qorti tal-Awdituri tibda proċeduri dixxiplinari kontra r-rikorrent, tadotta l-miżuri xierqa sabiex tiżgura l-irkupru ta’ EUR 472 869.09, li jikkorrispondu għall-ispejjeż indebitament sostnuti mill-Qorti tal-Awdituri, u tqis l-irkupru ta’ EUR 97 954.52, li jikkorrispondu għas-salarju mħallas għall-perijodi ta’ assenzi inġustifikati tar-rikorrent.

46

Barra minn hekk, peress li qies li xi wħud mill-fatti żvelati mill-investigazzjoni setgħu jikkostitwixxu reati kriminali, l-OLAF bagħat l-informazzjoni u r-rakkomandazzjonijiet tiegħu lill-awtoritajiet ġudizzjarji tal-Gran Dukat tal-Lussemburgu.

C.

Il‑proċeduri kriminali mibdija mill‑awtoritajiet tal‑Gran Dukat tal‑Lussemburgu

47

Fid-dawl tal-informazzjoni mibgħuta mill-OLAF, il-procureur d’État près le tribunal d’arrondissement de Luxembourg (il-Prosekutur Pubbliku fi ħdan il-Qorti Distrettwali tal-Lussemburgu, il-Lussemburgu), b’ittra tal‑1 ta’ Ottubru 2018, talab li l-Qorti tal-Awdituri tneħħi l-immunità minn proċeduri legali tar-rikorrent. Din tal-aħħar laqgħet din it-talba fil‑15 ta’ Novembru 2018.

D.

Bidu tal‑proċedura fi ħdan il‑Qorti tal‑Awdituri

48

Fit‑3 ta’ Lulju 2018, il-President tal-Qorti tal-Awdituri bagħat lill-Membri tal-Qorti tal-Awdituri kopja tar-rapport tal-OLAF u tar-rakkomandazzjonijiet magħmula minn dan l-organu.

49

Fil‑5 ta’ Ottubru 2018, il-President tal-Qorti tal-Awdituri bagħat rapport preliminari lill-Membri tal-Qorti tal-Awdituri. Dan ir-rapport kien jirrakkomanda li l-Qorti tal-Ġustizzja tintalab “teżamina l-fatti kif [kien ġew] stabbiliti u tiddetermina jekk ir-rikorrent [kienx] naqas milli jwettaq l-obbligi li jirriżultaw mill-kariga tiegħu”. L-imsemmi rapport u r-rapport tal-OLAF ġew ikkomunikati lir-rikorrent fl-istess jum. L-annessi tar-rapport tal-OLAF intbagħtulu, barra minn hekk, fis‑17 ta’ Ottubru 2018.

50

Fid‑19 ta’ Novembru 2018, ir-rikorrent bagħat osservazzjonijiet bil-miktub lill-Qorti tal-Awdituri. Fis‑26 ta’ Novembru 2018, huwa nstema’ mill-Membri tal-Qorti tal-Awdituri f’sessjoni in camera.

51

Fid‑29 ta’ Novembru 2018, matul laqgħa in camera, il-Qorti tal-Awdituri ddeċidiet li tgħaddi l-każ tar-rikorrent quddiem il-Qorti tal-Ġustizzja tal-Unjoni Ewropea b’applikazzjoni tal-Artikolu 286(6) TFUE.

E.

Il‑proċedura quddiem il‑Qorti tal‑Ġustizzja tal‑Unjoni Ewropea

52

Permezz tar-rikors tagħha, ippreżentat fil‑15 ta’ Frar 2019, il-Qorti tal-Awdituri talbet lill-Qorti tal-Ġustizzja tal-Unjoni Ewropea tikkonstata li r-rikorrent ma kienx baqa’ jissodisfa l-obbligi li jirriżultaw mill-kariga tiegħu u, konsegwentement, timponi s-sanzjoni prevista fl-Artikolu 286(6) TFUE.

53

Permezz tas-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), il-Qorti tal-Ġustizzja ddeċidiet li r-rikorrent kien kiser l-obbligi li jirriżultaw mill-kariga tiegħu mal-Qorti tal-Awdituri u ddikjarat it-telf ta’ żewġ terzi tad-dritt għall-pensjoni tar-rikorrent mid-data tal-għoti tal-imsemmija sentenza.

F.

L‑irkupru mill‑Qorti tal‑Awdituri tal‑ispejjeż meqjusa bħala indebiti

54

Permezz ta’ ittra tal‑14 ta’ Diċembru 2018 u ittra ta’ emenda tat‑23 ta’ Jannar 2019, is-Segretarju Ġenerali tal-Qorti tal-Awdituri informa lir-rikorrent bl-intenzjoni tiegħu li jipproċedi għall-irkupru ta’ EUR 160 839.89 favur l-Unjoni. Dawn l-ittri kienu jinkludu fl-anness tabella tal-ispejjeż meqjusa bħala indebiti (iktar ’il quddiem it-“tabella ta’ rkupru”). Ir-rikorrent wieġeb għal dawn l-ittri billi fl‑4 ta’ Frar 2019 issottometta osservazzjonijiet.

55

Fil‑11 ta’ April 2019, is-Segretarju Ġenerali tal-Qorti tal-Awdituri adotta d-deċiżjoni kkontestata. Huwa ddeċieda:

–

li ammont ta’ EUR 33 172.91 kien indebitament tħallas lir-rikorrent bħala spejjeż tal-missjonijiet u tal-allowances ta’ kuljum,

–

li ammont ta’ EUR 49 138.25 kien indebitament tħallas favur ir-rikorrent bħala spejjeż ta’ rappreżentanza,

–

li ammont totali ta’ EUR 71 096.42 (EUR 30 501.27 ta’ salarji flimkien ma’ EUR 40 595.15 ta’ spejjeż tal-missjoni u tal-allowances ta’ kuljum) kien indebitament ġie mitlub mill-baġit tal-Unjoni mir-rikorrent minħabba l-użu abbużiv tas-servizzi ta’ xufiera tal-Qorti tal-Awdituri,

–

li, b’kooperazzjoni mal-uffiċjal tal-kontabbiltà tal-Qorti tal-Awdituri, kien ser jiġi rkuprat ammont totali ta’ EUR 153 407.58 sal‑31 ta’ Mejju 2019.

56

Permezz ta’ ittra tal‑4 ta’ Ġunju 2019, wara li kkonstata n-nuqqas ta’ ħlas tal-ammont totali ta’ EUR 153 407.58 sal‑31 ta’ Mejju 2019, l-uffiċjal tal-kontabbiltà tal-Qorti tal-Awdituri talab il-ħlas tas-somma indebita, flimkien mal-interessi moratorji bir-rata ta’ 3.5 %, jiġifieri ammont ta’ EUR 153 584.10.

57

Permezz ta’ ittra tas‑7 ta’ Ġunju 2019, l-uffiċjal tal-kontabbiltà tal-Qorti tal-Awdituri kkonstata l-ħlas ta’ EUR 153 584.10 permezz ta’ trasferiment bankarju. Fid-dawl tad-data ta’ dan il-ħlas, l-uffiċjal tal-kontabbiltà naqqset l-ammont tal-interessi dovuti, billi rrimborsat ammont ta’ EUR 88.26, peress li, f’din id-data, id-debitu tar-rikorrent kien jammonta għal EUR 153 495.84.

III.

It‑talbiet tal‑partijiet

58

Ir-rikorrent jitlob li l-Qorti Ġenerali jogħġobha:

–

tannulla d-deċiżjoni kkontestata;

–

sa fejn ikun meħtieġ, tannulla ż-żewġ deċiżjonijiet tal-uffiċjal tal-kontabbiltà tal-Qorti tal-Awdituri tal‑4 u tas‑7 ta’ Ġunju 2019;

–

tikkundanna lill-Qorti tal-Awdituri tirrimborsa s-somma ta’ EUR 153 495.84 (EUR 153 407.58 flimkien ma’ EUR 88.26 bħala interessi moratorji li ġew imputati lilu) flimkien mal-interessi moratorji bir-rata ta’ 3.5 % sal-ħlas sħiħ;

–

tikkundanna lill-Qorti tal-Awdituri tikkumpensah għad-dannu morali mġarrab;

–

tikkundanna lill-Qorti tal-Awdituri għall-ispejjeż.

59

Il-Qorti tal-Awdituri titlob li l-Qorti Ġenerali jogħġobha:

–

tiċħad ir-rikors bħala parzjalment inammissibbli u parzjalment infondat;

–

tiċħad it-talba għad-danni bħala inammissibbli;

–

tikkundanna lir-rikorrent għall-ispejjeż kollha tal-kawża.

IV.

Id‑dritt

A.

Fuq it‑talbiet għall‑annullament tad‑deċiżjoni kkontestata

60

Insostenn tat-talbiet tiegħu għal annullament, ir-rikorrent iqajjem sitt motivi, ibbażati, l-ewwel wieħed, fuq l-irregolarità tal-investigazzjoni tal-OLAF u tar-rapport tiegħu, it-tieni wieħed, fuq l-assenza ta’ eżerċizzju mill-Qorti tal-Awdituri tas-setgħa ta’ evalwazzjoni tagħha, b’mod partikolari bħala uffiċjal awtorizzanti, fuq il-ksur tal-obbligu tagħha li tipprova l-akkuża u fuq il-ksur tal-obbligu ta’ motivazzjoni tagħha, it-tielet wieħed, fuq il-ksur tat-terminu raġonevoli, ir-raba’ wieħed, fuq il-ksur tal-prinċipji ta’ ċertezza legali u ta’ protezzjoni tal-aspettattivi leġittimi, kif ukoll fuq l-eżistenza ta’ “żbalji manifesti”, il-ħames wieħed, fuq il-ksur tal-massima li l-proċeduri kriminali jżommu l-proċeduri amministrattivi sospiżi u, is-sitt wieħed, fuq il-ksur tal-obbligu ta’ motivazzjoni fir-rigward tal-użu tas-servizzi ta’ xufiera u fuq il-ksur tal-Artikolu 75 tar-Regolament (UE, Euratom) Nru 966/2012 tal-Parlament Ewropew u tal-Kunsill tal‑25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002(ĠU 2012, L 298, p. 1), jew tal-Artikolu 94 tar-Regolament (UE, Euratom) 2018/1046 tal-Parlament Ewropew u tal-Kunsill tat‑18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU 2018, L 193, p. 1, rettifika fil-ĠU 2019, L 60, p. 36).

1.

Fuq l‑ewwel motiv ibbażat fuq l‑irregolarità tal‑investigazzjoni tal‑OLAF u tar‑rapport tiegħu

61

Ir-rikorrent isostni li l-investigazzjoni tal-OLAF u r-rapport tiegħu huma irregolari għal tliet raġunijiet, jiġifieri l-OLAF estenda illegalment il-portata tal-investigazzjoni tiegħu, l-OLAF kiser id-dritt tar-rikorrent għall-ħajja privata u l-OLAF ma rrispettax id-drittijiet tad-difiża tar-rikorrent.

62

Il-Qorti tal-Awdituri tikkontesta l-argumenti tar-rikorrent.

63

Għandu jiġi kkonstatat li l-argument tar-rikorrent dwar l-irregolarità tal-investigazzjoni tal-OLAF u tar-rapport tiegħu għall-finijiet ta’ din il-kawża jissovrapponi essenzjalment ma’ dak ippreżentat fil-proċedura prevista fl-Artikolu 286(6) TFUE (punti 126 sa 134 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782)) u miċħud mill-Qorti tal-Ġustizzja fil-punti 140 sa 175 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

64

Fil-fatt, qabel kollox, il-Qorti tal-Ġustizzja rrikonoxxiet li l-OLAF kien iddeċieda li jestendi s-suġġett tal-investigazzjoni, inizjalment miftuħa fir-rigward ta’ eventwali irregolaritajiet li jimplikaw lir-rikorrent u li jaffettwaw l-interessi finanzjarji tal-Unjoni, fl-użu tal-assi tal-Qorti tal-Awdituri u fil-missjonijiet imwettqa jew awtorizzati bi ksur tar-regoli applikabbli, għal kunflitti possibbli ta’ interessi u għal ksur ieħor tal-Artikoli 285 u 286 TFUE kif ukoll tad-dispożizzjonijiet tal-Kodiċi ta’ Kondotta tal‑2012. Fil-punt 157 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja madankollu kkonkludiet li l-fatt li tali estensjoni kienet ibbażata fuq elementi skoperti matul l-ispezzjoni mwettqa fl‑20 ta’ Novembru 2017 ma setax jimplika l-irregolarità ta’ din id-deċiżjoni.

65

Sussegwentement, fil-punt 166 tas-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), il-Qorti tal-Ġustizzja ddeċidiet li l-argumenti ppreżentati mir-rikorrent ma kinux ta’ natura li jistabbilixxu, għall-finijiet tal-proċedura prevista fl-Artikolu 286(6) TFUE, li l-OLAF kien kiser, b’mod illegali, id-dritt tar-rikorrent għar-rispett tal-ħajja privata.

66

Fl-aħħar nett, fil-punt 174 tas-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), il-Qorti tal-Ġustizzja kkonkludiet li l-argumenti ppreżentati mir-rikorrent ma setgħux juru, għall-finijiet tal-proċedura prevista fl-Artikolu 286(6) TFUE, li d-drittijiet tad-difiża tiegħu kienu ġew miksura.

67

Jidher li, wara l-għoti tas-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), ir-rikorrent jikkontesta biss ir-rilevanza, għal din il-kawża, tal-konklużjoni tal-Qorti tal-Ġustizzja fformulata fil-punt 174 ta’ dik is-sentenza.

68

Hekk kif ifakkar ir-rikorrent, il-Qorti tal-Ġustizzja ddeċidiet li, għalkemm kemm l-OLAF kif ukoll il-Qorti tal-Awdituri għandhom jikkonformaw ruħhom mal-obbligi rispettivi tagħhom, ir-rispett tad-dritt għal smigħ tal-Membru jew tal-ex Membru kkonċernat tal-Qorti tal-Awdituri għandu, għall-finijiet tal-proċedura prevista fl-Artikolu 286(6) TFUE, jiġi evalwat b’mod globali (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 170).

69

Il-Qorti tal-Ġustizzja bbażat ruħha wkoll insostenn tal-imsemmija evalwazzjoni fuq il-prinċipju li ma jistax jiġi eskluż li dan il-Membru jew dan l-ex Membru seta’ jingħata, mill-Qorti tal-Awdituri, possibbiltà suffiċjenti li jinstema’ fuq elementi li huwa ma setax effettivament jikkummenta dwarhom qabel l-adozzjoni tar-rapport tal-OLAF (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 170). F’dan ir-rigward, l-ewwel nett, il-Qorti tal-Ġustizzja kkonstatat li kien paċifiku li r-rikorrent kien instema’ oralment mill-OLAF fit‑22 ta’ Diċembru 2017, li kienu saru diversi skambji bil-miktub bejn l-OLAF u l-konsulent tar-rikorrent u li dan tal-aħħar seta’, wara l-komunikazzjoni ta’ sunt tal-fatti stabbiliti fi tmiem l-investigazzjoni, jindirizza lill-OLAF dokument bil-miktub intiż li jikkonfuta l-allegazzjonijiet magħmula f’dan is-sunt. It-tieni nett, il-Qorti tal-Ġustizzja rrilevat li r-rikorrent kien irċieva komunikazzjoni, fil‑5 ta’ Ottubru 2018, tar-rapport tal-OLAF u tar-rapport preliminari indirizzat lill-Membri tal-Qorti tal-Awdituri mill-President tal-Qorti tal-Awdituri u li huwa seta’ jieħu pożizzjoni dwar dawn ir-rapporti kemm permezz tat-trażmissjoni ta’ osservazzjonijiet bil-miktub kif ukoll waqt smigħ quddiem il-Qorti tal-Awdituri (sentenza tat‑30 ta’ Settembru 2021, Il‑Qorti tal-Awdituri vs Pinxten, C‑130/19, EU:C:2021:782, punt 172). It-tielet nett, il-Qorti tal-Ġustizzja kkonstatat li r-rikorrent ma kien ressaq ebda argument intiż li jistabbilixxi li huwa ma kienx f’pożizzjoni li jesprimi ruħu b’mod suffiċjenti, quddiem il-Qorti tal-Awdituri, dwar ċerti elementi meqjusa kontrih qabel l-adozzjoni tar-rapport tal-OLAF (sentenza tat‑30 ta’ Settembru 2021, Il‑Qorti tal-Awdituri vs Pinxten, C‑130/19, EU:C:2021:782, punt 172).

70

Il-konklużjoni tal-punt 174 tas-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), hija trasponibbli għal din il-kawża, peress li, bħall-proċedura prevista fl-Artikolu 286(6) TFUE, ma jistax jiġi eskluż li, f’dan il-każ, ir-rikorrent seta’ jingħata, mill-Qorti tal-Awdituri, possibbiltà suffiċjenti li jinstema’ dwar elementi li huwa ma setax jikkummenta dwarhom qabel l-adozzjoni tar-rapport tal-OLAF.

71

F’din il-proċedura, ir-rikorrent ma jippreżenta ebda element ġdid u konkret li jistabbilixxi li huwa ma setax jinstema’ b’mod suffiċjenti mill-Qorti tal-Awdituri dwar elementi li huwa ma setax effettivament jikkummenta dwarhom qabel l-adozzjoni tar-rapport tal-OLAF. Issa, kien jibqa’ possibbli għalih li jressaq tali elementi matul il-fażi bil-miktub ta’ din il-proċedura, b’mod partikolari fl-osservazzjonijiet tiegħu dwar il-konsegwenzi li kellhom jinstiltu mis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), għal din il-kawża.

72

Konsegwentement, l-ewwel motiv għandu jiġi miċħud bħala infondat.

2.

Fuq it‑tieni motiv ibbażat fuq l‑assenza ta’ eżerċizzju mill‑Qorti tal‑Awdituri tas‑setgħa ta’ evalwazzjoni tagħha, b’mod partikolari bħala uffiċjal awtorizzanti, fuq il‑ksur tal‑obbligu tagħha li tipprova l‑akkuża u fuq il‑ksur tal‑obbligu ta’ motivazzjoni tagħha

73

Fil-kuntest ta’ dan il-motiv, ir-rikorrent essenzjalment isostni li l-Qorti tal-Awdituri sempliċement irreferiet għar-rapport tal-OLAF mingħajr ma analizzatu u, b’mod partikolari, mingħajr ma indikat bi preċiżjoni kif kull waħda mill-ispejjeż li huma s-suġġett ta’ kritika hija irregolari. Huwa jinvoka l-Artikoli 98, 100 u 101 tar-Regolament 2018/1046, li minnhom jirriżulta li l-uffiċjal awtorizzanti għandu l-obbligu jevalwa l-eżistenza ta’ kreditu u jiddeċiedi, sussegwentement, dwar l-irkupru tiegħu. Għalhekk, hija l-Qorti tal-Awdituri li għandha tindika bi preċiżjoni kif kull waħda mill-ispejjeż li huma s-suġġett ta’ kritika hija irregolari, fatt li huwa wkoll neċessarju sabiex jiġi ssodisfatt l-obbligu ta’ motivazzjoni.

74

Il-Qorti tal-Awdituri tikkontesta l-argumenti tar-rikorrent.

75

Preliminarjament, għandu jiġi osservat li, f’din il-proċedura, wara s-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), ir-rikorrent mhux qiegħed iżomm iktar l-ilment tiegħu bbażat fuq l-assenza ta’ eżerċizzju mill-Qorti tal-Awdituri tas-setgħa ta’ evalwazzjoni tagħha. Għaldaqstant, ma hemmx iktar lok li tingħata deċiżjoni dwar dan.

76

Fir-rigward tal-ilmenti bbażati fuq il-ksur tal-obbligu tal-Qorti tal-Awdituri li tipprova l-akkuża u fuq il-ksur tal-obbligu ta’ motivazzjoni tagħha, li għalihom ir-rikorrent ma jirrinunzjax fil-kuntest ta’ din il-proċedura, dawn għandhom jiġu eżaminati flimkien sa fejn dawn jikkoinċidu. Barra minn hekk, mill-proċess jirriżulta li r-rikorrent jallega biss, fil-fatt, l-assenza ta’ motivazzjoni tan-natura indebita tal-ammonti differenti meqjusa mill-Qorti tal-Awdituri fid-dawl b’mod partikolari tat-tabella ta’ rkupru.

77

Id-dritt għal amministrazzjoni tajba, stabbilit fl-Artikolu 41 tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”), jipprevedi l-obbligu għall-istituzzjonijiet, għall-korpi u għall-organi tal-Unjoni li jimmotivaw id-deċiżjonijiet tagħhom. Dan l-obbligu għandu l-istess portata bħal dak li jirriżulta mit-tieni paragrafu tal-Artikolu 296 TFUE, li jipprovdi li l-atti ġuridiċi għandhom ikunu motivati. L-obbligu ta’ motivazzjoni huwa intiż li jippermetti, minn naħa, lill-persuni kkonċernati jsiru jafu bil-ġustifikazzjonijiet għall-miżura li tkun ittieħdet sabiex jiddefendu d-drittijiet tagħhom, u min-naħa l-oħra, lill-qorti tal-Unjoni Ewropea teżerċita l-istħarriġ tagħha fuq il-legalità tad-deċiżjoni. (ara s-sentenza tal‑14 ta’ Lulju 2021, BG vs Il‑Parlament, T‑253/19, mhux ippubblikata, EU:T:2021:459, punt 44 u l-ġurisprudenza ċċitata). Għandu jitfakkar li l-obbligu ta’ motivazzjoni jikkostitwixxi rekwiżit proċedurali essenzjali li għandu jiġi distint mill-kwistjoni tal-fondatezza tal-motivi, fejn din taqa’ taħt il-legalità tal-mertu tal-att kontenzjuż. (ara s-sentenza tat‑22 ta’ Mejju 2012, Internationaler Hilfsfonds vs Il‑Kummissjoni, T‑300/10, EU:T:2012:247, punt 180 u l-ġurisprudenza ċċitata). Fil-fatt, il-motivazzjoni ta’ deċiżjoni tikkonsisti fl-espressjoni formali tal-motivi li fuqhom din id-deċiżjoni tkun ibbażata. Din il-motivazzjoni tista’ tkun suffiċjenti filwaqt li tesprimi motivi żbaljati (ara d-digriet tat‑12 ta’ Lulju 2012, Dover vs Il‑Parlament, C‑278/11 P, mhux ippubblikat, EU:C:2012:457, punt 36 u l-ġurisprudenza ċċitata).

78

Barra minn hekk, ma huwiex meħtieġ li l-motivazzjoni tispeċifika l-elementi kollha rilevanti ta’ fatt u ta’ dritt, sa fejn il-kwistjoni dwar jekk il-motivazzjoni ta’ att tkunx suffiċjenti għandha tiġi evalwata mhux biss fid-dawl tal-formulazzjoni tagħha, iżda wkoll tal-kuntest tagħha kif ukoll tar-regoli ġuridiċi kollha li jirregolaw il-qasam ikkonċernat (sentenza tal‑14 ta’ Lulju 2021, BG vs Il‑Parlament, T‑253/19, mhux ippubblikata, EU:T:2021:459, punt 45).

79

F’dan il-każ, id-deċiżjoni kkontestata fiha tliet partijiet: l-ittra ta’ akkumpanjament li tikkomunika d-deċiżjoni kkontestata, l-anness tagħha (Anness 1), li jinkludi l-imsemmija deċiżjoni, kif ukoll in-nota ta’ debitu rikapitolattiva (Anness 2).

80

Wara li fakkret, fid-deċiżjoni kkontestata, id-dispożizzjonijiet dwar l-ispejjeż tal-missjoni u dwar l-allowances ta’ kuljum, dwar l-ispejjeż ta’ rappreżentanza kif ukoll dwar l-użu tal-flotta ta’ vetturi bil-mutur tal-Qorti tal-Awdituri u dwar l-ispejjeż tal-missjoni tax-xufiera użati mill-Membri li r-rikorrent kiser, il-Qorti tal-Awdituri identifikat is-somom indebitament imħallsa li l-irkupru tagħhom kien mitlub mingħand ir-rikorrent.

81

F’dan ir-rigward, il-Qorti tal-Awdituri indikat li l-analiżi tar-rapport tal-OLAF u tal-annessi tiegħu u tad-dokumenti fil-pussess tad-dipartimenti amministrattivi tiegħu kienet ippermettiet li jiġi kkonstatat li r-rikorrent kien indebitament kiseb ir-rimbors ta’ spejjeż għal attivitajiet privati jew estranji għall-funzjonijiet tiegħu jew inkompatibbli magħhom, meta huwa kien jaf jew kellu jkun jaf li dawn l-ispejjeż ma setgħux jiġu sostnuti permezz tar-riżorsi tal-Qorti tal-Awdituri. B’mod iktar partikolari, id-deċiżjoni dwar konstatazzjoni ta’ kreditu u ta’ rkupru tinkludi tabella ta’ rkupru li tindika, għal kull waħda mill-attivitajiet indebitament imħallsa mill-baġit tal-Unjoni, b’mod partikolari, il-motiv invokat mir-rikorrent fl-ordnijiet ta’ missjoni tiegħu jew f’dawk tax-xufier jew fit-talbiet tiegħu għar-rimbors tal-ispejjeż ta’ rappreżentanza; in-natura reali tal-attività; ir-riferiment għall-provi li jippermettu li tiġi stabbilita din in-natura reali, id-data u l-post tal-attività li ġġenerat l-ispejjeż, u l-ispiża sostnuta mill-Qorti tal-Awdituri.

82

Minn dan isegwi li d-deċiżjoni kkontestata tinkludi motivazzjoni konformi mar-rekwiżiti tal-Artikolu 41 tal-Karta, sa fejn din il-motivazzjoni tippermetti lir-rikorrent jifhem il-motivi li fuqhom hija bbażata d-deċiżjoni kkontestata u lill-Qorti Ġenerali teżerċita l-istħarriġ tagħha f’dan ir-rigward, bla ħsara għall-eżami tal-fondatezza tagħha, li ser jitwettaq fil-kuntest tar-raba’ motiv.

83

Fir-rigward tal-allegazzjoni tar-rikorrent li, fir-risposta, fir-rigward tar-raba’ motiv, il-Qorti tal-Awdituri tagħti motivazzjoni ġdida jew motivi ġodda, din ser tiġi eżaminata każ b’każ fil-kuntest tal-imsemmi motiv.

84

Konsegwentement, it-tieni motiv għandu jiġi miċħud bħala infondat.

3.

Fuq it‑tielet motiv ibbażat fuq il‑ksur tat‑terminu raġonevoli

85

Ir-rikorrent isostni li l-Qorti tal-Awdituri kisret il-prinċipju ta’ osservanza ta’ terminu raġonevoli, stabbilit fl-Artikolu 41(1) tal-Karta, billi kkontestat ir-regolarità tat-talbiet għal rimbors li huwa kien ressaq sa mis-sena 2006, filwaqt li dik l-istituzzjoni kellha, sa mit-tressiq ta’ dawn it-talbiet, l-informazzjoni utli kollha sabiex tiżgura ruħha li l-imsemmija talbiet kienu leġittimi jew sabiex tiddeċiedi li tfittex kjarifiki. Fil-fehma tiegħu, ix-xogħol ta’ verifika tal-Qorti tal-Awdituri għandu jkun limitat għal retroattività limitata għal tliet snin jew tal-inqas għal ħames snin mill‑5 ta’ Ottubru 2018, jiġifieri d-data tar-rapport preliminari tagħha. Ir-rikorrent iqis għalhekk li l-entrati fit-tabella ta’ rkupru li jippreċedu l‑4 ta’ Ottubru 2013, jiġifieri l-linji bin-Nri 1 sa 261 inklużi, huma preskritti, fatt li jwassal għal ammont ta’ EUR 85 924.75, b’tali mod li l-ammont totali li jista’ jiġi kklassifikat bħala kreditu li l-Qorti tal-Awdituri għandha fil-konfront tiegħu huwa ta’ EUR 67 482.83.

86

F’dan ir-rigward, ir-rikorrent jinvoka r-Regolament tal-Kunsill (KE, Euratom) Nru 1605/2002 tal‑25 ta’ Ġunju 2002 rigward ir-Regolament Finanazjarju applikabbli ghall-bagit generali tal-Komunitajiet Ewropej (ĠU Edizzjoni Speċjali bil-Malti, Kapitolu 1, Vol. 4, p. 74), kif emendat bir-Regolament tal-Kunsill (KE, Euratom) Nru 1995/2006 tat‑13 ta’ Diċembru 2006 (ĠU 2006, L 390, p. 1), li, fl-Artikolu 73a tiegħu, jintroduċi l-prinċipju ta’ preskrizzjoni tal-krediti miżmuma mill-Unjoni fil-konfront ta’ terzi għal terminu ta’ preskrizzjoni ta’ ħames snin. Fir-rigward tat-terminu li fih nota ta’ debitu għandha tiġi kkomunikata lid-debitur, ir-rikorrent josserva li la r-“regolament finanzjarju” u lanqas il-modalitajiet ta’ implimentazzjoni tiegħu ma jippreċiżaw tali terminu. Madankollu, huwa jfakkar li mill-ġurisprudenza tal-Qorti tal-Ġustizzja jirriżulta li l-komunikazzjoni ta’ nota ta’ debitu għandha ssir f’terminu raġonevoli u li l-Qorti tal-Ġustizzja tqis li tali komunikazzjoni tkun irraġonevoli meta din isseħħ lil hinn minn perijodu ta’ ħames snin li jibda jiddekorri mill-mument li fih l-istituzzjoni kkonċernata normalment setgħet titlob il-kreditu tagħha. Fir-replika, ir-rikorrent jirreferi wkoll għall-Artikolu 98(2) tar-Regolament 2018/1046.

87

Fl-osservazzjonijiet tiegħu dwar il-konsegwenzi li għandhom jinstiltu mis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), għal din il-kawża, ir-rikorrent iqis li l-Qorti tal-Ġustizzja ma ħaditx pożizzjoni dwar dan il-motiv, sa fejn hija ċaħdet ilment ieħor ibbażat fuq il-ksur tat-terminu raġonevoli li jirrigwarda r-rikors dixxiplinari tal-Qorti tal-Awdituri.

88

Il-Qorti tal-Awdituri tikkontesta l-argumenti tar-rikorrent billi essenzjalment tqis li huwa biss fid-data tar-rapport tal-OLAF li l-kreditu tagħha seta’ jitqies li huwa ċert, fi flus kontanti u dovut, hekk kif jeżiġu l-Artikolu 78(2) tar-Regolament Nru 966/2012 u l-Artikolu 81(b) tar-Regolament ta’ Delega tal-Kummissjoni (UE) Nru 1268/2012 tad‑29 ta’ Ottubru 2012 dwar ir-regoli tal-applikazzjoni tar-Regolament Nru 966/2012 (ĠU 2012, L 362, p. 1). Konsegwentement, fid-data tad-deċiżjoni kkontestata, it-terminu ta’ ħames snin kien għadu ma ntemmx. F’dan ir-rigward, il-Qorti tal-Awdituri tfakkar il-kliem tat-tieni paragrafu tal-Artikolu 85 tar-Regolamenti tal-Persunal tal-Unjoni Ewropea (iktar’ il quddiem ir-“Regolamenti tal-Persunal”), li jipprovdi li t-talba għall-irkupru tal-ammonti indebitament imħallsa għandha titressaq mhux iktar tard mill-iskadenza ta’ terminu ta’ ħames snin li jibda jiddekorri mid-data li fiha tkun tħallset is-somma. Hija tirrileva wkoll li dan it-terminu ma jistax jiġi invokat meta jkun jista’ jiġi stabbilit li l-persuna kkonċernata deliberatament qarrqet bl-amministrazzjoni bl-għan li tikseb il-ħlas tas-somma kkunsidrata, fatt li jikkostitwixxi prinċipju ġenerali tad-dritt tal-Unjoni.

a)

Fuq it‑terminu ta’ preskrizzjoni

89

Permezz tal-motiv tiegħu bbażat fuq il-ksur tat-terminu raġonevoli, ir-rikorrent jinvoka l-prinċipju ta’ preskrizzjoni tal-krediti miżmuma mill-Unjoni fil-konfront ta’ terzi għal terminu ta’ preskrizzjoni ta’ ħames snin. F’dan ir-rigward, minn naħa, huwa jiċċita, b’mod partikolari, l-Artikolu 73a tar-Regolament Nru 1605/2002, kif emendat, fis-seħħ sal‑31 ta’ Diċembru 2013, kif ukoll l-Artikoli 78 u 85b tar-Regolament tal-Kummissjoni (KE, Euratom) Nru 2342/2002 tat‑23 ta’ Diċembru 2002 li jippreskrivi regoli ddettaljati għall-implimentazzjoni tar-Regolament Nru 1605/2002 (ĠU Edizzjoni Speċjali bil-Malti, Kapitolu 1, Vol. 4, p. 145), kif emendat bir-Regolament tal-Kummissjoni (KE, Euratom) Nru 478/2007 tat‑23 ta’ April 2007 (ĠU 2007, L 111, p. 13), fis-seħħ sal‑31 ta’ Diċembru 2012. Min-naħa l-oħra, fir-replika, ir-rikorrent jirreferi wkoll għall-Artikolu 98(2) tar-Regolament 2018/1046. Waqt is-seduta, bi tweġiba għall-istedina tal-Qorti Ġenerali sabiex jippreċiża l-bażi legali tal-applikazzjoni f’dan il-każ tal-prinċipju ta’ preskrizzjoni tal-krediti miżmuma mill-Unjoni fil-konfront ta’ terzi għal terminu ta’ ħames snin, ir-rikorrent afferma li huwa kellu, hekk kif kien għamel fil-kuntest tar-replika, jibbaża ruħu fuq l-Artikolu 98(2) tar-Regolament 2018/1046, mingħajr ma huwa ġie kkontestat f’dan ir-rigward mill-Qorti tal-Awdituri. Għalhekk, għandu jsir riferiment għal din id-dispożizzjoni, applikabbli fid-data tal-adozzjoni tad-deċiżjoni kkontestata.

90

Ir-rikorrent jindika, essenzjalment, li l-Qorti tal-Awdituri ma setgħetx tibgħatlu nota ta’ debitu sabiex tinvoka l-allegat kreditu tagħha għal talbiet għal ħlas ikklassifikati bħala irregolari li għandhom iktar minn ħames snin. Permezz ta’ tali allegazzjoni, ir-rikorrent iqis, essenzjalment, li t-terminu ta’ preskrizzjoni previst fit-tieni subparagrafu tal-Artikolu 98(2) tar-Regolament 2018/1046 huwa applikabbli mingħajr eċċezzjoni.

91

L-Artikolu 98(1) u (2) tar-Regolament Nru 2018/1046 jipprovdi kif ġej:

92

F’dan ir-rigward, preliminarjament, għandu jiġi rrilevat li s-sistema ta’ preskrizzjoni għandha tkun imfassla b’mod li tistabbilixxi ekwilibriju bejn, minn naħa, l-għanijiet ta’ ċertezza legali u ta’ trattament tal-kawżi f’terminu raġonevoli bħala prinċipji ġenerali tad-dritt tal-Unjoni u, min-naħa l-oħra, l-implimentazzjoni effettiva u effikaċi tal-prinċipju ta’ ġestjoni finanzjarja tajba. (ara, b’analoġija, is-sentenza tal‑21 ta’ Jannar 2021, Whiteland Import Export (C‑308/19, EU:C:2021:47, punt 49). Huwa f’dan il-kuntest partikolari, u mhux permezz ta’ sempliċi applikazzjoni tal-Artikolu 41 tal-Karta, hekk kif isostni r-rikorrent, li l-prinċipju ta’ terminu raġonevoli japplika.

93

B’mod iktar partikolari, it-tieni subparagrafu tal-Artikolu 98(2) tar-Regolament 2018/1046 jipprevedi s-sistema ta’ preskrizzjoni marbuta mal-komunikazzjoni ta’ nota ta’ debitu fl-interess taċ-ċertezza legali li tipproteġi kemm lid-debitur ikkonċernat kif ukoll lill-istituzzjoni tal-Unjoni li tibgħat in-nota ta’ debitu. Fil-fatt, għad-debitur, il-prinċipju ta’ ċertezza legali jipprekludi li l-istituzzjoni tal-Unjoni taġixxi mingħajr ebda limitu ta’ żmien, bir-riskju għalhekk, b’mod partikolari, li tipperikola l-istabbiltà tas-sitwazzjonijiet ġuridiċi miksuba. Fir-rigward tal-istituzzjoni tal-Unjoni, fil-kompitu tagħha li tirkupra krediti tal-Unjoni mingħand terzi sabiex tissodisfa l-prinċipju ta’ ġestjoni finanzjarja tajba, hija għandha tosserva terminu raġonevoli li jikkostitwixxi aspett tal-prinċipju ta’ amministrazzjoni tajba u jirriżulta mir-rekwiżit fundamentali ta’ ċertezza legali (ara, f’dan is-sens, is-sentenzi tat‑13 ta’ Novembru 2014, Nencini vs Il‑Parlament, C‑447/13 P, EU:C:2014:2372, punt 45; tal‑14 ta’ Ġunju 2016, Marchiani vs Il‑Parlament, C‑566/14 P, EU:C:2016:437, punt 101, u tal‑5 ta’ Ottubru 2004, Sanders et vs Il‑Kummissjoni, T‑45/01, EU:T:2004:289, punti 59 u 60 u l-ġurisprudenza ċċitata).

94

L-iffissar ta’ termini ta’ preskrizzjoni fil-qasam tal-konstatazzjoni tal-krediti għandu wkoll ikun konformi mal-prinċipju ta’ effettività u ma għandux jirrendi prattikament impossibbli jew eċċessivament diffiċli l-implimentazzjoni tad-dritt tal-Unjoni (ara, b’analoġija, is-sentenzi tas‑17 ta’ Novembru 2016, Stadt Wiener Neustadt, C‑348/15, EU:C:2016:882, punt 41, u tal‑21 ta’ Jannar 2021, Whiteland Import Export, C‑308/19, EU:C:2021:47, punti 48 u 65).

95

Ċertament, fid-dawl tal-Artikolu 98(1) u (2) tar-Regolament 2018/1046, istituzzjoni tal-Unjoni tista’ normalment tkun fil-pożizzjoni li tinvoka l-kreditu tagħha mid-data li fiha din l-istituzzjoni jkollha dokumenti ta’ sostenn li jippermettu l-identifikazzjoni ta’ kreditu partikolari bħala ċert, fi flus kontanti u dovut jew setgħet kellha tali dokumenti ta’ sostenn li kieku hija aġixxiet bid-diliġenza meħtieġa (ara, f’dan is-sens u b’analoġija, is-sentenza tal‑14 ta’ Ġunju 2016, Marchiani vs Il‑Parlament (C‑566/14 P, EU:C:2016:437, punt 103).

96

Madankollu, tali konstatazzjoni tista’ ssir prattikament impossibbli f’każijiet fejn, minkejja d-diliġenza li tkun wettqet, istituzzjoni tal-Unjoni ma kinitx f’pożizzjoni li tidentifika kreditu minħabba l-aġir tad-debitur, b’mod partikolari minħabba l-manuvri dilatorji tiegħu jew il-mala fide tiegħu.

97

Tali interpretazzjoni tirriżulta mill-prinċipju li sistema ta’ preskrizzjoni stretta li, għal raġunijiet inerenti għaliha, tostakola b’mod sistematiku l-protezzjoni tal-interessi finanzjarji tal-Unjoni hija ta’ natura li tirrendi l-applikazzjoni tar-regoli tad-dritt tal-Unjoni prattikament impossibbli jew eċċessivament diffiċli (ara, b’analoġija, is-sentenza tal‑21 ta’ Jannar 2021, Whiteland Import Export, C‑308/19, EU:C:2021:47, punt 53 u l-ġurisprudenza ċċitata).

98

L-interpretazzjoni tal-Artikolu 98 tar-Regolament 2018/1046, sa fejn dan jipprevedi eċċezzjonijiet għall-bidu tad-dekorrenza tat-terminu għall-konstatazzjoni tal-krediti, hija kkorroborata, b’analoġija, mill-interruzzjonijiet tat-terminu ta’ preskrizzjoni previst fl-Artikolu 105 tal-imsemmi regolament għall-irkupru tad-djun.

99

Ċertament, għall-krediti miżmuma mill-Unjoni fil-konfront ta’ terzi, ir-Regolament 2018/1046 ma jipprevedi ebda sospensjoni jew interruzzjoni tat-terminu ta’ preskrizzjoni permezz ta’ att li jirriżulta b’mod partikolari mill-OLAF li jirrigwarda investigazzjoni, kuntrarjament għal dak li jipprevedi t-tieni subparagrafu tal-Artikolu 139(2) tal-istess regolament, li japplika għal deċiżjoni ta’ esklużjoni ta’ persuni jew ta’ entitajiet imsemmija fl-Artikolu 135(2) tiegħu, mill-parteċipazzjoni fil-proċeduri ta’ għoti rregolati mill-imsemmi regolament jew mis-selezzjoni għall-implimentazzjoni tal-fondi tal-Unjoni. Madankollu, tali silenzju ta’ test leġiżlattiv ma għandux jiġi interpretat b’mod wisq restrittiv u għandu jieħu inkunsiderazzjoni r-rwol speċifiku u s-setgħat mogħtija mid-dispożizzjonijiet tad-dritt tal-Unjoni lill-OLAF. Konklużjoni kuntrarja tirrendi l-applikazzjoni tar-regoli tad-dritt tal-Unjoni prattikament impossibbli jew eċċessivament diffiċli u tippreġudika l-prinċipju ta’ effettività tad-dritt tal-Unjoni.

100

Minn dan jirriżulta li l-bidu tad-dekorrenza tat-terminu għall-konstatazzjoni tal-krediti, skont it-tieni subparagrafu tal-Artikolu 98(2) tar-Regolament 2018/1046, jiġifieri l-mument li fih l-istituzzjoni kkonċernata normalment tkun f’pożizzjoni li tinvoka l-kreditu tagħha, ma jikkorrispondix neċessarjament għall-mument li fih persuna bħar-rikorrent titlob lil istituzzjoni l-ħlas ta’ somma flus. Dan jista’ jikkorrispondi, f’ċerti ċirkustanzi, għall-mument li fih l-OLAF jibgħat rapport lil din l-istituzzjoni (ara, f’dan is-sens u b’analoġija, is-sentenza tal‑14 ta’ Ġunju 2016, Marchiani vs Il‑Parlament (C‑566/14 P, EU:C:2016:437, punt 107).

101

Fid-dawl tal-kunsiderazzjonijiet preċedenti, l-allegazzjoni tar-rikorrent li t-terminu ta’ preskrizzjoni stabbilit mit-tieni subparagrafu tal-Artikolu 98(2) tar-Regolament 2018/1046 huwa applikabbli mingħajr eċċezzjoni ma għandhiex bażi legali.

102

Għaldaqstant, għandu jiġi eżaminat, każ b’każ, f’liema mument il-Qorti tal-Awdituri kienet, f’ċirkustanzi normali, f’pożizzjoni li tinvoka l-kreditu tagħha, fis-sens tat-tieni subparagrafu tal-Artikolu 98(2) tar-Regolament 2018/1046.

b)

Fuq it‑talbiet għal rimbors tar‑rikorrent li jikkorrispondu għal‑linji bin-Nri 1 sa 261 tat‑tabella ta’ rkupru

103

Ir-rikorrent isostni li, minħabba l-preskrizzjoni, il-Qorti tal-Awdituri ma setgħetx tikkonstata kreditu u tirkuprah fir-rigward tat-talbiet tiegħu għal rimbors imressqa matul il-perijodu ta’ bejn is-sena 2006 u l‑4 ta’ Ottubru 2013, li jikkorrispondu għal-linji bin-Nri 1 sa 261 tat-tabella ta’ rkupru.

104

F’dan il-każ, huwa paċifiku li l-Qorti tal-Awdituri bagħtet in-nota ta’ debitu lir-rikorrent biss fil‑11 ta’ April 2019, wara li l-Qorti tal-Awdituri rċeviet ir-rapport tal-OLAF fit‑2 ta’ Lulju 2018, li abbażi tiegħu l-Qorti tal-Awdituri kienet stabbilixxiet ir-rapport preliminari tagħha fil‑5 ta’ Ottubru 2018. Mir-rapport tiegħu jirriżulta li l-OLAF wettaq spezzjoni fl-uffiċċju tar-rikorrent u ġabar, f’din l-okkażjoni, diversi dokumenti għall-analiżi diġitali tagħhom u għamel mistoqsijiet kemm lir-rikorrent innifsu kif ukoll lil persuni oħra kkonċernati. (ara wkoll il-punti 39 sa 46 iktar ’il fuq). Fi tmiem l-investigazzjoni tiegħu, l-OLAF stabbilixxa li l-informazzjoni li r-rikorrent kien ipprovda lill-Qorti tal-Awdituri fl-ordnijiet ta’ missjoni tiegħu u fid-dikjarazzjonijiet tal-ispejjeż ta’ rappreżentanza tiegħu ma kinux biżżejjed sabiex jippermettu lill-President tal-Qorti tal-Awdituri jivverifika b’għarfien sħiħ tal-fatti jekk l-attività inkwistjoni kinitx fl-interess tal-Qorti tal-Awdituri.

105

F’dan ir-rigward, minn naħa, mill-Artikolu 11(1) u (2) tar-Regolament 883/2013, moqri fid-dawl tal-premessi 28 u 29 tiegħu, jirriżulta li l-investigazzjoni mwettqa mill-OLAF ġiet konkluża bit-tfassil ta’ rapport ta’ investigazzjoni finali, prova ammissibbli fil-proċeduri amministrattivi jew ġudizzjarji, li jippreżenta, b’mod partikolari, il-konklużjonijiet tal-investigazzjoni, u tar-rakkomandazzjonijiet tad-Direttur Ġenerali tiegħu dwar l-azzjoni li għandha tittieħed fuq din l-investigazzjoni. Skont l-Artikolu 11(4) tal-imsemmi regolament, l-OLAF għandu jibgħat dan ir-rapport lill-istituzzjoni, lill-korp jew lill-organu kkonċernat, li għandhom jieħdu l-azzjonijiet, b’mod partikolari dixxiplinarji u ġudizzjarji, meħtieġa skont ir-riżultati tal-investigazzjoni, u jirrapportaw lill-OLAF dwar dan, f’terminu li għandu jiġi stabbilit fir-rakkomandazzjonijiet li jakkumpanjaw ir-rapport kif ukoll fuq talba tal-OLAF. F’dan il-każ, huwa preċiżament f’dan il-kuntest li l-Qorti tal-Awdituri stabbilixxiet ir-rapport preliminari tagħha fil‑5 ta’ Ottubru 2018 fuq ir-rapport tal-OLAF.

106

Min-naħa l-oħra, għandu jitfakkar li, konformement mal-Artikolu 1(4) tar-Regolament Nru 883/2013, l-OLAF iwettaq, fi ħdan l-istituzzjonijiet, il-korpi u l-organi stabbiliti minn jew fuq il-bażi tat-Trattati, l-investigazzjonijiet amministrattivi intiżi għall-ġlieda kontra l-frodi, il-korruzzjoni u kull attività illegali oħra li tippreġudika l-interessi finanzjarji tal-Unjoni, imsejħa “investigazzjonijiet interni”. Minn dan ir-regolament jirriżulta li, fil-kuntest ta’ tali investigazzjonijiet, l-OLAF għandu jkollu aċċess mingħajr avviż minn qabel u mingħajr dewmien għal kull informazzjoni rilevanti, inkluża l-informazzjoni f’bażijiet tad-data, miżmuma mill-istituzzjonijiet, mill-korpi u mill-organi kif ukoll għall-bini tagħhom. Huwa jista’ jieħu kopja ta’ u jikseb siltiet minn kull dokument jew mill-kontenut ta’ kull mezz ta’ informazzjoni miżmum mill-istituzzjonijiet, mill-korpi u mill-organi. L-OLAF jista’ jitlob ukoll informazzjoni orali mingħand il-membri tal-persunal l-oħra, inkluż permezz ta’ intervisti, u ta’ informazzjoni bil-miktub. Huwa jista’ jwettaq kontrolli u verifiki fuq il-post fil-bini ta’ operaturi ekonomiċi sabiex jikseb aċċess għall-informazzjoni rilevanti marbuta mal-fatti li jkunu s-suġġett ta’ investigazzjoni interna.

107

Għall-kuntrarju, istituzzjoni tal-Unjoni bħalma hija l-Qorti tal-Awdituri ma għandhiex tali setgħat ta’ investigazzjoni, b’mod partikolari bl-għan tal-identifikazzjoni u tal-konstatazzjoni ta’ kreditu kontra wieħed mill-Membri tagħha.

108

Fid-dawl tal-osservazzjonijiet preliminari li jinsabu fil-punti 89 sa 107 iktar ’il fuq, għandu jiġi eżaminat jekk, fir-rigward tat-talbiet għal rimbors tar-rikorrent li jikkorrispondu għal-linji bin-Nri 1 sa 261 tat-tabella ta’ rkupru, huwiex b’effett mit-tressiq ta’ dawn it-talbiet, hekk kif iqis ir-rikorrent, jew mid-data tar-rapport tal-OLAF, hekk kif issostni l-Qorti tal-Awdituri, li din tal-aħħar kienet f’pożizzjoni li tidentifika u li ssostni l-kreditu tagħha fir-rigward tal-imsemmija linji. Għall-finijiet ta’ dan l-eżami, dawn it-talbiet għandhom jinqasmu fi tliet gruppi.

1)

Fuq l‑ewwel grupp tat‑talbiet għal rimbors tar‑rikorrent

109

Għandu jiġi osservat li, fost it-talbiet għal rimbors tar-rikorrent li jikkorrispondu għal-linji bin-Nri 1 sa 261 tat-tabella ta’ rkupru, diversi minnhom kienu jinkludu ġustifikazzjonijiet a priori kredibbli li ma kienu jeħtieġu ebda verifika addizzjonali min-naħa tal-Qorti tal-Awdituri fil-mument tat-tressiq tagħhom mir-rikorrent. Fir-rigward ta’ dawn it-talbiet, il-Qorti tal-Awdituri ma kellhiex informazzjoni li tippermettilha topponi għalihom qabel it-tmiem tal-investigazzjoni tal-OLAF.

110

L-ewwel nett, fost l-imsemmija talbiet għal rimbors, hemm dawk previsti fil-linji bin-Nri 1, 2, 3, 4, 5, 6, 7, 12, 14, 15, 16, 17, 19, 20, 23, 24, 29 (parzjalment), 31, 41, 43, 54, 57 (parzjalment), 59, 60, 61, 63 (parzjalment), 65, 66, 68, 69, 70, 81, 84, 85, 88, 89, 92, 94, 95, 96, 97, 111, 116, 118 (parzjalment), 120, 133, 150, 168, 169, 171, 175, 183, 184, 190, 194, 203, 204, 207, 208, 211, 215, 218, 221, 229 (parzjalment), 236, 238, 248, 258 u 260 tat-tabella ta’ rkupru, relatati mal-laqgħat tar-rikorrent ma’ mexxejja politiċi jew, f’ċerti każijiet limitati, ma’ Membri tal-uffiċċji tagħhom jew mal-parteċipazzjoni tar-rikorrent fl-attivitajiet tal-partit politiku inkwistjoni.

111

Għandu jiġi osservat li, minn naħa, kien biss waqt l-investigazzjoni tal-OLAF li ġie stabbilit li, matul il-mandat tiegħu, ir-rikorrent kien iltaqa’ mill-inqas 188 darba ma’ mexxejja politiċi Belġjani li kienu prinċipalment il-membri tal-partit politiku inkwistjoni, li huwa kien ukoll jappartjeni għalih. Skont ir-rapport tal-OLAF, din iċ-ċifra kienet tikkorrispondi għal 24 % tal-laqgħat kollha jew tal-ikliet ta’ nofsinhar tar-rikorrent li kienu s-suġġett tat-talbiet tiegħu għal rimbors. Għandu jiġi kkonstatat li dan jirrigwarda l-attivitajiet imsemmija fil-linji bin-Nri 1, 2, 3, 4, 5, 6, 7, 12, 14, 15, 16, 19, 20, 23, 24, 29 (parzjalment), 31, 41, 43, 54, 57 (parzjalment), 59, 63 (parzjalment), 65, 66, 70, 84, 88, 89, 92, 96, 97, 111, 116, 118 (parzjalment), 133, 150, 168, 169, 171, 183, 184, 190, 194, 203, 204, 208, 211, 215, 218, 236, 238 u 248 tat-tabella ta’ rkupru.

112

Min-naħa l-oħra, huwa wkoll l-OLAF li kkonstata rabta bejn il-laqgħat ma’ mexxejja politiċi Belġjani u l-laqgħat ta’ kull ġimgħa tal-bord tal-partit politiku inkwistjoni. F’dan ir-rigward, mir-rapport tal-OLAF jirriżulta li huwa ġabar, matul l-investigazzjoni tiegħu, il-minuti ta’ 44 laqgħa li jindikaw il-preżenza tal-membri tal-bord tal-partit politiku inkwistjoni matul il-perijodu ta’ bejn is‑17 ta’ Novembru 2008 u d‑29 ta’ April 2010. L-OLAF stabbilixxa l-preżenza tar-rikorrent fit‑28 laqgħa. Għandu jiġi kkonstatat li f’dan ir-rigward dawn huma l-attivitajiet tar-rikorrent imsemmija fil-linji bin-Nri 54, 60, 61, 68, 70, 81, 84, 85, 88 u 94 tat-tabella ta’ rkupru.

113

Fir-rigward tal-preżenza tar-rikorrent fil-laqgħat l-oħra tal-bord tal-partit politiku inkwistjoni, l-OLAF irrileva li kien ċar li l-mandat tar-rikorrent bħala membru votanti kien jeżiġi l-preżenza regolari tiegħu fil-laqgħat ta’ kull ġimgħa ta’ dan il-bord sax-xahar ta’ Novembru 2008. Skont ir-rapport tal-OLAF, l-eżami tal-ordnijiet ta’ missjoni żvela li, bejn ix-xahar ta’ Marzu 2006 u x-xahar ta’ Novembru 2008, ir-rikorrent kien wettaq 27 missjoni nhar ta’ Tnejn sabiex jiltaqa’ ma’ membri tal-partit politiku inkwistjoni u li dawn il-missjonijiet kienu ppermettew lir-rikorrent jipparteċipa fil-laqgħat ta’ kull ġimgħa tal-bord tad-diretturi ta’ dan il-partit politiku. Il-Qorti Ġenerali tikkonstata li f’dan ir-rigward dawn huma l-linji bin-Nri 1, 5, 7, 12, 17, 19, 23 u 24 tat-tabella ta’ rkupru. B’mod iktar partikolari, fost dawn l-attivitajiet, ir-rapport tal-OLAF jirreferi għal laqgħa tas‑7 ta’ April 2008 li tirrigwarda l-linja bin-Nru 19 tat-tabella ta’ rkupru.

114

Fir-rigward tal-preżenza tar-rikorrent f’dawn il-laqgħat wara x-xahar ta’ April 2010, l-OLAF indika li ma kienx possibbli li din tiġi ddeterminata matul l-investigazzjoni tiegħu, iżda li l-istatus tiegħu bħala membru li ma jivvotax kien jeżiġi l-preżenza tiegħu tal-inqas fil-laqgħat ta’ kull xahar li kienu nżammu kull l-ewwel Tnejn tax-xahar. F’dan ir-rigward, mir-rapport tal-OLAF jirriżulta li l-analiżi tal-missjonijiet tar-rikorrent imwettqa bejn ix-xahar ta’ April 2010 u x-xahar ta’ Diċembru 2017 żvelat l-eżistenza ta’ 17‑il missjoni fi Brussell (il-Belġju) l-ewwel Tnejn tax-xahar sabiex huwa jiltaqa’ ma’ mexxejja tal-partit politiku inkwistjoni li dehru li kienu involuti fit-tmexxija ta’ dan il-partit. Il-Qorti Ġenerali tikkonstata li l-attivitajiet tar-rikorrent imsemmija fil-linji bin-Nri 171, 203 u 238 tat-tabella ta’ rkupru jikkorrispondu għal din is-sitwazzjoni.

115

Barra minn hekk, mill-indikazzjonijiet li jinsabu fl-aġenda tar-rikorrent jirriżulta li l-missjonijiet imsemmija fil-linji bin-Nri 120, 175 u 221 kienu intiżi għall-parteċipazzjoni fil-ġranet parlamentari tal-partit politiku inkwistjoni, li l-missjoni msemmija fil-linja bin-Nru 207 u, parzjalment, dik iċċitata fil-linja bin-Nru 229 kienu intiżi għall-parteċipazzjoni fir-riċevimenti tas-“sena l-ġdida” ta’ dan il-partit, li l-missjoni msemmija fil-linja bin-Nru 258 kienet intiża għall-parteċipazzjoni fiż-żjara ta’ belt intiża għall-membri tal-imsemmi partit jew ukoll li l-missjonijiet imsemmija fil-linji bin-Nri 69 u 260 kienu intiżi għall-parteċipazzjoni, rispettivament, f’kungress u f’jum ta’ studju tal-istess partit (sentenza tat‑30 ta’ Settembru 2021, Il‑Qorti tal-Awdituri vs Pinxten, C‑130/19, EU:C:2021:782, punt 451).

116

It-tieni nett, fir-rigward tar-relazzjonijiet tar-rikorrent ma’ korpi rappreżentattivi u ma’ assoċjazzjonijiet, imsemmija fil-linji bin-Nri 32, 48, 83, 93, 118 (parzjalment), 131, 132, 134 u 135, 137, 143, 154, 155, 170, 174 (parzjalment), 192, 209, 217, 219, 224, 227, 228, 242, 256 u 261 tat-tabella ta’ rkupru, l-OLAF stabbilixxa li l-maġġoranza ta’ dawn ir-relazzjonijiet kienu jirrigwardaw korpi lokali, bħall-Kamra tal-Kummerċ u tal-Industrija tar-reġjun ta’ oriġini tar-rikorrent, grupp ta’ industrija tal-post ta’ oriġini tar-rikorrent u assoċjazzjoni lokali tal-persuni li jimpjegaw, li l-kamp ta’ azzjoni tagħha kien limitat għar-reġjun ta’ oriġini tar-rikorrent. Dawn l-attivitajiet għandhom jiġu assimilati wkoll ma’ dawk imsemmija fil-linji bin-Nri 39, 138 u 196 tat-tabella ta’ rkupru li jirreferu għall-istediniet formali ta’ ċirku li intiżi li jsaħħu l-preżenza tal-impriżi tar-Reġjun ta’ Vlaanderen fi Brussell. Fil-fatt, it-tabella ta’ rkupru tindika, b’riferiment għar-rapport tal-OLAF, b’mod partikolari għall-paġni 5, 18, 29 u 37 tiegħu, li dan iċ-ċirku li huwa intiż li jsaħħaħ il-preżenza tal-impriżi tar-Reġjun ta’ Vlaanderen fi Brussell jorganizza laqgħat sabiex l-intraprendituri tar-Reġjun ta’ Vlaanderen ikunu jistgħu jiltaqgħu ma’ diplomatiċi Belġjani f’pożizzjoni barra mill-pajjiż u li dawn l-attivitajiet ma kinux marbuta mal-funzjonijiet tar-rikorrent bħala Membru tal-Qorti tal-Awdituri. Il-preżenza tar-rikorrent tirriżulta wkoll mill-minuti tal-laqgħat tal-bord tal-partit politiku inkwistjoni fid-data li tikkorrispondi għal dik tal-missjoni msemmija fil-linja bin-Nru 39.

117

It-tielet nett, fir-rigward tat-talbiet għal rimbors tar-rikorrent imsemmija fil-linji bin-Nri 18, 29 (parzjalment), 100 (parzjalment), 114 u 239 li kienu relatati mal-laqgħat ma’ persuna, li b’mod partikolari kienet indikata fl-ordnijiet ta’ missjoni bħala “CEO” (President-Direttur Ġenerali), “CEO [ta’ operatur ekonomiku]” jew “CEO, President”, l-OLAF ikkonstata li, bejn l‑2008 u l‑2015, ir-rikorrent kien iltaqa’ ma’ din il-persuna tmien darbiet u li, dak iż-żmien, din tal-aħħar kienet il-President tal-Bord tad-Diretturi ta’ “holding”, li fih ir-rikorrent kien azzjonist, skont id-dikjarazzjoni tiegħu ta’ interessi tiegħu tal‑2017. Barra minn hekk, waqt l-intervista tiegħu matul l-investigazzjoni tal-OLAF, ir-rikorrent spjega li l-persuna inkwistjoni li huwa kien iltaqa’ magħha kienet ħabib tiegħu għal żmien twil u “sors kbir ta’ ispirazzjoni”.

118

Ir-raba’ nett, għat-talbiet għal rimbors tar-rikorrent imsemmija fil-linji bin-Nri 75 u 86, li kienu jirrigwardaw il-laqgħat tiegħu ma’ persuna, indikata bħala “CEO [ta’ operatur ekonomiku]”, fil‑21 ta’ Diċembru 2009 u fil‑15 ta’ Marzu 2010, l-OLAF iċċita espressament dawn iż-żewġ laqgħat fir-rapport tiegħu, filwaqt li indika li dawn kienu jikkoinċidu mal-investigazzjoni tal-Unjoni dwar l-għajnuna mill-Istat ipprovduta mill-Gvern Belġjan lil dan l-operatur ekonomiku. L-OLAF stabbilixxa wkoll li r-rikorrent kien f’kuntatt mal-persuna li huwa kien iltaqa’ magħha fir-rigward ta’ din l-investigazzjoni u li huwa kien iffaċilita kuntatti diretti mal-uffiċċju ta’ Membru tal-Kummissjoni Ewropea u ma’ persuna, li dak iż-żmien kienet il-President tal-partit politiku inkwistjoni. Barra minn hekk, mill-minuti tal-laqgħat tal-bord tal-partit politiku inkwistjoni kien jirriżulta li r-rikorrent kien f’tali laqgħa fid-data li tikkorrispondi għal dik tal-missjoni msemmija fil-linja bin-Nru 86.

119

Il-ħames nett, fir-rigward tat-talbiet għal rimbors tar-rikorrent imsemmija fil-linji bin-Nri 45, 199, 130, 202, 230, 232, 253 u 257 (parzjalment), dawn kienu relatati ma’ attivitajiet li l-OLAF stabbilixxa n-natura privata tagħhom. Fil-fatt, l-OLAF ikkonstata li dawn it-talbiet kellhom bħala suġġett, rispettivament, ikla ta’ nofsinhar mal-President tal-organizzazzjoni tal-assigurazzjoni għall-mard Belġjana, laqgħa ma’ sieħeb tal-kaċċa, laqgħa ma’ persuna responsabbli minn kumpannija tal-awditjar dwar offerta ta’ impjieg għal iben ir-rikorrent, il-parteċipazzjoni tar-rikorrent fiż-żwieġ ta’ wild ta’ wieħed mill-ħbieb tiegħu, żewġ laqgħat mad-direttur ta’ operatur ekonomiku, persuna li timpjega wieħed minn ulied ir-rikorrent, laqgħa ma’ mexxej politiku Belġjan għal kwistjoni privata u l-parteċipazzjoni tar-rikorrent f’barbecue organizzat minn ex membru tal-partit politiku inkwistjoni. Mill-minuti tal-laqgħat tal-bord tal-partit politiku inkwistjoni jirriżulta wkoll li r-rikorrent kien preżenti għal tali laqgħa fid-data li tikkorrispondi għal dik tal-missjoni msemmija fil-linja bin-Nru 45.

120

It-talbiet għal rimbors imsemmija fil-linji bin-Nri 82, 115 u 121 għandhom jiġu assimilati mal-attivitajiet imsemmija fil-punt 119 iktar ’il fuq. Fil-fatt, l-attività msemmija fil-linja bin-Nru 115 kienet tirrigwarda l-ikla ta’ nofsinhar mad-direttur ta’ operatur ekonomiku fl‑10 ta’ Settembru 2010. Fir-rigward tal-attivitajiet imsemmija fil-linji bin-Nri 82 u 121, li għandhom bħala suġġett “[Sur …], CEO”, u “stedina formali minn […]”, l-OLAF ikkonstata li din kienet laqgħa ma’ kuntrattur ta’ proprjetà immobbli għal skopijiet privati.

121

Is-sitt nett, ir-rapport tal-OLAF jirreferi wkoll għall-attivitajiet tar-rikorrent relatati ma’ laqgħat ma’ diplomat tal-Federazzjoni Russa, ma’ żewġ Membri tal-Kummissjoni u mad-Direttur Ġenerali ta’ ragruppament ta’ gruppi ta’ pressjoni Ewropej kif ukoll mar-Roi des Belges (ir-Re tal-Belġjani). Dawn l-attivitajiet huma relatati mal-linji bin-Nri 56, 57 (parzjalment), 108, 122 u 223 tat-tabella ta’ rkupru.

122

Qabel kollox, fir-rigward tal-laqgħa ma’ diplomat tal-Federazzjoni Russa, imsemmija fil-linja bin-Nru 56 tat-tabella ta’ rkupru, l-OLAF stabbilixxa li r-rikorrent kien iltaqa’ ma’ dan id-diplomat għal kwistjoni marbuta mal-adozzjoni ta’ wild Russu minn familja Belġjana. Skont ir-rapport tal-OLAF, rimarka fil-kalendarju numeriku tar-rikorrent kienet tirreferi għad-diffikultajiet ikkonstatati fil-fajl ta’ adozzjoni u d-diplomat inkwistjoni kien lest jagħti l-għajnuna tiegħu fir-rigward tal-formalitajiet sabiex tissolva l-problema. Barra minn hekk, l-OLAF indika li r-rikorrent kien iltaqa’ mal-istess diplomat fit‑22 ta’ Ġunju u mill-ġdid fis‑6 ta’ Lulju 2009 u li fuq l-ordnijiet ta’ missjoni kien hemm il-kliem “laqgħa mad-[diplomat]”, mingħajr indikazzjoni tal-għan veru ta’ dawn il-laqgħat. Huwa qies li din il-laqgħa kienet ta’ natura privata. Fil-fatt, ir-riferiment għal din l-attività tar-rikorrent jinsab fil-parti tar-rapport bit-titolu “Żjarat ta’ korteżija lil negozjanti u lil konoxxenzi għal raġunijiet privati”.

123

Sussegwentement, fir-rigward tal-laqgħat tar-rikorrent mal-Membri tal-Kummissjoni msemmija fil-linji bin-Nri 57 (parzjalment) u 108, mir-rapport tal-OLAF jirriżulta li, minn naħa, ir-rikorrent intervjena direttament mal-uffiċċju ta’ Membru tal-Kummissjoni dwar talba għal sussidju mressqa minn organizzazzjoni fil-kuntest tal-finanzjament għas-sostenn għall-festivals kulturali Ewropej. Min-naħa l-oħra, l-OLAF ikkonstata li r-rikorrent kien organizza laqgħa ma’ Membru tal-Kummissjoni u ma’ persuna oħra u kien ipparteċipa fiha sabiex jiddiskuti l-pożizzjoni ta’ ragruppament ta’ gruppi ta’ pressjoni fuq l-istrateġija tal-Unjoni fil-qasam tar-riċerka u tal-innovazzjoni. Skont ir-rapport tal-OLAF, din il-persuna l-oħra ltaqgħet mar-rikorrent fit‑18 ta’ Ottubru 2010 għal laqgħa ta’ segwitu, attività msemmija fil-linja bin-Nru 122 tat-tabella ta’ rkupru.

124

Fl-aħħar nett, fir-rigward ta’ laqgħa tar-rikorrent mar-Re des Belges (ir-Re tal-Belġjani) imsemmija fil-linja bin-Nru 223 tat-tabella ta’ rkupru, l-OLAF stabbilixxa, permezz tal-aġenda tar-rikorrent, li huwa kien ġie mistieden mill-familja rjali Belġjana sabiex jipparteċipa f’“avvenimenti ta’ kaċċa rjali” f’belt tal-Belġju.

125

Is-seba’ nett, għall-missjoni msemmija fil-linja bin-Nru 63 tat-tabella ta’ rkupru (parzjalment), li tirrigwarda “ċerimonja tal-ftuħ ta’ sena akkademika ta’ stabbiliment ta’ studji Ewropej”, it-tabella ta’ rkupru tirreferi għall-aġenda tar-rikorrent billi tindika li huwa ma pparteċipax għal din iċ-ċerimonja sa fejn huwa ma kienx imsemmi fil-lista ta’ personalitajiet Ewropej preżenti għaliha.

126

It-tmien nett, għall-missjoni msemmija fil-linja bin-Nru 74 tat-tabella ta’ rkupru, li tikkonċerna stedina tad-Direttur ta’ operatur ekonomiku privat, mill-aġenda tar-rikorrent jirriżulta li din il-laqgħa kienet intiża sabiex huwa jassisti għal kunċert.

127

Id-disa’ nett, fir-rigward tal-missjoni msemmija fil-linja bin-Nru 128 tat-tabella ta’ rkupru relatata mal-parteċipazzjoni tar-rikorrent f’konferenza organizzata minn organizzazzjoni li tiġbor fi ħdanha lill-proprjetarji u lill-ġestjonarji ta’ proprjetajiet Ewropej fil-Parlament Ewropew, mir-rapport tal-OLAF jirriżulta li l-parteċipazzjoni tar-rikorrent fl-avvenimenti ta’ din l-organizzazzjoni kienet marbuta mal-attività esterna tiegħu li tikkorrispondi għall-pożizzjoni ta’ President ta’ fondazzjoni ambjentali tar-reġjun ta’ oriġini tiegħu, awtorizzata mill-Qorti tal-Awdituri permezz ta’ deċiżjoni tat‑30 ta’ April 2015 (ara wkoll il-punt 33 iktar ’il fuq). L-OLAF ikkonstata wkoll li ż-żewġ organizzazzjonijiet kienu jaħdmu f’kollaborazzjoni mill-qrib u kienu jaqsmu d-dipartimenti amministrattivi tagħhom u l-persunal tagħhom.

128

L-għaxar nett, għat-talba għal rimbors imsemmija fil-linja bin-Nru 100 li tirrigwarda laqgħa ma’ Ministru tal-Istat, it-tabella ta’ rkupru tindika, b’riferiment għall-aġenda tar-rikorrent, li l-persuna li huwa kien iltaqa’ magħha kienet politiku tar-Reġjun ta’ Vlaanderen li ma kienx għadu Ministru sa mill‑2003.

129

Il‑ħdax‑il nett, għat-talba għal rimbors imsemmija fil-linja bin-Nru 173 relatata ma’ ikla ta’ nofsinhar tax-xogħol tar-rikorrent ma’ Membru Parlamentari Ewropew Ġermaniż, it-tabella ta’ rkupru tippreċiża, b’riferiment għall-aġenda tar-rikorrent u għall-paġni 5, 18, 29 u 37 tar-rapport tal-OLAF, li s-servizzi ta’ xufier intużaw għal finijiet privati sa fejn ir-rikorrent talab is-servizzi tiegħu għal tlett ijiem għal ikla ta’ nofsinhar waħda.

130

It‑tnax‑il nett, għat-talba għal rimbors imsemmija fil-linja bin-Nru 187 u marbuta mal-“istedina formali [ta’ prinċipessa]”, it-tabella ta’ rkupru tippreċiża, b’riferiment għall-aġenda tar-rikorrent, li l-karozza uffiċjali ntużat għal finijiet privati, fatt li obbliga lix-xufier jirritorna lejn il-Lussemburgu bil-ferrovija.

131

It‑tlettax‑il nett, għat-talba għal rimbors imsemmija fil-linja bin-Nru 191 li għandha bħala suġġett l-indikazzjoni “Committee of Foreign Affairs – SR No 1/2011 Devolution”, it-tabella ta’ rkupru tindika, b’riferiment għall-aġenda tar-rikorrent, li r-rikorrent uża s-servizzi ta’ xufier għal finijiet privati wara missjoni.

132

L‑erbatax‑il nett, għat-talba għar-rimbors tal-ispejjeż ta’ xufier imsemmija fil-linja bin-Nru 147 tat-tabella ta’ rkupru u li tirrigwarda laqgħa tal-Kumitat għall-Kontroll tal-Baġit tal-Parlament u konferenza waqt ikla ta’ nofsinhar organizzata minn assoċjazzjoni, din it-tabella tindika, b’riferiment għall-aġenda tar-rikorrent, li din hija missjoni “mingħajr kumpens” li tirrigwarda appuntament mediku tar-rikorrent, li fil-kuntest tagħha x-xufier kellu jieħu l-ferrovija mil-Lussemburgu għal Brussell u jakkumpanja lura lir-rikorrent bil-karozza uffiċjali lejn il-Lussemburgu.

133

Il‑ħmistax‑il nett, għat-talba għal rimbors imsemmija fil-linja bin-Nru 157 u marbuta ma’ laqgħa mal-Prim Ministru u ma’ persuna responsabbli minn kumpannija tal-awditjar, it-tabella ta’ rkupru tindika, b’riferiment għall-aġenda tar-rikorrent, li l-appuntament ta’ bejn it‑15.30 u s‑18.00 ma’ impjegati ta’ din il-kumpannija f’ċirku li huwa intiż li jsaħħaħ il-preżenza tal-impriżi tar-Reġjun ta’ Vlaanderen fi Brussell, li kellu l-effett li jirdoppja l-allowances tal-missjoni tar-rikorrent u tax-xufier u li jirdoppja l-ħin tax-xogħol tax-xufier, kien problematiku, għaliex ma kellux rabta mal-attivitajiet tal-Qorti tal-Awdituri. Barra minn hekk, din it-tabella tindika li x-xufier kellu jmur Brussell bil-ferrovija, peress li r-rikorrent żamm il-karozza uffiċjali.

134

Is‑sittax‑il nett, għat-talba għal rimbors imsemmija fil-linja bin-Nru 229 (parzjalment) u marbuta mal-ispejjeż tal-missjoni għal stedina formali f’kastell fi Franza għal “[j]um tal-istituzzjonijiet Ewropej”, it-tabella ta’ rkupru tirrileva, b’riferiment għall-aġenda tar-rikorrent, li din hija attività ta’ divertiment, jiġifieri parteċipazzjoni f’kaċċa fi Franza b’żewġ iljieli f’lukanda fuq il-post.

135

Fl-aħħar, fis‑sbatax‑il nett, għat-talbiet għal rimbors imsemmija fil-linji bin-Nri 13, 33, 47, 73, 76, 80, 103, 104, 161, 163, 164, 177, 210, 225, 237, 251 u 259 tat-tabella ta’ rkupru, li jirrigwardaw laqgħat ma’ mexxejja ta’ operaturi ekonomiċi privati, fosthom persuni responsabbli għal uffiċċji internazzjonali tal-awditjar, it-tabella ta’ rkupru tindika, b’riferiment għar-rapport tal-OLAF, b’mod partikolari għall-paġni 5, 18, 29 u 37 tiegħu, jew, f’ċerti każijiet, għall-aġenda tar-rikorrent, dan li ġej: għat-talba msemmija fil-linja bin-Nru 13, “ikla ta’ nofsinhar offruta lil operatur ekonomiku (‘missjoni mingħajr kumpens’, irrikonoxxuta iktar tard mir-[rikorrent] bħala privata)”; għat-talba msemmija fil-linja bin-Nru 33, “riċeviment f’unur il-[President‑Direttur Ġenerali] ta’ operatur ekonomiku […] li huwa wkoll membru tal-Bord tad-Diretturi [ta’ operatur ekonomiku ieħor] (li r-rikorrent kien huwa stess membru tiegħu sat‑30 ta’ Ġunju 2006)”; għat-talbiet imsemmija fil-linji bin-Nri 47, 103, 161 u 210, skont id-deskrizzjoni tal-istedina li l-“avveniment organizzat minn u favur [kumpannija tal-awditjar] huwa inkompatibbli mal-funzjonijiet ta’ Membru tal-Qorti tal-Awdituri”; għat-talbiet imsemmija fil-linji bin-Nri 73 u 76, “laqgħa mad-Direttur ta’ kumpannija ta’ esperti fil-kontabbiltà tar-reġjun tal-post ta’ oriġini [tar-rikorrent]”; għat-talba msemmija fil-linja bin-Nru 80, “kunċert privat — divertiment”; għat-talba msemmija fil-linja bin-Nru 104, “laqgħa mal-[President‑Direttur Ġenerali] ta’ operatur ekonomiku […]”; għat-talba msemmija fil-linja bin-Nru 163, “laqgħa mad-Direttur Ġenerali [ta’ operatur ekonomiku]”; għat-talba msemmija fil-linja bin-Nru 164, “laqgħa ma’ sieħeb tal-kaċċa […] li jmexxi [kumpannija Belġjana]”; għat-talba msemmija fil-linja bin-Nru 177, “laqgħa ma’ amministratur [ta’] kumpanija tal-investiment tar-Reġjun ta’ Vlaanderen”; għat-talba msemmija fil-linja bin-Nru 225, “attività kulturali privata (Opra La Traviata f’Monnaie, Brussell) li għaliha [ir-rikorrent] huwa mistieden minn operatur ekonomiku”; għat-talba msemmija fil-linja bin-Nru 237, “laqgħa f’lukanda fi Brussell ma’ soċju [ta’] kumpannija tal-awditjar u ta’ konsulenza”; għat-talba msemmija fil-linja bin-Nru 251, “ikla ta’ nofsinhar offruta lill-[President‑Direttur Ġenerali] ta’ kumpannija ta’ esperti fil-kontabbiltà f’Hasselt (ir-Reġjun ta’ Vlaanderen) [(il-Belġju)] li [ir-rikorrent] ltaqa’ mill-ġdid miegħu l-għada, din id-darba fil-kuntest ta’ ordni ta’ missjoni”, u għat-talba msemmija fil-linja bin-Nru 259, “attività ta’ divertiment: parteċipazzjoni fil-festival tal-mużika Odegand f’Gent [(il-Belġju)] is-Sibt”.

136

Konsegwentement, fir-rigward tat-talbiet għal rimbors tar-rikorrent imsemmija fil-linji bin-Nri 1, 2, 3, 4, 5, 6, 7, 12, 13, 14, 15, 16, 17, 18, 19, 20, 23, 24, 29, 31, 32, 33, 39, 41, 43, 45, 47, 48, 54, 56, 57, 59, 60, 61, 63, 65, 66, 68, 69, 70, 73, 74, 75, 76, 80, 81, 82, 83, 84, 85, 86, 88, 89, 92, 93, 94, 95, 96, 97, 100, 103, 104, 108, 111, 114, 115, 116, 118 (parzjalment), 120, 121, 122, 128, 130, 131, 132, 133, 134 u 135, 137, 138, 143, 147, 150, 154, 155, 157, 161, 163, 164, 168, 169, 170, 171, 173, 174 (parzjalment), 175, 177, 183, 184, 187, 190, 191, 192, 194, 196, 199, 202, 203, 204, 207, 208, 209, 210, 211, 215, 217, 218, 219, 221, 223, 224, 225, 227, 228, 229, 230, 232, 236, 237, 238, 239, 242, 248, 251, 253, 256, 257 (parzjalment), 258, 259, 260 u 261 (parzjalment), u tat-tabella ta’ rkupru, kien biss wara l-investigazzjoni tal-OLAF li l-Qorti tal-Awdituri, f’ċirkustanzi normali, kienet pożizzjoni li tinvoka l-kreditu tagħha fir-rigward tal-imsemmija linji, fis-sens tat-tieni subparagrafu tal-Artikolu 98(2) tar-Regolament 2018/1046.

137

Sa fejn il-Qorti tal-Awdituri rċeviet ir-rapport tal-OLAF biss fit‑2 ta’ Lulju 2018, filwaqt li stabbilixxiet ir-rapport preliminari tagħha fil‑5 ta’ Ottubru 2018 dwar it-talbiet għal rimbors imsemmija fil-linji tat-tabella ta’ rkupru indikati fil-punt 136 iktar’ il fuq, għandu jitqies li, fid-dawl tal-fatti esposti fil-punt 54 iktar’ il fuq, hija setgħet tidentifika u tikkonstata l-kreditu tagħha bħala ċert biss mit‑2 ta’ Lulju 2018 u b’hekk hija informat lir-rikorrent dwar il-kreditu tagħha b’osservanza tat-terminu ta’ ħames snin previst wara l-konstatazzjoni tal-kreditu, skont it-tieni subparagrafu tal-Artikolu 98(2) tar-Regolament 2018/1046. F’dawn iċ-ċirkustanzi, it-talbiet għal rimbors imsemmija fil-linji tat-tabella ta’ rkupru indikati fil-punt 136 iktar ’il fuq ma humiex preskritti.

2)

Fuq it‑tieni grupp tat‑talbiet għal rimbors tar‑rikorrent

138

Għandu jiġi kkonstatat li, fost it-talbiet għal rimbors tar-rikorrent li jikkorrispondu għal-linji bin-Nri 1 sa 261 tat-tabella ta’ rkupru, uħud minnhom kienu jinkludu informazzjoni inkompleta jew suspettuża u kienu jiġġustifikaw verifiki min-naħa tal-OLAF, b’tali mod li kien biss fi tmiem l-investigazzjoni tal-OLAF li l-Qorti tal-Awdituri kienet f’pożizzjoni li tikkonstata l-kreditu tagħha.

139

Minn naħa, dawn huma talbiet għal rimbors tar-rikorrent li kienu jinvolvu ammonti a priori eċċessivi.

140

Fil-fatt, l-ewwel nett, it-talbiet għar-rimbors tal-ispejjeż ta’ rappreżentanza msemmija fil-linji bin-Nri 27, 90, 98, 152 u 257 (parzjalment) tat-tabella ta’ rkupru, li kienu relatati mal-laqgħat tar-rikorrent ma’ mexxejja politiċi jew, f’ċerti każijiet limitati, ma’ membri tal-uffiċċji tagħhom, kienu jirrigwardaw l-ammonti, rispettivament, ta’ EUR 753 għal ikla ta’ filgħaxija ma’ tliet persuni (linja bin-Nru 27), ta’ EUR 1 159 għal ikla ta’ filgħaxija ma’ ħames persuni (linja bin-Nru 90), ta’ EUR 799 għal ikla ta’ filgħaxija ma’ żewġ persuni (linja bin-Nru 98), ta’ EUR 884 għal ikla ta’ filgħaxija ma’ erba’ persuni (linja bin-Nru 152) u ta’ EUR 802 għal ikla ta’ filgħaxija ma’ tliet persuni (linja bin-Nru 257).

141

It-tieni nett, it-talbiet għar-rimbors tal-ispejjeż ta’ rappreżentanza msemmija fil-linji bin-Nri 22, 55, 110, 160, 216, 243 u 245 tat-tabella ta’ rkupru, li kienu relatati mar-riċevimenti organizzati fid-dar tar-rikorrent, kienu jirrigwardaw l-ammonti, rispettivament, ta’ EUR 2 520.68 għal 18‑il persuna (linja bin-Nru 22), ta’ EUR 1 976 għal 12‑il persuna (linja bin-Nru 55), ta’ EUR 2 271.36 għal 11‑il persuna (linja bin-Nru 110), ta’ EUR 3 018.90 għal 16‑il persuna (linja bin-Nru 160), ta’ EUR 2 340 għal 10‑il persuna (linja bin-Nru 216), ta’ EUR 1 897.28 għal 9 persuni (linja bin-Nru 243) u ta’ EUR 2 069.76 għal 10 persuni (linja bin-Nru 245).

142

It-tielet nett, it-talba għar-rimbors tal-ispejjeż ta’ rappreżentanza msemmija fil-linja bin-Nru 123 tat-tabella ta’ rkupru kienet tirrigwarda ikla ta’ filgħaxija ma’ 11‑il persuna, fosthom żewġ “CEO” ta’ operaturi ekonomiċi u l-President tal-partit politiku inkwistjoni, għal ammont ta’ EUR 2 352.

143

Fl-aħħar, ir-raba’ nett, it-talba għar-rimbors tal-ispejjeż tal-missjoni u tal-allowances ta’ kuljum imsemmija fil-linja bin-Nru 252 tat-tabella ta’ rkupru, li tirrigwarda l-parteċipazzjoni tar-rikorrent f’forum tas-sajf fl-Isvizzera, kienet tirrigwarda l-ammont ta’ EUR 3 931.20.

144

Min-naħa l-oħra, il-Qorti tal-Awdituri awtorizzat ċerti talbiet għal rimbors tar-rikorrent li ma kinux jipprovdu informazzjoni essenzjali dwar l-attivitajiet li dawn kienu jikkonċernaw.

145

L-ewwel nett, it-talbiet għal rimbors tar-rikorrent imsemmija fil-linji bin-Nri 42, 44, 49, 50, 51, 139, 178, 188, 205, 234 u 235 u 254 u 255 tat-tabella ta’ rkupru kienu intiżi sabiex huwa jiltaqa’ ma’ persuna identifikata b’isimha, iżda mingħajr ebda preċiżazzjoni tal-kwalità tagħha.

146

It-tieni nett, it-talbiet għal rimbors tar-rikorrent imsemmija fil-linji bin-Nri 21, 28, 40 u 162 tat-tabella ta’ rkupru jirreferu għal laqgħat ma’ persuna sempliċement indikata bħala “Direttur tal-Istudji”, “Direttur Ġenerali”, “Direttur” u “Kumitat”.

147

It-tielet nett, it-talbiet għal rimbors tar-rikorrent imsemmija fil-linji bin-Nri 46, 53, 67, 79, 99, 101, 113, 159 u 181 tat-tabella ta’ rkupru ġew iġġustifikati mir-rikorrent billi rrefera, rispettivament, għal “stedina formali minn [kampus]” (linji bin-Nri 46 u 159), għal “[università]” (linja bin-Nru 53), għal “stedina formali” (linji bin-Nri 67 u 79), għal “stedina formali [ta’ università]” (linja bin-Nru 99), għal “stedina formali [għall-garden-party ta’ orkestra]” (linja bin-Nru 101), għal “[aġent tal-proprjetà immobbli]” (linja bin-Nru 113) u għall-“preżentazzjoni tar-rapport annwali 2010” (linja bin-Nru 181).

148

Ir-raba’ nett, it-talbiet għal rimbors tar-rikorrent imsemmija fil-linji bin-Nri 38, 62, 64, 77, 78, 107, 109, 112, 124, 126, 127, 129, 136, 140, 141, 142, 144, 145, 146, 148, 149, 156, 158, 165, 166, 172, 176, 179, 180, 182, 189, 193, 195, 197, 198, 200, 206, 212, 213, 220, 222, 226, 231, 233, 240, 241, 244, 246, 247, 249 u 250 tat-tabella ta’ rkupru jirreferu għal spejjeż ta’ xufier iġġustifikati bħala “ġbir [tar-rikorrent] f’Verbier”, “sewqan [tar-rikorrent]”, “sewqan ta’ karozza KD […] f’Verbier (l-Isvizzera)”, “ġbir ta’ KD […]”, “sewqan tal-karozza uffiċjali”, “sewqan ta’ karozza KD […]”, “sewqan ta’ KD”, “ġbir tar-[rikorrent]”, “konsenja [ta’] dokumenti” u “konsenja [ta’] dokumenti importanti” jew mhux iġġustifikati b’ebda mod.

149

Ċertament, li kieku l-Qorti tal-Awdituri kienet aġixxiet bid-diliġenza meħtieġa, hija setgħet titlob lir-rikorrent jipprovdi ġustifikazzjonijiet addizzjonali dwar l-ammonti a priori eċċessivi msemmija fil-punti 140 sa 143 iktar’ il fuq u dwar il-preċiżazzjonijiet neqsin fir-rigward tat-talbiet għal rimbors tar-rikorrent indikati fil-punti 145 sa 148 iktar ’il fuq. Dan l-approċċ kien jippermettilha tirreaġixxi fil-mument tat-tressiq tat-talbiet tar-rikorrent u, jekk ikun il-każ, tidentifika u tikkonstata l-kreditu.

150

Madankollu, mill-proċess jirriżulta li l-investigazzjoni tal-OLAF għamlet preċiżazzjonijiet addizzjonali dwar l-attivitajiet tar-rikorrent relatati mat-talbiet kollha għal rimbors tiegħu previsti fil-linji msemmija fil-punti 140 sa 143 u 145 sa 148 iktar ’il fuq u għamlet preċiżazzjonijiet addizzjonali għall-analiżi tal-imsemmija attivitajiet. Dawn il-preċiżazzjonijiet ma kinux magħrufa mill-Qorti tal-Awdituri meta tressqu t-talbiet tar-rikorrent, fatt li wassalha tikkonfutahom biss fi tmiem l-investigazzjoni tal-OLAF.

151

Fir-rigward tat-talbiet għal rimbors tar-rikorrent previsti fil-linji msemmija fil-punti 140 u 142 iktar ’il fuq, għandu jsir riferiment għall-punti 110, 111, 117 u 118 iktar ’il fuq, li jesponu l-informazzjoni li l-OLAF speċifika matul l-investigazzjoni tiegħu fir-rigward tal-attivitajiet tar-rikorrent li jikkorrispondu għall-imsemmija talbiet.

152

Fir-rigward tat-talbiet għal rimbors tar-rikorrent previsti fil-linji msemmija fil-punt 141 iktar ’il fuq, jiġifieri l-linji bin-Nri 22, 55, 110, 160, 216, 243 u 245 tat-tabella ta’ rkupru, dawn jirrigwardaw ir-riċevimenti organizzati fid-dar tar-rikorrent. Fir-rapport tiegħu, l-OLAF ippreċiża l-għan u n-natura kif ukoll ir-rabta tar-rikorrent mal-mistednin għal tali riċevimenti. L-OLAF ikkonstata li, bejn l‑2006 u l‑2016, ir-rikorrent kien organizza tlettax‑il ikla privata u informali għal pubbliku magħżul fil-post ta’ oriġini tiegħu. Skont l-OLAF, fost il-mistednin dejjem kien hemm mexxej politiku Belġjan wieħed jew tnejn kif ukoll xi ħbieb li jokkupaw pożizzjonijiet għolja fis-settur privat u, skont il-kliem użat mir-rikorrent f’ittra ta’ stedina, dawn l-avvenimenti kienu organizzati sabiex jgħaddu serata “pjaċevoli, rilassata u utli fil-kumpannija tar-Reġjun ta’ Vlaanderen magħżula”. L-OLAF qies li l-mistednin kienu kollha ħbieb qrib, marbuta b’diskrezzjoni u kunfidenzjalità assoluta f’dak li jirrigwarda l-konverżazzjonijiet. Fir-rapport tal-OLAF kien ippreċiżat ukoll li 46 persuna kienu pparteċipaw fl-ikliet tal-filgħaxija privati u li, apparti l-fatt li huma kienu ħbieb tar-rikorrent, ir-rabtiet tagħhom ma’ dan tal-aħħar setgħu ġeneralment jiġu kklassifikati bħala li jaqgħu taħt attivitajiet li jirrigwardaw il-politika Belġjana, il-kaċċa, pożizzjonijiet ta’ “CEO” u l-istituzzjonijiet tal-Unjoni.

153

Fir-rigward tat-talba għal rimbors tar-rikorrent imsemmija fil-punt 143 iktar ’il fuq, jiġifieri dik imsemmija fil-linja bin-Nru 252, li tirrigwarda l-missjoni tar-rikorrent għal “forum tas-sajf” fl-Isvizzera, qabel kollox, waqt l-investigazzjoni tiegħu, l-OLAF ippreċiża li dan l-avveniment tas-sajf ma kellux programm uffiċjali u li mill-preżentazzjoni tiegħu kien jirriżulta li l-mistednin kienu pparteċipaw f’eskursjonijiet, f’kuntest ta’ rikreazzjoni. Sussegwentement, l-OLAF iċċita n-nota tar-rikorrent mibgħuta lill-President tal-Qorti tal-Awdituri sabiex jitlob ir-rimbors tal-ispejjeż korrispondenti, li fiha r-rikorrent kien ippreżenta dan il-forum tas-sajf bħala ragruppament ta’ rappreżentanti eminenti ta’ Gvernijiet, ta’ diplomati, ta’ organizzazzjonijiet internazzjonali, ta’ partiti politiċi u ta’ parlamenti sabiex jiġu diskussi kwistjonijiet ta’ attwalità fil-politika internazzjonali. Fl-aħħar nett, l-OLAF ikkonkluda li, filwaqt li r-rikorrent kien konxju tan-natura vera ta’ dan l-avveniment, huwa kien żnatura l-informazzjoni dwaru, billi ppreżentah lill-President tal-Qorti tal-Awdituri bħala forum ta’ diskussjoni politika ta’ livell għoli sabiex jikseb ir-rimbors tal-ispejjeż tiegħu.

154

Fir-rigward tat-talbiet għal rimbors tar-rikorrent imsemmija fil-punti 145 sa 148 iktar ’il fuq, minn naħa, dawn huma talbiet li fir-rigward tagħhom l-OLAF jagħmel preċiżazzjonijiet fir-rapport tiegħu u li huma dawn li ġejjin:

–

għat-talba għal rimbors imsemmija fil-linja bin-Nru 44, bit-titolu “Ikla ta’ filgħaxija – Stedina minn […]”, l-OLAF ikkonstata li din kienet ikla ta’ filgħaxija ma’ amministratur ta’ operatur ekonomiku u li, fil-fatt, ir-rikorrent kien membru tal-Bord tad-Diretturi ta’ dan l-operatur sat‑30 ta’ Ġunju 2006;

–

għat-talba għal rimbors imsemmija fil-linja bin-Nru 49, bit-titolu “Ikla ta’ nofsinhar tax-xogħol ma’ […]”, l-OLAF fil-fatt rabat din l-attività ma’ festival tal-mużika;

–

għat-talbiet għal rimbors imsemmija fil-linji bin-Nri 51 u 113, bit-titoli, rispettivament, “Laqgħa ma’ […] u ma’ “[aġent ta’ proprjetà immobbli]”, l-OLAF ikkonstata li dawn l-attivitajiet kienu fil-fatt marbuta ma’ proprjetajiet privati tar-rikorrent fi Brussell;

–

għat-talba għal rimbors imsemmija fil-linja bin-Nru 101, bit-titolu “Stedina formali għall-[garden-party ta’ orkestra]”, l-OLAF fil-fatt ikkonstata n-natura privata ta’ din l-attività;

–

għat-talba għal rimbors imsemmija fil-linja bin-Nru 205, bit-titolu “Sur […]” l-OLAF ikkonstata li din il-persuna kienet fil-fatt perit li kien jagħti parir lir-rikorrent fil-kuntest tax-xiri ta’ appartament fi Brussell.

155

Min-naħa l-oħra, fost it-talbiet għal rimbors tar-rikorrent imsemmija fil-punti 145 à 148 iktar ’il fuq, hemm dawk li għalihom it-tabella ta’ rkupru tirreferi għall-paġni preċiżi tar-rapport tal-OLAF jew tal-aġenda tar-rikorrent, li tagħmel parti minn dan ir-rapport, mingħajr ma ssemmi speċifikament dawn it-talbiet f’dan tal-aħħar, u li huma dawn li ġejjin:

–

għat-talbiet għal rimbors imsemmija fil-linji bin-Nri 21 u 40, li għandhom bħala suġġett żewġ ikliet ta’ nofsinhar tar-rikorrent ma’ “Direttur tal-istudji”, it-tabella ta’ rkupru tippreċiża li dawn huma laqgħat ma’ membru tal-partit politiku inkwistjoni, filwaqt li tipproduċi bħala provi l-konstatazzjonijiet tal-OLAF fil-paġni 10, 11 u 12 tar-rapport tiegħu u, fir-rigward tal-attività msemmija fil-linja bin-Nru 40, l-aġenda tar-rikorrent;

–

għat-talba għal rimbors imsemmija fil-linja bin-Nru 28, bit-titolu “Sur […]” Direttur Ġenerali”, it-tabella ta’ rkupru tirreferi għall-paġni 15 u 16 u għall-Anness 16 tar-rapport tal-OLAF u mill-paġna 16 tal-imsemmi rapport jirriżulta li l-persuna li r-rikorrent kien iltaqa’ magħha kienet Direttur Ġenerali ta’ ragruppament li jirrappreżenta l-interessi tal-persuni li jimpjegaw ta’ impriżi privati fi ħdan l-Unjoni;

–

għat-talba għal rimbors imsemmija fil-linja bin-Nru 38, bit-titolu “Ġbir [tar-rikorrent] f’Verbier (l-Isvizzera)”, it-tabella ta’ rkupru tippreċiża, b’riferiment għall-intervisti tax-xufiera matul l-investigazzjoni, li din kienet fil-fatt marbuta ma’ vaganzi tal-iskijjar li kienu jeħtieġu l-użu tas-servizzi ta’ xufier, li kien mar jiġbor lir-rikorrent mill-post tal-vaganzi tiegħu u wasslu sal-post ta’ oriġini tiegħu;

–

għat-talbiet għal rimbors imsemmija fil-linji bin-Nri 42, 46, 50, 52 u 53, bit-titoli, rispettivament, “Ikla ta’ nofsinhar mas-Sur […]”, “Stedina formali [ta’ kampus]”, “Laqgħa mas-Sur […]”, “Stedina [ta’ persuna li tmexxi ’ kulleġġ mużikali]” u “[università]”, it-tabella ta’ rkupru tippreċiża, b’riferiment għall-aġendi tar-rikorrent, li dawn kienu missjonijiet “mingħajr kumpens” li jirrigwardaw l-ispejjeż ta’ rappreżentanza relatati fil-fatt ma’ laqgħa ma’ prosekutur ta’ distrett li kien jagħmel parti mill-komun ta’ oriġini tar-rikorrent (linja bin-Nru 42) u l-ispejjeż ta’ xufier sabiex ir-rikorrent jitwassal lejn skola sekondarja fil-belt ta’ oriġini tiegħu għal avveniment filgħaxija (linja bin-Nru 46), sabiex ir-rikorrent jittieħed għal laqgħa privata (linja bin-Nru 50), sabiex ix-xufier, li kellu jwassal lir-rikorrent lura lejn il-post ta’ oriġini tiegħu wara serata ta’ divertiment, jorqod hemmhekk f’lukanda u jirritorna lura l-għada bil-ferrovija lejn il-Lussemburgu, imur minn post għall-ieħor (linja bin-Nru 52), u sabiex ir-rikorrent jattendi għaċ-ċeremonja ta’ għoti ta’ diplomi tat-tifla tiegħu (linja bin-Nru 53);

–

għat-talba għal rimbors imsemmija fil-linja bin-Nru 62, bit-titolu “Sewqan [tar-rikorrent]”, it-tabella ta’ rkupru tindika, b’riferiment għall-aġenda tar-rikorrent, li huwa kellu jkun fuq missjoni t-Tlieta 4 ta’ Novembru 2009 f’belt fil-Belġju mill‑10.30 sas‑13.00 (ċerimonja ta’ ftuħ ta’ sena akkademika ta’ stabbiliment ta’ studji Ewropej) u li, madankollu, huwa talab lil xufier jmur jiġbru lejliet mill-post ta’ oriġini tiegħu u mhux mil-Lussemburgu u jqatta’ l-lejl fuq il-post f’lukanda. L-istess tabella tispeċifika wkoll li r-rikorrent talab lix-xufier iwasslu mill-ġdid lejn il-post ta’ oriġini tiegħu nhar it-Tlieta 4 ta’ Novembru u li jqatta’ lejl fuq il-post fl-istess lukanda qabel ma jsuqu lura mill-ġdid lejn il-Lussemburgu nhar l-Erbgħa 5 ta’ Novembru;

–

għat-talbiet għal rimbors imsemmija fil-linji bin-Nri 64 u 78, bit-titolu “Sewqan [tar-rikorrent]”, it-tabella ta’ rkupru, b’riferiment għar-rapport tal-OLAF, tindika li dawn l-attivitajiet kienu fil-fatt relatati mal-parteċipazzjoni tar-rikorrent għal-laqgħa tal-bord tal-partit politiku inkwistjoni;

–

għat-talba għal rimbors imsemmija fil-linja bin-Nru 67, bit-titolu “Stedina formali”, it-tabella ta’ rkupru tippreċiża, b’riferiment għall-aġenda tar-rikorrent u għall-paġna 8 tar-rapport tal-OLAF, li din l-attività kienet marbuta mal-kaċċa, fejn ir-rikorrent talab lil tieni xufier jingħaqad miegħu f’belt fil-Belġju li fiha huwa kien jipprattika l-kaċċa filwaqt li huwa kien diġà jinsab fuq il-post ma’ xufier u l-karozza uffiċjali;

–

għat-talbiet għal rimbors imsemmija fil-linji bin-Nri 77, 107, 112, 195, 198, 212, 213 u 233, bit-titoli “Sewqan ta’ KD […]”, “Sewqan [tar-rikorrent]” jew “Ġbir [tar-rikorrent]”, it-tabella ta’ rkupru tirrileva, b’riferiment għall-aġendi tar-rikorrent jew għall-paġni 5, 18, 29 u 37 tar-rapport tal-OLAF, li l-ispejjeż ta’ xufier marbuta ma’ vjaġġi fil-belt ta’ oriġini tar-rikorrent jew fi Brussell ġew sostnuti mingħajr ebda missjoni għar-rikorrent;

–

għat-talba għal rimbors imsemmija fil-linja bin-Nru 79, bit-titolu “Formal Invitation”, it-tabella ta’ rkupru tindika, b’riferiment għall-aġenda tar-rikorrent u għall-paġni 5, 18, 29 u 37 tar-rapport tal-OLAF, li din l-attività kienet marbuta mar-riċeviment tas-“sena l-ġdida” ta’ ċirku, li huwa intiż li jsaħħaħ il-preżenza tal-impriżi tar-Reġjun ta’ Vlaanderen fi Brussell, f’lukanda;

–

għat-talba għal rimbors imsemmija fil-linja bin-Nru 99, it-tabella ta’ rkupru tippreċiża, b’riferiment għall-aġenda tar-rikorrent, li l-missjoni li għandha bħala suġġett l-istedina formali minn università kienet tirrigwarda l-għoti ta’ diplomi ta’ dottorati onorarji lil artisti f’università tar-reġjun ta’ oriġini tar-rikorrent u li din l-attività kienet ġiet segwita minn kunċert;

–

għat-talbiet għal rimbors imsemmija fil-linji bin-Nri 106, 151, 153, 167 u 214, bit-titoli, rispettivament, “Med. Dr. […] - Missjoni mingħajr kumpens, “Prof. Dr. Med. […], [ta’ sptar universitarju]”, “Prof. Dr. […]”, “Prof. Dr. […] [ta’ sptar universitarju]” u “[…] Prof. Dr. […]”, it-tabella ta’ rkupru tippreċiża, b’riferiment għall-aġenda tar-rikorrent, li x-xufier fil-fatt intuża għal finijiet privati għal appuntamenti mediċi;

–

għat-talbiet għal rimbors imsemmija fil-linji bin-Nri 109, 126, 145, 146, 148, 158, 156, 165, 179, 180, 188, 200, 206, 220, 226, 231, 240, 241, 244 u 246, bit-titoli “Sewqan [tar-rikorrent]” jew “sewqan KD […]”, it-tabella ta’ rkupru tindika, b’riferiment għall-aġenda tar-rikorrent, li s-servizzi tax-xufier intużaw għal finijiet privati sabiex iwassal lir-rikorrent lejn il-post ta’ oriġini tiegħu jew sabiex iqegħedlu għad-dispożizzjoni tiegħu l-karozza uffiċjali filwaqt li x-xufier kellu jqatta’ l-lejl fil-lukanda fil-post ta’ oriġini tar-rikorrent u jaqbad il-ferrovija l-għada. Barra minn hekk, ma’ dawn it-talbiet għandha tiżdied dik imsemmija fil-linja bin-Nru 247, bit-titolu “Sewqan ta’ karozza uffiċjali”, li għaliha mit-tabella ta’ rkupru jirriżulta, liema tabella tirreferi għall-aġenda tar-rikorrent, li x-xufier kellu jsuq karozza uffiċjali sabiex iqegħedha għad-dispożizzjoni tar-rikorrent f’Bornem (il-Belġju);

–

għat-talbiet għal rimbors imsemmija fil-linji bin-Nri 124, 176 u 181, għall-ewwel żewġ talbiet bit-titolu “Ġbir [tar-rikorrent]” u għat-tielet waħda bit-titolu “Preżentazzjoni tar-rapport annwali 2010”, it-tabella ta’ rkupru tippreċiża, b’riferiment għall-aġenda tar-rikorrent, li s-servizzi tax-xufier intużaw għal finijiet privati, jiġifieri fi tmiem missjoni, fejn ir-rikorrent irritorna lura lejn il-post ta’ oriġini tiegħu, u mhux lejn il-Lussemburgu;

–

għat-talbiet għal rimbors imsemmija fil-linji bin-Nri 127, 140, 149, 166, 182, 189, 193, 234 u 235, bit-titolu “Sewqan tal-karozza uffiċjali” jew “Sewqan [tar-rikorrent]”, it-tabella ta’ rkupru ssemmi, b’riferiment għall-aġendi tar-rikorrent, li s-servizzi tax-xufier intużaw għal finijiet privati, sa fejn ir-rikorrent talab lil xufier jiġi jiġbru mill-post ta’ oriġini tiegħu jew minn Brussell u jieħdu l-Lussemburgu;

–

għat-talba għal rimbors imsemmija fil-linja bin-Nru 129, bit-titolu “Sewqan tal-karozza uffiċjali”, it-tabella ta’ rkupru ssemmi, b’riferiment għall-aġenda tar-rikorrent, li s-servizzi tax-xufier intużaw għal finijiet privati, peress li x-xufier mar jiġbor lill-konjuġi tar-rikorrent mill-post ta’ oriġini ta’ dan tal-aħħar sabiex iwassalha għal ikla ta’ filgħaxija li għaliha kienu preżenti Membri tal-Qorti tal-Awdituri fil-Lussemburgu;

–

għat-talba għal rimbors imsemmija fil-linja bin-Nru 136, bit-titolu “Sewqan [tar-rikorrent]”, it-tabella ta’ rkupru tindika, b’riferiment għall-aġenda tar-rikorrent, li s-servizzi tax-xufier intużaw għal finijiet privati, peress li xufier wassal lir-rikorrent fil-post ta’ oriġini tiegħu nhar il-Ġimgħa wara nofsinhar, ħallielu l-karozza uffiċjali u rritorna lejn il-Lussemburgu bil-ferrovija;

–

għat-talba għal rimbors imsemmija fil-linja bin-Nru 139, bit-titolu “Laqgħa mas-Sur […] u mas-Sur […]”, it-tabella ta’ rkupru tirreferi għall-aġenda tar-rikorrent u għall-konstatazzjonijiet tal-OLAF fil-paġni 10, 11 u 12 tar-rapport tiegħu;

–

għat-talba għal rimbors imsemmija fil-linja bin-Nru 141, bit-titolu “Konsenja ta’ dokumenti”, it-tabella ta’ rkupru tindika, b’riferiment għall-aġenda tar-rikorrent, li s-servizzi tax-xufier intużaw għal finijiet privati, filwaqt li tispjega dan li ġej:

–

għat-talba għal rimbors imsemmija fil-linja bin-Nru 142, bit-titolu “Sewqan ta’ karozza KD […] f’Verbier (l-Isvizzera)”, it-tabella ta’ rkupru tindika, b’riferiment għall-aġenda tar-rikorrent u għall-intervista mwettqa ma’ xufier waqt l-investigazzjoni tal-OLAF, li s-servizz ta’ xufier intuża għal finijiet privati;

–

għat-talba għal rimbors imsemmija fil-linja bin-Nru 144, bit-titolu “Sewqan [tar-rikorrent]”, it-tabella ta’ rkupru tippreċiża, b’riferiment għall-aġenda tar-rikorrent u għall-paġni 5, 18, 29 u 37 tar-rapport tal-OLAF, li din l-attività kienet marbuta ma’ laqgħa mad-Direttur ta’ kumpannija tal-fotogrammetrija tar-Reġjun ta’ Vlaanderen;

–

għat-talba għal rimbors imsemmija fil-linja bin-Nru 159, it-tabella ta’ rkupru tippreċiża, b’riferiment għall-aġenda tar-rikorrent, li l-missjoni li kellha bħala suġġett stedina formali minn kampus kienet marbuta ma’ skola sekondarja li tinsab fil-belt ta’ oriġini tar-rikorrent u li din kienet missjoni “mingħajr kumpens”;

–

għat-talba għal rimbors prevista fil-linja bin-Nru 162, bit-titolu “Stedina formali ta’ kumitat”, it-tabella ta’ rkupru tippreċiża li, fil-kuntest ta’ din l-attività, ir-rikorrent assista għall-kompetizzjoni ta’ kant ta’ kappella, filwaqt li ssemmi l-paġni 5, 18, 29 u 37 tar-rapport tal-OLAF u l-aġenda tar-rikorrent;

–

għat-talbiet għal rimbors imsemmija fil-linji bin-Nri 172, 222 u 249, bit-titolu “Konsenja ta’ dokumenti importanti”, it-tabella ta’ rkupru tindika, b’riferiment għall-aġenda tar-rikorrent, li s-servizzi tax-xufier intużaw għal finijiet privati sabiex jieħu dokumenti fil-post ta’ oriġini tar-rikorrent, fejn ix-xufier kien obbligat juża vettura uffiċjali oħra jew iqatta’ lejl u jirritorna lura lejn il-Lussemburgu;

–

għat-talba għal rimbors imsemmija fil-linja bin-Nru 178, bit-titolu “Sur […]” […]”, it-tabella ta’ rkupru tindika li din hija laqgħa mad-Direttur ta’ kumpannija ta’ bejgħ ta’ ħwejjeġ tal-isport, filwaqt li tirreferi għall-konstatazzjonijiet tal-OLAF fl-Anness 10 tar-rapport tiegħu (jiġifieri dawk relatati mar-riċevimenti tal-kaċċa f’kastell fi Franza), mingħajr ma ssemmi speċifikament l-attività msemmija f’din il-linja;

–

għat-talba għal rimbors imsemmija fil-linja bin-Nru 197, bit-titolu “Ġbir ta’ KD […] ”, it-tabella ta’ rkupru tindika, b’riferiment b’mod partikolari għall-intervisti tar-rikorrent u ta’ xufier, li s-servizzi tax-xufier intużaw għal finijiet privati, sa fejn ix-xufier mar jiġbor il-karozza privata tar-rikorrent minn garaxx fi Brussell sabiex joħodha l-Lussemburgu;

–

għat-talba għal rimbors imsemmija fil-linja bin-Nru 250, bit-titolu “Sewqan ta’ KD […]”, it-tabella ta’ rkupru tindika, b’riferiment għall-intervisti tar-rikorrent u ta’ xufier u għall-aġenda tar-rikorrent, li s-servizzi tax-xufier intużaw għal finijiet privati, sa fejn kienet involuta l-kunsinna ta’ xampanja għaż-żwieġ ta’ bint ir-rikorrent;

–

għat-talba għal rimbors imsemmija fil-linji bin-Nri 254 u 255, bit-titolu “Sewqan ta’ KD […]”, it-tabella ta’ rkupru tindika, b’riferiment għall-aġenda tar-rikorrent, li s-servizzi tax-xufier intużaw għal finijiet privati sabiex ir-rikorrent jiġi misjuq lejn ikla ta’ filgħaxija privata offruta f’ristorant bi stilel.

156

Fid-dawl tal-kunsiderazzjonijiet preċedenti, fir-rigward tat-talbiet għal rimbors tar-rikorrent imsemmija fil-linji bin-Nri 21, 22, 27, 28, 38, 40, 42, 44, 46, 49, 50, 51, 52, 53, 55, 62, 64, 67, 77, 78, 79, 90, 98, 99, 101, 106, 107, 109, 110, 112, 113, 123, 124, 126, 127, 129, 136, 139, 140, 141, 142, 144, 145, 146, 148, 149, 151, 152, 153, 156, 158, 159, 160, 162, 165, 166, 167, 172, 176, 178, 179, 180, 181, 182, 188, 189, 193, 195, 197, 198, 200, 205, 206, 212, 213, 214, 216, 220, 222, 226, 231, 233, 234 u 235, 240, 241, 243, 244, 245, 246, 247, 249, 250, 252, 254 u 255 u 257 (parzjalment) tat-tabella ta’ rkupru, kien biss wara l-investigazzjoni tal-OLAF li l-Qorti tal-Awdituri sabet ruħha, f’ċirkustanzi normali, f’pożizzjoni li tinvoka l-kreditu tagħha fir-rigward tal-imsemmija linji, li tikkonstatah u li tibgħat nota ta’ debitu lir-rikorrent fis-sens tat-tieni subparagrafu tal-Artikolu 98(2) tar-Regolament 2018/1046.

157

Sa fejn il-Qorti tal-Awdituri kienet irċeviet ir-rapport tal-OLAF biss fit‑2 ta’ Lulju 2018, filwaqt li hija kienet stabbilixxiet ir-rapport preliminari tagħha fil‑5 ta’ Ottubru 2018 dwar it-talbiet għal rimbors imsemmija fil-linji tat-tabella ta’ rkupru indikati fil-punt 156 iktar ’il fuq, jista’ jitqies, fid-dawl tal-fatti esposti fil-punt 54 iktar ’il fuq, li hija informat lir-rikorrent dwar il-kreditu tagħha fit-terminu ta’ ħames snin previst wara l-konstatazzjoni tal-kreditu konformement mat-tieni subparagrafu tal-Artikolu 98(2) tar-Regolament 2018/1046. F’dawn iċ-ċirkustanzi, it-talbiet għal rimbors imsemmija fil-linji tat-tabella ta’ rkupru indikati fil-punt 156 iktar ’il fuq ma humiex preskritti.

3)

Fuq it‑tielet grupp tat‑talbiet għal rimbors tar‑rikorrent

158

Għandu jiġi kkonstatat li, fost it-talbiet għal rimbors tar-rikorrent imsemmija fil-linji bin-Nri 1 sa 261 tat-tabella ta’ rkupru, uħud minnhom kienu jippermettu lill-Qorti tal-Awdituri twettaq verifika minn qabel u topponi, jekk hija kienet tqis xieraq, għall-użu tar-riżorsi tagħha previst mir-rikorrent, jew kienu jippermettulha tagħmel dan, kieku hija kienet aġixxiet bid-diliġenza meħtieġa, sa fejn ir-riżultati tal-investigazzjoni tal-OLAF ma pproduċew xejn mill-ġdid fir-rigward tagħhom.

159

F’dan ir-rigward, minn naħa, dawn huma talbiet għal rimbors tar-rikorrent li ma pprovdewx preċiżazzjonijiet biżżejjed dwar l-attivitajiet previsti mill-imsemmija talbiet u li ma kinux is-suġġett tal-investigazzjoni tal-OLAF:

–

l-ewwel nett, it-talba għal rimbors imsemmija fil-linja bin-Nru 37 tat-tabella ta’ rkupru, li kienet tirrigwarda laqgħa ma’ persuna, li fir-rigward tagħha kien imsemmi biss l-isem tal-persuna li magħha kienet saret il-laqgħa mingħajr ebda preċiżazzjoni tal-kwalità tagħha;

–

it-tieni nett, it-talbiet għal rimbors imsemmija fil-linji bin-Nri 25 u 26 tat-tabella ta’ rkupru, li kienu ġew iġġustifikati biss mir-rikorrent b’riferiment għat-titolu “Ikla ta’ filgħaxija formali”.

160

Min-naħa l-oħra, għandu jiġi kkonstatat li l-investigazzjoni tal-OLAF ma rrigwardatx it-talbiet għal rimbors segwenti tar-rikorrent, li kienu jippermettu lill-Qorti tal-Awdituri twettaq il-verifika tagħha u topponi għalihom, jekk ikun meħtieġ, qabel din l-investigazzjoni:

–

l-ewwel nett, it-talbiet għal rimbors imsemmija fil-linji bin-Nri 30, 35, 117 u 201 tat-tabella ta’ rkupru, relatati mal-laqgħat tar-rikorrent ma’ ambaxxatur, ma’ rettur, ma’ tliet mexxejja politiċi Belġjani li jirrappreżentaw gruppi politiċi u ma’ Ministru tal-Istat;

–

it-tieni nett, it-talba għal rimbors imsemmija fil-linja bin-Nru 36 tat-tabella ta’ rkupru, li kienet tirrigwarda laqgħa ma’ operatur ekonomiku privat;

–

it-tielet nett, it-talba għal rimbors imsemmija fil-linja bin-Nru 102 tat-tabella ta’ rkupru, li kienet tirrigwarda l-parteċipazzjoni tar-rikorrent f’konferenza, organizzata mill-Kummissjoni u istitut mhux governattiv.

161

Konsegwentement, fir-rigward tat-talbiet għal rimbors tar-rikorrent imsemmija fil-linji bin-Nri 25, 30, 26, 35, 36, 37, 102, 117 u 201 tat-tabella ta’ rkupru, kien diġà fil-mument tat-tressiq tagħhom li l-Qorti tal-Awdituri kienet tinsab, f’ċirkustanzi normali, f’pożizzjoni li tinvoka l-kreditu tagħha fir-rigward tal-imsemmija linji, li tikkonstatah u li tibgħat nota ta’ debitu lir-rikorrent fis-sens tat-tieni subparagrafu tal-Artikolu 98(2) tar-Regolament 2018/1046, kieku hija aġixxiet bid-diliġenza meħtieġa. Fir-rigward tal-attivitajiet tar-rikorrent relatati mal-imsemmija linji, il-Qorti tal-Awdituri ma tallegax u, a fortiori, ma tistabbilixxix li d-dewmien sabiex tittieħed azzjoni kien dovut għall-aġir tar-rikorrent.

162

Sa fejn it-talbiet għal rimbors imsemmija fil-linji tat-tabella ta’ rkupru indikati fil-punt 161 iktar ’il fuq tressqu bejn it‑3 ta’ Diċembru 2007 u l‑15 ta’ Settembru 2013, filwaqt li l-Qorti tal-Awdituri stabbilixxiet ir-rapport preliminari tagħha fil‑5 ta’ Ottubru 2018, il-Qorti tal-Awdituri ma osservatx it-terminu ta’ ħames snin previst mit-tieni subparagrafu tal-Artikolu 98(2) tar-Regolament 2018/1046, b’tali mod li l-azzjoni għall-irkupru ta’ dawn it-talbiet hija preskritta. L-ammont totali ta’ dawn it-talbiet għal rimbors jammonta għal EUR 3 170.19.

c)

Konklużjoni fuq it‑tielet motiv

163

Fid-dawl tal-kunsiderazzjonijiet preċedenti, it-talbiet għal rimbors tar-rikorrent previsti fil-linji msemmija fil-punt 161 iktar ’il fuq għandhom jitqiesu bħala preskritti u l-kumplament tat-tielet motiv għandu jiġi miċħud.

4.

Fuq ir‑raba’ motiv, ibbażat fuq il‑ksur tal‑prinċipji ta’ ċertezza legali u ta’ protezzjoni tal‑aspettattivi leġittimi, kif ukoll fuq l‑eżistenza ta’ “żbalji manifesti”

164

Fil-kuntest tar-raba’ motiv, ir-rikorrent jikkontesta, essenzjalment, id-determinazzjoni mill-Qorti tal-Awdituri, fid-deċiżjoni kkontestata, ta’ somom li huwa responsabbli għalihom fir-rigward ta’ numru kbir ta’ attivitajiet li għalihom ir-riżorsi tal-Qorti tal-Awdituri ntużaw, skont din tal-aħħar, b’mod abbużiv fuq talba tiegħu u li jikkorrispondu għal spejjeż tal-missjoni u tal-allowances ta’ kuljum, għal spejjeż ta’ rappreżentanza u ta’ ospitalità kif ukoll għal spejjeż li jirriżultaw mill-użu tal-karozza uffiċjali u mill-użu tas-servizz ta’ xufier.

165

F’dan ir-rigward, għandu jitfakkar li, fil-kuntest tat-tielet motiv, ibbażat, essenzjalment, fuq in-nuqqas ta’ osservanza tat-terminu ta’ preskrizzjoni, l-azzjoni għall-irkupru ta’ wħud minn dawn it-talbiet għal rimbors tar-rikorrent għandha titqies bħala preskritta, jiġifieri dawk imsemmija fil-linji bin-Nri 25, 26, 30, 35, 36, 37, 102, 117 u 201 tat-tabella ta’ rkupru. (ara l-punt 161 iktar ’il fuq). Għaldaqstant, dawn it-talbiet ma humiex ser jiġu eżaminati iktar fil-kuntest tar-raba’ motiv, peress li ma huwiex iktar neċessarju li tiġi eżaminata l-fondatezza tal-argumenti li jirrigwardawhom imqajma fil-kuntest tal-imsemmi motiv.

166

Għandu jiġi kkonstatat ukoll li l-irregolaritajiet allegati mill-Qorti tal-Awdituri fir-rigward tar-rikorrent fid-deċiżjoni kkontestata kienu s-suġġett tar-rikors li hija ppreżentat quddiem il-Qorti tal-Ġustizzja skont l-Artikolu 286(6) TFUE, li fil-kuntest tiegħu hija talbet lill-Qorti tal-Ġustizzja tikkonstata li r-rikorrent ma kienx issodisfa l-obbligi li jirriżultaw mill-kariga tiegħu ta’ Membru tal-Qorti tal-Awdituri skont l-Artikoli 285 u 286 TFUE. Fil-fatt, kemm f’dak ir-rikors kif ukoll f’dan ir-rikors, l-irregolaritajiet huma identifikati permezz tal-istess tabella li tinsab fl-anness, stabbilita abbażi tar-rapport tal-OLAF. (ara l-punt 44 iktar ’il fuq). Fost l-ilmenti mressqa insostenn tar-rikors fil-kawża li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), l-ewwel wieħed minnhom kien ibbażat fuq l-użu abbużiv, mir-rikorrent, tar-riżorsi tal-Qorti tal-Awdituri sabiex jiffinanzja attivitajiet li ma kellhomx rabta jew li kienu inkompatibbli mal-funzjonijiet tiegħu ta’ Membru tal-Qorti tal-Awdituri (iktar ’il quddiem l-“ewwel ilment invokat mill-Qorti tal-Awdituri”). Il-Qorti tal-Ġustizzja tat deċiżjoni dwar dan l-ilment fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punti 359 sa 799), billi qieset li r-rikorrent kien kiser l-obbligi tiegħu li jirriżultaw mill-kariga tiegħu ta’ Membru tal-Qorti tal-Awdituri (ara l-punt 53 iktar ’il fuq).

167

Huwa fid-dawl ta’ dan il-kuntest li għandu jiġi eżaminat ir-raba’ motiv. Qabel kollox, għandha tiġi eżaminata l-ammissibbiltà tal-ilment ibbażat fuq l-eżistenza ta’ “żbalji manifesti”.

a)

Fuq l‑ammissibbiltà tal‑ilment ibbażat fuq l‑eżistenza ta’ “żbalji manifesti”

168

Waqt is-seduta, il-Qorti tal-Awdituri sostniet li r-rikorrent ma kienx identifika l-iżbalji li jivvizzjaw il-legalità tad-deċiżjoni kkontestata. Hija indikat li, fir-rikors, ir-rikorrent sempliċement irrefera għal anness, li fih huwa qajjem, qabel l-adozzjoni tad-deċiżjoni kkontestata, 69 żball li huwa kien jikklassifika bħala “manifesti”, fatt li, skont il-Qorti tal-Awdituri, kien inammissibbli fil-kuntest ta’ din il-proċedura, peress li ma kienx il-kompitu tal-Qorti Ġenerali li tfittex liema kienu l-iżbalji manifesti li bihom kienet ivvizzjata d-deċiżjoni kkontestata. Ir-rikorrent ma ppreżentax osservazzjonijiet f’dan ir-rigward.

169

Għandu jiġi osservat li, fl-aħħar punt tar-raba’ motiv, ir-rikorrent jikkonkludi li l-Qorti tal-Awdituri wettqet “numru impressjonanti ta’ żbalji mhux biss ta’ klassifikazzjoni ta’ liġi[,] iżda sempliċement ta’ fatt”. Huwa minnu li, fil-kuntest ta’ dan il-motiv, ir-rikorrent isemmi l-kelma “żball” biss f’punt preliminari wieħed li jirreferi għall-anness inkwistjoni u għandu jiġi kkonstatat li r-riferiment għal dan l-anness huwa msemmi biss sussidjarjament, jiġifieri “għall-bqija”.

170

Madankollu, mill-kuntest tal-argumenti mressqa mir-rikorrent fil-kuntest tar-raba’ motiv kemm fir-rikors kif ukoll fir-replika jirriżulta li huwa jikkontesta essenzjalment bħala żbaljati l-motivi, inklużi fit-tabella ta’ rkupru għal kull waħda mill-entrati tagħha, li permezz tagħhom il-Qorti tal-Awdituri tqis li r-riżorsi tal-Qorti tal-Awdituri ntużaw b’mod abbużiv fir-rigward tal-ispejjeż tal-missjoni u tal-allowances ta’ kuljum, tal-ispejjeż ta’ rappreżentanza u ta’ ospitalità kif ukoll tal-ispejjeż sostnuti mill-użu tal-karozza uffiċjali u mill-użu tas-servizz ta’ xufier. Din il-konstatazzjoni għandha tinqara wkoll fid-dawl tal-preċiżazzjonijiet li jinsabu fir-rikors, li permezz tagħhom ir-rikorrent jenfasizza li l-assenza ta’ kummenti fuq l-entrati kollha tat-tabella ta’ rkupru, lil hinn minn dak li jinsab fir-rikors u fl-annessi tiegħu, bl-ebda mod ma timplika min-naħa tiegħu rikonoxximent tan-natura fondata tal-allegazzjonijiet tal-Qorti tal-Awdituri.

171

Konsegwentement, l-ilment ibbażat fuq l-eżistenza ta’ “żbalji manifesti” huwa suffiċjentement sostnut sabiex ikun ammissibbli. Għaldaqstant, issa għandha tiġi eżaminata l-fondatezza tal-ilmenti bbażati fuq il-ksur tal-prinċipji ta’ ċertezza legali u ta’ protezzjoni tal-aspettattivi leġittimi kif ukoll fuq l-eżistenza ta’ “żbalji manifesti”.

b)

Fuq il‑mertu

172

Fl-osservazzjonijiet tiegħu dwar il-konsegwenzi li għandhom jinstiltu mis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), għal din il-kawża, ir-rikorrent jindika li, fir-rigward tal-kritika bbażata fuq il-ksur tal-prinċipju ta’ ċertezza legali u ta’ protezzjoni tal-aspettattivi leġittimi, għandu jittieħed inkunsiderazzjoni dak li l-Qorti tal-Ġustizzja esponiet fil-punti 364 sa 381 ta’ dik is-sentenza.

173

Issa, fil-punt 364 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja rrilevat li, minkejja li r-rikorrent invoka formalment il-prinċipju ta’ ċertezza legali u l-prinċipju ta’ protezzjoni tal-aspettattivi leġittimi, l-argument tiegħu kien fir-realtà esklużivament relatat mat-tieni wieħed minn dawn il-prinċipji.

174

F’din il-proċedura, għandu jiġi kkonstatat li, fir-replika, ippreżentata wara l-għoti tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), l-argument tar-rikorrent dwar ir-raba’ motiv ma għadux jagħmel riferiment għall-prinċipju ta’ ċertezza legali. Għaldaqstant, huwa fid-dawl biss tal-prinċipju ta’ protezzjoni tal-aspettattivi leġittimi u ta’ eventwali “żbalji manifesti” li għandu jiġi eżaminat ir-raba’ motiv.

175

Fl-ewwel lok, fir-rigward tal-allegat ksur tal-prinċipju ta’ protezzjoni tal-aspettattivi leġittimi, ir-rikorrent isostni li l-Qorti tal-Awdituri kisret dan il-prinċipju sa fejn huwa rċieva, permezz tal-awtorizzazzjonijiet mogħtija u l-prattika tal-Qorti tal-Awdituri, assigurazzjonijiet preċiżi, inkundizzjonati u konkordanti, li joriġinaw minn sorsi affidabbli, għal iktar minn għaxar snin, li joħolqu fih aspettattivi leġittimi dwar il-fatt li l-ħlasijiet magħmula kienu regolari.

176

Fit-tieni lok, fir-rigward ta’ eventwali “żbalji manifesti”, hekk kif ikkonstatat fil-punt 170 iktar ’il fuq, ir-rikorrent iqis, essenzjalment, bħala żbaljati l-motivi li fuqhom il-Qorti tal-Awdituri tibbaża ruħha sabiex tiddetermina l-ammonti bħala indebitament imħallsa.

1)

Osservazzjonijiet preliminari

i)

Fuq il‑portata tal‑eżami tal‑ilment ibbażat fuq il‑ksur tal‑prinċipju ta’ protezzjoni tal‑aspettattivi leġittimi

177

Fir-rigward tal-ilmenti bbażati fuq il-ksur tal-prinċipju ta’ protezzjoni tal-aspettattivi leġittimi, ir-rikorrent jindika li huwa ma kienx qiegħed iżomm dawn l-ilmenti f’dak li jirrigwarda r-riżorsi użati mill-Qorti tal-Awdituri għall-ispejjeż ta’ rappreżentanza u ta’ ospitalità kif ukoll għall-użu tal-karozza uffiċjali u tal-użu tas-servizz ta’ xufier. Madankollu, huwa qiegħed iżomm dawn l-ilmenti fir-rigward tal-ordnijiet ta’ missjoni.

178

Fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punti 365 sa 374), il-Qorti tal-Ġustizzja rrilevat dan li ġej:

179

Għaldaqstant, f’din il-proċedura, ma hemmx lok li jiġi eżaminat l-allegat ksur tal-prinċipju ta’ protezzjoni tal-aspettattivi leġittimi f’dak li jirrigwarda r-riżorsi użati mill-Qorti tal-Awdituri għall-ispejjeż ta’ rappreżentanza u ta’ ospitalità kif ukoll għall-użu tal-karozza uffiċjali u tal-użu tas-servizz ta’ xufier.

180

Għall-kuntrarju, għandu jiġi evalwat jekk l-ordnijiet ta’ missjoni maħruġa, fuq talba tar-rikorrent, mill-President tal-Qorti tal-Awdituri kinux ta’ natura li jservu ta’ bażi għall-aspettattivi leġittimi tiegħu fir-rigward tar-regolarità tal-ispejjeż marbuta mal-missjonijiet ikkonċernati.

ii)

Fuq il‑portata tal‑eżami tal‑ilmenti bbażati fuq l‑aspettattivi leġittimi tar‑rikorrent fir‑rigward tar‑regolarità tal‑missjonijiet tiegħu u fuq l‑eżistenza ta’ “żbalji manifesti”

181

Wara l-għoti tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), ir-rikorrent indika li huwa kien qiegħed iżomm l-ilment tiegħu bbażat fuq l-eżistenza ta’ “żbalji manifesti” biss fir-rigward tal-attivitajiet ikklassifikati bħala mhux irregolari mill-Qorti tal-Ġustizzja f’dik is-sentenza fil-kuntest tal-eżami tal-ewwel ilment invokat mill-Qorti tal-Awdituri.

182

F’dan ir-rigward, mill-proċess jirriżulta li, fil-kuntest ta’ dan l-ilment, il-Qorti tal-Ġustizzja qieset bħala irregolari jew manifestament irregolari diversi attivitajiet li jagħmlu parti mit-tabella ta’ rkupru. Għaldaqstant, għandu jiġi konkluż li ma għadx hemm bżonn li tingħata deċiżjoni la fuq it-talbiet għal rimbors tar-rikorrent marbuta mal-imsemmija attivitajiet u lanqas fuq il-kwistjoni dwar jekk l-ordnijiet ta’ missjoni maħruġa, skont il-każ, fir-rigward ta’ dawn it-talbiet humiex ta’ natura li jservu ta’ bażi għall-aspettattivi leġittimi tar-rikorrent fir-rigward tar-regolarità tagħhom. Dawn huma l-attivitajiet li huma relatati mat-talbiet għal rimbors imsemmija fil-linji bin-Nri 13, 15, 16, 18, 20, 21, 25, 26, 29, 32, 33, 36, 37, 39, 40, 42, 44, 45, 46, 48, 49, 50, 51, 52, 53, 54, 60, 61, 62, 64, 67, 68, 69, 70, 73, 74, 75, 76, 77, 78, 79, 80, 81, 82, 83, 84, 85, 86, 88, 93, 94, 95, 99, 100, 101, 104, 107, 108, 109, 112, 113, 114, 115, 118 (parzjalment), 120, 121, 122, 123, 124, 126, 127, 129, 130, 131, 132, 133, 134, 135, 136, 139, 140, 141, 144, 145, 146, 148, 149, 152, 154, 155 (parzjalment), 156, 158, 159, 162, 163, 164, 165, 166, 170, 172, 173, 174, 175, 177, 178, 179, 180, 181, 182, 188, 189, 191, 192, 193, 195, 197, 198, 200, 201, 202, 205, 206, 207, 209, 212, 213, 217, 219, 220, 221, 222, 223, 224, 225, 226, 227, 228, 229, 230, 231, 232, 233, 234, 235, 239, 240, 241, 242, 244, 246, 249, 250, 251, 252, 253, 254, 255, 256, 258, 259, 260, 261, 262, 263, 264, 265, 266, 267, 268, 269, 270, 271, 272, 273, 274, 275, 278, 280, 283, 285, 286, 287, 288, 289, 291, 292, 295, 296 (parzjalment), 297, 298, 299, 300, 302, 304, 305, 306, 307, 308, 309, 310 (parzjalment), 311, 312, 315, 316, 318, 321, 322, 324, 325, 326 (parzjalment), 327, 328, 329, 333, 337, 340, 341, 342, 343, 344, 345, 348, 349, 351, 353, 356, 359, 360, 361, 362, 363, 364, 365, 366, 368, 369, 371, 372, 375, 376, 377, 378, 380, 383, 384, 385, 386, 387, 388, 389, 390, 392, 393, 394, 396, 397, 398, 399, 400, 401, 404, 405, 406, 409, 410, 413, 414 u 416 tat-tabella ta’ rkupru.

183

L-istess konklużjoni tapplika fir-rigward tat-talba għal rimbors imsemmija fil-linja bin-Nru 34, sa fejn, fil-kuntest ta’ miżura ta’ organizzazzjoni tal-proċedura, ir-rikorrent indika li huwa ma kienx qiegħed iżomm iktar l-ilment tiegħu mressaq taħt ir-raba’ motiv f’dak li jirrigwarda din it-talba, fid-dawl tal-punt 636 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

184

Għaldaqstant, fid-dawl tal-azzjoni għall-irkupru tat-talbiet għal rimbors li l-Qorti Ġenerali tqis bħala preskritta (ara l-punt 165 iktar ’il fuq), hemm lok li jiġu eżaminati biss it-talbiet imsemmija fil-linji bin-Nri 1, 2, 3, 4, 5, 6, 7, 12, 14, 17, 19, 22, 23, 24, 27, 28, 31, 38, 41, 43, 47, 55, 56, 57, 59, 63, 65, 66, 89, 90, 92, 96, 97, 98, 103, 106, 110, 111, 116, 118 (parzjalment), 128, 137, 138, 142, 143, 147, 150, 151, 153, 155 (parzjalment), 157, 160, 161, 167, 168, 169, 171, 176, 183, 184, 187, 190, 194, 196, 199, 203, 204, 208, 210, 211, 214, 215, 216, 218, 236, 237, 238, 243, 245, 247, 248, 257, 276, 277, 279, 281, 284, 290, 293 u 294, 296 (parzjalment), 301, 303, 310 (parzjalment), 313, 314, 317, 319 u 320, 323, 326 (parzjalment), 330, 331, 334, 335, 336, 338, 339, 346, 347, 350, 352, 354, 355, 357, 358, 367, 370, 373 u 374, 379, 381, 382, 391, 395, 402, 403, 408, 411 u 412 tat-tabella ta’ rkupru.

iii)

Fuq il‑portata tal‑istħarriġ tal‑Qorti Ġenerali

185

Fil-kuntest tar-rikors ippreżentat mill-Qorti tal-Awdituri u li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja ppreċiżat dan li ġej fir-rigward tal-ewwel ilment invokat mill-Qorti tal-Awdituri.

186

Minn naħa, il-Qorti tal-Ġustizzja rrilevat li, fil-kuntest tal-proċedura stabbilita fl-Artikolu 286(6) TFUE, hija għandha tagħti deċiżjoni dwar dan l-ilment abbażi tal-provi mqiegħda għad-dispożizzjoni tagħha u fid-dawl tal-kriterji stabbiliti fl-Artikolu 286(6) TFUE, sabiex tiddetermina jekk l-irregolaritajiet allegati setgħux jiġu kklassifikati bħala ksur tal-obbligi li jirriżultaw mill-kariga ta’ Membru tal-Qorti tal-Awdituri fis-sens ta’ din id-dispożizzjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 361).

187

Min-naħa l-oħra, il-Qorti tal-Ġustizzja ppreċiżat li, minkejja li l-Qorti tal-Awdituri indirizzat lir-rikorrent id-deċiżjoni kkontestata, dwar l-irregolaritajiet li huma s-suġġett tal-ewwel ilment li hija invokat fir-rikors li ta lok għas-sentenza tat‑30 ta’ Settembru 2021, Il-Qorti tal-Awdituri vs Pinxten (C‑130/19, EU:C:2021:782), l-evalwazzjonijiet tagħha dwar dan l-ilment, f’dik is-sentenza, ma kinux jirrigwardaw id-determinazzjoni ta’ somom li r-rikorrent jista’ jinżamm responsabbli għalihom u għalhekk kienu bla ħsara għall-evalwazzjoni li kellha ssir fir-rigward ta’ din id-deċiżjoni fil-kuntest tar-rikors għall-annullament tagħha, ippreżentat, quddiem il-Qorti Ġenerali, mir-rikorrent skont ir-raba’ paragrafu tal-Artikolu 263 TFUE (ara, f’dan is-sens, is-sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 362).

188

Il-proċedura prevista fir-raba’ paragrafu tal-Artikolu 263 TFUE tikkostitwixxi rimedju proċedurali għall-istħarriġ tal-legalità tal-atti tal-korpi jew tal-organi tal-Unjoni li, skont it-tieni paragrafu tal-Artikolu 263 TFUE, jista’jwassal għall-annullament tal-att ikkonċernat minħabba nuqqas ta’ kompetenza, ksur tar-rekwiżiti formali essenzjali, ksur tat-Trattati jew ta’ kull regola tad-dritt relatata mal-applikazzjoni tagħhom, jew użu ħażin ta’ poter. Minn dan isegwi li, fil-kuntest ta’ din il-proċedura, f’dan il-każ, il-Qorti Ġenerali għandha tevalwa jekk wieħed minn dawn il-motivi jiġġustifikax l-annullament tad-deċiżjoni kkontestata fil-kuntest tal-istħarriġ tal-legalità tagħha.

189

Fil-kuntest ta’ dan l-istħarriġ tal-legalità, il-qorti tal-Unjoni teżerċita, bħala prinċipju, stħarriġ sħiħ fir-rigward tal-legalità fil-mertu tal-att, jiġifieri stħarriġ li jirrigwarda kemm il-motivi ta’ liġi u ta’ fatt tal-att kif ukoll il-kontenut tiegħu. F’dan il-każ, il-qorti tal-Unjoni għandha tivverifika b’mod partikolari l-validità tal-evalwazzjonijiet ta’ fatt imwettqa mill-awtur tal-att (sentenza tal‑14 ta’ Lulju 2021, Arnautu vs Il‑Parlament, T‑740/20, mhux ippubblikata, EU:T:2021:444, punt 87).

190

F’dan ir-rigward, hija għandha tivverifika l-eżattezza materjali tal-provi invokati, l-affidabbiltà tagħhom u l-koerenza tagħhom (ara, f’dan is-sens, is-sentenzi tal‑15 ta’ Frar 2005, Il‑Kummissjoni vs Tetra Laval, C‑12/03 P, EU:C:2005:87, punt 39; tas‑7 ta’ April 2016, ArcelorMittal Tubular Products Ostrava et vs Hubei Xinyegang Steel, C‑186/14 P u C‑193/14 P, EU:C:2016:209, punt 36, u tat‑23 ta’ Ottubru 2018, McCoy vs Il‑Kumitat tar‑Reġjuni, T‑567/16, EU:T:2018:708, punt 98). F’din il-perspettiva, l-evalwazzjoni tal-valur probatorju ta’ dokument hija wkoll is-suġġett ta’ stħarriġ sħiħ. (ara, f’dan is-sens, is-sentenza tas‑16 ta’ Settembru 2004, Valmont vs Il‑Kummissjoni, T‑274/01, EU:T:2004:266, punt 43). B’hekk, anki l-evalwazzjonijiet kumplessi jew delikati li tagħmel l-amministrazzjoni għandhom ikunu sostnuti minn provi solidi (ara, f’dan is-sens, is-sentenzi tal‑15 ta’ Frar 2005, Il‑Kummissjoni vs Tetra Laval, C‑12/03 P, EU:C:2005:87, punt 41, u tas‑7 ta’ April 2016, Akhras vs Il‑Kunsill, C‑193/15 P, EU:C:2016:219, punt 56). Għaldaqstant, hija l-qorti li għandha twettaq, anki f’dan il-kuntest, eżami fil-fond tal-provi (ara, f’dan is-sens, is-sentenza tal‑10 ta’ Lulju 2008, Bertelsmann u Sony Corporation of America vs Impala, C‑413/06 P, EU:C:2008:392, punt 146).

191

L-Artikolu 264 TFUE jipprevedi li, jekk ir-rikors ikun fondat, l-att ikkontestat għandu jiġi ddikjarat null. Għaldaqstant, il-qorti tal-Unjoni ma tistax, fi kwalunkwe każ, tissostitwixxi l-motivazzjoni tal-awtur tal-att ikkontestat b’dik tagħha (sentenzi tas‑27 ta’ Jannar 2000, DIR International Film et vs Il‑Kummissjoni, C‑164/98 P, EU:C:2000:48, punt 38; tat‑22 ta’ Diċembru 2008, British Aggregates vs Il‑Kummissjoni, C‑487/06 P, EU:C:2008:757, punt 141; u tat‑28 ta’ Frar 2013, Il‑Portugall vs Il‑Kummissjoni, C‑246/11 P, mhux ippubblikata, EU:C:2013:118, punt 85). Madankollu, l-awtur tal-att ikkontestat jista’ jikkompleta l-motivazzjoni tiegħu jekk din tkun taqa’ taħt il-motivazzjoni globali ta’ dan l-att u taħt kuntest magħruf mid-destinatarju ta’ dan l-att waqt l-adozzjoni tiegħu.

192

Barra minn hekk, skont il-ġurisprudenza, l-atti tal-istituzzjonijiet igawdu, bħala prinċipju, minn preżunzjoni ta’ legalità u, għaldaqstant, jipproduċu effetti legali sakemm dawn ma jiġux annullati jew irtirati (sentenza tas‑27 ta’ Settembru 2006, Roquette Frères vs Il‑Kummissjoni, T‑322/01, EU:T:2006:267, punt 333).

193

Barra minn hekk, f’dan il-każ, fid-dawl tal-preżunzjoni tal-legalità tad-deċiżjoni kkontestata, imfakkra fil-punt 192 iktar ’il fuq, fil-preżenza ta’ dubju dwar ir-regolarità tas-somom irrimborsati lir-rikorrent, l-oneru tal-prova jaqa’ fuq ir-rikorrent sabiex juri, fir-rigward ta’ kull talba għal rimbors, li huwa sostna l-ispejjeż inkwistjoni b’osservanza tar-regoli applikabbli. F’dan ir-rigward, mill-ġurisprudenza jirriżulta li huwa r-rikorrent li għandu jipproduċi l-provi li jippermettu li tiġi kkontestata deċiżjoni dwar l-irkupru tas-somom indebitament imħallsa (ara, f’dan is-sens u b’analoġija, is-sentenzi tas‑7 ta’ Marzu 2018, Le Pen vs Il‑Parlament, T‑140/16, mhux ippubblikata, EU:T:2018:122, punti 61 sa 66, u tad‑19 ta’ Ġunju 2018, Le Pen vs Il‑Parlament, T‑86/17, mhux ippubblikata, EU:T:2018:357, punti 121 et seq). B’mod ġenerali, huwa għandu b’mod partikolari jkun jista’ jipproduċi dokumenti li jiġġustifikaw użu ta’ dawn is-somom li jkun konformi mar-regoli applikabbli (ara, f’dan is-sens u b’analoġija, is-sentenza tat‑22 ta’ Diċembru 2005, Gorostiaga Atxalandabaso vs Il‑Parlament, T‑146/04, EU:T:2005:584, punt 157).

iv)

Fuq il‑konsegwenzi li għandhom jinstiltu f’dan ir‑rikors mis‑sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19), dwar l‑irregolaritajiet ikkunsidrati mill‑Qorti tal‑Awdituri fir‑rigward tar‑rikorrent

194

Hekk kif tfakkar fil-punt 166 iktar ’il fuq, l-irregolaritajiet ikkunsidrati mill-Qorti tal-Awdituri fir-rigward tar-rikorrent fid-deċiżjoni kkontestata kienu s-suġġett tar-rikors ippreżentat minn din tal-aħħar li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). B’mod iktar partikolari, fost l-ilmenti mressqa mill-Qorti tal-Awdituri insostenn ta’ dan ir-rikors quddiem il-Qorti tal-Ġustizzja, l-ewwel wieħed kien ibbażat fuq l-użu abbużiv mir-rikorrent tar-riżorsi tal-Qorti tal-Awdituri sabiex jiffinanzja attivitajiet mingħajr rabta jew inkompatibbli mal-funzjonijiet tiegħu ta’ Membru tal-Qorti tal-Awdituri. Il-Qorti tal-Ġustizzja tat deċiżjoni dwar dan l-ilment fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punti 359 sa 799), billi qieset li r-rikorrent kien kiser l-obbligi tiegħu li jirriżultaw mill-kariga tiegħu ta’ Membru tal-Qorti tal-Awdituri (ara l-punt 53 iktar ’il fuq).

195

F’dan il-każ, fir-rigward tar-raba’ motiv, ir-rikorrent isostni li dak li jinsab f’dan il-motiv ġie eżaminat mill-Qorti tal-Ġustizzja fil-punti 359 sa 363 u 387 sa 799 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Barra minn hekk, fil-punti 392, 615 sa 618 u 700 tal-istess sentenza, il-Qorti tal-Ġustizzja, rispettivament, iddefinixxiet meta missjoni jew il-ħlas ta’ allowances ta’ kuljum kif ukoll ta’ spejjeż ta’ rappreżentanza u ta’ missjoni tax-xufier iffirmati mir-rikorrent fil-kwalità tiegħu ta’ uffiċjal awtorizzanti kellhom jitqiesu bħala regolari. Huwa jqis li, għalkemm għandu jittieħed inkunsiderazzjoni t-tagħlim tal-Qorti tal-Ġustizzja li jkun jirriżulta utli għal din il-proċedura, b’tali mod li din l-utilità għandha tiġi evalwata kull darba, il-proċedura preżenti ma tistax tkun il-post sabiex jiġi kkontestat dak li l-Qorti tal-Ġustizzja ddeċidiet fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fid-dawl tal-proċess li ġie ppreżentat lilha u ta’ dak li hija stabbilixxiet fil-fatt u fid-dritt.

196

Fir-rigward tal-Qorti tal-Awdituri, hija ssostni li r-rikors li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u dan ir-rikors huma awtonomi, billi jfittxu kull wieħed minnhom il-funzjonijiet tagħhom stess, l-ewwel wieħed intiż li jiggarantixxi l-funzjonament tajjeb tal-istituzzjonijiet tal-Unjoni, hekk kif tindika l-Qorti tal-Ġustizzja fil-punt 86 ta’ din is-sentenza, filwaqt li t-tieni wieħed jikkostitwixxi rikors għal annullament skont ir-raba’ paragrafu tal-Artikolu 263 TFUE kontra d-deċiżjoni ta’ rkupru tal-Qorti tal-Awdituri. Skont il-Qorti tal-Awdituri, hija l-Qorti Ġenerali, fil-kuntest ta’ dan ir-rikors, li għandha tevalwa l-fatti ppreżentati minnha. Hija tenfasizza wkoll li, fl-imsemmija sentenza, il-Qorti tal-Ġustizzja ma rrikonoxxiet ebda attività bħala regolari u li hija kkonstatat biss li ċerti attivitajiet ma kinux manifestament irregolari għall-finijiet tal-proċedura prevista fl-Artikolu 286(6) TFUE.

197

Fid-dawl ta’ dawn l-argumenti tal-partijiet, għandu jiġi eżaminat jekk u sa fejn l-evalwazzjoni tal-Qorti tal-Ġustizzja, fil-proċedura li wasslet għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), tista’ tiġi adottata f’din il-proċedura.

198

F’dan ir-rigward, qabelxejn, għandu jitfakkar li s-suġġett tar-rikors ippreżentat abbażi tal-Artikolu 286(6) TFUE, li fil-kuntest tiegħu l-Qorti tal-Ġustizzja adottat il-pożizzjoni tagħha dwar ir-rikorrent, huwa distint minn dan ir-rikors. Fil-fatt, l-ewwel wieħed jirrigwarda l-konstatazzjoni ta’ ksur tal-obbligi li jirriżultaw mill-kariga ta’ Membru tal-Qorti tal-Awdituri fis-sens ta’ din id-dispożizzjoni u l-għoti eventwali ta’ sanzjoni. Skont il-ġurisprudenza tal-Qorti tal-Ġustizzja, il-proċedura prevista fl-Artikolu 286(6) TFUE għandha funzjoni speċifika, sa fejn din hija intiża li tiggarantixxi l-funzjonament tajjeb tal-istituzzjonijiet tal-Unjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 86). Barra minn hekk, fil-kuntest ta’ din il-proċedura, hija l-Qorti tal-Ġustizzja fis-setgħa diskrezzjonali kollha tagħha li għandha teżamina jekk il-fatti allegati fil-konfront tal-Membru tal-Qorti tal-Awdituri kkonċernat jikkostitwixxux nuqqas ta’ twettiq tal-obbligi li jirriżultaw mill-kariga tiegħu (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 87).

199

Għall-kuntrarju, is-suġġett ta’ dan ir-rikors ippreżentat konformement mar-raba’ paragrafu tal-Artikolu 263 TFUE jirrigwarda l-kwistjoni tal-irkupru ta’ somom indebitament imħallsa u huwa intiż għall-annullament tad-deċiżjoni kkontestata. Hekk kif ġie ppreċiżat fil-punt 188 iktar ’il fuq, il-proċedura prevista f’din id-dispożizzjoni tikkostitwixxi rimedju proċedurali għall-istħarriġ tal-legalità tal-atti tal-korpi jew tal-organi tal-Unjoni li, skont it-tieni paragrafu tagħha, jista’ twassal għall-annullament tal-att ikkonċernat minħabba nuqqas ta’ kompetenza, ksur tal-forom proċedurali sostanzjali, ksur tat-Trattati jew ta’ kull regola tad-dritt relatata mal-applikazzjoni tagħhom, jew użu ħażin ta’ poter. Minn dan isegwi li, fil-kuntest ta’ din il-proċedura, f’dan il-każ, il-Qorti Ġenerali għandha tevalwa jekk wieħed minn dawn il-motivi jiġġustifikax l-annullament tad-deċiżjoni kkontestata fil-kuntest tal-istħarriġ tal-legalità tagħha, hekk kif imfakkar fil-punti 189 sa 193 iktar ’il fuq.

200

Sussegwentement, l-oneru tal-prova f’din il-proċedura huwa differenti minn dak applikabbli fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Fil-kuntest ta’ dan ir-rikors tal-Qorti tal-Awdituri, l-oneru tal-prova ta’ ksur mir-rikorrent tal-obbligi tiegħu fis-sens tal-Artikolu 286(6) TFUE kien jaqa’ fuq il-Qorti tal-Awdituri, peress li din tal-aħħar ippreżentat l-imsemmi rikors. Għalhekk, il-Qorti tal-Awdituri kellha turi li l-irregolaritajiet ikkunsidrati kienu suffiċjentement gravi u manifesti sabiex jikkostitwixxu nuqqas mir-rikorrent li jwettaq l-obbligi tiegħu li jirriżultaw mill-kariga tiegħu ta’ Membru tal-Qorti tal-Awdituri fis-sens tal-Artikolu 286(6) TFUE.

201

Għal kuntrarju, f’dan ir-rikors, ippreżentat mir-rikorrent abbażi tal-Artikolu 263 TFUE, l-oneru tal-prova jaqa’ fuq ir-rikorrent (ara l-punt 193 iktar ’il fuq).

202

Barra minn hekk, għandu jiġi osservat li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), meta kkonstatat li l-ewwel ilment invokat mill-Qorti tal-Awdituri kien, parzjalment, fondat, il-Qorti tal-Ġustizzja evalwat ġuridikament kull waħda mill-attivitajiet tar-rikorrent meqjusa mill-Qorti tal-Awdituri li huma irregolari. F’dan ir-rigward, il-Qorti tal-Ġustizzja kkonkludiet, parzjalment, favur ir-regolarità tagħhom jew favur l-assenza tal-irregolarità manifesta tagħhom u, parzjalment, favur l-irregolarità jew favur l-irregolarità manifesta tagħhom (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 359 sa 798).

203

Barra minn hekk, għandu jiġi rrilevat li, fil-kuntest ta’ dan ir-rikors, l-irregolaritajiet li l-Qorti tal-Awdituri qieset kontra r-rikorrent fid-deċiżjoni kkontestata u relatati mal-ħlas tal-ispejjeż indebitament imħallsa mill-baġit tal-Unjoni huma identiċi għal dawk li hija kienet indikat insostenn tar-rikors tagħha li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Fil-fatt, f’dawn iż-żewġ rikorsi, dawn l-irregolaritajiet huma ppreżentati permezz tal-istess tabella li tinsab fl-anness taż-żewġ rikorsi.

204

Madankollu, fid-dawl tan-natura distinta tas-suġġett ta’ dan ir-rikors meta mqabbel ma’ dak li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punti 198 u 199 iktar ’il fuq), tan-natura differenti tal-oneru tal-prova (ara l-punt 199 iktar ’il fuq) kif ukoll minħabba l-fatt li, f’dan il-każ, ir-risposta kif ukoll ir-replika u l-kontroreplika ġew ippreżentati biss wara li ngħatat dik is-sentenza, il-partijiet setgħu jippreżentaw f’din il-proċedura kjarifiki, argumenti u provi ġodda insostenn tal-prova tar-realtà ta’ dawn l-irregolaritajiet f’dak li jirrigwarda l-Qorti tal-Awdituri jew għall-finijiet tal-konfutazzjoni tagħhom f’dak li jirrigwarda r-rikorrent.

205

Konsegwentement, huwa biss fil-preżenza tal-istess fatti u tal-istess provi invokati kemm fir-rikors li ta lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u f’dan ir-rikors, mingħajr kjarifiki ġodda u fl-assenza ta’ dubju, li jkun hemm lok għall-Qorti Ġenerali li taqbel, f’dan il-każ, mal-istess evalwazzjoni bħal dik adottata mill-Qorti tal-Ġustizzja f’dik is-sentenza.

206

Fid-dawl tal-kunsiderazzjonijiet preċedenti, f’dan il-każ, għandha tiġi evalwata kull attività tar-rikorrent marbuta mat-talbiet għal rimbors previsti fil-linji tat-tabella ta’ rkupru msemmija fil-punt 184 iktar ’il fuq, fid-dawl tal-argumenti u tal-ispjegazzjonijiet ippreżentati mill-partijiet quddiem il-Qorti Ġenerali, sabiex jiġi ddeterminat jekk għandhiex tiġi adottata jew le l-istess evalwazzjoni bħal dik adottata mill-Qorti tal-Ġustizzja fil-kawża li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

207

F’dan il-każ, sa fejn il-qorti tal-Unjoni ma tistax tissostitwixxi l-motivazzjoni tal-awtur tal-att b’dik tagħha, hekk kif imfakkar fil-punt 191 iktar ’il fuq, billi teżamina jekk ir-rikorrent jirnexxilux jistabbilixxi r-regolarità tal-ispejjeż sostnuti, għandhom jittieħdu inkunsiderazzjoni l-motivi pprovduti mill-Qorti tal-Awdituri fid-deċiżjoni kkontestata li għalihom hija kienet qieset l-ispejjeż sostnuti mir-rikorrent bħala indebitament imħallsa mill-baġit tal-Unjoni. Huwa biss fir-rigward ta’ dawn il-motivi li għandu jiġi eżaminat jekk ir-rikorrent jirnexxilux jikkonfutahom u jistabbilixxi r-regolarità tagħhom.

208

Huwa fid-dawl tal-osservazzjonijiet ippreżentati fil-punti 177 sa 207 iktar ’il fuq li għandhom jiġu eżaminati l-ilmenti bbażati fuq il-ksur tal-prinċipju ta’ protezzjoni tal-aspettattivi leġittimi kif ukoll fuq l-eżistenza ta’ “żbalji manifesti” li jirrigwardaw l-attivitajiet tar-rikorrent relatati mat-talbiet għal rimbors previsti fil-linji tat-tabella ta’ rkupru msemmija fil-punt 184 iktar ’il fuq.

209

Sa fejn, fid-deċiżjoni kkontestata, billi tikklassifika l-ammonti ta’ kreditu, il-Qorti tal-Awdituri tagħmel distinzjoni bejn tliet tipi ta’ spejjeż, jiġifieri bejn, l-ewwel nett, l-ispejjeż tal-missjonijiet u tal-allowances ta’ kuljum, it-tieni nett, l-ispejjeż ta’ rappreżentanza u, it-tielet nett, l-ispejjeż relatati mal-użu tal-karozza uffiċjali u mal-użu tas-servizz ta’ xufier, għandu jiġi segwit l-istess approċċ fir-rigward tal-eżami tal-irregolaritajiet li hija qieset fil-konfront tar-rikorrent, limitati għall-attivitajiet tiegħu kkonċernati mit-talbiet għal rimbors previsti fil-linji tat-tabella ta’ rkupru msemmija fil-punt 184 iktar ’il fuq.

2)

Fuq l‑ispejjeż tal‑missjoni u l‑allowances ta’ kuljum

210

Preliminarjament, għandu jitfakkar li, fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), dwar il-prinċipju ta’ protezzjoni tal-aspettattivi leġittimi, il-Qorti tal-Ġustizzja indikat li l-Qorti tal-Awdituri ma tistax validament tikkritika lir-rikorrent talli bbenefika mill-ħlas ta’ spejjeż tal-missjoni jew ta’ allowances ta’ kuljum taħt missjoni awtorizzata mill-President tal-Qorti tal-Awdituri, abbażi ta’ talba li ma kinitx ta’ natura frawdolenti u li ma kinitx tħalli barra informazzjoni essenzjali, u li l-irregolarità tagħha ma kinitx tidher b’mod manifest (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 380). Il-Qorti tal-Ġustizzja kkonkludiet li l-kwistjoni dwar jekk l-ordnijiet ta’ missjoni maħruġa, fuq talba tar-rikorrent, mill-President tal-Qorti tal-Awdituri kinux ta’ natura li jservu ta’ bażi għall-aspettattivi leġittimi tal-persuna kkonċernata fir-rigward tar-regolarità tal-missjonijiet ikkonċernati kellha tkun suġġetta għal evalwazzjoni każ b’każ, ibbażata, b’mod partikolari, fuq il-paragun bejn il-motiv ddikjarat fit-talba għal awtorizzazzjoni u l-għan reali tal-missjoni, hekk kif kien jirriżulta mill-provi prodotti quddiem il-Qorti tal-Ġustizzja.

211

Il-Qorti tal-Ġustizzja ppreċiżat ukoll li talba għar-rimbors tal-ispejjeż tal-missjoni jew għall-ħlas ta’ allowances ta’ kuljum kellha titqies li hija irregolari jekk ikun ġie stabbilit li l-attività effettivament imwettqa taħt l-ordni ta’ missjoni inkwistjoni ma setgħetx tintrabat mal-eżerċizzju tal-funzjonijiet tar-rikorrent. Hija ppreċiżat li din l-irregolarità tista’ tittieħed inkunsiderazzjoni għall-finijiet tal-proċedura prevista fl-Artikolu 286(6) TFUE jew meta l-ordni ta’ missjoni tkun inkisbet b’mod frawdolenti jew abbażi ta’ talba li tkun tħalli barra informazzjoni essenzjali, jew meta l-assenza ta’ rabta bejn din l-attività u dawn il-funzjonijiet kienet ta’ natura manifesta (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 392).

212

Il-kunsiderazzjonijiet tal-Qorti tal-Ġustizzja, imfakkra fil-punti 210 u 211 iktar ’il fuq, għandhom japplikaw mutatis mutandis f’din il-proċedura. Madankollu, l-applikazzjoni tagħhom f’dan il-każ, meta mqabbla mal-proċedura li tat lok għas-sentenza tat‑30 ta’ Settembru 2021, I‑-Qorti tal-Awdituri vs Pinxten (C‑130/19, EU:C:2021:782), għandha tieħu inkunsiderazzjoni argumenti u provi ġodda prodotti mill-partijiet, b’mod iktar partikolari fid-dawl tal-oneru tal-prova differenti li jaqa’ fuq il-partijiet u tal-għan differenti ta’ dan ir-rikors, li jikkonċerna l-kwistjoni tal-irkupru ta’ somom indebitament imħallsa konformement mar-Regolament 2018/1046 u intiż għall-annullament tad-deċiżjoni kkontestata konformement mar-raba’ paragrafu tal-Artikolu 263 TFUE.

213

Għandu jitfakkar ukoll li, f’dan il-każ, l-ordnijiet ta’ missjoni nħarġu, fuq talba tar-rikorrent, mill-President tal-Qorti tal-Awdituri, billi ttieħdet inkunsiderazzjoni l-informazzjoni li huwa kien ipprovda, filwaqt li d-deċiżjoni kkontestata ġiet adottata abbażi tar-rapport tal-OLAF, li kien stabbilixxa li l-informazzjoni li r-rikorrent kien bagħat lill-Qorti tal-Awdituri fl-ordnijiet ta’ missjoni tiegħu ma kinitx suffiċjenti sabiex tippermetti lill-President ta’ din tal-aħħar jiddeċiedi jekk l-attività kinitx jew le fl-interess tal-Qorti tal-Awdituri (ara l-punt 104 iktar ’il fuq). Għaldaqstant, fid-dawl tal-assenza ta’ setgħat ta’ investigazzjoni tal-Qorti tal-Awdituri meta mqabbla ma’ dawk tal-OLAF, hekk kif ġie kkonstatat fil-punt 107 iktar ’il fuq, għandhom jittieħdu inkunsiderazzjoni l-konklużjonijiet tar-rapport tal-OLAF billi jiġi evalwat, f’din il-proċedura, jekk ordni ta’ missjoni maħruġa, fuq talba tar-rikorrent, mill-President tal-Qorti tal-Awdituri kinitx ta’ natura li tkun tista’ tkun ta’ bażi għall-aspettattivi leġittimi tiegħu fir-rigward tar-regolarità tal-missjoni kkonċernata.

214

Għall-finijiet ta’ din l-evalwazzjoni, għandu jiġi eżaminat, fid-dawl tal-oneru tal-prova mfakkar fil-punt 193 iktar ’il fuq, jekk ir-rikorrent irnexxilux jistabbilixxi, jekk ikun meħtieġ abbażi ta’ provi ġodda li jistgħu jikkontestaw il-konstatazzjonijiet imwettqa fir-rapport tal-OLAF, li ordni ta’ missjoni ma kinitx inkisbet b’mod frawdolenti jew abbażi ta’ talba li tħalli barra informazzjoni essenzjali jew li l-attività effettivament imwettqa taħt l-ordni ta’ missjoni inkwistjoni setgħet tintrabat mal-eżerċizzju tal-funzjonijiet tiegħu.

i)

Fuq il‑missjonijiet li jirrigwardaw il‑laqgħat ma’ mexxejja politiċi u ma’ membri tal‑uffiċċji tagħhom

215

Fost it-talbiet għal rimbors previsti fil-linji tat-tabella ta’ rkupru msemmija fil-punt 184 iktar ’il fuq, numru kbir ta’ talbiet tar-rikorrent li kienu ġew awtorizzati mill-Qorti tal-Awdituri u li kienu wasslu għar-rimbors ta’ spejjeż tal-missjoni jew għall-ħlas ta’ allowances ta’ kuljum kienu relatati ma’ laqgħat ma’ mexxejja politiċi. Dawn huma t-talbiet għal rimbors imsemmija fil-linji bin-Nri 1, 7, 19, 41, 43, 59, 92, 97, 118 (parzjalment), 169, 171, 203, 204, 208, 211, 215, 238, 248, 296 (parzjalment), 301, 303, 313, 314, 319 u 320, 326 (parzjalment), 330 (parzjalment), 331 (parzjalment), 334 (parzjalment), 336, 339 (parzjalment), 346, 352, 355, 373 u 374 (parzjalment), 381, 382 (parzjalment), 395 u 402 tat-tabella ta’ rkupru.

216

Mid-deċiżjoni kkontestata jirriżulta li l-Qorti tal-Awdituri tikkontesta l-ispejjeż tal-missjoni jew tal-allowances ta’ kuljum sostnuti mir-rikorrent fir-rigward tal-attivitajiet tiegħu previsti fl-imsemmija linji, billi tqishom essenzjalment bħala li ma humiex marbuta mal-funzjonijiet tar-rikorrent bħala Membru tal-Qorti tal-Awdituri jew max-xogħol ta’ din tal-aħħar.

217

Ir-rikorrent iqis li l-laqgħat tiegħu ma’ mexxejja politiċi setgħu jintrabtu mal-eżerċizzju tal-funzjonijiet tiegħu ta’ Membru tal-Qorti tal-Awdituri, b’tali mod li dawn għandhom jitqiesu li huma regolari u ta’ natura li jservu ta’ bażi għall-aspettattivi leġittimi tiegħu fir-rigward ta’ din ir-regolarità. Huwa essenzjalment jirreferi għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), billi jindika, b’mod partikolari, li l-Qorti tal-Ġustizzja qieset li l-eżerċizzju tal-funzjonijiet ta’ Membru tal-Qorti tal-Awdituri seta’ jinkludi attivitajiet protokollari, intiżi b’mod partikolari li jrawmu għarfien dwar u li jippromwovu l-ħidma tagħha kif ukoll li jżommu, fl-interess tagħha, relazzjonijiet ma’ mexxejja ewlenin. Barra minn hekk, ir-rikorrent jinnota li l-Qorti tal-Ġustizzja ppreċiżat li tali attivitajiet protokollari jistgħu jikkonċernaw b’mod iktar frekwenti lill-mexxejja mill-istess Stat Membru bħall-Membru kkonċernat tal-Qorti tal-Awdituri. Barra minn hekk, huwa jqis li din il-proċedura ma tistax tippermetti lill-Qorti tal-Awdituri tikkontesta dak li l-Qorti tal-Ġustizzja qieset fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fid-dawl tal-proċess li ġie ppreżentat lilha u ta’ dak li hija stabbilixxiet fil-fatt u fid-dritt.

218

Fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja ddeċidiet li l-missjonijiet awtorizzati, b’mod trasparenti, sabiex jinżammu laqgħat ma’ mexxejja politiċi ma jistgħux, b’mod ġenerali, jitqiesu li huma, minħabba l-għan tagħhom, manifestament irregolari (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 438). B’mod iktar partikolari, fir-rigward tal-laqgħat tar-rikorrent mal-membri tal-partit politiku inkwistjoni, il-Qorti tal-Ġustizzja indikat, fil-kuntest tal-istess proċedura, li r-rabtiet mill-qrib ikkonstatati bejn ir-rikorrent u dan il-partit politiku ma jistgħux ikunu biżżejjed, fil-kuntest ta’ dik il-proċedura, sabiex tiġi stabbilita preżunzjoni li tippermetti li tiġi dedotta sistematikament in-natura manifestament irregolari ta’ missjoni li jkollha bħala għan laqgħa ma’ mexxej politiku minħabba s-sempliċi fatt li dan tal-aħħar huwa membru ta’ dan il-partit politiku (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 464). Fil-fatt, skont il-Qorti tal-Ġustizzja, fid-dawl, b’mod partikolari, tar-rwol importanti li kellu l-imsemmi partit fil-ħajja politika Belġjana u tar-relazzjonijiet li seta’ leġittimament ikollu r-rikorrent fi ħdan dan il-partit minħabba l-attivitajiet tiegħu qabel id-dħul fil-kariga tiegħu, l-organizzazzjoni ta’ ċertu numru ta’ missjonijiet protokollari li jirrigwardaw mexxejja politiċi li jappartjenu għall-istess partit ma tistax titqies li ma hijiex plawżibbli (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 465).

219

Il-Qorti tal-Awdituri ssostni, essenzjalment, li investigazzjoni tal-OLAF skopriet id-diversi ommissjonijiet li ppermettew li jinħeba l-għan reali ta’ natura privata tal-attivitajiet tar-rikorrent. Hija tilmenta li r-rikorrent kellu relazzjonijiet regolari u intensi ma’ ċirku limitat ta’ mexxejja politiċi ta’ livell għoli li kienu membri tal-partit politiku inkwistjoni, li r-rikorrent kien jappartjeni għalih qabel ma nħatar fil-Qorti tal-Awdituri, u li r-rikorrent kien ilu jaf għal żmien twil. Fil-fehma tagħha, tali relazzjonijiet kienu relatati ma’ attività politika mhux iddikjarata jew fi kwalunkwe każ ma kinux marbuta mal-eżerċizzju tal-funzjonijiet ta’ Membru tal-Qorti tal-Awdituri.

220

Sa fejn l-argumenti tar-rikorrent f’din il-proċedura sempliċement jirreferu, essenzjalment, għall-evalwazzjoni mwettqa mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u fid-dawl tal-osservazzjonijiet tal-Qorti Ġenerali li jinsabu fil-punti 202 sa 205 iktar ’il fuq, sabiex isir magħruf jekk l-ordnijiet ta’ missjoni marbuta mat-talbiet għal rimbors previsti fil-linji msemmija fil-punt 215 iktar ’il fuq kinux ta’ natura li jservu ta’ bażi għall-aspettattivi leġittimi tar-rikorrent fir-rigward tar-regolarità tal-missjonijiet ikkonċernati, qabel kollox hemm lok li jiġi eżaminat jekk il-Qorti tal-Awdituri tressaqx hija stess argumenti jew spjegazzjonijiet ġodda meta mqabbla ma’ dawk li hija kienet ressqet quddiem il-Qorti tal-Ġustizzja fir-rigward tal-imsemmija talbiet u, fl-affermattiv, li jiġi evalwat jekk, fid-dawl ta’ dawn l-elementi l-ġodda, it-talbiet inkwistjoni jistgħux jiġu evalwati fir-rigward tar-regolarità tagħhom b’mod differenti mill-evalwazzjoni adottata mill-Qorti tal-Ġustizzja jew jekk hemmx lok li l-Qorti Ġenerali taqbel, fil-kuntest ta’ din il-proċedura, mal-istess evalwazzjoni bħal dik adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punt 205 iktar ’il fuq).

221

F’dan ir-rigward, permezz tal-argument tagħha ppreżentat quddiem il-Qorti Ġenerali, il-Qorti tal-Awdituri ma tibbażax ruħha biss fuq il-fatt li l-mexxejja politiċi msemmija fl-ordnijiet ta’ missjoni inkwistjoni kienu membri tal-partit politiku inkwistjoni u li huma kienu konoxxenzi tar-rikorrent. Fil-fatt, hija tagħti spjegazzjonijiet supplimentari speċifiċi sabiex tistabbilixxi li l-laqgħat tar-rikorrent mal-mexxejja politiċi inkwistjoni, membri ta’ dan il-partit politiku, kienu separabbli mill-funzjonijiet tiegħu ta’ Membru tal-Qorti tal-Awdituri, fid-dawl tal-frekwenza tagħhom u taċ-ċirku limitat u identiku ta’ persuni li huwa kien jiltaqa’ magħhom, hekk kif irrilevat l-investigazzjoni tal-OLAF.

222

Fl-ewwel lok, għandu effettivament jiġi osservat, mingħajr ma dan ġie kkontestat mir-rikorrent, li, matul iż-żewġ mandati tiegħu fil-Qorti tal-Awdituri, huwa kellu relazzjonijiet frekwenti ma’ mexxejja politiċi, membri tal-partit politiku inkwistjoni.

223

Qabel kollox, għandu jitfakkar, hekk kif ġie kkonstatat fil-punti 111 u 112iktar ’il fuq, li din il-frekwenza tal-laqgħat tar-rikorrent ma’ mexxejja politiċi, membri tal-partit politiku inkwistjoni, ġiet irrilevata matul l-investigazzjoni tal-OLAF. Minn naħa, l-OLAF stabbilixxa li, matul il-mandat tiegħu, ir-rikorrent kien iltaqa’ mill-inqas 188 darba ma’ mexxejja politiċi Belġjani li kienu prinċipalment membri tal-partit politiku inkwistjoni. Skont ir-rapport tal-OLAF, din iċ-ċifra kienet tikkorrispondi għal 24 % tal-laqgħat jew tal-ikliet ta’ nofsinhar kollha tar-rikorrent li kienu s-suġġett tat-talbiet tiegħu għal rimbors. Għandu jiġi kkonstatat li dan jirrigwarda l-linji kollha msemmija fil-punt 216 iktar ’il fuq, bl-eċċezzjoni tal-linji bin-Nri 314, 319 u 320 tat-tabella ta’ rkupru. Min-naħa l-oħra, huwa wkoll l-OLAF li kkonstata rabta bejn il-laqgħat ma’ mexxejja politiċi Belġjani u l-laqgħat ta’ kull ġimgħa tal-bord tal-partit politiku inkwistjoni. F’dan ir-rigward, mir-rapport tal-OLAF jirriżulta li matul l-investigazzjoni tiegħu ġew irkuprati l-minuti tal‑44 laqgħa li jindikaw il-preżenza tal-membri tal-bord ta’ dan il-partit politiku matul il-perijodu ta’ bejn is‑17 ta’ Novembru 2008 u d‑29 ta’ April 2010. L-OLAF stabbilixxa l-preżenza tar-rikorrent fit‑28 laqgħa.

224

Sussegwentement, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonstatat li t‑42 missjoni ppreżentati mir-rikorrent bħala li għandhom bħala għan laqgħa ma’ mexxejja politiċi Belġjani setgħu jkunu direttament marbuta mal-attività politika tar-rikorrent, inkompatibbli mal-funzjonijiet tiegħu, sa fejn dawn kienu intiżi, fir-realtà, li jippermettulu jipparteċipa f’laqgħa tal-bord tal-partit politiku inkwistjoni jew f’attivitajiet jew f’riċevimenti organizzati minn dan il-partit politiku (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 442 sa 457). Għandhom jiżdiedu wkoll l-għaxar talbiet għal rimbors relatati mal-ispejjeż ta’ rappreżentanza, meqjusa mill-Qorti tal-Ġustizzja li huma irregolari inkwantu dawn huma direttament marbuta mal-attività politika eżerċitata mir-rikorrent (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 633 sa 637).

225

Fl-aħħar nett, flimkien mal-laqgħat imsemmija fil-punt 224 iktar ’il fuq, u fost dawk imsemmija fil-punt 184 iktar ’il fuq, għandu jiġi nnotat li r-rikorrent ipparteċipa f’ 64 laqgħa addizzjonali ma’ mexxejja politiċi, dejjem membri tal-partit politiku inkwistjoni, fil-kuntest ta’ missjoni jew ta’ talba għar-rimbors tal-ispejjeż ta’ rappreżentanza (linji bin-Nri 19, 23, 24, 27, 41, 43, 57, 59, 65, 66, 89, 92, 96, 97, 111, 116, 118, 168, 169, 171, 183, 184, 190, 203, 204, 208, 211, 215, 218, 236, 238, 248, 257, 276, 281, 293 u 294, 296, 303, 313, 314, 323, 326, 330, 331, 334, 336, 338, 339, 346, 350, 352, 354, 355, 357, 358, 367, 370, 381, 382, 395, 402 u 408 tat-tabella ta’ rkupru). Ma’ dawn il-laqgħat jiżdiedu dawk li kellhom bħala għan laqgħa ma’ membru ta’ uffiċċju ta’ mexxej politiku, jiġifieri tliet laqgħat imsemmija fil-linji bin-Nri 1, 7 u 301 tat-tabella ta’ rkupru.

226

Fit-tieni lok, l-elementi tal-proċess juru li r-rikorrent iltaqa’ ma’ numru limitat ta’ mexxejja politiċi, kollha membri tal-partiti politiku inkwistjoni, kemm fil-livell nazzjonali kif ukoll fil-livell tal-Unjoni, fejn il-maġġoranza l-kbira ta’ dawn il-laqgħat ġew organizzati fir-reġjun ta’ oriġini tar-rikorrent.

227

Għandu jitqies li l-frekwenza tal-laqgħat tar-rikorrent ma’ numru limitat ta’ mexxejja politiċi Belġjani, membri tal-partit politiku inkwistjoni matul iż-żewġ mandati tiegħu fil-Qorti tal-Awdituri, turi l-kuntest partikolari ta’ dawn il-laqgħat, u b’hekk tikkostitwixxi informazzjoni essenzjali, li l-Qorti tal-Awdituri ma kellhiex fil-mument tal-approvazzjoni ta’ kull talba għar-rimbors tal-ispejjeż tal-missjoni u tal-allowances, imressqa separatament mir-rikorrent wara tali laqgħat. Dan il-kuntest speċifiku seta’ jinftiehem biss wara l-eżami fil-fond tas-sitwazzjoni mwettaq mill-OLAF abbażi tal-informazzjoni supplimentari miksuba wara l-approvazzjoni ta’ dawn il-missjonijiet mill-President tal-Qorti tal-Awdituri. Għaldaqstant, fid-dawl tal-ommissjoni ta’ din l-informazzjoni essenzjali, ir-rikorrent ma jistax jinvoka aspettattivi leġittimi fir-rigward tal-ordnijiet ta’ missjoni li jirrigwardaw il-laqgħat mal-mexxejja politiċi Belġjani jew mal-membri tal-uffiċċji tagħhom, kollha membri tal-partit politiku inkwistjoni, imsemmija fil-linji bin-Nri 1, 7, 19, 41, 43, 59, 92, 97, 118 (parzjalment), 169, 171, 203, 204, 208, 211, 215, 238, 248, 296 (parzjalment), 301, 303, 313, 326 (parzjalment), 330 (parzjalment), 331 (parzjalment), 334 (parzjalment), 336, 339 (parzjalment), 346, 352, 355, 373 u 374 (parzjalment), 381, 382 (parzjalment), 395 u 402 tat-tabella ta’ rkupru.

228

Din il-konklużjoni ma tistax tiġi kkonfutata mill-argumenti tar-rikorrent.

229

Minn naħa, ir-rikorrent iqis li konoxxenza ta’ żmien twil mal-persuna li huwa jkun iltaqa’ magħha ma hijiex manifestament biżżejjed sabiex tiskredita din il-laqgħa bħala li ma tippreżentax rabtiet mal-eżerċizzju tal-funzjonijiet tiegħu. Skont ir-rikorrent, xejn ma jipprojbixxi lil Membru tal-Qorti tal-Awdituri milli jiltaqa’ ma’ persuni magħrufa. Min-naħa l-oħra, huwa jirrileva, essenzjalment, li s-seba’ laqgħat fi tnax‑il sena ma’ membru tal-uffiċċju tal-mexxej ta’ grupp politiku tal-Parlament, fil-kuntest tal-missjonijiet imsemmija fil-linji bin-Nri 1, 7 u 301 tat-tabella ta’ rkupru, ma humiex manifestament ta’ natura li juru li kull laqgħa ma’ din il-persuna kienet serviet biss għal finijiet politiċi u għalhekk ma kinitx taqa’ taħt l-eżerċizzju tal-funzjonijiet tagħha bħala Membru tal-Qorti tal-Awdituri.

230

Ċertament, is-sempliċi fatt li seħħet laqgħa ma’ persuna magħrufa mir-rikorrent ma jistax neċessarjament juri li tali laqgħa ma kinitx marbuta mal-eżerċizzju tal-funzjonijiet tar-rikorrent. Huwa minnu wkoll li n-numru ta’ laqgħat tar-rikorrent ma’ persuna matul il-mandati tiegħu fil-Qorti tal-Awdituri ma huwiex biżżejjed bħala tali sabiex jiġi stabbilit li kull laqgħa kienet relatata mal-attività politika mhux iddikjarata tar-rikorrent jew ma kellhiex rabta mal-funzjonijiet tiegħu ta’ Membru tal-Qorti tal-Awdituri.

231

Madankollu, it-talbiet għal rimbors tar-rikorrent previsti fil-linji msemmija fil-punt 227 iktar ’il fuq għandhom jiġu evalwati fil-kuntest speċifiku tagħhom.

232

Fil-fatt, fil-punti 222 sa 226 iktar ’il fuq ġie kkonstatat li, matul il-mandati tar-rikorrent fil-Qorti tal-Awdituri, dawn il-laqgħat kienu frekwenti ħafna u kienu jirrigwardaw numru limitat ta’ persuni. Din il-frekwenza ta’ laqgħat ma’ persuni f’numru limitat għandha tinqara fid-dawl tal-konstatazzjoni tal-Qorti tal-Ġustizzja, li skontha r-rikorrent kien, matul il-parti l-kbira taż-żewġ mandati tiegħu fil-Qorti tal-Awdituri, eżerċita attività politika attiva, immanifestata b’mod partikolari mill-parteċipazzjoni diretta u regolari f’korp ta’ tmexxija ta’ partit politiku nazzjonali, fejn ikkonkludiet li tali attività kienet b’mod ċar inkompatibbli mal-funzjonijiet ta’ Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 267 u 270).

233

F’dawn iċ-ċirkustanzi, ma jistax jitqies li dawn il-laqgħat ripetuti tar-rikorrent ma’ numru limitat ħafna ta’ mexxejja politiċi fil-livell nazzjonali, kollha membri tal-istess partit politiku, li huwa kien jappartjeni għalih qabel id-dħul fil-kariga tiegħu mal-Qorti tal-Awdituri, kienu fl-interess tal-Qorti tal-Awdituri bil-għan li tiġi żgurata l-promozzjoni tal-ħidma tiegħu jew skambji ta’ opinjonijiet marbuta mal-funzjonijiet tiegħu. Fil-fatt, tali mod ta’ eżerċizzju tal-funzjonijiet ta’ Membru tal-Qorti tal-Awdituri jikkomprometti l-osservanza tar-regoli ta’ kondotta imposti fuqu bħala persuna li tokkupa funzjoni għolja fi ħdan istituzzjoni tal-Unjoni. Hekk kif spjega l-Avukat Ġenerali Hogan fil-konklużjonijiet tiegħu fil-kawża Il‑Qorti tal‑Awdituri vs Pinxten (C‑130/19, EU:C:2020:1052), il-Membri tal-Qorti tal-Awdituri għandhom josservaw l-obbligi ta’ indipendenza, ta’ integrità u ta’ diskrezzjoni stabbiliti fl-Artikoli 285 u 286 TFUE, iżda għandhom josservaw l-iktar standards rigorużi fil-qasam tal-imparzjalità u ta’ diżinteress. Għall-Membri tal-Qorti tal-Awdituri, istituzzjoni li hija l-“kuxjenza finanzjarja” tal-Unjoni, dan neċessarjament jimplika responsabbiltà sħiħa fil-mod ta’ kif huma jonfqu il-fondi pubbliċi u, għaldaqstant, ċertu grad ta’ trasparenza fir-rigward tal-mod ta’ kif huma jagħmlu dan (konklużjonijiet tal-Avukat Ġenerali Hogan fil-kawża Il-Qorti tal-Awdituri vs Pinxten, C‑130/19, EU:C:2020:1052, punt 76).

234

Huwa għalhekk fid-dawl ta’ dan il-kuntest li għandha tiġi kkonstatata l-assenza ta’ rabta tal-missjonijiet relatati mal-laqgħat ma’ mexxejja politiċi, membri tal-partit politiku inkwistjoni, previsti fil-linji msemmija fil-punt 227 iktar ’il fuq, mal-funzjonijiet tar-rikorrent bħala Membru tal-Qorti tal-Awdituri, u dan fl-assenza ta’ spjegazzjonijiet jew ta’ provi prodotti mir-rikorrent li jipprovaw il-kuntrarju.

235

Ċerti lmenti tal-Qorti tal-Awdituri jew elementi li jirriżultaw manifestament mill-proċess jippermettu li tiġi kkonfermata l-assenza ta’ tali rabta.

236

L-ewwel nett, għandu jiġi kkonstatat li, fost il-missjonijiet tar-rikorrent imsemmija fil-punt 227 iktar ’il fuq, dawk imsemmija fil-linji bin-Nri 19, 41, 118, 171, 203, 211, 215, 238, 303, 326, 331, 334, 346, 352 u 402 tat-tabella ta’ rkupru u li seħħew it-Tnejn huma direttament marbuta mal-attività politika mhux iddikjarata tar-rikorrent u inkompatibbli mal-funzjonijiet tiegħu. Fil-fatt, l-OLAF ikkonstata matul l-investigazzjoni tiegħu li l-laqgħat ta’ kull ġimgħa tal-bord tal-partit politiku inkwistjoni kienu seħħew nhar ta’ Tnejn. L-OLAF irrileva wkoll li kien ċar li l-mandat tar-rikorrent bħala membru votanti tal-partit politiku inkwistjoni kien jeżiġi l-preżenza regolari tiegħu f’dawn il-laqgħat ta’ kull ġimgħa sax-xahar ta’ Novembru 2008. Barra minn hekk, mir-rapport tal-OLAF jirriżulta li l-istatus ta’ membru mhux votanti tar-rikorrent fi ħdan il-partit politiku inkwistjoni, li huwa eżerċita mix-xahar ta’ April 2010, kien jeżiġi l-preżenza tiegħu tal-inqas fil-laqgħat ta’ kull xahar organizzati kull l-ewwel Tnejn tax-xahar. Ir-rikorrent ma jipproduċix provi li juru l-assenza tiegħu għal-laqgħat tal-partit politiku inkwistjoni nhar ta’ Tnejn fil-kuntest tal-missjonijiet inkwistjoni.

237

It-tieni nett, fir-rigward tal-missjonijiet imsemmija fil-linji bin-Nri 19 u 296 (parzjalment) tat-tabella ta’ rkupru, dwar il-laqgħat tar-rikorrent ma’ żewġ deputati tal-Parlament, il-Qorti tal-Awdituri tafferma li dawn kienu Membri tal-Kumitat għall-Iżvilupp jew ta’ dak għat-Trasport u għat-Turiżmu tal-Parlament. Hija tqis li l-funzjonijiet ta’ dawn id-deputati ma kellhom ebda rabta ma’ dawk tar-rikorrent, inkarigat, matul il-mandati tiegħu fil-Qorti tal-Awdituri, mill-awditjar tal-ispejjeż tal-Unjoni fil-qasam tar-relazzjonijiet esterni, tat-tkabbir u tal-għajnuna umanitarja. Barra minn hekk, fir-rigward ta’ wieħed minn dawn id-deputati, il-Qorti tal-Awdituri tindika li preċedentement huwa kien jappartjeni għall-istess partit politiku, bħar-rikorrent sal‑2002, u li huwa kien, flimkien mar-rikorrent, membru fundatur ta’ partit politiku ieħor matul perijodu qasir fl‑2002.

238

It-tielet nett, mill-proċess jirriżulta li r-rikorrent ressaq talba għar-rimbors tal-ispejjeż tal-missjoni jew tal-allowances ta’ kuljum għall-missjonijiet intiżi sabiex huwa jiltaqa’ diversi drabi mal-istess persuna fi żmien relattivament qasir. Fil-fatt, fl‑2015, il-laqgħat tar-rikorrent intensifikaw, b’mod partikolari ma’ żewġ mexxejja politiċi, membri tal-partit politiku inkwistjoni, fejn dawn kienu msemmija fil-linji bin-Nri 330 (parzjalment), 331 (parzjalment), 334 (parzjalment), 336, 346 u 355 tat-tabella ta’ rkupru. Meta ġie mistieden waqt is-seduta sabiex jispjega l-frekwenza tal-laqgħat tiegħu ma’ dawn iż-żewġ persuni, ir-rikorrent ma ppreżenta ebda raġuni f’dan ir-rigward. Għalhekk, fl-assenza ta’ spjegazzjonijiet min-naħa tiegħu dwar in-neċessità ta’ diversi missjonijiet protokollari mal-istess persuna matul l-istess sena, l-ispejjeż korrispondenti għandhom jitqiesu bħala manifestament irregolari u għalhekk li ma għandhomx rabta mal-eżerċizzju tal-funzjonijiet tar-rikorrent.

239

Bħala konklużjoni, fid-dawl tal-kunsiderazzjonijiet preċedenti u fil-kuntest deskritt fil-punt 232 iktar ’il fuq, il-missjonijiet relatati mal-laqgħat ma’ mexxejja politiċi, membri tal-partit politiku inkwistjoni, previsti fil-linji msemmija fil-punt 227 iktar ’il fuq, għandhom jitqiesu li ma għandhomx rabta mal-eżerċizzju tal-funzjonijiet tar-rikorrent bħala Membru tal-Qorti tal-Awdituri. Minn dan isegwi li l-ordnijiet ta’ missjoni li jirrigwardaw dawn il-laqgħat, maħruġa, fuq talba tar-rikorrent, mill-President tal-Qorti tal-Awdituri, ma kinux ta’ natura li jservu ta’ bażi għall-aspettattivi leġittimi tiegħu fir-rigward tar-regolarità tal-missjonijiet inkwistjoni. Għaldaqstant, ir-raba’ motiv għandu jiġi miċħud fir-rigward ta’ dawn il-missjonijiet.

240

Għall-kuntrarju, fir-rigward tal-missjonijiet tar-rikorrent imsemmija fil-linji bin-Nri 314 u 319 u 320 tat-tabella ta’ rkupru, għandu jiġi rrilevat dan li ġej.

241

Fl-ewwel lok, fir-rigward tal-missjoni msemmija fil-linja bin-Nru 314 tat-tabella ta’ rkupru, mit-tabella ta’ rkupru, li tagħmel parti mid-deċiżjoni kkontestata, jirriżulta li r-rikorrent irċieva stedina formali minn partit politiku Ewropew u li ma kien hemm ebda prova ta’ rabta mal-attivitajiet tal-Qorti tal-Awdituri.

242

Ir-rikorrent iqis li din il-proċedura ma tistax tippermetti lill-Qorti tal-Awdituri tikkontesta dak li l-Qorti tal-Ġustizzja qieset fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fid-dawl tal-proċess li ġie ppreżentat lilha u ta’ dak li hija stabbilixxiet fil-fatt u fid-dritt (ara l-punt 217 iktar ’il fuq). F’dan ir-rigward, għandu jitqies li huwa jirreferi, essenzjalment, għall-evalwazzjoni tal-Qorti tal-Ġustizzja mwettqa f’dik is-sentenza dwar l-ispejjeż ta’ rappreżentanza fl-okkażjoni ta’ ikla ta’ filgħaxija msemmija fil-linja bin-Nru 314 tat-tabella ta’ rkupru.

243

Għandu jiġi osservat li, fis-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), il-Qorti tal-Ġustizzja esprimiet ruħha biss dwar ir-regolarità tal-ispejjeż ta’ rappreżentanza marbuta mal-missjoni msemmija fil-linja bin-Nru 314 tat-tabella ta’ rkupru, jiġifieri ikla ta’ filgħaxija ma’ deputat tal-Parlament li jirrappreżenta partit politiku Ewropew. Fil-fatt, hija kkonstatat li, fl-assenza ta’ preżentazzjoni mill-Qorti tal-Awdituri ta’ motivi jew ta’ provi ta’ irregolarità addizzjonali, kellhom jitqiesu li huma regolari t-talbiet għar-rimbors tal-ispejjeż ta’ rappreżentanza sostnuti abbażi ta’ stediniet indirizzati lil Membri tal-Parlament (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 624).

244

F’din il-proċedura, il-Qorti tal-Awdituri tqis bħala irregolari l-ispejjeż sostnuti fl-okkażjoni tal-laqgħa msemmija fil-linja bin-Nru 314 tat-tabella ta’ rkupru. F’dan ir-rigward, hija tfakkar li r-rikorrent wieġeb għal stedina minn partit politiku u li l-parti l-oħra tal-missjoni inkwistjoni kienet tikkonsisti f’attività rikreattiva tal-kaċċa fil-Belġju, meqjusa bħala irregolari mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Għaldaqstant, quddiem il-Qorti Ġenerali, il-Qorti tal-Awdituri tressaq argumenti ġodda meta mqabbla ma’ dawk li jsostnu l-evalwazzjoni tal-Qorti tal-Ġustizzja f’dik is-sentenza, imfakkra fil-punt 243 iktar ’il fuq.

245

Il-Qorti Ġenerali tikkonstata li mill-proċess jirriżulta li l-persuna li r-rikorrent kien iltaqa’ magħha kienet deputat tal-Parlament u Membru tal-Kumitat għall-Kontroll tal-Baġit. Minn naħa, f’din il-proċedura, il-Qorti tal-Awdituri ma tallegax li din il-persuna kienet membru tal-partit politiku inkwistjoni jew li r-rikorrent kien wieġeb għal stedina tal-imsemmi partit politiku. Min-naħa l-oħra, fir-rigward tal-allegazzjoni tal-Qorti tal-Awdituri, li skontha l-Qorti tal-Ġustizzja ddeċidiet li attività rikreattiva tal-kaċċa kienet irregolari, għandu jiġi osservat li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja rrikonoxxiet bħala irregolari l-missjonijiet tar-rikorrent relatati ma’ stediniet għall-parteċipazzjoni f’kaċeċ fil-Belġju, imsemmija fil-linji bin-Nri 315 u 371 tat-tabella ta’ rkupru. Issa, dawn il-missjonijiet ma għandhom ebda rabta mal-ikla ta’ filgħaxija tar-rikorrent ma’ deputat tal-Parlament, imsemmija fil-linja bin-Nru 314 tat-tabella ta’ rkupru. Minn naħa, mill-proċess jirriżulta li din l-ikla ta’ filgħaxija seħħet fi Brussell fl-istess jum bħal dak tal-missjoni msemmija fil-linja bin-Nru 315, li kienet tirrigwarda attività tal-kaċċa fil-Belġju, jiġifieri fil‑15 ta’ Ottubru 2014. Madankollu, skont il-proċess, il-missjoni msemmija fil-linja bin-Nru 315 bdiet biss fil‑23:00 bi tluq minn Brussell u għalhekk, probabbilment, setgħet tibda biss wara l-ikla ta’ filgħaxija inkwistjoni, imsemmija fil-linja bin-Nru 314. Għalhekk, il-Qorti tal-Awdituri ma tistabbilixxix l-eżistenza ta’ attività rikreattiva tal-kaċċa fil-jum tal-laqgħa msemmija fil-linja bin-Nru 314. Min-naħa l-oħra, il-missjoni msemmija fil-linja bin-Nru 371 seħħet fis‑16 ta’ Novembru 2015, jiġifieri iktar minn sena wara l-ikla ta’ filgħaxija msemmija fil-linja bin-Nru 314.

246

F’dawn iċ-ċirkustanzi, il-preċiżazzjonijiet tal-Qorti tal-Awdituri msemmija fil-punt 244 iktar ’il fuq ma humiex suffiċjenti sabiex il-missjoni msemmija fil-linja bin-Nru 314 tat-tabella ta’ rkupru tkun tista’ tiġi evalwata, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 244 iktar ’il fuq. Għaldaqstant, il-Qorti Ġenerali taqbel ma’ din l-evalwazzjoni fir-rigward tal-ispejjeż tal-missjoni u tal-allowances ta’ kuljum, imsemmija fil-linja bin-Nru 314 tat-tabella ta’ rkupru, u dan minkejja l-fatt li din kienet relatata biss mal-ispejjeż ta’ rappreżentanza marbuta mal-missjoni msemmija fl-imsemmija linja.

247

Konsegwentement, sa fejn, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja, essenzjalment, qieset li t-talba għar-rimbors tal-ispejjeż ta’ rappreżentanza marbuta mal-missjoni msemmija fil-linja bin-Nru 314 tat-tabella ta’ rkupru kellha titqies li hija regolari. (ara l-punt 243 iktar ’il fuq), għandu jiġi konkluż li l-ordni ta’ missjoni maħruġa, fuq talba tar-rikorrent, mill-President tal-Qorti tal-Awdituri fir-rigward ta’ din il-missjoni kienet ta’ natura li toħloq l-aspettattivi leġittimi tiegħu fir-regolarità tagħha. Konsegwentement, hemm lok li d-deċiżjoni kkontestata tiġi annullata f’dak li jirrigwarda l-missjoni msemmija fil-linja bin-Nru 314 tat-tabella ta’ rkupru, għal ammont ta’ EUR 96.60.

248

Fit-tieni lok, fir-rigward tal-laqgħa ma’ membru tal-uffiċċju ta’ Ministru Belġjan imsemmija fil-linji bin-Nri 319 u 320 tat-tabella ta’ rkupru, sabiex jikkontesta l-irregolarità tal-ispejjeż marbuta ma’ din il-missjoni, ir-rikorrent jirreferi, essenzjalment, għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punt 217 iktar ’il fuq).

249

Insostenn tan-natura irregolari tal-laqgħa, il-Qorti tal-Awdituri tindika li din hija laqgħa mal-Ministru Federali għall-Mobbiltà, li tirriżulta mingħajr rabta mal-funzjonijiet tar-rikorrent bħala Membru tal-Qorti tal-Awdituri responsabbli mill-awditjar tal-ispejjeż tal-Unjoni fil-qasam tar-relazzjonijiet esterni, tat-tkabbir u tal-għajnuna umanitarja.

250

Fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonstatat li l-persuna li r-rikorrent kien iltaqa’ magħha ma kinitx deskritta mill-Qorti tal-Awdituri bħala li tappartjeni għall-partit politiku inkwistjoni u li din tal-aħħar kienet tqis li din il-missjoni kellha tintrabat ma’ attività politika jew privata, minħabba r-rabta tagħha mal-qasam tat-trasport. Il-Qorti tal-Ġustizzja qieset li dan l-element ma kienx suffiċjenti sabiex tiġi stabbilita n-natura manifestament irregolari tal-imsemmija missjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 470).

251

Fid-dawl ta’ dak li ġie konkluż fil-punt 205 iktar ’il fuq, fil-preżenza tal-istess fatti u provi prodotti fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u f’din il-proċedura, għandha tiġi adottata l-evalwazzjoni tal-Qorti tal-Ġustizzja fir-rigward tal-missjoni msemmija fil-linji bin-Nri 319 u 320 tat-tabella ta’ rkupru. Għaldaqstant, sa fejn in-natura manifestament irregolari tal-imsemmija missjoni ma ġietx stabbilita quddiem il-Qorti tal-Ġustizzja (ara l-punt 250 iktar ’il fuq) u sa fejn il-Qorti tal-Awdituri ma tallegax li din kienet ta’ natura frawdolenti jew kienet tħalli barra informazzjoni essenzjali, għandu jitqies li l-ordni ta’ missjoni maħruġa f’dan ir-rigward, fuq talba tar-rikorrent, mill-President tal-Qorti tal-Awdituri kienet ta’ natura li toħloq aspettattivi leġittimi tar-rikorrent fir-regolarità tal-missjoni kkonċernata. Konsegwentement, hemm lok li d-deċiżjoni kkontestata tiġi annullata f’dak li jirrigwarda l-missjoni msemmija fil-linji bin-Nri 319 u 320 tat-tabella ta’ rkupru, għal ammont ta’ EUR 96.60.

ii)

Fuq il‑missjonijiet l‑oħra

252

Fost it-talbiet għal rimbors previsti fil-linji tat-tabella ta’ rkupru msemmija fil-punt 184 iktar ’il fuq, talbiet oħra li wasslu għar-rimbors tal-ispejjeż tal-missjoni jew għall-ħlas tal-allowances ta’ kuljum li l-Qorti tal-Awdituri qieset li ma kellhomx rabta mal-eżerċizzju tal-funzjonijiet tiegħu bħala Membru ta’ din tal-aħħar kienu relatati mal-attivitajiet tar-rikorrent imsemmija fil-linji bin-Nri 47, 56, 57, 63, 103, 128, 137, 138, 143, 155 (parzjalment), 157, 161, 196, 199, 210, 237, 277, 284, 290, 293 u 294, 310 (parzjalment), 330 (parzjalment), 331 (parzjalment), 334 (parzjalment), 335, 339 (parzjalment), 347, 373 u 374 (parzjalment), 382, 391, 411 u 412 tat-tabella ta’ rkupru.

253

Bħal fil-każ tal-missjonijiet intiżi għal-laqgħat ma’ mexxejja politiċi u membri tal-uffiċċji tagħhom (ara l-punt 216 iktar ’il fuq), mid-deċiżjoni kkontestata jirriżulta li l-Qorti tal-Awdituri tikkontesta l-ispejjeż tal-missjoni jew tal-allowances ta’ kuljum sostnuti mir-rikorrent fir-rigward tat-talbiet tiegħu għal rimbors previsti fil-linji msemmija fil-punt 252 iktar ’il fuq, billi essenzjalment tqis li dawn huma mingħajr rabta mal-funzjonijiet tar-rikorrent bħala Membru tal-Qorti tal-Awdituri.

254

Ir-rikorrent iqis li l-missjonijiet tiegħu previsti fil-linji msemmija fil-punt 252 iktar ’il fuq huma relatati mal-funzjonijiet tiegħu bħala Membru tal-Qorti tal-Awdituri. F’dan ir-rigward, huwa jirreferi, essenzjalment, għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), billi jindika li, f’din il-proċedura, din għandha tittieħed inkunsiderazzjoni. Huwa jfakkar li l-Qorti tal-Awdituri ma tistax, f’dan il-każ, tikkontesta dak li l-Qorti tal-Ġustizzja qieset f’dik is-sentenza fid-dawl tal-proċess li ġie ppreżentat lilha u ta’ dak li hija stabbilixxiet fil-fatt u fid-dritt.

255

Fl-ewwel lok, fir-rigward, parzjalment, tal-missjonijiet imsemmija fil-linji bin-Nri 330, 331 u 334 tat-tabella ta’ rkupru, għandu jiġi kkonstatat li l-Qorti tal-Ġustizzja ma esprimietx ruħha fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), dwar in-natura regolari tal-parteċipazzjoni tar-rikorrent f’riċeviment tas-“sena l-ġdida” ta’ assoċjazzjoni tar-Reġjun ta’ Vlaanderen b’għan politiku (linja bin-Nru 330, parzjalment) u fi preżentazzjoni ta’ dokument lill-Kumitat għall-Kontroll tal-Baġit tal-Parlament (COCOBU) (linja bin-Nru 331, parzjalment) kif ukoll tal-laqgħa tiegħu ma’ ambaxxatur Belġjan f’Kuba (linja bin-Nru 334, parzjalment).

256

Fir-rigward tal-attivitajiet imsemmija fil-linji bin-Nri 330 u 331, il-Qorti tal-Awdituri tindika li l-parteċipazzjoni tar-rikorrent f’riċeviment tas-“sena l-ġdida” ta’ assoċjazzjoni tar-Reġjun ta’ Vlaanderen b’għan politiku u fi preżentazzjoni ta’ dokument lill-COCOBU ġiet segwita minn laqgħa ma’ membru tal-partit politiku inkwistjoni. Fir-rigward tal-attività msemmija fil-linja bin-Nru 334, il-Qorti tal-Awdituri tirrileva li l-aġenda tar-rikorrent ma ssemmi ebda laqgħa ma’ ambaxxatur Belġjan f’Kuba fil-jum ikkonċernat u li, fi kwalunkwe każ, din il-laqgħa eventwali ma setgħetx kienet marbuta mal-funzjonijiet tiegħu ta’ Membru tal-Qorti tal-Awdituri, peress li din tal-aħħar ma kellhiex missjoni ta’ awditjar ipprogrammata f’Kuba.

257

Ir-rikorrent ma jippreżenta ebda osservazzjoni fir-rigward ta’ dawn l-allegazzjonijiet tal-Qorti tal-Awdituri, minkejja li huwa għandu, f’din il-proċedura, juri (ara l-punt 193 iktar ’il fuq) li ħlas mill-baġit tal-Unjoni tal-ispejjeż tal-missjoni inkwistjoni kien iġġustifikat u li d-deċiżjoni kkontestata hija illegali minħabba li qieset li dawn l-ispejjeż tħallsu indebitament.

258

F’dawn iċ-ċirkustanzi, il-missjonijiet imsemmija, parzjalment, fil-linji bin-Nri 330, 331 u 334 tat-tabella ta’ rkupru għandhom jitqiesu li ma għandhomx rabta mal-eżerċizzju tal-funzjonijiet tar-rikorrent bħala Membru tal-Qorti tal-Awdituri. Minn dan isegwi li l-ordnijiet ta’ missjoni li jirrigwardaw dawn il-missjonijiet, maħruġa, fuq talba tar-rikorrent, mill-President tal-Qorti tal-Awdituri, ma kinux ta’ natura li jservu ta’ bażi għall-aspettattivi leġittimi tiegħu fir-rigward tar-regolarità tal-missjonijiet inkwistjoni. Għaldaqstant, ir-raba’ motiv għandu jiġi miċħud f’dak li jirrigwarda dawn il-missjonijiet.

259

Fit-tieni lok, fir-rigward tal-missjoni msemmija fil-linji bin-Nri 293 u 294 tat-tabella ta’ rkupru, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li l-ilmenti tal-Qorti tal-Awdituri dwar din il-missjoni kellhom jiġu esklużi peress li l-irregolarità imputata lir-rikorrent mill-Qorti tal-Awdituri setgħet titqies li tikkostitwixxi żball skużabbli tiegħu. Skont il-Qorti tal-Ġustizzja, minkejja li l-allegazzjoni tal-Qorti tal-Awdituri li din il-missjoni kienet inżammet minkejja l-annullament tal-laqgħa li kienet tiġġustifikaha kienet tidher li hija fondata, fid-dawl ta’ indikazzjoni li tinsab fl-aġenda tar-rikorrent, l-eżistenza ta’ frodi f’dan ir-rigward ma ġietx stabbilita peress li, fil-ħin previst inizjalment għall-eżekuzzjoni tal-imsemmija missjonijiet, kienet inżammet ikla ta’ nofsinhar li kienet ġiet iddikjarata lill-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 579).

260

F’dan il-każ, il-Qorti tal-Awdituri tfakkar li l-laqgħa marbuta mal-missjoni msemmija fil-linji bin-Nri 293 u 294 tat-tabella ta’ rkupru ġiet annullata u li, minflok, ir-rikorrent offra ikla ta’ nofsinhar lil tliet membri tal-partit politiku inkwistjoni.

261

Fid-dawl tar-relazzjonijiet tar-rikorrent ma’ mexxejja politiċi, membri tal-partit politiku inkwistjoni, meqjusa mill-Qorti Ġenerali li ma għandhomx rabta mal-funzjonijiet tar-rikorrent bħala Membru tal-Qorti tal-Awdituri (ara l-punti 232 sa 234 u 239 iktar ’il fuq), fir-rigward tal-missjoni msemmija fil-linji bin-Nri 293 u 294 tat-tabella ta’ rkupru, għandha tiġi applikata l-istess konklużjoni bħal dik li tinsab fil-punt 227 iktar ’il fuq.

262

Għaldaqstant, għandu jitqies li l-kuntest tar-relazzjonijiet tar-rikorrent mal-membri tal-partit politiku inkwistjoni jikkostitwixxi informazzjoni essenzjali, li l-President tal-Qorti tal-Awdituri ma kienx f’pożizzjoni li jkun jaf biha fil-mument tal-approvazzjoni tiegħu tat-talba għar-rimbors tal-ispejjeż tal-missjoni u tal-allowances inkwistjoni. Fid-dawl tal-ommissjoni ta’ tali informazzjoni essenzjali, ir-rikorrent ma jistax jinvoka aspettattivi leġittimi fir-rigward tal-ordni ta’ missjoni, previst għal laqgħa annullata u ssostitwita minn ikla ta’ nofsinhar ma’ tliet membri tal-partit politiku inkwistjoni. Konsegwentement, ir-raba’ motiv għandu jiġi miċħud f’dak li jirrigwarda l-missjoni msemmija fil-linji bin-Nri 293 u 294 tat-tabella ta’ rkupru.

263

Fit-tielet lok, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset, essenzjalment, li l-maġġoranza l-kbira tat-talbiet għal rimbors previsti fil-linji msemmija fil-punt 252 iktar ’il fuq, jiġifieri l-linji bin-Nri 56, 57, 63, 128, 137, 138, 143, 155 (parzjalment), 196, 199, 277, 284, 290, 310 (parzjalment), 335, 339 (parzjalment), 347, 373 u 374 (parzjalment), 382, 391, 411 u 412 tat-tabella ta’ rkupru, ma kellhomx jitqiesu li huma manifestament irregolari fir-rigward tal-funzjonijiet tar-rikorrent bħala Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 498 sa 501, 515, 534 sa 536, 558, 559, 561 sa 563, 567 sa 576 u 579).

264

F’dan il-każ, ir-rikorrent jirreferi, essenzjalment, għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fir-rigward tal-kwistjoni dwar jekk l-ordnijiet ta’ missjoni marbuta mat-talbiet għal rimbors previsti fil-linji msemmija fil-punt 263 iktar ’il fuq kinux ta’ natura li jservu ta’ bażi għall-aspettattivi leġittimi tiegħu fir-rigward tar-regolarità tal-missjonijiet ikkonċernati. Għalhekk, għandu jiġi applikat l-istess raġunament bħal dak li jinsab fil-punt 221 iktar ’il fuq. Għaldaqstant, għandu jiġi eżaminat jekk il-Qorti tal-Awdituri tressaqx preċiżazzjonijiet u argumenti ġodda meta mqabbla ma’ dawk li hija kienet ressqet quddiem il-Qorti tal-Ġustizzja fir-rigward ta’ dawn it-talbiet u, fl-affermattiv, għandu jiġi evalwat jekk, fid-dawl ta’ dawn l-elementi, l-imsemmija talbiet għandhomx, f’dan il-każ, jiġu evalwati jew le b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punt 205 iktar ’il fuq).

–

Fuq il‑missjonijiet imsemmija fil-linji bin-Nri 56, 138, 196, 284 u 382 tat-tabella ta’ rkupru

265

Fir-rigward tal-ordnijiet ta’ missjoni li jirrigwardaw il-laqgħat tar-rikorrent ma’ diplomatiċi u imprendituri msemmija fil-linji bin-Nri 56, 138, 196, 284 u 382 tat-tabella ta’ rkupru, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li l-Qorti tal-Awdituri, li kellha l-oneru tal-prova, ma kinitx stabbilixxiet b’mod suffiċjenti fid-dritt li l-missjonijiet li matulhom kienu saru dawn l-ispejjeż kienu ta’ natura privata. Skont il-Qorti tal-Ġustizzja, dawn il-missjonijiet, marbuta ma’ laqgħat ma’ diplomatiċi u ma’ imprendituri, setgħu bħala prinċipju jkunu marbuta mal-funzjonijiet ta’ Membru tal-Qorti tal-Awdituri li jpoġġi fl-Awla responsabbli għar-relazzjonijiet esterni tal-Unjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 569 sa 575).

266

Fir-rigward tal-missjonijiet imsemmija fil-linji bin-Nri 138, 196 u 382 tat-tabella ta’ rkupru, li kellhom l-għan li jippermettu lill-imprendituri tar-Reġjun ta’ Vlaanderen jiltaqgħu ma’ diplomatiċi Belġjani f’pożizzjoni barra mill-pajjiż, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li tali laqgħat setgħu jikkostitwixxu okkażjoni sabiex isiru skambji ta’ opinjonijiet dwar suġġetti li jinteressaw lill-Qorti tal-Awdituri kif ukoll sabiex tiġi magħrufa u promossa l-ħidma tagħha ma’ mexxejja ewlenin nazzjonali. Skont il-Qorti tal-Ġustizzja, il-fatt li l-imsemmija laqgħat huma organizzati minn organu li għandu l-għan li jippromwovi l-interessi tar-Reġjun ta’ Vlaanderen fi Brussell ma kienx, fih innifsu, suffiċjenti sabiex tiġi stabbilita l-irregolarità tal-missjonijiet inkwistjoni (ara, f’dan is-sens, is-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punt 573).

267

Hekk kif ikkonstatat fil-punt 116 iktar ’il fuq, it-tabella ta’ rkupru, li tagħmel parti mid-deċiżjoni kkontestata, tindika, b’riferiment għar-rapport tal-OLAF, b’mod partikolari għall-paġni 5, 18, 29 u 37 tiegħu, li t-talbiet għal rimbors imsemmija fil-linji bin-Nri 138 u 196 tat-tabella ta’ rkupru jirreferu għall-istediniet formali ta’ ċirku li kellu l-għan li jsaħħaħ il-preżenza tal-impriżi tar-Reġjun ta’ Vlaanderen fi Brussell u li kien jorganizza laqgħat sabiex l-intraprendituri tar-Reġjun ta’ Vlaanderen ikunu jistgħu jiltaqgħu ma’ diplomatiċi Belġjani f’pożizzjoni barra mill-pajjiż u li dawn ma kinux marbuta mal-funzjonijiet tar-rikorrent bħala Membru tal-Qorti tal-Awdituri. L-istess konstatazzjoni jsir fir-rigward tat-talba għal rimbors imsemmija fil-linja bin-Nru 382 tat-tabella ta’ rkupru.

268

F’din il-proċedura, il-Qorti tal-Awdituri tfakkar l-għan tal-attivitajiet imsemmija fil-linji bin-Nri 138, 196 u 382 tat-tabella ta’ rkupru, hekk kif imfakkar fil-punt 267 iktar ’il fuq. Barra minn hekk, hija ssostni li l-konklużjoni tal-Qorti tal-Ġustizzja, ippreċiżata fil-punt 267 iktar ’il fuq, jiġifieri li tali attivitajiet kellhom ikunu jistgħu jikkostitwixxu okkażjonijiet sabiex isiru skambji ta’ opinjonijiet dwar suġġetti li jinteressaw lill-Qorti tal-Awdituri kif ukoll sabiex tiġi magħrufa u promossa l-ħidma tagħha ma’ mexxejja ewlenin nazzjonali, tapplika għal kwalunkwe laqgħa ta’ Membru tal-Qorti tal-Awdituri ma’ persuna esterna għal din tal-aħħar.

269

F’dan ir-rigward, tali argument fih innifsu ma jistax ikun biżżejjed sabiex jikkonfuta dak li ġie kkonstatat mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), jiġifieri, minn naħa, li ma kienx ikkontestat li “ikla ta’ filgħaxija diplomatika” li tinżamm kull sena fi Brussell kienet tlaqqa’ numru kbir ta’ diplomatiċi Belġjani u, min-naħa l-oħra, li laqgħat ma’ diplomatiċi setgħu bħala prinċipju jkunu marbuta mal-funzjonijiet ta’ Membru tal-Qorti tal-Awdituri li jpoġġi fl-Awla responsabbli għar-relazzjonijiet esterni tal-Unjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 569 u 573).

270

Konsegwentement, fir-rigward tal-missjonijiet imsemmija fil-linji bin-Nri 138, 196 u 382 tat-tabella ta’ rkupru, hemm lok li tiġi applikata, f’dan il-każ, l-evalwazzjoni mwettqa mill-Qorti tal-Ġustizzja f’dan ir-rigward fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punti 265, 266 u 269 iktar ’il fuq, u li dawn jitqiesu, bħala prinċipju, li ma humiex irregolari.

271

Għall-kuntrarju, dan ma huwiex il-każ fir-rigward tal-missjonijiet imsemmija fil-linji bin-Nri 56 u 284 tat-tabella ta’ rkupru.

272

Fir-rigward tal-missjoni msemmija fil-linja bin-Nru 56 tat-tabella ta’ rkupru, dwar ikla ta’ nofsinhar tax-xogħol fis‑6 ta’ Lulju 2009 ma’ diplomat tal-Federazzjoni Russa, li, skont l-ispjegazzjonijiet tal-Qorti tal-Awdituri fit-tabella ta’ rkupru li tagħmel parti mid-deċiżjoni kkontestata, kienet marbuta ma’ intervent imwettaq favur terzi li xtaqu jadottaw wild f’dan il-pajjiż, il-Qorti tal-Ġustizzja qieset li d-dokumenti prodotti mill-Qorti tal-Awdituri, li kienu sussegwenti għal diversi xhur mid-data ta’ din il-missjoni u li la kienu jirreferu għal din l-ikla ta’ nofsinhar u lanqas għal xi fatt li seħħ preċedentement, ma kinux jippermettu li jiġi stabbilit b’ċertezza li din kellha għan indipendenti mill-funzjonijiet tar-rikorrent (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 570 u 571).

273

F’din il-proċedura, il-Qorti tal-Awdituri tirreferi għall-proċess li jinkludi estratt mir-rapport tal-OLAF dwar din il-laqgħa ma’ diplomat tal-Federazzjoni Russa. Hekk kif ġie kkonstatat fil-punt 122 iktar ’il fuq, waqt l-investigazzjoni tiegħu, l-OLAF qies l-imsemmija laqgħa bħala waħda privata. Huwa stabbilixxa li r-rikorrent kien iltaqa’ ma’ dan id-diplomat għal kwistjoni marbuta mal-adozzjoni ta’ wild Russu minn familja Belġjana. Skont ir-rapport tal-OLAF, rimarka fil-kalendarju numeriku tar-rikorrent kienet tirreferi għad-diffikultajiet ikkonstatati fil-fajl ta’ adozzjoni u l-konslu inkwistjoni kien lest jagħti l-għajnuna tiegħu għat-twettiq tal-formalitajiet neċessarji u għar-riżoluzzjoni tal-problema kkonstata. Barra minn hekk, l-OLAF indika li r-rikorrent kien iltaqa’ mal-istess diplomat fit‑22 ta’ Ġunju u mill-ġdid fis‑6 ta’ Lulju 2009 u li fuq l-ordnijiet ta’ missjoni kien hemm l-indikazzjoni “laqgħa mad-[diplomat]”, mingħajr indikazzjoni tal-għan veru ta’ dawn il-laqgħat.

274

Il-Qorti tal-Awdituri tallega wkoll li l-għan ta’ din il-laqgħa kien li tiġi ffaċilitata proċedura ta’ adozzjoni ta’ wild ta’ nazzjonalità Russa għal koppja ta’ nazzjonalità Belġjana, fatt li juri n-natura privata tagħha. Hija tirreferi għall-kuntest ta’ din il-missjoni, billi tindika li din kienet ippreċeduta minn missjoni oħra “mingħajr allowances” li kienet seħħet ġimagħtejn qabel, fit‑22 ta’ Ġunju 2009, u li dawn kienu ġew segwiti minn kuntatt ieħor fit‑30 ta’ Novembru 2009. Skont il-Qorti tal-Awdituri, il-fatt li, għal dawn iż-żewġ kuntatti, ir-rikorrent ma talabx ordni ta’ missjoni b’allowances juri li dawn kienu jirrigwardaw il-ħajja privata u tal-familja tal-koppja inkwistjoni.

275

Għandu jitqies li jeżisti dubju dwar ir-regolarità ta’ din il-missjoni, fid-dawl tal-preċiżazzjonijiet magħmula mill-Qorti tal-Awdituri. Il-Qorti tal-Awdituri tibbaża ruħha b’mod partikolari fuq il-frekwenza tal-laqgħat bejn ir-rikorrent u l-istess diplomat tal-Federazzjoni Russa, fuq perijodu qasir ħafna, mingħajr laqgħat oħra fis-snin preċedenti u sussegwenti, assoċjata mal-iskambji ta’ ittri elettroniċi fuq l-istess perijodu dwar proċedura partikolari ta’ adozzjoni ta’ wild favur koppja ta’ ħbieb, sabiex tqis li jeżisti dubju dwar ir-regolarità tal-missjoni inkwistjoni.

276

Konsegwentement, fil-preżenza ta’ dubju dwar ir-regolarità tas-somom irrimborsati lir-rikorrent, l-oneru tal-prova jaqa’ fuq ir-rikorrent sabiex juri li huwa sostna l-ispejjeż inkwistjoni b’osservanza tar-regoli applikabbli (ara l-punt 193 iktar ’il fuq). Madankollu, f’dan il-każ, ir-rikorrent ma pproduċiex elementi ġodda li jistgħu jikkonfutaw dan id-dubju.

277

Fir-rigward tal-missjoni msemmija fil-linja bin-Nru 284 tat-tabella ta’ rkupru, dwar ikla ta’ nofsinhar mal-ambaxxatur tar-Renju tal-Belġju fi Franza, jeżisti wkoll dubju dwar ir-regolarità ta’ din il-missjoni, fid-dawl tal-preċiżazzjonijiet magħmula mill-Qorti tal-Awdituri. Fir-rigward ta’ din il-missjoni, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonstatat li n-natura privata ta’ din l-ikla, sa fejn il-Qorti tal-Awdituri invokat relazzjoni ta’ ħbiberija li torbot lil dan l-ambaxxatur mar-rikorrent u l-identità tal-parteċipanti l-oħra, ma ntwerietx fl-assenza ta’ kwalunkwe prova li tista’ tagħti informazzjoni lill-Qorti tal-Ġustizzja dwar l-għan tal-imsemmija ikla, u sa fejn is-sempliċi eżistenza ta’ tali relazzjoni ma kinitx, fi kwalunkwe każ, suffiċjenti sabiex jiġi eskluż li l-istess ikla seta’ kellha dimensjoni professjonali (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 575).

278

F’din il-proċedura, ir-rikorrent ma jressaq ebda element ġdid. Fir-rigward tal-Qorti tal-Awdituri, hija tispjega mill-ġdid, f’termini differenti, li l-missjoni msemmija fil-linja bin-Nru 284 tat-tabella ta’ rkupru kienet ta’ natura privata. Hija tippreċiża li din kienet stedina mill-ambaxxatur tar-Renju tal-Belġju fi Franza, indirizzata lil ħames persuni, fosthom ir-rikorrent u l-konjuġi tiegħu, għal tmiem il-ġimgħa fir-residenza tiegħu, f’Pariġi, fl-okkażjoni ta’ degustazzjoni ta’ nbejjed. Hija ssemmi li, fil-kuntest ta’ din il-missjoni, ir-rikorrent ħallas l-ikla ta’ nofsinhar u organizza l-kunsinna ta’ bukkett fjuri f’isem il-mistednin kollha. Hija tenfasizza li elementi juru li huwa talab ukoll, u rċieva mingħand il-Qorti tal-Awdituri, cravat u velu bħala rigali uffiċjali għall-ambaxxatur u għall-konjuġi tiegħu.

279

Il-Qorti tal-Awdituri tiġġustifika wkoll in-natura privata tal-missjoni msemmija fil-linja bin-Nru 284 tat-tabella ta’ rkupru billi tagħmel riferiment għal attività mwettqa preċedentement mir-rikorrent flimkien mal-istess ħames persuni, meqjusa mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li hija irregolari. Barra minn hekk, il-Qorti tal-Awdituri tirreferi għall-atti tal-proċess li jinkludu, b’mod partikolari, estratt mir-rapport tal-OLAF li jorbot din l-attività tar-rikorrent ma’ “[ż]jarat ta’ korteżija [lil] negozjanti u lil konoxxenzi għal raġunijiet privati”.

280

Il-preċiżazzjonijiet magħmula mill-Qorti tal-Awdituri jirriżultaw plawżibbli. Fil-fatt, din kienet laqgħa li, fuq perijodu qasir ħafna, kienet żvolġiet, fuq stedina identika, mal-istess persuni, li għalihom laqgħa oħra, li hija s-suġġett tal-linja bin-Nru 268 tat-tabella ta’ rkupru, tqieset mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li hija irregolari, peress li din kienet relatata ma’ ikla ta’ filgħaxija organizzata f’ristorant viċin azjenda għall-produzzjoni tal-inbid u peress li diversi ittri elettroniċi kienu jindikaw li l-vjaġġ tar-rikorrent kif ukoll tal-mistieden tiegħu fir-reġjun kellu bħala għan żjara f’din l-azjenda (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 659). Dawn iċ-ċirkustanzi jippermettu li jitqies li jeżisti dubju dwar ir-regolarità tal-missjoni msemmija fil-linja bin-Nru 284 tat-tabella ta’ rkupru.

281

Sa fejn ir-rikorrent ma huwiex f’pożizzjoni li juri, f’dan il-każ, li l-missjonijiet imsemmija fil-linji bin-Nri 56 u 284 tat-tabella ta’ rkupru kellhom għanijiet professjonali, fil-preżenza ta’ dubju li jissussisti dwar ir-regolarità ta’ dawn il-missjonijiet, hemm lok li jitqies li l-laqgħat previsti fl-imsemmija linji ma għandhomx rabta mal-eżerċizzju tal-funzjonijiet tar-rikorrent bħala Membru tal-Qorti tal-Awdituri u li għalhekk dawn huma irregolari. Minn dan isegwi li l-ordnijiet ta’ missjoni li jirrigwardaw dawn il-laqgħat, maħruġa, fuq talba tar-rikorrent, mill-President tal-Qorti tal-Awdituri, ma kinux ta’ natura li jservu ta’ bażi għall-aspettattivi leġittimi tiegħu fir-rigward tar-regolarità tal-missjonijiet inkwistjoni. Għaldaqstant, ir-raba’ motiv għandu jiġi miċħud f’dak li jirrigwarda l-ispejjeż tal-missjonijiet imsemmija fil-linji bin-Nri 56 u 284.

–

Fuq il-missjonijiet imsemmija fil-linji bin-Nri 57 u 391 tat-tabella ta’ rkupru

282

Fir-rigward tal-ordnijiet ta’ missjoni li jirrigwardaw il-laqgħat tar-rikorrent ma’ Membru tal-Kummissjoni msemmija fil-linji bin-Nri 57 u 391 tat-tabella ta’ rkupru, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li l-provi prodotti mill-Qorti tal-Awdituri ma kinux biżżejjed sabiex tiġi stabbilita l-irregolarità li din tal-aħħar invokat fir-rigward ta’ dawn iż-żewġ missjonijiet. Il-Qorti tal-Ġustizzja kkonstatat li ma kienx ikkontestat li tali laqgħa setgħet, bħala prinċipju, tintrabat mal-eżerċizzju tal-funzjonijiet ta’ Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 561).

283

Fir-rigward tal-missjoni msemmija fil-linja bin-Nru 57 tat-tabella ta’ rkupru, il-Qorti tal-Ġustizzja rrilevat li l-fondatezza tal-allegazzjoni tal-Qorti tal-Awdituri li skontha din il-missjoni kienet, fir-realtà, marbuta mal-organizzazzjoni ta’ festival mużikali li jinteressa lir-rikorrent b’mod privat ma kinitx stabbilita. Il-Qorti tal-Ġustizzja spjegat li din il-missjoni twettqet fit‑13 ta’ Lulju 2009, filwaqt li l-ittri elettroniċi relatati ma’ dan il-festival prodotti mill-Qorti tal-Awdituri kienu jirrigwardaw sussidju għas-sena 2011 u kellhom id-data ta’ Settembru u Ottubru 2011. Barra minn hekk, skont il-Qorti tal-Ġustizzja, ir-relazzjoni bejn l-imsemmija missjoni u din is-sussidju kienet tidher inqas u inqas plawżibbli peress li l-Membru kkonċernat tal-Kummissjoni kien ġie inkarigat mill-kultura biss mill‑10 ta’ Frar 2010 (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 562 u 563).

284

F’din il-proċedura, il-Qorti tal-Awdituri tirreferi għall-atti tal-proċess, li jinkludu b’mod partikolari estratt mir-rapport tal-OLAF li minnu jirriżulta li l-laqgħa ma’ Membru tal-Kummissjoni msemmija fil-linja bin-Nru 57 tat-tabella ta’ rkupru kienet marbuta ma’ festival Ewropew tal-mużika għaż-żgħażagħ. Hija tqis li din ir-relazzjoni ppermettiet lir-rikorrent, sentejn wara, jintervjeni personalment bil-għan li jikseb sussidju lil assoċjazzjoni attiva fil-komun li fl‑2019 kien ingħaqad mal-komun ta’ oriġini tar-rikorrent, li tiegħu huwa kien is-sindku, komun li kien jorganizza festival Ewropew tal-mużika għaż-żgħażagħ. Dawn l-elementi diġà ġew eżaminati mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), hekk kif jixhed il-punt 283 iktar ’il fuq.

285

Barra minn hekk, il-Qorti tal-Awdituri ssostni li l-missjoni msemmija fil-linja bin-Nru 57 tat-tabella ta’ rkupru hija irregolari peress li ma hemmx rabta bejn il-kompiti ta’ awditjar eżerċitati mir-rikorrent, minn naħa, u dawk tal-Membru tal-Kummissjoni inkwistjoni, li fiż-żmien meta seħħew il-fatti kellu l-portafoll tas-saħħa, min-naħa l-oħra.

286

Madankollu, anki jekk jista’ jitqies li l-oqsma li jirrigwardaw ir-relazzjonijiet esterni, it-tkabbir u l-għajnuna umanitarja, li r-rikorrent kien direttament responsabbli għalihom matul il-mandati tiegħu (ara l-punt 32 iktar ’il fuq), ma setgħux jintrabtu ma’ dak tas-saħħa, xorta jibqa’ l-fatt li dan is-sempliċi fatt ma huwiex suffiċjenti bħala tali, fid-dawl tad-differenza fiż-żmien tal-fatti inkwistjoni u tal-assenza ta’ provi konkreti, sabiex il-missjoni msemmija fil-linja bin-Nru 57 tat-tabella ta’ rkupru tkun tista’ tiġi evalwata, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punti 282 u 283 iktar ’il fuq, b’mod li għandu jitqies li l-missjoni msemmija fil-linja bin-Nru 57 tat-tabella ta’ rkupru ma hijiex irregolari.

287

Fir-rigward tal-missjoni msemmija fil-linja bin-Nru 391 tat-tabella ta’ rkupru, il-Qorti tal-Ġustizzja qieset fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li l-Qorti tal-Awdituri ma kienet ipproduċiet ebda dokument speċifiku insostenn tal-allegazzjoni li din il-missjoni kienet tirrigwarda “ikla ta’ nofsinhar privata”. Skont il-Qorti tal-Ġustizzja, il-fatt, li barra minn hekk ma ġiex stabbilit, li l-Membru kkonċernat tal-Kummissjoni huwa sieħeb tal-kaċċa tar-rikorrent ma jistax, bħala tali, jippermetti li tiġi stabbilita n-natura privata tal-ikla inkwistjoni. Barra minn hekk, il-fatt li mexxej ta’ organizzazzjoni li tiġbor fi ħdanha lill-proprjetarji u lill-ġestjonarji tal-artijiet Ewropej kien ipparteċipa wkoll f’din l-ikla ta’ nofsinhar lanqas ma kien, skont il-Qorti tal-Ġustizzja, ta’ natura li jistabbilixxi l-fondatezza tal-pożizzjoni tal-Qorti tal-Awdituri, u dan iktar u iktar fid-dawl tal-fatt li ma kienx ikkontestat li l-lista ta’ parteċipanti għal din l-ikla, li kienet inżammet fis-sede tal-Kummissjoni, ma kinitx ġiet stabbilita mir-rikorrent (sentenza tat‑30 ta’ Settembru 2021, Il-Qorti tal-Awdituri vs Pinxten, C‑130/19, EU:C:2021:782, punti 564 u 565).

288

F’dan il-każ, il-Qorti tal-Awdituri tinvoka sensiela ta’ indizji li jistgħu juru n-natura privata tal-laqgħa msemmija fil-linja bin-Nru 391 tat-tabella ta’ rkupru, b’teħid inkunsiderazzjoni tal-preżenza ta’ żewġ konjuġi ta’ natura li tmur kontra l-kunfidenzjalità rriżervata għad-diskussjonijiet ta’ natura professjonali, tal-eżistenza ta’ laqgħat oħra mal-istess ħames persuni, meqjusa mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), bħala li huma ta’ natura privata, u ta’ interess komuni muri għall-kaċċa kondiviż mill-Membru tal-Kummissjoni li r-rikorrent iltaqa’ miegħu u r-rikorrent.

289

Qabel kollox, fir-rigward tan-natura privata tal-laqgħa inkwistjoni, ikkonstatata mill-OLAF fir-rapport tiegħu, u tal-fatt li l-Membru tal-Kummissjoni kkonċernat u r-rikorrent kellhom komuni interess għall-kaċċa, dawn l-allegazzjonijiet diġà ġew eżaminati mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), hekk kif jixhed il-punt 287 iktar ’il fuq.

290

Sussegwentement, fir-rigward tal-preżenza ta’ żewġ konjuġi, il-Qorti tal-Ġustizzja fakkret, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li n-nota tat‑22 ta’ April 2004 kienet tipprevedi espliċitament li l-konjuġi u l-imsieħba tal-Membri tal-Qorti tal-Awdituri kif ukoll tal-mistednin tagħhom setgħu jiġu mistiedna sabiex jipparteċipaw fl-avvenimenti li għalihom kienu sostnuti spejjeż ta’ rappreżentanza u ta’ ospitalità (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 611).

291

Fl-aħħar nett, fir-rigward tal-laqgħat l-oħra mal-istess ħames persuni li l-Qorti tal-Ġustizzja qieset fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li kienu ta’ natura privata, il-Qorti tal-Awdituri tinvoka l-attività msemmija fil-linja bin-Nru 376 tat-tabella ta’ rkupru. B’dan il-mod, hija tressaq argument ġdid meta mqabbel ma’ dawk eżaminati mill-Qorti tal-Ġustizzja f’dik is-sentenza, imsemmija fil-punt 287 iktar ’il fuq.

292

Madankollu, f’dan ir-rigward, huwa biżżejjed li jiġi osservat li l-attività msemmija fil-linja bin-Nru 376 tat-tabella ta’ rkupru kienet tinvolvi persuni li ma kinux kollha preżenti għall-ikla ta’ nofsinhar meqjusa taħt l-attività msemmija fil-linja bin-Nru 391 tat-tabella ta’ rkupru.

293

Għaldaqstant, l-ispjegazzjonijiet il-ġodda mogħtija mill-Qorti tal-Awdituri u msemmija fil-punt 292 iktar ’il fuq ma humiex suffiċjenti sabiex il-missjoni msemmija fil-linja bin-Nru 391 tat-tabella ta’ rkupru tkun tista’ tiġi evalwata b’mod differenti mill-evalwazzjoni adottata mill-Qorti tal-Ġustizzja fis‑sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punti 282, 287, 290 u 292 iktar ’il fuq, b’mod li, fil-kuntest ta’ din il-proċedura, din il-missjoni għandha titqies li hija regolari.

–

Fuq il‑missjonijiet imsemmija fil‑linji bin-Nri 137, 143, 155 (parzjalment) u 290 tat-tabella ta’ rkupru

294

Fir-rigward tal-missjonijiet imsemmija fil-linji bin-Nri 137, 143, 155 (parzjalment) u 290 tat-tabella ta’ rkupru, dwar il-laqgħat tar-rikorrent mal-President tal-fédération des entreprises belges (il-Federazzjoni tal-Impriżi Belġjani) u l-parteċipazzjoni tiegħu f’forums organizzati minn din il-federazzjoni, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonstatat li r-rwol importanti rrikonoxxut lill-federazzjonijiet ta’ impriżi li għandhom portata nazzjonali kien jimplika li dawn il-missjonijiet ma kellhomx jitqiesu li kienu manifestament irregolari (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 515).

295

F’din il-proċedura, il-Qorti tal-Awdituri tirreferi għall-atti tal-proċess, li jinkludu b’mod partikolari estratt mir-rapport tal-OLAF li minnu jirriżulta li l-maġġoranza ta’ dawn ir-relazzjonijiet kienu jirrigwardaw organi lokali, bħax-chambre de commerce et d’industrie (il-Kamra tal-Kummerċ u tal-Industrija) tar-reġjun ta’ oriġini tar-rikorrent, grupp tal-industrija tal-post ta’ oriġini tar-rikorrent u assoċjazzjoni tal-persuni lokali li jimpjegaw, li l-kamp ta’ azzjoni tagħhom kien limitat għar-reġjun ta’ oriġini tar-rikorrent. (ara wkoll il-punt 116 iktar ’il fuq). F’dan ir-rigward, għandu jiġi kkonstatat li din is-silta mir-rapport tal-OLAF ġiet analizzata mill-Qorti tal-Ġustizzja fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u li l-missjonijiet imsemmija fil-linji bin-Nri 137, 143, 155 (parzjalment) u 290 tat-tabella ta’ rkupru ma kinux jirrigwardaw laqgħat ma’ organi lokali tar-reġjun ta’ oriġini tar-rikorrent, iżda mal-fédération des entreprises belges (il-Federazzjoni tal-Impriżi Belġjani) li għandha portata nazzjonali.

296

Fir-rigward tal-laqgħat tar-rikorrent mal-President tal-fédération des entreprises belges (il-Federazzjoni tal-Impriżi Belġjani), imsemmija fil-linji bin-Nri 137 u 143 tat-tabella ta’ rkupru, il-Qorti tal-Awdituri tippreċiża f’din il-kawża li dawn huma manifestament estranji għall-attivitajiet tal-Qorti tal-Awdituri għal żewġ raġunijiet. Minn naħa, dawn seħħew b’intervall ta’ erba’ ġimgħat biss, waħda fl‑24 ta’ Jannar 2011 u l-oħra fil‑21 ta’ Frar 2011. Min-naħa l-oħra, dan huwa perijodu li matulu l-persuna li r-rikorrent kien iltaqa’ magħha ma baqgħetx il-President ta’ din il-federazzjoni. Hija tippreċiża li, fl-aħħar tax-xahar ta’ Jannar 2011, tħabbar fl-istampa li din il-persuna kienet ser tiġi ssostitwita b’oħra.

297

Madankollu, fid-dawl tal-konstatazzjoni tal-Qorti tal-Ġustizzja ppreċiżata fil-punt 294 iktar ’il fuq, dawn iż-żewġ raġunijiet ma humiex suffiċjenti sabiex jinħoloq dubju dwar in-natura privata tal-laqgħat inkwistjoni u sabiex il-missjonijiet imsemmija fil-linji bin-Nri 137 u 143 tat-tabella ta’ rkupru jkunu jistgħu jiġu evalwati, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

298

Fir-rigward tal-missjonijiet imsemmija fil-linji bin-Nri 155 (parzjalment) u 290 tat-tabella ta’ rkupru, il-Qorti tal-Awdituri tqis li biss attività eżerċitata fl-interess tas-servizz tista’ tiġġustifika ordni ta’ missjoni u r-rimbors tal-ispejjeż relatati. Fil-fehma tagħha, distinzjoni skont il-portata reġjonali jew nazzjonali tal-organi, magħmula mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), ma hijiex ta’ natura li tissodisfa dan ir-rekwiżit. B’mod iktar partikolari, fir-rigward tal-attività koperta mill-missjoni msemmija fil-linja bin-Nru 155, il-Qorti tal-Awdituri tindika li din hija attività ta’ lobby li ma tistax isservi l-interessi u l-attivitajiet tal-Qorti tal-Awdituri, li hija l-awditur estern tal-Unjoni. Hija żżid ukoll li r-rikorrent ma pparteċipax fiha bħala intervenjent.

299

Għandu jiġi kkonstatat li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja ma rrikonoxxietx biss ir-rwol importanti tal-federazzjonijiet ta’ impriżi li għandhom portata nazzjonali. Hija rrilevat ukoll li l-organi li jirrappreżentaw lis-soċjetà ċivili setgħu jesprimu pożizzjonijiet dwar il-funzjonament tal-istituzzjonijiet li setgħu jittieħdu inkunsiderazzjoni mill-Qorti tal-Awdituri waqt it-tfassil ta’ rapporti dwar dan il-funzjonament (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 504). Minn dan isegwi li ma huwiex eskluż li l-parteċipazzjoni f’forums organizzati mill-fédération des entreprises belges (il-Federazzjoni tal-Impriżi Belġjani) tista’ sservi l-interessi u l-attivitajiet tal-Qorti tal-Awdituri. Din il-konklużjoni ma tistax tiġi kkontestata mill-fatt li r-rikorrent ma pparteċipax bħala intervenjent. Fil-fatt, it-teħid inkunsiderazzjoni tal-pożizzjonijiet espressi minn korpi li jirrappreżentaw lis-soċjetà ċivili jista’ jieħu diversi forom, attivi jew passivi.

300

Għaldaqstant, l-argumenti msemmija fil-punt 298 iktar ’il fuq ma humiex suffiċjenti sabiex il-missjonijiet imsemmija fil-linji bin-Nri 155 (parzjalment) u 290 tat-tabella ta’ rkupru jkunu jistgħu jiġu evalwati, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punti 294 u 299 iktar ’il fuq. F’dawn iċ-ċirkustanzi, il-missjonijiet imsemmija f’dawn il-linji għandhom jitqiesu li ma humiex irregolari.

–

Fuq il‑missjonijiet imsemmija fil‑linji bin‑Nri 47, 103, 157, 161, 199, 210, 237, 277, 339 (parzjalment) u 373 u 374 (parzjalment) tat‑tabella ta’ rkupru

301

Fir-rigward tal-missjonijiet imsemmija fil-linji bin-Nri 47, 103, 157, 161, 199, 210, 237, 277, 339 (parzjalment) u 373 u 374 (parzjalment) tat-tabella ta’ rkupru, relatati ma’ laqgħat ma’ uffiċjal ta’ uffiċċju internazzjonali tal-awditjar, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja rrilevat li ma jistax jitqies li missjonijiet intiżi għall-iskambju ma’ mexxejja ta’ uffiċċji internazzjonali tal-awditjar kienu manifestament irregolari (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 494). Bi tweġiba għall-argument tal-Qorti tal-Awdituri bbażat fuq il-fatt li dawn il-kuntatti kellhom ikunu rregolati minn kuntratti pubbliċi jew kellhom iseħħu f’attivitajiet ta’ taħriġ, il-Qorti tal-Ġustizzja kkonstatat li tali prinċipji ma kinux previsti mir-regoli interni li kienet tirreferi għalihom il-Qorti tal-Awdituri u ma kinux jikkorrispondu għall-prassi tagħha, hekk kif kienet tirriżulta mill-ordnijiet ta’ missjoni tar-rikorrent (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 497).

302

B’mod iktar partikolari, fir-rigward tal-missjoni msemmija fil-linja bin-Nru 199 tat-tabella ta’ rkupru, li fir-rigward tagħha l-Qorti tal-Awdituri sostniet li din kellha l-għan reali li tiddiskuti offerta ta’ impjieg li setgħet tinteressa lil wild tar-rikorrent, il-Qorti tal-Ġustizzja qieset li d-dokumenti prodotti mill-Qorti tal-Awdituri ma kinux jippermettu li jintwera, b’mod suffiċjenti fid-dritt, li din il-laqgħa kienet ġiet organizzata għal dan l-għan jew li din kienet tirrigwarda prinċipalment l-interessi tal-familja tar-rikorrent u lanqas, għaldaqstant, li tiġi stabbilita l-irregolarità manifesta ta’ din il-missjoni. Il-Qorti tal-Ġustizzja rrikonoxxiet li, huwa minnu li, mill-ittri elettroniċi kkomunikati mill-Qorti tal-Awdituri kien jirriżulta li l-persuna li r-rikorrent kien iltaqa’ magħha fil-kuntest tal-imsemmija missjoni kienet irċeviet, wara l-laqgħa tagħha mar-rikorrent, il-curriculum vitae ta’ wieħed minn uliedu u kienet indikat possibbiltajiet ta’ impjieg potenzjali għal dan il-wild. Madankollu, il-ġustifikazzjoni pprovduta mir-rikorrent, fis-sens li ikla ta’ nofsinhar tax-xogħol setgħet tkun akkumpanjata minn diskussjonijiet iktar informali dwar, b’mod partikolari, is-sitwazzjoni tal-familja tal-parteċipanti li jistgħu jispjegaw dawn l-ittri elettroniċi, ma kinitx tidher li ma kinitx plawżibbli (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 500 u 501).

303

F’din il-proċedura, il-Qorti tal-Awdituri tfakkar li l-kuntatti ma’ uffiċċji internazzjonali privati ta’ awditjar għandhom jiġu rregolati bħal kull kuntatt ma’ operaturi privati permezz ta’ kuntratti pubbliċi. F’dak li jirrigwarda b’mod iktar partikolari l-laqgħa msemmija fil-linja bin-Nru 199 tat-tabella ta’ rkupru, hija tippreċiża li, fir-rapport tiegħu, l-OLAF qies din il-laqgħa bħala ta’ natura privata, sa fejn din kienet ġiet segwita minn skambju ta’ ittri elettroniċi bejn ir-rikorrent u l-persuna li huwa kien iltaqa’ magħha, li matulu din tal-aħħar kienet irċeviet il-curriculum vitae ta’ wieħed minn ulied ir-rikorrent u kienet indikat possibbiltajiet ta’ impjieg potenzjali għal dan il-wild. Permezz ta’ dawn l-argumenti, f’din il-proċedura, il-Qorti tal-Awdituri ma żżid xejn ġdid meta mqabbla mal-argumenti li hija kienet ressqet quddiem il-Qorti tal-Ġustizzja fil-kawża li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imsemmija fil-punti 301 u 302 iktar ’il fuq.

304

Issa, hekk kif ippreċiżat fil-punti 302 u 303 iktar ’il fuq, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li d-dokumenti prodotti mill-Qorti tal-Awdituri ma kinux jippermettu li jintwera, b’mod suffiċjenti fid-dritt, li l-laqgħa msemmija fil-linja bin-Nru 199 kienet ġiet organizzata għal finijiet privati u kienet tirrigwarda prinċipalment l-interessi tal-familja tar-rikorrent, filwaqt li ma jistax jitqies li missjonijiet intiżi għall-iskambju ma’ mexxejja ta’ uffiċċji internazzjonali tal-awditjar kienu manifestament irregolari.

305

Konsegwentement, l-argumenti msemmija fil-punt 303 iktar ’il fuq ma humiex suffiċjenti sabiex il-missjonijiet imsemmija fil-linji bin-Nri 47, 103, 157, 161, 199, 210, 237, 277, 339 (parzjalment) u 373 u 374 (parzjalment) tat-tabella ta’ rkupru jkunu jistgħu jiġu evalwati, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punti 302 u 303 iktar ’il fuq, b’tali mod li dawn il-missjonijiet għandhom jitqiesu li huma regolari.

–

Fuq il‑missjonijiet imsemmija fil‑linji bin‑Nri 128, 411 u 412 tat‑tabella ta’ rkupru

306

Fir-rigward tal-missjonijiet imsemmija fil-linji bin-Nri 128, 411 u 412 tat-tabella ta’ rkupru, li kienu marbuta ma’ avvenimenti organizzati rispettivament minn organizzazzjoni li tiġbor fi ħdanha lill-proprjetarji u lill-ġestjonarji tal-artijiet Ewropej, minn assoċjazzjoni oħra ta’ proprjetarji tal-artijiet u minn fondazzjoni għall-konservazzjoni tal-habitats, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li dawn ma setgħux jitqiesu li kienu manifestament irregolari. Fir-rigward tal-missjoni msemmija fil-linja bin-Nru 128 tat-tabella ta’ rkupru, il-Qorti tal-Ġustizzja rrilevat li r-rikorrent ma setax jiġi kkritikat bil-parteċipazzjoni, fuq il-bażi ta’ ordni ta’ missjoni trasparenti, f’konferenza organizzata fil-Parlament marbuta ma’ organizzazzjoni rappreżentattiva ta’ dimensjoni Ewropea. Fir-rigward tal-missjonijiet imsemmija fil-linji bin-Nri 411 u 412 tat-tabella ta’ rkupru, il-Qorti tal-Awdituri indikat li l-Qorti tal-Awdituri bbażat ruħha fuq rabtiet preżunti bejn dawn l-organi u fondazzjoni ambjentali tar-reġjun ta’ oriġini tar-rikorrent li ma kinux sostnuti minn provi prodotti lill-Qorti tal-Ġustizzja (ara, f’dan is-sens, is-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punti 534 sa 536).

307

F’din il-proċedura, il-Qorti tal-Awdituri tfakkar il-kunsiderazzjonijiet tagħha li l-avvenimenti inkwistjoni ma kellhomx rabta mal-eżerċizzju tal-funzjonijiet tar-rikorrent jew mal-interess tiegħu, iżda ma tipproduċi ebda prova ġdida sabiex issostni din l-allegazzjoni. Għalhekk, din is-sempliċi allegazzjoni ma hijiex suffiċjenti sabiex dawn il-missjonijiet ikunu jistgħu jiġu evalwati, f’din il-proċedura, bl-istess mod bħal dak adottat mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkar fil-punt 306 iktar ’il fuq. Għaldaqstant, dawn il-missjonijiet għandhom jitqiesu li ma humiex manifestament irregolari.

–

Fuq il‑missjoni msemmija fil‑linja bin‑Nru 347 tat‑tabella ta’ rkupru

308

Fir-rigward tal-missjoni msemmija fil-linja bin-Nru 347 tat-tabella ta’ rkupru, dwar il-laqgħa ma’ mexxej tal-Banque nationale de Belgique (il-Bank Nazzjonali tal-Belġju) kif ukoll ma’ membru parlamentari Belġjan u avukat, li kien jokkupa wkoll funzjonijiet fi ħdan dan il-bank, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja rrilevat li din ma setgħetx tiġi kklassifikata bħala manifestament irregolari abbażi biss tal-allegazzjoni tal-Qorti tal-Awdituri li din il-missjoni kienet “mingħajr rabta mal-funzjonijiet [tar-rikorrent]” u tal-fatt li dan il-membru parlamentari kien membru tal-partit politiku inkwistjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 559).

309

F’din il-proċedura, il-Qorti tal-Awdituri ma tippreżenta ebda element relatat mal-missjoni inkwistjoni, b’tali mod li hemm lok li jitqies, bħall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 308 iktar ’il fuq, li din il-missjoni ma tistax tiġi kklassifikata bħala manifestament irregolari.

–

Fuq il‑missjoni msemmija fil‑linja bin‑Nru 310 tat‑tabella ta’ rkupru

310

F’dak li jirrigwarda l-missjoni msemmija fil-linja bin-Nru 310 tat-tabella ta’ rkupru, li tirrigwarda, parzjalment, żjara f’università, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li, fl-assenza ta’ kwalunkwe preċiżazzjoni mill-Qorti tal-Awdituri fir-rigward tar-raġuni tal-allegata irregolarità, din il-missjoni ma tistax titqies li hija manifestament irregolari, sa fejn din kienet tirrigwarda, parzjalment, żjara f’università (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 558).

311

F’din il-proċedura, il-Qorti tal-Awdituri tqis li l-missjoni msemmija fil-linja bin-Nru 310 tat-tabella ta’ rkupru għandha titqies li ma hijiex relatata mal-interess tas-servizz u, għaldaqstant, li hija irregolari, mingħajr ma tipproduċi provi ġodda li jsostnu din l-allegazzjoni. Madankollu, għandu jitqies, hekk kif għamlet il-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punt 310 iktar ’il fuq), li din l-allegazzjoni ma hijiex suffiċjenti bħala tali sabiex din il-missjoni tkun tista’, fl-assenza ta’ kwalunkwe preċiżazzjoni mill-Qorti tal-Awdituri, titqies li hija manifestament irregolari.

–

Fuq il‑missjoni msemmija fil‑linja bin‑Nru 335 tat‑tabella ta’ rkupru

312

F’dak li jirrigwarda l-missjoni msemmija fil-linja bin-Nru 335 tat-tabella ta’ rkupru, li għandha bħala għan il-parteċipazzjoni fil-funeral ta’ missier assistenta tar-rikorrent, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja nnotat li l-parteċipazzjoni fil-funeral ta’ missier assistenta tar-rikorrent setgħet tintrabat mal-eżerċizzju tal-funzjonijiet ta’ Membru tal-Qorti tal-Awdituri, li seta’ raġonevolment ikun mistenni jagħti l-appoġġ personali tiegħu f’tali okkażjoni lil wieħed mill-kollaboraturi mill-qrib tiegħu fi ħdan l-imsemmija istituzzjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 576).

313

F’din il-proċedura, il-Qorti tal-Awdituri ttenni l-argument tagħha li l-missjoni msemmija fil-linja bin-Nru 335 tat-tabella ta’ rkupru, marbuta mal-funeral ta’ ġenitur tal-assistenta tar-rikorrent, ma setgħetx tagħti lok għall-użu tal-fondi tal-Unjoni, sa fejn il-mewta ta’ ġenitur kienet tappartjeni għall-isfera privata. F’dan ir-rigward, bħall-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 312 iktar ’il fuq, għandu jitqies li dan l-argument ma huwiex suffiċjenti bħala tali sabiex din il-missjoni tkun tista’ titqies li hija irregolari.

–

Fuq il‑missjoni msemmija fil‑linja bin‑Nru 63 tat‑tabella ta’ rkupru

314

Għall-missjoni msemmija fil-linja bin-Nru 63 tat-tabella ta’ rkupru, marbuta ma’ “ċerimonja ta’ ftuħ [ta’] sena akkademika [ta’ stabbiliment ta’ studji Ewropej]”, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fir-rigward tal-argument tal-Qorti tal-Awdituri dwar l-assenza ta’ isem ir-rikorrent fil-lista ta’ personalitajiet Ewropej preżenti għal din iċ-ċerimonja u l-estratt minn sit internet prodott f’dan ir-rigward minnha, il-Qorti tal-Ġustizzja qieset li dan ma kienx jidher suffiċjenti sabiex tiġi stabbilita l-assenza tar-rikorrent fl-imsemmija ċerimonja, fid-dawl kemm tan-natura ta’ dan l-estratt, li ma setax jiġi assimilat ma’ minuti b’lista ta’ preżenza, kif ukoll tat-termini użati fl-imsemmi dokument, li kienu juru li dan kien isemmi biss parti mill-personalitajiet preżenti għall-istess ċerimonja (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 567). Barra minn hekk, il-Qorti tal-Ġustizzja sostniet li, għalkemm kien stabbilit li r-rikorrent, fid-data li fiha kienet inżammet il-missjoni inkwistjoni, kellu ikla ta’ nofsinhar fi Brussell, il-provi prodotti mill-Qorti tal-Awdituri ma kinux jippermettu li jiġi stabbilit il-ħin ta’ din l-ikla (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 568).

315

F’din il-proċedura, il-Qorti tal-Awdituri ssostni li l-missjoni msemmija fil-linja bin-Nru 63 għandha titqies li hija irregolari sa fejn ir-rikorrent, fil-fehma tagħha, ma assistietx għaliha. Hija tirrileva li, fl-istess ħin, ir-rikorrent kellha “ikla ta’ nofsinhar tax-xogħol” fi Brussell ma’ membru ta’ uffiċċju Ministerjali Belġjan. Minn naħa, il-Qorti tal-Awdituri tippreċiża li, sa fejn iċ-ċerimonja inkwistjoni seħħet bejn l‑10:30 u s‑13:00, id-distanza bejn din iċ-ċerimonja u l-ikla ta’ nofsinhar tax-xogħol tiegħu fi Brussell ma kinitx tippermetti li huwa jasal fil-ħin għal ikla ta’ nofsinhar. Hija tispjega li d-distanza bejn il-post taċ-ċerimonja u r-ristorant fi Brussell hija ta’ 99.6 km u li t-tul ta’ vjaġġ mingħajr traffiku jista’ jiġi kkalkolat għal siegħa u tlettax‑il minuta. Min-naħa l-oħra, il-Qorti tal-Awdituri ssostni li l-paġna tas-sit internet tal-istabbiliment ta’ studji Ewropej inkwistjoni li hija tippreżenta tippermetti li jiġi kkonstatat — permezz ta’ deduzzjoni, billi taf ir-regoli protokollari applikabbli għal tali avvenimenti — li r-rikorrent ma kienx preżenti għall-imsemmija ċerimonja. Hija tirreferi wkoll għal video, disponibbli fuq l-istess sit internet, li minnu jirriżulta li, fid-diskors tiegħu, ir-rettur ta’ dan l-istabbiliment kien sellem, fl-ordni protokollari, il-preżenza tal-personalitajiet fiċ-ċerimonja, mingħajr ma semma bl-ebda mod dik tar-rikorrent bħala Membru tal-Qorti tal-Awdituri.

316

Jidher li l-argumenti tal-Qorti tal-Awdituri, imsemmija fil-punt 315 iktar ’il fuq, huma ġodda meta mqabbla ma’ dawk li jsostnu l-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Madankollu, dawn ma humiex suffiċjenti sabiex il-missjoni msemmija fil-linja bin-Nru 63 tat-tabella ta’ rkupru tkun tista’ tiġi evalwata, f’din il-proċedura, b’mod differenti mill-evalwazzjoni adottata mill-Qorti tal-Ġustizzja f’dik is-sentenza. Fil-fatt, l-informazzjoni dwar id-distanza bejn il-post taċ-ċerimonja u l-ikla ta’ nofsinhar tax-xogħol tar-rikorrent fi Brussell ma turix li r-rikorrent ma kienx preżenti għall-imsemmija ċerimonja, fl-assenza ta’ informazzjoni dwar il-ħin tal-ikla ta’ nofsinhar fir-ristorant, hekk kif ikkonstatat mill-Qorti tal-Ġustizzja fl-imsemmija sentenza (ara l-punt 314 iktar ’il fuq). Fir-rigward tal-video li minnu jirriżulta li, fid-diskors tiegħu, ir-rettur tal-istabbiliment inkwistjoni sellem, fl-ordni protokollari, il-preżenza tal-personalitajiet fiċ-ċerimonja mingħajr ebda riferiment għar-rikorrent, dan id-diskors huwa disponibbli fuq l-istess sit internet bħall-estratt indikat fil-punt 315 iktar ’il fuq. F’dan ir-rigward, huwa biżżejjed li jitfakkar li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonstatat li l-estratt inkwistjoni kien isemmi biss parti mill-personalitajiet preżenti għall-istess ċerimonja, b’mod li ma jistax jiġi eskluż li d-diskors tar-rettur kien għamel l-istess. Fl-aħħar nett, ma jistax jiġi eskluż li r-rikorrent kien iddeċieda li jitlaq miċ-ċerimonja qabel ma din intemmet sabiex ikun jista’ jmur fil-ħin għall-imsemmija ikla ta’ nofsinhar fi Brussell.

317

Konsegwentement, fid-dawl tal-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 314 iktar ’il fuq, hemm lok li l-missjoni msemmija fil-linja bin-Nru 63 tat-tabella ta’ rkupru titqies li ma tidhirx li hija manifestament irregolari.

318

Fid-dawl tal-kunsiderazzjonijiet preċedenti, hemm lok li l-Qorti Ġenerali taqbel, fil-kuntest ta’ din il-proċedura, mal-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), dwar l-attivitajiet relatati mal-missjonijiet imsemmija fil-linji bin-Nri 47, 57, 63, 103, 128, 137, 138, 143, 155 (parzjalment), 157, 161, 196, 199, 210, 237, 277, 290, 310 (parzjalment), 335, 339 (parzjalment), 347, 373 u 374 (parzjalment), 382, 391, 411 u 412 tat-tabella ta’ rkupru. Bħall-Qorti tal-Ġustizzja, li qieset li dawn l-attivitajiet ma kellhomx jitqiesu li kienu manifestament irregolari meta mqabbla mal-funzjonijiet tar-rikorrent bħala Membru tal-Qorti tal-Awdituri (ara l-punt 263 iktar ’il fuq), għandu jiġi konkluż li l-ordnijiet ta’ missjoni maħruġa, fuq talba tar-rikorrent, mill-President tal-Qorti tal-Awdituri fir-rigward ta’ dawn l-attivitajiet kienu ta’ natura li jservu ta’ bażi għall-aspettattivi leġittimi tar-rikorrent fir-rigward tar-regolarità tal-missjonijiet ikkonċernati. Għaldaqstant hemm lok li d-deċiżjoni kkontestata tiġi annullata f’dak li jirrigwarda l-ispejjeż tal-missjoni jew tal-allowances ta’ kuljum previsti fl-imsemmija linji, li jammontaw għal total ta’ EUR 2 018.71. F’dan ir-rigward, fir-rigward tal-ispejjeż tal-missjoni u tal-allowances ta’ kuljum imsemmija fil-linji bin-Nri 155, 310, 339 u 373 u 374 tat-tabella ta’ rkupru, għandhom jingħaddu nofs dawn l-ispejjeż fir-rigward tal-missjoni msemmija fil-linja bin-Nru 155 (EUR 48.30), it-tielet parti tal-imsemmija spejjeż li tirrigwarda l-missjoni msemmija fil-linja bin-Nru 310 (EUR 48.30) u r-raba’ parti tal-ispejjeż inkwistjoni fir-rigward tal-missjonijiet imsemmija fil-linji bin-Nri 339 u 373 u 374 (rispettivament EUR 99.57 u EUR 12.075).

319

Ir-raba’ motiv għandu jiġi miċħud f’dak li jirrigwarda l-missjonijiet imsemmija fil-linji bin-Nri 56, 284, 293 u 294, 330 (parzjalment), 331 (parzjalment) u 334 (parzjalment) tat-tabella ta’ rkupru.

iii)

Konklużjoni fuq l‑ispejjeż tal-missjoni u l‑allowances ta’ kuljum

320

Fid-dawl tal-kunsiderazzjonijiet preċedenti, għandu jitqies li, f’din il-proċedura, l-ordnijiet ta’ missjoni maħruġa, fuq talba tar-rikorrent, mill-President tal-Qorti tal-Awdituri fir-rigward tal-attivitajiet imsemmija fil-linji bin-Nri 47, 57, 63, 103, 128, 137, 138, 143, 155 (parzjalment), 157, 161, 196, 199, 210, 237, 277, 290 (parzjalment), 310, 314 u 319, 320, 335 (parzjalment), 339, 347 u 373 (parzjalment), 374, 382, 391 u 412 tat-tabella ta’ rkupru kienu ta’ natura li jservu ta’ bażi għall-aspettattivi leġittimi tar-rikorrent fir-regolarità tal-missjonijiet ikkonċernati. Għaldaqstant, id-deċiżjoni kkontestata għandha tiġi annullata f’dak li jirrigwarda l-ispejjeż tal-missjoni u tal-allowances ta’ kuljum mogħtija għal dawn il-missjonijiet għal ammont totali ta’ EUR 2 211.91 u l-kumplament tar-raba’ motiv li jirrigwarda dawn l-ispejjeż għandu jiġi miċħud.

3)

Fuq l‑ispejjeż ta’ rappreżentanza u ta’ ospitalità

321

Fost it-talbiet tar-rikorrent previsti fil-linji tat-tabella ta’ rkupru msemmija fil-punt 184 iktar ’il fuq, it-talbiet għar-rimbors tal-ispejjeż ta’ rappreżentanza u ta’ ospitalità li l-Qorti tal-Awdituri tqis li indebitament tħallsu mir-rikorrent jirrigwardaw il-linji bin-Nri 1, 2, 4, 5, 6, 7, 12, 14, 17, 19, 22, 23, 24, 27, 55, 56, 57, 63, 65, 89, 90, 96, 98, 110, 111, 116, 138, 150, 160, 168, 171, 183, 184, 190, 194, 196, 204, 216, 218, 236, 243, 245, 257, 276, 279, 281, 284, 290, 293 u 294, 314, 319 u 320, 323, 336, 338, 339, 350, 354, 357, 358, 367, 370, 373 u 374, 381, 382 u 408 tat-tabella ta’ rkupru.

322

Ir-rikorrent iqis, essenzjalment, li t-talbiet għar-rimbors tal-ispejjeż ta’ rappreżentanza previsti fil-linji msemmija fil-punt 321 iktar ’il fuq jirrigwardaw il-funzjonijiet tiegħu bħala Membru tal-Qorti tal-Awdituri. F’dan ir-rigward, huwa jirreferi, essenzjalment, għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), billi jindika li, f’din il-proċedura, għandha tiġi adottata dik l-evalwazzjoni tal-Qorti tal-Ġustizzja. Huwa jqis li din il-proċedura ma tistax tippermetti lill-Qorti tal-Awdituri tikkontesta dak li l-Qorti tal-Ġustizzja ddeċidiet f’dik is-sentenza fid-dawl tal-proċess li ġie ppreżentat lilha u ta’ dak li hija stabbilixxiet fil-fatt u fid-dritt.

323

Preliminarjament, għandu jitfakkar li, f’din il-proċedura, hekk kif ippreċiżat fil-punt 179 iktar ’il fuq, ma hemmx lok li jiġi eżaminat l-allegat ksur tal-prinċipju ta’ protezzjoni tal-aspettattivi leġittimi f’dak li jirrigwarda r-riżorsi użati mill-Qorti tal-Awdituri għall-ispejjeż ta’ rappreżentanza u ta’ ospitalità. Għaldaqstant, fir-rigward ta’ dawn l-ispejjeż, għandha tiġi eżaminata biss il-kwistjoni dwar jekk il-Qorti tal-Awdituri wettqitx “żbalji manifesti” meta qisithom bħala użati għal missjonijiet irregolari.

i)

Fuq l‑ispejjeż ta’ rappreżentanza li jirrigwardaw il‑laqgħat ma’ mexxejja politiċi u ma’ membri tal‑uffiċċji tagħhom, membri tal‑partit politiku inkwistjoni

324

Fost il-linji msemmija fil-punt 321 iktar ’il fuq, diversi huma relatati mar-relazzjonijiet tar-rikorrent ma’ mexxejja politiċi jew ma’ membri tal-uffiċċji tagħhom, li kollha huma membri tal-partit politiku inkwistjoni. Dawn huma l-linji 1, 2, 4, 5, 6, 7, 12, 14, 19, 23, 24, 27, 57, 63, 65, 89, 90, 96, 111, 116, 150, 168, 171, 183, 184, 190, 194, 204, 218, 236, 257, 276, 293 u 294, 323, 336, 338, 350, 354, 357, 358, 367, 370, 373 u 374, 381, 382 (parzjalment) u 408 tat-tabella ta’ rkupru.

325

F’dan ir-rigward, għandu jiġi kkonstatat li ħamsa minn dawn it-talbiet għar-rimbors tal-ispejjeż ta’ rappreżentanza sostnuti fir-rigward ta’ stediniet indirizzati lil dawn il-mexxejja politiċi jew lill-membri tal-uffiċċji tagħhom, jiġifieri dawk imsemmija fil-linji bin-Nri 1, 7, 19, 171 u 336 tat-tabella ta’ rkupru, huma marbuta ma’ talbiet tar-rikorrent għar-rimbors tal-ispejjeż tal-missjoni jew tal-allowances ta’ kuljum. Sa fejn dawn l-ispejjeż tal-aħħar tqiesu mill-Qorti Ġenerali fil-punt 239 iktar ’il fuq bħala li ma għandhomx rabta mal-eżerċizzju tal-funzjonijiet tar-rikorrent bħala Membru tal-Qorti tal-Awdituri, din il-konklużjoni għandha wkoll tiġi trasposta għall-ispejjeż ta’ rappreżentanza sostnuti fil-kuntest tal-missjonijiet ikkonċernati.

326

Fir-rigward tal-linji l-oħra msemmija fil-punt 324 iktar ’il fuq u li huma relatati wkoll mar-relazzjonijiet ma’ mexxejja politiċi jew ma’ membri tal-uffiċċji tagħhom, li kollha huma membri tal-partit politiku inkwistjoni, l-analiżi esposta fil-punti 230 sa 235 u 237 sa 239 iktar ’il fuq tapplika wkoll għar-rimbors tal-ispejjeż ta’ rappreżentanza marbuta ma’ dawn il-linji.

327

Ċertament, hekk kif jippreċiża r-rikorrent, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fir-rigward tal-ispejjeż ta’ rappreżentanza u ta’ ospitalità marbuta mar-relazzjonijiet professjonali li huwa kellu ma’ persuna li tidher, fid-dawl tal-kwalità tagħha, li tista’ tkun ta’ interess għall-Qorti tal-Awdituri, il-Qorti tal-Ġustizzja qieset li stedina indirizzata lil tali persuna kellha titqies li hija regolari (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 618).

328

Madankollu, fid-dawl tal-oneru tal-prova li f’dan il-każ jaqa’ fuq ir-rikorrent, u fl-assenza ta’ spjegazzjonijiet jew ta’ elementi li jistgħu jipprovaw il-kuntrarju, il-kuntest tar-relazzjonijiet tiegħu ma’ mexxejja politiċi jew ma’ membri tal-uffiċċji tagħhom, li kollha huma membri tal-partit politiku inkwistjoni, imfakkar fil-punt 232 iktar ’il fuq, jikkontesta r-rabta ta’ tali relazzjonijiet mal-funzjonijiet tiegħu ta’ Membru tal-Qorti tal-Awdituri (ara l-punt 239 iktar ’il fuq).

329

Konsegwentement, ir-raba’ motiv għandu jiġi miċħud fir-rigward tal-ispejjeż ta’ rappreżentanza relatati mal-linji bin-Nri 1, 2, 4, 5, 6, 7, 12, 14, 19, 23, 24, 27, 57, 63, 65, 89, 90, 96, 111, 116, 150, 168, 171, 183, 184, 190, 194, 204, 218, 236, 257, 276, 293 u 294, 323, 336, 338, 350, 354, 357, 358, 367, 370, 373 u 374, 381, 382 (parzjalment) u 408 tat-tabella ta’ rkupru, sa fejn huwa stabbilit li dawn ma humiex marbuta mal-funzjonijiet tar-rikorrent bħala Membru tal-Qorti tal-Awdituri.

330

F’dawn iċ-ċirkustanzi, ma hemmx iktar lok li jiġu eżaminati l-ammonti tal-ispejjeż ta’ rappreżentanza meqjusa mill-Qorti tal-Awdituri li huma eċċessivi previsti fil-linji msemmija fil-punt 329 iktar ’il fuq, jiġifieri dawk relatati mal-linji bin-Nri 6, 24, 27, 89, 90, 116, 168, 190, 194, 218, 236, 257, 293 u 294, 338, 350, 354, 357, 358, 367, 370, 373 u 374 u 408 tat-tabella ta’ rkupru, li jirrigwardaw l-ikliet ta’ nofsinhar jew ikliet ta’ filgħaxija offruti mir-rikorrent lill-mexxejja politiċi, ukoll membri tal-partit politiku inkwistjoni.

331

Fi kwalunkwe każ, mil-linji msemmija fil-punt 330 iktar ’il fuq jirriżulta li l-ispejjeż tal-ikliet għal żewġ persuni kienu jammontaw għal EUR 124 (linja bin-Nru 350), għal EUR 293.50 (linja bin-Nru 6), għal EUR 482 (linja bin-Nru 24), għal EUR 292 (linja bin-Nru 89), għal EUR 341 (linja bin-Nru 116), għal EUR 225 (linja bin-Nru 194), għal EUR 227 (linja bin-Nru 236), għal EUR 296 (linja bin-Nru 338), għal EUR 226 (linja bin-Nru 354), għal EUR 315 (linja bin-Nru 357), għal EUR 196 (linja bin-Nru 358), għal EUR 338.20 (linja bin-Nru 367), għal EUR 414 (linji bin-Nri 373 u 374) u għal EUR 347 (linja bin-Nru 408), li dawk għal tliet persuni kienu jammontaw għal EUR 753 (linja bin-Nru 27), li dawk għal erba’ persuni kienu jammontaw għal EUR 513 (linja bin-Nru 190), għal EUR 802 (linja bin-Nru 257) u għal EUR 670 (linji bin-Nri 293 u 294), li dawk għal ħames persuni kienu jammontaw għal EUR 564 (linja bin-Nru 168) u li dawk għal sitt persuni kienu jammontaw għal EUR 1 159 (linja bin-Nru 90), għal EUR 630 (linja bin-Nru 218) u għal EUR 1 330 (linja bin-Nru 370).

332

Għandu jiġi rrilevat li dawn l-ammonti jirriżultaw partikolarment għoljin għal spejjeż ta’ ristoranti u li, għalhekk, il-Qorti tal-Awdituri kienet iġġustifikata tqis li dawn kienu a priori manifestament eċċessivi. Peress li r-rikorrent ma joffri ebda spjegazzjoni speċifika sabiex juri n-natura raġonevoli u neċessarja tal-imsemmija ammonti, minkejja li huwa għandu juri li l-ħlas tal-ispejjeż ta’ rappreżentanza mill-baġit tal-Unjoni kien iġġustifikat (ara l-punt 193 iktar ’il fuq), id-deċiżjoni kkontestata ma tistax tiġi annullata minħabba li qieset li dawn l-ispejjeż kienu ġew indebitament sostnuti mill-Qorti tal-Awdituri.

333

Konsegwentement, fid-dawl tal-konstatazzjonijiet tal-OLAF fl-investigazzjoni tiegħu dwar il-frekwenza tal-laqgħat tar-rikorrent ma’ mexxejja politiċi membri tal-partit politiku inkwistjoni (ara l-punt 223 iktar ’il fuq), evalwati fid-dawl tal-kuntest indikat fil-punt 232 iktar ’il fuq, l-argument tar-rikorrent fil-kuntest tar-raba’ motiv intiż li jikkontesta n-natura eċċessiva tal-ispejjeż ta’ rappreżentanza previsti fil-linji msemmija fil-punt 330 iktar ’il fuq għandu jiġi miċħud.

ii)

Fuq l‑ispejjeż ta’ rappreżentanza li jirrigwardaw il‑laqgħat ma’ persuni li ma humiex mexxejja politiċi membri tal‑partit politiku inkwistjoni

334

Fir-rigward tat-talbiet għar-rimbors tal-ispejjeż ta’ rappreżentanza li jifdal, li huma relatati mal-laqgħat tar-rikorrent ma’ persuni li ma humiex mexxejja politiċi, membri tal-partit politiku inkwistjoni, għandu jitfakkar, qabel kollox, hekk kif ippreċiża l-Avukat Ġenerali Hogan fil-konklużjonijiet tiegħu fil-kawża Il‑Qorti tal‑Awdituri vs Pinxten (C‑130/19, EU:C:2020:1052), li l-“kuxjenza finanzjarja” tal-Unjoni timplika neċessarjament li tiġi assunta kull responsabbiltà fir-rigward tal-mod li bih il-Membri tal-Qorti tal-Awdituri jonfqu l-fondi pubbliċi u, konsegwentement, ċertu livell ta’ trasparenza fir-rigward tal-mod ta’ kif dan għandu jsir (konklużjonijiet tal-Avukat Ġenerali Hogan fil-kawża Il‑Qorti tal‑Awdituri vs Pinxten, C‑130/19, EU:C:2020:1052, punt 76).

335

Sussegwentement, mill-Anness 1 tan-nota tat‑22 ta’ April 2004 jirriżulta li, fost l-eżempji ta’ spejjeż aċċettabbli bħala spejjeż ta’ rappreżentanza, hemm ir-“rigali li l-prezz tagħhom ma jistax jaqbeż EUR 50 għal stedina”. Din ir-regola tagħti indikazzjoni dwar l-ammont li jista’ jitqies li huwa raġonevoli fir-rigward tar-rigali li jistgħu jiġu offruti mir-rikorrent lill-persuni li huwa jistieden waqt ikla ta’ nofsinhar jew ikla ta’ filgħaxija.

336

Fl-aħħar nett, hekk kif diġà ġie ppreċiżat fil-punti 193 u 332 iktar ’il fuq, huwa r-rikorrent li għandu juri li l-ħlas tal-ispejjeż ta’ rappreżentanza mill-baġit tal-Unjoni kien iġġustifikat u li d-deċiżjoni kkontestata hija illegali minħabba li qieset li dawn l-ispejjeż kienu indebitament sostnuti mill-Qorti tal-Awdituri.

337

Huwa fid-dawl tal-kunsiderazzjonijiet imfakkra fil-punti 334 sa 336 iktar ’il fuq, kif ukoll tal-portata tal-istħarriġ tal-Qorti Ġenerali f’din il-proċedura, ippreċiżata fil-punti 185 sa 193 iktar ’il fuq, li għandu jiġi eżaminat jekk, hekk kif isostni r-rikorrent, il-Qorti tal-Awdituri wettqitx żbalji ta’ evalwazzjoni fir-rigward tat-talbiet għar-rimbors tal-ispejjeż ta’ rappreżentanza li jirrigwardaw il-laqgħat tiegħu ma’ persuni li ma humiex mexxejja politiċi membri tal-partit politiku inkwistjoni, imsemmija fil-linji bin-Nri 17, 28, 56, 98, 138, 196, 281, 284, 290, 314, 319 u 320, 339 u 382 tat-tabella ta’ rkupru.

338

Fid-dawl tal-kontenut tal-argumenti tar-rikorrent f’dan il-każ, imfakkra fil-punt 322 iktar ’il fuq, u tal-osservazzjonijiet tal-Qorti Ġenerali fil-punti 202 sa 205 iktar ’il fuq, għandu, fil-kuntest tal-eżami tat-talbiet għar-rimbors tal-ispejjeż ta’ rappreżentanza msemmija fil-punt 337 iktar ’il fuq, jiġi segwit ir-raġunament li jinsab fil-punti 220 u 264 iktar ’il fuq. Għaldaqstant, għandu qabelxejn jiġi eżaminat jekk il-Qorti tal-Awdituri tressaqx argumenti u preċiżazzjonijiet ġodda meta mqabbla ma’ dawk li hija kienet ressqet quddiem il-Qorti tal-Ġustizzja fir-rigward ta’ dawn it-talbiet u sussegwentement, fl-affermattiv, li jiġi evalwat jekk, fid-dawl ta’ dawn l-elementi, hemmx lok li tiġi kondiviża, fil-kuntest ta’ din il-proċedura, l-istess evalwazzjoni bħal dik adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fir-rigward tagħhom (ara l-punt 205 iktar ’il fuq).

–

Fuq l‑ispejjeż ta’ rappreżentanza msemmija fil‑linji bin‑Nri 56, 138, 196, 284 u 382 tat‑tabella ta’ rkupru

339

L-ispejjeż ta’ rappreżentanza msemmija fil-linji bin-Nri 138, 196 u 382 tat-tabella ta’ rkupru jirrigwardaw l-ikliet ta’ filgħaxija li kellhom l-għan li jippermettu lill-imprendituri tar-Reġjun ta’ Vlaanderen jiltaqgħu ma’ diplomatiċi Belġjani f’pożizzjoni barra mill-pajjiż, dawk imsemmija fil-linja bin-Nru 56 jirrigwardaw ikla ta’ nofsinhar ma’ diplomat tal-Federazzjoni Russa u dawk imsemmija fil-linja bin-Nru 284 huma marbuta ma’ stedina mill-ambaxxatur tar-Renju tal-Belġju fi Franza, indirizzata lil ħames persuni, fosthom ir-rikorrent u l-konjuġi tiegħu.

340

Ir-rikorrent jirreferi essenzjalment għall-evalwazzjoni tal-Qorti tal-Ġustizzja fil-proċedura li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). Fl-imsemmija proċedura, il-Qorti tal-Ġustizzja qieset li l-laqgħat ma’ diplomatiċi, imsemmija fil-linji bin-Nri 56, 138, 284 u 382 tat-tabella ta’ rkupru, kellhom jitqiesu li huma regolari, peress li kien ġie kkonstatat li l-irregolarità tal-missjonijiet li matulhom kienu ġew sostnuti dawn l-ispejjeż ma kinitx ġiet stabbilita mill-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 643). L-istess japplika għal-laqgħa msemmija fil-linja bin-Nru 196, fid-dawl tal-konklużjoni tal-Qorti tal-Ġustizzja li l-Qorti tal-Awdituri ma kinitx stabbilixxiet b’mod suffiċjenti fid-dritt li din kienet ta’ natura privata (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 569 u 572 sa 574).

341

F’din il-proċedura, il-Qorti tal-Awdituri tqis li l-ikliet ta’ filgħaxija msemmija fil-linji bin-Nri 138, 196 u 382 tat-tabella ta’ rkupru u l-ikla ta’ nofsinhar imsemmija fil-linji bin-Nri 56 u 284 kienu ta’ natura privata. Fil-fehma tagħha, l-ikliet ta’ filgħaxija msemmija fil-linji bin-Nri 138, 196 u 382 kellhom l-għan li jippermettu lill-imprendituri tar-Reġjun ta’ Vlaanderen jiltaqgħu ma’ diplomatiċi Belġjani f’pożizzjoni barra mill-pajjiż, l-ikla ta’ nofsinhar imsemmija fil-linja bin-Nru 56 ma’ diplomat tal-Federazzjoni Russa kienet marbuta ma’ diskussjonijiet sabiex tiġi ffaċilitata proċedura ta’ adozzjoni ta’ wild ta’ nazzjonalità Russa minn koppja ta’ ħbieb tar-rikorrent ta’ nazzjonalità Belġjana u l-ikla ta’ nofsinhar imsemmija fil-linja bin-Nru 284 kienet tirrigwarda stedina mill-ambaxxatur tar-Renju tal-Belġju fi Franza, indirizzata lil ħames persuni, fosthom ir-rikorrent u l-konjuġi tiegħu, għal tmiem il-ġimgħa fir-residenza tiegħu f’Pariġi, fl-okkażjoni ta’ degustazzjoni ta’ nbejjed, li fil-kuntest tagħha r-rikorrent kien ħallas l-ikla ta’ nofsinhar u organizza l-kunsinna ta’ bukkett fjuri f’isem il-mistednin kollha. Barra minn hekk, mill-proċess jirriżulta li l-Qorti tal-Awdituri tqis bħala eċċessiv l-ammont tal-ikla ta’ nofsinhar msemmija fil-linja bin-Nru 284.

342

F’dan ir-rigward, fir-rigward tan-natura privata tal-laqgħat imsemmija fil-linji bin-Nri 138, 196 u 382 tat-tabella ta’ rkupru, huwa biżżejjed li jsir riferiment għall-punti 266 sa 270 iktar ’il fuq, li jikkonkludu favur l-applikazzjoni, fil-kuntest ta’ din il-proċedura, tal-evalwazzjoni magħmula f’dan ir-rigward mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), u mfakkra fil-punti 266 u 269 iktar ’il fuq. Sa fejn, għaldaqstant, dawn il-laqgħat ma għandhomx jitqiesu li huma manifestament irregolari fir-rigward tal-funzjonijiet tar-rikorrent bħala Membru tal-Qorti tal-Awdituri (ara l-punt 263 iktar ’il fuq), għandu jiġi konkluż li, billi qieset li l-imsemmija laqgħat huma ta’ natura privata u billi talbet l-irkupru tal-ispejjeż ta’ rappreżentanza marbuta magħhom, il-Qorti tal-Awdituri wettqet żball ta’ evalwazzjoni.

343

Għall-kuntrarju, fir-rigward tal-laqgħat imsemmija fil-linji bin-Nri 56 u 284 tat-tabella ta’ rkupru, l-ispejjeż tal-missjonijiet marbuta ma’ dawn il-laqgħat tqiesu mill-Qorti Ġenerali li huma irregolari fil-punt 281 iktar ’il fuq. Konsegwentement, l-ispejjeż ta’ rappreżentanza relatati ma’ dawn il-missjonijiet huma wkoll irregolari u għalhekk ma għandhomx jiġu imposti fuq il-Qorti tal-Awdituri.

344

Fid-dawl tal-kunsiderazzjonijiet preċedenti, hemm lok, minn naħa, li d-deċiżjoni kkontestata tiġi annullata f’dak li jirrigwarda t-talbiet għar-rimbors tal-ispejjeż ta’ rappreżentanza relatati mal-linji bin-Nri 138, 196 u 382 tat-tabella ta’ rkupru, għal ammont ta’ EUR 382 u, min-naħa l-oħra, li r-raba’ motiv jiġi miċħud f’dak li jirrigwarda l-ispejjeż ta’ rappreżentanza relatati mal-linji bin-Nri 56 u 284 tat-tabella ta’ rkupru.

–

Fuq l‑ispejjeż ta’ rappreżentanza msemmija fil‑linji bin‑Nri 17, 28 u 290 tat‑tabella ta’ rkupru

345

L-ispejjeż ta’ rappreżentanza msemmija fil-linji bin-Nri 17, 28 u 290 tat-tabella ta’ rkupru jirrigwardaw l-ikliet ta’ nofsinhar, rispettivament, ma’ uffiċjal amministrattiv għoli, ma’ President ta’ ragruppament li jirrappreżenta l-interessi tal-persuni li jimpjegaw ta’ impriżi privati fi ħdan l-Unjoni u ma’ uffiċjal ta’ uffiċċju internazzjonali tal-awditjar.

346

Ir-rikorrent jirreferi, essenzjalment, għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). F’dan ir-rigward, il-Qorti tal-Ġustizzja qieset li l-Qorti tal-Awdituri ma kienx irnexxilha turi li t-talbiet għar-rimbors tal-ispejjeż ta’ rappreżentanza relatati mal-linji msemmija fil-punt 345 iktar ’il fuq kienu jirrigwardaw spejjeż li ma kinux ġew sostnuti fil-kwalità tiegħu ta’ Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 639). Fir-rigward tal-ispejjeż imsemmija fil-linja bin-Nru 17, il-Qorti tal-Ġustizzja rrilevat li stedina indirizzata lil uffiċjal amministrattiv f’livell għoli ta’ tmexxija responsabbli għall-presidenza ta’ kumitat fi ħdan id-direction du Service public fédéral – Finances (id-Direttorat tas-Servizz Pubbliku Federali – Finanzi, il-Belġju) kellha, fl-assenza ta’ provi tan-natura privata ta’ din l-istedina, titqies li taqa’ taħt din il-kategorija (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 640). Fl-opinjoni tagħha, l-istess kien japplika għall-ispejjeż imsemmija fil-linji bin-Nri 28 u 290 sa fejn stediniet indirizzati rispettivament lid-Direttur ta’ ragruppament rappreżentattiv ta’ dimensjoni Ewropea u lil uffiċjal ta’ uffiċċju internazzjonali tal-awditjar setgħu jkunu marbuta mal-funzjonijiet ta’ Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 642).

347

F’din il-proċedura, il-Qorti tal-Awdituri tqis li l-ispejjeż ta’ rappreżentanza msemmija fil-linji bin-Nri 17, 28 u 290 tat-tabella ta’ rkupru għandhom jitqiesu li huma sostnuti fil-kuntest ta’ laqgħat li ma humiex relatati mal-interess tas-servizz u, għaldaqstant, irregolari.

348

Qabelxejn, fir-rigward tal-ispejjeż ta’ rappreżentanza li jikkorrispondu għal-linja bin-Nru 290 tat-tabella ta’ rkupru, huwa biżżejjed li jsir riferiment għall-punti 297 u 300 iktar ’il fuq, li permezz tagħhom ġie konkluż li l-missjonijiet relatati ma kinux manifestament irregolari, b’mod li l-ispejjeż ta’ rappreżentanza relatati jistgħu jkunu s-suġġett tal-istess evalwazzjoni.

349

Sussegwentement, fir-rigward tal-ispejjeż ta’ rappreżentanza sostnuti għal-laqgħa msemmija fil-linja bin-Nru 17 tat-tabella ta’ rkupru, insostenn tan-natura estranja ta’ din l-attività għall-funzjonijiet tar-rikorrent, il-Qorti tal-Awdituri tinvoka l-fatt li din seħħet fil-kuntest ta’ “missjoni mingħajr kumpens”, fatt li, fil-fehma tagħha, jindika li, f’moħħ ir-rikorrent, din kienet intiża, bħala definizzjoni, għal raġunijiet privati.

350

Madankollu, għal ordni ta’ missjoni “mingħajr kumpens”, għandu jitfakkar li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782), il-Qorti tal-Ġustizzja eżaminat l-argument tal-Qorti tal-Awdituri fis-sens li r-rikorrent kien irrikonoxxa, waqt is-smigħ tiegħu mill-OLAF, li l-missjonijiet kollha li, fit-talbiet għal ordni ta’ missjoni, kienu ppreżentati espliċitament bħala “missjonijiet mingħajr kumpens”, ma kellhom ebda rabta mal-funzjonijiet tiegħu. F’dan ir-rigward, il-Qorti tal-Ġustizzja kkonstatat li mill-minuti ta’ dan is-smigħ kien jirriżulta li r-rikorrent kien iddikjara biss li huwa kien jirrikorri għal tali preżentazzjoni ta’ dawn it-talbiet, għal finijiet ta’ trasparenza, meta missjoni “kellha għan marbut mal-funzjoni [tiegħu] iżda wkoll aspett privat” jew meta huwa kellu “dubju dwar in-natura opportuna” tal-missjoni fid-dawl tal-għan u tal-importanza tal-attività inkwistjoni. Il-Qorti tal-Ġustizzja kkonkludiet li l-missjonijiet ippreżentati espliċitament mir-rikorrent bħala “missjonijiet mingħajr kumpens” kellhom jiġu eżaminati bl-istess mod bħall-missjonijiet l-oħra li kienu s-suġġett tal-ewwel ilment invokat mill-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 393 sa 395). Fid-dawl ta’ din l-evalwazzjoni tal-Qorti tal-Ġustizzja, l-argument uniku tal-Qorti tal-Awdituri bbażat fuq l-allegazzjoni li l-ispejjeż ta’ rappreżentanza kienu marbuta ma’ “missjoni mingħajr kumpens” ma huwiex suffiċjenti sabiex il-laqgħa marbuta mal-ispejjeż ta’ rappreżentanza msemmija fil-linja bin-Nru 17 tat-tabella ta’ rkupru tkun tista’ tkun is-suġġett, f’din il-proċedura, ta’ evalwazzjoni differenti minn dik adottata mill-Qorti tal-Ġustizzja, imfakkra fil-punt 346 iktar ’il fuq, b’mod li hemm lok li din tiġi applikata fil-kuntest ta’ din il-proċedura u li jitqies li dawn l-ispejjeż għandhom jiġu sostnuti mill-Qorti tal-Awdituri.

351

Fl-aħħar nett, fir-rigward tal-ispejjeż ta’ rappreżentanza marbuta mal-laqgħa tar-rikorrent mad-Direttur ta’ ragruppament rappreżentattiv ta’ dimensjoni Ewropea, imsemmija fil-linja bin-Nru 28 tat-tabella ta’ rkupru, il-Qorti tal-Awdituri tirreferi għall-atti tal-proċess, li jinkludu b’mod partikolari estratt mir-rapport tal-OLAF li minnu jirriżulta li din il-laqgħa kienet ta’ natura privata.

352

Għandu jiġi kkonstatat li din is-silta mir-rapport tal-OLAF kienet tagħmel parti mill-proċess quddiem il-Qorti tal-Ġustizzja fil-kawża li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), sa fejn, hekk kif ikkonstatat fil-punt 166 iktar ’il fuq, f’dik l-aħħar proċedura u f’din il-proċedura, l-irregolaritajiet allegati mill-Qorti tal-Awdituri kontra r-rikorrent huma identifikati permezz tal-istess tabella, li tinsab fl-Anness A.47 taż-żewġ rikorsi. Għaldaqstant, il-Qorti tal-Awdituri ma żżid xejn ġdid fir-rigward tal-argumenti li hija kienet ippreżentat quddiem il-Qorti tal-Ġustizzja f’dik il-kawża. F’dawn iċ-ċirkustanzi, hija l-Qorti tal-Awdituri li għandha ssostni l-ispejjeż ta’ rappreżentanza marbuta mal-laqgħa msemmija fil-linja bin-Nru 28 tat-tabella ta’ rkupru, li ma hijiex manifestament irregolari.

353

Fid-dawl tal-kunsiderazzjonijiet preċedenti, għandu jiġi konkluż li, billi qieset li l-laqgħat imsemmija fil-linji bin-Nru 17, 28 u 290 tat-tabella ta’ rkupru huma estranji għall-interess tas-servizz u billi talbet l-irkupru tal-ispejjeż ta’ rappreżentanza marbuta magħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda t-talbiet għar-rimbors tal-ispejjeż ta’ rappreżentanza msemmija fil-linji bin-Nri 17, 28 u 290 tat-tabella ta’ rkupru, għal ammont ta’ EUR 608.80.

–

Fuq l‑ispejjeż ta’ rappreżentanza msemmija fil‑linji bin‑Nri 314 u 319 u 320 tat‑tabella ta’ rkupru

354

Fir-rigward tal-ispejjeż ta’ rappreżentanza msemmija fil-linji bin-Nri 314 u 319 u 320 tat-tabella ta’ rkupru, li jirrigwardaw ir-relazzjonijiet ma’ mexxejja politiċi, li ma kinux membri tal-partit politiku inkwistjoni, hemm lok li tiġi adottata fir-rigward tagħhom l-evalwazzjoni li tinsab fil-punti 241 sa 251 iktar ’il fuq.

355

Għaldaqstant, f’dan il-każ, bħall-evalwazzjoni adottata f’dan ir-rigward mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punti 243 u 250 iktar ’il fuq), billi qieset bħala regolari l-ispejjeż ta’ rappreżentanza msemmija fil-linja bin-Nru 314 u bħala li ma kinux manifestament irregolari l-ispejjeż ta’ rappreżentanza msemmija fil-linji bin-Nri 319 u 320, għandu jiġi konkluż li l-Qorti tal-Awdituri wettqet żball ta’ evalwazzjoni meta qieset li l-laqgħat marbuta ma’ dawn l-ispejjeż kienu irregolari u talbet l-irkupru tagħhom. Konsegwentement, hemm lok li d-deċiżjoni kkontestata tiġi annullata f’dak li jirrigwarda t-talbiet għar-rimbors tal-ispejjeż ta’ rappreżentanza relatati mal-linji bin-Nri 314 u 319 u 320 tat-tabella ta’ rkupru, għal ammont ta’ EUR 209.40.

–

Fuq l‑ispejjeż ta’ rappreżentanza msemmija fil‑linja bin‑Nru 339 tat‑tabella ta’ rkupru

356

L-ispejjeż ta’ rappreżentanza msemmija fil-linja bin-Nru 339 tat-tabella ta’ rkupru jirrigwardaw laqgħa mal-kap tal-uffiċċju tar-Roi des Belges (ir-Re tal-Belġjani).

357

Ir-rikorrent jirreferi essenzjalment għall-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li fiha l-Qorti tal-Ġustizzja qieset li l-funzjonijiet okkupati mill-persuna li r-rikorrent kien iltaqa’ magħha kienu jiġġustifikaw ir-regolarità tar-rimborsi tal-ispejjeż ta’ rappreżentanza mitluba minnu (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 625).

358

F’din il-proċedura, insostenn tal-assenza ta’ rabta tal-laqgħa inkwistjoni mal-funzjonijiet tar-rikorrent bħala Membru tal-Qorti tal-Awdituri, il-Qorti tal-Awdituri tibbaża ruħha fuq l-istatus tal-persuna li r-rikorrent kien iltaqa’ magħha. Dan l-argument ma huwiex differenti minn dak imressaq quddiem il-Qorti tal-Ġustizzja fil-kawża li tat lok għas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), b’mod li hemm lok li, fil-kuntest ta’ din il-proċedura, tiġi adottata l-evalwazzjoni tal-Qorti tal-Ġustizzja dwar l-ispejjeż ta’ rappreżentanza msemmija fil-linja bin-Nru 339 tat-tabella ta’ rkupru, imfakkra fil-punt 357 iktar ’il fuq.

359

Konsegwentement, għandu jiġi konkluż li r-rimborsi tal-ispejjeż ta’ rappreżentanza koperti mil-linja bin-Nru 339 tat-tabella ta’ rkupru huma regolari, b’mod li, billi rrikjediet l-irkupru tagħhom, il-Qorti tal-Awdituri wettqet żball ta’ evalwazzjoni.

360

Madankollu, il-Qorti tal-Awdituri tqis li l-ispejjeż relatati ma’ ikla ta’ filgħaxija għal żewġ persuni li jammontaw għal EUR 158 kienu eċċessivi. F’dan ir-rigward, għandu jiġi kkonstatat li r-rikorrent ma jippreżenta ebda osservazzjoni dwar in-natura raġonevoli tal-imsemmi ammont, minkejja li huwa għalih li jikkonfuta l-ilment ifformulat f’dan ir-rigward mill-Qorti tal-Awdituri. (ara l-punt 336 iktar ’il fuq).

361

F’dawn iċ-ċirkustanzi, u fid-dawl tal-osservazzjonijiet li jinsabu fil-punt 335 iktar ’il fuq, hemm lok li l-ammont tal-ispejjeż ta’ rappreżentanza msemmija fil-linja bin-Nru 339 tat-tabella ta’ rkupru jitqies li huwa eċċessiv u li l-ammont ta’ EUR 50 għal kull persuna jiġi ffissat bħala ġġustifikat għall-ispejjeż ta’ rappreżentanza sostnuti minn Membru tal-Qorti tal-Awdituri, fatt li jikkorrispondi f’dan il-każ għal ammont ta’ EUR 100.

362

Fid-dawl tal-kunsiderazzjonijiet preċedenti, hemm lok li d-deċiżjoni kkontestata tiġi annullata f’dak li jirrigwarda t-talba għar-rimbors tal-ispejjeż ta’ rappreżentanza msemmija fil-linja bin-Nru 339 tat-tabella ta’ rkupru, sa fejn din tirrigwarda l-ispejjeż ta’ rappreżentanza għal ammont ta’ EUR 100. Ir-raba’ motiv għandu jiġi miċħud fir-rigward tal-bqija tal-ispejjeż ta’ rappreżentanza msemmija fil-linja bin-Nru 339 tat-tabella ta’ rkupru.

–

Fuq l‑ispejjeż ta’ rappreżentanza msemmija fil‑linji bin‑Nri 98 u 281 tat‑tabella ta’ rkupru

363

L-ispejjeż ta’ rappreżentanza msemmija fil-linji bin-Nri 98 u 281 tat-tabella ta’ rkupru jirrigwardaw, rispettivament, ikla ta’ filgħaxija ma’ kap tal-uffiċċju ta’ Membru tal-Kummissjoni u ikla ta’ filgħaxija ma’ Membru tal-Qorti tal-Awdituri, Membru tal-Gvern Belġjan u “Direttur ta’ uffiċċju”.

364

Ir-rikorrent jirreferi, essenzjalment, għall-evalwazzjoni magħmula mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). F’dan ir-rigward, minn naħa, il-Qorti tal-Ġustizzja qieset, fir-rigward tal-ispejjeż sostnuti għal ikla ta’ filgħaxija mal-kap tal-uffiċċju ta’ Membru tal-Kummissjoni msemmija fil-linja bin-Nru 98 tat-tabella ta’ rkupru, li dawn l-ispejjeż kellhom, bħala prinċipju, fid-dawl tal-funzjonijiet eżerċitati mill-mistieden, jitqiesu li huma sostnuti fil-kwalità ta’ Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 644). Fil-fehma tagħha, il-provi prodotti f’dan ir-rigward mill-Qorti tal-Awdituri ma kinux suffiċjenti sabiex tiġi stabbilita l-fondatezza tal-allegazzjoni tagħha li din l-ikla kienet ta’ natura privata (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 645). Hija rrilevat li, għalkemm il-Qorti tal-Awdituri invokat skambju ta’ ittri elettroniċi tal‑20 ta’ Mejju 2010, madankollu minn dan l-iskambju kien jirriżulta li l-kwistjonijiet speċifiċi msemmija fih kienu ġew solvuti qabel din l-ikla u li ebda element ma kien jindika li dawn kienu s-suġġett tal-imsemmija ikla (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 646). Barra minn hekk, hija qieset li l-argument tal-Qorti tal-Awdituri li l-ispiża tal-ikla inkwistjoni kienet timplika ksur, mill-persuna mistiedna, tal-obbligi imposti fuqha skont l-Artikolu 11 tar-Regolamenti tal-Persunal ma kienx, fi kwalunkwe każ, ta’ natura li jistabbilixxi n-natura privata ta’ din l-ikla.

365

F’dawn il-proċeduri, fir-rigward tan-natura politika tal-laqgħa msemmija fil-linja bin-Nru 98 tat-tabella ta’ rkupru, il-Qorti tal-Awdituri tirrileva li huma l-affinitajiet politiċi li jorbtu lir-rikorrent mal-kap tal-uffiċċju inkwistjoni li huma s-sinjali tan-natura privata tal-missjoni. F’dan ir-rigward, hija tirreferi għal skambju ta’ ittri elettroniċi tal‑20 ta’ Mejju 2010 inklużi fil-proċess u relatati mal-organizzazzjoni ta’ din l-ikla ta’ filgħaxija, li fihom il-persuna li r-rikorrent kien iltaqa’ magħha kienet użat il-kliem “bit-tislijiet l-iktar blu tiegħi”, fatt li, skont il-Qorti tal-Awdituri, huwa allużjoni għall-kulur assoċjat fir-Reġjun ta’ Vlaanderen (il-Belġju) mal-partit politiku inkwistjoni. Il-Qorti tal-Awdituri tindika wkoll li d-dokumenti maqbuda mill-OLAF jippermettu fi kwalunkwe każ li jiġi stabbilit li l-laqgħa inkwistjoni ma kinitx tirrigwarda kwistjonijiet marbuta mal-funzjonijiet tar-rikorrent.

366

Il-Qorti tal-Awdituri żżid li l-persuna li r-rikorrent kien iltaqa’ magħha kienet il-kap tal-uffiċċju ta’ Membru tal-Kummissjoni Belġjan, membru tal-partit politiku inkwistjoni. Fid-dawl tal-użu mill-persuna li r-rikorrent iltaqa’ magħha, fl-ittri elettroniċi tal‑20 ta’ Mejju 2010, tal-kliem “bit-tislijiet l-iktar blu tiegħi”, jidher li din kienet ukoll membru ta’ dan il-partit politiku.

367

Fid-dawl tal-kuntest tar-relazzjonijiet tar-rikorrent ma’ mexxejja politiċi, membri tal-partit politiku inkwistjoni, deskritt fil-punt 232 iktar ’il fuq, li hemm lok li jitqies li ma għandux rabta mal-funzjonijiet tiegħu ta’ Membru tal-Qorti tal-Awdituri (ara l-punt 239 iktar ’il fuq), l-argument tal-Qorti tal-Awdituri msemmi fil-punt 366 iktar ’il fuq huwa biżżejjed sabiex inissel dubju dwar in-natura uffiċjali tal-laqgħa inkwistjoni. Mingħajr preċiżazzjonijiet oħra f’dan ir-rigward min-naħa tar-rikorrent, li madankollu għandu l-oneru tal-prova, l-ispejjeż ta’ rappreżentanza assoċjati u msemmija fil-linja bin-Nru 98 tat-tabella ta’ rkupru għandhom jiġu sostnuti minnu.

368

Konsegwentement, ir-raba’ motiv għandu jiġi miċħud f’dak li jirrigwarda l-ispejjeż ta’ rappreżentanza msemmija fil-linja bin-Nru 98 tat-tabella ta’ rkupru.

369

Min-naħa l-oħra, fir-rigward ta’ ikla ta’ filgħaxija ma’ Membru tal-Qorti tal-Awdituri, Membru tal-Gvern Belġjan u “Direttur ta’ Uffiċċju”, imsemmija fil-linja bin-Nru 281 tat-tabella ta’ rkupru, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li, sa fejn l-Artikolu 2 tad-Deċiżjoni Nru 7‑2004 kien jeżiġi biss indikazzjoni tal-mistieden prinċipali sabiex jiġi ġġustifikat l-infiq ta’ spejjeż ta’ rappreżentanza, il-preżenza ta’ mistieden addizzjonali, li l-kwalità tiegħu ma kinitx tiġġustifika waħedha tali spiża, ma kinitx suffiċjenti sabiex tiġi stabbilita l-irregolarità tat-talba kollha għar-rimbors tal-ispejjeż ta’ rappreżentanza inkwistjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 627).

370

F’din il-proċedura, għandu jiġi kkonstatat li jidher li l-Qorti tal-Awdituri indikat bħala l-mistieden prinċipali għall-ikla ta’ filgħaxija Membru tal-Gvern Belġjan. Issa, mill-proċess jirriżulta li din il-persuna kienet membru tal-partit politiku inkwistjoni li favurih ir-rikorrent kien jeżerċita attività politika mhux iddikjarata. Sa fejn ġie konkluż fil-punt 240 iktar ’il fuq li, fil-kuntest deskritt fil-punt 233 iktar ’il fuq, il-missjonijiet li jirrigwardaw il-laqgħat tar-rikorrent ma’ mexxejja politiċi Belġjani, membri ta’ dan il-partit politiku kellhom jitqiesu li ma kellhomx rabta mal-eżerċizzju tal-funzjonijiet tiegħu bħala Membru tal-Qorti tal-Awdituri, hemm lok li din is-soluzzjoni tiġi trasposta f’dak li jirrigwarda t-talba għar-rimbors tal-ispejjeż ta’ rappreżentanza sostnuti għal-laqgħa msemmija fil-linja bin-Nru 281.

371

Konsegwentement, it-talbiet għar-rimbors tal-ispejjeż ta’ rappreżentanza sostnuti fir-rigward tal-ikliet ta’ filgħaxija msemmija fil-linji bin-Nri 98 u 281 tat-tabella ta’ rkupru għandhom jitqiesu li huma marbuta mal-attività politika mhux iddikjarata tar-rikorrent, inkompatibbli mal-funzjonijiet tiegħu ta’ Membru tal-Qorti tal-Awdituri. Għaldaqstant, ir-raba’ motiv għandu jiġi miċħud f’dan ir-rigward.

372

F’dawn iċ-ċirkustanzi, ma hemmx iktar lok li jiġi eżaminat l-argument tal-Qorti tal-Awdituri dwar in-natura eċċessiva tal-ammonti tal-ispejjeż ta’ rappreżentanza msemmija fil-linji bin-Nri 98 u 281 tat-tabella ta’ rkupru.

373

Fi kwalunkwe każ, għandu jiġi osservat li huwa inkwistjoni ammont ta’ EUR 799 għal ikla ta’ filgħaxija ma’ żewġ persuni, imsemmija fil-linja bin-Nru 98 tat-tabella ta’ rkupru, u ta’ EUR 685 għal ikla ta’ filgħaxija ma’ tliet persuni, imsemmija fil-linja bin-Nru 281 tat-tabella ta’ rkupru. F’dan ir-rigward, ir-rikorrent ma jippreżenta ebda osservazzjoni dwar in-natura raġonevoli tal-imsemmija ammonti, minkejja li huwa għandu jipproduċi provi f’dan ir-rigward (ara l-punt 336 iktar ’il fuq).

374

F’dawn iċ-ċirkustanzi, fid-dawl tal-konstatazzjonijiet li jinsabu fir-rapport tal-OLAF dwar il-frekwenza tal-laqgħat tar-rikorrent ma’ mexxejja politiċi, membri tal-partit politiku inkwistjoni, imfakkra fil-punt 223 iktar ’il fuq, li għandhom jiġu evalwati fid-dawl tal-kuntest indikat fil-punt 232 iktar ’il fuq, in-natura eċċessiva tal-ispejjeż ta’ rappreżentanza msemmija fil-linji bin-Nri 98 u 281 tat-tabella ta’ rkupru hija stabbilita u hemm lok ukoll li r-raba’ motiv jiġi miċħud f’dan ir-rigward.

–

Konklużjoni fuq l‑ispejjeż ta’ rappreżentanza marbuta mal‑laqgħat ma’ persuni oħra

375

Fid-dawl tal-kunsiderazzjonijiet preċedenti, hemm lok li d-deċiżjoni kkontestata tiġi annullata, sa fejn din tirrigwarda ammont totali ta’ EUR 1 300.20 maqsum kif ġej:

–

it-talbiet għar-rimbors tal-ispejjeż ta’ rappreżentanza relatati mal-laqgħat imsemmija fil-linji bin-Nri 17, 28, 196, 138, 290, 314, 319 u 320 u 382 tat-tabella ta’ rkupru, li jammontaw għal total ta’ EUR 1 200.20,

–

it-talba għar-rimbors tal-ispejjeż ta’ rappreżentanza relatati mal-linja bin-Nru 339 tat-tabella ta’ rkupru, li tammonta għal EUR 100.

376

Ir-raba’ motiv għandu jiġi miċħud f’dak li jirrigwarda l-kumplament ta’ dawn l-ispejjeż ta’ rappreżentanza.

iii)

Fuq l‑ikliet fil‑post ta’ oriġini tar‑rikorrent

377

It-talbiet għar-rimbors tal-ispejjeż ta’ rappreżentanza li jirrigwardaw l-ikliet fil-post ta’ oriġini tar-rikorrent huma msemmija fil-linji bin-Nri 22, 55, 110, 160, 216, 243, 245 u 279 tat-tabella ta’ rkupru. Fir-rigward ta’ dawn it-talbiet, ir-rikorrent jirreferi, essenzjalment, għall-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal-Awdituri vs Pinxten (C‑130/19, EU:C:2021:782), sabiex isostni li l-ispejjeż sostnuti fl-okkażjoni ta’ dawn l-ikliet kienu marbuta mal-funzjonijiet tiegħu ta’ Membru tal-Qorti tal-Awdituri u li d-deċiżjoni kkontestata hija illegali sa fejn din tqis dawn l-ispejjeż bħala indebitament imħallsa. F’dan ir-rigward, il-Qorti tal-Ġustizzja qieset li l-imsemmija talbiet kienu jirrigwardaw spejjeż li kienu ġew sostnuti minħabba li dawn kienu marbuta mal-funzjonijiet tar-rikorrent bħala Membru tal-Qorti tal-Awdituri. Skont il-Qorti tal-Ġustizzja, kien jidher li, fi tmien każijiet imsemmija fl-imsemmija linji, il-kwalitajiet tal-parti l-kbira tal-mistednin għal riċeviment organizzat fir-residenza tar-rikorrent kienu ta’ natura li juru li huwa seta’ leġittimament jipprova jżomm, fl-interess tal-Qorti tal-Awdituri, relazzjonijiet professjonali magħhom. B’hekk, il-Qorti tal-Ġustizzja ppreċiżat li fost dawn il-mistednin kien hemm persuni li jeżerċitaw responsabbiltajiet ewlenin fi ħdan l-istituzzjonijiet Ewropej, jiġifieri Membri tal-Parlament Ewropew, tal-Kummissjoni, tal-Qorti tal-Ġustizzja u tal-Qorti tal-Awdituri, u fi ħdan l-Istati Membri, bħal Membri tal-Parlament Belġjan, tal-Gvern Belġjan, u tal-Uffiċċju tar-Roi des Belges (ir-Re tal-Belġjani) kif ukoll ambaxxaturi jew uffiċjali għolja (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 682 u 683).

378

B’applikazzjoni tar-raġunament li jinsab fil-punti 220, 264 u 338 iktar ’il fuq, hemm lok, qabelxejn, li jiġi eżaminat jekk il-Qorti tal-Awdituri tqajjimx preċiżazzjonijiet u argumenti ġodda meta mqabbla ma’ dawk li hija kienet spjegat quddiem il-Qorti tal-Ġustizzja fir-rigward tat-talbiet inkwistjoni u, sussegwentement, fl-affermattiv, li jiġi evalwat jekk, fid-dawl ta’ dawn l-elementi, huwiex possibbli li jiġu trasposti għal din il-kawża l-konklużjonijiet tal-Qorti tal-Ġustizzja relatati ma’ dawn it-talbiet li jinsabu fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782) (ara l-punt 205 iktar ’il fuq).

379

F’din il-proċedura, il-Qorti tal-Awdituri tqis li l-ispejjeż ta’ rappreżentanza marbuta mal-ikliet fil-post ta’ oriġini tar-rikorrent, imsemmija fil-linji bin-Nri 22, 55, 110, 160, 216, 243, 245 u 279 tat-tabella ta’ rkupru, huma manifestament estranji għall-attivitajiet tiegħu. F’dan ir-rigward, hija tipproduċi prinċipalment ittra tar-rikorrent tat‑28 ta’ April 2015 u indirizzata lill-Prim Ministru tar-Renju tal-Belġju sabiex jistiednu għal ikla ta’ filgħaxija, li fiha r-rikorrent spjega li huwa regolarment kien jistieden “ċertu numru ta’ ħbieb sabiex jaqsmu ikla ta’ filgħaxija informali fid-dar [tiegħu]” li kienet tlaqqa’ “personalità jew żewġ personalitajiet politiċi ewlenin, kif ukoll xi ħbieb li [kienu] jokkupaw pożizzjoni għolja fis-settur intraprenditorjali” sabiex “iqattgħu serata pjaċevoli, rilassata u utli f’kumpanija tajba”. Skont il-Qorti tal-Awdituri, il-kliem ta’ din l-ittra jippermetti li jiġi stabbilit, b’mod ġenerali, li l-ikliet organizzati fil-post ta’ oriġini tar-rikorrent kienu fir-realtà jservu sabiex ilaqqgħu, b’mod kunfidenzjali, il-ħbieb tiegħu u għalhekk ma kellhom ebda rabta mal-funzjonijiet tiegħu bħala Membru tal-Qorti tal-Awdituri.

380

Barra minn hekk, il-Qorti tal-Awdituri tindika li l-ikliet ġew organizzati fil-post ta’ oriġini tar-rikorrent, u mhux fid-dar tiegħu, fejn suppost huwa stabbilixxa ruħu uffiċjalment wara l-ħatra tiegħu, u lanqas fis-sede tiegħu, li kellu post għal laqgħat previst għal dan l-għan.

381

Barra minn hekk, wara li fakkret li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja ma kinitx qieset li din l-ittra kienet suffiċjenti sabiex turi li l-ikliet kollha organizzati mir-rikorrent fir-residenza tal-post ta’ oriġini tiegħu kienu ta’ natura privata (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 676 sa 681), il-Qorti tal-Awdituri żżid li l-ittra tat‑28 ta’ April 2015 turi kemm l-għan kif ukoll il-metodu segwit mir-rikorrent sabiex jorganizza riċevimenti li n-natura estranja għall-attivitajiet tiegħu hija manifesta. Fi kwalunkwe każ, skont il-Qorti tal-Awdituri, ma hijiex il-persuna taxxabbli tal-Unjoni li għandha tiffinanzja avvenimenti ta’ natura privata li jibbenefikaw minnhom il-partijiet mistiedna u li jqarrbu lejn aġir ta’ kollużjoni u kunflitti ta’ interessi bejn ħbieb li jokkupaw funzjonijiet pubbliċi jew privati ta’ livell għoli.

382

L-argumenti tal-Qorti tal-Awdituri, imsemmija fil-punti 379 sa 381 iktar ’il fuq, ma jżidu xejn ma’ dawk li jsostnu l-evalwazzjoni tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), dwar l-ittra tar-rikorrent tat‑28 ta’ April 2015 u l-kwalità tal-mistednin għall-ikliet inkwistjoni, imfakkra fil-punt 377 iktar ’il fuq. Għaldaqstant, dawn l-argumenti ma humiex suffiċjenti sabiex it-talbiet għal rimbors tar-rikorrent previsti fil-linji msemmija fil-punt 377 iktar ’il fuq ikunu jistgħu jiġu evalwati, f’din il-proċedura, b’mod differenti mill-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

383

Għandu jitfakkar ukoll, kif ġie ppreċiżat fil-punt 152 iktar ’il fuq, li, fir-rigward tat-talbiet għal rimbors tar-rikorrent imsemmija fil-linji bin-Nri 22, 55, 110, 160, 216, 243 u 245 tat-tabella ta’ rkupru, fir-rapport tiegħu, l-OLAF ippreċiża b’mod partikolari r-rabta tar-rikorrent mal-mistednin ta’ tali riċevimenti. Skont l-OLAF, fost il-mistednin dejjem kien hemm mexxej politiku Belġjan wieħed jew tnejn flimkien ma’ xi ħbieb tal-qalb li jokkupaw pożizzjonijiet għolja fis-settur privat u l-avveniment kien organizzat sabiex jgħaddu “serata pjaċevoli, rilassata u utli fil-kumpannija tar-Reġjun ta’ Vlaanderen magħżula”. L-OLAF qies li l-mistednin kienu kollha ħbieb tal-qalb u li huma setgħu jafdaw lil xulxin b’diskrezzjoni u kunfidenzjalità assoluta fir-rigward tal-konverżazzjoni. Fir-rapport tal-OLAF ġie ppreċiżat ukoll li 46 persuna kienu pparteċipaw f’dawn l-ikliet ta’ filgħaxija privati u li, apparti l-fatt li huma kienu ħbieb tiegħu, ir-rabta tagħhom mar-rikorrent setgħet ġeneralment tiddependi fuq l-appartenenza għall-oqsma tal-politika Belġjana, tal-kaċċa, tas-settur privat u tal-istituzzjonijiet tal-Unjoni.

384

B’mod iktar partikolari, fir-rigward tal-parteċipazzjoni tal-mexxejja politiċi Belġjani fl-ikliet organizzati fil-post ta’ oriġini tar-rikorrent li jikkorrispondu għal-linji bin-Nri 22, 55, 110, 160, 216, 243, 245 u 279 tat-tabella ta’ rkupru, il-proċess għad-dispożizzjoni tal-Qorti Ġenerali jikkonferma l-konstatazzjoni tal-OLAF, li tgħid li, fost il-mistednin għal dawn l-ikliet, kien hemm mexxej politiku Belġjan wieħed jew tnejn. Fil-fatt, fit-tabella ta’ rkupru, huwa ppreċiżat li fl-ikliet imsemmija fil-linji bin-Nri 22, 55, 216, 245 u 279 kien jipparteċipa membru tal-partit politiku inkwistjoni u li f’dik prevista fil-linja bin-Nru 160 kienu jipparteċipaw żewġ membri ta’ dan il-partit politiku. Din it-tabella ma tinkludi ebda preċiżazzjoni dwar il-preżenza ta’ tali membri fl-ikliet imsemmija fil-linji bin-Nri 110 u 243.

385

Ċertament, il-parteċipazzjoni tal-membri tal-partit politiku inkwistjoni f’tali ikliet tidher problematika, fid-dawl tal-konstatazzjonijiet tal-OLAF fl-investigazzjoni tiegħu dwar il-frekwenza tal-laqgħat tar-rikorrent ma’ dawn il-mexxejja politiċi, imfakkra fil-punt 223 iktar ’il fuq, moqrija fid-dawl tal-kuntest indikat fil-punt 232 iktar ’il fuq. Għal din ir-raġuni, tali ikliet jistgħu jitqiesu li jsegwu, tal-inqas parzjalment, għanijiet politiċi speċifiċi għar-rikorrent, fatt li ma huwiex kompatibbli mal-funzjonijiet tiegħu ta’ Membru tal-Qorti tal-Awdituri.

386

Madankollu, għandu jiġi kkonstatat, hekk kif jirriżulta mill-punti 383 u 384 iktar ’il fuq, li l-lista tal-persuni mistiedna għall-ikliet inkwistjoni ma kinitx limitata għal membri tal-partit politiku inkwistjoni jew, hekk kif ikkonstatat il-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punt 678), għal “personalitajiet tar-Reġjun ta’ Vlaanderen” u kienet tinkludi ta’ spiss persuna jew diversi persuni li jeżerċitaw responsabbiltajiet fi ħdan l-istituzzjonijiet tal-Unjoni.

387

Il-Qorti tal-Awdituri ma tispeċifikax liema mistednin speċifiċi għall-ikliet organizzati fil-post ta’ oriġini tar-rikorrent, imsemmija fil-linji bin-Nri 22, 55, 110, 160, 216, 243, 245 u 279 tat-tabella ta’ rkupru, kienu juru l-assenza ta’ relazzjonijiet professjonali mar-rikorrent. Għaldaqstant, hemm lok li l-Qorti Ġenerali tadotta, fil-kuntest ta’ din il-proċedura, l-istess evalwazzjoni bħal dik adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 377 iktar ’il fuq, jiġifieri li t-talbiet għar-rimbors tal-ispejjeż ta’ rappreżentanza marbuta ma’ dawn l-ikliet kienu jirrigwardaw spejjeż li kienu ġew sostnuti minħabba li kienu marbuta mal-funzjonijiet tar-rikorrent bħala Membru tal-Qorti tal-Awdituri.

388

Għall-kuntrarju, il-Qorti Ġenerali tosserva li, fir-rigward tat-talbiet kollha għar-rimbors tal-ispejjeż ta’ rappreżentanza li jirrigwardaw l-ikliet fil-post ta’ oriġini tar-rikorrent, imsemmija fil-punt 378 iktar ’il fuq, il-Qorti tal-Awdituri tenfasizza wkoll l-ammonti ta’ dawn l-ispejjeż, billi essenzjalment tikkritika n-natura eċċessiva tagħhom.

389

F’dan ir-rigward, għandu jiġi kkonstatat li l-ispejjeż li jirrigwardaw l-imsemmija ikliet jammontaw għal ammonti ta’ EUR 2 520.68 għal 18‑il persuna (linja bin-Nru 22), ta’ EUR 1 976 għal 12‑il persuna (linja bin-Nru 55), ta’ EUR 2 271.36 għal 11‑il persuna (linja bin-Nru 110), ta’ EUR 3 018.90 għal 16‑il persuna (linja bin-Nru 160), ta’ EUR 2 340 għal 10 persuni (linja bin-Nru 216), ta’ EUR 1 897.28 għal 9 persuni (linja bin-Nru 243), ta’ EUR 2 069.76 għal 10 persuni (linja bin-Nru 245) u ta’ EUR 1 104 għal 6 persuni (linja bin-Nru 279). Peress li dawn l-ispejjeż jinsabu bejn madwar EUR 140 u EUR 234 għal kull persuna, dawn għandhom jitqiesu li jeċċedu manifestament dak li huwa neċessarju għall-finijiet ta’ riċevimenti fir-residenza privata tar-rikorrent, arranġamenti ta’ fjuri inklużi, jekk kien hemm, konformement man-nota tat‑22 ta’ April 2004. (ara l-punt 16 iktar ’il fuq). Barra minn hekk, għandu jittieħed inkunsiderazzjoni l-fatt li l-ispejjeż inkwistjoni ġew sostnuti barra mill-post ta’ assenjazzjoni tar-rikorrent.

390

Il-Qorti Ġenerali tikkonstata li r-rikorrent ma jippreżenta ebda osservazzjoni fir-rigward tan-natura raġonevoli tal-imsemmija ammonti, filwaqt li, hekk kif ippreċiżat fil-punt 336 iktar ’il fuq, huwa għandu jiċħad l-allegazzjonijiet tal-Qorti tal-Awdituri u juri li l-ħlas tal-ispejjeż ta’ rappreżentanza mill-baġit tal-Unjoni kien iġġustifikat u li d-deċiżjoni kkontestata hija illegali sa fejn din qieset dawn l-ispejjeż bħala indebitament imħallsa.

391

F’dawn iċ-ċirkustanzi, fid-dawl tal-kunsiderazzjonijiet tal-Qorti Ġenerali fil-punt 335 iktar ’il fuq, li japplikaw mutatis mutandis għall-ikliet organizzati fil-post ta’ oriġini tar-rikorrent, hemm lok li jiġi deċiż li tkun issir evalwazzjoni ġusta tal-fatti tal-każ jekk ammont ta’ EUR 50 għal kull persuna jkun jitqies bħala li ma jeċċedix dak li huwa neċessarju għall-ikliet organizzati fil-post ta’ oriġini tar-rikorrent, imsemmija fil-linji bin-Nri 22, 55, 110, 160, 216, 243, 245 u 279 tat-tabella ta’ rkupru.

392

Barra minn hekk, mill-Anness 1 tan-nota tat‑22 ta’ April 2004, li jinkludi suġġerimenti dwar l-ispejjeż ta’ rappreżentanza u ta’ ospitalità tal-Membri tal-Qorti tal-Awdituri, jirriżulta li l-infiq relatat ma’ dawn l-ispejjeż fir-residenza privata ta’ tali membru seta’ jirrigwarda b’mod partikolari arranġamenti ta’ fjuri li ma kinux jeċċedu dak li kien neċessarju għall-finijiet tal-organizzazzjoni ta’ riċeviment (ara l-punt 17 iktar ’il fuq). Madankollu, il-Qorti Ġenerali tikkonstata li l-fatturi fil-proċess, relatati ma’ kull waħda mill-ikliet organizzati fil-post ta’ oriġini tar-rikorrent, imsemmija fil-linji bin-Nri 22, 55, 110, 160, 216, 243, 245 u 279 tat-tabella ta’ rkupru, ma jinkludu ebda preċiżazzjoni fir-rigward tal-arranġamenti tal-fjuri previsti għal dawn l-ikliet. Fil-fatt, il-fatturi tal-ikliet imsemmija fil-linji bin-Nri 22, 55, 110, 160, 216, 243 u 245 jirrigwardaw essenzjalment biss il-prezz tal-menu għal kull persuna servuta waqt l-ikliet. Hija biss il-fattura marbuta mal-ikla msemmija fil-linja bin-Nru 279 li ssemmi, fost servizzi oħra pprovduti minn fornitur tal-ikel, “dekorazzjoni tal-mejda”, mingħajr madankollu ebda indikazzjoni li din kienet arranġamenti tal-fjuri u mingħajr ebda riferiment għall-prezz ta’ tali arranġamenti, jekk kien hemm. Fi kwalunkwe każ, sa fejn, konformement mal-Artikolu 6 tad-Deċiżjoni Nru 7‑2004, għar-riċevimenti fid-dar, il-Qorti tal-Awdituri tirrimborsa l-ispejjeż sostnuti sal-ammonti indikati fid-dokumenti ta’ sostenn prodotti (ara l-punt 15 iktar ’il fuq), sempliċi riferiment għal servizz ta’ “dekorazzjoni tal-mejda” ma huwiex biżżejjed sabiex jiġu rrimborsati l-ispejjeż marbuta mal-arranġamenti tal-fjuri.

393

Konsegwentement, hemm lok li d-deċiżjoni kkontestata tiġi annullata sa fejn din titlob l-irkupru tal-ammont ta’ EUR 900 li jikkorrispondi għal-linja bin-Nru 22, ta’ EUR 600 li jikkorrispondi għal-linja bin-Nru 55, ta’ EUR 550 li jikkorrispondi għal-linja bin-Nru 110, ta’ EUR 800 li jikkorrispondi għal-linja bin-Nru 160, ta’ EUR 500 li jikkorrispondi għal-linja bin-Nru 216, ta’ EUR 450 li jikkorrispondi għal-linja bin-Nru 243, ta’ EUR 500 li jikkorrispondi għal-linja bin-Nru 245 u ta’ EUR 300 li jikkorrispondi għal-linja bin-Nru 279, b’ammont totali ta’ EUR 4 600, u li jiġi miċħud il-kumplament tar-raba’ motiv fir-rigward ta’ dawn l-ispejjeż.

4)

Fuq l‑ispejjeż relatati mal‑użu tal‑karozza uffiċjali u mal‑użu tas‑servizzi ta’ xufier

394

Fost it-talbiet tar-rikorrent previsti fil-linji tat-tabella ta’ rkupru msemmija fil-punt 184 iktar ’il fuq, it-talbiet għar-rimbors tal-ispejjeż relatati mal-użu tal-karozza uffiċjali u mal-użu tas-servizzi ta’ xufier li l-Qorti tal-Awdituri tqis li tħallsu indebitament mir-rikorrent jirrigwardaw il-linji bin-Nri 3, 31, 38, 57, 66, 103, 138, 142, 143, 161, 196, 199, 203, 211, 215, 237, 238, 277, 281, 293 u 294, 296 (parzjalment), 310 (parzjalment), 313, 317, 319 u 320, 330, 335, 336, 339, 347, 352, 354, 355, 373 u 374, 379, 381, 382, 391, 402 u 403tat-tabella ta’ rkupru.

395

Ir-rikorrent iqis, essenzjalment, li t-talbiet għar-rimbors tal-ispejjeż ta’ xufier previsti fil-linji msemmija fil-punt 394 iktar ’il fuq huma relatati mal-funzjonijiet tiegħu ta’ Membru tal-Qorti tal-Awdituri. F’dan ir-rigward, huwa jirreferi, essenzjalment, għall-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), filwaqt li jindika li din il-proċedura ma tistax tippermetti lill-Qorti tal-Awdituri tikkontestaha.

396

Preliminarjament, għandu jitfakkar li, f’din il-proċedura, hekk kif speċifikat fil-punt 179 iktar ’il fuq, ma hemmx lok li jiġi eżaminat l-allegat ksur tal-prinċipju ta’ protezzjoni tal-aspettattivi leġittimi fir-rigward tar-riżorsi użati mill-Qorti tal-Awdituri għall-ispejjeż tal-użu tal-karozza uffiċjali u għall-użu tas-servizzi ta’ xufier. Għaldaqstant, fir-rigward tal-imsemmija spejjeż, għandu jiġi eżaminat biss, fid-dawl tal-portata tal-istħarriġ tal-Qorti Ġenerali f’din il-proċedura, imfakkra fil-punti 185 sa 193 iktar ’il fuq, jekk, billi rkuprathom, il-Qorti tal-Awdituri wettqitx żbalji ta’ evalwazzjoni.

i)

Fuq l‑ispejjeż tax‑xufier marbuta mal‑missjonijiet jew mal‑ispejjeż ta’ rappreżentanza tar‑rikorrent relatati mal‑laqgħat ma’ membri tal‑partit politiku inkwistjoni

397

Fir-rigward tal-linji bin-Nri 203, 211, 215, 238, 293 u 294, 296 (parzjalment), 313, 330, 336, 339 (parzjalment), 352, 355, 381, 382 (parzjalment) u 402 tat-tabella ta’ rkupru, fil-punti 239 u 261 iktar ’il fuq ġie meqjus li l-missjonijiet tar-rikorrent previsti fl-imsemmija linji ma kellhomx rabta mal-eżerċizzju tal-funzjonijiet tiegħu ta’ Membru tal-Qorti tal-Awdituri. Għaldaqstant, għandu jitqies li l-ispejjeż ta’ xufier imsemmija fl-istess linji huma b’mod korrelattiv nieqsa minn tali rabta.

398

L-istess japplika għat-talbiet għar-rimbors tal-ispejjeż ta’ xufier imsemmija fil-linji bin-Nri 281, 293 u 294 u 354 tat-tabella ta’ rkupru, relatati mat-talbiet għar-rimbors tal-ispejjeż ta’ rappreżentanza sostnuti għall-ikliet ta’ filgħaxija ma’ membri tal-partit politiku inkwistjoni, imsemmija fl-istess linji u meqjusa li huma inkompatibbli mal-funzjonijiet tiegħu ta’ Membru tal-Qorti tal-Awdituri (ara l-punti 329 u 371 iktar ’il fuq).

399

L-istess konklużjoni tapplika fir-rigward tat-talbiet għar-rimbors tal-ispejjeż ta’ xufier imsemmija fil-linji bin-Nri 3, 31 u 66 tat-tabella ta’ rkupru, sa fejn dawn it-talbiet kienu relatati ma’ laqgħat ma’ membri tal-partit politiku inkwistjoni.

400

Konsegwentement, ir-raba’ motiv għandu jiġi miċħud sa fejn dan jirrigwarda l-ispejjeż ta’ xufier imsemmija fil-linji bin-Nri 3, 31, 66, 203, 211, 215, 238, 281, 293 u 294, 296 (parzjalment), 313, 330, 336, 339 (parzjalment), 352, 354, 355, 381, 382 (parzjalment) u 402 tat-tabella ta’ rkupru.

ii)

Fuq l‑ispejjeż l‑oħra tax‑xufier

–

Fuq l‑ispejjeż tax‑xufier imsemmija fil‑linji bin‑Nri 57, 103, 143, 157, 161, 199, 237, 277, 310, 335, 347, 354 u 391 tat‑tabella ta’ rkupru

401

Fost it-talbiet għar-rimbors tal-ispejjeż ta’ xufier imsemmija fil-punt 394 iktar ’il fuq, dawk imsemmija fil-linji bin-Nri 3, 31, 57, 66, 103, 143, 157, 161, 199, 237, 277, 310 (parzjalment), 335, 347, 354 u 391 tat-tabella ta’ rkupru huma marbuta mat-talbiet għall-ispejjeż tal-missjoni jew tal-allowances ta’ kuljum jew inkella mat-talbiet għall-ispejjeż ta’ rappreżentanza mressqa mir-rikorrent. Dawn l-aħħar talbiet ġew eżaminati mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), sabiex isir magħruf jekk dawn kinux relatati mal-funzjonijiet tar-rikorrent bħala Membru tal-Qorti tal-Awdituri.

402

F’dan ir-rigward, għandu jiġi osservat li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), wara li evalwat kull waħda mit-talbiet għar-rimbors tal-ispejjeż tal-missjoni jew tal-allowances ta’ kuljum imsemmija fil-linji bin-Nri 31, 57, 66, 103, 143, 157, 161, 199, 237, 277, 310 (parzjalment), 335, 347 u 391 tat-tabella ta’ rkupru, fid-dawl tal-irregolaritajiet allegati mill-Qorti tal-Awdituri f’dik il-proċedura, il-Qorti tal-Ġustizzja qieset essenzjalment li dawn kienu spejjeż li kienu ġew sostnuti minħabba li kienu marbuta mal-funzjonijiet tar-rikorrent bħala Membru tal-Qorti tal-Awdituri (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 494, 497, 500, 501, 504, 505, 515, 558, 559, 561 sa 565, 576 u 735).

403

Ir-rikorrent jibbaża ruħu fuq dik l-evalwazzjoni tal-Qorti tal-Ġustizzja f’din il-proċedura sabiex juri li t-teħid ta’ responsabbiltà għall-ispejjeż sostnuti b’riżultat tat-talbiet għal rimbors previsti fil-linji msemmija fil-punt 401 iktar ’il fuq kien marbut mal-funzjonijiet tiegħu u li d-deċiżjoni kkontestata hija illegali peress li qieset dawn l-ispejjeż bħala indebitament imħallsa.

404

Fid-dawl tal-argumenti tar-rikorrent u tal-osservazzjonijiet li jinsabu fil-punti 202 sa 205 iktar ’il fuq, għandu jiġi applikat, fil-kuntest tal-eżami tat-talbiet għar-rimbors tal-ispejjeż ta’ xufier imsemmija fil-punt 401 iktar ’il fuq, l-istess raġunament bħal dak li jinsab fil-punti 220, 264, 338 u 378 iktar ’il fuq. Għaldaqstant, hemm lok, qabelxejn, li jiġi eżaminat jekk il-Qorti tal-Awdituri tressaqx argumenti u preċiżazzjonijiet ġodda meta mqabbla ma’ dawk li hija kienet ressqet quddiem il-Qorti tal-Ġustizzja fir-rigward ta’ dawn it-talbiet u, sussegwentement, fl-affermattiv, li jiġi evalwat jekk, fid-dawl ta’ dawn l-elementi, hemmx lok li jinstiltu l-istess konklużjonijiet bħall-Qorti tal-Ġustizzja. (ara l-punt 205 iktar ’il fuq) fir-rigward tal-imsemmija talbiet.

405

Fir-rigward tat-talbiet għar-rimbors tal-ispejjeż tal-missjoni jew tal-allowances ta’ kuljum imsemmija fil-linji bin-Nri 57, 103, 143, 157, 161, 199, 237, 277, 310 (parzjalment), 335, 347 u 391 tat-tabella ta’ rkupru, f’din il-proċedura ġie konkluż, fid-dawl tal-eżami fil-punti 282 sa 297, 301 sa 305 u 308 sa 313 iktar ’il fuq, li hemm lok li tiġi kondiviża l-evalwazzjoni tal-Qorti tal-Ġustizzja f’dan ir-rigward. Sa fejn, fir-rigward tat-talbiet għar-rimbors tal-ispejjeż ta’ xufier li huma s-suġġett tal-imsemmija linji, il-Qorti tal-Awdituri ma żżid xejn ġdid meta mqabbel mal-argumenti tagħha quddiem il-Qorti tal-Ġustizzja, hemm lok, hekk kif għamlet il-Qorti tal-Ġustizzja, li jitqies li l-ispejjeż ta’ xufier previsti fl-imsemmija linji għandhom jitqiesu li ġew sostnuti minħabba li huma marbuta mal-funzjonijiet tiegħu ta’ Membru tal-Qorti tal-Awdituri.

406

F’dawn iċ-ċirkustanzi, għandu jiġi konkluż li, billi qieset li l-ispejjeż ta’ xufier imsemmija fil-linji bin-Nri 57, 103, 143, 157, 161, 199, 237, 277 (parzjalment), 335, 347 u 391 tat-tabella ta’ rkupru huma estranji għall-funzjonijiet tar-rikorrent bħala Membru tal-Qorti tal-Awdituri u billi talbet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda l-ispejjeż ta’ xufier previsti fl-imsemmija linji, għal ammont ta’ EUR 3 224.72. F’dan ir-rigward, f’dak li jirrigwarda l-ispejjeż imsemmija fil-linja bin-Nru 310, l-ammont korrett huwa terz minn dawn l-ispejjeż (EUR 153.65).

–

Fuq l‑ispejjeż tax‑xufier imsemmija fil‑linji bin‑Nri 138, 196, 319 u 320, 339 (parzjalment) u 382 (parzjalment) tat‑tabella ta’ rkupru

407

Fir-rigward tat-talbiet għar-rimbors tal-ispejjeż ta’ xufier imsemmija fil-linji bin-Nri 138, 196, 319 u 320, 339 (parzjalment) u 382 (parzjalment) tat-tabella ta’ rkupru, għandu jiġi kkonstatat li l-Qorti tal-Ġustizzja ma ddeċidietx dwarhom fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

408

Dawn it-talbiet huma marbuta mat-talbiet għar-rimbors tal-ispejjeż ta’ rappreżentanza tar-rikorrent li fir-rigward tagħhom tqies li l-attivitajiet marbuta magħhom ma kinux estranji għall-funzjonijiet tiegħu ta’ Membru tal-Qorti tal-Awdituri (ara l-punti 342, 355 u 359 iktar ’il fuq).

409

B’applikazzjoni tal-istess raġunament bħal dak li jinsab fil-punt 404 iktar ’il fuq, għandu jiġi kkonstatat li, fir-rigward tat-talbiet għar-rimbors tal-ispejjeż ta’ xufier marbuta mal-linji inkwistjoni, il-Qorti tal-Awdituri ma żżid xejn ġdid f’dan il-każ meta mqabbel mal-argumenti li hija kienet ippreżentat quddiem il-Qorti tal-Ġustizzja. Għaldaqstant, għandu jitqies li l-ispejjeż ta’ xufier imsemmija fil-linji bin-Nri 138, 196, 319 u 320, 339 (parzjalment) u 382 (parzjalment) tat-tabella ta’ rkupru ġew sostnuti minħabba li kienu marbuta mal-funzjonijiet tar-rikorrent bħala Membru tal-Qorti tal-Awdituri.

410

F’dawn iċ-ċirkustanzi, għandu jiġi konkluż li, billi qieset li l-ispejjeż ta’ xufier imsemmija fil-linji bin-Nri 138, 196, 319 u 320, 339 (parzjalment) u 382 (parzjalment) tat-tabella ta’ rkupru huma estranji għal dawn il-funzjonijiet u billi eżiġiet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda l-ispejjeż ta’ xufier imsemmija fil-linji bin-Nri 138, 196, 319 u 320, 339 (parzjalment) u 382 (parzjalment) tat-tabella ta’ rkupru, għal ammont ta’ EUR 1 158.83. F’dan ir-rigward, f’dak li jirrigwarda l-ispejjeż ta’ xufier imsemmija fil-linji bin-Nri 339 u 382, l-ammont korrett huwa kwart ta’ dawn l-ispejjeż f’dak li jirrigwarda l-linja bin-Nru 339 (EUR 74.13) u terz tal-ispejjeż inkwistjoni f’dak li jirrigwarda l-linja bin-Nru 382 (EUR 165.70).

–

Fuq l‑ispejjeż tax‑xufier imsemmija fil-linji bin-Nri 379 u 403 tat‑tabella ta’ rkupru

411

Iż-żewġ talbiet għar-rimbors tal-ispejjeż ta’ xufier imsemmija fil-punt 394 iktar ’il fuq u li jirrigwardaw il-linji bin-Nri 379 u 403 tat-tabella ta’ rkupru ma ġewx espressament eżaminati mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

412

F’dan ir-rigward, fid-dawl tal-oneru tal-prova mfakkar fil-punt 193 iktar ’il fuq, huwa r-rikorrent li għandu juri li l-ħlas mill-baġit tal-Unjoni tal-ispejjeż ta’ xufier inkwistjoni marbuta mal-linji bin-Nri 379 u 403 tat-tabella ta’ rkupru kien iġġustifikat u li d-deċiżjoni kkontestata hija illegali minħabba li qieset li dawn l-ispejjeż tħallsu indebitament.

413

Għandu jiġi osservat li, fir-rigward tal-ispejjeż ta’ xufier imsemmija fil-linja bin-Nru 379, dawn ma kinux marbuta ma’ missjoni għar-rikorrent. Mill-ordni ta’ missjoni tax-xufier jirriżulta li l-għan tagħha kien jikkonsisti fis-sewqan tar-rikorrent mil-Lussemburgu lejn Brussell, u sussegwentement lejn il-post ta’ oriġini tiegħu, fejn ix-xufier qatta’ l-lejl f’lukanda u rritorna lejn il-Lussemburgu bil-ferrovija.

414

Għall-kuntrarju, fir-rigward tal-ispejjeż ta’ xufier imsemmija fil-linja bin-Nru 403, dawn kienu marbuta ma’ missjoni tar-rikorrent mingħajr kumpens. Mill-ordni ta’ missjoni jirriżulta li din kienet tirrigwarda l-“Maître […]” u l-vjaġġ il-Lussemburgu‑Dijon‑il-Lussemburgu. Skont il-Qorti tal-Awdituri, in-natura reali tal-attività msemmija f’din il-linja kienet ix-xiri ta’ vinja.

415

Ir-rikorrent jillimita ruħu jqis li, sa fejn dawn l-ispejjeż ma ġewx ikklassifikati bħala irregolari mill-Qorti tal-Ġustizzja, dawn ma jistgħux jitqiesu bħala tali f’din il-proċedura.

416

Issa, għandu jiġi kkonstatat li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li l-missjonijiet ta’ xufier li kellhom bħala għan is-sewqan tar-rikorrent għal raġuni mhux magħrufa jew li tista’ tiġi sseparata b’mod ċar mill-funzjonijiet tiegħu kienu irregolari (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 711 sa 716).

417

Fl-assenza ta’ produzzjoni mir-rikorrent ta’ elementi ta’ natura li jistabbilixxu li l-ispejjeż ta’ xufier imsemmija fil-linji bin-Nri 379 u 403 tat-tabella ta’ rkupru kienu relatati ma’ vjaġġi marbuta mal-eżerċizzju tal-funzjonijiet tiegħu u li jikkontestaw l-allegazzjonijiet tal-Qorti tal-Awdituri fir-rigward tan-natura privata ta’ dawn l-ispejjeż, għandu jitqies li kien b’mod korrett li l-Qorti tal-Awdituri kklassifikathom bħala krediti u eżiġiet l-irkupru tagħhom.

418

Konsegwentement, ir-raba’ motiv għandu jiġi miċħud f’dak li jirrigwarda l-kontestazzjoni tar-regolarità tal-irkupru relatat mal-ispejjeż ta’ xufier imsemmija fil-linji bin-Nri 379 u 403 tat-tabella ta’ rkupru.

–

Fuq l‑ispejjeż ta’ xufier imsemmija fil‑linja bin-Nru 38 tat‑tabella ta’ rkupru

419

Fid-deċiżjoni kkontestata, il-Qorti tal-Awdituri tqis li l-missjoni ta’ xufier imsemmija fil-linja bin-Nru 38 tat-tabella ta’ rkupru, li fil-kuntest tagħha xufier mar mil-Lussemburgu lejn il-post ta’ vaganzi tar-rikorrent fl-Isvizzera sabiex isuqu lura lejn il-post ta’ oriġini tiegħu, hija irregolari.

420

Ir-rikorrent jibbaża ruħu, essenzjalment, fuq l-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li abbażi tagħha, għalkemm ir-raġuni allegata mill-Qorti tal-Awdituri fir-rigward tal-missjoni ta’ xufier imsemmija fil-linja bin-Nru 38 tat-tabella ta’ rkupru, jiġifieri l-ġbir tar-rikorrent mill-post tal-vaganzi tiegħu, hija ta’ natura li tistabbilixxi l-irregolarità ta’ din il-missjoni, huwa ċaħad li kien awtorizza tali missjoni filwaqt li l-Qorti tal-Awdituri ma kinitx stabbilixxiet li din il-missjoni kienet effettivament seħħet, peress li l-proċess li l-Qorti tal-Ġustizzja kellha għad-dispożizzjoni tagħha ma kienx jinkludi ordni ta’ missjoni ffirmata minnu (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 717).

421

Il-Qorti tal-Ġustizzja kkonstatat ukoll li, fil-kuntest tal-organizzazzjoni implimentata fi ħdan il-Qorti tal-Awdituri sal‑5 ta’ Ottubru 2016, kien il-kompitu ta’ Membru ta’ dik l-istituzzjoni li jiffirma l-ordnijiet ta’ missjoni tax-xufiera li tagħhom huwa kien juża s-servizzi (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 698).

422

F’din il-proċedura, il-Qorti tal-Awdituri tindika li ma kienx hemm ordni ta’ missjoni fir-rigward tar-rikorrent, fatt li fih innifsu huwa biżżejjed sabiex tiġi kkonstatata l-irregolarità tal-missjoni tax-xufier. Hija tallega wkoll li r-rikorrent, bħala uffiċjal awtorizzanti tax-xufier, talab u vvalida l-missjoni inkwistjoni fis-sistema elettronika MISPROD, użata dak iż-żmien minnha sabiex tiġi attestata r-realtà tal-missjoni.

423

Ċertament, il-proċess ma jinkludi ebda missjoni ta’ xufier għall-attività msemmija fil-linja bin-Nru 38 tat-tabella ta’ rkupru, iffirmata bl-idejn mir-rikorrent, hekk kif kienu jeżiġu r-regoli fis-seħħ f’dak iż-żmien. Madankollu, għalkemm dan ix-xogħol amministrattiv ma sarx, xorta jibqa’ l-fatt li huwa paċifiku li l-ispejjeż għal din l-attività ġew sostnuti minn xufier bejn is‑7 u d‑9 ta’ Marzu 2009 għal ammont ta’ EUR 716.82. Barra minn hekk, il-Qorti tal-Awdituri hemżet mal-proċess l-estratti mis-sistema elettronika MISPROD li minnhom jirriżulta li r-rikorrent kien l-uffiċjal awtorizzanti tal-missjoni sabiex ix-xufier imur jiġbru minn belt fl-Isvizzera. Dawn is-siltiet jikkonfermaw ukoll l-allegazzjonijiet tal-Qorti tal-Awdituri fir-rigward tal-attivitajiet tax-xufier marbuta mat-talba għal rimbors imsemmija fl-imsemmija linja, li skonthom ix-xufier qatta’ l-lejl bejn is‑7 u t‑8 ta’ Marzu 2009 f’lukanda fl-Isvizzera, saq lura lir-rikorrent lejn il-post ta’ oriġini tiegħu fit‑8 ta’ Marzu 2009, fejn huwa qatta’ l-lejl bejn it‑8 u d‑9 ta’ Marzu 2009 f’lukanda, u wara rritorna lejn il-Lussemburgu fid‑9 ta’ Marzu 2009.

424

Ir-rikorrent ma jippreżenta ebda osservazzjoni fir-rigward ta’ dawn l-allegazzjonijiet tal-Qorti tal-Awdituri, minkejja li f’din il-proċedura hija r-responsabbiltà tiegħu li juri (ara l-punt 193 iktar ’il fuq) li l-ħlas mill-baġit tal-Unjoni tal-ispejjeż ta’ xufier inkwistjoni kien iġġustifikat u li d-deċiżjoni kkontestata hija illegali minħabba li qieset li dawn l-ispejjeż tħallsu indebitament.

425

F’dawn iċ-ċirkustanzi, l-ispejjeż tax-xufier imsemmija fil-linja bin-Nru 38 tat-tabella ta’ rkupru għandhom jitqiesu li huma irregolari u r-raba’ motiv għandu jiġi miċħud sa fejn dan jirrigwarda din il-linja.

–

Fuq l‑ispejjeż ta’ xufier imsemmija fil-linji bin-Nri 106, 147, 151, 153, 167 u 214 tat-tabella ta’ rkupru

426

L-għan tal-missjonijiet ta’ xufier imsemmija fil-linji bin-Nri 106, 147, 151, 153, 167 u 214 tat-tabella ta’ rkupru kien li x-xufier isuq lir-rikorrent fil-kuntest ta’ missjonijiet relatati ma’ appuntamenti mediċi.

427

Ir-rikorrent jirreferi f’dan ir-rigward, essenzjalment, għall-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782).

428

Il-Qorti tal-Awdituri ssostni li l-missjonijiet ta’ xufier previsti fil-linji msemmija fil-punt 426 iktar ’il fuq kienu irregolari, peress li l-missjonijiet korrispondenti tar-rikorrent kienu “missjonijiet mingħajr kumpens” jew kienu “[magħluqa] mingħajr spejjeż”. Fil-fehma tagħha, peress li dawn il-missjonijiet ma kinux jikkostitwixxu missjoni skont ir-regoli interni tagħha, dawn ma setgħux jawtorizzaw l-użu tas-servizzi ta’ xufier.

429

Għandu jitfakkar li, fir-rigward tal-imsemmija missjonijiet ta’ xufier, il-Qorti tal-Ġustizzja indikat fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), dan li ġej:

430

Hemm lok li għal din il-kawża jiġu applikati dawn il-kunsiderazzjonijiet u dawn il-konklużjonijiet tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), fir-rigward tal-istess missjonijiet ta’ xufier, imsemmija fil-linji bin-Nri 106, 151, 153, 167 u 214 tat-tabella ta’ rkupru.

431

Barra minn hekk, dan ir-raġunament tal-Qorti tal-Ġustizzja huwa applikabbli wkoll għall-missjoni ta’ xufier imsemmija fil-linja bin-Nru 147, li tinkludi l-ispejjeż ta’ trasport għax-xufier fir-rigward ta’ żewġ appuntamenti mediċi tar-rikorrent. F’dan ir-rigward, fid-dawl tal-fatt li dawn l-appuntamenti, li għalihom ir-rikorrent kien talab awtorizzazzjoni mill-Qorti tal-Awdituri, seħħew waqt vjaġġ, bl-użu ta’ karozza uffiċċjali, lejn laqgħa tal-Kumitat għall-Kontroll tal-Baġit tal-Parlament u lejn konferenza waqt ikla ta’ nofsinhar organizzata minn assoċjazzjoni (ara wkoll il-punt 132 iktar ’il fuq), it-talba tiegħu għall-użu tas-servizzi ta’ xufier sabiex jirritorna lejn il-Lussemburgu ma tistax titqies bħala irregolari, u dan anki jekk din kienet tippreżupponi li x-xufier ikkonċernat jieħu ferrovija mil-Lussemburgu għal Brussell.

432

Fid-dawl tal-kunsiderazzjonijiet preċedenti, għandu jitqies li, billi kklassifikat bħala krediti l-ispejjeż ta’ xufier imsemmija fil-linji bin-Nri 106, 147, 151, 153, 167 u 214 tat-tabella ta’ rkupru u billi talbet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda l-ispejjeż ta’ xufier imsemmija f’dawn il-linji, għal ammont ta’ EUR 1 689.25.

–

Fuq l‑ispejjeż ta’ xufier imsemmija fil‑linja bin‑Nru 142 tat‑tabella ta’ rkupru

433

Il-missjoni ta’ xufier imsemmija fil-linja bin-Nru 142 tat-tabella ta’ rkupru tirrigwarda l-ispejjeż sostnuti sabiex il-karozza uffiċjali tar-rikorrent tinġieb fil-post ta’ vaganzi tiegħu fl-Isvizzera. Fid-deċiżjoni kkontestata, il-Qorti tal-Awdituri tieħu inkunsiderazzjoni r-rimbors mir-rikorrent tas-somom minfuqa fl-okkażjoni ta’ dan il-vjaġġ tax-xufier. Madankollu, hija tqis li l-parti tas-salarju tax-xufier indebitament użata ma ġietx irkuprata.

434

Ir-rikorrent jikkontesta l-fatt li s-salarju tax-xufier assoċjat mal-missjoni msemmija fil-linja bin-Nru 142 tat-tabella ta’ rkupru jikkostitwixxi kreditu tal-Qorti tal-Awdituri fil-konfront tiegħu. Huwa jippreċiża għalhekk li, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja qieset li din ma kinitx irregolarità.

435

Fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), il-Qorti tal-Ġustizzja kkonkludiet li, minkejja li l-irregolarità tal-missjoni ta’ xufier imsemmija fil-linja bin-Nru 142 tat-tabella ta’ rkupru ma hijiex ikkontestata, din l-irregolarità ma tistax tiġi attribwita lir-rikorrent fil-kuntest tal-proċedura quddiemha (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 752). F’dan ir-rigward, hija kkonstatat li, għalkemm il-partijiet ma kienux jaqblu dwar l-għan preċiż ta’ din il-missjoni, l-affermazzjoni tar-rikorrent li l-imsemmija missjoni kellha bħala għan, bi qbil mal-persuna inkarigata mix-xufiera tal-Qorti tal-Awdituri, l-irkupru tal-karozza uffiċjali wara inċident kienet tikkorrispondi, essenzjalment, għad-dikjarazzjonijiet tax-xufier ikkonċernat waqt is-smigħ tiegħu mill-OLAF tas‑16 ta’ Ottubru 2017 (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 754). Barra minn hekk, il-Qorti tal-Ġustizzja indikat li kien stabbilit li, wara li ġie informat bil-possibbiltà ta’ irregolarità fir-rigward tal-missjoni tax-xufier inkwistjoni, ir-rikorrent kien talab lill-amministrazzjoni tal-Qorti tal-Awdituri, matul is-sena 2011, sabiex jirrimborsa s-somom indebitament imħallsa minn dik l-istituzzjoni fl-okkażjoni ta’ din il-missjoni u li dawn is-somom kienu tnaqqsu mis-salarju tiegħu (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 755).

436

F’dan il-każ, huwa biżżejjed li jiġi kkonstatat, hekk kif tfakkar fil-punt 35 iktar ’il fuq, li, fl‑2011, il-Qorti tal-Awdituri qiegħdet is-servizzi ta’ xufier għad-dispożizzjoni tar-rikorrent, b’tali mod li s-salarju ta’ dan ix-xufier kellu jitħallas mill-Qorti tal-Awdituri u li għalhekk ebda dannu finanzjarju mġarrab minnha ma kien stabbilit f’dan ir-rigward.

437

Konsegwentement, billi kklassifikat is-salarju tax-xufier imsemmi fil-linja bin-Nru 142 tat-tabella ta’ rkupru bħala kreditu u billi talbet l-irkupru tiegħu, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda l-ispejjeż ta’ xufier imsemmija f’din il-linja, għal ammont ta’ EUR 185.43.

–

Fuq l‑ispejjeż ta’ xufier imsemmija fil‑linja bin‑Nru 187 tat‑tabella ta’ rkupru

438

Is-suġġett tal-missjoni ta’ xufier imsemmija fil-linja bin-Nru 187 tat-tabella ta’ rkupru kien l-“istedina formali [ta’ Prinċipessa]”. Il-Qorti tal-Awdituri tqis li din il-missjoni kienet irregolari, peress li l-missjoni korrispondenti tar-rikorrent kienet “missjoni mingħajr kumpens”. B’mod iktar partikolari, hija tippreċiża li r-rikorrent kien fuq missjoni fi Brussell, flimkien max-xufier tiegħu u mal-karozza uffiċjali, iżda li madankollu huwa ddeċieda li jżomm il-karozza uffiċjali għall-attivitajiet privati tiegħu fi tmiem il-ġimgħa filwaqt li x-xufier kien imġiegħel jirritorna lura l-Lussemburgu bil-ferrovija.

439

Ir-rikorrent jirreferi, essenzjalment, għall-evalwazzjoni adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li fiha l-Qorti tal-Ġustizzja essenzjalment ikkonkludiet li ma kienx jidher utli li jiġi ddeterminat jekk il-Qorti tal-Awdituri setgħetx validament tattribwixxi lir-rikorrent prassi li abbażi tagħha ż-żamma minnu tal-karozza uffiċjali tiegħu kienet wasslet għal vjaġġ bil-ferrovija tax-xufier (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 798).

440

F’din il-proċedura, u skont raġunament simili għal dak relatat mat-talba għal rimbors imsemmija fil-linja bin-Nru 147 (ara l-punt 431 iktar ’il fuq), huwa biżżejjed li jiġi kkonstatat li l-Qorti tal-Awdituri ma tikkontestax ir-regolarità tal-vjaġġ tar-rikorrent bi tweġiba għal stedina tal-personalità inkwistjoni u li hija lanqas ma tippreċiża għal liema attivitajiet privati r-rikorrent żamm il-karozza uffiċjali għat-tmiem il-ġimgħa. F’dawn iċ-ċirkustanzi, u fid-dawl tal-fatt li l-missjoni korrispondenti tar-rikorrent kienet awtorizzata mill-Qorti tal-Awdituri, it-talba tiegħu għall-użu tas-servizzi ta’ xufier ma tistax titqies li hija irregolari.

441

Konsegwentement, billi kklassifikat bħala kreditu l-ispejjeż ta’ xufier imsemmija fil-linja bin-Nru 187 tat-tabella ta’ rkupru u billi talbet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, hemm lok li d-deċiżjoni kkontestata tiġi annullata f’dak li jirrigwarda dawn l-ispejjeż ta’ xufier, għal ammont ta’ EUR 42.64.

–

Fuq l‑ispejjeż ta’ xufier imsemmija fil‑linja bin‑Nru 247 tat‑tabella ta’ rkupru

442

Is-suġġett tal-missjoni tax-xufier imsemmija fil-linja bin-Nru 247 kien is-sewqan tal-karozza uffiċjali tar-rikorrent, użata minnu, lejn garaxx fil-Belġju sabiex titwettaq il-manutenzjoni tagħha.

443

Ir-rikorrent iqis, essenzjalment, li għandhom jittieħdu inkunsiderazzjoni l-kunsiderazzjonijiet tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). F’dan ir-rigward, wara li kkonstatat li l-missjoni tax-xufier imsemmija fil-linja bin-Nru 247 kienet intiża, skont ir-rikorrent, sabiex il-karozza uffiċjali tiegħu tinġieb f’garaxx sabiex issir il-manutenzjoni tagħha, il-Qorti tal-Ġustizzja qieset li l-argument tal-Qorti tal-Awdituri ma setax, fl-assenza ta’ kwalunkwe dokument li jsostni dan l-argument, jintlaqa’ (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 748 u 749).

444

F’din il-proċedura, il-Qorti tal-Awdituri tirrileva li l-garaxx inkarigat mill-manutenzjoni tal-karozza uffiċjali tar-rikorrent kien jinsab, skont il-kuntratt ta’ leasing fis-seħħ, fil-Lussemburgu, b’tali mod li l-għan tal-missjoni inkwistjoni ma setax jikkorrispondi għal tali manutenzjoni.

445

F’dan ir-rigward, billi jiġi segwit l-istess raġunament bħal dak li jinsab fil-punt 404 iktar ’il fuq, huwa biżżejjed li jiġi osservat li l-proċess ma jinkludi ebda element ieħor li jistabbilixxi r-realtà tal-allegazzjoni tal-Qorti tal-Awdituri fis-sens li l-manutenzjoni ta’ din il-karozza kienet żgurata minn garaxx li jinsab f’pajjiż ieħor. Għaldaqstant, hemm lok li l-Qorti Ġenerali tadotta, fil-kuntest ta’ din il-proċedura, l-istess evalwazzjoni bħal dik adottata mill-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), imfakkra fil-punt 443 iktar ’il fuq.

446

Konsegwentement, billi kklassifikat l-ispejjeż ta’ xufier imsemmija fil-linja bin-Nru 247 tat-tabella ta’ rkupru bħala kreditu u billi talbet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata f’dak li jirrigwarda dawn l-ispejjeż, għal ammont ta’ EUR 239.10.

–

Fuq l‑ispejjeż ta’ xufier imsemmija fil-linji bin‑Nri 176, 317 u 373 u 374 tat‑tabella ta’ rkupru

447

Fir-rigward tal-ispejjeż ta’ xufier imsemmija fil-linji bin-Nri 176, 317 u 373 u 374 tat-tabella ta’ rkupru, ir-rikorrent iqis, essenzjalment, li għandhom jittieħdu inkunsiderazzjoni l-kunsiderazzjonijiet tal-Qorti tal-Ġustizzja fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782). F’dan ir-rigward, il-Qorti tal-Ġustizzja ma kkonkludietx li l-missjonijiet ta’ xufier li jirrigwardaw il-linji bin-Nri 176, 317 u 373 u 374 tat-tabella ta’ rkupru kienu irregolari, peress li l-proċess li hija kellha għad-dispożizzjoni tagħha ma kienx jinkludi l-ordnijiet ta’ missjoni tar-rikorrent li kienet qiegħda tirreferi għalihom il-Qorti tal-Awdituri u għalhekk ma kienx jippermetti li jiġi stabbilit li l-vjaġġi kkontestati ma kinux koperti, b’mod iġġustifikat, minn dawn l-ordnijiet ta’ missjoni (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 735).

448

B’applikazzjoni tar-raġunament li jinsab fil-punt 404 iktar ’il fuq, għandu jiġi kkonstatat li, f’din il-proċedura, il-Qorti tal-Awdituri tindika, billi tirreferi għall-ordnijiet ta’ missjoni relatati li jinsabu fl-annessi, li l-missjonijiet imsemmija fil-linji bin-Nri 176, 317 u 373 u 374 tat-tabella ta’ rkupru kellhom jibdew u jintemmu fil-Lussemburgu.

449

F’dan ir-rigward, huwa biżżejjed li jiġi osservat, hekk kif għamlet il-Qorti tal-Ġustizzja, li l-proċess quddiem il-Qorti Ġenerali lanqas ma jinkludi f’dan il-każ l-ordnijiet ta’ missjoni tar-rikorrent marbuta mal-ispejjeż ta’ xufier imsemmija fil-linji bin-Nri 176, 317 u 373 u 374 tat-tabella ta’ rkupru, b’mod li l-irregolarità tal-ispejjeż inkwistjoni ma hijiex suffiċjentement stabbilita sabiex din tkun tista’ tiġi invokata fir-rigward tar-rikorrent.

450

F’dawn iċ-ċirkustanzi, għandu jiġi konkluż li, billi qieset li l-ispejjeż ta’ xufier imsemmija fil-linji bin-Nri 176, 317 u 373 u 374 tat-tabella ta’ rkupru kienu estranji għall-funzjonijiet tar-rikorrent bħala Membru tal-Qorti tal-Awdituri u billi eżiġiet l-irkupru tagħhom, il-Qorti tal-Awdituri wettqet żball ta’ evalwazzjoni. Għaldaqstant, id-deċiżjoni kkontestata għandha tiġi annullata sa fejn din titlob ir-rimbors ta’ dawn l-ispejjeż, għal ammont ta’ EUR 1 431.93.

–

Konklużjoni fuq l‑ispejjeż l‑oħra ta’ xufier

451

Fid-dawl tal-kunsiderazzjonijiet preċedenti, hemm lok li d-deċiżjoni kkontestata tiġi annullata f’dak li jirrigwarda l-ispejjeż ta’ xufier imsemmija fil-linji bin-Nri 57, 103, 106, 138, 142, 143, 147, 151, 153, 157, 161, 167, 176, 187, 196, 199, 214, 237, 247, 277, 310 (parzjalment), 317, 319 u 320, 335, 339 (parzjalment), 347, 354, 373 u 374, 382 (parzjalment) u 391 tat-tabella ta’ rkupru, għal ammont ta’ EUR 7 971.90. Il-kumplament tar-raba’ motiv għandu jiġi miċħud f’dak li jirrigwarda dawn l-ispejjeż l-oħra.

c)

Konklużjoni fuq ir‑raba’ motiv

452

Fid-dawl tal-kunsiderazzjonijiet preċedenti, hemm lok li d-deċiżjoni kkontestata tiġi annullata, sa fejn din tordna l-irkupru tat-talbiet għar-rimbors tal-ispejjeż previsti fil-linji msemmija fil-punti 320, 375, 393 u 451 iktar ’il fuq, għal ammont ta’ EUR 16 084.01. Il-kumplament tar-raba’ motiv għandu jiġi miċħud.

5.

Fuq il‑ħames motiv, ibbażat fuq il‑massima li l‑proċeduri kriminali jżommu l‑proċeduri amministrattivi sospiżi

453

Fil-kuntest ta’ dan il-motiv, ir-rikorrent isostni li, minħabba proċeduri kriminali pendenti fil-Gran Dukat tal-Lussemburgu, il-Qorti tal-Awdituri ma setgħetx tagħti d-deċiżjoni tagħha qabel l-adozzjoni ta’ deċiżjoni mill-awtoritajiet kriminali Lussemburgiżi aditi bl-istess fatti bħal dawk li fuqhom hija bbażata d-deċiżjoni kkontestata. Peress li ma stennietx l-eżitu tal-proċeduri kriminali, hija kisret il-massima li l-proċeduri kriminali jżommu l-proċeduri amministrattivi sospiżi. Fl-osservazzjonijiet tiegħu dwar il-konsegwenzi li għandhom jinstiltu mis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), għal din il-kawża, ir-rikorrent iqis li l-Qorti tal-Ġustizzja ma tatx deċiżjoni dwar dan il-motiv.

454

Il-Qorti tal-Awdituri tikkontesta l-argumenti tar-rikorrent.

455

Għandu jiġi kkonstatat, hekk kif għamlet il-Qorti tal-Awdituri, li l-Qorti tal-Ġustizzja ċaħdet, fis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), argument simili tar-rikorrent, ibbażat fuq l-eżistenza ta’ proċeduri kriminali pendenti fil-Gran Dukat tal-Lussemburgu. F’dan ir-rigward, qabel kollox, il-Qorti tal-Ġustizzja rrilevat li ebda dispożizzjoni tad-dritt tal-Unjoni ma kienet tipprevedi li proċedura mibdija quddiemha taħt l-Artikolu 286(6) TFUE kellha tiġi sospiża meta jkunu nbdew proċeduri kriminali li jirrigwardaw, totalment jew parzjalment, l-istess fatti (sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782, punt 83). Sussegwentement, wara li invokat l-Artikolu 25 tal-Anness IX tar-Regolamenti tal-Persunal, li jipprovdi li meta uffiċjal ikun is-suġġett ta’ proċeduri kriminali għall-istess fatti, is-sitwazzjoni dixxiplinari tiegħu għandha tiġi rregolata definittivament biss wara li d-deċiżjoni mogħtija mill-qorti adita tkun saret definittiva, il-Qorti tal-Ġustizzja indikat li l-proċeduri relatati mal-ksur, minn Membru tal-Qorti tal-Awdituri, tal-obbligi li jirriżultaw mill-kariga tiegħu jaqgħu taħt rimedju legali awtonomu, previst fl-Artikolu 286(6) TFUE, u li dawn il-proċeduri għalhekk ma kinux irregolati mir-regoli dwar il-proċedura dixxiplinari stabbiliti mir-Regolamenti tal-Persunal (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punti 84 u 85). Fl-aħħar nett, il-Qorti tal-Ġustizzja kkonkludiet li eventwali sospensjoni tal-proċedura taħt l-Artikolu 286(6) TFUE, fl-istennija tal-eżitu tal-proċeduri kriminali mibdija fil-Gran Dukat tal-Lussemburgu, ma kinitx neċessarja, peress li, fi kwalunkwe każ, l-eżitu ta’ dawk il-proċeduri ma kienx ta’ natura li jillimita l-portata tal-evalwazzjonijiet li l-Qorti tal-Ġustizzja kienet obbligata twettaq sabiex tagħti deċiżjoni dwar dak ir-rikors (sentenza tat‑30 ta’ Settembru 2021, Il‑Qorti tal‑Awdituri vs Pinxten, C‑130/19, EU:C:2021:782, punt 88).

456

Hemm lok li dan ir-raġunament jiġi traspost għal din il-proċedura, imressqa taħt ir-raba’ paragrafu tal-Artikolu 263 TFUE. Fil-fatt, ebda regola tad-dritt tal-Unjoni ma tipprevedi li proċedura mibdija quddiem il-Qorti Ġenerali taħt din id-dispożizzjoni għandha tiġi sospiża meta jkunu nbdew proċeduri kriminali li jirrigwardaw, totalment jew parzjalment, l-istess fatti. Barra minn hekk, il-konsegwenzi finanzjarji li jirriżultaw mill-ksur, minn Membru tal-Qorti tal-Awdituri, tal-obbligi li jirriżultaw mill-kariga tiegħu ma humiex irregolati mir-regoli dwar il-proċedura dixxiplinari stabbiliti mir-Regolamenti tal-Persunal. Dawn il-konsegwenzi finanzjarji ġew applikati skont id-dispożizzjonijiet tal-Artikoli 98 u 100 tar-Regolament 2018/1046. Barra minn hekk, fil-kuntest ta’ din il-proċedura, huwa wkoll possibbli li jiġi konkluż li eventwali sospensjoni ta’ din il-proċedura, fl-istennija tal-eżitu tal-proċeduri kriminali mibdija fil-Lussemburgu, ma hijiex neċessarja, peress li, fi kwalunkwe każ, l-eżitu ta’ dawk il-proċeduri ma huwiex ta’ natura li jillimita l-portata tal-evalwazzjonijiet li l-Qorti tal-Ġustizzja hija obbligata twettaq sabiex tagħti deċiżjoni dwar dan ir-rikors.

457

Fid-dawl tal-kunsiderazzjonijiet preċedenti, dan il-motiv għandu jiġi miċħud bħala infondat.

6.

Fuq is‑sitt motiv ibbażat fuq il‑ksur tal‑obbligu ta’ motivazzjoni fir‑rigward tal‑użu tas‑servizzi ta’ xufiera u fuq il‑ksur tal‑Artikolu 75 tar‑Regolament Nru 966/2012 jew tal‑Artikolu 94 tar‑Regolament 2018/1046

458

Ir-rikorrent jikkontesta l-fatt li huwa jista’ jinżamm responsabbli fil-kwalità tiegħu ta’ uffiċjal awtorizzanti għall-ispejjeż tax-xufiera tiegħu, li jammontaw għal EUR 30 501.27 għas-salarji tagħhom u għal EUR 40 595.15 għall-ispejjeż tal-missjoni u għall-allowances ta’ kuljum. Huwa jirreferi għall-Artikolu 75 tar-Regolament Nru 966/2012 u jqis li din ir-responsabbiltà tista’ tiġi stabbilita biss fil-każ ta’ “nuqqas intenzjonali” jew ta’ “negliġenza serja” min-naħa tiegħu bħala uffiċjal awtorizzanti tal-missjonijiet tax-xufiera. Huwa jindika wkoll li din id-dispożizzjoni kif ukoll l-Artikolu 94 tar-Regolament 2018/1046 jipprevedu riferiment lill-korp speċjalizzat fil-qasam tal-irregolaritajiet finanzjarji fil-każ ta’ tqegħid inkwistjoni tar-responsabbiltà ta’ attur finanzjarju. Barra minn hekk, ir-rikorrent ifakkar li huwa ma huwiex l-uffiċjal awtorizzanti tal-allowances ta’ kuljum tax-xufiera li saquh jew tar-remunerazzjoni tagħhom.

459

Ir-rikorrent iqis li l-Qorti tal-Awdituri kisret, minn naħa, l-obbligu ta’ motivazzjoni tagħha meta naqset, fid-deċiżjoni kkontestata, milli tirrispondi għal “wieħed mill-argumenti mqajma [minnu] fil-kuntest tal-eżerċizzju tad-dritt tiegħu għal smigħ” u, min-naħa l-oħra, l-Artikolu 75 tar-Regolament Nru 966/2012 jew l-Artikolu 94 tar-Regolament 2018/1046.

460

Bħala paragun, ir-rikorrent jindika li l-kwalità ta’ uffiċjal awtorizzanti taż-żewġ Presidenti tal-Qorti tal-Awdituri matul iż-żewġ mandati tiegħu għall-ispejjeż tagħhom ta’ missjonijiet, ta’ rappreżentanza u ta’ ospitalità ma wasslitx għal tqegħid inkwistjoni tar-responsabbiltà tagħhom. Barra minn hekk, huwa jsostni li l-ispejjeż tal-missjonijiet tax-xufiera kienu konformi mal-kuntest ġuridiku fis-seħħ fiż-żmien tal-fatti li wasslu għat-tilwima, jiġifieri, b’mod partikolari, mad-Deċiżjonijiet Nri 33‑2004 u 19‑2009.

461

Fl-osservazzjonijiet tiegħu dwar il-konsegwenzi li għandhom jinstiltu mis-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), għal din il-kawża, ir-rikorrent jirrileva li l-Qorti tal-Ġustizzja ma tatx deċiżjoni dwar dan il-motiv, li ma kienx tqajjem fil-kuntest tal-proċedura mressqa quddiemha mill-Qorti tal-Awdituri.

462

Il-Qorti tal-Awdituri tikkontesta l-argumenti tar-rikorrent.

463

Fl-ewwel lok, fir-rigward tal-ilment ibbażat fuq il-ksur tal-obbligu ta’ motivazzjoni, ir-rikorrent sempliċement jindika li d-deċiżjoni kkontestata ma tweġibx għal wieħed mill-argumenti tiegħu mqajma fil-kuntest tal-eżerċizzju tad-dritt tiegħu għal smigħ. Mingħajr ebda preċiżazzjoni fir-rigward tal-argument hekk imsemmi, hemm lok li jitqies li dan l-ilment ma jissodisfax ir-rekwiżiti meħtieġa mill-Artikolu 76(d) tar-Regoli tal-Proċedura tal-Qorti Ġenerali f’termini ta’ ċarezza u ta’ preċiżjoni u, għaldaqstant, li għandu jiġi miċħud bħala inammissibbli.

464

Għandu jitfakkar li, skont l-ewwel paragrafu tal-Artikolu 21 tal-Istatut tal-Qorti tal-Ġustizzja tal-Unjoni Ewropea, applikabbli għall-proċedura quddiem il-Qorti Ġenerali konformement mal-ewwel paragrafu tal-Artikolu 3 tal-istess Statut, kif ukoll skont l-Artikolu 76(d) tar-Regoli tal-Proċedura, ir-rikors għandu jinkludi s-suġġett tat-tilwim, il-motivi u l-argumenti invokati kif ukoll espożizzjoni sommarja tal-imsemmija motivi. Dawn l-elementi għandhom ikunu ċari u preċiżi biżżejjed sabiex jippermettu lill-konvenut jipprepara d-difiża tiegħu u lill-Qorti Ġenerali tagħti deċiżjoni fuq ir-rikors, skont il-każ, mingħajr ebda informazzjoni oħra. Sabiex tiġi ggarantita ċ-ċertezza legali u amministrazzjoni tajba tal-ġustizzja, huwa meħtieġ, sabiex rikors ikun ammissibbli, li l-elementi essenzjali ta’ fatt u ta’ liġi li r-rikors ikun ibbażat fuqhom ikunu jirriżultaw b’mod koerenti u komprensibbli mit-test tar-rikors stess. (ara, f’dan is-sens, id-digriet tat‑28 ta’ April 1993, De Hoe vs Il‑Kummissjoni, T‑85/92, EU:T:1993:39, punt 20 u l-ġurisprudenza ċċitata). Ir-rikors għandu, għalhekk, jispjega fiex jikkonsisti l-motiv li fuqu r-rikors huwa bbażat, b’mod li s-sempliċi dikjarazzjoni astratta tiegħu ma tissodisfax ir-rekwiżiti tar-Regoli tal-Proċedura. Rekwiżiti simili huma meħtieġa meta jiġi invokat ilment insostenn ta’ motiv. (ara s-sentenza tal‑25 ta’ Marzu 2015, Il‑Belġju vs Il‑Kummissjoni, T‑538/11, EU:T:2015:188, punt 131 u l-ġurisprudenza ċċitata, digriet tas‑27 ta’ Novembru 2020, PL vs Il‑Kummissjoni, T‑728/19, mhux ippubblikat, EU:T:2020:575, punt 64).

465

Fit-tieni lok, fir-rigward tal-ilment ibbażat fuq il-ksur tal-Artikolu 75 tar-Regolament Nru 966/2012 jew tal-Artikolu 94 tar-Regolament 2108/1046, ir-rikorrent ippreċiża, waqt is-seduta, li dan kien jirrigwarda, fir-realtà, l-Artikolu 73 tar-Regolament Nru 966/2012 jew l-Artikolu 92 tar-Regolament 2018/1046.

466

F’dak li jirrigwarda l-eżami fuq il-mertu tal-ilment ibbażat fuq il-ksur ta’ dawn l-aħħar dispożizzjonijiet, huwa biżżejjed li jiġi osservat li mis-sistema applikabbli għall-użu tas-servizzi ta’ xufier minn Membru tal-Qorti tal-Awdituri jirriżulta, hekk kif ippreċiżat mill-Qorti tal-Ġustizzja fil-punti 695 sa 700 tas-sentenza tat‑30 ta’ Settembru 2021, Il‑Qorti tal‑Awdituri vs Pinxten (C‑130/19, EU:C:2021:782), li kien ir-rikorrent bħala uffiċjal awtorizzanti tal-missjonijiet tax-xufiera li kellu jiżgura li, meta jistabbilixxi l-ordnijiet ta’ missjoni tax-xufiera tiegħu, ir-regoli applikabbli f’dan ir-rigward jiġu osservati. Dan ir-rekwiżit għandu jitqies bħala indipendenti minn kull rikors eventwali għall-proċedura stabbilita mill-Artikolu 73 tar-Regolament Nru 966/2012 jew mill-Artikolu 92 tar-Regolament 2018/1046 jew anki mir-riferiment lill-OLAF. Għaldaqstant, dawn id-dispożizzjonijiet huma irrilevanti għal din il-proċedura.

467

Barra minn hekk, ir-responsabbiltà tar-rikorrent bħala uffiċjal awtorizzanti tal-missjonijiet tax-xufiera, intenzjonali jew b’negliġenza serja, ma tistax titqabbel ma’ dik tal-President tal-Qorti tal-Awdituri fil-kwalità tiegħu ta’ uffiċjal awtorizzanti għall-ispejjeż tal-missjonijiet, ta’ rappreżentanza u ta’ ospitalità sostnuti mill-Membri tal-Qorti tal-Awdituri. Fil-fatt, il-missjonijiet tax-xufiera huma marbuta mal-attivitajiet tar-rikorrent innifsu, filwaqt li ma hemmx tali rabta bejn il-Membru tal-Qorti tal-Awdituri u l-President tiegħu fir-rigward tal-missjonijiet tal-ewwel wieħed.

468

Fid-dawl tal-kunsiderazzjonijiet preċedenti, l-ilment ibbażat fuq il-ksur tal-Artikolu 73 tar-Regolament Nru 966/2012 jew tal-Artikolu 92 tar-Regolament 2018/1046 għandu jiġi miċħud bħala infondat.

469

Barra minn hekk, fir-rigward tal-ilment li permezz tiegħu r-rikorrent jikkontesta r-responsabbiltà tiegħu għall-ispejjeż tax-xufiera tiegħu, li jammontaw għal EUR 30 501.27 għas-salarji tagħhom u għal EUR 40 595,15 għall-ispejjeż tal-missjoni u għall-allowances ta’ kuljum, tali lment jissovrapponi, essenzjalment, ma’ dak ibbażat fuq l-eżistenza ta’ “żbalji manifesti”, diġà eżaminat fil-kuntest tar-raba’ motiv (ara l-punti 394 sa 451 iktar ’il fuq).

470

Fid-dawl tal-kunsiderazzjonijiet preċedenti, is-sitt motiv għandu jiġi miċħud kollu kemm hu.

7.

Konklużjoni fuq it‑talba għall‑annullament tad‑deċiżjoni kkontestata

471

Fid-dawl tal-kunsiderazzjonijiet kollha preċedenti, mingħajr ma huwa neċessarju li jiġu adottati l-miżuri ta’ organizzazzjoni tal-proċedura mitluba mir-rikorrent, hemm lok li d-deċiżjoni kkontestata tiġi annullata sa fejn din tirrigwarda, minn naħa, it-talbiet għar-rimbors tal-ispejjeż meqjusa bħala preskritti mill-Qorti Ġenerali fil-punt 162 iktar ’il fuq u, min-naħa l-oħra, dawk imsemmija fil-punt 452 iktar ’il fuq. B’kollox, l-ispejjeż marbuta ma’ dawn it-talbiet kollha jammontaw għal total ta’ EUR 19 254.20. Il-kumplament tat-talba għall-annullament tad-deċiżjoni kkontestata għandha tiġi miċħuda.

B.

Fuq it‑talbiet għall‑annullament tad‑deċiżjonijiet tal‑uffiċjal tal‑kontabbiltà tal‑Qorti tal‑Awdituri tal‑4 u tas‑7 ta’ Ġunju 2019

472

Għandu jiġi osservat li, fil-kuntest tat-talbiet għal annullament, immedjatament wara t-talba tiegħu għall-annullament tad-deċiżjoni kkontestata, ir-rikorrent jitlob, “sa fejn ikun meħtieġ”, li jiġu annullati d-deċiżjonijiet tal-uffiċjal tal-kontabbiltà tal-Qorti tal-Awdituri tal‑4 u tas‑7 ta’ Ġunju 2019. F’dan ir-rigward, għandu jitqies li, mingħajr ma jqajjem ebda lment speċifikament dirett kontra dawn iż-żewġ deċiżjonijiet, ir-rikorrent jitlob l-annullament tagħhom f’dak li jirrigwarda l-ammont imsemmi fihom, hekk kif miżjud bl-interessi mill‑31 ta’ Mejju 2019, li, skont il-kalkoli tal-uffiċjal tal-kontabbiltà tal-Qorti tal-Awdituri, kien jammonta għal EUR 153 584.10 fl‑4 ta’ Ġunju 2019 u għal ammont ta’ EUR 153 495.84 fis‑7 ta’ Ġunju 2019.

473

F’dan il-każ, għandu jiġi kkonstatat li kien permezz tal-ittra tas‑7 ta’ Ġunju 2019 li l-uffiċjal tal-kontabbiltà tal-Qorti tal-Awdituri kkonstata li l-ħlas kien sar billi ttieħdu inkunsiderazzjoni l-interessi dovuti għal din id-data. (ara l-punt 57 iktar ’il fuq). Għaldaqstant, fid-dawl tal-konklużjoni misluta fil-punt 471 iktar ’il fuq, hemm lok li t-talbiet għall-annullament tad-deċiżjoni tal-uffiċjal tal-kontabbiltà tal-Qorti tal-Awdituri inkluża fl-ittra tagħha tas‑7 ta’ Ġunju 2019 tiġi annullata, sa fejn din tipprevedi l-ħlas tal-interessi moratorji bir-rata ta’ 3.5 % fuq l-ammont indikat fil-punt 471 iktar ’il fuq.

474

F’dawn iċ-ċirkustanzi, ma huwiex neċessarju li tiġi annullata d-deċiżjoni tal‑4 ta’ Ġunju 2019, li tinkludi ammont, miżjud bl-interessi mill‑31 ta’ Mejju sal‑4 ta’ Ġunju 2019, minbarra dak ikkonstatat mill-uffiċjal tal-kontabbiltà tal-Qorti tal-Awdituri fis‑7 ta’ Ġunju 2019 u effettivament imħallas mir-rikorrent.

C.

Fuq it‑talbiet għal rimbors u għall‑ħlas tal‑interessi

475

Ir-rikorrent jitlob li l-Qorti Ġenerali tikkundanna lill-Qorti tal-Awdituri tirrimborsah l-ammont li hija kklassifikat li huwa ħlas indebitu u tħallsu interessi bir-rata ta’ 3.5 % mill‑31 ta’ Mejju 2019, data limitu li ġiet imposta fuqu mid-deċiżjoni kkontestata sabiex iħallas ammont totali ta’ EUR 153 407.58, sal-ħlas sħiħ.

476

Għandu jitfakkar li l-annullament ta’ att mill-qorti tal-Unjoni għandu l-effett li jelimina b’mod retroattiv dan l-att mill-ordinament ġuridiku (ara s-sentenza tat‑30 ta’ Ġunju 2021, Mélin vs Il‑Parlament, T‑51/20, mhux ippubblikata, EU:T:2021:398, punt 68 u l-ġurisprudenza ċċitata).

477

Konformement mal-Artikolu 266 TFUE, l-istituzzjoni, il-korp jew l-organu li minnhom jirriżulta l-att annullat għandhom jieħdu l-miżuri neċessarji għall-eżekuzzjoni tas-sentenza ta’ annullament. L-istituzzjoni konvenuta hija għalhekk marbuta, skont din id-dispożizzjoni, tieħu l-miżuri neċessarji sabiex telimina l-effetti tal-illegalitajiet ikkonstatati (ara s-sentenza tat‑30 ta’ Ġunju 2021, Mélin vs Il‑Parlament, T‑51/20, mhux ippubblikata, EU:T:2021:398, punt 69 u l-ġurisprudenza ċċitata).

478

Barra minn hekk, meta l-att annullat ikun diġà ġie implimentat, it-tneħħija tal-effetti tiegħu tkun titlob, bħala prinċipju, li tiġi stabbilita mill-ġdid is-sitwazzjoni ġuridika li r-rikorrent kien jinsab fiha qabel l-adozzjoni tal-imsemmi att (ara s-sentenza tat‑30 ta’ Ġunju 2021, Mélin vs Il‑Parlament, T‑51/20, mhux ippubblikata, EU:T:2021:398, punt 70 u l-ġurisprudenza ċċitata).

479

Fir-rigward tal-ħlas tal-interessi bir-rata ta’ 3.5 % mill‑31 ta’ Mejju 2019, għandu jiġi osservat dan li ġej.

480

Mill-ġurisprudenza tal-Qorti tal-Ġustizzja jirriżulta li, meta s-somom ikunu nġabru bi ksur tad-dritt tal-Unjoni, minn dan id-dritt jirriżulta obbligu li dawn jitħallsu lura bl-interessi. Dan huwa, b’mod partikolari, il-każ meta somom ikunu ġew rċevuti b’applikazzjoni ta’ att tal-Unjoni li jkun iddikjarat invalidu jew annullat mill-qorti tal-Unjoni (sentenza tal‑20 ta’ Jannar 2021, Il‑Kummissjoni vs Printeos, C‑301/19 P, EU:C:2021:39, punti 66 u 67).

481

Fir-rigward, b’mod partikolari, tal-annullament mill-qorti tal-Unjoni ta’ att li kien implika l-ħlas ta’ somma lill-Unjoni, il-Qorti tal-Ġustizzja ddeċidiet li l-ħlas ta’ interessi moratorji jikkostitwixxi miżura ta’ eżekuzzjoni tas-sentenza ta’ annullament, fis-sens tal-ewwel paragrafu tal-Artikolu 266 TFUE, sa fejn dawn huwa intiż li jikkumpensa b’rata fissa ċ-ċaħda tat-tgawdija ta’ kreditu u jħeġġeġ lid-debitur jeżegwixxi, fl-iqsar żmien possibbli, is-sentenza ta’ annullament (sentenza tal‑20 ta’ Jannar 2021, Il‑Kummissjoni vs Printeos, C‑301/19 P, EU:C:2021:39, punt 68).

482

F’dan il-każ, hekk kif ippreċiżat il-Qorti tal-Awdituri waqt is-seduta, l-interessi għandhom jiġu kkalkolati mis‑7 ta’ Ġunju 2019, jiġifieri mill-ħlas imwettaq mir-rikorrent. Fil-fatt, l-allokazzjoni ta’ interessi moratorji mid-data tal-ħlas tas-somma inkwistjoni mir-rikorrent għandha l-għan li tikkumpensa b’rata fissa ċ-ċaħda tat-tgawdija, mir-rikorrent, tal-fondi tiegħu (ara, f’dan is-sens, is-sentenza tal‑20 ta’ Jannar 2021, Il‑Kummissjoni vs Printeos, C‑301/19 P, EU:C:2021:39, punt 85).

483

Fir-rigward tar-rata tal-interessi mitluba mir-rikorrent, jiġifieri 3.5 %, skont il-ġurisprudenza, b’applikazzjoni tal-Artikolu 99(2)(b) tar-Regolament 2018/1046, ir-rata tal-interessi applikabbli hija kkalkolata abbażi tar-rata applikata mill-Bank Ċentrali Ewropew (BĊE) għall-operazzjonijiet prinċipali tiegħu ta’ finanzjament mill-ġdid u fis-seħħ fl-ewwel jum kalendarju tax-xahar tal-iskadenza tal-ħlas, miżjuda bi tliet punti perċentwali u nofs (ara, b’analoġija, id-digriet tas‑27 ta’ Jannar 2016, ANKO vs Il‑Kummissjoni u REA, T‑165/14 DEP, mhux ippubblikat, EU:T:2016:108, punt 50).

484

Sa fejn ir-rikorrent jitlob il-ħlas ta’ interessi li jammontaw biss għar-rata ta’ 3.5 %, u mhux għar-rata stabbilita mill-BĊE għall-operazzjonijiet prinċipali tiegħu ta’ finanzjament mill-ġdid, miżjuda bi 3.5 punti perċentwali, għandu jiġi deċiż biss li, f’dan il-każ, l-ammont ta’ EUR 19 254.20 jipproduċi, mis‑7 ta’ Ġunju 2019, interessi moratorji bir-rata ta’ 3.5 %, u dan sal-ħlas sħiħ mill-Qorti tal-Awdituri.

D.

Fuq it‑talbiet għad‑danni

485

Ir-rikorrent jitlob li l-Qorti tal-Awdituri tiġi kkundannata għall-ħlas ta’ danni sabiex jiġi kkumpensat id-dannu morali li huwa allegatament ġarrab, li huwa jevalwa, ex æquo et bono, għal EUR 50 000. Huwa jsostni li l-Qorti tal-Awdituri ppreġudikat il-karriera u r-reputazzjoni tiegħu permezz tal-komunikazzjonijiet suċċessivi tagħha dwar l-eżistenza u l-konklużjonijiet tar-rapport tal-OLAF fil-mument meta huwa stess ma kellux dan ir-rapport, u lanqas rapport preliminari eventwali tal-President tal-Qorti tal-Awdituri. F’dan ir-rigward, ir-rikorrent jirrileva li r-rapport tal-OLAF tqiegħed għad-dispożizzjoni tal-Membri tal-Qorti tal-Awdituri u tal-Kumitat għall-Kontroll tal-Baġit tal-Parlament fit‑3 ta’ Lulju 2018, filwaqt li kien biss fil‑5 ta’ Ottubru 2018 li r-rapport preliminari tal-President tal-Qorti tal-Awdituri, li kien jinkludi r-rapport tal-OLAF, ġie kkomunikat lilu. Madankollu, huwa jindika li, “fuq il-bażi ta’ żvelar”, fil‑11 ta’ Lulju 2018, l-istampa kienet diġà xandret l-eżistenza u l-konklużjonijiet tar-rapport tal-OLAF. F’dan il-kuntest, huwa jikkritika lill-Qorti tal-Awdituri li ma wettqitx investigazzjoni sabiex tidentifika s-sors preċiż tal-“iżvelar”. Ir-rikorrent ifakkar ukoll il-fatt li, fl-istess jum, fil‑11 ta’ Lulju 2018, il-Qorti tal-Awdituri ħarġet stqarrija għall-istampa u komunikazzjoni lill-persunal kollu tagħha.

486

Ir-rikorrent iqis li, billi rreferiet għall-investigazzjoni tal-OLAF fil-komunikazzjonijiet li qajmu kwistjonijiet dwaru u billi indikat li kienu ser jittieħdu miżuri bil-għan tal-irkupru ta’ spejjeż frawdolenti, il-Qorti tal-Awdituri xerrdet l-informazzjoni fis-sens li huwa kien ħati ta’ miżapproprazzjonijiet u ppreġudikat serjament il-preżunzjoni ta’ innoċenza li kienet dovuta lilu. Skont ir-rikorrent, il-Qorti tal-Awdituri, b’dan il-mod, ħadet pożizzjoni mingħajr ma kienet informata utilment, bi ksur tar-rekwiżiti tal-prinċipju ta’ amministrazzjoni tajba previst fl-Artikolu 41 tal-Karta u tal-kompetenzi tagħha. Huwa jqajjem ukoll ksur tal-garanziji proċedurali previsti mit-Trattat FUE u mir-Regoli ta’ Proċedura tal-Qorti tal-Awdituri.

487

Fir-replika, ir-rikorrent jinvoka l-ksur mill-Qorti tal-Awdituri tal-prinċipju ta’ preżunzjoni ta’ innoċenza, tal-prinċipju ta’ amministrazzjoni tajba, b’mod iktar partikolari tar-regola ta’ imparzjalità u tad-dmir ta’ diliġenza li għandhom l-istituzzjonijiet tal-Unjoni, u tal-garanziji proċedurali kif ukoll tal-obbligu ta’ kunfidenzjalità.

488

Il-Qorti tal-Awdituri tqis li t-talba għad-danni tar-rikorrent hija inammissibbli, peress li din tressqet fil-kuntest ta’ rikors għal annullament ippreżentat abbażi tar-raba’ paragrafu tal-Artikolu 263 TFUE u mhux ta’ rikors awtonomu ppreżentat b’applikazzjoni tal-Artikoli 268 u 340 TFUE. Waqt is-seduta, hija ppreċiżat li hija ma kinitx qiegħda tikkontesta l-fatt li kien possibbli, bħala prinċipju, li titressaq, fi ħdan l-istess rikors, talba għad-danni u talba għal annullament. Madankollu, fil-fehma tagħha, it-talba għad-danni tar-rikorrent ma hijiex ammissibbli, sa fejn din ma tiżviluppax, b’mod suffiċjenti fid-dritt, il-kundizzjonijiet kollha li għalihom huwa suġġett l-istabbiliment tar-responsabbiltà mhux kuntrattwali tal-Unjoni. Hija tfakkar li kien biss fir-replika li r-rikorrent wettaq preżentazzjoni iktar strutturata tat-talba tiegħu għal kumpens.

489

Preliminarjament, għandu jitfakkar li, konformement ma’ ġurisprudenza stabbilita, l-istabbiliment tar-responsabbiltà mhux kuntrattwali tal-Unjoni, fis-sens tat-tieni paragrafu tal-Artikolu 340 TFUE, jeħtieġ li jkunu ssodisfatti kumulattivament numru ta’ kundizzjonijiet, jiġifieri l-illegalità tal-aġir ikkritikat fil-konfront tal-istituzzjoni tal-Unjoni, in-natura reali tad-dannu u l-eżistenza ta’ rabta kawżali bejn l-aġir ta’ din l-istituzzjoni u d-dannu invokat (Ara s-sentenza tal‑20 ta’ Settembru 2016, Ledra Advertising et vs Il‑Kummissjoni u BĊE (C‑8/15 P sa C‑10/15 P, EU:C:2016:701, punti 64 u l-ġurisprudenza ċċitata).

490

Peress li waħda mit-tliet kundizzjonijiet għall-istabbiliment tar-responsabbiltà mhux kuntrattwali tal-Unjoni ma hijiex issodisfatta, it-talbiet għal kumpens għandhom jiġu miċħuda, mingħajr ma huwa neċessarju li jiġi eżaminat jekk iż-żewġ kundizzjonijiet l-oħra humiex issodisfatti (ara d-digriet tal‑11 ta’ Novembru 2014, Bergallou vs Il‑Parlament u Il‑Kunsill, T‑22/14, mhux ippubblikat, EU:T:2014:954, punt 61 u l-ġurisprudenza ċċitata).

491

Insostenn tat-talba tiegħu għad-danni, ir-rikorrent jikkritika, essenzjalment, lill-Qorti tal-Awdituri b’żewġ istanzi ta’ aġir: minn naħa, li ma wettqitx investigazzjoni sabiex tidentifika s-sors preċiż tal-“iżvelar” dwar l-eżistenza u l-konklużjonijiet tar-rapport tal-OLAF fir-rigward tiegħu u, min-naħa l-oħra, li xandret stqarrija għall-istampa u komunikazzjoni lill-persunal kollu tagħha fil‑11 ta’ Lulju 2018, jiġifieri wara dan l-“iżvelar” ta’ informazzjoni, iżda qabel ma ġie kkomunikat lilu r-rapport tal-OLAF jew ir-rapport preliminari tal-President tal-Qorti tal-Awdituri.

492

F’dan ir-rigward, għandu jiġi kkonstatat li, waqt is-seduta, il-Qorti tal-Awdituri ppreċiżat li ma kienx hemm stqarrija għall-istampa fuq inizjattiva tagħha stess, fatt li r-rikorrent ma kkontestax. L-eżistenza ta’ stqarrija għall-istampa lanqas ma tirriżulta mill-proċess. Għalhekk, fil-kuntest tal-eżami ta’ din it-talba għad-danni, l-ilment tar-rikorrent ibbażat fuq l-eżistenza ta’ stqarrija għall-istampa min-naħa tal-Qorti tal-Awdituri għandu qabelxejn jiġi miċħud bħala mhux issostanzjat biżżejjed.

493

Barra minn hekk, huwa biżżejjed li jiġi kkonstatat li mill-osservazzjonijiet tal-Qorti tal-Awdituri fformulati waqt is-seduta, mhux ikkontestati f’dan ir-rigward mir-rikorrent, jirriżulta li din tal-aħħar ħarġet komunikazzjoni lill-persunal kollu tagħha fil‑11 ta’ Lulju 2018 biss wara li, “abbażi ta’ żvelar”, l-istampa kienet diġà xandret l-eżistenza u l-konklużjonijiet tar-rapport tal-OLAF. Waqt is-seduta, il-Qorti tal-Awdituri ppreċiżat li hija kienet wieġbet għal xi mistoqsijiet magħmula f’dan ir-rigward minn ġurnalisti, u t-tweġibiet tagħha sussegwentement ġew ikkomunikati lill-persunal kollu. Dan huwa kkonfermat ukoll, minn naħa, mit-test stess tal-komunikazzjoni tal-Qorti tal-Awdituri lill-persunal tagħha, li jirreferi għall-“mistoqsijiet magħmula mill-istampa” u, min-naħa l-oħra, mill-artiklu tal-istampa ċċitat mir-rikorrent fil-punt 234 tar-rikors, li jirreferi għal “sors informat tajjeb li mmanifesta ruħu b’mod anonimu” u li kien ikkomunika informazzjoni lill-istampa dwar l-investigazzjoni tal-OLAF kontra r-rikorrent.

494

Minn dan isegwi li huwa dan l-“iżvelar” ta’ informazzjoni minn qabel fl-istampa min-naħa ta’ terz anonimu li ta lok għall-komunikazzjoni sussegwenti tal-Qorti tal-Awdituri lill-persunal kollu tagħha u li jikkostitwixxi, fir-realtà, il-bażi tal-allegazzjonijiet tar-rikorrent fir-rigward tad-dannu għall-karriera u għar-reputazzjoni tiegħu. Madankollu, f’dawn iċ-ċirkustanzi, ir-rikorrent ma jipproduċix prova prima facie li tistabbilixxi li dan l-iżvelar ta’ informazzjoni fl-istampa dwar l-eżistenza u l-konklużjonijiet tar-rapport tal-OLAF fil-konfront tiegħu kien imputabbli lill-Qorti tal-Awdituri.

495

Għaldaqstant, peress li r-rikorrent ma stabbilixxiex li d-dannu allegat għall-karriera tiegħu u għar-reputazzjoni tiegħu kien il-konsegwenza diretta ta’ att imputabbli lill-Qorti tal-Awdituri, għandu jitqies li ebda nuqqas ta’ din tal-aħħar ma jista’ jiġi kkonstatat u li l-ewwel kundizzjoni għall-istabbiliment tar-responsabbiltà tal-Unjoni, fost dawk imfakkra fil-punt 489 iktar ’il fuq, ma hijiex issodisfatta. Barra minn hekk, għalkemm ir-rikorrent jikkritika lill-Qorti tal-Awdituri li ma wettqitx investigazzjoni sabiex tidentifika s-sors preċiż tal-“iżvelar” ta’ informazzjoni fl-istampa inkwistjoni, huwa ma jindikax il-bażi legali li fuqha l-Qorti tal-Awdituri kienet marbuta b’tali obbligu, fid-dawl tal-fatt barra minn hekk li dan huwa “żvelar” ta’ informazzjoni li ma jistax jiġi imputat lilha.

496

Konsegwentement, it-talba għad-danni tar-rikorrent għandha tiġi miċħuda, mingħajr ma huwa neċessarju li tingħata deċiżjoni dwar l-ammissibbiltà tagħha.

V.

Fuq l‑ispejjeż

497

Skont l-Artikolu 134(1) tar-Regoli tal-Proċedura, il-parti li titlef il-kawża għandha tiġi kkundannata għall-ispejjeż, jekk dawn ikunu ntalbu. Barra minn hekk, skont l-Artikolu 134(3) tar-Regoli tal-Proċedura, jekk il-partijiet jitilfu rispettivament fuq waħda jew iktar mit-talbiet tagħhom, kull parti għandha tbati l-ispejjeż rispettivi tagħha. Madankollu, jekk fid-dawl taċ-ċirkustanzi tal-kawża jkun jidher ġustifikat, il-Qorti Ġenerali tista’ tiddeċiedi li waħda mill-partijiet għandha, minbarra l-ispejjeż tagħha, tbati parti mill-ispejjeż tal-parti l-oħra.

498

Minkejja li d-deċiżjoni kkontestata hija annullata fir-rigward ta’ ammont ta’ EUR 19 254.20, li jirrappreżenta madwar parti waħda minn tmienja tal-ammont totali ta’ EUR 153 407.58 meqjus mill-Qorti tal-Awdituri li huwa indebitu, għandu jiġi rrilevat li r-rikorrent tilef f’dak li jirrigwarda s-seba’ partijiet minn tmienja ta’ dan l-aħħar ammont u f’dak li jirrigwarda r-rikors tiegħu għad-danni. Għaldaqstant, hemm lok li r-rikorrent jiġi kkundannat ibati l-ispejjeż tal-Qorti tal-Awdituri u erba’ partijiet minn ħamsa tal-ispejjeż tiegħu, filwaqt li l-Qorti tal-Awdituri għandha tbati l-parti waħda minn ħames li jkun għad jifdal.

1)

Id-deċiżjoni tal-Qorti Ewropea tal-Awdituri tal‑11 ta’ April 2019 dwar konstatazzjoni ta’ kreditu u rkupru fir-rigward ta’ CQ, li tikkwantifika somma ta’ EUR 153 407.58 bħala ħlas indebitament irċevut u li tordna l-irkupru tagħha, hija annullata inkwantu din tirrigwarda ammont ta’ EUR 19 254.20, u d-deċiżjoni inkluża fl-ittra tal-uffiċċjal tal-kontabbiltà tal-Qorti tal-Awdituri tas‑7 ta’ Ġunju 2019 hija annullata inkwantu din tipprevedi l-ħlas tal-interessi moratorji bir-rata ta’ tliet punti perċentwali u nofs fuq l-imsemmi ammont.

2)

Interessi moratorji bir-rata ta’ tliet punti ta’ perċentwali u nofs fuq is-somma ta’ EUR 19 254.20 għandhom jitħallsu mis‑7 ta’ Ġunju 2019 ’il quddiem u dan sal-ħlas komplet mill-Qorti tal-Awdituri.

3)

Il-kumplament tar-rikors huwa miċħud.

4)

CQ huwa kkundannat ibati l-ispejjeż tal-Qorti tal-Awdituri u erba’ partijiet minn ħamsa tal-ispejjeż tiegħu, u l-Qorti tal-Awdituri għandha tbati l-parti waħda minn ħamsa li jkun għad jifdal.