European flag

Iris Oifigiúil
an Aontais Eorpaigh

GA

Sraith L


2024/2856

13.11.2024

RIALACHÁN (AE) 2024/2856 ÓN gCOIMISIÚN

an 12 Samhain 2024

lena leasaítear Iarscríbhinn I a ghabhann le Rialachán (CE) Uimh. 1334/2008 ó Pharlaimint na hEorpa agus ón gComhairle a mhéid a bhaineann leis an tsubstaint bhlaistithe Beinséin-1,2-dé-ól (FL Uimh. 04.029) a bhaint de liosta an Aontais

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1334/2008 ó Pharlaimint na hEorpa agus ón gComhairle an 16 Nollaig 2008 maidir le blastáin agus maidir le comhábhair áirithe bia a bhfuil airíonna blaistithe acu agus atá le húsáid i mbianna agus ar bhianna agus lena leasaítear Rialachán (CEE) Uimh. 1601/91 ón gComhairle, Rialachán (CE) Uimh. 2232/96 agus Rialachán (CE) Uimh. 110/2008 agus Treoir 2000/13/CE (1), agus go háirithe Airteagal 11(3) de,

Ag féachaint do Rialachán (CE) Uimh. 1331/2008 ó Pharlaimint na hEorpa agus ón gComhairle an 16 Nollaig 2008 lena mbunaítear nós imeachta comhchoiteann údaraithe maidir le breiseáin bia, maidir le heinsímí bia agus maidir le blastáin bia (2), agus go háirithe Airteagal 7(4) de,

De bharr an mhéid seo a leanas:

(1)

Le hIarscríbhinn I a ghabhann le Rialachán (CE) Uimh. 1334/2008 leagtar síos liosta Aontais de bhlastáin agus de bhunábhair a fhormheastar lena n-úsáid i mbianna agus ar bhianna agus coinníollacha a n-úsáide.

(2)

Le Rialachán Cur Chun Feidhme (AE) Uimh. 872/2012 ón gCoimisiún (3), glacadh liosta an Aontais de shubstaintí blaistithe agus tugadh isteach an liosta sin i gCuid A d’Iarscríbhinn I a ghabhann le Rialachán (CE) Uimh. 1334/2008.

(3)

Féadfar an liosta sin a thabhairt cothrom le dáta i gcomhréir leis an nós imeachta comhchoiteann dá dtagraítear in Airteagal 3(1) de Rialachán (CE) Uimh. 1331/2008, ar thionscnamh an Choimisiúin nó tar éis iarratas a fháil ó Bhallstát nó ó pháirtí leasmhar.

(4)

Ar liosta an Aontais de bhlastáin agus de bhunábhair a leagtar síos in Iarscríbhinn I a ghabhann le Rialachán (CE) Uimh. 1334/2008 tá Beinséin-1,2-dé-ól (FL Uimh. 04.029), substaint a liostaíodh ar bhonn measúnú sábháilteachta ón gCoiste Eolaíoch um Bia.

(5)

An 28 Meán Fómhair 2023 ghlac an tÚdarás Eorpach um Shábháilteacht Bia (‘an tÚdarás’) tuairimí maidir le húdaruithe Zesti Smoke code 10 (SF-002) (4), Smoke Concentrate 809045 (SF-003) (5), SmokEz C-10 (SF-005) (6) agus SmokEz Enviro-23 (SF-006) (7) a athnuachan mar tháirgí príomhúla um blastán deataigh a bhfuil Beinséin-1,2-dé-ól (FL Uimh. 04.029) iontu. Sna tuairimí uaidh, mheas an tÚdarás go n-ardaíonn Beinséin-1,2-dé-ól (FL Uimh. 04.029) ceist sábháilteachta mar sainaithníodh a ghéineatocsaineacht in vivo nuair a tugadh de bhéal í.

(6)

I gcomhréir le hAirteagal 4, pointe (a), de Rialachán (CE) Uimh. 1334/2008, ní fhéadfar ach blastáin nach mbaineann riosca sábháilteachta do shláinte na dtomhaltóirí leo a chur ar an margadh, ar bhonn na fianaise eolaíche atá ar fáil. Dá bhrí sin, ba cheart Beinséin-1,2-dé-ól (FL Uimh. 04.029) a bhaint de liosta an Aontais de shubstaintí blaistithe.

(7)

Dá bhrí sin, ba cheart Rialachán (CE) Uimh. 1334/2008 a leasú.

(8)

Agus úsáid íseal na substainte blaistithe sin á cur san áireamh agus chun aistriú rianúil ó na rialacha a bhí ann roimh an Rialachán seo a áirithiú, bianna ar cuireadh Beinséin-1,2-dé-ól (FL Uimh. 04.029) iontu agus a cuireadh ar an margadh san Aontas nó atá ar idirthuras ó thríú tíortha chuig an Aontas roimh theacht i bhfeidhm an Rialacháin seo, ba cheart a cheadú go ndéanfaí iad a mhargú san Aontas go dtí a ndáta íosmharthanachta nó a ndáta éagtha. Níor cheart feidhm a bheith ag an mbeart idirthréimhseach maidir leis an tsubstaint í féin agus le hullmhóidí ar cuireadh an tsubstaint sin iontu agus nach bhfuil sé beartaithe iad a thomhailt mar atá siad, toisc go mbíonn fios ag na monaróirí táirgí bia a bhaineann úsáid as na hullmhóidí sin faoina gcomhdhéanamh nuair a bhíonn siad á n-úsáid.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Leasuithe ar Rialachán (CE) Uimh. 1334/2008

Leasaítear Iarscríbhinn I a ghabhann le Rialachán (CE) Uimh. 1334/2008 i gcomhréir leis an Iarscríbhinn a ghabhann leis an Rialachán seo.

Airteagal 2

Bearta idirthréimhseacha

1.   Maidir le bianna ar cuireadh Beinséin-1,2-dé-ól (FL Uimh. 04.029) iontu agus a cuireadh ar an margadh go dlíthiúil roimh theacht i bhfeidhm an Rialacháin seo, féadfar iad a mhargú go fóill go dtí a ndáta íosmharthanachta nó a ndáta éagtha.

2.   Maidir le bianna a allmhairítear isteach san Aontas agus ar cuireadh Beinséin-1,2-dé-ól (FL Uimh. 04.029) iontu, féadfar iad a mhargú go dtí a ndáta íosmharthanachta nó a ndáta éagtha, más féidir leis an allmhaireoir a léiriú gur seachadadh iad ón tríú tír lena mbaineann agus go raibh siad faoi bhealach chuig an Aontas roimh theacht i bhfeidhm an Rialacháin seo.

3.   Ní bheidh feidhm ag míreanna 1 agus 2 maidir le Beinséin-1,2-dé-ól agus maidir le hullmhóidí a bhfuil an tsubstaint sin iontu agus nach bhfuil sé beartaithe iad a thomhailt mar atá siad.

Chun críocha na míre seo, ciallaíonn ‘ullmhóidí’ meascáin de bhlastáin nó meascáin a bhfuil blastán amháin nó níos mó ná sin agus comhábhair bhia eile iontu, amhail breiseáin bhia, einsímí nó iompróirí, chun a stóráil, a ndíol, a gcaighdeánú, a gcaolú nó a dtuaslagadh a éascú.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Samhain 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 354, 31.12.2008, lch. 34, ELI: http://data.europa.eu/eli/reg/2008/1334/oj.

(2)   IO L 354, 31.12.2008, lch. 1, ELI: http://data.europa.eu/eli/reg/2008/1331/oj.

(3)  Rialachán Cur Chun Feidhme (AE) Uimh. 872/2012 ón gCoimisiún an 1 Deireadh Fómhair 2012 lena nglactar an liosta de shubstaintí blaistithe dá bhforáiltear le Rialachán (CE) Uimh. 2232/96 ó Pharlaimint na hEorpa agus ón gComhairle, lena dtugtar isteach in Iarscríbhinn I a ghabhann le Rialachán (CE) Uimh. 1334/2008 ó Pharlaimint na hEorpa agus ón gComhairle é agus lena n-aisghairtear Rialachán (CE) Uimh. 1565/2000 ón gCoimisiún agus Cinneadh 1999/217/CE ón gCoimisiún (IO L 267, 2.10.2012, lch. 1, ELI: http://data.europa.eu/eli/reg_impl/2012/872/oj).

(4)  Tuairim eolaíoch maidir le húdarú Zesti Smoke Code 10 (SF-002) mar Tháirge Príomhúil um blastán deataigh. EFSA Journal [Iris EFSA] 2023; 21(11): 8364.

(5)  Tuairim eolaíoch maidir le húdarú Smoke Concentrate 809045 (SF-003) mar Tháirge Príomhúil um blastán deataigh. EFSA Journal [Iris EFSA] 2023; 21(11): 8365.

(6)  Tuairim eolaíoch maidir le húdarú SmokEz C-10 (SF-005) mar Tháirge Príomhúil um blastán deataigh. EFSA Journal [Iris EFSA] 2023; 21(11): 8367.

(7)  Tuairim eolaíoch maidir le húdarú SmokEz Enviro-23 (SF-006) mar Tháirge Príomhúil um blastán deataigh. EFSA Journal [Iris EFSA] 2023; 21(11): 8368.


IARSCRÍBHINN

I gCuid A d’Iarscríbhinn I a ghabhann le Rialachán (CE) Uimh. 1334/2008, scriostar an iontráil seo a leanas:

‘04.029

Beinséin-1,2-dé-ól

120-80-9

 

680

 

 

 

an Coiste Eolaíoch um Bia/Comhairle na hEorpa’


ELI: http://data.europa.eu/eli/reg/2024/2856/oj

ISSN 1977-0839 (electronic edition)