(1)

Bir-Regolament (KE) Nru 925/2009 (2), il-Kunsill impona dazju anti-dumping definittiv fuq l-importazzjonijiet ta’ ċerti fuljetti tal-aluminju li joriġinaw, inter alia, fir-Repubblika Popolari taċ-Ċina (“ir-RPĊ”) (“il-miżuri eżistenti”).

(2)

Fl-24 ta’ Settembru 2012, il-Kummissjoni Ewropea (“il-Kummissjoni”) irċeviet talba skont l-Artikolu 13(3) u 14(5) tar-Regolament bażiku biex tinvestiga l-allegata ċirkomvenzjoni tal-miżuri eżistenti u biex tagħmel l-importazzjonijiet tal-fuljetta tal-aluminju ta’ ħxuna ta’ mhux inqas minn 0,008 mm u mhux aktar minn 0,018 mm, mingħajr appoġġ, mhux maħduma aktar milli rrumblati, f’rombli li mhumiex annellati, ta’ wisgħa aktar minn 650 mm u piż ta’ aktar minn 10 kg u li attwalment jaqgħu taħt il-kodiċi NM ex 7607 11 19 (kodiċi TARIC 7607 11 19 20), li joriġinaw fir-Repubblika Popolari taċ-Ċina (“il-prodott li qed jiġi investigat”) suġġetti għal reġistrazzjoni.

(3)

It-talba tressqet minn Symetal SA, Eurofoil Lussemburgu SA, Alcomet u Hydro Aluminium Rolled Products GmbH, erba’ produtturi tal-Unjoni tal-fuljetti tal-aluminju.

(4)

It-talba kienet tinkludi evidenza prima facie li l-miżuri eżistenti qegħdin jiġu ċirkomvalati permezz ta’ importazzjonijiet tal-prodott taħt investigazzjoni u l-konverżjoni sussegwenti tiegħu f’fuljetta tal-aluminju f’rombli b’wisa’ ta’ mhux aktar minn 650 mm, li huwa l-prodott soġġett għall-miżuri eżistenti.

(5)

Skont l-Artikolu 13(3) u l-Artikolu 14(5) tar-Regolament bażiku, il-Kummissjoni, wara konsultazzjoni mal-Kumitat Konsultattiv, permezz tar-Regolament (UE) Nru 973/2012 (3) bdiet investigazzjoni u tat struzzjonijiet lill-awtoritajiet tad-dwana biex jirreġistraw l-importazzjonijiet tal-prodott li qed jiġi investigat.

(6)

Intbagħtu kwestjonarji lil disa’ produtturi esportaturi u lill-awtoritajiet fir-RPĊ. La l-produtturi esportaturi u lanqas l-awtoritajiet fir-RPĊ ma ppreżentaw ruħhom u ressqu xi tweġiba għall-kwestjonarju. Il-kwestjonarji ntbagħtu wkoll lil sittax-il importatur fl-Unjoni. Importatur wieħed biss ippreżenta ruħu iżda ma weġibx il-kwestjonarju.

(7)

Permezz tal-ittri tat-3 u l-4 ta’ April 2013 indirizzati lill-Kummissjoni, l-erba’ produtturi tal-Unjoni irtiraw formalment it-talba tagħhom biex tiġi investigata l-allegata ċirkomvenzjoni tal-miżuri eżistenti.

(8)

Skont l-Artikolu 9(1) u l-Artikolu 13(3) tar-Regolament bażiku, l-investigazzjoni tista’ tiġi tterminata meta jiġi rtirat l-ilment, sakemm din it-terminazzjoni ma tkunx fl-interess tal-Unjoni.

(9)

Il-Kummissjoni qieset li l-investigazzjoni attwali għandha tiġi tterminata billi l-investigazzjoni ma żvelat xejn li juri li tali terminazzjoni ma tkunx fl-interess tal-Unjoni. Il-partijiet interessati ġew infurmati b’dan u ngħataw l-opportunità li jikkummentaw. Ma tressqu ebda kummenti li jindikaw li dan it-tmiem ma jkunx fl-interess tal-Unjoni.

(10)

Il-Kummissjoni għaldaqstant waslet għall-konklużjoni li l-investigazzjoni dwar iċ-ċirkomvenzjoni possibbli tal-miżuri anti-dumping imposti fuq l-importazzjonijiet ta’ ċerta fuljetta tal-aluminju li joriġinaw fir-Repubblika Popolari taċ-Ċina bl-importazzjonijiet ta’ ċerta fuljetta tal-aluminju f’rombli li mhumiex annellati u ta’ wisa’ li taqbeż is-650 mm li joriġinaw mir-Repubblika Popolari taċ-Ċina, għandha tiġi tterminata.

(11)

Ir-reġistrazzjoni ta’ importazzjonijiet tal-prodott li qed jiġi investigat li ġiet introdotta mir-Regolament (UE) Nru 973/2012 għalhekk għandha titwaqqaf u r-Regolament (UE) Nru 973/2012 għandu jitħassar,