Eagrán sealadach

BREITHIÚNAS NA CÚIRTE (an Cúigiú Dlísheomra)

15 Deireadh Fómhair 2026 (*)

(Tarchur chun réamhrialú – Treoir 2010/13/AE – Seirbhísí meán closamhairc – Airteagal 1(1)(a)(i) – An coincheap ‘Seirbhísí meán closamhairc’ – Airteagal 6(1) – Dínit an duine a chosaint – Reachtaíocht náisiúnta lena dtoirmisctear craoltaí a ghoileann ar chuibheas – Dliteanas an tsoláthraí seirbhíse – an Chairt um Chearta Bunúsacha an Aontais Eorpaigh – Airteagal 11 – Saoirse chun tuairimí a nochtadh – Airteagal 52(1) – Teorannú ar na cearta agus saoirsí a aithnítear sa Chairt um Chearta Bunúsacha)

I gCás C‑591/24,

IARRIADH ar réamhrialú faoi Airteagal 267 CFAE, ó Administrativen sad Sofia-grad (Cúirt Riaracháin Chathair Shóifia, an Bhulgáir), trí bhreith an 29 Lúnasa 2024, a fuarthas ag an gCúirt an 11 Meán Fómhair 2024, sna himeachtaí

‘Golf Bulgaria’ EOOD

v

Savet za elektronni medii,

tugann AN CHÚIRT (an Cúigiú Dlísheomra),

agus í comhdhéanta mar seo a leanas: M. L. Arastey Sahún (Rapóirtéir), Uachtarán Dlísheomra, B. Smulders, E. Regan, J. Passer agus D. Gratsias, Breithiúna,

Abhcóide Ginearálta: T. Ćapeta,

Cláraitheoir: V. Di Bucci,

ag féachaint don nós imeachta i scríbhinn,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–        Rialtas na Bulgáire, ag T. Mitova agus R. Stoyanov, i gcáil Gníomhairí,

–        an Coimisiún Eorpach, ag O. Gariazzo, C. Georgieva, P.-J. Loewenthal agus G. Meeßen, i gcáil Gníomhairí,

tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,

an Breithiúnas seo a leanas:

Breithiúnas

1        Baineann an iarraidh ar réamhrialú le léiriú ar Threoir 2010/13/AE ó Pharlaimint na hEorpa agus ón gComhairle an 10 Márta 2010 maidir le comhordú forálacha áirithe arna leagan síos le dlí, rialachán nó gníomh riaracháin i mBallstáit i dtaobh seirbhísí meán closamhairc a sholáthar (‘an Treoir maidir le Seirbhísí Meán Closamhairc’) (IO 2010 L 95, lch. 1), arna leasú le Treoir (AE) 2018/1808 ó Pharlaimint na hEorpa agus ón gComhairle an 14 Samhain 2018 (IO 2018 L 303, lch. 69) (‘Treoir 2010/13’), agus ar Airteagal 11 den Chairt um Chearta Bunúsacha an Aontais Eorpaigh (‘an Chairt’).

2        Rinneadh an iarraidh seo in imeachtaí idir ‘Golf Bulgaria’ EOOD, cuideachta atá corpraithe faoi dhlí na Bulgáire, agus Savet za elektronni medii (Comhairle na Meán Leictreonach, an Bhulgáir) (‘SEM’) maidir le dlíthiúlacht cinnidh ó SEM lena bhforchuirtear fíneáil riaracháin ar an gcuideachta sin as físeán a chraoladh a ghoilleann ar chuibheas (‘an cinneadh atá faoi chonspóid’).

 An dlí lena mbaineann

 Dlí an Aontais Eorpaigh

 An Chairt

3        Foráiltear le hAirteagal 11(1) den Chairt:

‘Tá ag gach uile dhuine an ceart chun saoirse nochtaithe tuairime. Folóidh an ceart sin saoirse chun tuairimí a bheith ag an duine agus faisnéis agus barúlacha a fháil agus a thabhairt gan cur isteach ó údarás poiblí agus ar neamhaird ar theorainneacha.’

4        Foráiltear an méid seo a leanas le hAirteagal 52(1) den Chairt:

‘Ní mór foráil le dlí d’aon teorannú ar fheidhmiú na gceart agus na saoirsí arna n‑aithint sa Chairt seo agus ní mór inneachar sár-riachtanach na gceart agus na saoirsí sin a urramú. Faoi réir phrionsabal na comhréireachta, ní fhéadfar teorainneacha a dhéanamh ach amháin má tá gá leo agus má fhreagraíonn siad iarbhír do chuspóirí leasa ghinearálta arna n‑aithint ag an Aontas [Eorpach] nó don riachtanas cearta agus saoirsí daoine eile a chosaint. ’

 Treoir 2010/13

5        De réir Airteagal 1(1) de Threoir 2010/13:

‘Chun críocha na Treorach seo, tá feidhm ag na sainmhínithe seo a leanas:

a)      ciallaíonn “seirbhís meán closamhairc”:

(i)      seirbhís, mar a shainmhínítear in Airteagal 56 agus in Airteagal 57 [CFAE], i gcás ina bhfuil príomhchuspóir na seirbhíse nó cuid indealaithe di dírithe ar chláir a sholáthar, faoi fhreagracht eagarthóireachta soláthraí seirbhíse meán, don phobal i gcoitinne, chun eolas, siamsaíocht nó oideachas a chur ar fáil trí líonraí cumarsáide leictreonaí de réir bhrí phointe (a) d’Airteagal 2 de [Threoir 2002/21/CE ó Pharlaimint na hEorpa agus ón gComhairle an 7 Márta 2002 maidir le creat rialála coiteann do líonraí agus do sheirbhísí cumarsáide leictreonaí (an “Chreat‑Treoir”) (IO L 108, lch. 33)] is craoladh teilifíse, mar a shainmhínítear i bpointe (e) den mhír seo, nó seirbhís meán closamhairc ar éileamh, mar a shainmhínítear i bpointe (g) den mhír seo, seirbhís meán closamhairc den sórt sin;

(ii)      cumarsáid tráchtála chlosamhairc;

[…]

(b)      ciallaíonn “clár” sraith íomhánna gluaisteacha, bíodh fuaim leo nó na bíodh, is ionann agus mír aonair, beag beann ar a fad laistigh de sceideal nó de chatalóg a bhunaíonn soláthraí seirbhíse meán, lena n‑áirítear scannáin fhada, gearrthóga físe, ócáidí spóirt, drámaí grinn suímh, cláir faisnéise, cláir do leanaí agus dráma úr;

(c)      ciallaíonn “freagracht eagarthóireachta” smacht éifeachtach a fheidhmiú ar roghnú na gclár agus ar a n‑eagrú, de réir sceideal croineolaíoch, i gcás craoltaí teilifíse, nó i gcatalóg, i gcás seirbhísí meán closamhairc ar éileamh. Ní gá go dtugtar aon dliteanas dlíthiúil faoin dlí náisiúnta i leith na n‑ábhar nó na seirbhísí a sholáthraítear le fios le freagracht eagarthóireachta;

(d)      ciallaíonn “soláthraí seirbhíse meán”: an duine nádúrtha nó dlítheanach ar a bhfuil freagracht eagarthóireachta as ábhar closamhairc na seirbhíse meán closamhairc a roghnú agus a chinneann an bealach ina n‑eagraítear é;

[…]

(e)      ciallaíonn “craolachán teilifíse” nó ‘craoladh teilifíse’ (i.e. seirbhís meán closamhairc líneach) seirbhís meán closamhairc arna soláthar ag soláthraí seirbhísí meán d’fhonn breathnú ar chláir ar aon uain ar bhonn sceideal clár;

[…]

(g)      ciallaíonn “seirbhís meán closamhairc ar éileamh” (i.e. seirbhís meán closamhairc neamhlíneach) seirbhís meán closamhairc arna soláthar ag soláthraí seirbhísí meán d’fhonn breathnú ar chláir tráth a roghnaíonn an t‑úsáideoir déanamh amhlaidh agus ar iarraidh uaidh féin ar bhonn catalóg clár arna roghnú ag an soláthraí seirbhíse meán;

[…]’

[Aistriúchán neamhoifigiúil]

6        Foráiltear le hAirteagal 4(1) de Threoir 2010/13:

‘Beidh sé de shaoirse ag na Ballstáit ceangal a chur ar sholáthraithe seirbhíse meán faoina ndlínse rialacha níos mionchruinne nó níos déine a chomhlíonadh sna réimsí a chomhordaítear leis an Treoir seo, ar an gcoinníoll go bhfuil na rialacha sin i gcomhréir le dlí an Aontais.’

7        Is mar seo a leanas atá an fhoclaíocht in Airteagal 6 den Treoir sin:

‘1.      Gan dochar don oibleagáid atá ar na Ballstáit dínit an duine a urramú agus a chosaint, áiritheoidh na Ballstáit trí mheáin iomchuí nach mbeidh an méid seo a leanas sna seirbhísí meán closamhairc atá á soláthar ag soláthraithe seirbhíse meán faoina ndlínse:

(a)      gríosú chun foréigin nó fuatha a dhírítear i gcoinne grúpa daoine nó comhalta de ghrúpa bunaithe ar aon cheann de na forais dá dtagraítear in Airteagal 21 den Chairt;

(b)      briogadh poiblí chun cion sceimhlitheoireachta a dhéanamh mar a leagtar amach in Airteagal 5 de Threoir (AE) 2017/541 [ó Pharlaimint na hEorpa agus ón gComhairle an 15 Márta 2017 maidir leis an sceimhlitheoireacht a chomhrac, agus lena n‑ionadaítear Cinneadh Réime 2002/475/CGB ón gComhairle agus lena leasaítear Cinneadh 2005/671/CGB ón gComhairle (IO 2017 L 88, lch. 6)].

2.      Na bearta a ghlacfar chun críocha an Airteagail seo, beidh siad riachtanach agus comhréireach agus urramóidh siad na cearta agus na prionsabail a leagtar amach sa Chairt.’

8        Leagtar amach na forálacha is infheidhme maidir le seirbhísí ardáin comhroinnte físeán in Airteagail 28a agus 28b de Threoir 2010/13.

 Treoir (AE) 2018/1972

9        De réir Airteagal 2(1) de Threoir (AE) 2018/1972 ó Pharlaimint na hEorpa agus ón gComhairle an 11 Nollaig 2018 lena mbunaítear Cód Eorpach um Chumarsáid Leictreonach (IO 2018 L 321, lch. 36), a cuireadh in ionad Airteagal 2(a) de Threoir 2002/21:

‘Chun críocha na Treorach seo, tá feidhm ag na sainmhínithe seo a leanas:

1)      ciallaíonn “líonra cumarsáide leictreonaí” córais tarchuir, bídís bunaithe ar bhonneagar buan nó ar acmhainn riaracháin láraithe nó ná bíodh, agus, i gcás inarb infheidhme, trealamh lasctha nó ródúcháin agus acmhainní eile, lena n‑áirítear eilimintí neamhghníomhacha líonra, a cheadaíonn iompar comharthaí ar shreang, ar raidió, ar mhodh optach nó ar mhodh leictreamaighnéadach eile, lena n‑áirítear líonraí satailíte, líonraí fosaithe (ciorcadlasctha agus paicéadlasctha, an [tIdirlíon] san áireamh) agus líonraí móibíleacha, córais de cháblaí leictreacha, a mhéid a úsáidtear iad chun comharthaí a tharchur, líonraí a úsáidtear le haghaidh craolachán raidió agus teilifíse, agus líonraí teilifíse cábla, beag beann ar chineál na faisnéise arna hiompar;’

 Dlí na Bulgáire

10      Foráiltear le hAirteagal 10(1) den Zakon za radioto i televisiata (an Dlí maidir leis an raidió agus an teilifís) an 23 Meán Fómhair 1998 (DV Uimh. 138 an 24 Samhain 1998), sa leagan is infheidhme maidir leis an díospóid sna príomhimeachtaí (‘ZRT’):

‘Agus iad i mbun a ngníomhaíochtaí, beidh na prionsabail seo a leanas mar threoir ag soláthraithe seirbhíse meán:

1.      an ceart chun tuairimí a nochtadh;

2.      an ceart chun faisnéise a ráthú;

3.      rúndacht foinsí faisnéise a urramú;

4.      cosaint do shaol príobháideach na saoránach;

5.      toirmeasc ar chraoltaí lena spreagtar éadulaingt idir saoránaigh;

6.      toirmeasc ar chraoltaí a ghoileann ar chuibheas, go háirithe craoltaí ina bhfuil pornagrafaíocht iontu, má dhéanann siad cruatan nó foréigean a ghlóiriú nó a iompar, nó má ghríosaíonn siad fuath ar fhorais chine, ghnéis, reiligiúin nó náisiúntachta;

7.      an ceart freagartha sna cláir a ráthú;

8.      cóipcheart agus cearta gaolmhara a ráthú i gcraoltaí agus i gcláir;

9.      íonacht na Bulgáirise a chosaint.’

11      Foráiltear don mhéid seo a leanas le hAirteagal 17(1) agus (2) den Dlí sin:

‘1.      Tá soláthraithe seirbhíse meán freagrach as ábhar na seirbhísí meán sin.

2.      Beidh sé de cheangal ar sholáthraithe seirbhíse meán gan craoltaí a bhaineann an bonn de na prionsabail dá dtagraítear in Airteagal 10 agus craoltaí a ghríosaíonn éadulaingt náisiúnta, pholaitiúil, eitneach, reiligiúnach nó chiníoch, cruatan nó foréigean a ghlóiriú nó a leithscéal a chur ar fáil lena ndáileadh.’

12      Is mar seo a leanas atá Airteagal 20(1) agus (2) den dlí sin:

‘1.      Beidh [SEM] ina chomhlacht speisialaithe neamhspleách a rialaíonn na seirbhísí meán agus na seirbhísí ardáin comhroinnte físeán sna cásanna agus ar an mbealach dá bhforáiltear sa Dlí seo.

2.      Agus [SEM] i mbun a ghníomhaíochtaí, feidhmeoidh sé a chumhachtaí go neamhchlaonta agus go trédhearcach agus i gcomhréir le cuspóirí [Threoir 2010/13], faoi threoir leas an phobail, áiritheoidh sé saoirse cainte, neamhspleáchas soláthraithe seirbhíse meán, iolrachas na meán, éagsúlacht chultúrtha agus teanga, cosaint tomhaltóirí, inrochtaineacht, neamh-idirdhealú, feidhmiú cuí an mhargaidh inmheánaigh agus iomaíocht chóir a chur chun cinn.’

 An díospóid sna príomhimeachtaí agus an cheist a tharchuirtear le haghaidh réamhrialú

13      An 5 Aibreán 2023, d’fhoilsigh Golf Bulgaria, a bhí liostaithe ag an am sin i gclár poiblí an SEM mar sholáthraí seirbhísí meán neamhlíneacha, alt ar an idirlíon dar teideal ‘Émilie Trottinette ag spochadh as buachaill a bhfuil riachtanais speisialta aige’ ina raibh físeán ón líonra sóisialta Facebook. San fhíseán seo, a rinneadh scannánú air laistigh d’ionad siopadóireachta, taispeánadh buachaill a bhfuil riachtanais speisialta oideachais aige ag bogadh ar a lámha agus ar a chosa, ag déanamh aithrise ar mhadra, agus é á choinneáil ar iall ag an duine a chuirtear i láthair mar Emilie, agus í féin agus baill eile den ghrúpa a raibh sí páirteach ann ag ordú dó ‘suí’, ‘an lapa a thabhairt’ nó ‘greim a bhreith’ ar chupán a chaithfidís agus a déarfaidís ‘madra maith’ leis agus iad ag cuimilt ar a cheann nuair a chomhlíonadh sé na horduithe seo.

14      Le cinneadh an 29 Meitheamh 2023, chinn SEM, tríd an bhfíseán sin a fhoilsiú, go ndearna Golf Bulgaria cion riaracháin, eadhon sárú ar Airteagal 17(2) de ZRT, arna léamh i gcomhar le hAirteagal 10(1)(6) den Dlí sin, físeán a chraoladh a ghoileann ar chuibheas.

15      Leis an gcinneadh atá faoi chonspóid, a glacadh an 27 Iúil 2023, d’fhorchuir SEM fíneáil riaracháin 3 000 leva na Bulgáire (BGN) (thart ar EUR 1 534) ar Golf Bulgaria. Ós rud é gur sheas Sofiyski rayonen sad (Cúirt Dúiche Shóifia, an Bhulgáir) leis an gcinneadh sin in imeachtaí achomhairc, thug Golf Bulgaria achomharc os comhair Administrativen sad Sofia-grad (Cúirt Riaracháin Chathair Shóifia, an Bhulgáir), arb í an chúirt a rinne an tarchur í.

16      I gcomhthéacs an achomhairc sin, áitíonn Golf Bulgaria, ar an gcéad dul síos, go bhfuil cinneadh Sofiyski rayonen sad (Cúirt Dúiche Shóifia) neamhdhleathach agus mícheart toisc gur tugadh é de shárú ar an dlí substainteach agus ar cheanglais fhíor-riachtanacha nós imeachta, ar an dara dul síos, gur sháraigh SEM, trí chinneadh a ghlacadh lena gcinntear cion riaracháin maidir le físeán a chraoladh a ghoileann ar chuibheas, a chumhachtaí maidir le rialú ábhair ós rud é nach dtagann craoladh an fhíseáin atá i gceist sna príomhimeachtaí faoin gcoincheap ‘seirbhís meán closamhairc’ agus, ar an tríú dul síos, nach raibh údar leordhóthanach leis an bhfíseán sin a aicmiú mar fhíseán ‘a ghoileann ar chuibheas’, ós rud é gur léirigh an físeán sin eachtra a ndearnadh scannánú uirthi in áit phoiblí, a craoladh cheana féin ar na meáin shóisialta.

17      Maidir le SEM, déanann sé tagairt don chásdlí náisiúnta maidir leis an gcoincheap ‘Goileadh ar chuibheas’ agus, go háirithe, do chinneadh ón Konstitutsionen sad (an Chúirt Bhunreachtúil, an Bhulgáir), ar dá réir a cinneadh gur réimse í an mhoráltacht phoiblí ina dtugtar tús áite do thraidisiúin agus cultúr náisiúnta thar aon ní eile, nach bhfuil an toirmeasc ar chur isteach ar phrionsabail an chuibhis teoranta don cheanglas cloí le caighdeáin iompair shóisialta atá bunaithe ag traidisiúin sochaí ar leith, go bhfuil sé ar mhaithe le leas an phobail, mar shampla, go mbeadh an mhoráltacht phoiblí ina critéar chun oiliúint a chur ar dhéagóirí agus nach gá, dá bhrí sin, go mbeadh sárú iarbhír ann i ngach cás. Is léir ón gcinneadh sin gur féidir breithnithe a bhaineann le hurraim don chuibheas a thuiscint mar d’iompar sóisialta maith atá bunaithe laistigh den tsochaí chun í a chosaint, arb é an leas sáraitheach ina leith sin sláine mhorálta na sochaí a chaomhnú. Ina theannta sin, áitíonn SEM, sa chás seo, nach bhfuil aon amhras ach go náiríodh agus gur caitheadh go héagórach le duine a raibh riachtanais speisialta oideachais acu agus gur sáraíodh a ndínit dhaonna. Mar sin féin, níl an ceart chun tuairimí a nochtadh gan teorainn agus níor cheart scaipeadh ábhair ina ndéantar ‘clúmhilleadh’ agus ina bhfuil ‘gníomhartha ciniciúla agus garbha atá dírithe ar dhuine leochaileach’. Ina theannta sin, cuireann SEM i bhfios go láidir go gcuireann soláthraithe seirbhíse meán go mór le tuairimí an phobail a chruthú agus, dá bhrí sin, nach féidir glacadh le hábhar closamhairc a ghoileann ar chuibheas, atá contrártha don thraidisiún náisiúnta agus don chultúir, amhail an físeán atá i gceist sna príomhimeachtaí.

18      Tugann an chúirt a rinne an tarchur dá haire, de réir an chásdlí náisiúnta, gur prionsabal ginearálta é an coincheap ‘Goileadh ar chuibheas’, atá ina riail iompair ann féin, agus nach mór é a chumhdach mar sin i bhforáil shonrach dhlíthiúil atá ceaptha chun caidrimh shóisialta a rialú, chun go mbeadh sé ina riail bhailí. Sa chomhthéacs sin, dúirt Varhoven Kasatsionen sad (an Chúirt Uachtarach um Achomharc Deiridh, an Bhulgáir) ‘nach mór brí an choincheapa “Goileadh ar chuibheas” a lorg i gcatagóirí morálta oibiachtúla a nglactar leo sa tsochaí ach, mar gheall ar a gcineál eiticiúil go sóisialta, nach bhfuil cumhdaithe sa dlí agus atá nasctha go bunúsach leis an toirmeasc ar dhíobháil a dhéanamh do dhaoine eile trí leas a bhaint as a gcás míbhuntáisteach ó thaobh aoise de, a [staid shóisialta], a staid sláinte nó a staid ábhartha’.

19      Sa chomhthéacs sin, agus i bhfianaise na tagartha d’Airteagal 4(1) de Threoir 2010/13 san iarraidh ar réamhrialú, is cosúil go bhfuil amhras ar an gcúirt a rinne an tarchur an féidir an féidir toirmeasc, a thabhairt isteach sa reachtaíocht náisiúnta ábhartha ar chraoltaí a ghoileann ar chuibheas a mheas mar bheart níos mionsonraithe nó níos déine, de réir bhrí na forála sin, i gcomparáid leis na bearta eile dá bhforáiltear leis an Treoir sin.

20      Ina theannta sin, fiafraíonn an chúirt sin an gcuireann úsáid phrionsabal an chuibhis mar bhonn chun pionóis a fhorchur i gcás sárú ar an bprionsabal sin srian ar an tsaoirse chun tuairimí a nochtadh a chumhdaítear in Airteagal 11 den Chairt.

21      Sna himthosca sin, chinn Administrativen sad Sofia-grad (Cúirt Riaracháin Chathair Shóifia) bac a chur ar na himeachtaí agus an cheist seo a leanas a chur faoi bhráid na Cúirte Breithiúnais le haghaidh réamhrialú:

‘An gceadaítear le dlí an Aontais reachtaíocht náisiúnta lena gceadaítear don Bhallstát, trí phrionsabal ginearálta dlí, eadhon ‘an cuibheas’, a chur isteach sa dlí náisiúnta, bearta breise a thabhairt isteach, lena n‑áirítear dliteanas a bhunú, ar bhonn phrionsabal an chuibhis, do sheirbhís sochaí faisnéise ar leith de réir bhrí Threoir 2010/13 agus, más amhlaidh atá, cé mhéid nach gcuirtear srian, le cur i bhfeidhm an phrionsabail theibí sin mar bhonn do dhliteanas i leith sáruithe, ar an tsaoirse chun tuairimí a nochtadh faoi Airteagal 11 den [Chairt]?’

 Na himeachtaí os comhair na Cúirte Breithiúnais

22      Le cinneadh ó Uachtarán na Cúirte Breithiúnais an 14 Samhain 2024, cuireadh bac ar na himeachtaí seo go dtí an cinneadh lena gcuirtear clabhsúr leis na himeachtaí i gCásanna C‑555/23 agus C‑556/23.

23      Tar éis fhógairt bhreithiúnas an 26 Meitheamh 2025, Makeleio agus Zougla (C‑555/23 agus C‑556/23, EU:C:2025:484), thug Uachtarán na Cúirte Breithiúnais, an 1 Iúil 2025, fógra faoin mbreithiúnas sin don chúirt a rinne an tarchur, ag iarraidh uirthi a léiriú ar mhian léi, i bhfianaise an bhreithiúnais sin, an iarraidh ar réamhrialú a choinneáil ar bun.

24      I litir dar dáta an 30 Iúil 2025, chuir an chúirt sin an Chúirt Bhreithiúnais ar an eolas go raibh sé beartaithe aici a hiarraidh ar réamhrialú a choinneáil ar bun. I ndáil leis sin, thug sí dá haire, murab ionann agus an cás ba chúis leis an mbreithiúnas sin, gur bhain ábhar na díospóide sna príomhimeachtaí leis an bhféidearthacht Treoir 2010/13 a chur chun feidhme trí phrionsabal ginearálta dlí a ionchorprú, sa dlíchóras náisiúnta, amhail ‘prionsabail an chuibhis’, agus a mhéid a chuir úsáid prionsabail theibí den sórt sin mar bhonn dliteanais i gcás sárú ar an bprionsabal sin srian ar an tsaoirse chun tuairimí a nochtadh dá dtagraítear in Airteagal 11 den Chairt.

 Do-ghlacthacht na hiarrata ar réamhrialú

25      Cuireann Rialtas na Bulgáire i gcoinne dho-ghlacthacht na hiarrata ar réamhrialú ar an bhforas, ar an gcéad dul síos, nach bhfuil aon nasc idir an cheist a tharchuirtear chuig an gCúirt Bhreithiúnais agus ábhar na díospóide sna príomhimeachtaí agus, ar an dara dul síos, nach léirítear forálacha sonracha dhlí an Aontais nach mór a léiriú chun an díospóid sin a réiteach.

26      Go háirithe, maidir leis an easpa nasc líomhnaithe, áitíonn an rialtas sin gur léir ón ráiteas ar chúiseanna leis an iarraidh ar réamhrialú go dtagraíonn sé do sholáthraithe ardáin comhroinnte físeán. I ndáil leis sin, agus an dlí lena mbaineann á leagan amach aici, luaigh an chúirt a rinne an tarchur foclaíocht Airteagail 28a agus 28b de Threoir 2010/13, is infheidhme maidir le seirbhísí ardáin comhroinnte físeán, cé nach bhfuil na hAirteagail sin ábhartha maidir le réiteach na díospóide sna príomhimeachtaí. Ina theannta sin, baineann an cheist a tarchuireadh chuig an gCúirt Bhreithiúnais, mar a cheap an chúirt sin í, le soláthraí ‘seirbhíse sochaí faisnéise, de réir bhrí Threoir 2010/13’, agus leis an bhféidearthacht go gcuirfí an soláthraí seirbhíse sin faoi dhliteanas i gcás sárú ar na ceanglais a fhorchuirtear le dlí náisiúnta Ballstáit. Mar sin féin, ní le Treoir sin a rialaítear seirbhísí na sochaí faisnéise, ach le Treoir 2000/31/CE ó Pharlaimint na hEorpa agus ón gComhairle an 8 Meitheamh 2000 maidir le gnéithe dlíthiúla áirithe de sheirbhísí na sochaí faisnéise, go háirithe tráchtáil leictreonach, sa Mhargadh Inmheánach (‘an Treoir maidir le tráchtáil leictreonach’) (IO 2000 L 178, lch. 1) agus le Rialachán (AE) 2022/2065 ó Pharlaimint na hEorpa agus ón gComhairle an 19 Deireadh Fómhair 2022 maidir le Margadh Aonair do Sheirbhísí Digiteacha agus lena leasaítear Treoir 2000/31/CE (an Gníomh um Sheirbhísí Digiteacha) (IO 2022 L 277, lch. 1). Ina theannta sin, is léir ó na fíorais a leagtar amach san iarraidh ar réamhrialú gur soláthraí seirbhísí meán neamhlíneacha é Golf Bulgaria, coincheap atá éagsúil ón gcoincheap ‘soláthraí seirbhíse na sochaí faisnéise’.

27      De réir cásdlí socair, tá toimhde ábharthachta ag ceisteanna maidir le léiriú dhlí an Aontais arna dtarchur ag cúirt náisiúnta sa chomhthéacs fíorasach agus reachtach a bhfuil an chúirt sin freagrach as a shainiú, agus nach faoin gCúirt Bhreithiúnais atá sé a chruinneas a chinneadh. Ní féidir leis an gCúirt Bhreithiúnas diúltú rialú a thabhairt maidir le ceist arna tarchur ag cúirt náisiúnta ach amháin má dhealraíonn sé go follasach nach bhfuil baint ar bith ag an léiriú arna iarraidh ar dhlí an Aontais Eorpaigh le fíorais iarbhír nó cuspóir na díospóide sna príomhimeachtaí, gur fadhb de chineál hipitéiseach í nó nach bhfuil an fhaisnéis fhíorasach agus dhlíthiúil is gá ag an gCúirt Bhreithiúnais chun freagra úsáideach a thabhairt ar na ceisteanna a cuireadh uirthi (breithiúnas an 30 Aibreán 2026, Nekilnojamojo turto valdymas, C‑544/24, EU:C:2026:356, mír 36 agus an cásdlí dá dtagraítear).

28      Sa chás seo, déantar cur síos mionsonraithe san iarraidh ar réamhrialú ar imthosca na díospóide sna príomhimeachtaí agus déantar tagairt inti do na forálacha náisiúnta a mheasann an chúirt a rinne an tarchur a bheith infheidhme maidir leis an díospóid sin agus don chásdlí náisiúnta a mheasann an chúirt sin a bheith ábhartha freisin. Ina theannta sin, leis an ráiteas ar chúiseanna a leagtar amach san iarraidh sin, is féidir a thuiscint go mbaineann an t‑amhras a chuir an chúirt sin in iúl maidir le comhoiriúnacht ZRT le Treoir 2010/13 agus le hAirteagal 11 den Chairt, agus go n‑eascraíonn siad as an bhfíoras go bhfuil Airteagal 17(2) de ZRT, a bhí mar bhonn leis an bpionós a ghearradh ar Golf Bulgaria as craoladh an fhíseáin a thuairiscítear i mír 13 den bhreithiúnas seo, bunaithe ar phrionsabal ginearálta an dlí náisiúnta, eadhon prionsabal an chuibhis. Ina theannta sin, tá an nasc idir, ar thaobh amháin, Treoir 2010/13 agus Airteagal 11 den Chairt agus, ar an taobh eile, forálacha ZRT is infheidhme maidir leis an díospóid sna príomhimeachtaí soiléir go leor ón eolas atá san iarraidh sin.

29      Is fíor, mar a thug Rialtas na Bulgáire faoi deara, san iarraidh ar réamhrialú, go ndéanann an chúirt a rinne an tarchur tagairt do sheirbhísí meán closamhairc agus do sheirbhísí ardáin comhroinnte físeán araon agus go luann sí forálacha Threoir 2010/13 maidir le soláthraithe seirbhíse meán closamhairc agus forálacha na Treorach sin maidir le soláthraithe ardán den sórt sin. Ina theannta sin, i bhfoclaíocht na ceiste a tharchuirtear le haghaidh réamhrialú, déanann an chúirt sin tagairt do sheirbhís de chuid na sochaí faisnéise agus tagraíonn sí go ginearálta do Threoir 2010/13 gan a chur in iúl cé na forálacha sonracha den Treoir sin ba cheart a léiriú.

30      Mar sin féin, ar dtús, ní mór a chur san áireamh, ar an gcéad dul síos, gur léir ó na fíorais a leagtar amach san iarraidh ar réamhrialú gur liostáladh Golf Bulgaria i gclár poiblí SEM mar sholáthraí seirbhísí meán neamhlíneacha. Ar an dara dul síos, de réir a bhfoclaíochta, baineann Airteagal 10(1) pointe (6) agus Airteagal 17 de ZRT, ar ar a mbonn a chinn SEM go ndearna Golf Bulgaria an sárú ar gearradh pionós air leis an gcinneadh atá faoi chonspóid, le soláthraithe seirbhíse meán. Ar an tríú dul síos, is léir ó fhorais na hiarrata sin gur mhian leis an gcúirt a rinne an tarchur an chéad cheann de na cúig cheist a tharchur chuig an gCúirt a mhol Golf Bulgaria di a tharchur le haghaidh réamhrialú, ós rud é go dtagraíonn an chéad cheist sin go sainráite do ‘sholáthraithe seirbhísí meán closamhairc neamhlíneacha’.

31      Dá bhrí sin, tugann an méid sin le fios, in ainneoin, sa chéad áit, úsáid na bhfocal ‘[s]eirbhís sochaí faisnéise’ i bhfoclaíocht na ceiste a tharchuirtear le haghaidh réamhrialú agus, sa dara háit, an tagairt san iarraidh ar réamhrialú do ‘sheirbhísí ardáin comhroinnte físeán’, go mbaineann an cheist sin le ‘seirbhís meán closamhairc’ de réir bhrí Threoir 2010/13.

32      Ina dhiaidh sin, in éagmais aon léiriú, i bhfoclaíocht na ceiste a tharchuirtear chuig an gCúirt Bhreithiúnais, ar fhorálacha sonracha de dhlí an Aontais, ní fhágann sé sin go bhfuil iarraidh ar réamhrialú do-ghlactha a mhéid a chuireann an fhaisnéis atá san iarraidh sin ar chumas na Cúirte Breithiúnais forálacha dhlí an Aontais a shainaithint a bhfuil gá lena léiriú chun a chur ar chumas na cúirte a rinne an tarchur an díospóid sna príomhimeachtaí a réiteach. Is amhlaidh atá sa chás seo, ós rud é go gcuireann an ráiteas ar chúiseanna leis an iarraidh seo ar réamhrialú ar chumas na Cúirte Breithiúnais forálacha Threoir 2010/13 nach mór a léiriú chun na gcríoch sin a shainaithint, mar a mhínítear i míreanna 50 go 54 den bhreithiúnas seo.

33      Ar deireadh, cé go luann an chúirt a rinne an tarchur, agus an dlí lena mbaineann á leagan amach aici atá infheidhme, dar léi, forálacha de dhlí an Aontais nach bhfuil ábhartha chun an díospóid sna príomhimeachtaí a réiteach, níl aon tionchar aige sin ar do-ghlacthacht iarrata ar réamhrialú.

34      Dá bhrí sin, tá an iarraidh ar réamhrialú do-ghlactha.

 Breithniú ar an gceist a tharchuirtear le haghaidh réamhrialú

 Réamhphointí

 Maidir leis an aicmiú, ar an gcéad dul síos, de chraoladh na físe ábhartha sna príomhimeachtaí mar ‘sheirbhís meán closamhairc’ agus, ar an dara dul síos, maidir leis an aicmiú den iarratasóir sna príomhimeachtaí mar ‘sholáthraí seirbhíse meán’, de réir bhrí Threoir 2010/13

35      Mar is léir ó mhíreanna 30 agus 31 den bhreithiúnas seo, ní mór a thuiscint go dtagraíonn an cheist a tharchuir an chúirt a rinne an tarchur do ‘sheirbhís meán closamhairc’ de réir bhrí Threoir 2010/13 agus, dá bhrí sin, go bhfuil sí bunaithe ar an mbonn go dtagann craoladh an fhíseáin ar gearradh pionós air leis an gcinneadh atá faoi chonspóid faoin gcoincheap sin.

36      Mar a cuireadh in iúl i mír 16 den bhreithiúnas seo, san achomharc as ar eascair an cás seo, mhaígh Golf Bulgaria nár tháinig craoladh an fhíseáin sin faoin gcoincheap sin.

37      I ndáil leis sin, ní mór a mheabhrú, i gcomhthéacs roinnt na ndlínsí idir cúirteanna an Aontais agus an chúirt náisiúnta, gur faoin gcúirt náisiúnta atá sé, i bprionsabal, a fhíorú go gcomhlíontar na coinníollacha fíorasacha is cúis le cur i bhfeidhm riail an Aontais sa chás atá ar feitheamh os a comhair, agus go bhféadfaidh an Chúirt Bhreithiúnais, agus réamhrialú á thabhairt aici, i gcás inarb iomchuí, soiléiriú a thabhairt atá beartaithe chun treoir a thabhairt don chúirt sin maidir lena léiriú (breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 37 agus an cásdlí dá dtagraítear).

38      Dá bhrí sin, is faoin gCúirt Bhreithiúnais atá sé an treoir is gá a thabhairt don chúirt a rinne an tarchur maidir le léiriú an choincheapa ‘seirbhís meán closamhairc’, de réir bhrí na Treorach sin, ionas gur féidir léi a fháil amach an dtagann craoladh an fhíseáin atá i gceist faoin gcoincheap sin i ndáiríre agus ar cheart, i ndáil leis na cláir sin, Golf Bulgaria a mheas, dá bhrí sin, mar ‘sholáthróirí seirbhísí meán’ de réir bhrí na Treorach sin.

39      Sa chomhthéacs sin, ba cheart a mheabhrú, de réir an tsainmhínithe in Airteagal 1(1)(a)(i) de Threoir 2010/13, go dtagraíonn an coincheap ‘seirbhís meán closamhairc’ do sheirbhís mar a shainmhínítear in Airteagail 56 agus 57 CFAE, i gcás ina bhfuil príomhchuspóir na seirbhíse nó cuid indealaithe di dírithe ar chláir a sholáthar, faoi fhreagracht eagarthóireachta soláthraí seirbhísí meán, don phobal i gcoitinne, chun eolas, siamsaíocht nó oideachas a chur ar fáil trí líonraí cumarsáide leictreonaí de réir bhrí Airteagal 2(a) de Threoir 2002/21.

40      Ina theannta sin, mar is léir ó Airteagal 1(1)(b) de Threoir 2010/13, tagraíonn an coincheap ‘clár’, de réir bhrí na Treorach sin, do ‘[shraith] íomhánna gluaisteacha, [...] is ionann agus mír aonair, beag beann ar a fad laistigh de sceideal nó de chatalóg a bhunaíonn soláthraí seirbhíse meán, lena n‑áirítear scannáin fhada, gearrthóga físe, ócáidí spóirt, drámaí grinn suímh, cláir faisnéise, cláir do leanaí agus dráma úr’.

41      Thairis sin, i gcomhréir le hAirteagal 1(1)(d), de Threoir 2010/13, chun críocha na Treorach sin, is é an ‘soláthraí seirbhísí meán’ an duine nádúrtha nó dlítheanach ar a bhfuil freagracht eagarthóireachta as ábhar closamhairc na seirbhíse meán closamhairc a roghnú agus a chinneann an modh a n‑eagraítear é.

42      Sa chás seo, is léir ón iarraidh ar réamhrialú gur foilsíodh an físeán atá i gceist sna príomhimeachtaí ar shuíomh gréasáin a chuireann ailt agus ábhar closamhairc ar fáil don phobal.

43      Dá bhrí sin, ar an gcéad dul síos, is cosúil gur craoladh an físeán sin trí líonraí cumarsáide leictreonaí, de réir bhrí Airteagal 2(1) de Threoir 2018/1972, a tháinig in ionad Airteagal 2(a) de Threoir 2002/21, ar faoin gcúirt a rinne an tarchur atá sé a dheimhniú, áfach.

44      Ina dhiaidh sin, faoi réir fíorú ag an gcúirt sin freisin, is féidir a mheas go bhfuil an físeán sin mar chuid den eangach nó den chatalóg den tairiscint closamhairc a thairgtear ar an suíomh gréasáin atá i gceist sna príomhimeachtaí, agus mar thoradh air sin gur ‘clár’ é de réir bhrí Airteagal 1(1)(b) de Threoir 2010/13 (féach, de réir analaí, breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 48), agus go bhfónann an tairiscint closamhairc sin chun críocha faisnéise nó siamsaíochta.

45      Thairis sin, níl aon rud sa chomhad os comhair na Cúirte Breithiúnais a thabharfadh le fios nach bhfuil ábhar ná feidhm ag an tseirbhís chun físeáin a chur ar fáil ar an suíomh gréasáin atá i gceist sna príomhimeachtaí atá neamhspleách ar ábhar agus feidhm seirbhísí eile a d’fhéadfaí a thairiscint ar an suíomh gréasáin sin. Dá bhrí sin, faoi réir fíorú ag an gcúirt a rinne an tarchur, ní mór a mheas go bhfuil craoladh an fhíseáin atá i gceist sna príomhimeachtaí mar chuid de sheirbhís arb é is príomhchuspóir di nó cuid inscartha den tseirbhís sin cláir a sholáthar don phobal i gcoitinne.

46      Ar deireadh, mar is léir ó Airteagal 1(1)(a)(i), (c) agus (d) de Threoir 2010/13, ní féidir foilsiú an fhíseáin atá i gceist sna príomhimeachtaí ag Golf Bulgaria ar an suíomh gréasáin atá i gceist sna príomhimeachtaí teacht faoin gcoincheap ‘seirbhís meán closamhairc’ ach amháin má ghlacann an chuideachta sin ‘freagracht eagarthóireachta’, de réir bhrí na Treorach sin, as rogha an ábhair closamhairc a chuirtear ar fáil ar an suíomh gréasáin sin.

47      B’amhlaidh an cás, go háirithe, más faoi Golf Bulgaria atá sé cinneadh a dhéanamh, go háirithe, maidir le físeáin a phostáil agus a bhaint, leis an sceideal agus leis na hamanna a bhaineann le físeáin a chraoladh ar an suíomh gréasáin sin, leis an tréimhse ar lena linn a bheidh rochtain ag úsáideoirí idirlín orthu, le struchtúr an tsuímh gréasáin sin, leis an gcaoi a ndéantar na físeáin a chur i láthair agus a roghnú, leis an gcóras cuardaigh físe agus le hábhar an tsuímh gréasáin sin a uasdátú (féach, de réir analaí, breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 53).

48      Ós rud é nach bhfuil aon fhaisnéis san iarraidh ar réamhrialú ina leith sin, is faoin gcúirt a rinne an tarchur a bheidh sé a mheas, ag féachaint go háirithe do na coinníollacha lena rialaítear foilsiú na bhfíseán arna dtarchur ag úsáideoirí ar an suíomh gréasáin atá i gceist sna príomhimeachtaí, an bhforchoimeádann Golf Bulgaria an ceart chun cinneadh a dhéanamh maidir leis na físeáin atá le foilsiú ar an suíomh gréasáin sin nó nach bhforchoimeádann. Cé go leanann sé ón measúnú sin gur ar an gcuideachta sin atá an cinneadh críochnaitheach maidir le foilseachán den sórt sin, is ar an gcuideachta sin a bheidh an fhreagracht eagarthóireachta as rogha an ábhair closamhairc a chuirtear ar fáil don phobal ar an suíomh gréasáin sin, lena n-áirítear an físeán atá i gceist sna príomhimeachtaí, fiú má chruthaíonn agus má sheolann úsáideoirí na físeáin a chuirtear ar líne d’fhonn iad a fhoilsiú ar an suíomh gréasáin céanna.

49      I bhfianaise an mhéid thuas, agus faoi réir na bhfíoruithe a bheidh le déanamh ag an gcúirt a rinne an tarchur, ní mór an freagra ar an gceist a tharchuir an chúirt sin a bheith bunaithe ar an mbonn, ar an gcéad dul síos, gurb ionann craoladh an fhíseáin ar gearradh pionós air leis an gcinneadh atá faoi chonspóid agus ‘seirbhís meán closamhairc’ de réir bhrí Threoir 2010/13 agus, ar an dara dul síos, go dtagann Golf Bulgaria faoin gcoincheap ‘soláthraí seirbhíse meán’ de réir bhrí na Treorach sin.

 An fhoráil de Threoir 2010/13 atá ábhartha maidir le réiteach na díospóide sna príomhimeachtaí

50      Is léir ón iarraidh ar réamhrialú gur léirigh an físeán atá i gceist sna príomhimeachtaí gur náirigh grúpa daoine agus gur chaith siad go héagórach le duine a raibh riachtanais speisialta oideachais acu. Thug sé sin ar SEM, inter alia, an físeán sin a aicmiú mar fhíseán ‘a ghoileann ar chuibheas’, de réir bhrí an dlí náisiúnta, agus, dá bhrí sin, pionós a ghearradh ar an gcuideachta sin as craoladh a scaipeadh a ghoileann ar chuibheas, ós rud é gur luaigh SEM, os comhair na cúirte a rinne an tarchur, go raibh sárú déanta ar dhínit an duine seo dá bhrí sin.

51      Ní mór a mheabhrú go gceanglaítear le hAirteagal 6(1) de Threoir 2010/13 ar na Ballstáit ní hamháin dínit an duine a urramú ach í a chosaint freisin, rud a thugann le tuiscint, go háirithe, gur faoi na Stáit sin atá sé na bearta is gá a ghlacadh chun a áirithiú nach mbainfidh ábhar na seirbhísí meán closamhairc arna soláthar ag soláthraithe faoina ndlínse an bonn de luach dhínit an duine (féach, chuige sin, breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 67).

52      Dá bhrí sin, tagann an oibleagáid luach dhínit an duine a urramú agus an toirmeasc ar ábhar lena mbaintear an bonn den luach sin a chraoladh faoi raon feidhme na forála sin (breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 73).

53      Dá bhrí sin, i gcomhthéacs, amhail an comhthéacs sna príomhimeachtaí, ina raibh reachtaíocht náisiúnta lena dtoirmisctear scaipeadh ábhair a ghoileann ar chuibheas mar bhonn do chinneadh arna ghlacadh chun pionós a ghearradh ar shárú ar dhínit an duine, d’fhéadfadh an reachtaíocht náisiúnta sin teacht faoi raon feidhme Airteagal 6(1) de Threoir 2010/13. Ní leagtar síos le reachtaíocht náisiúnta lena gceanglaítear luach dhínit an duine a urramú agus lena staonadh ó ábhair lena mbainfí an bonn den luach sin a chraoladh ach an oibleagáid dínit an duine a urramú agus an foras do thoirmeasc atá bunaithe ar an mbonn a bhaint de luach dhínit an duine a leagtar síos in Airteagal 6(1) de Threoir 2010/13, sa chaoi nach bhfuil rialacha ‘níos mionsonraithe’ nó ‘níos déine’ sa reachtaíocht sin, de réir bhrí Airteagal 4(1) den Treoir sin, agus, dá bhrí sin, nach dtagann sí faoi raon feidhme na forála deiridh sin (féach, chuige sin, breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 78).

54      Dá bhrí sin, i bhfianaise imthosca sonracha na díospóide sna príomhimeachtaí, is i bhfianaise Airteagal 6(1) de Threoir 2010/13 nach mór freagra a thabhairt ar an gceist a tharchuir an chúirt a rinne an tarchur.

 Breithniú ar an gceist a tharchuirtear le haghaidh réamhrialú

55      I bhfianaise na réamhbhreithnithe thuas, ní mór a mheas, lena ceist, go bhfiafraíonn an chúirt a rinne an tarchur, go bunúsach, an gá Airteagal 6(1) de Threoir 2010/13, arna léamh i bhfianaise Airteagal 11 den Chairt, a léiriú sa chaoi go gcuirtear cosc leis ar Bhallstát a bheith in ann, faoi reachtaíocht náisiúnta lena dtoirmisctear, ar bhonn prionsabal ginearálta de dhlí an Stáit sin, craoltaí a ghoileann ar chuibheas, pionós a ghearradh ar sholáthraí seirbhíse meán as físeán a chraoladh a sháraíonn dínit an duine.

56      Chun an cheist sin a fhreagairt, tá sé tábhachtach, ar an gcéad dul síos, a mheabhrú, de réir fhoclaíocht iarbhír an tríú mír d’Airteagal 288 CFAE, go bhféadfaidh na Ballstáit an fhoirm agus na modhanna a roghnú chun treoracha a chur chun feidhme lena n-áirithítear an toradh is fearr atá le baint amach leis na treoracha sin agus gur léir ón bhforáil sin nach gá gníomhaíocht reachtach a dhéanamh i ngach Ballstát chun treoir a thrasuí sa dlí náisiúnta (breithiúnas an 14 Feabhra 2012, Flachglas Torgau, C‑204/09, EU:C:2012:71, mír 60).

57      Go háirithe, de réir chásdlí socair na Cúirte Breithiúnais, d’fhéadfadh trasuí iomarcach trí bhearta sonracha breise reachtacha nó rialála a bheith mar thoradh ar phrionsabail ghinearálta nó rialacha ginearálta a bheith ann, ar choinníoll, áfach, go n‑áirithítear leis na prionsabail nó na rialacha sin cur i bhfeidhm iomlán na Treorach sin agus, i gcás ina bhféachtar leis an bhforáil ábhartha den Treoir cearta a chruthú do dhaoine aonair, go bhfuil an staid dhlíthiúil a eascraíonn as na prionsabail nó na rialacha sin beacht agus soiléir go leor agus go gcuirtear ar chumas na ndaoine lena mbaineann eolas a bheith acu ar mhéid iomlán a gceart agus, i gcás inarb iomchuí, a bheith in ann brath orthu os comhair na gcúirteanna náisiúnta (breithiúnas an 10 Meitheamh 2021, Ultimo Portfolio Investment (Luxembourg), C‑303/20, EU:C:2021:479, mír 34 agus an cásdlí dá dtagraítear).

58      I bhfianaise an chásdlí sin, is féidir a mheas, cé, mar a cuireadh in iúl i míreanna 51 agus 52 den bhreithiúnas seo, go gceanglaítear le hAirteagal 6(1) de Threoir 2010/13 ar na Ballstáit, i réimse sheirbhísí na meán closamhairc, luach dhínit an duine a chosaint trína n-áirithiú go dtoirmisctear ábhar lena mbaintear an bonn den luach sin, nach gcuirtear as an áireamh, i bprionsabal, go bhféadfar an fhoráil sin a thrasuí i ndlíchóras náisiúnta Ballstáit ar bhonn reachtaíocht náisiúnta lena dtoirmisctear, i gcomhréir le prionsabal ginearálta dhlí an Stáit sin, craoltaí a ghoileann ar chuibheas, ar choinníoll go bhfuil an staid dhlíthiúil a eascraíonn as an reachtaíocht náisiúnta sin beacht agus soiléir go leor chun a chur ar chumas soláthraithe seirbhíse meán a bheith ar an eolas go gcumhdaítear leis an gcoincheap craolta a ghoileann ar chuibheas craoladh físeáin lena sáraítear luach dhínit an duine.

59      Ina theannta sin, ba cheart a mheabhrú go n‑éilítear le prionsabal na deimhneachta dlíthiúla, ar thaobh amháin, go mbeadh rialacha dlí soiléir agus beacht agus, ar an taobh eile, go mbeadh a gcur i bhfeidhm intuartha ag iadsan atá faoina réir, go háirithe nuair a d’fhéadfadh iarmhairtí díobhálacha a bheith leo. Ceanglaítear leis an bprionsabal sin inter alia go gcuirfidh na rialacha sin ar chumas na ndaoine lena mbaineann eolas beacht a bheith acu ar mhéid na n‑oibleagáidí a fhorchuirtear orthu agus nach mór do na daoine sin a bheith in ann a fháil amach go soiléir cad iad a gcearta agus a n‑oibleagáidí agus bearta a dhéanamh dá réir sin (breithiúnas an 21 Bealtaine 2026, Across Fiduciaria agus páirtithe eile, C‑684/24 agus C‑685/24, EU:C:2026:410, mír 40 agus an cásdlí dá dtagraítear).

60      Ina theannta sin, tá an riachtanas seo le haghaidh deimhneacht dhlíthiúil thar a bheith dian i gcás rialachán ar dócha go mbeidh iarmhairtí airgeadais acu. Go háirithe, rialaigh an Chúirt Bhreithiúnais nach féidir pionós, fiú pionós de chineál neamhchoiriúil, a fhorchur ach amháin má tá bunús dlí soiléir gan débhrí leis (féach, chuige sin, breithiúnas an 26 Deireadh Fómhair 2006, Koninklijke Coöperatie Cosun, C‑248/04, EU:C:2006:666, míreanna 79 agus 80 agus an cásdlí dá dtagraítear).

61      Sa chomhthéacs sin, ní mór a mheabhrú, maidir le prionsabal na dlíthiúlachta i dtaca le cionta coiriúla agus pionóis atá cumhdaithe in Airteagal 49(1) den Chairt, a bhfuil feidhm ag an bhforáil sin maidir le hábhair choiriúla (féach, chuige sin, breithiúnas an 1 Lúnasa 2025, BAJI Trans, C‑544/23, EU:C:2025:614, mír 62) ar léiriú ar leith é ar phrionsabal ginearálta na deimhneachta dlíthiúla tugtar le tuiscint, inter alia, go sainítear go soiléir sa dlí na cionta agus na pionóis dóibh chun intuarthacht a áirithiú maidir le sainiú an chiona agus maidir le cinneadh an phionóis araon. Comhlíontar an coinníoll sin i gcás ina bhfuil duine aonair in ann a fháil amach, ar bhonn fhoclaíocht na forála ábhartha agus, más gá, le cabhair ón léiriú a thug na cúirteanna náisiúnta lena mbaineann dó, cé na gníomhartha agus na neamhghníomhartha a fhágfaidh é faoi dhliteanas coiriúil (breithiúnas an 26 Meitheamh 2025, Makeleio agus Zougla, C‑555/23 agus C‑556/23, EU:C:2025:484, mír 88 agus an cásdlí dá dtagraítear). I ndáil leis sin, agus in aon chás, ní féidir an seasamh a bheith seachas sin maidir le pionóis nach de chineál coiriúil iad.

62      Dá bhrí sin, is faoin gcúirt a rinne an tarchur a bheidh sé a fháil amach an féidir le soláthraí seirbhíse meán a bheith ar an eolas, i bhfianaise fhoclaíocht ZRT agus, i gcás inarb iomchuí, le cúnamh ón léiriú a thug an Konstitutsionen sad (an Chúirt Bhunreachtúil) agus an Varhoven Kasatsionen sad (an Chúirt Uachtarach um Achomharc Deiridh) dó, go bhfuil feidhm ag an toirmeasc ar chraoltaí a ghoileann ar chuibheas dá bhforáiltear leis an reachtaíocht náisiúnta sin freisin maidir le craoladh físeáin a sháraíonn dínit an duine.

63      Ar an dara dul síos, maidir leis an gceist an sáraítear leis an reachtaíocht náisiúnta lena léirítear na saintréithe a leagtar amach i mír 55 den bhreithiúnas seo agus lena gcomhlíontar na ceanglais maidir le soiléireacht agus beachtas, de réir bhrí an chásdlí a leagtar amach i míreanna 57 go 61 den bhreithiúnas seo, an ceart chun tuairimí a nochtadh a chumhdaítear in Airteagal 11 den Chairt, ba cheart a mheabhrú nach cearta iomlána iad na cearta agus na saoirsí a chumhdaítear in Airteagal 11, ach nach mór iad a mheas i ndáil lena bhfeidhm sa tsochaí. Mar sin féin, i gcomhréir le hAirteagal 52(1) den Chairt, ní mór foráil a dhéanamh le dlí d’aon teorannú ar fheidhmiú na gceart agus na saoirsí atá aitheanta aici, a n‑inneachar sár-riachtanach a urramú agus, i gcomhréir le prionsabal na comhréireachta, ní mór go bhfuil gá leis agus go bhfreagraíonn sé iarbhír do chuspóirí leasa ghinearálta arna n‑aithint ag an Aontas nó don riachtanas cearta agus saoirsí daoine eile a chosaint (breithiúnas an 26 Feabhra 2026, an Coimisiún v an Ungáir (an Ceart cheart chun seirbhísí meán a sholáthar ar mhinicíocht raidió), C‑92/23, EU:C:2026:108, míreanna 365 agus 367 agus an cásdlí dá dtagraítear).

64      I ndáil leis sin, de réir Airteagal 1 den Chairt tá dínit an duine dosháraithe. Ní mór an dínit sin a urramú agus a chosaint.

65      Is léir ó na mínithe a bhaineann leis an gCairt um Chearta Bunúsacha (IO 2007 C 303, lch. 17) ní amháin gur ceart bunúsach ann féin í dínit an duine, de réir bhrí Airteagal 1, ach gurb ionann í agus bunús na gceart bunúsach. I ndáil leis sin, tagraíonn na mínithe sin go háirithe do Dhearbhú Uilechoiteann Chearta an Duine, a ghlac Comhthionól Ginearálta na Náisiún Aontaithe an 10 Nollaig 1948, inar cumhdaíodh dínit an duine ina bhrollach, ina luaitear gurb é ‘aitheantas do dhínit bhunúsach gach duine den teaghlach daonna agus dá gcearta comhionanna doshannta bunchloch na saoirse, an cheartais agus na síochána ar domhan’. Fágtar ó na mínithe sin nach féidir úsáid a bhaint as aon cheann de na cearta a leagtar síos sa Chairt seo chun dochar a dhéanamh do dhínit duine eile, agus gur cuid de shubstaint na gceart a leagtar síos inti í dínit an duine. Ní mór, dá bhrí sin, í a urramú, fiú amháin agus srian á chur ar cheart (breithiúnas an 21 Aibreán 2026, an Coimisiún v an Ungáir (Luachanna an Aontais), C‑769/22, EU:C:2026:326, mír 486).

66      Leanann sé ón méid sin roimhe seo go gcomhlíonann oibleagáid maidir leis an gcuibheas a urramú, a mhéid is bealach é chun luach dhínit an duine a chosaint, trí thoirmeasc a chur ar chraoladh ábhair lena mbaintear an bonn den luach sin, mar a cheanglaítear le hAirteagal 6(1) de Threoir 2010/13, ar an gcéad dul síos, foras dlisteanach chun srian a chur leis an tsaoirse chun tuairimí a nochtadh agus, ar an dara dul síos, i bhfianaise an tsriain ar an tsaoirse sin a eascraíonn as sin, gur gá gur beart comhréireach é de réir bhrí Airteagal 52(1) den Chairt.

67      Dá bhrí sin, le beart den sórt sin, ní sháraítear an ceart chun tuairimí a nochtadh a chumhdaítear in Airteagal 11 den Chairt le reachtaíocht náisiúnta lena léirítear na saintréithe a leagtar amach i mír 55 den bhreithiúnas seo agus lena gcomhlíontar na ceanglais maidir le soiléireacht agus beachtas, de réir bhrí an chásdlí a leagtar amach i míreanna 57 go 61 den bhreithiúnas sin.

68      I bhfianaise an méid sin thuas, is é an freagra ar an gceist ná nach mór Airteagal 6(1) de Threoir 2010/13, arna léamh i bhfianaise Airteagal 11 den Chairt, a léiriú sa chaoi nach gcuirtear cosc leis ar Bhallstát a bheith in ann, le reachtaíocht náisiúnta lena dtoirmisctear, ar bhonn phrionsabal ginearálta dhlí an Stáit sin, craoltaí a ghoileann ar chuibheas, pionós a ghearradh ar sholáthraí seirbhíse meán as físeán a chraoladh lena sáraítear luach dhínit an duine, a mhéid is féidir le soláthraithe seirbhísí den sórt sin a bheith ar an eolas, i bhfianaise fhoclaíocht na reachtaíochta náisiúnta sin agus, más gá, le cúnamh ón léiriú a thugann na cúirteanna náisiúnta dóibh, go gcumhdaíonn toirmeasc den sórt sin craoltaí lena mbaintear an bonn den luach sin.

 Costais

69      Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.

Ar na forais sin, rialaíonn an Chúirt (an Cúigiú Dlísheomra) mar seo a leanas:

Maidir le Treoir 2010/13/AE ó Pharlaimint na hEorpa agus ón gComhairle an 10 Márta 2010 maidir le comhordú forálacha áirithe arna leagan síos le dlí, rialachán nó gníomh riaracháin i mBallstáit i dtaobh seirbhísí meán closamhairc a sholáthar (‘an Treoir maidir le Seirbhísí Meán Closamhairc’) arna leasú le Treoir (AE) 2018/1808 ó Pharlaimint na hEorpa agus ón gComhairle an 14 Samhain 2018, arna léamh i bhfianaise Airteagal 11 den Chairt um Chearta Bunúsacha an Aontais Eorpaigh,

ní mór léiriú a dhéanamh mar seo a leanas:

ní chuirtear cosc leis ar Bhallstát a bheith in ann, le reachtaíocht náisiúnta lena dtoirmisctear, ar bhonn prionsabal ginearálta de dhlí an Stáit sin, craoltaí a ghoileann ar chuibheas, pionós a ghearradh ar sholáthraí seirbhíse meán as físeán a chraoladh lena mbaintear an bonn de luach dhínit an duine, ar choinníoll go bhfuil soláthraithe seirbhísí den sórt sin in ann a bheith ar an eolas, i bhfianaise fhoclaíocht na reachtaíochta náisiúnta sin agus, i gcás inar gá, le cúnamh ón léiriú a thugann na cúirteanna náisiúnta dóibh, go gcumhdaítear leis an toirmeasc sin craoltaí lena mbaintear an bonn den luach sin.

[Sínithe]


*      Teanga an cháis: an Bhulgáiris.