L_202400860MT.000101.fmx.xml

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 470/2009 tal-Parlament Ewropew u tal-Kunsill tas-6 ta’ Mejju 2009 li jistabbilixxi l-proċeduri Komunitarji għall-istabbiliment ta’ limiti ta’ residwi ta’ sustanzi farmakoloġikament attivi fl-oġġetti tal-ikel li joriġinaw mill-annimali, u li jħassar ir-Regolament tal-Kunsill (KEE) Nru 2377/90 u li jemenda d-Direttiva 2001/82/KE tal-Parlament Ewropew u tal-Kunsill u r-Regolament (KE) Nru 726/2004 tal-Parlament Ewropew u tal-Kunsill (1), u b’mod partikolari l-Artikolu 14 tiegħu,

Billi:

(1)

Ir-Regolament tal-Kummissjoni (UE) Nru 37/2010 (2) jistabbilixxi s-sustanzi farmakoloġikament attivi u l-klassifikazzjoni tagħhom fir-rigward tal-limiti massimi ta’ residwu (“MRLs”) fl-oġġetti tal-ikel li ġejjin mill-annimali. Hija inkorporat is-sustanzi farmakoloġikament attivi kklassifikati fl-erba’ Annessi tar-Regolament tal-Kunsill (KEE) Nru 2377/90 (3) li tħassar u ġie sostitwit bir-Regolament (KE) Nru 470/2009.

(2)

Fiż-żmien tal-adozzjoni tar-Regolament (UE) Nru 37/2010, is-sustanza 17β-estradjol, li ġiet inkluża fl-Anness II (“lista ta’ sustanzi mhux soġġetti għal-limiti massimi ta’ residwi”) tar-Regolament (KEE) Nru 2377/90, ġiet inkluża fit-Tabella 1 (“sustanzi permessi”) tal-Anness tar-Regolament (UE) Nru 37/2010.

(3)

L-Artikolu 1(3) tar-Regolament (KE) Nru 470/2009 jipprevedi li r-Regolament (KE) Nru 470/2009 għandu japplika mingħajr preġudizzju għal-leġiżlazzjoni Komunitarja li tipprojbixxi l-użu fl-annimali li jipproduċu l-ikel ta’ ċerti sustanzi li jkollhom azzjoni ormonali jew tirostatika u ta’ beta-agonisti, kif previst fid-Direttiva tal-Kunsill 96/22/KE (4).

(4)	Id-Direttiva 96/22/KE tipprojbixxi l-amministrazzjoni ta’ 17β-estradjol lill-annimali tar-razzett.

(5)	Għalhekk, huwa xieraq li s-sustanza 17β-estradjol titneħħa mit-Tabella 1 tar-Regolament (UE) Nru 37/2010.

(6)	Għaldaqstant, ir-Regolament (UE) Nru 37/2010 jenħtieġ li jiġi emendat skont dan.

(7)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Prodotti Mediċinali Veterinarji,

ADOTTAT DAN IR-REGOLAMENT:

Artikolu 1

L-Anness tar-Regolament (UE) Nru 37/2010 huwa emendat kif stipulat fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-18 ta’ Marzu 2024.

Għall-Kummissjoni

Il-President

Ursula VON DER LEYEN

(2) Ir-Regolament tal-Kummissjoni (UE) Nru 37/2010 tat-22 ta’ Diċembru 2009 dwar is-sustanzi farmakoloġikament attivi u l-klassifikazzjoni tagħhom fir-rigward tal-limiti massimi ta’ residwu fl-oġġetti tal-ikel li ġejjin mill-annimali (ĠU L 15, 20.1.2010, p. 1, ELI: http://data.europa.eu/eli/reg/2010/37(1)/oj).

(3) Ir-Regolament Tal-Kunsill (KEE) Nru 2377/90 tas-26 ta’ Ġunju 1990 li jistabbilixxi kull proċedura tal-Komunità għal iffissar ta’ limiti massimi ta’ residwi ta’ prodotti mediċinali veterinarji fi prodotti tal-ikel ta’ oriġini mill-annimali (ĠU L 224, 18.8.1990, p. 1, ELI: http://data.europa.eu/eli/reg/1990/2377/oj);

(4) Id-Direttiva tal-Kunsill 96/22/KE tad-29 ta’ April 1996 li tikkonċerna l-projbizzjoni tal-użu fl-istockfarming ta’ ċerti sustanzi li jkollhom azzjoni ormonika u tyrostatika u ta’ beta-agonists u li tħassar id-Direttivi 81/602/KEE, 88/146/KEE u 88/299/KEE (ĠU L 125, 23.5.1996, p. 3, ELI: http://data.europa.eu/eli/dir/1996/22/2008-12-18).