(1)

Fl-24 ta' Mejju 2018, il-Kummissjoni Ewropea (“il-Kummissjoni”) bdiet proċediment antidumping fir-rigward tal-importazzjonijiet ta' planki tal-azzar illaminati bis-sħana li joriġinaw mir-Repubblika tal-Poplu taċ-Ċina billi ppubblikat notifika ta' bidu f'Il-Ġurnal Uffiċjali tal-Unjoni Ewropea (2).

(2)

L-investigazzjoni nfetħet wara lment imressaq minn EUROFER (“l-ilmentatur”) f'isem iż-żewġ produtturi tal-Unjoni li jirrappreżentaw 100 % tal-produzzjoni totali tal-planki tal-azzar illaminati bis-sħana fl-Unjoni. L-ilment kien fih evidenza ta' dumping u ta' dannu materjali riżultanti, u dan tqies biżżejjed biex il-bidu tal-investigazzjoni jkun iġġustifikat.

(3)

Fin-notifika ta' bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentatur, lil produtturi magħrufa oħrajn tal-Unjoni, lill-produttur esportatur magħruf u lill-awtoritajiet Ċiniżi, lil importaturi, fornituri u utenti magħrufin, negozjanti, kif ukoll assoċjazzjonijiet li kien magħruf li kienu kkonċernati dwar il-bidu tal-investigazzjoni, u stednithom jieħdu sehem.

(4)

Fit-22 ta' Frar 2019, il-Kummissjoni infurmat lill-partijiet interessati kollha li kienet iddeċidiet li ma timponix miżuri provviżorji fil-każ preżenti, u li tkompli l-investigazzjoni.

(5)

Permezz tal-ittra tal-11 ta' April 2019, l-ilmentatur informa lill-Kummissjoni li huwa rtira l-ilment tiegħu.

(6)

Skont l-Artikolu 9(1) tar-Regolament (UE) 2016/1036, il-proċedimenti jistgħu jintemmu meta jiġi rtirat l-ilment, sakemm dan it-tmiem ma jkunx imur kontra l-interess tal-Unjoni.

(7)

L-investigazzjoni ma kienet żvelat ebda kunsiderazzjoni li turi li terminazzjoni tal-proċediment ma kinitx tkun fl-interess tal-Unjoni. F'dan il-kuntest, il-Kummissjoni nnutat li ma wasal l-ebda kumment mingħand il-partijiet imsemmija fl-Artikolu 21 tar-Regolament bażiku, bħal utenti, importaturi jew konsumaturi, li jindika li dan it-tmiem ma jkunx fl-interess tal-Unjoni. Għalhekk, il-Kummissjoni kkunsidrat li l-investigazzjoni dwar l-importazzjonijiet fl-Unjoni ta' planki tal-azzar illaminati bis-sħana li joriġinaw mir-Repubblika tal-Poplu taċ-Ċina jenħtieġ li tintemm mingħajr determinazzjonijiet formali li jikkonċernaw l-eżistenza jew in-nuqqas ta' dumping u ta' dannu jew dwar kwalunkwe aspett ieħor tal-investigazzjoni.

(8)

Għaldaqstant il-Kummissjoni kkonkludiet li l-proċediment antidumping li jikkonċerna l-importazzjonijiet fl-Unjoni ta' planki tal-azzar illaminati bis-sħana li joriġinaw mir-Repubblika tal-Poplu taċ-Ċina jenħtieġ li tintemm mingħajr l-impożizzjoni tal-miżuri.

(9)

Il-partijiet interessati ġew mgħarrfa b'dan u ngħataw opportunità li jikkummentaw. Madankollu, ma wasal l-ebda kumment mingħand il-partijiet interessati.

(10)

Din id-Deċiżjoni hija konformi mal-opinjoni tal-Kumitat stabbilit mill-Artikolu 15(1) tar-Regolament (UE) 2016/1036.