(1)

L-Artikolu 14(1) tar-Regolament (UE) 2023/2405 jistabbilixxi skema volontarja ta’ tikkettar ambjentali li tippermetti li titkejjel il-prestazzjoni ambjentali tat-titjiriet, miftuħa għall-operaturi kollha tal-inġenji tal-ajru li jaqgħu fil-kamp ta’ applikazzjoni ta’ dak ir-Regolament.

(2)

Sabiex il-konsumaturi jkunu jistgħu jagħmlu għażliet infurmati rigward titjiriet u modi alternattivi oħra ta’ trasport, jenħtieġ li dan ir-Regolament jistabbilixxi metodoloġija robusta, affidabbli, trasparenti u armonizzata għall-istima tal-emissjonijiet tat-titjiriet bl-użu ta’ data primarja, u regoli dwar il-komunikazzjoni tal-emissjonijiet tat-titjiriet lill-passiġġieri. Peress li r-riżultat tal-metodoloġija huwa l-istima tal-emissjonijiet tat-titjiriet, dan ir-Regolament jenħtieġ li juża terminu għal din it-tikketta li jirrappreżenta mill-qrib il-metodoloġija użata. Din hija r-raġuni għaliex it-tikketta għandha tissejjaħ Tikketta tal-Emissjonijiet tat-Titjira.

(3)

Jenħtieġ li l-operaturi tal-inġenji tal-ajru li jkunu jridu li jinħarġu tikketti għat-titjiriet tagħhom japplikaw mal-Aġenzija tas-Sikurezza tal-Avjazzjoni tal-Unjoni Ewropea (l-“Aġenzija”) u jħallu biżżejjed żmien minn qabel, sabiex kemm l-Aġenzija kif ukoll l-operatur tal-inġenji tal-ajru jkunu jistgħu jħejju l-infrastruttura diġitali rilevanti u r-rapportar.

(4)

Il-metodoloġija għall-istima tal-emissjonijiet tat-titjiriet stabbilita f’dan ir-Regolament jenħtieġ li tiżgura li l-ogħla livelli ta’ trasparenza u traċċabbiltà tal-istimi u tas-suppożizzjonijiet sottostanti li jenħtieġ li jibqgħu konsistenti f’kull mument mal-atti tal-Unjoni li ġejjin dwar il-kontabbiltà tal-emissjonijiet tal-gassijiet serra tas-servizzi tat-trasport.

(5)

Jenħtieġ li l-emissjonijiet tat-titjiriet jiġu stmati abbażi tal-prestazzjoni medja ta’ titjiriet tal-passat bħala funzjoni tal-prestazzjoni ambjentali medja tal-fjuwils tal-avjazzjoni użati għall-operat ta’ kull titjira u tal-konsum medju tal-fjuwils tal-avjazzjoni fil-perjodu ta’ skedar korrispondenti preċedenti. Dawn iż-żewġ fatturi huma l-aktar affidabbli u robusti biex jiġu stmati b’mod preċiż l-emissjonijiet tat-titjiriet. Minħabba limitazzjonijiet tekniċi possibbli biex wieħed jasal għal tali livell ta’ dettall dwar il-lottijiet eżatti ta’ fjuwils tal-avjazzjoni kkunsmati biex tiġi operata kull titjira, jenħtieġ li dan ir-Regolament jistabbilixxi wkoll metodi robusti biex tintlaħaq l-eqreb u l-aktar approssimazzjoni sikura tal-konsum tal-fjuwils tal-avjazzjoni u tal-emissjonijiet tul iċ-ċiklu tal-ħajja tal-fjuwils tal-avjazzjoni filwaqt li jkun hemm sforz biex jitnaqqas il-piż imqiegħed fuq l-operaturi tal-inġenji tal-ajru u fuq l-Aġenzija. Għall-fini tal-istima tal-emissjonijiet tat-titjira ta’ titjira fuq rotta għal perjodu ta’ skedar partikolari, jenħtieġ li titqies l-aktar informazzjoni disponibbli reċenti tal-perjodu ta’ skedar korrispondenti preċedenti u jenħtieġ li dan ir-Regolament jistabbilixxi rekwiżiti speċifiċi għal dan l-għan. Jenħtieġ li l-użu tal-informazzjoni tas-sena kalendarja preċedenti meta jiġu stmati l-emissjonijiet tat-titjira jippermetti lill-Aġenzija tuża informazzjoni diġà vverifikata minn verifikaturi indipendenti filwaqt li timminimizza l-piż amministrattiv u tuża l-aktar informazzjoni reċenti dwar il-prestazzjoni.

(6)

L-istimi preċiżi tal-konsum futur tal-fjuwils tal-avjazzjoni tat-titjiriet huma essenzjali għall-kalkolu tal-emissjonijiet tat-titjiriet u jenħtieġ li dawn l-istimi jkunu bbażati fuq l-aktar evidenza xjentifika reċenti. Jenħtieġ li dawn l-istimi tal-konsum tal-fjuwils tal-avjazzjoni jkunu bbażati wkoll fuq data primarja rrapportata mill-operaturi tal-inġenji tal-ajru tal-aktar operazzjonijiet reċenti tagħhom li jenħtieġ li jkunu dawk tal-perjodu ta’ skedar korrispondenti preċedenti. Jenħtieġ li l-użu ta’ data sekondarja, bħal dik id-data li tirriżulta minn mudelli u stimi mhux derivati bis-sħiħ minn data primarja, ikun limitat għal każijiet eċċezzjonali fejn id-data primarja ma tkunx disponibbli jew meta ma tkunx tista’ ssir stima bbażata fuq data primarja bi preċiżjoni suffiċjenti. Dan jista’ jkun il-każ, b’mod partikolari, meta l-operatur tal-inġenji tal-ajru jiddeċiedi li jopera fuq rotot ġodda jew meta t-titjiriet operati fuq rotot eżistenti jkunu skedati li jiġu operati taħt kundizzjonijiet differenti. Jenħtieġ li dan ir-Regolament jiżgura li r-rekwiżiti metodoloġiċi biex jiġi stmat il-konsum tal-fjuwils tal-avjazzjoni jibqgħu jkunu konformi mal-aktar evidenza u żviluppi xjentifiċi reċenti.

(7)

L-emissjonijiet tul iċ-ċiklu tal-ħajja tal-fjuwils tal-avjazzjoni għandhom il-potenzjal li jkunu aktar baxxi minn dawk l-emissjonijiet tul iċ-ċiklu tal-ħajja tal-fjuwils tal-avjazzjoni konvenzjonali, skont diversi fatturi bħall-għażla tal-materja prima u l-perkorsi tal-produzzjoni għall-produzzjoni tagħhom. Tali emissjonijiet tul iċ-ċiklu tal-ħajja tal-fjuwils tal-avjazzjoni jqisu l-emissjonijiet ekwivalenti tad-diossidu tal-karbonju (CO2eq) tal-produzzjoni, it-trasport, id-distribuzzjoni u l-użu tal-enerġija abbord, inkluż matul il-kombustjoni, sabiex jibqgħu konsistenti mad-dritt tal-Unjoni, b’mod partikolari r-Regolament (UE) 2023/2405, iżda wkoll id-Direttiva (UE) 2018/2001 tal-Parlament Ewropew u tal-Kunsill (2). Għalhekk, jenħtieġ li l-kamp ta’ applikazzjoni tal-gassijiet ikkunsidrati fl-istima tal-emissjonijiet tul iċ-ċiklu tal-ħajja tal-fjuwils tal-avjazzjoni jirrappreżenta s-somma tad-diossidu tal-karbonju (CO2), tal-metan (CH4), u tal-ossidu nitruż (N2O). Jenħtieġ li l-emissjonijiet tul iċ-ċiklu tal-ħajja tal-fjuwils tal-avjazzjoni jiġu kkalkulati f’konformità mal-Punt C tal-Anness V tad-Direttiva (UE) 2018/2001 u, fejn applikabbli, ma’ liġi rilevanti oħra tal-Unjoni u ma’ standards internazzjonali, u data u metodoloġiji li jirriflettu l-aktar żviluppi xjentifiċi reċenti żviluppati bis-saħħa tal-qafas tal-Organizzazzjoni tal-Avjazzjoni Ċivili Internazzjonali (ICAO, International Civil Aviation Organization).

(8)

Filwaqt li jirrikonoxxi li l-informazzjoni dwar il-konsum u l-emissjonijiet tul iċ-ċiklu tal-ħajja tal-fjuwils tal-avjazzjoni hija importanti ħafna għall-istima preċiża tal-emissjonijiet tat-titjiriet, jenħtieġ li dan ir-Regolament jistabbilixxi l-kundizzjonijiet għal din l-informazzjoni li għandha tiġi rrapportata mill-operaturi tal-inġenji tal-ajru lill-Aġenzija. Jenħtieġ li l-piż tar-rapportar jiġi minimizzat, speċjalment għall-operaturi tal-inġenji tal-ajru żgħar u ta’ daqs medju, biex jiġi evitat li l-operaturi tal-inġenji tal-ajru jiġu skoraġġuti milli jadottaw it-Tikketta tal-Emissjonijiet tat-Titjira. Għalhekk, jenħtieġ li l-operaturi tal-inġenji tal-ajru jkunu jistgħu jirrapportaw id-data lill-Aġenzija mingħajr problemi u bla xkiel, bl-użu ta’ għodod ta’ rapportar diġitali żviluppati mill-Aġenzija, u, fejn applikabbli, jagħmlu użu mill-informazzjoni rrapportata diġà għal skopijiet oħra. Sabiex tkun tista’ tagħmel stimi robusti, jenħtieġ li l-Aġenzija jkollha aċċess għall-informazzjoni kollha meħtieġa dwar il-volumi ta’ fjuwils tal-avjazzjoni ppumpjati minn kull operatur tal-inġenji tal-ajru f’kull ajruport, u l-volumi fornuti mill-fornituri tal-fjuwil tal-avjazzjoni lill-operaturi tal-inġenji tal-ajru f’kull ajruport u l-emissjonijiet tul iċ-ċiklu tal-ħajja tal-fjuwils tal-avjazzjoni rispettivi tagħhom.

(9)

Jenħtieġ li l-metodoloġija għall-istima tal-emissjonijiet tat-titjiriet stabbilita f’dan ir-Regolament tlaħħaq mal-iżviluppi fil-liġijiet tal-Unjoni u l-istandards rilevanti, id-data, u l-metodoloġiji internazzjonali u l-iżviluppi xjentifiċi, b’mod partikolari fir-rigward tal-użu ta’ valuri prestabbiliti. Għall-fini ta’ dan ir-Regolament, il-linja bażi tal-intensità tal-emissjonijiet għall-fjuwils tal-avjazzjoni konvenzjonali jenħtieġ li tkun ta’ 89 g CO2eq/MJ, li huwa l-valur referenzjarju għall-fjuwils tal-avjazzjoni żviluppati skont il-qafas tal-ICAO sakemm id-dritt tal-Unjoni jiddefinixxi komparatur tal-karburanti fossili speċifiku għall-avjazzjoni. Jenħtieġ li l-piż attribwit għal kull passiġġier, inkluż il-bagalji tal-passiġġieri, ikun ta’ 100 kg, u jenħtieġ li l-kontenut enerġetiku tal-fjuwils tal-avjazzjoni jkun f’konformità mad-Direttiva (UE) 2018/2001 u mal-istandards u l-metodoloġiji internazzjonali applikabbli.

(10)

Għall-fini ta’ dan ir-Regolament, il-prestazzjoni ambjentali hija limitata għall-emissjonijiet ta’ gassijiet b’effett ta’ serra tal-fjuwils tal-avjazzjoni użati mill-operaturi tal-inġenji tal-ajru, il-prestazzjoni operazzjonali tat-titjiriet u tal-flotta tagħhom, u l-impatt tat-traffiku tal-ajru fuq il-konsum tal-fjuwils tal-avjazzjoni. Dan ir-Regolament, għalhekk, ma jkoprix impatti ambjentali oħra, bħall-istorbju u emissjonijiet ta’ inkwinanti oħra bħall-ossidi tan-nitroġenu (NOx) jew il-materja partikolata (PM, particulate matter).

(11)

Il-metodoloġija għall-istima tal-emissjonijiet tat-titjiriet hija bbażata fuq il-konsum medju tal-passat tal-fjuwils tal-avjazzjoni u t-tiġdid tal-flotta u l-ippjanar ottimizzat tar-rotot jista’ jkollhom impatt mhux negliġibbli fuq it-tnaqqis tal-konsum tal-fjuwils tal-avjazzjoni u, b’hekk, fuq it-tnaqqis tal-emissjonijiet tat-titjiriet. Jenħtieġ li dawk iż-żewġ fatturi jiġu riflessi awtomatikament fil-metodoloġija għall-istima tal-emissjonijiet tat-titjiriet biex tiġi ffaċilitata t-tranżizzjoni lejn inġenji tal-ajru aktar effiċjenti u ppjanar ottimizzat tar-rotot. Għalhekk, jenħtieġ li l-emissjonijiet tat-titjiriet stmati mill-Aġenzija bl-użu tal-metodoloġija stabbilita f’dan ir-Regolament jinċentivaw it-tiġdid tal-flotta u l-ippjanar ottimizzat tar-rotot. Jenħtieġ li l-metodoloġija stabbilita f’dan ir-Regolament tkun robusta biżżejjed biex takkomoda l-bidliet teknoloġiċi u l-avvanzi operazzjonali.

(12)

Meta l-kundizzjonijiet operattivi ta’ titjiriet skedati futuri jikkoinċidu mat-titjiriet diġà operati fuq dik ir-rotta, l-istimi bbażati f’konformità ma’ dan ir-Regolament fuq dik l-istess rotta huma stima konsiderevolment aktar affidabbli tal-prestazzjoni ambjentali ta’ dawk it-titjiriet skedati. Għall-fini ta’ dan ir-Regolament, il-kundizzjonijiet operattivi jirreferu għat-tip ta’ inġenju tal-ajru, it-tip ta’ fjuwils tal-avjazzjoni, l-għadd medju ta’ passiġġieri u l-massa tal-merkanzija ttrasportata. Madankollu, meta l-operatur tal-inġenji tal-ajru jibdel il-kundizzjonijiet operattivi ta’ titjira jew jopera titjiriet ġodda, jenħtieġ li l-konsum tal-fjuwils tal-avjazzjoni u l-prestazzjoni ambjentali tal-fjuwils tal-avjazzjoni stmati jiġu stmati bl-użu tal-aktar metodi u evidenza xjentifika reċenti disponibbli. Tali stimi jenħtieġ li jkunu preċiżi u bbażati fuq approċċ li jwieġeb għall-prinċipju ta’ prekawzjoni. Għalhekk, jenħtieġ li dan ir-Regolament jistabbilixxi l-metodoloġija għall-istima tal-emissjonijiet tat-titjiriet għaż-żewġ każijiet, jiġifieri, għal titjiriet fejn l-informazzjoni kollha meħtieġa dwar l-operazzjonijiet tal-operatur tal-inġenji tal-ajru fil-passat tkun disponibbli u titqies bħala sors affidabbli għall-istima ta’ dawk l-operazzjonijiet, u għal dawk it-titjiriet fejn dik l-informazzjoni ma tkunx disponibbli.

(13)

L-iskedi tat-titjiriet futuri jenħtieġ li jiġu kondiviżi mal-Aġenzija, bil-kunsiderazzjonijiet ta’ kunfidenzjalità meħtieġa, sabiex l-Aġenzija tqabbel il-kundizzjonijiet operattivi u tistma l-emissjonijiet tat-titjiriet bl-aktar mod preċiż. Barra minn hekk, jenħtieġ li l-operaturi tal-inġenji tal-ajru jagħmlu ħilithom biex jipprovdu lill-Aġenzija bi kwalunkwe informazzjoni oħra li tista’ tiffaċilita l-aktar stima preċiża tal-emissjonijiet tat-titjiriet.

(14)

Jenħtieġ li l-informazzjoni rrapportata lill-Aġenzija, speċjalment fir-rigward tal-konsum tal-fjuwil tal-avjazzjoni għal kull titjira u l-emissjonijiet tul iċ-ċiklu tal-ħajja tal-fjuwils tal-avjazzjoni maħruġa għal kull ajruport, tiġi vverifikata minn verifikatur indipendenti qabel ma dawn jiġu rrapportati lill-Aġenzija. Jenħtieġ li din il-verifika indipendenti titwettaq abbażi tal-prinċipji u l-gwida tad-dritt tal-Unjoni rilevanti u tal-istandards u l-metodoloġiji internazzjonali applikabbli. Jenħtieġ li l-verifika tqis ukoll l-iżviluppi internazzjonali li għaddejjin, b’mod partikolari biex jiġi żgurat li t-titjiriet li jaslu fl-Unjoni jkunu jistgħu wkoll, fejn applikabbli, jibbenefikaw mid-dispożizzjonijiet ta’ dan ir-Regolament.

(15)

Jenħtieġ li dan ir-Regolament jistabbilixxi r-regoli dwar il-perjodu ta’ validità tat-tikketti maħruġa mill-Aġenzija u l-kundizzjonijiet biex jinkorporaw il-perjodu ta’ validità fil-ħruġ tagħhom lill-operaturi tal-inġenji tal-ajru, kif ukoll il-kundizzjonijiet għall-operaturi tal-inġenji tal-ajru biex juru b’mod ċar lill-klijenti informazzjoni dwar din il-validità.

(16)

Jenħtieġ li dan ir-Regolament jistabbilixxi l-kundizzjonijiet għall-wiri tat-tikketti maħruġa mill-Aġenzija. Fi żminijiet ta’ diġitalizzazzjoni, speċjalment għat-trasport bl-ajru, il-klijenti jistgħu jaċċessaw online sett ferm usa’ ta’ informazzjoni dwar is-servizzi tat-trasport bl-ajru offruti minn operaturi tal-inġenji tal-ajru kompetituri. Għalhekk huwa essenzjali li jiġi żgurat li t-tikketti maħruġa mill-Aġenzija għal operatur tal-inġenji tal-ajru jintwerew fil-punti kollha tal-bejgħ li huma proprjetà ta’ dak l-operatur tal-inġenji tal-ajru skont il-mudelli stabbiliti f’dan ir-Regolament. Jenħtieġ li l-operaturi tal-inġenji tal-ajru jiżguraw ukoll li l-punti kollha tal-bejgħ li jkollhom relazzjoni kuntrattwali magħhom juru t-tikketti maħruġa mill-Aġenzija. Fl-aħħar nett, jenħtieġ li l-operaturi tal-inġenji tal-ajru jagħmlu sforzi raġonevoli biex jiżguraw li l-punti tal-bejgħ li magħhom ma jikkooperawx ukoll juru t-tikketti maħruġa mill-Aġenzija. Jekk dan ma jsirx, ikun hemm riskju li tiddgħajjef il-fiduċja tan-nies fit-Tikketta u fl-isforzi mwettqa mill-operaturi tal-inġenji tal-ajru biex jużaw fjuwils tal-avjazzjoni b’emissjonijiet aktar baxxi tul iċ-ċiklu tal-ħajja tal-fjuwils tal-avjazzjoni.

(17)

Jenħtieġ li dan ir-Regolament jistabbilixxi l-kundizzjonijiet għall-operaturi tal-inġenji tal-ajru biex juru t-tikketti maħruġa mill-Aġenzija u jiżguraw li l-emissjonijiet tat-titjira jiġu rikonoxxuti faċilment. Jenħtieġ li jistabbilixxi l-ispeċifikazzjonijiet tad-disinn u l-mudelli tal-wiri għall-emissjonijiet tat-titjira li għandhom jintwerew b’mod armonizzat u rikonoxxibbli mill-operaturi kollha tal-inġenji tal-ajru.

(18)

L-elementi tad-disinn jenħtieġ li jinkludu logo li juri li l-emissjonijiet tat-titjira ġew stmati mill-Aġenzija f’isem l-Unjoni Ewropea f’konformità ma’ dan ir-Regolament. Jenħtieġ li dan il-logo armonizzat iservi bħala mezz biex jiġi żgurat ir-rikonoxximent tal-istima tal-emissjonijiet tat-titjira f’konformità ma’ dan ir-Regolament u tinbena l-fiduċja fiha. Jenħtieġ li jservi wkoll biex jirrappreżenta dan ir-Regolament fid-dinja u jevita konfużjoni ma’ leġiżlazzjoni oħra tal-Unjoni u inizjattivi eżistenti fil-qasam tas-sostenibbiltà, bħat-tikketti maħruġa skont ir-Regolament (UE) 2017/1369 tal-Parlament Ewropew u tal-Kunsill (3) u r-regolamenti delegati adottati taħtu. Bl-għan li jittejbu l-komunikazzjoni u s-sensibilizzazzjoni, jenħtieġ li dan ir-Regolament jistabbilixxi wkoll it-terminoloġija speċifika biex jirreferi b’mod ċar għal kull wieħed mill-elementi li jiffurmaw it-tikketta tal-emissjonijiet tat-titjira. Dan jinkludi, pereżempju, il-kombinazzjoni tal-emissjonijiet tat-titjira, il-logo u l-aspetti l-oħra li jenħtieġ li jkunu l-elementi ewlenin li jiffurmaw it-tikketta. Għalhekk, jenħtieġ li dan ir-Regolament jistabbilixxi d-disinn ta’ logo tat-tikketta sempliċi u ċar li dejjem irid jintwera maġenb l-emissjonijiet tat-titjira, li jinkludi l-bandiera tal-Unjoni. Jenħtieġ li l-kundizzjonijiet għall-wiri tat-tikketti stabbiliti f’dan ir-Regolament jiżguraw li t-tikketti jkunu faċilment aċċessibbli u jinftiehmu, u jenħtieġ li l-kundizzjonijiet għall-wiri jippermettu lill-klijenti jqabblu faċilment il-prestazzjoni ambjentali tat-titjiriet operati minn operaturi differenti tal-inġenji tal-ajru li jtiru l-istess rotta. Jenħtieġ li dan ir-Regolament jiżgura li tintwera data konsistenti u preċiża dwar l-emissjonijiet biex jiġu żgurati l-komparabbiltà u l-kompetizzjoni ġusta fis-suq intern għat-trasport, b’mod partikolari meta s-servizzi tat-trasport bl-ajru jkunu parti minn ktajjen tat-trasport multimodali jew meta s-servizzi jkunu qed jikkompetu ma’ modi oħra tat-trasport. Għal dan l-għan, jenħtieġ li dan ir-Regolament ikun konsistenti mal-leġiżlazzjoni applikabbli dwar il-kontabbiltà tal-emissjonijiet tal-gassijiet b’effett ta’ serra tas-servizzi tat-trasport.

(19)

Jenħtieġ li l-kundizzjonijiet għall-wiri tat-tikketti jinqasmu f’wiri primarju u wiri sekondarju. Il-wiri tat-tikketti għandu l-potenzjal li jtejjeb l-għarfien tal-klijenti dwar l-emissjonijiet stmati tat-titjiriet u dwar l-isforzi li saru mill-operaturi tal-inġenji tal-ajru biex inaqqsu l-impronta ambjentali tas-servizzi tat-trasport bl-ajru li joffru. Jenħtieġ li l-wiri primarju, li għandu dejjem jinkludi, f’format li jinftiehem faċilment, l-elementi ewlenin ta’ titjira partikolari matul il-proċess kollu tat-tiftix u x-xiri tat-titjira, ma jkun jeħtieġ l-ebda interazzjoni mill-klijent. Jenħtieġ li l-wiri primarju jinkorpora wkoll l-elementi meħtieġa biex il-klijent ikun jista’ jqabbel il-prestazzjoni ta’ operatur tal-inġenji tal-ajru partikolari ma’ operaturi tal-inġenji tal-ajru kompetituri oħra fuq l-istess rotta. Jenħtieġ li l-għan ta’ tali tqabbil ikun li jagħmilha aktar faċli għall-konsumatur li jifhem l-informazzjoni ambjentali rilevanti, kif ukoll li jinċentiva aktar l-isforzi mill-operaturi tal-inġenji tal-ajru biex itejbu l-prestazzjoni ambjentali tagħhom. Wiri sekondarju, li jenħtieġ li jirrikjedi l-interazzjoni tal-klijenti biex ikun viżibbli, jenħtieġ li jkun fih livell ogħla ta’ dettall u informazzjoni ta’ sfond dwar il-mod li bih ġew stmati l-emissjonijiet tat-titjira, inkluż, pereżempju, il-prestazzjoni ambjentali medja tal-fjuwils tal-avjazzjoni użati mill-operatur tal-inġenju tal-ajru.

(20)

L-iżgurar li jintwerew biss tikketti validi mill-operaturi tal-inġenji tal-ajru huwa essenzjali biex tinbena l-fiduċja fost il-klijenti. Jenħtieġ li dan ir-Regolament jistabbilixxi l-kundizzjonijiet biex l-Aġenzija tivverifika l-implimentazzjoni u l-wiri korretti tat-tikketti mill-operaturi tal-inġenji tal-ajru f’konformità mad-dritt tal-Unjoni rilevanti u l-istandards u l-metodoloġiji internazzjonali applikabbli. It-tikketti revokati u skaduti ma għandhomx jintwerew mill-operaturi tal-inġenji tal-ajru. Jenħtieġ li jistabbilixxi wkoll il-kundizzjonijiet biex l-Aġenzija tirrieżamina l-preċiżjoni u l-veraċità tal-informazzjoni rrapportata mill-operaturi tal-inġenji tal-ajru fir-rigward tal-operazzjonijiet tagħhom. Għalhekk huwa xieraq li dan ir-Regolament, flimkien mar-regoli u s-setgħat ta’ infurzar applikabbli tal-Aġenzija, jistabbilixxi l-kundizzjonijiet għar-rieżami tat-tikketti, kif ukoll il-proċedura biex l-Aġenzija tirrevoka tikketti invalidi jew tagħti struzzjonijiet lill-operaturi tal-inġenji tal-ajru biex jaġġustaw il-wiri tagħhom kif xieraq.

(21)

Jenħtieġ li l-Aġenzija toħloq u tmantni sit web dwar l-emissjonijiet tat-titjiriet, li jippermetti li l-informazzjoni dwar l-iskema tkun faċilment aċċessibbli kemm għall-operaturi tal-inġenji tal-ajru kif ukoll għall-pubbliku. Dan huwa meħtieġ ukoll biex l-iskema ssir aktar attraenti għall-operaturi tal-inġenji tal-ajru.

(22)

Sabiex tiġi ffaċilitata l-adozzjoni tat-Tikketta tal-Emissjonijiet tat-Titjira fl-Unjoni, jenħtieġ li mid-data tad-dħul fis-seħħ ta’ dan ir-Regolament sal-1 ta’ Jannar 2028, l-Aġenzija toħroġ tikketti għas-servizzi tat-trasport bl-ajru tal-passiġġieri jew għat-titjiriet imħallta tal-passiġġieri u tal-merkanzija biss, esklużi s-servizzi tat-trasport bl-ajru tal-merkanzija kollha. Is-servizzi tat-trasport bl-ajru tal-passiġġieri u tal-merkanzija huma intrinsikament differenti fil-mod kif jiġu organizzati l-operazzjonijiet tagħhom, u b’mod partikolari, fir-relazzjonijiet tagħhom mal-klijenti finali. Dan ir-Regolament jagħti prijorità lill-ħruġ ta’ tikketti lill-operaturi tal-inġenji tal-ajru li jipprovdu servizzi tat-trasport bl-ajru sabiex ikun hemm biżżejjed żmien għall-parteċipanti fis-suq biex isiru familjari mat-tikketta. Jenħtieġ li t-tikketti jkopru t-tipi kollha ta’ servizzi tat-trasport bl-ajru biss mill-1 ta’ Jannar 2028.

(23)

Il-miżuri previsti f’dan ir-Regolament huma f’konformità mal-opinjoni tal-Kumitat ReFuelEU Aviation,

(a)

metodoloġija standardizzata u bbażata fuq ix-xjenza għall-kalkolu tal-emissjonijiet tat-titjiriet, inkluż il-metodoloġija għall-istimi, ibbażata fuq l-aħjar data xjentifika disponibbli;

(b)

il-proċedura li permezz tagħha l-operaturi tal-inġenji tal-ajru għandhom jipprovdu lill-Aġenzija tas-Sikurezza tal-Avjazzjoni tal-Unjoni Ewropea (l-“Aġenzija”) bl-informazzjoni rilevanti għall-istima tal-emissjonijiet tat-titjiriet u għall-ħruġ tat-tikketti rispettivi;

(c)

it-tul tal-perjodu ta’ validità tat-tikketti maħruġa mill-Aġenzija;

(d)

il-kundizzjonijiet u l-proċeduri biex l-Aġenzija tirrevedi, tirrevoka u toħroġ tikketti ġodda;

(e)

il-mudelli għall-wiri tat-tikketti;

(f)

ir-regoli biex jiġi żgurat aċċess faċli għat-tikketti kollha maħruġa f’format li jinqara mill-magni;

(g)

il-possibbiltà u l-kundizzjonijiet li skonthom l-operaturi tal-inġenji tal-ajru jistgħu juru informazzjoni oħra dwar il-prestazzjoni ambjentali barra mill-kamp ta’ applikazzjoni ta’ dan ir-Regolament.

(1)

“emissjonijiet tat-titjira” tfisser l-emissjonijiet stmati tul iċ-ċiklu tal-ħajja tal-fjuwils tal-avjazzjoni ta’ titjira operata minn operatur tal-inġenji tal-ajru li huma magħmula mill-emissjonijiet tal-kabina u l-emissjonijiet tal-merkanzija, imkejla f’tunnellati ta’ ekwivalenti ta’ diossidu tal-karbonju;

(2)

“emissjonijiet tal-kabina” tfisser il-proporzjon tal-emissjonijiet tat-titjira attribwiti għall-kabina, imkejjel f’tunnellati ta’ ekwivalenti ta’ diossidu tal-karbonju;

(3)

“emissjonijiet tal-merkanzija” tfisser il-proporzjon tal-emissjonijiet mit-titjiriet attribwiti għall-merkanzija, imkejjel f’tunnellati ta’ ekwivalenti ta’ diossidu tal-karbonju;

(4)

“emissjonijiet tal-kabina għal kull passiġġier” tfisser ir-riżultat tad-diviżjoni tal-emissjonijiet tal-kabina bl-għadd medju ta’ passiġġieri fuq it-titjiriet fil-perjodu ta’ skedar korrispondenti preċedenti, imkejla f’kilogrammi ta’ ekwivalenti ta’ diossidu tal-karbonju għal kull passiġġier;

(5)

“emissjonijiet tal-merkanzija għal kull tunnellata” tfisser ir-riżultat tad-diviżjoni tal-emissjonijiet tal-merkanzija bil-massa medja tal-merkanzija li tinġarr fuq l-inġenju tal-ajru fil-perjodu ta’ skedar korrispondenti preċedenti, imkejla f’kilogrammi ta’ ekwivalenti ta’ diossidu tal-karbonju għal kull tunnellata ta’ merkanzija;

(6)

“emissjonijiet tal-kabina għal kull passiġġier-kilometru” tfisser ir-riżultat tad-diviżjoni tal-emissjonijiet stmati fil-kabina għal kull passiġġier bid-distanza tar-rotta operata, imkejla fi grammi ta’ ekwivalenti ta’ diossidu tal-karbonju għal kull passiġġier-kilometru;

(7)

“emissjonijiet tal-merkanzija għal kull tunnellata-kilometru” tfisser ir-riżultat tad-diviżjoni tal-emissjonijiet tal-merkanzija stmata għal kull tunnellata bid-distanza tar-rotta operata, imkejla fi grammi ta’ ekwivalenti ta’ diossidu tal-karbonju għal kull tunnellata-kilometru;

(8)

“tikketta” tfisser dijagramma grafika, stampata jew elettronika, li tgħaqqad il-logo tat-tikketta u l-informazzjoni stabbilita fl-Anness III;

(9)

“logo tat-tikketta” tfisser l-immaġni definita fil-Punt 1 tal-Anness III ta’ dan ir-Regolament li għandha tirrappreżenta l-verifika tal-emissjonijiet tat-titjira;

(10)

“tikketti skaduti” tfisser tikketti li għadda l-perjodu ta’ validità tagħhom;

(11)

“għodda ta’ rapportar diġitali” tfisser pjattaforma diġitali żviluppata u ġestita mill-Aġenzija bħala l-punt uniku ta’ kuntatt mal-operaturi tal-inġenji tal-ajru għar-rapportar tad-data u għad-distribuzzjoni tat-tikketti;

(12)

“inġenju tal-ajru” tfisser “inġenju tal-ajru” kif definit fl-Artikolu 3, il-punt 28, tar-Regolament (UE) 2018/1139 tal-Parlament Ewropew u tal-Kunsill (4);

(13)

“ċertifikat tal-operatur tal-ajru” (“AOC”) tfisser “ċertifikat tal-operatur tal-ajru (AOC)” kif definit fl-Artikolu 2, il-punt 8, tar-Regolament (KE) Nru 1008/2008 tal-Parlament Ewropew u tal-Kunsill (5);

(14)

“ajruport” tfisser “ajruport” kif definit fl-Artikolu 2, il-punt 1, tad-Direttiva 2009/12/KE tal-Parlament Ewropew u tal-Kunsill (6);

(15)

“sit” tfisser sit imwaħħal ma’ inġenju tal-ajru li fuqu passiġġier jista’ jiġi akkomodat għat-tul tal-vjaġġ;

(16)

“passiġġier” (“pax”) tfisser persuna li tokkupa sit fiż-żona tal-kabina ta’ inġenju tal-ajru fil-mument tat-tluq ta’ inġenju tal-ajru, u li tkun qed tivvjaġġa abbord inġenju tal-ajru bl-għan li tilħaq destinazzjoni speċifika;

(17)

“erja tas-sit” tfisser iż-żona allokata għal kull sit għal kull passiġġier u għal kull klassi tal-kabina, imkejla f’metri kwadri;

(18)

“klassi tal-kabina” tfisser is-servizz u l-akkomodazzjoni distinti pprovduti lill-passiġġieri li hija kkaratterizzata mill-konfigurazzjoni speċifika tas-sits fil-kabina, fil-faċilitajiet u fl-istrutturi tan-nollijiet;

(19)

“perjodu ta’ skedar” tfisser “perjodu ta’ skedar” kif definit fl-Artikolu 2, il-punt (d), tar-Regolament tal-Kunsill (KEE) Nru 95/93 (7);

(20)

“block aviation fuel” tfisser l-ammont ta’ fjuwils tal-avjazzjoni kkunsmat minn inġenju tal-ajru meta jopera titjira, mill-moviment inizjali tiegħu mill-post tal-parkeġġ tiegħu fl-ajruport tat-tluq sakemm jasal għal waqfa sħiħa fil-post tal-parkeġġ fl-ajruport tal-wasla, imkejjel f’tunnellati;

(21)

“block time” tfisser il-ħin totali li jkun għadda mill-moviment inizjali tal-inġenju tal-ajru mill-post tal-parkeġġ tiegħu fl-ajruport tat-tluq sakemm jasal għal waqfa sħiħa fil-post tal-parkeġġ fl-ajruport tal-wasla, imkejjel f’minuti;

(22)

“emissjonijiet tul iċ-ċiklu tal-ħajja tal-fjuwils tal-avjazzjoni” tfisser l-emissjonijiet ekwivalenti ta’ diossidu tal-karbonju ta’ fjuwils tal-avjazzjoni li jinkludu l-emissjonijiet ekwivalenti ta’ diossidu tal-karbonju tal-produzzjoni, it-trasport, it-distribuzzjoni u l-użu tal-enerġija abbord, inkluż matul il-kombustjoni, u li jirrappreżentaw is-somma ta’ diossidu tal-karbonju (CO2), ta’ metan (CH4), u ta’ ossidu nitruż (N2O) emessi, ikkalkulati f’konformità mal-Punt C tal-Anness V tad-Direttiva (UE) 2018/2001 u, fejn applikabbli, mal-liġijiet tal-Unjoni u l-istandards internazzjonali rilevanti l-oħra, u data u metodoloġiji li jirriflettu l-aktar żviluppi xjentifiċi reċenti żviluppati skont il-qafas tal-ICAO, u mkejla fi grammi ta’ ekwivalenti ta’ diossidu tal-karbonju għal kull megajoule;

(23)

“ekwivalenti ta’ diossidu tal-karbonju” (“CO2eq”) tfisser l-unità ta’ kejl li tqabbel il-forza radjattiva ta’ gass b’effett ta’ serra ma’ dik tad-diossidu tal-karbonju (CO2);

(24)

“skema ta’ gassijiet serra tal-fjuwils tal-avjazzjoni” tfisser skema li tagħti benefiċċji lill-operaturi tal-inġenji tal-ajru għat-tnaqqis tal-emissjonijiet ta’ gassijiet b’effett ta’ serra mill-fjuwils tal-avjazzjoni;

(25)

“merkanzija” tfisser merkanzija, materjali, u pakketti għajr bagalji tal-passiġġieri ttrasportati abbord inġenju tal-ajru, imkejla f’tunnellati;

(26)

“punt tal-bejgħ” tfisser post fiżiku jew servizz tal-pjattaforma online li jkun proprjetà ta’ operatur tal-inġenji tal-ajru, jew li joffri t-titjiriet ta’ operatur tal-inġenji tal-ajru, fejn operatur tal-inġenji tal-ajru, jew kwalunkwe persuna awtorizzata biex tirrappreżenta lil dak l-operatur tal-inġenji tal-ajru, taħżen u tagħmel l-informazzjoni disponibbli għall-pubbliku dwar titjiriet operati minn dak l-operatur tal-inġenji tal-ajru għal finijiet ta’ xiri jew tqabbil.