IL-KUMMISSJONI EWROPEA
Brussell, 9.6.2022
COM(2022) 254 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
skont l-Artikolu 85(2) tar-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet, kif emendat bir-Regolament (UE) Nru 834/2019, li jivvaluta jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskema tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli
RAPPORT TAL-KUMMISSJONI LILL-PARLAMENT EWROPEW U LILL-KUNSILL
skont l-Artikolu 85(2) tar-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet, kif emendat bir-Regolament (UE) Nru 834/2019, li jivvaluta jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskema tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli
1.Introduzzjoni
Ir-Regolament dwar l-Infrastrutturi tas-Suq Ewropew (EMIR) fih eżenzjoni temporanja mill-obbligu tal-ikklerjar ċentrali għal entitajiet li joperaw Arranġamenti tal-Iskemi tal-Pensjoni (PSAs), fir-rigward ta’ ċerti tipi ta’ derivattivi barra l-Borża (OTC). L-eżenzjoni ġiet estiża diversi drabi mill-2012. Bħalissa, din tibqa’ għaddejja sat-18 ta’ Ġunju 2022. Il-Kummissjoni tista’ tadotta att delegat, li jestendi l-eżenzjoni għall-aħħar darba sa Ġunju 2023.
Ir-rekwiżit li l-PSAs jikklerjaw kuntratti tad-derivattivi OTC f’Parti Ċentrali tal-Ikklerjar (CCP) jista’ jwassalhom biex jittrasformaw ammont sinifikanti tal-assi tagħhom għal flus kontanti jew assi likwidi ħafna oħrajn, bħal depożiti bankarji, ishma ta’ fondi tas-suq monetarju, ftehimiet ta’ riakkwist jew linji ta’ kreditu, sabiex ikunu jistgħu jipprovdu “marġni” lis-CCPs. L-obbligu ta’ kklerjar u r-rekwiżit assoċjat li jiġi pprovdut marġni huwa relatat b’mod partikolari mal-ħtieġa li jiġu żgurati biżżejjed flus għall-marġni ta’ varjazzjoni li jeħtieġ li jiġi kopert regolarment u fi żmien qasir. Bħala tali, hemm riskju li l-ħtieġa prematura li l-PSAs jikklerjaw kuntratti tad-derivattivi OTC ċentralment tista’ twassal biex il-PSAs jċedu proporzjon sinifikanti tal-assi tagħhom għal flus kontanti biex jibnu bafers kapitali sabiex jissodisfaw ir-rekwiżiti ta’ marġni possibbli tas-CCPs, u b’hekk inaqqsu r-riżorsi allokati għall-investiment li jiġġenera introjtu biex ikopru pensjonijiet futuri. Madankollu, l-għan aħħari tar-Regolament jibqa’ l-ikklerjar ċentrali għall-PSAs mill-aktar fis possibbli.
L-Artikolu 85(2) tal-EMIR jirrikjedi li l-Kummissjoni tħejji rapporti annwali li jivvalutaw jekk ġewx żviluppati soluzzjonijiet tekniċi vijabbli għat-trasferiment permezz ta’ arranġamenti tal-iskema tal-pensjonijiet ta’ kollateral fi flus u mhux fi flus bħala marġni ta’ varjazzjoni u l-ħtieġa għal miżuri li jiffaċilitaw l-użu tagħhom. Dan huwa t-tielet Rapport tal-Kummissjoni u jippreżenta l-progress li sar s’issa.
2.Kontribut riċevut
Mid-dħul fis-seħħ tal-EMIR REFIT fis-17 ta’ Ġunju 2019, il-ħidma kienet għaddejja f’diversi fora li jimmonitorjaw il-progress lejn ikklerjar ċentrali mill-PSAs. Wasal kontribut mill-Awtorità Ewropea tat-Titoli u s-Swieq (ESMA), l-Aġenzija Bankarja Ewropea (EBA), l-Awtorità Ewropea tal-Assigurazzjoni u l-Pensjonijiet tax-Xogħol (EIOPA) u l-Bord Ewropew dwar ir-Riskju Sistemiku (BERS), kif ukoll mingħand parteċipanti fis-suq permezz tal-grupp ta’ esperti tal-PSA. L-ESMA, f’kooperazzjoni mal-EBA, l-EIOPA u l-BERS, ippreżentat rapporti annwali lill-Kummissjoni li jivvalutaw il-kwistjoni, kif meħtieġ mill-EMIR. L-ewwel rapport wasal għand il-Kummissjoni f’April 2020. It-tieni rapport ġie ppreżentat lill-Kummissjoni f’Diċembru 2020. Ir-rapport tal-ESMA l-aktar reċenti ntbagħat lill-Kummissjoni f’Jannar 2022.
Filwaqt li qieset l-kontribut riċevut, il-Kummissjoni ppubblikat żewġ rapporti,, li s’issa jivvalutaw il-kundizzjonijiet tal-likwidità kif ukoll jesploraw diversi arranġamenti tal-ikklerjar għall-fondi tal-pensjonijiet. Dawn ir-rapporti stipulaw l-argumenti relatati mal-estensjonijiet sussegwenti tal-eżenzjoni.
Fir-rapport ta’ Jannar 2022, l-ESMA kkonkludiet li d-deskrizzjoni, l-analiżi u s-sejbiet dettaljati fit-tieni rapport estensiv kienu għadhom validi. Hija qieset li huwa improbabbli li, minkejja l-isforzi tal-partijiet ikkonċernati u r-regolaturi, hemm soluzzjoni unika biex jiġi indirizzat it-tħassib tal-PSAs. Pjuttost jenħtieġ li tiġi segwita taħlita ta’ soluzzjonijiet li jiffaċilitaw l-aċċess għal-likwidità jew li jtaffu l-pressjoni tat-twettiq tal-ikklerjar. Għalhekk, il-fokus tal-aħħar rapport kien fuq il-valutazzjoni tal-livell ta’ tħejjija operazzjonali tal-PSAs biex jikklerjaw id-derivattivi tar-rati tal-imgħax OTC tagħhom. L-ESMA kkonkludiet li l-PSAs huma fil-biċċa l-kbira lesti minn perspettiva operazzjonali, filwaqt li nnotat taħlita ta’ soluzzjonijiet disponibbli għall-PSAs, b’tali mod li l-ESMA temmen li kien hemm inqas raġuni biex il-PSAs jiġu ttrattati b’mod differenti meta mqabbla ma’ parteċipanti oħra fis-suq. Barra minn hekk, l-ESMA indikat li l-estensjoni tal-eżenzjoni tal-ikklerjar jenħtieġ li titqies fil-kuntest usa’ tal-bini tal-kapaċità tal-ikklerjar fl-UE u ż-żieda fl-attraenza tas-CCPs tal-UE, li għalihom jista’ jikkontribwixxi wkoll it-tmiem ta’ din l-eżenzjoni.
Madankollu, skont l-ESMA, għadd ta’ kunsiderazzjonijiet operazzjonali jiġġustifikaw li l-PSAs jingħataw aktar żmien qabel ma jiġu soġġetti għall-obbligu tal-ikklerjar. B’mod partikolari, l-ESMA enfasizzat li l-PSAs u l-parteċipanti rilevanti fis-suq jeħtieġu ż-żmien biex jiffinalizzaw l-arranġamenti tal-ikklerjar u tal-ġestjoni tal-kollateral tagħhom. Hija żiedet ukoll li d-deċiżjoni tal-Kummissjoni trid tiġi kkomunikata b’avviż suffiċjenti li jippermetti lill-partijiet kollha milquta jadattaw il-pjanijiet ta’ implimentazzjoni tagħhom. Filwaqt li qieset dan ta’ hawn fuq, l-ESMA rrakkomandat estenżjoni ulterjuri tal-eżenzjoni tal-ikklerjar sad-19 ta’ Ġunju 2023.
Mill-aħħar rapport tal-Kummissjoni f’Mejju 2021, il-grupp ta’ esperti dwar il-PSAs iltaqa’ tliet darbiet. Il-parteċipanti kkonfermaw li l-PSAs huma fil-biċċa l-kbira lesti biex jikklerjaw, għandhom arranġamenti ta’ kklerjar fis-seħħ u jikklerjaw xi kummerċ b’mod volontarju. Fl-istess ħin, il-PSAs enfasizzaw li l-kwistjoni sottostanti tal-aċċess għall-flus kontanti għadha hemm. Biex din tiġi indirizzata, b’mod partikolari r-repo kklerjata ġiet diskussa mill-grupp ta’ esperti dwar il-PSAs bħala soluzzjoni potenzjali ta’ likwidità. Madankollu, il-PSAs innotaw li filwaqt li dan huwa pass fid-direzzjoni t-tajba, id-dipendenza żejda fuq is-suq repo kklerjat tħallihom vulnerabbli għal riskju residwu ta’ likwidità f’ċirkostanzi estremi tas-suq.
3.Kuntest politiku
Ir-Renju Unit huwa ċentru ewlieni għall-ikklerjar ċentrali tad-derivattivi u jibqa’ post importanti għall-ikklerjar mill-atturi tas-suq tal-UE, li matul is-snin akkumulaw ammont sinifikanti ta’ pożizzjonijiet fis-CCPs tar-Renju Unit. Bosta PSAs tal-UE bħalissa għandhom arranġamenti ta’ kklerjar kemm fl-UE kif ukoll fir-Renju Unit, iżda l-analiżi turi li dawn għandhom it-tendenza li jikklerjaw fi proporzjonijiet akbar fir-Renju Unit. Sabiex jiġu evitati riskji għall-istabbiltà finanzjarja għall-UE, f’Settembru 2020 il-Kummissjoni adottat deċiżjoni temporanja dwar l-ekwivalenza li tkopri l-qafas regolatorju u superviżorju tar-Renju Unit għas-CCPs, inizjalment sa Ġunju 2022, u sussegwentement estiża sat-30 ta’ Ġunju 2025. Sadanittant, il-parteċipanti fis-suq tal-UE ġew imħeġġa jnaqqsu l-iskoperturi tagħhom għas-CCPs tar-Renju Unit, peress li l-firxa ta’ tali skoperturi tista’ tagħmilha diffiċli għall-awtoritajiet tal-UE biex jimmaniġġjaw l-istabbiltà finanzjarja f’każ ta’ stress.
F’Jannar 2021, il-Kummissjoni waqqfet grupp ta’ ħidma li jinkludi l-ASE, il-BERS, il-BĊE u l-MSU biex jivvaluta l-opportunitajiet u l-isfidi tat-trasferiment tal-ikklerjar tad-derivattivi mir-Renju Unit għas-CCPs tal-UE. Il-grupp għamel kuntatt ukoll ma’ firxa ta’ partijiet ikkonċernati biex jiġbor il-fehmiet u l-kontribut. Id-diskussjonijiet fil-grupp ikkonfermaw ir-riskji għall-UE li jirriżultaw mill-iskoperturi għas-CCPs tar-Renju Unit. Tali riskji ġew enfasizzati wkoll fil-valutazzjoni ta’ CCPs sistemiċi ta’ pajjiżi terzi mwettqa mill-ESMA taħt il-qafas tal-EMIR 2.2, iffinalizzat f’Diċembru tas-sena li għaddiet.
Għalhekk, sabiex tappoġġa servizzi tal-ikklerjar effiċjenti u kompetittivi, fit-tieni nofs tal-2022 il-Kummissjoni se tippreżenta miżuri biex is-CCPs tal-UE jsiru aktar attraenti għall-parteċipanti tas-suq; billi l-UE ssir ċentru tal-ikklerjar aktar attraenti u kosteffiċjenti u billi jissaħħaħ il-qafas superviżorju tal-UE għas-CCPs biex jiġu ġestiti aħjar ir-riskji assoċjati.
F’dan il-kuntest, it-tmiem tal-eżenzjoni tal-PSA jista’ jgħin fl-iżvilupp tal-pula ta’ likwidità tal-UE, u potenzjalment jattira aktar ikklerjar fl-UE.
4.Evoluzzjoni mir-Rapporti inizjali tal-Kummissjoni
L-eżenzjoni temporanja mill-obbligu tal-ikklerjar kellha l-għan li tagħti biżżejjed żmien lill-PSAs u parteċipanti rilevanti oħra fis-suq biex jiddifferenzjaw is-sorsi ta’ likwidità biex ikopru l-ħtiġijiet tal-marġnijiet ta’ varjazzjoni u biex jiżviluppaw il-kapaċità operazzjonali biex jittrattaw l-ikklerjar ta’ portafolli tad-derivattivi kbar.
4.1
Likwidità
L-eżenzjoni temporanja tal-ikklerjar għall-PSAs għandha l-għan li ttaffi l-impatt li l-obbligu tal-ikklerjar ikollu fuq l-allokazzjoni tal-flus tagħhom. L-aktar raġuni komuni għall-użu ta’ derivattivi OTC mill-PSAs hija l-għadd insuffiċjenti ta’ ħruġ ta’ bonds ta’ kwalità għolja datati fit-tul, li jirrestrinġi l-kapaċità tagħhom li jimmaniġġjaw ir-riskji tar-rati tal-imgħax b’mod adegwat. Dan jagħti lok għal tħassib dwar l-aċċess għall-flus kontanti matul perjodi ta’ stress fis-suq, meta t-talbiet għall-marġni jiżdiedu u l-PSAs jikkompetu ma’ entitajiet oħra tas-suq għal-likwidità.
Il-kundizzjonijiet tal-likwidità għall-PSAs evolvew b’mod favorevoli minn meta beda l-obbligu tal-EMIR li jikklerjaw ċentralment ċerti klassijiet ta’ derivattivi OTC, anke jekk żammew sew matul perjodi reċenti ta’ volatilità. Bl-eċċezzjoni ta’ Marzu-April 2020, meta s-sejħiet għall-marġni ta’ varjazzjoni ta’ kuljum kienu ogħla b’mod sinifikanti mill-flussi medji normalment osservati, il-PSAs ma ffaċċjawx problemi ta’ likwidità relatati ma’ sejħiet għall-marġni. F’Marzu 2020, il-pagamenti tal-marġni ta’ varjazzjoni kienu kbar meta mqabbla mal-assi likwidu ħafna miżmum mill-fondi tal-pensjonijiet u poġġew xi wħud minnhom taħt pressjoni ta’ likwidità. Madankollu, il-fondi tal-pensjonijiet kienu ġeneralment kapaċi jilħquhom.
Matul perjodi ta’ stress tas-suq, is-suq repo jista’ jsir sors importanti ta’ likwidità għall-parteċipanti min-naħa tax-xiri, inklużi l-PSAs. F’dawn l-aħħar snin, il-parteċipanti fis-suq kienu attivi fl-akkomodazzjoni tal-PSAs u entitajiet oħra fl-ekosistema tal-ikklerjar tar-repo. Eurex, is-CCP Ġermaniża, waqqfet mudell ta’ “aċċess dirett” biex tiffaċilita l-aċċess għall-ikklerjar. Dan jinkludi kemm repos kif ukoll swaps tar-rati tal-imgħax. Aktar reċentement, it-tieni kamra tal-ikklerjar tal-UE fetħet offerta ta’ mudell ta’ repo ta’ kklerjar sponsorjat, u żiedet aktar kapaċità ta’ trasformazzjoni tal-kollateral. Dawn il-mudelli huma mistennija li jkomplu jimmaturaw matul l-2022 u l-2023, u dan iwassal għal żieda fl-adozzjoni mill-isponsers u l-parteċipanti min-naħa tax-xiri.
Minkejja dan, il-PSAs ikomplu jirrapportaw tħassib dwar is-sitwazzjoni tal-likwidità tagħhom. Għalkemm il-likwidità baqgħet robusta s’issa, din tista’ tissikka, speċjalment fis-suq għall-kollateral ġenerali, hekk kif il-politika monetarja tinnormalizza fuq perjodu medju ta’ żmien. Skont il-PSAs, dan jista’ jwassal biex ikollhom ibigħu parteċipazzjonijiet bħal ekwitajiet, bonds korporattivi u bonds tal-gvern. F’ambjent bħal dan, huma jkunu qed ibigħu f’suq li sejjer ħażin, u tali bejgħ ta’ assi jista’ jkompli jaggrava l-pressjoni ’l isfel fuq it-tnaqqis fil-prezzijiet tal-assi.
Minkejja dan, jistgħu jsiru disponibbli sorsi alternattivi ta’ likwidità. Pereżempju, l-estenżjoni tas-sigħat operattivi tat-TARGET2 u t-T2S aktar tard din is-sena tista’ tgħin biex jiġi żgurat li t-tranżazzjonijiet ta’ finanzjament minn faċilitajiet repo denominati f’EUR ikunu jistgħu jiġu saldati meta jaslu sejħiet għall-marġni. Għalkemm dawn il-mudelli ġodda ta’ aċċess jidhru aktar adatti għall-ħtiġijiet ta’ PSAs kbar, dawn jippermettu lill-banek jirrilaxxaw il-kapaċità tal-karta tal-bilanċ, potenzjalment ukoll għall-benefiċċju ta’ PSAs iżgħar. Madankollu, il-PSAs jitolbu l-introduzzjoni ta’ link tal-bank ċentrali mal-pjattaforma repo kklerjata, sabiex il-banek ċentrali jkunu jistgħu jintervjenu fis-suq tar-repo u jaġixxu bħala fornitur ta’ flus kontanti għall-fondi tal-pensjonijiet (kif ukoll parteċipanti oħra fis-suq) bl-użu ta’ repos ikklerjati.
Madankollu, ta’ min jinnota li la l-ESMA fit-tliet rapporti annwali tagħha u lanqas il-grupp ta’ esperti tal-PSA ma indikaw li fi kwalunkwe punt il-kundizzjonijiet ta’ likwidità ddeterjoraw sa tali punt, anke fir-rebbiegħa tal-2020, sabiex jheddu b’mod permanenti l-kapaċità tal-PSAs li jissodisfaw is-sejħiet għall-marġni. Bl-istess mod, is-servizzi tal-ikklerjar għal bonds tal-gvern u tranżazzjonijiet repo baqgħu reżiljenti u stabbli, għall-kuntrarju tal-likwidità esperjenzata fis-suq tar-repo bilaterali. Anke qabel l-intervent tal-bank ċentrali, l-ebda fond tas-suq monetarju ma ssospenda l-fidi u s-suq repo kompla jiffunzjona, li jfisser li l-PSAs komplew ikunu jistgħu jaċċessaw il-likwidità. Madankollu, fi żmien ta’ stress, il-PSAs jistgħu jibbenefikaw indirettament minn operazzjonijiet tal-bank ċentrali li għandhom l-għan li jappoġġaw segmenti vulnerabbli tas-suq, kif kien il-każ f’Marzu-April 2020 meta l-BĊE pprovda faċilitajiet ta’ self għall-banek biex jixtru assi minn fondi tas-suq monetarju jew li jestendu l-kollateral għal bonds bankarji mhux garantiti.
4.2
Disponibbiltà operazzjonali għall-ikklerjar
II-PSAs huma fil-biċċa l-kbira lesti biex jikklerjaw, li jfisser li għandhom arranġamenti ta’ kklerjar fis-seħħ u jikklerjaw xi kummerċ b’mod volontarju. Dawn is-sejbiet huma kkonfermati mill-aħħar rapport tal-ESMA li nnota livell għoli ta’ disponibbiltà operazzjonali tal-PSAs biex jikklerjaw.
L-analiżi tal-ESMA tindika li madwar terz tat-tranżazzjonijiet tal-ikklerjar tal-PSAs bdew jikklerjaw fl-aħħar sena. Madankollu, hemm xi differenzi bejn il-PSAs (xi wħud minnhom jikklerjaw il-maġġoranza vasta tal-kummerċ tagħhom, uħud minnhom ftit wisq jew xejn affattu) u l-attività tal-ikklerjar tidher li hija kkonċentrata (madwar 70 % tan-nozzjonali kklerjat huwa attribwibbli għal ħames PSAs biss). F’termini ta’ perċentwal ikklerjat, l-analiżi tindika li madwar 25 % tan-nozzjonali (40 % fl-għadd tal-kummerċ) innegozjat mill-PSAs huwa kklerjat. Madankollu, filwaqt li l-akbar tliet PSAs tipikament jikklerjaw medja ta’ 25 % iżda mhux aktar minn 25 % - 30 % tal-kummerċ tagħhom, il-PSAs ta’ daqs medju u żgħir jikklerjaw minn 0 sa 100 % tal-kummerċ tagħhom.
Il-bilanċ fl-attività ta’ kklerjar bejn Eurex u LCH Ltd għal swaps ikklerjati minn PSAs, f’termini ta’ volum ikklerjat dinji, huwa madankollu fl-istess proporzjon bħall-bqija tas-suq, jiġifieri li LCH Ltd għad għandha sehem mis-suq dominanti. Madankollu, f’termini ta’ arranġamenti ta’ kklerjar, l-istampa hija differenti. Meta wieħed iħares lejn il-PSAs ogħla mil-limitu tal-marġni inizjali ta’ EUR 8 biljun, l-analiżi tindika perċentwali simili f’termini ta’ PSAs li għandhom mill-inqas kummerċ ikklerjat f’Eurex (76 %) u kummerċ ikklerjat f’LCH Ltd (80 %). Dan ikun ifisser li l-maġġoranza tal-PSAs il-kbar, dawk l-aktar probabbli milquta mir-rekwiżit ta’ kklerjar, ikollhom arranġamenti fis-seħħ biex jikklerjaw fi kwalunkwe waħda mis-CCP. Skont il-kalkoli tal-ESMA, 31 PSAs tal-UE jkunu koperti mill-obbligu tal-ikklerjar skont l-EMIR, peress li jkunu ogħla mil-limiti massimi tal-ikklerjar. Il-maġġoranza ta’ dawn il-PSAs (80 %) ikklerjaw mill-inqas negozju wieħed, iżda mhux neċessarjament il-portafoll tad-derivattivi kollu tagħhom, u għalhekk għandhom xi arranġamenti tal-ikklerjar fis-seħħ. L-iżvilupp tal-istrateġija tal-Kummissjoni dwar l-ikklerjar, li se tiġi ppreżentata aktar tard fl-2022, għandu l-għan li jtejjeb l-attraenza tal-ikklerjar fl-UE.
Fl-aħħar nett, huwa importanti li jiġi enfasizzat li minkejja ż-żieda fil-prontezza operazzjonali tagħhom, il-PSAs esprimew tħassib dwar il-fatt li hemm biżżejjed kapaċità biex jiġu kklerjati d-derivattivi kollha tagħhom soġġetti għall-obbligu tal-ikklerjar. Huma indikaw li ż-żieda fir-rata tal-ikklerjar mil-livelli attwali tista’ toħloq sfidi f’termini ta’ limiti tal-kapaċità tal-ikklerjar ikkawżati minn għadd limitat ta’ membri tal-ikklerjar jew il-limiti tal-ikklerjar potenzjali tagħhom.
5.Konklużjoni
L-eżenzjoni tal-ikklerjar ċentrali attwali tiskadi fit-18 ta’ Ġunju 2022. L-EMIR REFIT jippermetti lill-Kummissjoni testendi din l-eżenzjoni temporanja għall-aħħar darba sat-18 ta’ Ġunju 2023, jekk tikkonkludi li l-parteċipanti fis-suq jeħtieġu żmien addizzjonali biex ikomplu jiżviluppaw u jadottaw soluzzjonijiet tekniċi xierqa, u li l-effetti negattivi tal-ikklerjar ċentrali tal-kuntratti tad-derivattivi fuq l-introjtu tal-pensjonijiet ma jinbidlux.
L-analiżi tal-Kummissjoni turi li l-kundizzjonijiet tal-likwidità għall-PSAs qed ikomplu jitjiebu u varjetà ta’ mudelli tfaċċaw biex jaċċessaw l-ikklerjar ċentrali jew jittrasformaw il-kollateral. Għalkemm soluzzjoni unika għall-forniment ta’ marġni lis-CCPs mill-PSAs f’kundizzjonijiet tas-suq taħt stress kienet elużiva, teżisti firxa ta’ strumenti li għandha tippermettu lill-fondi tal-pensjonijiet jikklerjaw b’mod effiċjenti f’kundizzjonijiet tas-suq differenti, inkluż taħt stress.
Sabiex jintużaw bis-sħiħ is-soluzzjonijiet disponibbli, il-fondi tal-pensjonijiet taż-ŻEE se jkollhom bżonn isaħħu l-kapaċità operattiva tagħhom biex jikklerjaw u jimmaniġġjaw il-likwidità u l-kollateral. L-analiżi ppreżentata mill-ESMA wriet li l-għadd ta’ kklerjar tal-PSAs qed ikompli jiżdied, iżda l-livell ta’ disponibbiltà fis-settur kollu jvarja. Għalhekk, il-PSAs u l-membri tal-ikklerjar tas-CCP tagħhom jeħtieġu żmien addizzjonali biex jiffinalizzaw l-arranġamenti meħtieġa biex jikklerjaw il-kuntratti kollha li huma fil-kamp ta’ applikazzjoni. Hemm bżonn ukoll ta’ żmien biex tiġi indirizzata t-tħejjija għal-likwidità tal-PSAs peress li mhux kollha jidhru li għandhom ġestjoni tal-likwidità adegwata. B’mod partikolari, l-awtoritajiet nazzjonali kompetenti fl-Istati Membri bi swieq akbar tal-PSA indikaw li ġew stabbiliti inizjattivi superviżorji biex itejbu din is-sitwazzjoni. Fl-aħħar nett, l-istrateġija tal-Kummissjoni dwar l-ikklerjar se tattira attività akbar fi kmamar tal-ikklerjar ibbażati fl-UE, billi tipprovdi lill-PSAs b’aċċess akbar għal servizzi ta’ kklerjar kompetittivi u effiċjenti.
Bħala konklużjoni, mill-2019 ’l hawn, kien hemm progress sostanzjali lejn l-ikklerjar ċentrali għall-PSAs, inkluż xi PSAs li qed jimxu parzjalment lejn l-ikklerjar ċentrali fuq bażi volontarja. Madankollu, huma meħtieġa passi operazzjonali ulterjuri. B’mod partikolari, jenħtieġ li s-CCPs tal-UE jużaw iż-żmien allokat biex ikomplu jiżviluppaw il-mudelli tagħhom ta’ aċċess iffaċilitat u trasformazzjoni kollaterali, biex iżidu l-attraenza tagħhom għall-PSAs, b’mod partikolari dawk iżgħar, li attwalment jidhru li qed isibuha aktar bi tqila biex jikklerjaw. Fl-istess ħin, jenħtieġ li l-fondi tal-pensjonijiet jiżguraw li jkollhom biżżejjed kompetenzi u kapaċitajiet organizzattivi biex jimmaniġġjaw l-ikklerjar tal-portafolli tad-derivattivi tagħhom. Għal dawn ir-raġunijiet, il-Kummissjoni se ttawwal l-eżenzjoni tal-ikklerjar għall-PSAs għal sena finali. Mid-19 ta’ Ġunju 2023, l-Arranġamenti tal-Iskemi tal-Pensjoni se jkunu meħtieġa skont l-EMIR biex jiġu kklerjati.