(1)

Il-Konvenzjoni dwar l-Avjazzjoni Ċivili Internazzjonali, li ġiet iffirmata f’Chicago fis-7 ta’ Diċembru 1944 (il-“Konvenzjoni ta’ Chicago”), u li tirregola t-trasport internazzjonali bl-ajru, daħlet fis-seħħ fl-4 ta’ April 1947. Hija stabbiliet l-Organizzazzjoni tal-Avjazzjoni Ċivili Internazzjonali (“ICAO”, International Civil Aviation Organization).

(2)

L-Istati Membri huma Partijiet Kontraenti għall-Konvenzjoni ta’ Chicago u Stati Kontraenti tal-ICAO, filwaqt li l-Unjoni għandha status ta’ osservatur f’ċerti korpi tal-ICAO. Bħalissa sitt Stati Membri huma rrappreżentati fil-Kunsill tal-ICAO (il-“Kunsill tal-ICAO”).

(3)

Skont l-Artikolu 37 tal-Konvenzjoni ta’ Chicago, l-ICAO għandha tadotta u temenda l-istandards u l-prattiki u l-proċeduri rakkomandati internazzjonali li jittrattaw, pereżempju, is-sistemi ta’ komunikazzjoni u l-għajnuniet għan-navigazzjoni bl-ajru, ir-regoli tal-prattiki tal-kontroll tal-ajru u tat-traffiku tal-ajru u kwistjonijiet oħra bħal dawn li jikkonċernaw is-sikurezza, ir-regolarità u l-effiċjenza tan-navigazzjoni bl-ajru kif jista’ jkun xieraq minn żmien għal żmien.

(4)

Skont l-Artikolu 38 tal-Konvenzjoni ta’ Chicago, kwalunkwe Stat Kontraenti tal-ICAO li jara li ma jkunx prattikabbli li jikkonforma fl-aspetti kollha ma’ kwalunkwe standard internazzjonali jew li jġib ir-regolamenti jew il-prattiki tiegħu stess f’konformità sħiħa ma’ kwalunkwe standard internazzjonali wara l-emendar ta’ dan tal-aħħar, jew li jqis li jkun meħtieġ li jadotta regolamenti jew prattiki li jvarjaw fi kwalunkwe aspett partikolari minn dawk stabbiliti minn standard internazzjonali, għandu jagħti notifika immedjata lill-ICAO dwar id-differenzi bejn ir-regolamenti u l-prattiki tiegħu stess u dawk stabbiliti mill-istandard internazzjonali. Fil-każ ta’ emendi għall-istandards internazzjonali, kwalunkwe Stat li ma jagħmilx l-emendi xierqa għar-regolamenti jew il-prattiki tiegħu stess, fi żmien sittin jum mill-adozzjoni tal-emenda għall-istandard internazzjonali, għandu jagħti notifika lill-Kunsill tal-ICAO jew jindika l-azzjoni li jipproponi li jieħu.

(5)

Skont l-Artikolu 54(l) tal-Konvenzjoni ta’ Chicago, il-Kunsill tal-ICAO għandu jadotta Standards u Prattiki Rakkomandati (“SARPs”, Standards and Recommended Practices) internazzjonali, u jiddeżinjahom bħala Annessi tal-Konvenzjoni ta’ Chicago (l-“Annessi tal-ICAO”).

(6)

Skont l-Artikolu 90 tal-Konvenzjoni ta’ Chicago, kwalunkwe Anness tal-ICAO jew kwalunkwe emenda f’Anness tal-ICAO ssir effettiva fi żmien tliet xhur minn meta tiġi ppreżentata lill-Istati Kontraenti tal-ICAO, jew fit-tmiem ta’ kull perjodu itwal ta’ żmien tali li l-Kunsill tal-ICAO jippreskrivi, sakemm sadanittant ma jkunx hemm maġġoranza ta’ Stati Kontraenti tal-ICAO li jirreġistraw id-diżapprovazzjoni tagħhom. Huwa biss ladarba jkunu ġew adottati mill-Kunsill tal-ICAO u jkunu saru effettivi li l-istandards internazzjonali jorbtu lill-Istati Kontraenti tal-ICAO kollha, inkluż l-Istati Membri kollha tal-Unjoni, f’konformità mal-Konvenzjoni ta’ Chicago u fil-limiti stabbiliti fiha, b’mod partikolari fl-Artikoli 37 u 38 tagħha.

(7)

Ir-regoli interni tal-ICAO, b’mod partikolari dawk li jikkawżaw l-aħħar verżjonijiet tad-dokumenti għal deċiżjonijiet dwar SARPs ġodda jew emendi lis-SARPs biex ikunu disponibbli għall-Kunsill tal-ICAO tard biss, l-iskadenzi stabbiliti mill-ICAO biex l-Istati Kontraenti tal-ICAO jinnotifikaw id-differenzi fir-rigward tal-istandards internazzjonali, kif ukoll in-numru kbir ta’ differenzi fl-oqsma tas-sikurezza tal-avjazzjoni ċivili, tan-navigazzjoni bl-ajru u tal-ġestjoni tat-traffiku tal-ajru li għandhom jiġu notifikati kull sena, jagħmluha diffiċli li tiġi stabbilita l-pożizzjoni li għandha tittieħed f’isem l-Unjoni f’Deċiżjoni tal-Kunsill ibbażata fuq l-Artikolu 218(9) tat-Trattat dwar il-Funzjonament tal-Unjoni Ewropea (TFUE) fil-waqt biex is-SARPs il-ġodda jew emendi għas-SARPs jiġu adottati, jew biex kull differenza tiġi notifikata.

(8)

Għaldaqstant jixraq li jiġu stabbiliti l-kriterji u l-proċedura li għandhom jiġu segwiti biex tiġi stabbilita l-pożizzjoni li għandha tittieħed f’isem l-Unjoni dwar l-adozzjoni ta’ SARPs jew emendi għas-SARPs, sa fejn dawk is-SARPs ikunu kapaċi jinfluwenzaw b’mod deċiżiv il-kontenut tad-dritt tal-Unjoni fil-qasam tal-avjazzjoni ċivili, kif ukoll fir-rigward ta’ deċiżjonijiet biex jiġu diżapprovati jew biex ma jiġux diżapprovati SARPs skont l-Artikolu 90 tal-Konvenzjoni ta’ Chicago u fir-rigward tan-notifika ta’ differenzi b’rabta mal-istandards internazzjonali skont l-Artikolu 38 tal-Konvenzjoni ta’ Chicago.

(9)

Minħabba l-ispeċifiċità tas-sikurezza tal-avjazzjoni ċivili, in-navigazzjoni bl-ajru u l-ġestjoni tat-traffiku tal-ajru meta mqabbla ma’ oqsma oħrajn indirizzati mill-ICAO, b’mod partikolari l-għadd kbir ta’ SARPs adottati f’dawk l-oqsma mill-Kunsill tal-ICAO kull sena u l-għadd ta’ differenzi li jkollhom jiġu nnotifikati kull sena, jenħtieġ li din id-Deċiżjoni jkollha x’taqsam biss mas-sikurezza tal-avjazzjoni ċivili, man-navigazzjoni bl-ajru u mal-ġestjoni tat-traffiku tal-ajru sabiex jiġu ssimplifikati l-proċessi biex tiġi stabbilita malajr il-pożizzjoni li għandha tittieħed f’isem l-Unjoni għall-adozzjoni ta’ SARPs ġodda u emendi għas-SARPs, id-deċiżjonijiet li jiġu diżapprovati, jew ma jiġux diżapprovati, SARPs jew emendi lis-SARPs adottati mill-Kunsill tal-ICAO u li jiġi indirizzat l-għadd kbir ta’ notifiki b’mod effiċjenti.

(10)

Is-SARPs adottati mill-Kunsill tal-ICAO fil-qasam tas-sikurezza tal-avjazzjoni ċivili, tan-navigazzjoni bl-ajru u tal-ġestjoni tat-traffiku tal-ajru jistgħu jikkonċernaw kwistjonijiet ta’ kompetenza esklużiva tal-Unjoni u jistgħu jkunu kapaċi jinfluwenzaw b’mod deċiżiv il-kontenut tad-dritt tal-Unjoni. Għaldaqstant huwa effiċjenti u xieraq, permezz ta’ deċiżjoni, li jiġu stabbiliti l-kriterji u l-proċedura li għandhom jiġu segwiti biex tiġi stabbilita l-pożizzjoni li għandha tittieħed f’isem l-Unjoni fir-rigward tas-SARPs f’dawk l-oqsma, mingħajr preġudizzju għad-drittijiet u l-obbligi tal-Istati Membri bħala Stati Kontraenti tal-ICAO skont il-Konvenzjoni ta’ Chicago. Fil-livell tal-ICAO, is-SARPs għas-sikurezza tal-avjazzjoni ċivili, in-navigazzjoni bl-ajru u l-ġestjoni tat-traffiku tal-ajru jinsabu prinċipalment fl-Annessi 1, 2, 3, 4, 6, 8, 10, 11, 14, 15, 18 u 19.

(11)

Fil-livell tal-Unjoni, ir-rekwiżiti li jinsabu fis-SARPs għas-sikurezza tal-avjazzjoni ċivili huma primarjament riflessi u msemmija fir-Regolamenti (UE) 2018/1139 (1) u (KE) Nru 2111/2005 (2) tal-Parlament Ewropew u tal-Kunsill u fl-atti ta’ implimentazzjoni u delegati adottati fuq il-bażi tagħhom, b’mod partikolari r-Regolamenti tal-Kummissjoni (UE) Nru 1178/2011 (3), (UE) Nru 748/2012 (4), (UE) Nru 965/2012 (5), (UE) Nru 139/2014 (6), (UE) Nru 452/2014 (7), (UE) Nru 1321/2014 (8) u (UE) 2015/640 (9), ir-Regolament ta’ Implimentazzjoni tal-Kummissjoni (UE) 2019/947 (10), ir-Regolament Delegat tal-Kummissjoni (UE) 2019/945 (11), u r-Regolament ta’ Implimentazzjoni tal-Kummissjoni (UE) 2021/664 (12).

(12)

Fil-livell tal-Unjoni, ir-rekwiżiti li jinsabu fis-SARPs għan-navigazzjoni bl-ajru u għall-ġestjoni tat-traffiku tal-ajru huma prinċipalment riflessi u msemmija fir-Regolamenti (KE) Nru 549/2004 (13), (KE) Nru 550/2004 (14) u (UE) 2024/2803 (15) tal-Parlament Ewropew u tal-Kunsill u fl-atti ta’ implimentazzjoni u delegati adottati abbażi tagħhom, b’mod partikolari r-Regolament tal-Kummissjoni (UE) Nru 1332/2011 (16), ir-Regolament ta’ Implimentazzjoni tal-Kummissjoni (UE) Nru 923/2012 (17), ir-Regolament tal-Kummissjoni (UE) 2015/340 (18) u r-Regolament ta’ Implimentazzjoni tal-Kummissjoni (UE) 2018/1048 (19).

(13)

Jenħtieġ li din id-Deċiżjoni tikkonċerna biss il-pożizzjonijiet li għandhom jittieħdu f’isem l-Unjoni fi ħdan l-ICAO f’oqsma li fihom l-Unjoni għandha kompetenza esklużiva. Din id-Deċiżjoni hija mingħajr preġudizzju għall-possibbiltà li l-Kunsill jadotta, fuq proposta tal-Kummissjoni, deċiżjonijiet ibbażati fuq l-Artikolu 218(9) TFUE li jistabbilixxi l-pożizzjoni li għandha tittieħed f’isem l-Unjoni fi ħdan l-ICAO b’mod partikolari f’oqsma li jaqgħu barra mill-kamp ta’ applikazzjoni ta’ din id-Deċiżjoni, inkluż fejn il-kompetenza kondiviża tal-Unjoni tkun għadha ma ġietx eżerċitata.

(14)

Jenħtieġ li l-perjodu ta’ applikazzjoni tad-Deċiżjoni tal-Kunsill (UE) 2023/746 (20) jiġi estiż għal ċiklu triennali ieħor tal-ICAO, jiġifieri sal-31 ta’ Diċembru 2028. Jenħtieġ li l-Kummissjoni tippreżenta lill-Kunsill evalwazzjoni bil-miktub tal-applikazzjoni ta’ dik id-Deċiżjoni biex isservi bħala l-bażi għal kwalunkwe estensjoni jew emenda potenzjali ta’ dik id-Deċiżjoni.

(15)

Jenħtieġ li l-implimentazzjoni ta’ din id-Deċiżjoni ma tinvolvix ksur tal-obbligi tal-Istati Membri skont id-dritt tal-Unjoni jew tal-obbligi internazzjonali tagħhom skont il-Konvenzjoni ta’ Chicago.

(16)

Għall-finijiet tal-implimentazzjoni ta’ din id-Deċiżjoni, jenħtieġ li l-Istati Membri u l-Kummissjoni, f’konformità mal-istatus ta’ osservatur tal-Unjoni, jaġixxu f’kooperazzjoni mill-qrib f’konformità mad-dmir ta’ kooperazzjoni leali tagħhom.

(17)

Għalhekk jenħtieġ li d-Deċiżjoni (UE) 2023/746 tiġi emendata skont dan,

(1)

fl-Artikolu 7, il-paragrafu 1 huwa sostitwit b’dan li ġej:

(2)

l-Anness huwa emendat kif ġej: