(1)

L-Artikolu 5 tar-Regolament (UE) Nru 1370/2013 jistabbilixxi l-ammont totali tal-għajnuna tal-Unjoni għall-għoti ta’ frott u ħaxix, frott u ħaxix ipproċessat u prodotti tal-banana lit-tfal kif imsemmi fl-Artikolu 23 tar-Regolament (UE) Nru 1308/2013 tal-Parlament Ewropew u tal-Kunsill (2) (minn hawn ’il quddiem “l-iskema tal-frott u l-ħxejjex fl-iskejjel”). Barra minn hekk, l-Artikolu 5 tar-Regolament (UE) Nru 1370/2013 jiffissa r-rati massimi ta’ kofinanzjament u l-ammont minimu ta’ dik l-għajnuna għal kull Stat Membru.

(2)

Il-Kummissjoni għandha tiffissa l-allokazzjoni indikattiva tal-għajnuna mill-iskema tal-frott u l-ħxejjex fl-iskejjel lil kull Stat Membru fuq il-bażi tal-kriterji msemmija fl-Artikolu 23(5) tar-Regolament (UE) Nru 1308/2013. Barra minn hekk, il-Kummissjoni għandha tevalwa perjodikament jekk l-allokazzjoni indikattiva tkunx għadha konsistenti ma’ dawk il-kriterji.

(3)

L-Anness II tar-Regolament tal-Kummissjoni (KE) Nru 288/2009 (3) jistabbilixxi l-ammont tal-allokazzjoni indikattiva tal-għajnuna mill-Unjoni għal kull Stat Membru, ibbażat fuq il-baġit totali tal-Unjoni ta’ EUR 90 miljun. Billi r-Regolament (UE) Nru 1370/2013 iżid il-baġit totali għall-iskema tal-frott u l-ħxejjex fl-iskejjel għal EUR 150 miljun u jiffissa rati ġodda ta’ kofinanzjament, għandha tiġi ffissata allokazzjoni indikattiva ġdida.

(4)

L-allokazzjoni indikattiva l-ġdida għandha tqis ukoll il-kriterji msemmija fl-Artikolu 23(5) tar-Regolament (UE) Nru 1308/2013 ibbażati fuq l-aktar dejta reċenti disponibbli mill-2012 fir-rigward tan-numru ta' tfal ta’ bejn is-sitta u l-għaxar snin bħala proporzjon tal-popolazzjoni fir-reġjuni tal-Istat Membru.

(5)

Għaldaqstant, ir-Regolament (KE) Nru 288/2009 għandu jiġi emendat skont dan. Minħabba l-istruttura perjodika tas-sena skolastika, l-allokazzjoni indikattiva l-ġdida għandha tibda tapplika mill-1 ta' Awwissu 2014.

(6)

Il-miżuri previsti f'dan ir-Regolament huma skont l-opinjoni tal-Kumitat ta' Ġestjoni għall-Organizzazzjoni Komuni tas-Swieq Agrikoli,