European flag

Iris Oifigiúil
an Aontais Eorpaigh

GA

Sraith L


2025/1304

3.7.2025

RIALACHÁN (Euratom) 2025/1304 ÓN gCOMHAIRLE

an 23 Meitheamh 2025

lena mbunaítear Clár Taighde agus Oiliúna an Chomhphobail Eorpaigh do Fhuinneamh Adamhach le haghaidh na tréimhse 2026-2027 lena gcomhlánaítear Fís Eorpach – an Clár Réime um Thaighde agus Nuálaíocht agus lena n-aisghairtear Rialachán (Euratom) 2021/765

TÁ COMHAIRLE AN AONTAIS EORPAIGH,

Ag féachaint don Chonradh ag bunú an Chomhphobail Eorpaigh do Fhuinneamh Adamhach, agus go háirithe Airteagal 7, an chéad mhír, de,

Ag féachaint don togra ón gCoimisiún Eorpach,

Tar éis dul i gcomhairle leis an gCoiste Eolaíoch agus Teicniúil,

De bharr an mhéid seo a leanas:

(1)

Is é is aidhm don Chomhphobal Eorpach do Fhuinneamh Adamhach (‘an Comhphobal’) an caighdeán maireachtála sna Ballstáit a fheabhsú trí thaighde núicléach a chur chun cinn agus a éascú sna Ballstáit agus é a chomhlánú trí chlár taighde agus oiliúna de chuid an Chomhphobail a chur i gcrích.

(2)

Is féidir don taighde núicléach rannchuidiú leis an bhfolláine shóisialta, an rathúnas eacnamaíoch agus an inbhuanaitheacht comhshaoil trí fheabhas a chur ar an tsábháilteacht núicléach an tslándáil núicléach agus an chosaint ar radaíocht. Leis an taighde ar an gcosaint ar radaíocht, tá feabhas tagtha ar theicneolaíochtaí leighis dá dtairbhíonn a lán saoránach agus is féidir don taighde sin a bheith ina chúis le feabhsuithe ar earnálacha eile amhail an tionscal, an talmhaíocht, an comhshaol agus an tslándáil.

(3)

Agus lánurraim á tabhairt do cheart na mBallstát cinneadh a dhéanamh faoin meascán fuinnimh a bheidh acu, d’fhéadfadh torthaí taighde an chláir a bhunaítear leis an Rialachán seo cur le haistriú chuig córas fuinnimh aeráidneodrach ar bhealach sábháilte, éifeachtach, slán.

(4)

Chun leanúnachas an taighde núicléach ar leibhéal an Chomhphobail a áirithiú, is gá Clár Taighde agus Oiliúna an Chomhphobail a bhunú le haghaidh na tréimhse ón 1 Eanáir 2026 go dtí an 31 Nollaig 2027 (‘Clár Euratom 2026-2027’) ionas go mbeidh fad a thréimhse ailínithe le fad tréimhse an chreata airgeadais ilbhliantúil le haghaidh na mblianta 2021 go 2027 a leagtar síos i Rialachán (AE, Euratom) 2020/2093 ón gComhairle (1). Le Clár Euratom 2026-2027, ba cheart leanúint de phríomhghníomhaíochtaí taighde Chlár Taighde agus Oiliúna an Chomhphobail Eorpaigh do Fhuinneamh Adamhach roimhe seo a chur i gcrích le haghaidh na mblianta 2021-2025 a bunaíodh le Rialachán (Euratom) 2021/765 ón gComhairle (2) (‘Clár Euratom 2021-2025’), agus na cuspóirí céanna ag gabháil leis agus úsáid á bhaint as an modh cur chun feidhme céanna.

(5)

Sa tuarascáil ón gCoimisiún maidir leis an meastóireacht eatramhach ar Chlár Euratom2021-2025, cuireadh i dtábhacht ábharthacht na ngnéithe éagsúla den Chlár sin. De réir na tuarascála, áirítear ar na gnéithe sin: (a) an phunann taighde fhairsing lena dtacaítear leis an tsábháilteacht núicléach, an tslándáil núicléach agus le coimircí núicléacha, cosaint ar radaíocht agus feidhmeanna neamhchumhachtacha; (b) breisluach AE i gcás taighde ar eamhnú; (c) tacaíocht do gheallsealbhóirí trí shábháilteacht fheabhsaithe agus tríd an mbonn eolais a bhaineann le saincheisteanna sábháilteachta i dtaobh oibriú fadtéarmach na ngléasraí cumhachta núicléiche atá ann faoi láthair; (d) an obair ullmhúcháin a ghabhann leis an gcás sábháilteachta, slándála agus coimircí le haghaidh ardchórais núicléacha; (e) an taighde ar chomhleá a fhorbairt tuilleadh trí rialachas a fheabhsú; agus (f) tosaíochtaí an chláir a shainiú agus conairí níos inchreidte agus níos réalaíche a shainaithint. Ba é conclúid na tuarascála gur cheart na gnéithe sin a choinneáil ar bun maidir le Clár Euratom 2026-2027.

(6)

Tá Clár Euratom 2026-2027 ceaptha agus deartha in aghaidh an ghá atá le mais chriticiúil de ghníomhaíochtaí a dtugtar tacaíocht dóibh a bhunú. Tá an méid sin le baint amach trí líon teoranta de chuspóirí sonracha a bhunú, ar cuspóirí iad atá dírithe ar úsáid shábháilte a bhaint as eamhnú núicléach i gcomhair feidhmeanna cumhachta agus neamhchumhachta, ar an saineolas is gá a fhorbairt agus a choinneáil ar bun, ar fhuinneamh comhleá a chothú agus ar thacaíocht a thabhairt do bheartais an Aontais agus a Bhallstát maidir leis an tsábháilteacht núicléach, coimircí núicléacha agus an tslándáil núicléach.

(7)

Is cuid ríthábhachtach é Clár Euratom 2026-2027 d’iarrachtaí an Aontais maidir le ceannaireacht theicneolaíoch a fhorbairt tuilleadh agus barr feabhais sa taighde agus nuálaíocht núicléach a chur chun cinn, agus maidir lena áirithiú go mbaintear amach na caighdeáin is airde i dtaca le sábháilteacht, slándáil, coimircí, cosaint ar radaíocht, breosla spíonta sábháilte, bainistiú dramhaíola radaighníomhaí agus díchoimisiúnú sa réimse núicléach, i gcomhréir le cuspóirí an chláir a leagtar amach sa Rialachán seo.

(8)

Ós rud é go mbaineann na Ballstáit uile úsáid as ábhair radaighníomhacha, tá sé tábhachtach a áirithiú go ndéanfar breosla spíonta agus dramhaíl radaighníomhach a bhainistiú ar bhealach freagrach agus sábháilte, mar a cheanglaítear le Treoir 2011/70/Euratom ón gComhairle (3), chun nach bhforchuirtear ualaí míchuí ar na glúnta atá le teacht. Le Clár Euratom 2026-2027, ba cheart leanúint de bheith ag feabhsú taighde agus forbairt a bhaineann le teicneolaíochtaí agus inniúlachtaí i réimse an bhainistithe ar bhreosla spíonta agus ar dhramhaíl radaighníomhach, agus ba cheart leanúint de bheith ag tacú leis an taighde agus forbairt sin freisin.

(9)

Laistigh de Chlár Eurotam 2026-2027, ba cheart an taighde ar an bhfuinneamh comhleá a chur chun feidhme i gcomhréir leis an Treochlár Comhleá Eorpach, ina leagtar amach an taighde agus na forbairtí a éilítear chun bonn a sholáthar do ghléasra cumhachta comhleá ginte leictreachais, agus i gcomhréir le Cinneadh 2007/198/Euratom ón gComhairle (4). Sa ghearrthéarma agus sa mheántéarma, is é is tábhachtaí tógáil agus oibriú tosaigh ITER a thabhairt i gcrích agus le clár láidir taighde ar an gcomhleá ba cheart gníomhaíochtaí na hEorpa maidir le ITER a chomhlánú chun tacú leis na hoibríochtaí ITER a bheidh ann amach anseo agus leis an ullmhúchán don chéad ghléasra cumhachta comhleá.

(10)

Trí thacú leis an taighde núicléach, le Clár Euratom 2026-2027, ba cheart rannchuidiú le cuspóirí an chláir Fís Eorpach- an Clár Réime um Thaighde agus um Nuálaíocht (‘Fís Eorpach’) a bhaint amach, ar clár é a bunaíodh le Rialachán (AE) 2021/695 ó Pharlaimint na hEorpa agus ón gComhairle (5), agus ba cheart freisin cur chun feidhme straitéis Eoraip 2030 agus neartú an limistéir Eorpaigh taighde a éascú.

(11)

Le Clár Euratom 2026-2027, ba cheart sineirgí a lorg leis an gclár Fís Eorpach agus le cláir eile de chuid an Aontais, óna ndearadh agus óna bpleanáil straitéise, ar aghaidh go dtí roghnú tionscadal, bainistiú, cumarsáid, leathadh agus saothrú torthaí, mar aon le faireachán, iniúchadh agus rialachas.

(12)

Ba cheart gníomhaíochtaí Chlár Euratom 2026-2027 a bheith comhréireach, gan maoiniú príobháideach a dhúbláil ná a phlódú agus ba cheart breisluach soiléir a bheith acu don Eoraip. Áiritheoidh an méid sin an chomhsheasmhacht idir gníomhaíochtaí Chlár Euratom 2026-2027 agus rialacha an Aontais maidir le státchabhair, agus seachnófar saobhadh míchuí iomaíochta sa mhargadh inmheánach.

(13)

Cé gur faoi gach Ballstát atá sé a roghnú úsáid a bhaint nó gan a bhaint as an gcumhacht núicléach, aithnítear freisin go mbíonn róil dhifriúla ag an bhfuinneamh núicléach i mBallstáit éagsúla. Beidh Clár Euratom 2026-2027 ina rannchuidiú freisin trí bhíthin a chuid gníomhaíochtaí taighde chun plé leathan a chothú i measc na ngeallsealbhóirí ábhartha go léir maidir leis na deiseanna agus rioscaí a bhaineann leis an bhfuinneamh núicléach.

(14)

D’fhonn aghaidh a thabhairt ar na riachtanais atá ann i réimsí an oideachais agus na hoiliúna, ba cheart, le Clár Euratom 2026-2027, tacaíocht a thabhairt trí ranníocaíochtaí airgeadais chun go mbeidh taighdeoirí sa réimse núicléach incháilithe chun tairbhiú de Ghníomhaíochtaí Marie Skłodowska-Curie, ar comhchéim le taighdeoirí i réimsí eile.

(15)

Leagtar síos leis an Rialachán seo imchlúdach airgeadais d’fhad tréimhse iomlán Chlár Euratom 2026-2027 arb éard a bheidh ann an méid príomhthagartha, de réir bhrí phointe 18 den Chomhaontú Idirinstitiúideach an 16 Nollaig 2020 idir Parlaimint na hEorpa, Comhairle an Aontais Eorpaigh agus an Coimisiún Eorpach maidir leis an smacht buiséadach, comhar in ábhair bhuiséadacha agus bainistíocht fhónta airgeadais, agus maidir le hacmhainní dílse nua freisin, lena n-áirítear treochlár i dtreo acmhainní dílse nua a thabhairt isteach (6), do Pharlaimint na hEorpa agus don Chomhairle le linn an nós imeachta bhuiséadaigh bhliantúil.

(16)

Tá feidhm ag Rialachán (AE, Euratom) 2024/2509 ó Pharlaimint na hEorpa agus ón gComhairle (7) (‘an Rialachán Airgeadais’) maidir le Clár Euratom. Leis an Rialachán Airgeadais, leagtar síos rialacha maidir le cur chun feidhme bhuiséad an Aontais, lena n-áirítear na rialacha maidir le deontais, duaiseanna, soláthar, bainistíocht indíreach, ionstraimí airgeadais, ráthaíochtaí buiséadacha, cúnamh airgeadais agus aisíocaíocht a dhéanamh le saineolaithe seachtracha. Cuimsítear freisin leis na rialacha a glacadh ar bhonn Airteagal 322 den Chonradh ar Fheidhmiú an Aontais Eorpaigh (CFAE) córas ginearálta coinníollachta chun buiséad an Aontais a chosaint.

(17)

Maidir leis na cineálacha maoiniúcháin agus na modhanna cur chun feidhme a úsáidfear faoin Rialachán seo, ba cheart iad a roghnú ar bhonn a n-oiriúnachta maidir le cuspóirí sonracha a ngníomhaíochtaí a bhaint amach agus maidir le torthaí a bhaint amach, agus aird á tabhairt, go háirithe, ar na costais rialuithe, an ualach riaracháin agus an riosca neamh-chomhlíontachta a mheastar a bheith ann. Maidir le deontais, ba cheart a chuimsiú leis sin breithniú ar úsáid cnapshuimeanna, rátaí comhréidhe agus costais aonaid.

(18)

Ba cheart aird ar leith a thabhairt ar rannpháirtíocht leordhóthanach na bhfiontar beag agus meánmhéide (FBManna) agus na hearnála príobháidí i gcoitinne a áirithiú. Ba cheart measúnuithe cainníochtúla agus cáilíochtúla a dhéanamh ar rannpháirtíocht FBManna mar chuid de na socruithe meastóireachta agus faireacháin.

(19)

Ba cheart é a bheith d’aidhm ag na gníomhaíochtaí a fhorbrófar faoi Chlár Euratom 2026-2027 deireadh a chur leis an neamhionannas inscne agus an comhionannas idir fir agus mná sa taighde agus nuálaíocht a chur chun cinn, i gcomhréir le hAirteagail 2 agus 3 den Chonradh ar an Aontas Eorpach agus Airteagal 8 de CFAE. Ba cheart an ghné inscne a chomhtháthú sa taighde agus nuálaíocht agus ba cheart leanúint den ghné sin ag gach céim den timthriall taighde.

(20)

Chun an caidreamh idir an eolaíocht agus an tsochaí a neartú agus muinín an phobail san eolaíocht a neartú, ba cheart, le Clár Euratom 2026-2027, tús áite a thabhairt do rannpháirtíocht eolach na saoránach agus na sochaí sibhialta i ndáil le hábhair thaighde agus nuálaíochta tríd an oideachas eolaíochta a chur chun cinn, trí rochtain níos fearr ar an eolas eolaíoch a sholáthar, trí chláir oibre fhreagracha maidir le taighde agus le nuálaíocht a fhorbairt lena bhfreastalaítear ar ábhair imní agus ionchas na saoránach agus na sochaí sibhialta agus trína n-éascaítear rannpháirtíocht na saoránach agus na sochaí sibhialta i ngníomhaíochtaí faoi Chlár Euratom 2026-2027.

(21)

Le gníomhaíochtaí a thagann faoi raon feidhme Chlár Euratom 2026-2027, ba cheart na cearta bunúsacha a urramú agus cloí leis na prionsabail a aithnítear i gCairt um Chearta Bunúsacha an Aontais Eorpaigh go háirithe.

(22)

Is den tábhacht go leanfar d’éascaíocht a dhéanamh ar shaothrú na maoine intleachtúla a fhorbróidh na rannpháirtithe, agus leasanna dlisteanacha rannpháirtithe eile agus an Chomhphobail á gcosaint i gcomhréir le Teideal II, Caibidil 2, den Chonradh ag bunú an Chomhphobail Eorpaigh do Fhuinneamh Adamhach (‘Conradh Euratom’).

(23)

Chun an tionchar is fearr is féidir a bhaint as an gcistiú ó Euratom a áirithiú, féadfaidh an Comhphobal, i gcás inarb iomchuí, breithniú a dhéanamh ar Chomhpháirtíochtaí Eorpacha le comhpháirtithe ón earnáil phoiblí nó ón earnáil phríobháideach, ar choinníoll gur féidir an tionchar inmhianaithe a bhaint amach ar bhealach níos éifeachtaí i gcomhpháirtíocht ná mar a dhéanfadh an Comhphobal as féin, agus nuair a chuirtear i gcomparáid iad le cineálacha eile tacaíochta de Chlár Euratom 2026-2027. Ba cheart a áirithiú leis an Rialachán seo go mbeidh cur chuige soiléir ag baint le comhpháirtíochtaí den sórt sin, ar cur chuige é atá bunaithe ar shaolré, agus go leanfaidh na comhpháirtíochtaí sin próiseas trédhearcach roghnúcháin agus cinnteoireachta i gcomhréir le hIarscríbhinn III a ghabhann le Rialachán (AE) 2021/695.

(24)

Ba cheart é a bheith indéanta freisin aghaidh a thabhairt ar chuspóirí Chlár Euratom 2026-2027 trí ionstraimí airgeadais agus ráthaíochtaí buiséadacha faoi chláir atá bunaithe ar CFAE, ar choinníoll go gcomhlíonfaidh na gníomhaíochtaí cuspóirí agus rialacha na gclár sin.

(25)

Chun an cur chun feidhme is éifeachtaí is féidir a áirithiú agus creat comhleanúnach cuimsitheach trédhearcach a bheith ann do na tairbhithe, ba cheart an rannpháirtíocht i gClár Euratom 2026-2027 mar aon le scaipeadh na dtorthaí taighde, a bheith faoi réir rialacha ábhartha Rialachán (AE) 2021/695, maille le roinnt modhnuithe agus eisceachtaí. Na sainmhínithe ábhartha agus príomhchineálacha gníomhaíochta a leagtar amach sa Rialachán sin, ba cheart feidhm a bheith acu chun críocha an Rialacháin seo.

(26)

Tá sé léirithe gur sásra coimirce tábhachtach atá sa chiste um ráthaíocht rannpháirtithe a bunaíodh faoin gClár Fís 2020 a bunaíodh le Rialachán (AE) Uimh. 1291/2013 ó Pharlaimint na hEorpa agus ón gComhairle (8) agus a ndéanann an Coimisiún bainistiú air, ar sásra é lena maolaítear na rioscaí a bhaineann leis na méideanna atá dlite agus nach bhfuil aisíoctha ag rannpháirtithe mainneachtana. Ba cheart, dá bhrí sin, leanúint leis an sásra coimirce sin. Thairis sin, ba cheart gníomhaíochtaí a dhéantar faoi chuimsiú an Rialacháin seo a chumhdach leis an sásra árachais fhrithpháirtigh a bunaíodh de bhun Rialachán (AE) 2021/695.

(27)

Ba cheart don Airmheán Comhpháirteach Taighde (‘JRC’) leanúint d’fhianaise neamhspleách eolaíoch, a bheidh dírithe ar chustaiméirí, agus tacaíocht theicniúil a sholáthar don Aontas agus do na Ballstát, mar is iomchuí, ar feadh thimthriall iomlán na mbeartas. Ba cheart gníomhaíochtaí díreacha JRC a chur chun feidhme ar bhealach solúbtha, éifeachtúil, trédhearcach, agus riachtanais ábhartha úsáideoirí JRC agus riachtanais bheartais an Aontais, go háirithe i réimse na sábháilteachta núicléiche, na gcoimircí núicléacha agus na slándála núicléiche, á gcur san áireamh, agus an chosaint ar leasanna airgeadais an Aontais á háirithiú. De réir na gconclúidí ón gComhairle an 26 Aibreán 1994 maidir le ról JRC, ba cheart don JRC leanúint d’acmhainní breise a ghiniúint trí ghníomhaíochtaí iomaíocha tacaíochta do bheartais an Aontais nó thar ceann tríú páirtithe. Ba cheart JRC a bheith in ann páirt a ghlacadh i ngníomhaíochtaí indíreacha, i gcás ina bhforáiltear amhlaidh sa chlár oibre ábhartha.

(28)

I gcomhréir leis an Rialachán Airgeadais, Rialachán (AE, Euratom) Uimh. 883/2013 ó Pharlaimint na hEorpa agus ón gComhairle (9), agus Rialachán (CE, Euratom) Uimh. 2988/95 (10), (Euratom, CE) Uimh. 2185/96 (11) agus (AE) 2017/1939 (12) ón gComhairle, tá leasanna airgeadais an Aontais le cosaint trí bhíthin bearta comhréireacha, lena n-áirítear bearta a bhaineann le neamhrialtachtaí a chosc, a bhrath, a cheartú agus a imscrúdú, lena n-áirítear calaois, le haisghabháil cistí a cailleadh, a íocadh go mícheart nó a úsáideadh go mícheart agus, i gcás inarb iomchuí, le pionóis riaracháin a fhorchur. Go sonrach, i gcomhréir le Rialachán (Euratom, CE) Uimh. 2185/96 agus (AE, Euratom) Uimh. 883/2013, tá sé de chumhacht ag an Oifig Eorpach Frith-Chalaoise (OLAF) imscrúduithe riaracháin a dhéanamh, lena n-áirítear seiceálacha agus cigireachtaí ar an láthair, d’fhonn a shuí ar tharla calaois, éilliú nó aon ghníomhaíocht neamhdhleathach eile a dhéanann difear do leasanna airgeadais an Aontais. Cumhachtaítear Oifig an Ionchúisitheora Phoiblí Eorpaigh (‘OIPE’), i gcomhréir le Rialachán (AE) 2017/1939, chun coireanna a dhéanann difear do leasanna airgeadais an Aontais, dá bhforáiltear i dTreoir (AE) 2017/1371 ó Pharlaimint na hEorpa agus ón gComhairle, a imscrúdú agus a ionchúiseamh (13). I gcomhréir leis an Rialachán Airgeadais, aon duine nó aon eintiteas a fhaigheann cistiú ón Aontas, táthar le hoibriú i gcomhar go hiomlán maidir le cosaint leasanna airgeadais an Aontais, na cearta agus an rochtain is gá a thabhairt don Choimisiún, do OLAF, don Chúirt Iniúchóirí agus, i ndáil leis na mBallstát sin atá rannpháirteach sa chomhar feabhsaithe de bhun Rialachán (AE) 2017/1939, do OIPE, agus táthar le háirithiú go ndéanfaidh aon tríú páirtí a bheidh páirteach i gcur chun feidhme cistí ón Aontas cearta coibhéiseacha a thabhairt.

(29)

Féadfaidh tríú tíortha a bheith rannpháirteach i gClár Euratom 2026-2027 ar bhonn a n-ionstraimí dlí féin. Ba cheart foráil ar leith a thabhairt isteach leis an Rialachán seo lena gcuirfear de cheangal ar thríú tíortha na cearta agus an rochtain is gá a thabhairt don oifigeach údarúcháin freagrach, do OLAF agus don Chúirt Iniúchóirí chun go bhféadfaidh siad a gcuid inniúlachtaí féin a fheidhmiú go cuimsitheach.

(30)

Chun coinníollacha aonfhoirmeacha a áirithiú chun na gníomhaíochtaí faoi Chlár Euratom a chur chun feidhme agus chun faireachán agus meastóireacht a dhéanamh orthu, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (14).

(31)

De bhun mhíreanna 22 agus 23 den Chomhaontú Idirinstitiúideach an 13 Aibreán 2016 maidir le Reachtóireacht Níos Fearr (15), ba cheart meastóireacht a dhéanamh ar Chlár Euratom ar bhonn na faisnéise arna bailiú i gcomhréir le ceanglais faireacháin shonracha, agus ag an am céanna ualach riaracháin, go háirithe ar na Ballstáit, agus ró-rialáil, á seachaint. Ar na ceanglais sin ba cheart a chuimsiú, i gcás inarb iomchuí, táscairí intomhaiste mar bhonn chun meastóireacht a dhéanamh ar éifeachtaí Chlár Euratom 2026-2027 ar an láthair.

(32)

Maidir le Bord Gobharnóirí JRC, a bunaíodh le Cinneadh 96/282/Euratom ón gCoimisiún (16), chuathas i gcomhairle leis maidir le hinneachar eolaíoch agus teicneolaíoch ghníomhaíochtaí díreacha JRC.

(33)

Chuathas i gcomhairle le Parlaimint na hEorpa ar bhonn deonach agus tá tuairim tugtha uaithi (17). Chuathas i gcomhairle le Coiste Eacnamaíoch agus Sóisialta na hEorpa ar bhonn deonach agus tá tuairim tugtha uaidh (18).

(34)

Ar chúiseanna deimhneachta dlíthiúla, ba cheart Rialachán (Euratom) 2021/765 a aisghairm,

TAR ÉIS AN RIALACHÁN SEO A GHLACADH:

CAIBIDIL I

FORÁLACHA GINEARÁLTA

Airteagal 1

Ábhar

Leis an Rialachán seo, bunaítear Clár Taighde agus Oiliúna an Chomhphobail Eorpaigh do Fhuinneamh Adamhach don tréimhse ón 1 Eanáir 2026 go dtí an 31 Nollaig 2027 (‘Clár Euratom 2026-2027’) agus na rialacha maidir le rannpháirtíocht agus scaipeadh i ngníomhaíochtaí indíreacha faoi Chlár Euratom 2026-2027, de chomhlánú ar an gclár Fís Eorpach.

Leagtar síos le cuspóirí Chlár Euratom 2026-2027, an buiséad don tréimhse 2026-2027, na foirmeacha cistiúcháin a bheidh ann agus na rialacha a bhaineann leis an gcistiú sin a sholáthar.

Airteagal 2

Sainmhínithe

Chun críocha an Rialacháin seo, tá feidhm ag na sainmhínithe ábhartha a leagtar amach i Rialachán (AE) 2021/695. Déanfar tagairtí sna sainmhínithe sin don Aontas agus don chlár Fís Eorpach a fhorléiriú mar thagairtí don Chomhphobal Eorpach do Fhuinneamh Adamhach (‘an Comhphobal’) agus do Chlár Euratom 2026-2027 faoi seach. Mar sin féin, chun críocha an Rialacháin seo, ciallaíonn ‘clár oibre’ an doiciméad a ghlacfaidh an Coimisiún chun Clár Euratom 2026-2027 a chur chun feidhme i gcomhréir le hAirteagal 16 den Rialachán seo.

Gach tagairt dá ndéantar sa Rialachán seo do Rialachán (AE) 2021/695, is tagairtí iad don leagan atá i bhfeidhm ón 23 Meitheamh 2025.

Airteagal 3

Cuspóirí an chláir

1.   Is é cuspóir ginearálta Chlár Euratom 2026-2027 taighde a dhéanamh sa réimse núicléach agus gníomhaíochtaí oiliúna, agus béim á cur ar fheabhsú leanúnach na sábháilteachta núicléiche, na slándála núicléiche agus na cosanta ar radaíocht, mar aon le baint amach chuspóirí an chláir Fís Eorpach a chomhlánú inter alia i gcomhthéacs an aistrithe fuinnimh.

2.   Tá na cuspóirí sonracha seo a leanas ag Clár Euratom 2026-2027:

(a)

feabhas a chur ar an tsábháilteacht núicléach, slándáil núicléach, coimircí núicléacha, cosaint ar radaíocht, breosla spíonta sábháilte agus bainistiú dramhaíola radaighníomhaí agus díchoimisiúnú, lena n-airítear úsáid shábháilte, shlán, éifeachtúil an fhuinnimh núicléach agus feidhmeanna neamhchumhachtacha radaíochta ianúcháin;

(b)

saineolas agus inniúlacht sa réimse núicléach laistigh den Chomhphobal a choinneáil ar bun agus a fhorbairt tuilleadh;

(c)

forbairt an fhuinnimh comhleá a chothú mar fhoinse fhéideartha fuinnimh don ghiniúint leictreachais agus rannchuidiú le cur chun feidhme an treochláir comhleá Eorpaigh;

(d)

tacaíocht a thabhairt do bheartas an Aontais agus a Bhallstáit maidir leis an tsábháilteacht núicléach, le coimircí núicléacha agus leis an tslándáil núicléach.

3.   Déanfar na cuspóirí a liostaítear i míreanna 1 agus 2 a chur chun feidhme i gcomhréir le hIarscríbhinn I. Féadfaidh freagairtí ar dheiseanna, géarchéimeanna agus bagairtí atá ag teacht chun cinn, a bheith san áireamh i gcur chun feidhme na gcuspóirí sin, ach údar cuí a bheith leis.

Airteagal 4

Buiséad

1.   Is é EUR 598 346 804 i bpraghsanna reatha an t-imchlúdach airgeadais do chur chun feidhme Chlár Euratom 2026-2027 le haghaidh na tréimhse ón 1 Eanáir 2026 go dtí an 31 Nollaig 2027.

2.   Is é seo a leanas a bheidh i ndáileadh táscach na suime dá dtagraítear i mír 1:

(a)

EUR 252 532 225 le haghaidh gníomhaíochtaí indíreacha i ndáil le taighde agus forbairt comhleá;

(b)

EUR 115 339 356 le haghaidh gníomhaíochtaí indíreacha i ndáil le heamhnú núicléach, an tsábháilteacht núicléach, agus an chosaint ar radaíocht;

(c)

EUR 230 475 223 le haghaidh gníomhaíochtaí díreacha arna ndéanamh ag an Airmheán Comhpháirteach Taighde.

Ní fhéadfaidh an Coimisiún imeacht ón méid dá dtagraítear sa chéad fhomhír, pointe (c).

3.   Féadfar a chumhdach freisin leis an méid dá dtagraítear i mír 1 costais maidir le hullmhúchán, faireachán, rialú, iniúchóireacht, meastóireacht agus gníomhaíochtaí agus caiteachas eile a bhaineann le bainistiú agus cur chun feidhme Chlár Euratom 2026-2027, lena n-áirítear an caiteachas riaracháin uile, chomh maith le meastóireacht a dhéanamh ar ghnóthú a chuspóirí. Ní rachaidh na costais riaracháin a bhaineann le gníomhaíochtaí indíreacha os cionn 6 % den mhéid a dáileadh ar ghníomhaíochtaí indíreacha Chlár Euratom 2026-2027 dá dtagraítear i mír 2, an chéad fhomhír, pointí (a) agus (b). Féadfar seo a leanas a chumhdach freisin le húsáid an mhéid dá dtagraítear i mír 1:

(a)

a mhéid a bhaineann siad sin le cuspóirí Chlár Euratom 2026-2027, costais a bhaineann le staidéir, cruinnithe saineolaithe, gníomhaíochtaí faisnéise agus cumarsáide;

(b)

costais a bhaineann le líonraí teicneolaíochta faisnéise arb é is fócas dóibh próiseáil agus malartú faisnéise, lena n-áirítear uirlisí teicneolaíochta faisnéise corparáideacha agus cúnamh teicniúil agus riaracháin eile a bhfuil gá leo i ndáil le bainistiú Chlár Euratom 2026-2027.

4.   Féadfar leithreasuithe a iontráil sa bhuiséad tar éis 2027 chun na costais dá bhforáiltear i mír 3 a chumhdach, más gá sin ionas go mbeifear in ann na gníomhaíochtaí nach mbeidh tugtha i gcrích faoin 31 Nollaig 2027 a bhainistiú.

5.   Gealltanais bhuiséadacha maidir le gníomhaíochtaí is faide ná 1 bhliain airgeadais amháin, féadfar iad a roinnt ina dtráthchodanna bliantúla thar roinnt blianta.

6.   Gan dochar do Rialachán (AE, Euratom) 2024/2509 (‘an Rialachán Airgeadais’), caiteachas ar bhearta a d’eascraigh as tionscadail a áirítear sa chéad chlár oibre, is caiteachas é a fhéadfaidh a bheith incháilithe ón 1 Eanáir 2026 ar aghaidh.

7.   Acmhainní arna leithdháileadh ar na Ballstáit faoi bhainistíocht roinnte, féadfar iad a aistriú, arna iarraidh sin don Bhallstát lena mbaineann, chuig Clár Euratom 2026-2027, faoi réir na gcoinníollacha a leagtar amach sna forálacha ábhartha i Rialachán (AE) 2021/1060 ó Pharlaimint na hEorpa agus ón gComhairle (19). Cuirfidh an Coimisiún na hacmhainní sin chun feidhme go díreach i gcomhréir le hAirteagal 62(1), an chéad fhomhír, pointe (a), den Rialachán Airgeadais nó go hindíreach i gcomhréir le pointe (c) den fhomhír sin. Úsáidfear na hacmhainní sin chun leas an Bhallstáit lena mbaineann.

Airteagal 5

Tríú tíortha atá comhlachaithe le Clár Euratom 2026-2027

1.   Beidh Clár Euratom 2026-2027 in ann comhlachas a dhéanamh leis na tríú tíortha seo a leanas:

(a)

tíortha aontacha, tíortha is iarrthóirí agus iarrthóirí ionchasacha, i gcomhréir leis na prionsabail ghinearálta agus na téarmaí agus coinníollacha ginearálta a bhaineann le rannpháirtíocht na dtíortha sin i gcláir de chuid an Chomhphobail arna mbunú sna comhaontuithe réime agus sna cinntí ó Chomhairlí Comhlachais ar leith nó i gcomhaontuithe comhchosúla agus i gcomhréir leis na coinníollacha sonracha a leagtar síos i gcomhaontuithe idir an Comhphobal agus na tíortha sin;

(b)

tíortha de Bheartas Comharsanachta na hEorpa, i gcomhréir leis na prionsabail ghinearálta agus na téarmaí agus coinníollacha ginearálta a bhaineann le rannpháirtíocht na dtíortha sin i gcláir de chuid an Chomhphobail arna mbunú sna comhaontuithe réime agus sna cinntí ó chomhairlí comhlachais ar leith, nó i gcomhaontuithe comhchosúla agus i gcomhréir leis na coinníollacha sonracha a leagtar síos i gcomhaontuithe idir an Comhphobal agus na tíortha sin;

(c)

tríú tíortha agus críocha a chomhlíonann na critéir uile seo a leanas:

(i)

acmhainneacht mhaith eolaíochta, teicneolaíochta agus nuálaíochta a bheith acu;

(ii)

gealltanas a bheith tugtha acu maidir le geilleagar margaidh oscailte riailbhunaithe, lena n-áirítear a bheith ag caitheamh ar bhealach cóir agus cothrom le cearta maoine intleachtúla, agus sin faoi choimirce institiúidí daonlathacha;

(iii)

beartais a chur chun cinn lena gcuirtear feabhas ar dhea-bhail eacnamaíoch agus sóisialta na saoránach.

2.   Maidir le comhlachas le Clár Euratom 2026-2027 a dhéanfar le gach ceann de na tríú tíortha faoi mhír 1, pointe (c), is comhlachas é a dhéanfar i gcomhréir leis na coinníollacha a leagtar síos i gcomhaontú sonrach lena gcumhdaítear rannpháirtíocht an tríú tír in aon Chlár de chuid an Chomhphobail nó an Aontais, ar choinníoll go ndéantar an méid seo a leanas leis an gcomhaontú:

(a)

áirithítear leis cothromaíocht chóir a mhéid a bhaineann le ranníocaíochtaí agus sochair an tríú tír atá rannpháirteach i gcláir an Chomhphobail nó an Aontais;

(b)

leagtar síos leis na coinníollacha maidir le rannpháirtíocht i gcláir an Chomhphobail nó an Aontais, lena n-áirítear ríomh na ranníocaíochtaí airgeadais leis na cláir aonair agus ríomh chostais riaracháin na gclár sin;

(c)

ní thugtar don tríú tír leis aon chumhacht chinnteoireachta i leith Chlár Euratom 2026-2027;

(d)

ráthaítear leis cearta an Aontais chun bainistíocht fhónta airgeadais a áirithiú agus chun leasanna airgeadais an Aontais a chosaint.

Ioncaim shannta i gcomhréir le hAirteagal 21(5) den Rialachán Airgeadais a bheidh sna ranníocaíochtaí dá dtagraítear sa chéad fhomhír, pointe (b), den mhír seo.

3.   I raon feidhme an chomhlachais le gach tríú tír i gClár Euratom 2026-2027, cuirfear san áireamh an cuspóir maidir le fás eacnamaíoch a thiomáint san Aontas trí bhíthin na nuálaíochta. Dá réir sin, diomaite de thíortha aontacha, de thíortha is iarrthóirí agus d’iarrthóirí ionchasacha, d’fhéadfaí codanna de Chlár Euratom 2026-2027 a eisiamh ó chomhaontú comhlachais i dtaca le tír shonrach.

4.   Déanfaidh an comhaontú comhlachais, i gcás inarb iomchuí, foráil maidir le rannpháirtíocht chómhalartach eintiteas dlítheanach atá bunaithe san Aontas i gcláir chomhchosúla i dtíortha comhlachais i gcomhréir leis na coinníollacha a leagtar síos sna cláir sin.

5.   I gcás inarb iomchuí, leis na coinníollacha lena gcinnfear leibhéal na ranníocaíochta airgeadais áiritheofar go ndéanfar ceartú uathoibríoch ar aon mhíchothromaíocht shuntasach i gcomparáid leis an méid a fhaigheann eintitis atá bunaithe sa tír chomhlachaithe trí bheith rannpháirteach i gClár Euratom 2026-2027, agus na costais maidir le bainistiú, cur i bhfeidhm agus oibriú Chlár Euratom 2026-2027 á gcur san áireamh.

Airteagal 6

Cur chun feidhme agus foirmeacha cistiúcháin

1.   Is trí bhíthin bainistíocht dhíreach i gcomhréir leis an Rialachán Airgeadais nó trí bhíthin bainistíocht indíreach ag na comhlachtaí cistiúcháin dá dtagraítear in Airteagal 62(1), an chéad fhomhír, pointe (c), den Rialachán Airgeadais a chuirfear Clár Euratom 2026-2027 chun feidhme.

2.   Féadfar cistiú faoi Chlár Euratom 2026-2027 a sholáthar in aon cheann de na foirmeacha a leagtar síos sa Rialachán Airgeadais. Mar sin féin, is deontais a bheidh sa phríomhfhoirm thacaíochta do ghníomhaíochtaí indíreacha faoi Chlár Euratom 2026-2027. Féadfar cistiú faoi Chlár Euratom 2026-2027 a sholáthar freisin trí dhuaiseanna, soláthar agus ionstraimí airgeadais laistigh d’oibríochtaí measctha.

3.   Na príomhchineálacha gníomhaíochta atá le déanamh faoi Chlár Euratom 2026-2027, leagtar amach agus sainmhínítear in Airteagal 2 de Rialachán (AE) 2021/695 iad, amhail gníomhaíochtaí taighde agus nuálaíochta, gníomhaíochtaí nuálaíochta, gníomhaíochtaí nuálaíochta agus cur in úsáid sa mhargadh, gníomhaíochtaí oiliúna agus soghluaisteachta, gníomhaíochtaí comhchistiúcháin cláir, gníomhaíochtaí soláthair réamhthráchtála, soláthar poiblí gníomhaíochtaí um réitigh nuálacha, gníomhaíochtaí comhordaithe agus tacaíochta, duaiseanna dreasachta agus duaiseanna aitheantais.

Na foirmeacha cistiúcháin dá dtagraítear i mír 2 den Airteagal seo, úsáidfear iad ar bhealach solúbtha síos trí gach cuspóir de Chlár Euratom 2026-2027 agus cinnfear an úsáid a bheidh leo ar bhonn riachtanais agus saintréithe na gcuspóirí ar leith.

4.   Le Clár Euratom 2026-2027, tacófar freisin le gníomhaíochtaí díreacha a dhéanfaidh ag JRC.

Airteagal 7

Comhpháirtíochtaí Eorpacha

1.   Féadfar codanna de Chlár Euratom 2026-2027 a chur chun feidhme trí bhíthin Comhpháirtíochtaí Eorpacha.

2.   Maidir le rannpháirtíocht an Chomhphobail i gComhpháirtíochtaí Eorpacha, féadfaidh sí a bheith in aon cheann de na foirmeacha seo a leanas:

(a)

rannpháirtíocht i gcomhpháirtíochtaí a bhunaítear ar bhonn meabhráin tuisceana nó socruithe conarthacha idir an Coimisiún agus comhpháirtithe poiblí nó príobháideacha, lena sonraítear cuspóirí na Comhpháirtíochta Eorpaí, gealltanais ghaolmhara ó na comhpháirtithe eile maidir lena ranníocaíochtaí airgeadais nó maidir lena ranníocaíochtaí comhchineáil, eochairtháscairí feidhmíochta agus tionchair, na torthaí atá le soláthar agus socruithe tuairiscithe; cuimsítear leo sin gníomhaíochtaí comhlántacha taighde agus nuálaíochta, a chuirtear chun feidhme leis na comhpháirtithe agus le Clár Euratom 2026-2027 (comhpháirtíochtaí Eorpacha Comhchláraithe), a shainaithint;

(b)

rannpháirtíocht i gclár gníomhaíochtaí taighde agus nuálaíochta agus ranníocaíocht airgeadais leis an gclár céanna, lena sonraítear na cuspóirí, na príomhtháscairí feidhmíochta agus tionchair, agus na torthaí atá le baint amach, bunaithe ar ghealltanas na gcomhpháirtithe maidir lena ranníocaíochtaí airgeadais nó lena ranníocaíochtaí comhchineáil agus maidir lena gcuid gníomhaíochtaí ábhartha a chomhtháthú trí ghníomhaíocht chomhchistiúcháin ó Chlár Euratom 2026-2027 (comhpháirtíochtaí Eorpacha Comhchistithe), a úsáid.

3.   Maidir le Comhpháirtíochtaí Eorpacha:

(a)

bunófar iad sna cásanna ina mbainfí cuspóirí Chlár Euratom 2026-2027 amach ar bhealach níos éifeachtaí ná mar a d’éireodh leis an gComhphobal ina aonar, agus nuair a chuirtear i gcomparáid le foirmeacha eile tacaíochta faoi Chlár Euratom 2026-2027; déanfar scair iomchuí de bhuiséad Chlár Euratom 2026-2027 a leithdháileadh ar na codanna sin;

(b)

cloífidh siad leis na prionsabail a bhaineann le breisluach Aontais, trédhearcacht agus oscailteacht, agus le tionchair a bheith acu laistigh den Eoraip agus ar son na hEorpa, an éifeacht láidir ghiarála ar scála leordhóthanach, ghealltanais fhadtéarmacha na gcomhpháirtithe uile lena mbaineann, solúbthacht maidir le cur chun feidhme, comhleanúnachas, chomhordú agus comhlántacht le tionscnaimh de chuid an Aontais agus tionscnaimh áitiúla, réigiúnacha, náisiúnta agus, i gcás inarb ábhartha, tionscnaimh idirnáisiúnta nó Comhpháirtíochtaí Eorpacha eile;

(c)

beidh cur chuige soiléir maidir le saolré acu, beidh siad teoranta ó thaobh ama de agus beidh coinníollacha iontu maidir le cistiú Chlár Euratom 2026-2027 a chéimniú amach.

4.   Na forálacha agus na critéir maidir le Comhpháirtíochtaí Eorpacha a roghnú, a chur chun feidhme, maidir le faireachán agus meastóireacht a dhéanamh orthu agus maidir lena gcéimniú amach, leagtar amach iad in Iarscríbhinn III a ghabhann le Rialachán (AE) 2021/695.

Airteagal 8

An eolaíocht oscailte

Na forálacha a bhfuil feidhm acu maidir leis an eolaíocht oscailte a leagtar amach i Rialachán (AE) 2021/695, tá feidhm acu maidir le Clár Euratom 2026-2027 freisin.

Airteagal 9

Gníomhaíochtaí incháilithe agus rialacha maidir le rannpháirtíocht agus scaipeadh torthaí taighde

1.   Níl incháilithe chun cistiú a fháil ach gníomhaíochtaí lena gcuirtear na cuspóirí dá dtagraítear in Airteagal 3 chun feidhme.

2.   Faoi réir mír 3 agus 4 den Airteagal seo, tá feidhm ag Teideal II maidir le rialacha i ndáil le rannpháirtíocht agus scaipeadh Rialachán (AE) 2021/695 maidir le gníomhaíochtaí a fhaigheann tacaíocht faoi Chlár Euratom 2026-2027. Déanfar tagairtí don Aontas agus don chlár Fís Eorpach i Rialachán (AE) 2021/695 a fhorléiriú mar thagairtí don Chomhphobal agus do Chlár Euratom 2026-2027, i gcás inarb iomchuí. Déanfar tagairtí do ‘rialacha slándála’ i Rialachán (AE) 2021/695 a fhorléiriú mar thagairtí lena gcuimsítear leasanna cosanta na mBallstát de réir bhrí Airteagal 24 de Chonradh Euratom.

3.   De mhaolú ar Airteagal 40(4) de Rialachán (AE) 2021/695, an ceart chun agóid a dhéanamh in aghaidh aistrithe úinéireachta torthaí nó in aghaidh ceadúnas eisiach a dheonú maidir le torthaí, féadfar an ceart sin a leathnú chun deonú ceadúnas neamheisiach a chumhdach.

4.   De mhaolú ar Airteagal 41(9) de Rialachán (AE) 2021/695, tabharfaidh tairbhí, ar tugadh maoiniú Comhphobail dó, rochtain saor ó ríchíosanna ar a thorthaí d’institiúidí an Chomhphobail, do chomhlachtaí cistiúcháin nó don Chomhghnóthas Eorpach um ITER agus um Fhuinneamh Comhleá a Fhorbairt (Fuinneamh Comhleá) arna bhunú le Cinneadh 2007/198/Euratom (‘an Comhghnóthas um Fhuinneamh Comhleá’), chun beartais agus cláir nó oibleagáidí Comhphobail a fhorbairt, a chur chun feidhme agus faireachán a dhéanamh orthu faoi chomhar idirnáisiúnta le tríú tíortha agus le heagraíochtaí idirnáisiúnta. Cuimseofar leis na cearta rochtana sin an ceart chun a údarú do thríú páirtithe na torthaí a úsáid chun críoch soláthair phoiblí agus an ceart chun focheadúnas a dheonú. Beidh cearta rochtana teoranta d’úsáid neamhthráchtála agus neamhiomaíoch.

5.   Leis an sásra árachais fhrithpháirtigh, arna bhunú de bhun Rialachán (AE) 2021/695, cumhdófar an riosca a bhaineann le suimeanna dlite nach ngnóthaítear ó na tairbhithe don Choimisiún nó do chomhlachtaí cistiúcháin faoin Rialachán seo.

Airteagal 10

Maoiniú carnach, malartach agus comhcheangailte

1.   Cuirfear Clár Euratom 2026-2027 chun feidhme i sineirge leis an gclár Fís Eorpach agus le cláir eile de chuid an Aontais.

2.   Chun cuspóirí Chlár Euratom 2026-2027 a bhaint amach agus chun aghaidh a thabhairt ar na dúshláin is coiteann do Chlár Euratom 2026-2027 agus don chlár Fís Eorpach, féadfaidh gníomhaíochtaí a bhaineann leis na cuspóirí a leagtar amach i gClár Euratom 2026-2027 nó leis na gníomhaíochtaí sin lena gcuirtear an clár Fís Eorpach chun feidhme, nó leo araon, tairbhiú de ranníocaíocht airgeadais an Chomhphobail, faoi réir Airteagal 9. Go háirithe, le Clár Euratom 2026-2027, féadfar ranníocaíocht airgeadais a chur ar fáil do Ghníomhaíochtaí Marie Skłodowska-Curie chun tacú le gníomhaíochtaí atá ábhartha don taighde núicléach.

3.   Gníomhaíocht ar tugadh ranníocaíocht di ó chlár eile de chuid an Aontais, féadfar ranníocaíocht a thabhairt di faoi Chlár Euratom 2026-2027 freisin, ar choinníoll nach gcumhdaítear na costais chéanna leis na ranníocaíochtaí. Beidh feidhm ag rialacha an chláir ábhartha maidir lena ranníocaíocht chomhfhreagrach leis an ngníomhaíocht. Ní rachaidh an maoiniú carnach thar chostais incháilithe iomlána na gníomhaíochta. Féadfar an tacaíocht ó na cláir éagsúla a ríomh ar bhonn pro rata i gcomhréir leis na doiciméid lena leagtar amach na coinníollacha tacaíochta.

4.   Féadfaidh gníomhaíochtaí tacaíocht a fháil ó Chiste Forbraíochta Réigiúnaí na hEorpa nó ó Chiste Sóisialta na hEorpa Plus i gcomhréir leis na forálacha ábhartha de Rialachán (AE) 2021/1060 i gcás inar gníomhaíochtaí iad ar bronnadh lipéad an tSéala Barr Feabhais orthu faoi Chlár Euratom 2026-2027 má chomhlíonann an ghníomhaíocht na coinníollacha carnacha seo a leanas:

(a)

rinneadh measúnú orthu i nglao ar thograí faoi Chlár Euratom 2026-2027;

(b)

comhlíonann siad íoscheanglais cháilíochta an ghlao sin ar thograí;

(c)

ní fhéadfar iad a mhaoiniú faoin nglao sin ar thograí i ngeall ar shrianta buiséadacha.

CAIBIDIL II

CLÁRSCEIDEALÚ, FAIREACHÁN, MEASTÓIREACHT AGUS RIALÚ

Airteagal 11

Cláir oibre

1.   Is leis na cláir oibre dá dtagraítear in Airteagal 110 den Rialachán Airgeadais a chuirfear gníomhaíochtaí indíreacha Chlár Euratom 2026-2027 chun feidhme. Leagfar amach leis na cláir oibre, i gcás inarb infheidhme, an méid foriomlán arna chur i leataobh le haghaidh oibríochtaí measctha. Glacfaidh an Coimisiún, trí bhíthin gníomhartha cur chun feidhme, na cláir oibre. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 16(4).

2.   Sa bhreis ar cheanglais Airteagal 110 den Rialachán Airgeadais, cuimseofar sna cláir oibre an méid seo a leanas, de réir mar is iomchuí:

(a)

sonrú an mhéid a leithdháiltear ar gach gníomhaíocht agus clár ama táscach maidir le cur chun feidhme;

(b)

maidir le deontais, na tosaíochtaí, na critéir roghnúcháin agus dhámhachtana agus an t-ualú coibhneasta a bhaineann leis na critéir dhámhachtana éagsúla agus an t-uasráta cistiúcháin le haghaidh shuim iomlán na gcostas incháilithe;

(c)

aon oibleagáid bhreise i leith tairbhithe, i gcomhréir le hAirteagail 39 agus 41 de Rialachán (AE) 2021/695;

(d)

cur chuige ilbhliantúil agus treoshuíomhanna straitéiseacha do na blianta cur chun feidhme ina dhiaidh sin.

3.   Tarraingeoidh an Coimisiún suas clár oibre ilbhliantúil maidir le gníomhaíochtaí díreacha arna ndéanamh ag JRC i gcomhréir le Cinneadh 96/282/Euratom.

Airteagal 12

Faireachán agus tuairisciú

1.   Déanfaidh an Coimisiún faireachán leanúnach ar bhainistiú agus ar chur chun feidhme Chlár Euratom 2026-2027. Chun an trédhearcacht a fheabhsú, cuirfear na sonraí sin ar fáil go poiblí ar bhealach inrochtana ar shuíomh gréasáin an Choimisiúin de réir an nuashonraithe is déanaí ar na sonraí sin.

Leagtar amach in Iarscríbhinn II táscairí a bheidh le tuairisciú ar bhonn bliantúil maidir le dul chun cinn Chlár Euratom 2026-2027 chun na cuspóirí a bhunaítear in Airteagal 3 a bhaint amach ar feadh na gconairí tionchair.

2.   Chun an measúnú éifeachtach ar dhul chun cinn Chlár Euratom 2026-2027 maidir le baint amach a chuspóirí a áirithiú, glacfaidh an Coimisiún gníomhartha cur chun feidhme a bhaineann le cur chun feidhme an chreata faireacháin agus meastóireachta, go háirithe trí bhonnlínte agus spriocanna a leagan síos i gcomhréir le hIarscríbhinn II. Déanfar na gníomhartha cur chun feidhme sin a ghlacadh i gcomhréir leis an nós imeachta comhairleach dá dtagraítear in Airteagal 16(3).

3.   Leis an gcóras tuairiscithe feidhmíochta, áiritheofar go ndéanfar na sonraí chun faireachán a dhéanamh ar chur chun feidhme agus ar thorthaí Chlár Euratom 2026-2027 a bhailiú ar bhealach éifeachtúil, éifeachtach tráthúil gan an t-ualach riaracháin a mhéadú do thairbhithe. Chuige sin, forchuirfear ceanglais chomhréireacha tuairiscithe ar fhaighteoirí cistí ón gComhphobal agus, i gcás inarb iomchuí, ar na Ballstáit.

Airteagal 13

Faisnéis, cumarsáid, poiblíocht agus scaipeadh agus saothrú

1.   Maidir le faighteoirí an chistithe ó Chlár Euratom 2026-2027, tabharfaidh siad aitheantas d’fhoinse na gcistí sin agus áiritheoidh siad infheictheacht an chistithe ón gComhphobal, go háirithe nuair a bhíonn na gníomhaíochtaí agus a dtorthaí á gcur chun cinn, trí fhaisnéis spriocdhírithe atá comhleanúnach, éifeachtach agus comhréireach a sholáthar do shainghrúpaí éagsúla, lena n-áirítear na meáin agus an pobal.

2.   Cuirfidh an Coimisiún chun feidhme gníomhaíochtaí faisnéise agus cumarsáide a bhaineann le Clár Euratom 2026-2027, leis na gníomhaíochtaí a rinneadh de bhun Chlár Euratom 2026-2027 agus leis na torthaí a baineadh amach. Sa bhreis air sin, soláthróidh sé faisnéis chríochnaitheach thráthúil do na Ballstáit agus do na tairbhithe. Déanfar seirbhísí fianaisebhunaithe meaitseála, atá bunaithe ar an anailísíocht agus ar fhiníochtaí líonraí, a sholáthar do na heintitis leasmhara chun cuibhreannais a bhunú i ndáil le tionscadail chomhoibríocha, agus aird ar leith á tabhairt ar na deiseanna líonraithe a shainaithint le haghaidh eintitis dhlítheanacha ó Bhallstáit arb íseal a bhfeidhmíocht maidir le taighde agus nuálaíocht. Ar bhonn na hanailíse sin, féadfar imeachtaí meaitseála spriocdhírithe a eagrú i ndáil le glaonna sonracha ar thograí.

3.   Chomh maith leis sin, bunóidh an Coimisiún straitéis maidir le scaipeadh agus saothrú chun cur le hinfhaighteacht agus scaipeadh thorthaí taighde agus nuálaíochta Chlár Euratom 2026-2027, agus le hinfhaighteacht agus scaipeadh an eolais a d’eascair as an gclár sin chun dlús a chur leis an saothrú chun cur leis an nglacadh sa mhargadh, cur leis an gcomhar sa taighde agus chun cur le tionchar Chlár Euratom 2026-2027.

4.   Na hacmhainní airgeadais a leithdháilfear ar Chlár Euratom 2026-2027, rannchuideoidh siad freisin leis an gcumarsáid chorparáideach i ndáil le tosaíochtaí polaitiúla an Chomhphobail, chomh maith le gníomhaíochtaí faisnéise, cumarsáide, poiblíochta, scaipthe agus saothraithe a mhéid a bhaineann siad leis na cuspóirí dá dtagraítear in Airteagal 3.

Airteagal 14

Meastóireacht

1.   Déanfar meastóireachtaí ar Chlár Euratom 2026-2027 go tráthúil chun fónamh don phróiseas cinnteoireachta maidir le Clár Euratom 2026-2027, maidir lena chéad chlár réime eile agus maidir le tionscnaimh eile is ábhartha i ndáil le taighde agus nuálaíocht.

2.   Ag deireadh chur chun feidhme Chlár Euratom 2026-2027, ach tráth nach déanaí ná 4 bliana tar éis dheireadh na tréimhse a shonraítear in Airteagal 1, déanfaidh an Coimisiún, le cúnamh ó shaineolaithe neamhspleácha arna roghnú trí phróiseas trédhearcach, meastóireacht deiridh ar Chlár Euratom 2026-2027 agus ar Chlár Euratom 2021-2025. Cuimseofar leis sin measúnú ar an tionchar fadtéarmach a bhí ag Cláir Thaighde agus Oiliúna Euratom a bhí ann roimhe seo agus ar éifeachtacht, éifeachtúlacht, ábharthacht, comhleanúnachas agus breisluach Comhphobail Chlár Euratom 2026-2027.

3.   Foilseoidh an Coimisiún conclúidí na meastóireachtaí chomh maith lena bharúlacha féin, cuirfidh sé iad in iúl do Pharlaimint na hEorpa, don Chomhairle, do Choiste Eacnamaíoch agus Sóisialta na hEorpa agus do Choiste na Réigiún agus cuirfidh sé iad ina láthair.

Airteagal 15

Iniúchtaí

1.   Áiritheofar leis an gcóras rialúcháin le haghaidh Chlár Euratom 2026-2027 go mbeidh cothromaíocht iomchuí ann idir iontaoibh agus rialú, agus costais riaracháin agus costais eile a bhaineann le rialú ar gach leibhéal á gcur san áireamh, go háirithe i dtaca le tairbhithe. Beidh na rialacha iniúchóireachta soiléir, comhsheasmhach agus comhleanúnach i ngach gné de Chlár Euratom 2026-2027.

2.   Gníomhaíochtaí a fhaigheann comhchistiú ó chláir éagsúla de chuid an Aontais, ní dhéanfar ach iniúchadh amháin orthu sin, arb iniúchadh é lena gcumhdófar na cláir uile lena mbaineann agus a rialacha is infheidhme ar leith.

3.   Féadfaidh an Coimisiún nó an comhlacht cistiúcháin ábhartha brath ar athbhreithnithe ar chórais chomhcheangailte ar leibhéal na dtairbhithe. Beidh na hathbhreithnithe comhcheangailte sin roghnach i gcás cineálacha áirithe tairbhithe agus is éard atá iontu iniúchadh ar chórais agus ar phróisis, rud a chomhlánófar le hiniúchadh ar idirbhearta. Is iniúchóir neamhspleách inniúil atá cáilithe chun iniúchtaí reachtúla a dhéanamh ar dhoiciméid chuntasaíochta i gcomhréir le Treoir 2006/43/CE ó Pharlaimint na hEorpa agus ón gComhairle (20) a dhéanfaidh iniúchadh ar na hidirbhearta sin. Féadfaidh an Coimisiún nó an comhlacht cistiúcháin ábhartha na hiniúchtaí ar chórais agus ar phróisis a úsáid chun an leibhéal muiníne foriomlán a chinneadh maidir le bainistíocht fhónta airgeadais an chaiteachais agus chun leibhéal na n-iniúchtaí ex post agus na ndeimhnithe maidir le ráitis airgeadais a athmheas.

4.   I gcomhréir le hAirteagal 127 den Rialachán Airgeadais, féadfaidh an Coimisiún nó an comhlacht cistiúcháin brath ar iniúchtaí maidir le húsáid ranníocaíochtaí an Chomhphobail arna ndéanamh ag daoine nó ag eintitis neamhspleácha inniúla eile, lena n-áirítear daoine nach bhfuil sainordú tugtha dóibh chuige sin ó Institiúidí nó ó chomhlachtaí an Aontais.

5.   Féadfar iniúchtaí a dhéanamh suas le 2 bhliain tar éis íocaíocht an iarmhéid.

6.   Foilseoidh an Coimisiún treoirlínte iniúchóireachta, arb é is aidhm dóibh cur i bhfeidhm agus léiriú iontaofa aonfhoirmeach na nósanna imeachta agus na rialacha iniúchóireachta le linn fhad tréimhse Chlár Euratom 2026-2027 a áirithiú.

Airteagal 16

Nós imeachta coiste

1.   Tabharfaidh Coiste cúnamh don Choimisiún. Beidh an coiste sin ina choiste de réir bhrí Rialachán (AE) Uimh. 182/2011.

2.   Tiocfaidh an Coiste le chéile in dhá fhoirmíocht éagsúla, foirmíochtaí a bheidh ag plé leis na gnéithe sin de Chlár Euratom 2026-2027 a bhaineann le heamhnú agus le comhleá.

D’fhonn cur chun feidhme Chlár Euratom 2026-2027 a éascú, maidir le gach cruinniú den Choiste mar a shainítear sa chlár oibre, aisíocfaidh an Coimisiún costais aon ionadaí amháin in aghaidh an Bhallstáit, agus costais aon saineolaí amháin nó aon chomhairleora amháin in aghaidh an Bhallstáit as na míreanna cláir oibre sin i gcás ina dteastóidh saineolas sonrach ó Bhallstát i gcomhréir le treoirlínte bunaithe an Choimisiúin.

3.   I gcás ina ndéantar tagairt don mhír seo, tá feidhm ag Airteagal 4 de Rialachán (AE) Uimh. 182/2011.

4.   I gcás ina ndéantar tagairt don mhír seo, tá feidhm ag Airteagal 5 de Rialachán (AE) Uimh. 182/2011.

5.   I gcás ina bhfuiltear chun tuairim an Choiste a fháil trí bhíthin nós imeachta i scríbhinn, déanfar an nós imeachta sin a fhoirceannadh gan toradh más rud é go gcinneann cathaoirleach an Choiste amhlaidh nó i gcás ina n-iarrann tromlach simplí de chomhaltaí an Choiste amhlaidh laistigh den teorainn ama leis an tuairim sin a thabhairt.

6.   Cuirfidh an Coimisiún an Coiste ar an eolas go rialta faoin dul chun cinn foriomlán maidir le cur chun feidhme Chlár Euratom 2026-2027 agus soláthróidh an Coimisiún faisnéis thráthúil don Choiste faoi na gníomhaíochtaí uile a bheartaítear nó a chistítear faoi Chlár Euratom 2026-2027.

Airteagal 17

Leasanna airgeadais an Aontais a chosaint

I gcás ina mbeidh tríú tír rannpháirteach i gClár Euratom 2026-2027 trí bhíthin cinneadh a glacadh de bhun comhaontú idirnáisiúnta nó ar bhonn aon ionstraim dlí eile, tabharfaidh an tríú tír na cearta agus an rochtain is gá don oifigeach údarúcháin freagrach, do OLAF agus don Chúirt Iniúchóirí chun a n-inniúlachtaí ar leith a fheidhmiú go cuimsitheach. I gcás OLAF, áiritheofar leis na cearta sin an ceart chun imscrúduithe a dhéanamh, lena n-áirítear seiceálacha agus cigireachtaí ar an láthair, dá bhforáiltear i Rialachán (AE, Euratom) Uimh. 883/2013.

CAIBIDIL III

FORÁLACHA IDIRTHRÉIMHSEACHA AGUS CRÍOCHNAITHEACHA

Airteagal 18

Aisghairm

Aisghairtear Rialachán (Euratom) 2021/765 le héifeacht ón 1 Eanáir 2026 ar aghaidh.

Airteagal 19

Forálacha idirthréimhseacha

1.   Ní dhéanfaidh an Rialachán seo difear do leanúnachas ná do mhodhnú na ngníomhaíochtaí arna dtionscnamh de bhun Rialachán (Euratom) 2021/765, a leanfaidh d’fheidhm a bheith aige maidir leis na gníomhaíochtaí sin go dtí go gcuirfear clabhsúr orthu.

2.   I gcás inar gá, is é an Coiste dá dtagraítear in Airteagal 16 den Rialachán seo a dhéanfaidh aon chúram eile de chuid an Choiste arna bhunú le Rialachán (Euratom) 2021/765.

3.   Ina theannta sin, le himchlúdach airgeadais Chlár Euratom 2026-2027 féadfar na costais theicniúla agus cúnaimh riaracháin is gá a chumhdach chun an t-aistriú idir Clár Euratom 2026-2027 agus na bearta a glacadh de bhun Rialachán (Euratom) 2021/765 a áirithiú.

Airteagal 20

Teacht i bhfeidhm

Tiocfaidh an Rialachán seo i bhfeidhm lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 23 Meitheamh 2025.

Thar ceann na Comhairle

An tUachtarán

K. KALLAS


(1)  Rialachán (AE, Euratom) 2020/2093 ón gComhairle an 17 Nollaig 2020 lena leagtar síos an creat airgeadais ilbhliantúil do na blianta 2021 go 2027 (IO L 433 I, 22.12.2020, lch. 11, ELI: http://data.europa.eu/eli/reg/2020/2093/oj).

(2)  Rialachán (Euratom) 2021/765 ón gComhairle an 10 Bealtaine 2021 lena mbunaítear Clár Taighde agus Oiliúna an Chomhphobail Eorpaigh do Fhuinneamh Adamhach don tréimhse 2021-2025 lena gcomhlánaítear Fís Eorpach – an Clár Réime um Thaighde agus um Nuálaíocht agus lena n-aisghairtear Rialachán (Euratom) 2018/1563 (IO L 167 I, 12.5.2021, lch. 81, ELI: http://data.europa.eu/eli/reg/2021/765/oj).

(3)  Treoir 2011/70/Euratom ón gComhairle an 19 Iúil 2011 lena mbunaítear Creat Comhphobail maidir le bainistiú freagrach agus sábháilte ar bhreosla spíonta agus ar dhramhaíl radaighníomhach (IO L 199, 2.8.2011, lch. 48, ELI: http://data.europa.eu/eli/dir/2011/70/oj).

(4)  Cinneadh 2007/198/Euratom ón gComhairle an 27 Márta 2007 lena mbunaítear an Comhghnóthas Eorpach um ITER agus um Fhuinneamh Comhleá a Fhorbairt agus lena dtugtar buntáistí dó (IO L 90, 30.3.2007, lch. 58, ELI: http://data.europa.eu/eli/dec/2007/198/oj).

(5)  Rialachán (AE) 2021/695 ó Pharlaimint na hEorpa agus ón gComhairle an 28 Aibreán 2021 lena mbunaítear Fís Eorpach – an Clár Réime um Thaighde agus um Nuálaíocht, lena leagtar síos a rialacha maidir le rannpháirtíocht agus scaipeadh, agus lena n-aisghairtear Rialacháin (AE) Uimh. 1290/2013 agus (AE) Uimh. 1291/2013 (IO L 170, 12.5.2021, lch. 1, ELI: http://data.europa.eu/eli/reg/2021/695/oj).

(6)   IO L 433 I, 22.12.2020, lch. 28, ELI: http://data.europa.eu/eli/agree_interinstit/2020/1222/oj.

(7)  Rialachán (AE, Euratom) 2024/2509 ó Pharlaimint na hEorpa agus ón gComhairle an 23 Meán Fómhair 2024 maidir leis na rialacha airgeadais is infheidhme maidir le buiséad ginearálta an Aontais (athmhúnlú) (IO L, 2024/2509, 26.9.2024, ELI: http://data.europa.eu/eli/reg/2024/2509/oj).

(8)  Rialachán (AE) Uimh. 1291/2013 ó Pharlaimint na hEorpa agus ón gComhairle an 11 Nollaig 2013 lena mbunaítear Fís 2020 – An Clár Réime um Thaighde agus Nuálaíocht (2014-2020) agus lena n-aisghairtear Cinneadh Uimh. 1982/2006/CE (IO L 347, 20.12.2013, lch. 104, ELI: http://data.europa.eu/eli/reg/2013/1291/oj).

(9)  Rialachán (AE, Euratom) Uimh. 883/2013 ó Pharlaimint na hEorpa agus ón gComhairle an 11 Meán Fómhair 2013 maidir le himscrúduithe arna ndéanamh ag an Oifig Eorpach Frith-Chalaoise (OLAF) agus lena n-aisghairtear Rialachán (CE) Uimh. 1073/1999 ó Pharlaimint na hEorpa agus ón gComhairle agus Rialachán (Euratom) Uimh. 1074/1999 ón gComhairle (IO L 248, 18.9.2013, lch. 1, ELI: http://data.europa.eu/eli/reg/2013/883/oj).

(10)  Rialachán (CE, Euratom) Uimh. 2988/95 ón gComhairle an 18 Nollaig 1995 maidir le leasanna airgeadais na gComhphobal Eorpach a chosaint (IO L 312, 23.12.95, lch. 1, ELI: http://data.europa.eu/eli/reg/1995/2988/oj).

(11)  Rialachán (Euratom, CE) Uimh. 2185/96 ón gComhairle an 11 Samhain 1996 a bhaineann le seiceálacha agus cigireachtaí ar an láthair arna ndéanamh ag an gCoimisiún chun leasanna airgeadais na gComhphobal Eorpach a chosaint i gcoinne na calaoise agus neamhrialtachtaí eile (IO L 292, 15.11.1996, lch. 2, ELI: http://data.europa.eu/eli/reg/1996/2185/oj).

(12)  Rialachán (AE) 2017/1939 ón gComhairle an 12 Deireadh Fómhair 2017 lena gcuirtear chun feidhme comhar feabhsaithe maidir le bunú Oifig an Ionchúisitheora Phoiblí Eorpaigh (‘OIPE’) (IO L 283, 31.10.2017, lch. 1, ELI: http://data.europa.eu/eli/reg/2017/1939/oj).

(13)  Treoir (AE) 2017/1371 ó Pharlaimint na hEorpa agus ón gComhairle an 5 Iúil 2017 maidir leis an gcomhrac in aghaidh na calaoise ar leasanna airgeadais an Aontais trí bhíthin an dlí choiriúil (IO L 198, 28.7.2017, lch. 29, ELI: http://data.europa.eu/eli/dir/2017/1371/oj).

(14)  Rialachán (AE) Uimh. 182/2011 ó Pharlaimint na hEorpa agus ón gComhairle an 16 Feabhra 2011 lena leagtar síos na rialacha agus na prionsabail ghinearálta a bhaineann leis na sásraí maidir le rialú ag na Ballstáit ar fheidhmiú cumhachtaí cur chun feidhme ag an gCoimisiún (IO L 55, 28.2.2011, lch. 13, ELI: http://data.europa.eu/eli/reg/2011/182/oj).

(15)   IO L 123, 12.5.2016, lch. 1, ELI: http://data.europa.eu/eli/agree_interinstit/2016/512/oj.

(16)  Cinneadh 96/282/Euratom ón gCoimisiún an 10 Aibreán 1996 maidir le hatheagar a chur ar an Airmheán Comhpháirteach Taighde (IO L 107, 30.4.1996, lch. 12, ELI: http://data.europa.eu/eli/dec/1996/282/oj).

(17)  Tuairim an 22 Bealtaine 2025 (nár foilsíodh fós san Iris Oifigiúil).

(18)  Tuairim an 26 Márta 2025 (nár foilsíodh fós san Iris Oifigiúil).

(19)  Rialachán (AE) 2021/1060 ó Pharlaimint na hEorpa agus ón gComhairle an 24 Meitheamh 2021 lena leagtar síos forálacha coiteanna maidir le Ciste Forbraíochta Réigiúnaí na hEorpa, Ciste Sóisialta na hEorpa Plus, an Ciste Comhtháthaithe, an Ciste um Aistriú Cóir agus an Ciste Eorpach Muirí, Iascaigh agus Dobharshaothraithe agus rialacha airgeadais maidir leis na cistí sin agus maidir leis an gCiste um Thearmann, Imirce agus Lánpháirtíocht, an Ciste Slándála Inmheánaí agus an Ionstraim le haghaidh Tacaíocht Airgeadais don Bhainistiú Teorainneacha agus don Bheartas Víosaí (IO L 231, 30.6.2021, lch. 159, ELI: http://data.europa.eu/eli/reg/2021/1060/oj).

(20)  Treoir 2006/43/CE ó Pharlaimint na hEorpa agus ón gComhairle an 17 Bealtaine 2006 maidir le hiniúchtaí reachtúla ar chuntais bhliantúla agus ar chuntais chomhdhlúite, lena leasaítear Treoracha 78/660/CEE agus 83/349/CEE ón gComhairle agus lena n-aisghairtear Treoir 84/253/CEE ón gComhairle (IO L 157, 9.6.2006, lch. 87, ELI: http://data.europa.eu/eli/dir/2006/43/oj).


IARSCRÍBHINN I

GNÍOMHAÍOCHTAÍ

Saothrófar na cuspóirí sonracha dá dtagraítear in Airteagal 3(2) trí Chlár Euratom 2026-2027 ina iomláine, de réir phríomhairíonna na ngníomhaíochtaí a bhfuil tuairisc orthu san Iarscríbhinn seo. Trí na cuspóirí sonracha sin a chur chun feidhme, le Clár Euratom 2026-2027, tacaítear leis na Ballstáit reachtaíocht Euratom (1) a chur chun feidhme agus treisítear iarrachtaí taighde na mBallstát sin mar aon le hiarrachtaí taighde na hearnála príobháidí. Ba cheart, leis na cuspóirí sonracha sin, rannchuidiú leis an gceannaireacht theicneolaíoch sa réimse núicléach a choinneáil ar bun agus a fhorbairt a thuilleadh.

Chun na cuspóirí sonracha dá dtagraítear in Airteagal 3(2) a bhaint amach, le Clár Euratom 2026-2027 tacófar le gníomhaíochtaí trasearnála lena n-áirithítear sineirge na n-iarrachtaí taighde maidir le dúshláin chomhchoiteanna a réiteach. Áiritheofar go ndéantar naisc agus idirphlé iomchuí, amhail glaonna comhpháirteacha leis an gclár Fís Eorpach. Féadfaidh gníomhaíochtaí taighde agus nuálaíochta gaolmhara tairbhiú den tacaíocht airgeadais arna soláthar ag na cistí faoi Rialachán (AE) 2021/1060- ach iad a bheith i gcomhréir le cuspóirí agus rialacháin na gcistí sin.

Ar na gníomhaíochtaí a liostaítear san Iarscríbhinn seo, tá comhar idirnáisiúnta sa taighde agus nuálaíocht núicléach le húsáid shíochánta, bunaithe ar spriocanna comhroinnte agus ar mhuinín fhrithpháirteach d’fhonn tairbhí soiléire móra a chur ar fáil don Aontas, dá shaoránaigh agus don chomhshaol. Áirítear leis sin an comhar idirnáisiúnta trí chreataí iltaobhacha. Leanfaidh JRC, arb é Gníomhaire Cur Chun Feidhme Euratom a aithnítear go foirmiúil d’Fhóram Idirnáisiúnta Ghlúin IV (FIG) (2) é, de rannchuidiú Chomhphobal Euratom le gníomhaíochtaí taighde agus oiliúna FIG, agus de rannpháirtíocht an Chomhphobail sin sna gníomhaíochtaí sin, a éascú agus a chomhordú. An rannchuidiú le gníomhaíochtaí FIG faoi raon feidhme Chlár Euratom 2026-2027, is rannchuidiú é atá dírithe ar ghníomhaíochtaí taighde agus oiliúna maidir leis an méid seo a leanas an tsábháilteacht núicléach, cosaint ar radaíocht, coimircí agus neamhleathadh a bhaineann go sonrach le córais Ghlúin IV.

Déanfaidh Bord Gobharnóirí JRC anailís ar aon ghníomhaíocht nua a shannfar do JRC d’fhonn a chomhsheasmhacht le gníomhaíochtaí atá ann cheana sna Ballstáit a sheiceáil agus dúbailt taighde agus forbartha sa réimse núicléach a sheachaint san Aontas.

Féadfaidh an Coimisiún a chinneadh, trí bhíthin an chláir oibre ábhartha faoi Chlár Euratom 2026-2027, leanúint de dheontais arna ndámhachtain faoi Rialachán (Euratom) 2021/765 a chistiú.

Tá tosaíochtaí na gclár oibre le bunú ag an gCoimisiún ar bhonn ionchuir ó údaráis phoiblí, ó gheallsealbhóirí sa taighde núicléach agus ó aon eagraíocht nó fóram ábhartha de chuid na ngeallsealbhóirí sa réimse núicléach.

Tá taighde agus oiliúint sna réimsí seo a leanas incháilithe do chistiú ó Chlár Euratom 2026-2027:

(a)

feabhas a chur ar an tsábháilteacht núicléach, slándáil núicléach, coimircí núicléacha, cosaint ar radaíocht, breosla spíonta sábháilte agus bainistiú dramhaíola radaighníomhaí agus díchoimisiúnú, lena n-áirítear úsáid shábháilte, shlán, éifeachtúil an fhuinnimh núicléach agus feidhmeanna neamhchumhachtacha radaíochta ianúcháin (3):

(i)

an tsábháilteacht núicléach: córas imoibritheora agus timthriallta breosla, atá in úsáid sa Chomhphobal, a mhéid is gá chun saineolas fairsing a choinneáil ar bun sa Chomhphobal maidir le sábháilteacht núicléach, na cineálacha imoibritheoirí sin agus a dtimthriallta breosla iomlána, cuir i gcás scaradh agus claochlú, a fhéadfar a úsáid amach anseo;

(ii)

breosla spíonta sábháilte agus bainistiú dramhaíola radaighníomhaí: an bainistiú, go háirithe na gníomhaíochtaí réamhdhiúscartha, agus an diúscairt a ghabhann le dramhaíl radaighníomhach agus le breosla núicléach spíonta idirmheánach, ardleibhéil agus fadsaolach, agus le sruthanna dramhaíola radaighníomhaí agus le cineálacha eile nach ann do phróisis faoi láthair ina leith atá aibí go tionsclaíoch nó a bhféadfaí iad a fheabhsú; dramhaíl radaighníomhach a íoslaghdú agus radatocsaineacht na dramhaíola sin a laghdú; an bainistiú agus an t-aistriú eolais agus inniúlachtaí idir glúine agus ar fud chláir na mBallstát maidir le dramhaíl radaighníomhach agus bainistiú breosla spíonta;

(iii)

an díchoimisiúnú: taighde chun forbairt agus meastóireacht a dhéanamh ar theicneolaíochtaí um dhíchoimisiúnú agus um leigheas comhshaoil saoráidí núicléacha; tacaíocht a thabhairt maidir le dea-chleachtais agus eolas ar an díchoimisiúnú a mhalartú;

(iv)

eolaíocht núicléach agus feidhmeanna radaíochta ianúcháin, cosaint ar radaíocht, ullmhacht i gcomhair éigeandála:

—

eolaíocht núicléach agus feidhmeanna radaíochta ianúcháin a chur i bhfeidhm i réimsí taighde leighis, tionsclaíocha agus eile;

—

éifeachtaí agus rioscaí ó dháileoga ísle a eascraíonn ó nochtadh tionsclaíoch, leighis nó comhshaoil;

—

ullmhacht éigeandála i gcás tionóiscí lena mbaineann radaíocht, agus taighde ar an raidi-éiceolaíocht;

—

soláthar agus úsáid raidiseatóp atá slán agus sábháilte;

—

samhlacha d’easrú raideolaíoch sa chomhshaol, agus tacaíocht do mhalartú sonraí, córais foláirimh agus comhar maidir le teicnící tomhais (4) (atá le cur chun feidhme trí ghníomhaíochtaí díreacha);

(v)

slándáil núicléach, coimircí núicléacha agus neamhleathadh (atá le cur chun feidhme trí ghníomhaíochtaí díreacha):

—

modhanna agus teicneolaíocht chun tacú le coimircí an Chomhphobail agus coimircí idirnáisiúnta agus chun iad a neartú;

—

tacaíocht agus oiliúint oibríochtúil do chóras coimirce Euratom;

—

tacaíocht theicniúil do chur chun feidhme an Chonartha maidir le Neamhleathadh Arm Núicléach i réimse na gcoimircí núicléacha lena n-áirítear tacaíocht chun córas rialaithe onnmhairí an Aontais a neartú;

—

taighde agus tacaíocht chun an tsábháilteacht núicléach agus raideolaíoch agus an tslándáil a fheabhsú i gcomhthéacs an chreat domhanda CBRN (Ceimiceach, Bitheolaíoch, Raideolaíoch agus Núicléach) agus straitéisí gaolmhara an Aontais;

—

modhanna agus teicneolaíocht chun ábhair núicléacha agus radaighníomhacha a bhrath nach ndéantar rialú rialála orthu agus chun teagmhais a bhaineann le hábhair den chineál sin, lena n-áirítear fóiréinsic núicléach, a chosc agus chun freagairt orthu;

—

tacaíocht don fhothú acmhainní ar shlándáil núicléach trí úsáid a bhaint as Ionad Oiliúna na hEorpa um Shlándáil Núicléach;

(b)

saineolas agus inniúlacht sa réimse núicléach laistigh den Chomhphobal a chothabháil agus a fhorbairt a thuilleadh:

(i)

oideachas, oiliúint agus soghluaisteacht, lena n-áirítear scéimeanna oideachais agus oiliúna amhail Gníomhaíochtaí Marie Skłodowska-Curie;

(ii)

nuálaíocht, bainistiú eolais, eolaíocht agus teicneolaíocht núicléach a scaipeadh agus a shaothrú, go háirithe ar mhaithe le sábháilteacht núicléach, slándáil núicléach, coimircí núicléacha agus cosaint ar radaíocht;

(iii)

tacaíocht don teicneolaíocht a aistriú ón taighde go dtí an tionscal;

(iv)

tacaíocht d’acmhainn tionsclaíoch comhleá na hEorpa atá iomaíoch a ullmhú agus a fhorbairt;

(v)

tacaíocht do bhonneagair taighde Eorpacha agus idirnáisiúnta a sholáthar, a chur ar fáil agus rochtain iomchuí a thabhairt orthu, lena n-áirítear bonneagair JRC (5);

(vi)

chun eolaíocht núicléach a chothú mar bhonn chun tacú leis an gcaighdeánú, le gníomhaíochtaí díreacha soláthrófar sonraí tagartha, ábhair agus tomhais úrscothacha a bhaineann le sábháilteacht núicléach, coimircí núicléacha agus slándáil núicléach, chomh maith le feidhmeanna eile cuir i gcás leigheas núicléach;

(c)

forbairt fuinnimh comhleá a chothú agus rannchuidiú le cur chun feidhme an treochláir comhleá Eorpaigh:

cuirfear comhpháirtíocht Eorpach Chomhchistithe sa taighde comhleá an treochlár chun feidhme faoin dara leath den chéad seo, ar treochlár i dtreo na sprice maidir le giniúint leictreachais comhleá é. Féadfar a áireamh leis sin, inter alia:

(i)

saoráidí comhleá atá ann cheana agus a bheidh ann amach anseo a shaothrú, lena n-áirítear deontais oibriúcháin a leithdháileadh ar bhonneagair taighde comhleá nuair is iomchuí;

(ii)

ullmhúchán do ghléasraí cumhachta comhleá sa todhchaí trí thaighde a dhéanamh ar gach gné ábhartha, lena n-áirítear ábhair, teicneolaíochtaí agus dearaí, agus trí na gnéithe sin a fhorbairt;

(iii)

clár dírithe oideachais agus oiliúna a chur chun feidhme chomh maith le gníomhaíochtaí faoi phointe (b)(i);

(iv)

gníomhaíochtaí comhchoiteanna a chomhordú leis an gComhghnóthas um Fhuinneamh Comhleá;

(v)

comhoibriú leis an eagraíocht ITER;

(vi)

comhoibriú eolaíoch faoi chuimsiú chomhaontuithe idirnáisiúnta Euratom;

Cuirfear an Chomhpháirtíocht Eorpach Chomhchistithe i réimse an chomhleá chun feidhme trí bhíthin deontas a bhronnfar ar na heintitis dhlítheanacha arna mbunú nó arna n-ainmniú ag na Ballstáit agus ag aon tríú tír atá comhlachaithe le Clár Euratom 2026-2027. Féadfaidh acmhainní comhchineáil ón gComhphobal, nó baill foirne de chuid an Choimisiúin a thabhairt ar iasacht, a bheith san áireamh sa deontas.

Maidir le cistiú breise le haghaidh taighde agus nuálaíocht comhleá, féadfar sin a sholáthar trí bhíthin glaonna ar thograí;

(d)

tacaíocht a thabhairt do bheartas an Aontais gona Bhallstáit maidir le sábháilteacht núicléach, coimircí núicléacha agus slándáil núicléach;

leis na gníomhaíochtaí díreacha, tacófar leis an mbeartas maidir le sábháilteacht núicléach, coimircí núicléacha agus slándáil núicléach agus le cur chun feidhme na reachtaíochta ábhartha trí fhianaise agus saineolas neamhspleách eolaíoch agus teicniúil a sholáthar.


(1)  Go háirithe, Treoir 2006/117/Euratom ón gComhairle an 20 Samhain 2006 maidir le maoirseacht agus rialú loingsithe ar dhramhaíl radaighníomhach agus breosla spíonta (IO L 337, 5.12.2006, lch. 21, ELI: http://data.europa.eu/eli/dir/2006/117/oj); Treoir 2009/71/Euratom ón gComhairle an 25 Meitheamh 2009 lena mbunaítear creat Comhphobail maidir le sábháilteacht núicléach na suiteálacha núicléacha (IO L 172, 2.7.2009, lch. 18, ELI: http://data.europa.eu/eli/dir/2009/71/oj); Treoir 2011/70/Euratom ón gComhairle; Treoir 2013/51/Euratom ón gComhairle an 22 Deireadh Fómhair 2013 lena leagtar síos na ceanglais maidir le sláinte an phobail i gcoitinne a chosaint i ndáil le substaintí radaighníomhacha in uisce atá beartaithe lena thomhailt ag an duine (IO L 296, 7.11.2013, lch. 12, ELI: http://data.europa.eu/eli/dir/2013/51/oj); Treoir 2013/59/Euratom ón gComhairle an 5 Nollaig 2013 lena leagtar síos bunchaighdeáin sábháilteachta maidir le cosaint i gcoinne na contúirte a eascraíonn as nochtadh don radaíocht ianúcháin, agus lena n-aisghairtear Treoracha 89/618/Euratom, 90/641/Euratom, 96/29/Euratom, 97/43/Euratom agus 2003/122/Euratom (IO L 13, 17.1.2014, lch. 1, ELI: http://data.europa.eu/eli/dir/2013/59/oj) agus Rialachán (Euratom) 2016/52 ón gComhairle an 15 Eanáir 2016 lena leagtar síos uasleibhéil cheadaithe éilliúcháin radaighníomhaigh ar bhia agus ar bheatha tar éis tionóisc núicléach nó i ndiaidh aon cháis eile ina dtarlaíonn éigeandáil raideolaíoch, agus lena n-aisghairtear Rialachán (Euratom) Uimh. 3954/87 agus Rialacháin (Euratom) Uimh. 944/89 agus (Euratom) Uimh. 770/90 ón gCoimisiún (IO L 13, 20.1.2016, lch. 2, ELI: http://data.europa.eu/eli/reg/2016/52/oj).

(2)  I gcomhréir le hAirteagal III.2 den Chreat-Chomhaontú maidir le Comhoibriú Idirnáisiúnta ar Thaighde agus ar Fhorbairt Ghlúin IV de Chórais Fuinnimh Núicléacha.

(3)  Seachas an tslándáil núicléach, na coimircí núicléacha agus an neamhleathadh núicléach, féadfar na gníomhaíochtaí sin a chur chun feidhme le gníomhaíochtaí díreacha agus indíreacha.

(4)  Airt. 35, 36, 38 de Chonradh Euratom; Cinneadh 87/600/Euratom ón gComhairle an 14 Nollaig 1987 maidir le socruithe an Chomhphobail maidir le malartú luath faisnéise i gcás éigeandáil raideolaíoch (IO L 371, 30.12.1987, lch. 76, ELI: http://data.europa.eu/eli/dec/1987/600/oj).

(5)  Ar bhonn an phlean infheistíochta leanúnaigh do bhonneagair JRC.


IARSCRÍBHINN II

Le conairí tionchair, agus príomhtháscairí na gconairí tionchair gaolmhara, déanfar struchtúrú ar an bhfaireachán ar fheidhmíocht Chlár Euratom 2026-2027 i dtreo a chuspóirí sonracha dá dtagraítear in Airteagal 3(2). Beidh na conairí tionchair am-íogair: déanfar idirdhealú leo idir an gearrthéarma, an meántéarma agus an fadtéarma. Feidhmeoidh táscairí na gconairí tionchair mar tháscairí ionadaíocha ar an dul chun cinn a rinneadh i dtreo na gcuspóirí sonracha a bhaint amach. Na micreashonraí atá taobh thiar de phríomhtháscairí na gconairí tionchair, ar micreashonraí iad a chomhroinntear leis an gclár Fís Eorpach, baileofar iad ar dhóigh a mbainisteofar go lárnach agus go comhchuibhithe, agus ar dhóigh a fhágfaidh go mbeidh an t-ualach tuairiscithe ar na tairbhithe chomh beag agus is féidir.

Táscairí na gconairí tionchair eolaíocha

Meastar go ndéanfar dul chun cinn le Clár Euratom 2026-2027 a mhéid a bhaineann le heolas i dtaca leis an tsábháilteacht núicléach agus an tslándáil núicléach a threisiú, feidhmeanna sábháilte na radaíochta ianúcháin, breosla spíonta agus bainistiú dramhaíola radaighníomhaí; cosaint ar radaíocht; agus fuinneamh comhleá a fhorbairt. An dul chun cinn a dhéanfar sna réimsí sin, déanfar é a thomhas leis na táscairí a bhaineann le foilseacháin eolaíocha, le dul chun cinn maidir le cur chun feidhme an treochláir comhleá, le forbairt saineolais agus scileanna, agus rochtain ar bhonneagair thaighde.

I dtreo tionchair eolaíocha

Gearrthéarmach

Meántéarmach

Fadtéarmach

Feabhas a chur ar úsáid shábháilte shlán fuinnimh núicléach agus feidhmeanna neamhchumhachtacha radaíochta ianúcháin, lena n-áirítear sábháilteacht núicléach, slándáil núicléach, coimircí núicléacha, cosaint ar radaíocht, breosla spíonta sábháilte agus bainistiú dramhaíola radaighníomhaí agus díchoimisiúnú

Foilseacháin -

An líon foilseachán eolaíochta a ndearnadh athbhreithniú piaraí orthu faoi Euratom

Luanna -

Innéacs na Luanna Ualaithe de réir Réimse le haghaidh na bhfoilseachán a ndearnadh athbhreithniú piaraí orthu faoi Euratom

Eolaíocht den chéad scoth – An líon agus an sciar foilseachán a ndearnadh athbhreithniú piaraí orthu ó Chlár Euratom 2026-2027, ar foilseacháin iad a rannchuidíonn ar leibhéal bunúsach le réimsí eolaíocha

Eolas comhroinnte -

An sciar d’aschuir thaighde (sonraí oscailte/foilseacháin/bogearraí etc.) arna gcomhroinnt faoi bhonneagar eolais oscailte

Scaipeadh eolais - An sciar d’aschuir thaighde faoi rochtain oscailte arna n-úsáid/arna lua go gníomhach

Comhar nua - Sciar na dtairbhithe ó Euratom a d’fhorbair comhar nua trasdisciplíneach/trasearnála le húsáideoirí a n-aschur (T&N) oscailte taighde agus nuálaíochta ó Euratom

Fuinneamh comhleá a chothú agus a fhorbairt

Dul chun cinn maidir leis an treochlár comhleá a chur chun feidhme -

Céatadán de gharspriocanna an treochláir comhleá a bunaíodh le haghaidh na tréimhse 2021-2027 atá bainte amach ag Clár Euratom 2026-2027

Saineolas agus barr feabhais san Aontas a choinneáil ar bun agus a fhorbairt a thuilleadh

Scileanna -

An líon taighdeoirí a thairbhigh de ghníomhaíochtaí uas-scilithe Chlár Euratom 2026-2027 (trí oiliúint, soghluaisteacht agus rochtain ar bhonneagar)

Gairmréimeanna -

An líon agus an sciar taighdeoirí uas-scilithe a bhfuil tionchar is mó acu ina réimse T&N

Dálaí oibre -

An líon agus an sciar taighdeoirí uas-scilithe a bhfuil dálaí oibre feabhsaithe acu

An líon taighdeoirí a bhfuil rochtain acu ar bhonneagar taighde trí bhíthin tacaíocht ó Chlár Euratom 2026-2027

Ábhair thagartha arna seachadadh agus tomhais tagartha arna n-ionchorprú i leabharlann

An líon caighdeán idirnáisiúnta arna modhnú

Táscairí na gconairí tionchair shóisialta

Táthar ag súil go gcuideofar le Clár Euratom 2026-2027 aghaidh a thabhairt ar thosaíochtaí beartais an Chomhphobail maidir le sábháilteacht núicléach agus slándáil núicléach, cosaint ar radaíocht, agus feidhmeanna radaíochta ianúcháin trí bhíthin taighde agus nuálaíochta, mar a léiríonn punanna na dtionscadal lena ngintear aschuir a rannchuidíonn le dul i ngleic le dúshláin sna réimsí sin. Déanfar an tionchar sóisialta a thomhas freisin i dtéarmaí na forbartha sonraí i réimse na slándála núicléiche agus na gcoimircí núicléacha.

I dtreo tionchair shóisialta

Gearrthéarmach

Meántéarmach

Fadtéarmach

Feabhas a chur ar úsáid shábháilte shlán fuinnimh núicléach agus feidhmeanna neamhchumhachtacha radaíochta ianúcháin, lena n-áirítear sábháilteacht núicléach, slándáil núicléach, coimircí núicléacha, cosaint ar radaíocht, breosla spíonta sábháilte agus bainistiú dramhaíola radaighníomhaí agus díchoimisiúnú

Aschuir -

An líon agus an sciar aschur arb é is aidhm dóibh aghaidh a thabhairt ar thosaíochtaí beartais sonracha

Réitigh -

An líon agus an sciar nuálaíochtaí agus torthaí eolaíocha lena dtugtar aghaidh ar thosaíochtaí beartais sonracha

Sochair -

Éifeachtaí measta comhiomlána as torthaí arna gcistiú le Euratom a úsáid, maidir le dul i ngleic le tosaíochtaí beartais sonracha, lena n-áirítear rannchuidiú leis an timthriall déanta beartas agus dlíthe

An líon seirbhísí arna cuireadh ar fáil chun tacú le coimircí

An líon córas teicniúil arna soláthar agus arna n-úsáid

 

An líon seisiún oiliúna arna dtabhairt d’oifigigh thúslíne

Comhchruthú -

An líon agus an sciar tionscadal ó Euratom ina rannchuidíonn saoránaigh an Aontais agus úsáideoirí deiridh le hinneachar T&N a chomhchruthú

Rannpháirtíocht -

An líon agus an sciar eintiteas is tairbhithe Euratom a bhfuil sásraí rannpháirtíochta acu le saoránaigh agus úsáideoirí deiridh tar éis thionscadal Euratom

Glacadh T&N sa tsochaí

Glacadh agus for-rochtain na dtorthaí eolaíocha agus réiteach nuálach arna gcomhchruthú faoi Euratom

Táscairí nuálaíochta na gconairí tionchair

Meastar go n-eascróidh tionchair nuálaíochta as Clár Euratom 2026-2027, ar tionchar iad a thacaíonn leis an dul chun cinn i dtreo a chuspóirí sonracha. An dul chun cinn a dhéanfar sa réimse sin, déanfar é a thomhas le táscairí a bhaineann le cearta maoine intleachtúla (CMI), táirgí, modhanna agus próisis nuálacha agus a n-úsáid, mar aon le cruthú post.

I dtreo tionchar eacnamaíoch/nuálaíochta

Gearrthéarmach

Meántéarmach

Fadtéarmach

Feabhas a chur ar úsáid shábháilte shlán fuinnimh núicléach agus feidhmeanna neamhchumhachtacha radaíochta ianúcháin, lena n-áirítear sábháilteacht núicléach, slándáil núicléach, coimircí núicléacha, cosaint ar radaíocht, breosla spíonta sábháilte agus bainistiú dramhaíola radaighníomhaí agus díchoimisiúnú

Fuinneamh comhleá a chothú agus a fhorbairt

Saineolas agus barr feabhais san Aontas a choinneáil ar bun agus a fhorbairt a thuilleadh

Aschuir nuálacha -

An líon táirgí, próiseas nó modhanna nuálacha ó Chlár Euratom 2026-2027 (de réir cineál nuálaíochta) agus feidhmeanna CMI

Nuálaíochtaí -

An líon nuálaíochtaí ó thionscadail Euratom (de réir cineál nuálaíochta) lena n-áirítear nuálaíochtaí ó CMInna arna ndámhachtain

Fás eacnamaíoch -

Cruthú, fás agus scaireanna margaidh ag cuideachtaí a d’fhorbair nuálaíochtaí arna gcistiú ag Euratom

Fostaíocht a dtacaítear léi -

An líon na bpost coibhéiseach lánaimseartha (FTE) arna gcruthú, agus an líon post arna gcoinneáil ar bun sna heintitis is tairbhithe le haghaidh thionscadal Euratom (de réir cineál poist)

Fostaíocht arna coinneáil ar bun -

An méadú ar phoist FTE sna heintitis is tairbhithe tar éis thionscadal Euratom (de réir cineál poist)

Fostaíocht iomlán – An líon post díreach agus indíreach arna gcruthú nó arna gcoinneáil ar bun i ngeall ar thorthaí ó Euratom a scaipeadh (de réir cineál poist)

Méid na hinfheistíochta poiblí agus príobháidí arna slógadh le hinfheistíocht tosaigh Euratom

Méid na hinfheistíochta poiblí agus príobháidí arna slógadh chun torthaí Euratom a shaothrú nó a uas-scálú

Dul chun cinn an Aontais i dtreo na sprice 3 % de OTI de bharr Chlár Euratom 2026-2027

Táscairí beartais na gconairí tionchair

Táthar ag súil le Clár Euratom 2026-2027 go soláthraítear fianaise eolaíoch le haghaidh ceapadh beartas. Baineann sin, go háirithe, le tacaíocht eolaíoch do sheirbhísí eile de chuid an Choimisiúin, amhail tacaíocht do choimircí Euratom, nó do na Ballstáit gníomhartha dlí a bhaineann leis an radaíocht núicléach agus ianúcháin a chur chun feidhme (1).

I dtreo tionchar beartais

Gearrthéarmach

Meántéarmach

Fadtéarmach

Tacú le beartas maidir le sábháilteacht núicléach, coimircí núicléacha agus slándáil núicléach

An líon agus an sciar tionscadal Euratom as a n-eascraíonn torthaí atá ábhartha ó thaobh beartais de

An líon aschur a bhfuil tionchar inléirithe acu ar an mbeartas

An líon agus an sciar torthaí ar thionscadail Euratom a luaitear i ndoiciméid bheartais/chlársceidealaithe

Socrófar spriocanna i ndáil le gníomhaíochtaí indíreacha agus díreacha araon chun na torthaí a bhfuiltear ag coinne i ngach cuid de Chlár Euratom 2026-2027 a léiriú.


(1)  Rialachán (Euratom) Uimh. 302/2005 ón gCoimisiún an 8 Feabhra 2005 maidir le cur i bhfeidhm choimircí Euratom (IO L 54, 28.2.2005, lch. 1, ELI: http://data.europa.eu/eli/reg/2005/302/oj); Treoir 2011/70/Euratom ón gComhairle agus Treoir 2014/87/Euratom an 8 Iúil 2014 ón gComhairle lena leasaítear Treoir 2009/71/Euratom lena mbunaítear creat Comhphobail maidir le sábháilteacht núicléach na suiteálacha núicléacha (IO L 219, 25.7.2014, lch. 42, ELI: http://data.europa.eu/eli/dir/2014/87/oj).


ELI: http://data.europa.eu/eli/reg/2025/1304/oj

ISSN 1977-0839 (electronic edition)