(1)

Leagtar síos le Rialachán (AE) 2019/1241 forálacha sonracha maidir le bearta teicniúla ar an leibhéal réigiúnach le haghaidh uiscí an Aontais in Uiscí an Iarthuaiscirt.

(2)

Leasaíodh Rialachán (AE) 2019/1241 le Rialachán Tarmligthe (AE) 2021/2324 ón gCoimisiún (2) a mhéid a bhaineann le bearta feabhais chun foghabhálacha trosc agus faoitíní a laghdú sa Mhuir Cheilteach agus bearta roghnaíochta breise arb é is aidhm dóibh foghabhálacha gadóideach a laghdú i Muir Éireann. Maidir leis na bearta lena mbaineann, arb é is aidhm dóibh cuidiú le cuspóirí na mbeart caomhnúcháin, na bpleananna ilbhliantúla agus an phlean maidir le hábhar muirí aischurtha in Uiscí an Iarthuaiscirt a bhaint amach, tugadh cothrom le dáta iad agus cuireadh síneadh leo faoi dhó ina dhiaidh sin, le Rialacháin Tarmligthe (AE) 2022/2588 ón gCoimisiún (3) agus (AE) 2024/492 (4) faoi seach. Rachaidh dáta chur i bhfeidhm na mbeart a glacadh faoi Rialachán Tarmligthe (AE) 2024/492 in éag an 31 Nollaig 2024.

(3)

Maidir leis na bearta feabhais le haghaidh stoic a bhfuil bithmhais acu ar leibhéil faoi bhun Blim dá bhforáiltear faoi Airteagal 8 de Rialachán (AE) 2019/472 ó Pharlaimint na hEorpa agus ón gComhairle (5) (plean ilbhliantúil le haghaidh Uiscí an Iarthair), tá gá fós leo chun a áirithiú go ndéanfar leibhéil an stoic nó an aonaid fheidhmiúil lena mbaineann a athbhunú go tapa os cionn na leibhéal sin atá in ann an uastáirgeacht inbhuanaithe a bhaint amach. Dá bhrí sin, ba cheart síneadh bliana a chur leis na bearta feabhais atá i bhfeidhm faoi láthair le Rialachán (AE) 2024/492, chun patrúin saothraithe a bharrfheabhsú ar bhonn leanúnach, cur le roghnaíocht trealaimh agus gabhálacha de thaisme a laghdú.

(4)

Tar éis do Ghrúpa Réigiúnach Bhallstáit Uiscí an Iarthuaiscirt Moladh Comhpháirteach a chur isteach an 26 Meán Fómhair 2024, ba cheart síneadh a chur leis na bearta teicniúla a leagtar amach in Iarscríbhinn VI a ghabhann le Rialachán (AE) 2019/1241 le haghaidh iascaigh ghrinnill agus pheiligeacha áirithe sa Mhuir Cheilteach, i Muir Éireann agus in Iarthar na hAlban go dtí an 31 Nollaig 2025.

(5)

Ós rud é go bhfuil tionchar díreach ag na bearta dá bhforáiltear sa Rialachán seo ar phleanáil an tséasúir iascaireachta le haghaidh soithí de chuid an Aontais agus ar na gníomhaíochtaí eacnamaíocha a bhaineann leo, ba cheart an Rialachán seo a theacht i bhfeidhm an lá tar éis lá a fhoilsithe. Ós rud é go rachaidh dáta chur i bhfeidhm na mbeart a glacadh faoi Rialachán Tarmligthe (AE) 2024/492 in éag an 31 Nollaig 2024, ba cheart feidhm a bheith ag an Rialachán seo le héifeacht ón 1 Eanáir 2025 chun leanúnachas dlíthiúil a áirithiú.

(6)

Leis na bearta a tugadh isteach leis an Rialachán seo is infheidhme maidir le huiscí an Aontais, saothraítear na cuspóirí a leagtar amach in Airteagal 494(1) agus (2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (6), agus tabharfar aird ar na prionsabail dá dtagraítear in Airteagal 494(3) den chomhaontú sin. Tá siad gan dochar d’aon bheart is infheidhme in uiscí Ríocht Aontaithe na Breataine Móire agus Thuaisceart Éireann.

(7)

Ba cheart, dá bhrí sin, Rialachán (AE) 2019/1241 a leasú dá réir sin,