An Bhruiséil,17.7.2025

COM(2025) 397 final

2025/0214(NLE)

Togra le haghaidh

CINNEADH ÓN gCOMHAIRLE

maidir le tabhairt i gcrích, thar ceann an Aontais, an Phrótacail Leasaithigh a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta


MEABHRÁN MÍNIÚCHÁIN

1.COMHTHÉACS AN TOGRA

•Foras agus cuspóirí an togra

Baineann an togra seo le tabhairt i gcrích an Phrótacail Leasaithigh a ghabhann leis an gComhaontú idir an tAontas Eorpach agus Prionsacht Lichtinstéin (Lichtinstéin) maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta 1 (an Comhaontú).

Déantar foráil leis an gComhaontú maidir leis an mbunús dlí le haghaidh uathmhalartú cómhalartach faisnéise i dtaca le cuntais airgeadais idir Ballstáit an Aontais Eorpaigh agus Lichtinstéin, i gcomhréir leis an gComhchaighdeán Tuairiscithe arna fhorbairt ag an Eagraíocht um Chomhar agus Forbairt Eacnamaíochta (ECFE). Cuirtear an caighdeán céanna chun feidhme laistigh den Aontas Eorpach faoi Threoir 2014/107/AE ón gComhairle 2 (TCR 2 – an chéad leasú ar Threoir 2011/16/AE 3 maidir le comhar riaracháin i réimse an chánachais – an Treoir maidir le Comhar Riaracháin (TCR)).

Formheasadh athruithe tábhachtacha ar an gComhchaighdeán Tuairiscithe ar an leibhéal idirnáisiúnta an 26 Lúnasa 2022 4 agus beidh feidhm acu ón 1 Eanáir 2026. Le Treoir (AE) 2023/2226 ón gComhairle 5  (TCR8), cuireadh na hathruithe sin chun feidhme cheana laistigh den Aontas Eorpach agus beidh feidhm aici freisin ón 1 Eanáir 2026.

Leis na hathruithe, leathnaítear raon feidhme an Chomhchaighdeáin Tuairiscithe chun a áirithiú go gcumhdaítear táirgí ríomh-airgid agus airgeadraí digiteacha bainc ceannais. Cuireann siad tuilleadh feabhais freisin ar na nósanna imeachta maidir le dícheall cuí agus ar na torthaí tuairiscithe, chun inúsáidteacht fhaisnéis an Chomhchaighdeáin Tuairiscithe a mhéadú le haghaidh riaracháin chánach agus na hualaí ar institiúidí airgeadais a laghdú, i gcás inar féidir.

Chun a áirithiú go ndéanfar an t‑uathmhalartú faisnéise i dtaca le cuntais airgeadais idir Ballstáit an Aontais Eorpaigh agus Lichtinstéin a ailíniú leis an gComhchaighdeán Tuairiscithe a tugadh cothrom le dáta ón 1 Eanáir 2026, agus go leanfar den uathmhalartú sin a dhéanamh i gcomhréir leis an gComhchaighdeán sin, ba ghá leasuithe comhfhreagracha ar an gComhaontú a chaibidliú agus a chomhaontú.

I mí na Bealtaine 2018, cuireadh tús le cur i bhfeidhm Rialachán (AE) 2016/679 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n‑aisghairtear Treoir 95/46/CE (an Rialachán Ginearálta maidir le Cosaint Sonraí ‘RGCS’) 6 .

Chun a áirithiú go léireofaí na nuashonruithe sin sa Chomhaontú, ba ghá na tagairtí do Threoir aisghairthe 95/46/CE a bhaint agus tagairtí do Rialachán (AE) 2016/679 a chur in ionad na dtagairtí sin. An tráth céanna, léirítear sa chomhaontú go bhfuil RGCS curtha chun feidhme ag Lichtinstéin, bunaithe ar a ballraíocht in LEE, trí bhíthin Acht um Chosaint Sonraí an 4 Deireadh Fómhair 2018.

Glacadh cinneadh ón gComhairle an 21 Bealtaine 2024 lena n‑údaraítear tús a chur leis an gcaibidlíocht lena leasaítear an Comhaontú a bhaineann le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta idir an tAontas Eorpach agus Prionsacht Lichtinstéin 7 .

Tionóladh roinnt babhtaí caibidlíochta agus thángthas ar chomhaontú sealadach i mí Aibreáin 2025. Ina dhiaidh sin, rinne na príomh-idirbheartaithe dréacht-téacs an Phrótacail Leasaithigh a inisiliú i mí an Mheithimh 2025.

Cuireadh an Chomhairle ar an eolas i gcónaí faoin dul chun cinn sa chaibidlíocht sa Mheitheal um Cheisteanna Cánach agus sa Mheitheal Ardleibhéil. Go háirithe, comhroinneadh téacs an dréacht-Phrótacail Leasaithigh agus pléadh é leis na Ballstáit sular inisilíodh é.

Measann an Coimisiún gur baineadh amach na cuspóirí a shocraigh an Chomhairle ina treoir chaibidlíochta agus go bhfuil an téacs a caibidlíodh inghlactha don Aontas.

Síníodh an Prótacal Leasaitheach a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta, thar ceann an Aontais, an xxxx.

•Comhsheasmhacht le forálacha beartais atá sa réimse beartais cheana

Rinneadh leasú an Chomhaontaithe a chaibidliú i gcomhréir leis an treoir chuimsitheach chaibidlíochta a ghlac an Chomhairle an 21 Bealtaine 2024.

Áirithítear leis an bPrótacal Leasaitheach a caibidlíodh go mbeidh an comhaontú atá ann cheana idir an tAontas Eorpach agus Lichtinstéin ailínithe le reachtaíocht an Aontais sa réimse céanna fós, go háirithe TCR arna leasú le TCR8.

I measc leasuithe eile, áirítear le TCR8 na hathruithe is déanaí ar Chomhchaighdeán Tuairiscithe ECFE. I bhfianaise an dlúthchaidrimh sa réimse seo idir an tAontas Eorpach agus Lichtinstéin, tá sé tábhachtach an comhar riaracháin lena n‑údaráis chánach i réimse an uathmhalartaithe faisnéise i dtaca le cuntais airgeadais a neartú ar an gcaoi chéanna. Áirithítear leis an gComhaontú a thabhairt cothrom le dáta go tráthúil go leanfar leis an gcomhar riaracháin seo go réidh agus go héifeachtach tar éis an 1 Eanáir 2026.

Leis na leasuithe ar an gComhaontú, cuirtear san áireamh beartais an Aontais i réimse an chomhraic in aghaidh sciúradh airgid agus mhaoiniú na sceimhlitheoireachta, ós rud é go ndéanfar na gníomhaíochtaí maidir le Dícheall Cuí Custaiméara, a bheidh le déanamh ag na hInstitiúidí Airgeadais, d’fhonn an fhaisnéis i dtaca le cuntais airgeadais a bhailiú lena malartú faoin gComhaontú sin, a ailíniú ar bhealach substaintiúil leo siúd atá le cur i bhfeidhm ag na hInstitiúidí Airgeadais céanna mar eintitis faoi oibleagáid de réir chreat dlíthiúil an Aontais Eorpaigh sa chomhrac in aghaidh sciúradh airgid agus mhaoiniú na sceimhlitheoireachta.

Cuirtear san áireamh sa Phrótacal Leasaitheach freisin beartais an Aontais i réimse urraim na gceart bunúsach, go háirithe maidir le cosaint sonraí pearsanta i gcás eis-sreabhadh na sonraí sin chuig tíortha nach Ballstáit den Aontas Eorpach iad agus chuig tíortha nach tíortha LEE iad.

A mhéid a bhaineann leis na codanna a bhaineann leis an gComhchaighdeán Tuairiscithe, áirítear sa Chomhaontú féin, in Airteagal 8, foráil lena gceanglaítear ar na Páirtithe Conarthacha dul i gcomhairle le chéile gach uair a ghlactar athrú tábhachtach ar leibhéal ECFE ar aon cheann d’eilimintí an gComhchaighdeán Tuairiscithe. Déantar foráil leis an Airteagal freisin go bhféadfar an Comhaontú a leasú trí phrótacal idir na Páirtithe Conarthacha tar éis na gcomhairliúchán sin. Ós rud é gur formheasadh athruithe tábhachtacha ar an gComhchaighdeán Tuairiscithe laistigh de ECFE an 26 Lúnasa 2022, agus i gcomhréir le hinniúlacht eisiach an Aontais a eascraíonn as an gComhaontú atá ann cheana, cuireann an Prótacal Leasaitheach chun feidhme na hathruithe uile is gá chun na hathruithe comhfhreagracha ar an gComhchaighdeán Tuairiscithe a léiriú. Foráiltear cur chun feidhme na n‑athruithe sin laistigh den Aontas trí bhíthin Threoir (AE) 2023/2226 ón gComhairle.

2.BUNÚS DLÍ, COIMHDEACHT AGUS COMHRÉIREACHT

•An bunús dlí

I bhfianaise phríomhchuspóir agus chomhpháirteanna an Chomhaontaithe, is é Airteagal 115 den Chonradh ar Fheidhmiú an Aontais Eorpaigh (CFAE) bunús dlí substainteach an togra seo chuig an gComhairle.

Glacfaidh an Chomhairle an cinneadh lena dtabharfar an Prótacal Leasaitheach i gcrích tar éis di dul i gcomhairle le Parlaimint na hEorpa. Ós rud é gurb é Airteagal 115 CFAE an bunús dlí substainteach, ba cheart do Pharlaimint na hEorpa a tuairim a thabhairt. Dá bhrí sin, is é Airteagal 218(6), an dara fomhír, pointe (b), CFAE, bunús dlí nós imeachta an chinnidh lena dtugtar an Prótacal Leasaitheach i gcrích. Ós rud é go gceanglaítear aontoilíocht do ghníomh de chuid an Aontais le hAirteagal 115 CFAE, ba cheart an dara fomhír d’Airteagal 218(8) CFAE a áireamh sa bhunús dlí nós imeachta chun an Prótacal Leasaitheach a thabhairt i gcrích.

•Inniúlacht an Aontais

Faoi chásdlí na Cúirte Breithiúnais, tá inniúlacht eisiach ag an Aontas i gcás ina bhféadfadh comhaontú difear a dhéanamh do rialacha comhchoiteanna nó raon feidhme na rialacha sin a athrú 8 . Cumhdaíodh dlí-eolaíocht sin na Cúirte Breithiúnais in Airteagal 3(2) CFAE.

Mar aon leis na réimsí ina bhfuil inniúlacht eisiach ag an Aontas a liostaítear in Airteagal 3(1) CFAE, foráiltear le hAirteagal 3(2) CFAE go mbeidh ‘inniúlacht eisiach freisin ag an Aontas comhaontú idirnáisiúnta a thabhairt i gcrích nuair a fhorálfar dá thabhairt i gcrích i ngníomh reachtach de chuid an Aontais, nó nuair atá sé riachtanach chun a chumasú don Aontas a inniúlacht inmheánach a fheidhmiú, nó a mhéid ar dóigh dá thabhairt i gcrích difear a dhéanamh do na rialacha comhchoiteanna nó a raon feidhme a athrú’.

•Comhréireacht

Urramaíonn an prótacal leasaitheach prionsabal na comhréireachta agus ní théann sé thar a bhfuil riachtanach chun an cuspóir a chomhlíonadh maidir leis an gComhaontú a thabhairt cothrom le dáta chun na hathruithe ar an gComhchaighdeán Tuairiscithe a thiocfaidh i bhfeidhm ón 1 Eanáir 2026 a ionchorprú. Cuirfidh na leasuithe sin ar a gcumas do na Ballstáit leanúint d’uathmhalartú faisnéise i dtaca le cuntais airgeadais a dhéanamh le Lichtinstéin ar bhealach neamhbhriste, agus ar bhealach atá ailínithe le ceanglais nua an Chomhchaighdeáin Tuairiscithe, mar atá ionchorpraithe cheana féin in TCR8.

•An rogha ionstraime

Déantar an togra seo le haghaidh cinneadh ón gComhairle a thíolacadh i gcomhréir le mír 6 d’Airteagal 218 CFAE, lena mbeartaítear go nglacfaidh an Chomhairle cinneadh lena dtabharfar comhaontú idirnáisiúnta i gcrích. Níl aon ionstraim dlí eile ann a d’fhéadfaí a úsáid chun an cuspóir a chuirtear in iúl sa togra seo a bhaint amach. I bhfianaise ábhar an chomhaontaithe atá beartaithe, is iomchuí don Choimisiún togra a thíolacadh chuige sin.

3.TORTHAÍ Ó MHEASÚNUITHE TIONCHAIR

•Measúnú tionchair

I gcomhréir le huirlis 7 de Rialáil Níos Fearr 9 , níl gá le measúnú tionchair, inter alia, nuair nach mbíonn mórán rogha nó aon rogha ar bith ag an gCoimisiún sa chás lena mbaineann.

Comhlíontar an coinníoll sin sa chás seo toisc go bhfuil na leasuithe ar na Comhaontuithe atá ann cheana maidir le huathmhalartú faisnéise i dtaca le cuntais airgeadais ailínithe go hiomlán leis na hathruithe ar an gComhchaighdeán Tuairiscithe a comhaontaíodh ar leibhéal ECFE agus atá ionchorpraithe cheana féin i ndlí an Aontais Eorpaigh trí bhíthin TCR8. Ar deireadh, níl i gceist leis na hathruithe ar chosaint sonraí ach tagairtí do reachtaíocht an Aontais Eorpaigh agus Lichtinstéin maidir le cosaint sonraí a thabhairt cothrom le dáta.

•Cearta bunúsacha

Urramófar sa Phrótacal Leasaitheach atá beartaithe a ghabhfaidh leis an gComhaontú príomhluachanna an Aontais Eorpaigh mar a bhunaítear iad in Airteagal 2 den Chonradh ar Fheidhmiú an Aontais Eorpaigh agus i gCairt um Chearta Bunúsacha an Aontais Eorpaigh.

4.IMPLEACHTAÍ BUISÉADACHA

Níl aon impleacht ag an togra maidir le buiséad an Aontais.

5.EILIMINTÍ EILE

•Míniúchán mionsonraithe ar fhorálacha sonracha an togra

Cumhdaítear na pointí seo a leanas leis na leasuithe atá beartaithe:

‑1. Leasuithe chun a áirithiú go ndéanfar an tuathmhalartú faisnéise i dtaca le cuntais airgeadais idir na Ballstáit agus Lichtinstéin faoin gcomhaontú atá ann cheana a ailíniú leis an gComhchaighdeán Tuairiscithe a tugadh cothrom le dáta ón 1 Eanáir 2026 agus go leanfar den uathmhalartú sin a dhéanamh i gcomhréir leis an gComhchaighdeán sin

Leis na leasuithe atá beartaithe, leathnaítear raon feidhme an tuairiscithe chun táirgí airgeadais digiteacha nua a chur san áireamh, amhail Táirgí Ríomh-Airgid Sonraithe agus Airgeadraí Digiteacha Bainc Ceannais. An tráth céanna, chun feabhas a chur ar iontaofacht agus úsáid na faisnéise malartaithe, tugtar isteach leis na leasuithe ceanglais tuairiscithe níos mionsonraithe agus nósanna imeachta díchill chuí neartaithe.

Tá forálacha sna leasuithe freisin chun idirghníomhaíocht éifeachtúil a áirithiú idir an Comhchaighdeán Tuairiscithe agus an Creat Tuairiscithe Cripteashócmhainní ar leithligh a d’fhorbair ECFE 10 . Leis na forálacha sin, is féidir cásanna tuairiscithe dúblaigh a theorannú, agus uasmhéid solúbthachta oibríochta na n‑Institiúidí Airgeadais Tuairiscithe atá faoi réir oibleagáidí faoin gCreat Tuairiscithe Cripteashócmhainní á choinneáil ar bun an tráth céanna.

Ar deireadh, léiríonn na leasuithe catagóir roghnach nua d’Institiúidí Airgeadais Neamh-Thuairiscithe le haghaidh fíor-eintitis neamhbhrabúis a oibríonn chun leasa an phobail (Eintiteas Neamhbhrabúis Cáilithe), a sholáthraítear sna Tráchtaireachtaí a ghabhann leis an nuashonrú ar an gComhchaighdeán Tuairiscithe. D’fheidhmigh an Lichtinstéin an rogha sin agus tá sí i mbun na sásraí dlíthiúla agus riaracháin a chur ar bun chun a áirithiú go ndeimhneofar go gcomhlíonann aon Eintiteas a éilíonn stádas Eintitis Neamhbhrabúis Cháilithe na coinníollacha ábhartha a leagtar síos sna Tráchtaireachtaí thuasluaite. Os a choinne sin, níor fheidhmigh Ballstáit an Aontais Eorpaigh an rogha sin, i gcomhréir le Treoir (AE) 2023/2226 ón gComhairle. Déantar foráil maidir leis na ceanglais leasaithe sin maidir le tuairisciú agus uathmhalartú faisnéise laistigh d’Airteagail 1-3 agus d’Iarscríbhinn I. Beidh feidhm acu ón 1 Eanáir 2026.

2. Nuashonrú ar an tagairt dhlíthiúil i dtaca le reachtaíocht maidir le cosaint sonraí

Cuireadh tagairtí do RGCS in ionad na dtagairtí uile do Threoir 95/46/CE.

An tráth céanna, rinneadh an tagairt dhlíthiúil do reachtaíocht náisiúnta Lichtinstéin maidir le cosaint sonraí a thabhairt cothrom le dáta chuig Acht um Chosaint Sonraí an 4 Deireadh Fómhair 2018, lena gcuirtear RGCS chun feidhme.

•Téacs an Phrótacail Leasaithigh, dearbhuithe comhpháirteacha agus fógraí

Cuirtear téacs an Phrótacail Leasaithigh faoi bhráid na Comhairle in éineacht leis an togra seo. Cuirtear téacs na ndearbhuithe comhpháirteacha isteach in éineacht leis an togra seo.

I gcomhréir leis na Conarthaí, is faoin gCoimisiún atá sé leanúint ar aghaidh, thar ceann an Aontais, leis an bhfógra dá bhforáiltear in Airteagal 2 den Phrótacal Leasaitheach a thabhairt, chun toiliú an Aontais a chur in iúl a bheith faoi cheangal ag an bPrótacal Leasaitheach.

2025/0214 (NLE)

Togra le haghaidh

CINNEADH ÓN gCOMHAIRLE

maidir le tabhairt i gcrích, thar ceann an Aontais, an Phrótacail Leasaithigh a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh (CFAE), agus go háirithe Airteagal 115, i dteannta le hAirteagal 218(6), an dara fomhír, pointe (b) agus an dara fomhír d’Airteagal 218(8) de,

Ag féachaint don togra ón gCoimisiún Eorpach,

Ag féachaint don tuairim ó Pharlaimint na hEorpa 11 ,

De bharr an mhéid seo a leanas:

(1)Leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta 12 (‘an Comhaontú’), cuireadh feabhas ar chúnamh frithpháirteach i gcúrsaí cánach idir na páirtithe conarthacha agus ar chomhlíontacht cánach idirnáisiúnta.

(2)Formheasadh athruithe tábhachtacha ar an gComhchaighdeán Tuairiscithe ar an leibhéal idirnáisiúnta an 26 Lúnasa 2022 13 agus tugadh isteach iad i reachtaíocht an Aontais leis an leasú ar Threoir 2011/16/AE ón gComhairle le Treoir (AE) 2023/2226 ón gComhairle 14 .

(3)Dá bhrí sin, is gá an Comhaontú a leasú chun a áirithiú go ndéanfar an t‑uathmhalartú faisnéise i dtaca le cuntais airgeadais idir Ballstáit an Aontais Eorpaigh agus Prionsacht Lichtinstéin a ailíniú leis an gComhchaighdeán Tuairiscithe a tugadh cothrom le dáta ón 1 Eanáir 2026 agus go leanfar den uathmhalartú sin a dhéanamh i gcomhréir leis an gComhchaighdeán sin.

(4)Is léiriú cuí é téacs an Phrótacail Leasaithigh a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta (‘an Prótacal Leasaitheach a ghabhann leis an gComhaontú’), atá mar thoradh ar an gcaibidlíocht, ar an treoir chaibidlíochta a d’eisigh an Chomhairle.

(5)I gcomhréir le Cinneadh (AE) XXXX ón gComhairle 15 , síníodh an Prótacal Leasaitheach a ghabhann leis an gComhaontú an XXXX faoi réir a thabhairt i gcrích tráth níos déanaí.

(6)Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (CE) Uimh. 2018/1725 ó Pharlaimint na hEorpa agus ón gComhairle 16 .

(7)Ba cheart an Prótacal Leasaitheach a ghabhann leis an gComhaontú agus na dearbhuithe comhpháirteacha atá i gceangal leis a fhormheas thar ceann an Aontais,

TAR ÉIS AN CINNEADH SEO A GHLACADH:

Airteagal 1

Formheastar leis seo, thar ceann an Aontais, an Prótacal Leasaitheach a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta.

Tá téacs an Phrótacail Leasaithigh a ghabhann leis an gComhaontú i gceangal leis an gCinneadh seo.

Airteagal 2

Formheastar leis seo Dearbhú Comhpháirteach na bPáirtithe Conarthacha maidir le hAirteagal 5 den Chomhaontú agus Dearbhú Comhpháirteach na bPáirtithe Conarthacha maidir le teacht i bhfeidhm agus éifeacht an Phrótacail Leasaithigh.

Airteagal 3

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil,

   Thar ceann na Comhairle

   An tUachtarán

(1)    IO L 379, 24.12.2004, lgh. 84-104.
(2)    IO L 359, 16.12.2014, lgh. 1-29.
(3)    IO L 64, 11.3.2011, lgh. 1-12.
(4)     https://www.oecd.org/en/publications/international-standards-for-automatic-exchange-of-information-in-tax-matters_896d79d1-en.html , lgh. 62-102.
(5)    Treoir (AE) 2023/2226 ón gComhairle an 17 Deireadh Fómhair 2023 lena leasaítear Treoir 2011/16/AE maidir le comhar riaracháin i réimse an chánachais (IO L, 24.10.2023).
(6)    IO L 119, 4.5.2016, lgh. 1-88.
(7)    Cinneadh (AE) 2024/1489 ón gComhairle an 21 Bealtaine 2024 lena n‑údaraítear tús a chur leis an gcaibidlíocht lena leasaítear na Comhaontuithe a bhaineann le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta idir an tAontas Eorpach agus Cónaidhm na hEilvéise, Prionsacht Lichtinstéin, Prionsacht Andóra, Prionsacht Mhonacó agus Poblacht San Mairíne, faoi seach.
(8)    Tuairim 3/15 ón gCúirt, ECLI:EU:C:2017:114, mír 118 agus an cásdlí a luaitear ann.
(9)

   https://ec.europa.eu/info/sites/default/files/br_toolbox-nov_2021_en_0.pdf

(10)     https://www.oecd.org/en/publications/international-standards-for-automatic-exchange-of-information-in-tax-matters_896d79d1-en.html , lgh. 8-61.
(11)    Tuairim an X (nár foilsíodh fós in Iris Oifigiúil an Aontais Eorpaigh).
(12)    IO L 379, 24.12.2004, lgh. 84-104.
(13)     https://www.oecd.org/en/publications/international-standards-for-automatic-exchange-of-information-in-tax-matters_896d79d1-en.html , lgh. 62-102.
(14)    Treoir (AE) 2023/2226 ón gComhairle an 17 Deireadh Fómhair 2023 lena leasaítear Treoir 2011/16/AE maidir le comhar riaracháin i réimse an chánachais (IO L, 24.10.2023).
(15)

   Cinneadh (AE) xxxx ón gComhairle maidir le síniú, thar ceann an Aontais, an Phrótacail Leasaithigh a ghabhann leis an gComhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta (IO L XXXX)

(16)    Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n‑aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lgh. 39-98).