Relatur:

Philip VON BROCKDORFF

Korelatur:

Antonio GARCÍA DEL RIEGO

Konsulenti	Christian M. STIEFMUELLER (għar-relatur) Sebastien DE BROUWER (għall-korelatur)
Deċiżjoni tal-Assemblea Plenarja	18.1.2024
Bażi legali	Artikolu 52(2) tar-Regoli ta’ Proċedura
Sezzjoni kompetenti	Sezzjoni għall-Unjoni Ekonomika u Monetarja u l-Koeżjoni Ekonomika u Soċjali
Adozzjoni fis-sezzjoni	6.11.2024
Adozzjoni fis-sessjoni plenarja	4.12.2024
Sessjoni plenarja Nru	592
Riżultat tal-votazzjoni (favur/kontra/astensjonijiet)	145/0/3

1.   Konklużjonijiet u rakkomandazzjonijiet

1.1.

Il-KESE jemmen li jekk il-funzjonament tas-suq tat-titolizzazzjoni jkompli jittejjeb, dan jista’ jwessa’ l-opportunitajiet ta’ investiment għall-investituri u jespandi l-aċċess għall-kreditu għall-unitajiet domestiċi u n-negozji. It-titolizzazzjoni tista’ tgħin biex tavvanza l-Unjoni tas-Swieq Kapitali billi tiffaċilita l-ħolqien ta’ aggregazzjonijiet profondi ta’ likwidità, ittejjeb l-aċċess dirett u indirett għas-swieq, u tkompli tneħħi l-ostakli li jfixklu l-fluss transfruntier tal-kapital.

1.2.

L-isforzi biex tiġi stimulata t-titolizzazzjoni fl-UE għandhom jikkonċentraw fuq il-produzzjoni ta’ benefiċċji dimostrabbli f’termini ta’ finanzjament addizzjonali għall-ekonomija reali, b’mod partikolari għall-unitajiet domestiċi u n-negozji. It-titolizzazzjoni għandu jkollha rwol komplementari għal strumenti oħra ta’ kapital tad-dejn, bħal bonds koperti, billi tipprovdi għażliet ta’ rifinanzjament għal ċerti kategoriji ta’ assi, kif ukoll għodda għall-ġestjoni tar-riskju. It-titolizzazzjoni tista’ tintuża wkoll biex jiġi lliberat il-kapital bankarju biex isir self ġdid lill-ekonomija reali jew distribuzzjonijiet lill-investituri.

1.3.

Il-KESE jinnota li t-titolizzazzjoni ġiet identifikata bħala sors potenzjali ta’ finanzjament addizzjonali li jkopri l-ħtiġijiet sostanzjali ta’ investiment tat-tranżizzjoni ekoloġika. L-estensjoni tar-rekwiżiti ta’ divulgazzjoni eżistenti dwar is-sostenibbiltà (eż. għal klassijiet oħrajn ta’ assi) jew l-introduzzjoni ta’ qafas iddedikat għat-“titolizzazzjoni ekoloġika” jistgħu jżidu l-valur għall-investituri li japprezzaw li jkollhom tali informazzjoni biex ikejlu s-sehem tagħhom stess ta’ investimenti ambjentali, soċjali u ta’ governanza, biex jivvalutaw ir-riskji relatati mal-kriterji ambjentali, soċjali u ta’ governanza, u bħala għodda ta’ tqabbil.

1.4.

It-titolizzazzjoni tradizzjonali b’mod partikolari għandha l-potenzjal li timmobilizza finanzjament addizzjonali mis-swieq kapitali. Il-KESE jirrakkomanda li jiġi vvalutat għaliex it-titolizzazzjonijiet tradizzjonali għandhom irkupru komparattivament dgħajjef fis-suq, u li jiġu esplorati l-possibbiltajiet għal aktar żvilupp tas-suq tat-titoli garantiti b’assi għal ċerti kategoriji ta’ assi. Il-progress fl-armonizzazzjoni (eż. tal-liġi kuntrattwali u tal-insolvenza u t-tassazzjoni) ikun importanti biex tittejjeb il-fattibbiltà tal-akkomunament transfruntier u l-ħruġ ta’ titoli bħal dawn.

1.5.

Hija rrakkomandata valutazzjoni tas-suq tat-titolizzazzjoni, b’mod partikolari dwar l-infrastruttura tas-suq, il-likwidità, l-effiċjenza u t-trasparenza, biex dawn l-istrumenti jsiru aktar attraenti mingħajr ma tiġi kompromessa l-istabbiltà finanzjarja. Għandhom jiġu esplorati wkoll aktar aġġustamenti fil-qafas regolatorju rigward ir-rapportar u r-rekwiżiti ta’ diliġenza dovuta, kif ukoll sforzi biex jiġu ssemplifikati l-mudelli ta’ divulgazzjoni tal-Awtorità Ewropea tat-Titoli u s-Swieq (ESMA).

1.6.

Il-KESE jinnota li t-trattament prudenzjali tal-esponiment tat-titolizzazzjoni mill-banek u l-kumpaniji tal-assigurazzjoni huwa rregolat fil-biċċa l-kbira minn standards internazzjonali. Huwa jinnota wkoll li l-Bord għall-Istabbiltà Finanzjarja dan l-aħħar nieda konsultazzjoni mal-partijiet ikkonċernati biex tiġi evalwata l-effettività ta’ dan il-qafas regolatorju. Il-KESE huwa tal-fehma li l-UE għandha tikkoopera mill-qrib mal-imsieħba internazzjonali tagħha f’din l-evalwazzjoni.

1.7.

Il-KESE jinnota li jista’ jkun utli li l-proċess jiġi ssemplifikat aktar kull meta jkun possibbli, pereżempju billi jitnaqqsu l-perjodi ta’ żmien u jiġu standardizzati u armonizzati aktar ir-rekwiżiti biex jiġi rikonoxxut trasferiment tar-riskju sinifikanti. Madankollu, l-awtoritajiet għandhom ikomplu jimmonitorjaw bir-reqqa fejn jitqassmu dawn ir-riskji sabiex tiġi evitata konċentrazzjoni ta’ riskji sistemiċi, kemm fis-settur bankarju kif ukoll fost l-intermedjarji finanzjarji mhux bankarji.

1.8.

Il-KESE jirrakkomanda li l-istituzzjonijiet tal-UE jwettqu valutazzjonijiet bl-għan li jesploraw titjib potenzjali f’termini ta’ infrastruttura tas-suq, likwidità, effiċjenza u trasparenza sabiex l-istrumenti ta’ titolizzazzjoni jsiru aktar attraenti għall-investituri istituzzjonali potenzjali mingħajr ma tiġi kompromessa l-istabbiltà finanzjarja. Ir-riformi kollha għandhom ikunu mmirati biex iżidu l-finanzjament tal-ekonomija reali bil-ħsieb li jitrawmu t-tkabbir ekonomiku u l-ħolqien tal-impjiegi, kull fejn ikun possibbli. Il-KESE jistieden lill-Kummissjoni tiżgura li l-evalwazzjonijiet kontinwi tal-implimentazzjoni tal-qafas regolatorju dwar it-titolizzazzjoni jinkludu analiżi tal-impatt fuq il-finanzjament tal-ekonomija reali.

2.   Sfond

2.1.

It-titolizzazzjoni tikkontribwixxi għall-allokazzjoni tal-kapital lin-negozji u lill-unitajiet domestiċi b’mod indirett, primarjament billi tippermetti lill-banek jittrasferixxu ċerti skoperturi għar-riskju tal-kreditu għall-investituri. It-titolizzazzjoni tinkludi żewġ strumenti differenti: dak tradizzjonali (“flus kontanti” jew “bejgħ veru”) u dak sintetiku. Id-differenza teknika ewlenija hija li fit-titolizzazzjoni tradizzjonali, l-assi attwali jinbiegħu lill-investituri, filwaqt li fit-titolizzazzjoni sintetika, il-bank iżomm l-assi iżda jittrasferixxi r-riskju lill-investituri istituzzjonali permezz ta’ garanziji finanzjarji u derivattivi ta’ kreditu.

2.2.

Il-Kunsill Ewropew (1), ir-rapport ta’ Letta (2) u dak ta’ Draghi (3), u l-ESMA (4) kollha enfasizzaw il-ħtieġa li jitnieda mill-ġdid is-suq tat-titolizzazzjoni, kemm biex tiżdied il-kompetittività tal-UE, biex jiġu żviluppati s-swieq kapitali tal-UE jew biex tiżdied il-kapaċità ta’ finanzjament tal-banek. Din l-Opinjoni għandha l-għan li tippromovi rieżami tal-qafas legali għat-titolizzazzjoni fl-UE b’mod li jtejjeb il-kompetittività tal-ekonomija tal-UE u l-kundizzjonijiet tax-xogħol fis-suq tax-xogħol Ewropew, filwaqt li tinżamm l-istabbiltà finanzjarja.

2.3.

Fl-2022, it-total tal-ħruġ ġdid ta’ titolizzazzjonijiet fl-UE laħaq EUR 135 biljun, u l-valur nominali totali tat-titotlizzazzjonijiet pendenti kien stmat għal EUR 930 biljun (5). Fiż-żewġ parametri, is-suq jibqa’ taħt il-livell massimu tiegħu tal-2008 b’mod sinifikanti. Il-Kumitat Konġunt tal-Awtoritajiet Superviżorji Ewropej (6) osserva li l-introduzzjoni tar-Regolament dwar it-Titolizzazzjoni u l-qafas prudenzjali fl-2019 kienu rriżultaw f’suq li kien iżgħar iżda ta’ kwalità ogħla, u li l-livelli ta’ qabel il-kriżi ma għandhomx jintgħażlu bħala punt ta’ riferiment. Madankollu, huwa nnota li s-suq ta’ wara l-kriżi ma laħaqx l-objettiv li jiġu ġġenerati EUR 100-150 biljun ta’ finanzjament addizzjonali. It-titolizzazzjoni tradizzjonali b’mod partikolari kienet aktar baxxa mit-titolizzazzjoni sintetika, li esperjenzat tkabbir qawwi f’dawn l-aħħar snin wara li f’April 2021 it-tranżazzjonijiet sintetiċi ġew inklużi fil-qafas sempliċi, trasparenti u standardizzat (7).

2.4.

Id-data disponibbli mill-ESMA (8) u l-Assoċjazzjoni għas-Swieq Finanzjarji fl-Ewropa (9) tindika li s-swieq tat-titolizzazzjoni fl-UE huma eteroġeni u frammentati skont il-linji nazzjonali, bi 80 % tal-ħruġ ta’ titolizzazzjoni kkonċentrati f’erba’ Stati Membri (10). Il-frammentazzjoni tas-suq tnaqqas il-potenzjal għall-oriġinaturi u l-emittenti li jiksbu ekonomiji ta’ skala, u tillimita l-likwidità tas-suq għall-investituri. Għat-titolizzazzjonijiet tradizzjonali, il-gruppi ta’ assi għandhom it-tendenza li jkunu kkonċentrati f’pajjiż wieħed, u l-klassijiet tal-assi titolizzati jvarjaw bejn il-pajjiżi. Dawn id-differenzi huma attribwibbli għal varjetà ta’ fatturi, inklużi l-ispeċifiċitajiet tal-ekonomiji nazzjonali u s-swieq kapitali, it-tassazzjoni differenti, il-liġi korporattiva u r-reġimi tal-insolvenza, u d-disponibbiltà ta’ strumenti ta’ finanzjament alternattivi, bħall-bonds koperti. S’issa, il-kontribut tat-titolizzazzjoni għall-aċċess ta’ aggregazzjonijiet inkrementali ta’ kapital hija moderata: b’differenza għal swieq oħra, il-banek tal-UE stess ikomplu jkunu l-akbar detenturi ta’ titolizzazzjonijiet b’marġni kbir, bil-maġġoranza tal-volum maħruġ fl-2023 miżmum mill-emittenti, prinċipalment biex jintuża bħala kollaterali f’operazzjonijiet tal-bank ċentrali (11).

2.5.

F’ħafna Stati Membri tal-UE, is-self kollateralizzat jiġi ffinanzjat mill-ġdid bl-użu ta’ strumenti alternattivi, b’mod partikolari bonds koperti. Sa tmiem l-2022, l-akbar tliet emittenti globali ta’ bonds koperti huma d-Danimarka, il-Ġermanja u Franza (12). B’paragun ma’ dan, fl-Istati Uniti, il-bonds koperti ma għandhomx rwol sinifikanti, b’mod partikolari minħabba r-rwol tat-titolizzazzjoni appoġġjata minn aġenzija f’ipoteki residenzjali. It-titolizzazzjoni u l-bonds koperti jikkondividu strutturi simili, iżda jvarjaw ukoll f’diversi aspetti, bħall-profil tar-riskju u l-użu. Id-differenzi fil-profil tar-riskju huma riflessi wkoll fit-trattament prudenzjali tagħhom. Madankollu, il-KESE jinnota li l-bonds koperti ma jippermettux lill-banek jilliberaw il-kapital, pereżempju biex jagħtu self ġdid jew distribuzzjonijiet lill-investituri, peress li r-riskju ta’ kreditu tas-self kopert jibqa’ fil-karta bilanċjali tal-bank emittenti.

2.6.

Is-suq tal-Istati Uniti għat-titolizzazzjonijiet għadu sostanzjalment akbar minn dak fl-UE. Din id-differenza hija attribwibbli primarjament għall-ispeċifiċitajiet strutturali, eż. id-disponibbiltà ta’ strumenti alternattivi ta’ finanzjament, bħal bonds koperti fl-Ewropa, u l-preżenza ta’ aġenziji ta’ finanzjament ipotekarju sponsorjati mill-gvern fl-Istati Uniti, li jinsabu wara l-maġġoranza l-kbira (80 %) ta’ titoli abbażi ta’ ipoteka (13). Minbarra l-ħruġ appoġġjat mill-aġenziji, l-ammont totali ta’ titolizzazzjoni pendenti fl-Istati Uniti jammonta għal madwar 8 % tal-kreditu kollu tas-settur privat, meta mqabbel ma’ madwar 5 % fir-Renju Unit, madwar 4 % fl-UE, u madwar 3 % fil-Ġappun (14).

3.   Kummenti ġenerali

3.1.

Il-KESE jemmen li t-titolizzazzjoni jista’ jkollha impatt pożittiv fuq it-tlestija tal-Unjoni tas-Swieq Kapitali. Filwaqt li t-titolizzazzjoni ma tistax tissostitwixxi l-iżvilupp ta’ swieq Ewropej aktar profondi u integrati għad-dejn korporattiv u t-titoli ta’ ekwità, li jiddependu mill-kisba ta’ diversi objettivi fit-tul (eż. il-promozzjoni ta’ kultura ta’ ekwità, l-integrazzjoni tas-swieq u l-infrastrutturi tat-titoli, l-armonizzazzjoni tal-liġijiet korporattivi u tat-taxxa), it-titolizzazzjoni tista’ sservi bħala strument biex is-swieq kapitali jiġu konnessi mal-finanzjament tad-dejn korporattiv, u f’xi swieq, tespandi l-aċċess għall-kreditu għall-unitajiet domestiċi. Barra minn hekk, il-kultivazzjoni ta’ aggregazzjonijiet profondi ta’ likwidità, it-titjib tal-aċċess dirett u indirett għas-swieq għall-investituri, u t-tkomplija tat-tneħħija tal-ostakli li jfixklu l-fluss transfruntier tal-kapital huma rilevanti ħafna biex tiġi avvanzata l-Unjoni tas-Swieq Kapitali.

3.2.

Filwaqt li hemm qbil ġenerali li r-riformi ta’ wara l-kriżi tal-qafas prudenzjali għall-banek kienu ġġustifikati u meħtieġa biex jiġu indirizzati r-riskji sistemiċi, il-KESE jinnota, madankollu, li valutazzjoni tal-effettività tal-qafas legali fis-seħħ hija xierqa. Il-KESE jinnota wkoll li l-istandards internazzjonali dwar din il-kwistjoni bħalissa huma soġġetti għal evalwazzjoni mill-Bord għall-Istabbiltà Finanzjarja. Il-KESE jqis li l-kalibrazzjoni mill-ġdid tar-rekwiżiti prudenzjali, waħedha, ma tiżgurax l-irkupru tas-suq tat-titolizzazzjoni (15), u jirrakkomanda li kwalunkwe kalibrazzjoni mill-ġdid tat-trattament prudenzjali tat-titolizzazzjoni għandha tkun ibbażata fuq l-evalwazzjoni magħmula minn esperti maħtura mill-istituzzjonijiet rilevanti, u għandha torbot b’mod effettiv ir-rekwiżiti ta’ kapital mar-riskju. Barra minn hekk, jistgħu jiġu esplorati aġġustamenti oħra għall-qafas regolatorju, bħal rapportar semplifikat, żvelar u rekwiżiti ta’ diliġenza dovuta, inklużi l-mudelli ta’ divulgazzjoni tal-ESMA, dment li s-salvagwardji msemmija hawn fuq jiġu rispettati.

3.3.

Il-KESE jirrakkomanda li r-regolaturi, is-superviżuri u l-parteċipanti fis-suq jimmonitorjaw fejn jitqassmu r-riskji. Sar progress sinifikanti mill-2008-2009, speċjalment fir-rigward tas-superviżjoni tal-aġenziji tal-klassifikazzjoni u, sa ċertu punt, tal-intermedjarji finanzjarji mhux bankarji. Madankollu, għadhom jeżistu vulnerabbiltajiet sistemiċi. B’mod partikolari, l-akkumulazzjoni ta’ riskji relatati mat-titolizzazzjoni f’oqsma inqas sorveljati tal-katina tal-intermedjazzjoni għandha tiġi evitata. Is-superviżuri għandhom ukoll jikkooperaw aktar mill-qrib, pereżempju billi jiġbru u jiskambjaw data rilevanti u valutazzjonijiet tar-riskju.

3.4.

Il-KESE jtenni li l-isforzi biex tiġi stimulata t-titolizzazzjoni fl-UE għandhom jikkonċentraw fuq il-produzzjoni ta’ benefiċċji dimostrabbli f’termini ta’ finanzjament addizzjonali għall-ekonomija reali, b’mod partikolari għall-unitajiet domestiċi u n-negozji. Il-miżuri min-naħa tal-provvista u min-naħa tad-domanda jenħtieġ li jingħataw attenzjoni ugwali sabiex jiġu żviluppati swieq b’saħħithom u sostenibbli. Meta jiġu kkunsidrati l-inċentivi biex tiġi promossa t-titolizzazzjoni, jenħtieġ li jitqiesu kemm id-differenzi fil-profili tar-riskju tat-titoli strutturati kif ukoll l-istrumenti eżistenti tas-suq kapitali tad-dejn. Għandha tiġi vvalutata bir-reqqa d-dupplikazzjoni possibbli ma’ swieq stabbiliti u li jiffunzjonaw tajjeb li diġà jikkontribwixxu għall-finanzjament tal-ekonomija tal-UE, bħal bonds koperti għal self ipotekarju. F’dan ir-rigward, it-titolizzazzjoni għandu jkollha rwol komplementari flimkien ma’ strumenti oħra tad-dejn tas-suq kapitali, bħal bonds koperti, billi tipprovdi għażliet ta’ rifinanzjament għal ċerti kategoriji ta’ assi, kif ukoll għodda għall-ġestjoni tar-riskju.

3.5.

Il-KESE jirrakkomanda li l-istituzzjonijiet tal-UE jwettqu vallutazzjoni biex jiġi esplorat titjib potenzjali f’termini ta’ infrastruttura tas-suq, likwidità, effiċjenza u trasparenza sabiex l-istrumenti ta’ titolizzazzjoni jsiru aktar attraenti għall-investituri istituzzjonali potenzjali mingħajr ma tiġi kompromessa l-istabbiltà finanzjarja. Ir-riformi kollha għandhom ikunu mmirati biex iżidu l-finanzjament tal-ekonomija reali bil-ħsieb li jitrawmu t-tkabbir ekonomiku u l-ħolqien tal-impjiegi, kull fejn ikun possibbli. Il-KESE jistieden lill-Kummissjoni tiżgura li l-evalwazzjonijiet kontinwi tal-implimentazzjoni tal-qafas regolatorju dwar it-titolizzazzjoni jinkludu analiżi tal-impatt fuq il-finanzjament tal-ekonomija reali.

3.6.

Fir-rigward tat-trattament prudenzjali, il-KESE jinnota li t-trattament prudenzjali tal-esponimenti tat-titolizzazzjoni mill-banek u l-kumpaniji tal-assigurazzjoni huwa rregolat fil-biċċa l-kbira minn standards internazzjonali. Huwa jinnota wkoll li l-Bord għall-Istabbiltà Finanzjarja dan l-aħħar nieda konsultazzjoni mal-partijiet ikkonċernati biex tiġi evalwata l-effettività ta’ dan il-qafas regolatorju. Il-KESE huwa tal-fehma li l-UE għandha tikkoopera mill-qrib mal-imsieħba internazzjonali tagħha f’din l-evalwazzjoni. Il-KESE jinnota wkoll li l-assiguraturi Ewropej huma biss marġinalment involuti bħala investituri fis-suq tat-titolizzazzjoni. Din ix-xejra tista’ tiġi spjegata parzjalment mill-kalibrazzjoni tar-rekwiżiti regolatorji. Il-KESE għalhekk jilqa’ reviżjoni mill-Awtorità Ewropea tal-Assigurazzjoni u l-Pensjonijiet tax-Xogħol, kif ġie ssuġġerit reċentement mill-President tagħha (16).

3.7.

Il-KESE huwa konxju tar-restrizzjonijiet rigward il-potenzjal tat-titolizzazzjoni tradizzjonali biex jiġi mobilizzat finanzjament inkrementali għall-SMEs. Il-limitazzjonijiet prattiċi inerenti (il-volumi tal-ħruġ u d-disponibbiltà u l-eteroġeneità tal-kollateral disponibbli) illimitaw id-daqs u r-rilevanza ta’ dan is-suq. Is-self lill-SMEs wera li huwa kollateral inqas adatt għal ħruġ ekonomikament sinifikanti ta’ titoli abbażi ta’ assi: il-kollateral huwa skars u spiss ikollu ftit jew l-ebda użu alternattiv; id-durata mhix standardizzata u spiss qasira; u t-termini u l-kundizzjonijiet huma mfassla apposta. Il-KESE jirrakkomanda li jiġi vvalutat għaliex it-titolizzazzjonijiet tradizzjonali raw irkupru dgħajjef meta mqabbla mat-titolizzazzjoni sintetika, u kif jista’ jiġi żviluppat aktar is-suq tat-titoli abbażi tal-assi, b’mod partikolari għal portafolli akbar u transfruntiera ta’ self tal-SMEs. Il-progress fl-armonizzazzjoni, pereżempju tal-liġi kuntrattwali u tal-insolvenza u t-tassazzjoni, ikun prerekwiżit biex tittejjeb il-fattibbiltà tal-akkomunament transfruntier u l-ħruġ ta’ titoli bħal dawn.

4.   Kummenti speċifiċi

4.1.

Il-KESE huwa tal-fehma li l-istimulazzjoni tas-suq tat-titolizzazzjoni jista’ jkun mod kif jitwessgħu l-opportunitajiet ta’ investiment għall-investituri u tingħata spinta lis-self lill-unitajiet domestiċi u lin-negozji tal-Ewropa. Jemmen ukoll li t-“titolizzazzjoni ekoloġika” b’mod partikolari jista’ jkollha rwol pożittiv fil-finanzjament tat-tranżizzjoni ekoloġika, pereżempju biex jiġi ffinanzjat mill-ġdid is-self għar-rinnovazzjoni tal-proprjetà u biex jiżdied l-investiment fil-mobbiltà u l-enerġija. Il-qafas attwali jimponi biss obbligu limitat fuq l-oriġinaturi ta’ tranżazzjonijiet ta’ titolizzazzjoni biex jagħmlu divulgazzjonijiet dwar is-sostenibbiltà. L-estensjoni tar-rekwiżiti eżistenti ta’ divulgazzjoni ambjentali, soċjali u ta’ governanza għal klassijiet oħrajn ta’ assi b’mod proporzjonat jew l-introduzzjoni ta’ qafas iddedikat għat-“titolizzazzjoni ekoloġika” jistgħu jżidu l-valur għall-investituri li japprezzaw li jkollhom tali informazzjoni biex ikejlu s-sehem tagħhom stess ta’ investimenti ambjentali, soċjali u ta’ governanza, biex jivvalutaw ir-riskji relatati mal-kriterji ambjentali, soċjali u ta’ governanza, u bħala għodda ta’ tqabbil.

4.2.

Il-KESE jsostni li r-reviżjonijiet futuri tal-qafas regolatorju għandhom jinkludu kunsiderazzjonijiet bir-reqqa: a) tal-problema tal-aġenzija inerenti fil-mudell “oriġina u ddistribwixxi” (17); u b) tar-riskji sistemiċi, bħar-riskji ta’ konċentrazzjoni. Tali kunsiderazzjonijiet għandhom ikunu bbażati fuq evidenza empirika adegwata biss, u jitwettqu f’konformità mar-rakkomandazzjonijiet ta’ dawk li jistabbilixxu l-istandards internazzjonali, filwaqt li jindirizzaw ukoll l-ispeċifiċitajiet Ewropej.

4.3.

It-titoli strutturati jinkludu portafolli kbar ta’ assi, li jagħmluha diffiċli għall-investituri biex jivvalutaw il-kwalità tagħhom fid-dettall. Huma strutturati ħafna (“segmentazzjoni”), jiġifieri jiddependu mis-suppożizzjonijiet tal-oriġinatur dwar il-kwalità tal-assi u l-fluss tal-flus, espressi f’mudelli kkumplikati ta’ “kaskata”. L-investituri jridu jwettqu diliġenza dovuta estensiva jew jiddependu minn klassifikazzjonijiet ipprovduti mill-aġenziji tal-klassifikazzjoni. L-aġenziji tal-klassifikazzjoni jibqgħu jitħallsu mill-oriġinatur. Il-kunflitti ta’ interess, li jistgħu jkunu riżultat ta’ dan u li kienu wieħed mill-fatturi kontributuri ewlenin tal-kriżi finanzjarja globali, ġew identifikati għal darb’oħra bħala riskju potenzjali mill-ESMA fir-rapport reċenti tagħha dwar il-ħruġ ta’ obbligu kollateralizzat ta’ self (18). Il-KESE jirrakkomanda li jitqiesu dawn il-kunsiderazzjonijiet, b’mod partikolari meta jiġu vvalutati l-fattibbiltà u x-xewqa ta’ titoli strutturati u abbażi ta’ assi/ipoteki għall-kummerċjalizzazzjoni lil investituri inqas sofistikati.

4.4.

Il-KESE jinnota li r-rekwiżit għall-oriġinaturi jew l-isponsors ta’ titolizzazzjoni li jżommu interess ekonomiku materjali fit-tranżazzjoni (ritenzjoni tar-riskju) jirrappreżenta salvagwardja importanti kontra l-“periklu morali”. Il-KESE jaqbel mal-Kumitat Konġunt tal-Awtoritajiet Superviżorji Ewropej (19) li l-obbligi ta’ ritenzjoni kienu ta’ suċċess u għandhom jinżammu kif inhuma.

4.5.

Il-KESE huwa tal-fehma li r-rapport tal-2021 tal-Awtorità Bankarja Ewropea dwar it-trasferiment sinifikanti tar-riskju (20) ikkontribwixxa materjalment biex tiġi armonizzata l-applikazzjoni tal-qafas ta’ solliev kapitali mis-superviżuri tal-UE (21). Madankollu, il-KESE jinnota li l-parteċipanti fis-suq iqisu li l-perjodi ta’ żmien għall-valutazzjoni u r-rikonoxximent tat-tranżazzjonijiet tat-trasferiment sinifikanti tar-riskju huma twal wisq. Barra minn hekk, it-testijiet tat-trasferiment sinifikanti tar-riskju stabbiliti fir-rapport tal-Awtorità Bankarja Ewropea jistgħu jkunu kumplessi u jistgħu jagħmlu xi tranżazzjonijiet mhux ta’ vantaġġ ekonomiku, speċjalment fejn is-solliev kapitali kien l-objettiv primarju tal-bank oriġinarju. Il-KESE jaqbel li għandhom jiġu esplorati miżuri possibbli biex jiġi ssemplifikat aktar il-proċess ta’ approvazzjoni tat-trasferiment sinifikanti tar-riskju (possibbilment billi jintużaw mudelli aktar standardizzati) sabiex tiġi ssemplifikata l-ħidma tas-superviżuri u tkun tista’ ssir approvazzjoni aktar rapida tar-rekwiżiti tat-trasferiment sinifikanti tar-riskju, speċjalment għal prodotti aktar sempliċi.

4.6.

Skont studju reċenti ppubblikat mill-Bord Ewropew dwar ir-Riskju Sistemiku (22), il-maġġoranza tat-tranżazzjonijiet tat-trasferiment sinifikanti tar-riskju jitwettqu bl-użu ta’ titolizzazzjoni sintetika b’ġabra limitata ta’ kontropartijiet (normalment maniġers professjonali tar-riskju ta’ kreditu). L-istudju tal-Bord Ewropew dwar ir-Riskju Sistemiku jindika li tnaqqis sinifikanti fiċ-ċiklu tal-kreditu jista’ jiżvela teħid ta’ riskju eċċessiv mill-investituri li jipparteċipaw fis-suq tat-trasferiment sinifikanti tar-riskju. Il-KESE jappoġġja s-suġġeriment tal-awturi li jwettqu analiżi ulterjuri dwar kif it-trażmissjoni tar-riskju tat-trasferiment sinifikanti tar-riskju taffettwa s-sistema bankarja Ewropea, u kif din tmexxi r-riskji għal oqsma oħra tas-sistema finanzjarja (23).

---

(1)  Kunsill Ewropew, Laqgħa Speċjali tal-Kunsill Ewropew – Konklużjonijiet, 18 ta’ April 2024.

(2)  Letta E., Much more than a market, (Ħafna aktar minn suq [mhux disponibbli bil-Malti]), 18 ta’ April 2024.

(3)  Draghi, M., The Future of European Competitiveness. Part B: In-depth Analysis and Recommendations (Il-futur tal-kompetittività Ewropea. Parti B: Analiżi fil-fond u rakkomandazzjonijiet [mhux disponibbli bil-Malti]), Settembru 2024.

(4)  ESMA, Building More Effective and Attractive Capital Markets in the EU (Nibnu swieq kapitali aktar effettivi u attraenti fl-UE [mhux disponibbli bil-Malti]), Dokument ta’ Pożizzjoni, 22 ta’ Mejju 2024.

(5)  ESMA, Is-Suq tat-Titolizzazzjoni tal-UE – Ħarsa Ġenerali (mhux disponibbli bil-Malti), 21 ta’ Settembru 2023.

(6)  Kumitat Konġunt tal-Awtoritajiet Superviżorji Ewropej, Parir tal-Kumitat Konġunt dwar ir-Rieżami tal-Qafas Prudenzjali tat-Titolizzazzjoni (mhux disponibbli bil-Malti), 12 ta’ Diċembru 2022.

(7)  ESMA, Is-Suq tat-Titolizzazzjoni tal-UE – Ħarsa Ġenerali (mhux disponibbli bil-Malti), 21 ta’ Settembru 2023.

(8)  ESMA, Is-Suq tat-Titolizzazzjoni tal-UE – Ħarsa Ġenerali (mhux disponibbli bil-Malti), pp. 9-12.

(9)  AFME, Rapport dwar it-titolizzazzjoni għar-raba’ trimestru tal-2022 u għas-sena finanzjarja 2022 (mhux disponibbli bil-Malti), 14 ta’ Marzu 2023.

(10)  ESMA, Is-Suq tat-Titolizzazzjoni tal-UE – Ħarsa Ġenerali (mhux disponibbli bil-Malti), 21 ta’ Settembru 2023.

(11)  ESMA, Is-Suq tat-Titolizzazzjoni tal-UE – Ħarsa Ġenerali (mhux disponibbli bil-Malti), 21 ta’ Settembru 2023; ESRB, Monitoraġġ tar-riskji sistemiċi fis-suq tat-titolizzazzjoni tal-UE (mhux disponibbli bil-Malti), Lulju 2022.

(12)  Kunsill Ewropew ta’ Bond Kopert European Covered Bond Factbook 2023 (mhux disponibbli bil-Malti), Settembru 2023.

(13)  Levitin, A. J., Report on the Institutional and Regulatory Differences between the American and European Securitization Markets , (Rapport dwar id-differenzi istituzzjonali u regolatorji bejn is-swieq tat-titolizzazzjoni Amerikani u Ewropej [mhux disponibbli bil-Malti]), Dokument ta’ Ħidma Nru 3/2023 tal-Kunsill Ġermaniż tal-Esperti Ekonomiċi, Novembru 2023.

(14)  Bord għall-Istabbiltà Finanzjarja, Evaluation on Effects of G20 Reforms on Securitisation (Evalwazzjoni dwar l-effetti tar-riformi tal-G20 relatati mat-titolizzazzjoni [mhux disponibbli bil-Malti]), Rapport ta’ Konsultazzjoni, 2 ta’ Lulju 2024.

(15)  Kumitat Konġunt tal-Awtoritajiet Superviżorji Ewropej, Rapport tal-Kumitat Konġunt dwar l-implimentazzjoni u l-funzjonament tar-Regolament dwar it-Titolizzazzjoni (mhux disponibbli bil-Malti) (Artikolu 44), 17 ta’ Mejju 2021.

(16)  Fausto Parente, Insurance Regulatory Framework for Securitisation (Qafas Regolatorju tal-Assigurazzjoni għat-Titolizzazzjoni [mhux disponibbli bil-Malti]), Eurofi Magazine, Frar 2024.

(17)  Li huma l-fokus ta’ ħafna dispożizzjonijiet fil-qafas legali attwali, bħar-ritenzjoni tar-riskju, l-istandards tal-għoti tal-kreditu u t-tikketta sempliċi, trasparenti u standardizzata.

(18)  ESMA, EU CLO Credit Ratings – Risk of Conflicts of Interests Relating to Methodology Changes (Klassifikazzjoni tal-kreditu – riskju ta’ kunflitti ta’ interessi relatati mat-tibdil fil-metodoloġija [mhux disponibbli bil-Malti]) Rapport finali, 21 ta’ Settembru 2023.

(19)  Kumitat Konġunt tal-Awtoritajiet Superviżorji Ewropej, Rapport tal-Kumitat Konġunt dwar l-implimentazzjoni u l-funzjonament tar-Regolament dwar it-Titolizzazzjoni (mhux disponibbli bil-Malti) (Artikolu 44), 17 ta’ Mejju 2021.

(20)  Awtorità Bankarja Ewropea, Report on Significant Risk Transfers in Securitisations under Articles 244(6) und 245(6) of the Capital Requirements Regulation (Rapport dwar trasferimenti sinifikanti tar-riskji f’titolizzazzjonijiet skont l-Artikoli 244(6) u 245(6) tar-Regolament dwar ir-Rekwiżiti ta’ Kapital [mhux disponibbli bil-Malti]), 23 ta’ Novembru 2020.

(21)  Gonzalez, F., u Morar Triandafil, C., The European Significant Risk Transfer Securitisation Market, (Is-suq Ewropew tat-titolizzazzjoni ta’ trasferiment sinifikanti tar-riskju [mhux disponibbli bil-Malti]), Serje ta’ Dokumenti Okkażjonali Nru 23, p. 35, Bord Ewropew dwar ir-Riskju Sistemiku.

(22)  Gonzalez, F., u Morar Triandafil, C., ‘The European Significant Risk Transfer Securitisation Market, (Is-suq Ewropew tat-titolizzazzjoni ta’ trasferiment sinifikanti tar-riskju [mhux disponibbli bil-Malti]), Serje ta’ Dokumenti Okkażjonali Nru 23, p. 35, Bord Ewropew dwar ir-Riskju Sistemiku.

(23)  Aliaj, O., Gara, A., u Platt, E., Blackstone Snaps Up “Circular” Private Equity Credit Risk, (mhux disponibbli bil-Malti) Financial Times, 3 ta’ Lulju 2024.