(1)

Ir-Regolament (UE) 2019/1241 jistabbilixxi dispożizzjonijiet speċifiċi dwar il-miżuri tekniċi fil-livell reġjonali għall-ilmijiet tal-Unjoni fl-Ilmijiet tal-Majjistral.

(2)

Ir-Regolament (UE) 2019/1241 ġie emendat bir-Regolament Delegat tal-Kummissjoni (UE) 2021/2324 (2) fir-rigward tal-miżuri ta’ rimedju biex jitnaqqsu l-qabdiet inċidentali tal-bakkaljaw u tal-merlangu fil-Baħar Ċeltiku u tal-miżuri addizzjonali ta’ selettività bil-għan li jitnaqqsu l-qabdiet aċċessorji tal-gadojd fil-Baħar Irlandiż. Il-miżuri kkonċernati, li għandhom l-għan li jgħinu biex jintlaħqu l-objettivi tal-miżuri ta’ konservazzjoni, il-pjanijiet pluriennali u l-pjan għall-iskartar tal-ħut fl-Ilmijiet tal-Majjistral, sussegwentement ġew aġġornati u estiżi darbtejn, permezz tar-Regolamenti Delegati tal-Kummissjoni (UE) 2022/2588 (3) u (UE) 2024/492 (4) rispettivament. Id-data tal-applikazzjoni tal-miżuri adottati skont ir-Regolament Delegat (UE) 2024/492 tiskadi fil-31 ta’ Diċembru 2024.

(3)

Il-miżuri ta’ rimedju għall-istokkijiet b’bijomassa f’livelli taħt il-Blim previsti skont l-Artikolu 8 tar-Regolament (UE) 2019/472 tal-Parlament Ewropew u tal-Kunsill (5) (il-pjan pluriennali għall-Ilmijiet tal-Punent) jibqgħu meħtieġa biex jiżguraw ir-ritorn rapidu tal-istokk ikkonċernat jew tal-unità funzjonali kkonċernata għal livelli ogħla minn dawk li kapaċi jipproduċu l-MSY. Għalhekk, il-miżuri ta’ rimedju attwalment fis-seħħ permezz tar-Regolament Delegat (UE) 2024/492 jenħtieġ li jiġu estiżi għal sena, sabiex ikomplu jiġu ottimizzati x-xejriet ta’ sfruttament, tiżdied is-selettività tal-irkaptu u jitnaqqsu l-qabdiet mhux mixtieqa.

(4)

Wara Rakkomandazzjoni Konġunta mill-Grupp Reġjonali tal-Istati Membri tal-Ilmijiet tal-Majjistral fis-26 ta’ Settembru 2024, il-miżuri tekniċi stabbiliti fl-Anness VI tar-Regolament (UE) 2019/1241 għal ċertu sajd demersali u pelaġiku fil-Baħar Ċeltiku, fil-Baħar Irlandiż u fil-Punent tal-Iskozja jenħtieġ li jiġu estiżi sal-31 ta’ Diċembru 2025.

(5)

Peress li l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu. Peress li d-data tal-applikazzjoni tal-miżuri adottati skont ir-Regolament Delegat (UE) 2024/492 tiskadi fil-31 ta’ Diċembru 2024, jenħtieġ li dan ir-Regolament japplika b’effett mill-1 ta’ Jannar 2025 sabiex tiġi żgurata l-kontinwità legali.

(6)

Il-miżuri introdotti b’dan ir-Regolament applikabbli għall-ilmijiet tal-Unjoni għandhom l-għan li jilħqu l-objettivi stabbiliti fl-Artikolu 494(1) u (2) tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, min-naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (6) u jikkunsidraw il-prinċipji msemmija fl-Artikolu 494(3) ta’ dak il-ftehim. Dawn huma mingħajr preġudizzju għal kwalunkwe miżura applikabbli fl-ilmijiet tar-Renju Unit tal-Gran Brittanja u l-Irlanda ta’ Fuq.

(7)

Għaldaqstant, jenħtieġ li r-Regolament (UE) 2019/1241 jiġi emendat skont dan,