|
Iris Oifigiúil |
GA Sraith L |
|
2026/2309 |
19.10.2026 |
RIALACHÁN (AE) 2026/2309 ÓN gCOIMISIÚN
an 16 Deireadh Fómhair 2026
lena leasaítear an Iarscríbhinn a ghabhann le Rialachán (AE) Uimh. 231/2012 lena leagtar síos sonraíochtaí le haghaidh breiseáin bhia a liostaítear in Iarscríbhinní II agus III a ghabhann le Rialachán (CE) Uimh. 1333/2008 ó Pharlaimint na hEorpa agus ón gComhairle, a mhéid a bhaineann le sonraíochtaí le haghaidh gliocóisídí steibhióil a tháirgtear go heinsímeach chun ribidióisíd M a tháirgtear trí thiontú einsímeach a dhéanamh ar eastóscáin duilleog stevia ribidióisíde A ardíonaithe (E 960c(ii)) trí úsáid á bhaint as giosta géinmhodhnaithe K. phaffii CGMCC 7539 a chur leis an Iarscríbhinn sin
(Téacs atá ábhartha maidir le LEE)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (CE) Uimh. 1333/2008 ó Pharlaimint na hEorpa agus ón gComhairle an 16 Nollaig 2008 maidir le breiseáin bia (1), agus go háirithe Airteagal 14 de,
Ag féachaint do Rialachán (CE) Uimh. 1331/2008 ó Pharlaimint na hEorpa agus ón gComhairle an 16 Nollaig 2008 lena mbunaítear nós imeachta comhchoiteann údaraithe maidir le breiseáin bia, maidir le heinsímí bia agus maidir le blastáin bia (2), agus go háirithe Airteagal 7(5) de,
De bharr an mhéid seo a leanas:
|
(1) |
Le Rialachán (AE) Uimh. 231/2012 ón gCoimisiún (3) leagtar síos sonraíochtaí le haghaidh breiseáin bhia a liostaítear in Iarscríbhinní II agus III a ghabhann le Rialachán (CE) Uimh. 1333/2008. |
|
(2) |
Féadfar na sonraíochtaí le haghaidh breiseáin bhia a thabhairt cothrom le dáta i gcomhréir leis an nós imeachta comhchoiteann dá dtagraítear in Airteagal 3(1) de Rialachán (CE) Uimh. 1331/2008, ar thionscnamh an Choimisiúin nó tar éis iarratas a fháil ó Bhallstát nó ó pháirtí leasmhar. |
|
(3) |
An breiseán bia ‘gliocóisídí steibhióil a tháirgtear go heinsímeach’ (E 960c) atá údaraithe faoi láthair, tá sé san áireamh sa ghrúpa ‘gliocóisídí steibhióil (E960a-E960c)’ i gCuid C d’Iarscríbhinn II a ghabhann le Rialachán (CE) Uimh. 1333/2008. |
|
(4) |
Foráiltear le Rialachán (AE) Uimh. 231/2012 go dtáirgtear ‘ribidióisíd M a tháirgtear trí thiontú einsímeach a dhéanamh ar eastóscáin duilleog stevia ribidióisíde A ardíonaithe’ (E 960c(ii)) trí úsáid a bhaint as trasfaráis UDP-glúcóisile agus einsímí siontáise siúcróise arna dtáirgeadh ag na tréithchineálacha géinmhodhnaithe de E. coli (pPM294, pFAF170 agus pSK401). |
|
(5) |
An 22 Nollaig 2022 cuireadh iarratas faoi bhráid an Choimisiúin ar leasú ar na sonraíochtaí le haghaidh ribidióisíd M a tháirgtear trí mhodhnú einsímeach a dhéanamh ar ghliocóisídí steibhióil ó stevia (E 960c(i)) chun ribidióisíd M a tháirgtear trí bhith-thiontú einsím-chatalaithe trí úsáid a bhaint as giosta géinmhodhnaithe K. phaffii CGMCC 7539 a chur leis na sonraíochtaí sin. Mar sin féin, le linn an mheasúnaithe riosca, rinne an t-iarratasóir athbhreithniú ar a mholadh bunaidh agus d’iarr sé go leasófaí na sonraíochtaí le haghaidh Ribidióisíd M a tháirgtear trí thiontú einsímeach a dhéanamh ar eastóscáin duilleog stevia ribidióisíde A ardíonaithe (E 960c(ii)) ina ionad sin. Chuir an Coimisiún an t-iarratas ar fáil do na Ballstáit de bhun Airteagal 4 de Rialachán (CE) Uimh. 1331/2008. |
|
(6) |
Sa tuairim a foilsíodh an 14 Bealtaine 2025 (4), rinne an tÚdarás Eorpach um Shábháilteacht Bia (‘an tÚdarás’) meastóireacht ar shábháilteacht an leasaithe atá beartaithe ar na sonraíochtaí le haghaidh ribidióisíd M a tháirgtear trí bhith-thiontú einsím-chatalaithe trí úsáid a bhaint as giosta géinmhodhnaithe K. phaffii CGMCC 7539. Tháinig an tÚdarás ar an gconclúid nach bhfuil aon ábhar imní sábháilteachta ann maidir leis an leasú atá beartaithe ar shonraíochtaí E 960c(i) nó E 960c(ii) san Iarscríbhinn a ghabhann le Rialachán (AE) Uimh. 231/2012 a bhaineann le húsáid an tréithchineáil ghéinmhodhnaithe K. phaffii CGMCC 7539 i bpróiseas monaraíochta an bhreiseáin bia Ribidióisíd M a tháirgtear trí bhith-thiontú einsím-chatalaithe. Mheas an tÚdarás gur faoi shainchúram na mbainisteoirí riosca atá sé a chinneadh ar cheart leasú ar shonraíochtaí E 960c(i) nó E 960c(ii) atá ann cheana a theacht chun cinn mar thoradh ar na hathruithe atá beartaithe ar na sonraíochtaí. Ina theannta sin, mhol an tÚdarás iontráil shonrach a thabhairt isteach le haghaidh aigéad caimhréanóch sna sonraíochtaí atá beartaithe. |
|
(7) |
Dá bhrí sin, ba cheart an Iarscríbhinn a ghabhann le Rialachán (AE) Uimh. 231/2012 a leasú dá réir. |
|
(8) |
Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha, |
TAR ÉIS AN RIALACHÁN SEO A GHLACADH:
Airteagal 1
Leasaítear an Iarscríbhinn a ghabhann le Rialachán (AE) Uimh. 231/2012 i gcomhréir leis an Iarscríbhinn a ghabhann leis an Rialachán seo.
Airteagal 2
Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, an 16 Deireadh Fómhair 2026.
Thar ceann an Choimisiúin
An tUachtarán
Ursula VON DER LEYEN
(1) IO L 354, 31.12.2008, lch. 16, ELI: http://data.europa.eu/eli/reg/2008/1333/oj.
(2) IO L 354, 31.12.2008, lch. 1, ELI: http://data.europa.eu/eli/reg/2008/1331/oj.
(3) Rialachán (AE) Uimh. 231/2012 ón gCoimisiún an 9 Márta 2012 lena leagtar síos sonraíochtaí le haghaidh breiseáin bhia a liostaítear in Iarscríbhinní II agus III a ghabhann le Rialachán (CE) Uimh. 1333/2008 ó Pharlaimint na hEorpa agus ón gComhairle (IO L 83, 22.3.2012, lch. 1, ELI: http://data.europa.eu/eli/reg/2012/231/oj).
(4) Painéal EFSA maidir le Breiseáin Bhia agus Blastáin ‘Sábháilteacht an leasaithe atá beartaithe ar shonraíochtaí an bhreiseáin bia E960c(i) nó E960c(ii)’, EFSA Journal [Iris EFSA], 2025;23:e9396, https://doi.org/10.2903/j.efsa.2025.9396.
IARSCRÍBHINN
San Iarscríbhinn a ghabhann le Rialachán (AE) Uimh. 231/2012, leasaítear an iontráil a bhaineann le Ribidióisíd M a tháirgtear trí thiontú einsímeach a dhéanamh ar eastóscáin duilleog stevia ribidióisíde A ardíonaithe E 960c(ii) mar a leanas:
|
(1) |
cuirtear an méid seo a leanas in ionad na sonraíochta ‘Sainmhíniú’:
|
|
(2) |
sa tsonraíocht ‘Íonacht’, cuirtear an iontráil seo a leanas isteach i ndiaidh na hiontrála a bhaineann le ‘Tuaslagóir iarmharach’:
|
ELI: http://data.europa.eu/eli/reg/2026/2309/oj
ISSN 1977-0839 (electronic edition)