An Bhruiséil,25.4.2023

COM(2023) 213 final

2023/0114(NLE)

Togra le haghaidh

CINNEADH ÓN gCOMHAIRLE

maidir leis an seasamh atá le glacadh thar ceann an Aontais Eorpaigh san Eagraíocht Idirnáisiúnta um Fhíniúin agus um Fhíon (OIV)


MEABHRÁN MÍNIÚCHÁIN

1.Ábhar an togra

Baineann an togra seo leis an gcinneadh lena mbunaítear an seasamh atá le glacadh thar ceann an Aontais sa Chomhthionól Ginearálta de chuid OIV an 9 Meitheamh 2023 i ndáil leis na rúin ó OIV a bhfuil sé beartaithe iad a ghlacadh a bhféadfadh éifeachtaí dlíthiúla ar dhlí an Aontais a bheith mar thoradh orthu.

2.Comhthéacs an togra

2.1.An stádas ar leith atá ag an Aontas laistigh de OIV

Tá 49 Stát ina gcomhaltaí de OIV faoi láthair, lena n‑áirítear 20 Stát ar Ballstáit den Aontas iad. Níl an tAontas ina chomhalta de OIV. Mar sin féin, ón 20 Deireadh Fómhair 2017, tá an stádas ar leith dá bhforáiltear in Airteagal 4 de Rialacha Nós Imeachta OIV á dheonú ag OIV don Aontas, ar stádas é lena gcuirfear ar a chumas idirghabháil in oibreacha na gCoimisiún, na bhFo-Choimisiún agus na ngrúpaí saineolaithe agus freastal a dhéanamh ar chruinnithe an Tionóil Ghinearálta agus an Choiste Feidhmiúcháin.

2.2.OIV

Is eagraíocht eolaíoch, theicniúil, idir-rialtasach í an Eagraíocht Idirnáisiúnta um Fhíniúin agus um Fhíon (OIV) atá gníomhach in earnáil an fhíonsaothraithe, deochanna fíonbhunaithe, fíonchaora boird, rísíní agus táirgí fíniúna eile. Is iad cuspóirí OIV (i) eolas a sholáthar maidir le bearta lena bhféadfar ábhair imní na dtáirgeoirí, na dtomhaltóirí agus imreoirí eile in earnáil na dtáirgí fíniúna agus fíona a thabhairt san áireamh, (ii) cúnamh a thabhairt d’eagraíochtaí idirnáisiúnta a bhfuil baint acu le gníomhaíochtaí caighdeánúcháin agus (iii) cur le comhchuibhiú idirnáisiúnta na gcleachtas agus na gcaighdeán atá ann cheana.

2.3.An gníomh atá beartaithe ag OIV

Reáchtálfar an chéad Tionól Ginearálta eile de chuid OIV an 9 Meitheamh 2023. Sa chomhthéacs sin agus ar bhonn pléití a rinneadh i measc an ghrúpa saineolaithe ag físchruinnithe ó mhí Eanáir go dtí mí Mhárta 2023, is féidir a mheas go mbeidh na rúin seo a leanas, a mbeidh éifeacht dhlíthiúil acu ar dhlí an Aontais, ar chlár an Tionóil Ghinearálta lena nglacadh:

–Dréachtrún OENO-SCMA 20-666 lena mbunaítear modh anailíse nua agus Dréachtrún OENO-SCMA 21-687 lena leasaítear an modh anailíse OIV-MA-AS313-20,

–Dréachtrún OENO-TECHNO 19-657 a ghabhann ionad cleachtais fhíoneolaíoch atá ann cheana agus Dréachtrún OENO-TECHNO 19-658 lena mbunaítear cleachtas nua.

Faoi mar a bhí san am a chuaigh thart, is féidir a mheas go dtiocfaidh éabhlóid ar chlár chruinniú Thionól Ginearálta OIV agus go gcuirfear ar an gclár rúin eile a mbeidh éifeachtaí dlíthiúla ar dhlí an Aontais mar thoradh orthu. Chun éifeachtúlacht obair an Tionóil Ghinearálta a áirithiú agus sin a dhéanamh ar dhóigh a thugann urraim do rialacha na gConarthaí, déanfaidh an Coimisiún forlíonadh nó leasú in am trátha ar an togra seo chun é a chur ar a cumas don Chomhairle an seasamh a ghlacadh a bheidh le glacadh maidir leis na rúin sin freisin.

3.An seasamh atá le glacadh thar ceann an Aontais

Rinne saineolaithe eolaíocha agus teicniúla de chuid earnáil an fhíona plé fairsing ar na dréachtrúin a chuirfear chun vóta ag an gcéad Tionól Ginearálta eile de chuid OIV. Cuireann siad le comhchuibhiú idirnáisiúnta na gcaighdeán fíona agus leagfar amach leo creat lena n‑áiritheofar iomaíocht chóir i dtrádáil tháirgí earnáil an fhíona. Dá bhrí sin, ba cheart tacú leo.

4.Bunús dlí

4.1.Bunús dlí nós imeachta

4.1.1.Prionsabail

In Airteagal 218(9) den Chonradh ar Fheidhmiú an Aontais Eorpaigh (CFAE) déantar foráil maidir le cinntí lena mbunófar ‘na seasaimh a ghlacfar thar ceann an Aontais i gcomhlacht arna chur ar bun le comhaontú nuair a iarrtar ar an gcomhlacht sin gníomhartha a ghlacadh a bhfuil éifeachtaí dlíthiúla leo, seachas gníomhartha lena bhforlíonfar nó lena leasófar creat institiúideach an chomhaontaithe.’

Tá feidhm ag Airteagal 218(9) CFAE bíodh an tAontas ina chomhalta den chomhlacht nó ina pháirtí sa chomhaontú, nó ná bíodh 1 .

Áirítear ar na ‘gníomhartha a bhfuil éifeachtaí dlíthiúla leo’ gníomhartha a bhfuil éifeachtaí dlíthiúla leo de bhua rialacha an dlí idirnáisiúnta lena rialaítear an comhlacht i gceist. Áirítear freisin ionstraimí nach bhfuil éifeacht cheangailteach leo faoin dlí idirnáisiúnta, ach a fhéadfaidh ‘tionchar cinntitheach a imirt ar ábhar na reachtaíochta a ghlacfaidh reachtóir an Aontais Eorpaigh’ 2 .

4.1.2.Feidhm maidir leis an gcás seo

Is eagraíocht eolaíoch, theicniúil, idir-rialtasach í an Eagraíocht Idirnáisiúnta um Fhíniúin agus um Fhíon (OIV) atá gníomhach in earnáil an fhíonsaothraithe, deochanna fíonbhunaithe, fíonchaora boird, rísíní agus táirgí fíniúna eile. Tá 49 Stát ina gcomhaltaí de OIV faoi láthair, lena n‑áirítear 20 Stát ar Ballstáit den Aontas iad. Níl an tAontas ina chomhalta de OIV. Mar sin féin, ón 20 Deireadh Fómhair 2017, tá an stádas ar leith dá bhforáiltear in Airteagal 4 de Rialacha Nós Imeachta OIV á dheonú ag OIV don Aontas, ar stádas é lena gcuirfear ar a chumas idirghabháil in oibreacha na gCoimisiún, na bhFo-Choimisiún agus na ngrúpaí saineolaithe agus freastal a dhéanamh ar chruinnithe an Tionóil Ghinearálta agus an Choiste Feidhmiúcháin.

De bhun Rialachán (AE) Uimh. 1308/2013 ó Pharlaimint na hEorpa agus ón gComhairle agus Rialachán Tarmligthe (AE) 2019/934 ón gCoimisiún, bíonn éifeacht dhlíthiúil le rúin áirithe arna nglacadh agus arna bhfoilsiú ag OIV ar dhlí an Aontais. Dá bhrí sin, ba cheart don Chomhairle seasamh an Aontais maidir leis na rúin sin i ndáil le hábhair atá faoina inniúlacht a ghlacadh agus ba cheart do na Ballstáit ar comhaltaí de OIV iad é a chur in iúl ag cruinnithe OIV, ag gníomhú go comhpháirteach dóibh chun leas an Aontais.

Dá bhrí sin, is é Airteagal 218(9) CFAE bunús dlí nós imeachta an chinnidh atá beartaithe.

4.2.Bunús dlí substainteach

4.2.1.Prionsabail

An bunús dlí substainteach le haghaidh cinneadh faoi Airteagal 218(9) CFAE, braitheann sé go príomha ar chuspóir agus ar ábhar an ghnímh atá beartaithe agus a bhfuiltear ag glacadh seasamh thar ceann an Aontais ina leith. Má tá dhá aidhm ag an ngníomh atá beartaithe nó má tá dhá chomhpháirt ann agus más féidir ceann de na haidhmeanna nó de na comhpháirteanna sin a shainaithint mar phríomhaidhm nó mar phríomh-chomhpháirt agus an ceann eile mar aidhm nó comhpháirt theagmhasach, ní mór an cinneadh faoi Airteagal 218(9) CFAE a bhunú ar bhunús dlí substainteach aonair, is é sin an bunús dlí a éilítear de réir na príomhaidhme nó na príomh-chomhpháirte.

4.2.2.Feidhm maidir leis an gcás seo

Baineann príomhchuspóir na ndréachtrún atá beartaithe le comhchuibhiú na gcaighdeán fíona agus dá bhrí sin le cur i bhfeidhm comhbheartas talmhaíochta. Dá bhrí sin, is é Airteagal 43 CFAE bunús dlí substainteach an chinnidh atá beartaithe.

4.3.Conclúid

Is é Airteagal 43 ba cheart a bheith ina bhunús dlí don chinneadh atá beartaithe, i gcomhar le hAirteagal 218(9) CFAE.

5.Foilsiú an ghnímh atá beartaithe

Neamhbhainteach.

2023/0114 (NLE)

Togra le haghaidh

CINNEADH ÓN gCOMHAIRLE

maidir leis an seasamh atá le glacadh thar ceann an Aontais Eorpaigh san Eagraíocht Idirnáisiúnta um Fhíniúin agus um Fhíon (OIV)

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43, i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)Déanfaidh an Eagraíocht Idirnáisiúnta um Fhíniúin agus um Fhíon (OIV) scrúdú ar rúin a mbeidh éifeachtaí dlíthiúla leo chun críocha Airteagal 218(9) CFAE sa chéad Tionól Ginearálta eile a bheidh aici an 9 Meitheamh 2023 agus d’fhéadfadh sé go nglacfadh sí na rúin sin.

(2)Níl an tAontas ina chomhalta de OIV. Mar sin féin, an 20 Deireadh Fómhair 2017, bhronn OIV ar an Aontas an stádas ar leith dá bhforáiltear in Airteagal 4 de Rialacha Nós Imeachta OIV.

(3)Tá 20 Ballstát ina gcomhaltaí de OIV. Beidh deis ag na Ballstáit sin leasuithe ar na dréachtrúin ó OIV a mholadh agus iarrfar orthu na dréachtrúin sin a ghlacadh ag an gcéad Chomhthionól Ginearálta eile de chuid OIV an 9 Meitheamh 2023.

(4)Dá bhrí sin, ba cheart don Chomhairle seasamh an Aontais maidir leis na rúin sin i ndáil le hábhair atá faoina inniúlacht a ghlacadh agus ba cheart do na Ballstáit ar comhaltaí de OIV iad é a chur in iúl ag cruinnithe OIV, ag gníomhú go comhpháirteach dóibh chun leas an Aontais.

(5)De bhun Rialachán (AE) Uimh. 1308/2013 ó Pharlaimint na hEorpa agus ón gComhairle 3 agus Rialachán Tarmligthe (AE) 2019/934 ón gCoimisiún 4 , beidh éifeachtaí dlíthiúla le rúin áirithe arna nglacadh agus arna bhfoilsiú ag OIV.

(6)Foráiltear le hAirteagal 80(3)(a) de Rialachán (AE) Uimh. 1308/2013 go mbeidh ar an gCoimisiún na cleachtais fhíoneolaíocha agus na modhanna anailíse a mhol agus a d’fhoilsigh OIV a thabhairt san áireamh agus é ag údarú cleachtais fhíoneolaíocha.

(7)Foráiltear le hAirteagal 80(5) de Rialachán (AE) Uimh. 1308/2013, agus modhanna anailíse á leagan síos ag an gCoimisiún lena gcinnfear comhdhéanamh tháirgí earnáil an fhíona, go mbunóidh sé na modhanna sin ar aon mhodh ábhartha arna mholadh agus arna fhoilsiú ag OIV mura rud é go mbeidís neamhéifeachtach nó neamhchuí i bhfianaise an chuspóra atá á shaothrú ag an Aontas.

(8)Foráiltear le hAirteagal 90(2) de Rialachán (AE) Uimh. 1308/2013 i dtaca le táirgí earnáil an fhíona a allmhairítear chun an Aontais, go dtáirgfear na táirgí sin i gcomhréir le cleachtais fíoneolaíochta arna n‑údarú ag an Aontas de bhun an Rialacháin nó, roimh an údarú sin, go dtáirgfear iad i gcomhréir le cleachtais fíoneolaíochta arna moladh agus arna bhfoilsiú ag OIV.

(9)Le Dréachtrún OENO-SCMA 20-666 bunaítear modh anailíse nua le haghaidh fíonta. Le Dréachtrún OENO-SCMA 21-687 leasaítear an modh anailíse a úsáidtear chun cion aigéid shorbaigh, bheansóch agus shalaiciligh i bhfíon a chinneadh trí chrómatagrafaíocht leachta ardfheidhmíochta a úsáid. I gcomhréir le hAirteagal 80(3)(a), agus Airteagal 80(5) de Rialachán (AE) Uimh. 1308/2013, beidh éifeachtaí dlíthiúla leis na Rúin sin.

(10)Gabhann Dréachtrún OENO-TECHNO 19-657 ionad cleachtais fhíoneolaíoch atá ann cheana le haghaidh fíona agus le Dréachtrún OENO-TECHNO 19-658 bunaítear cleachtas fíoneolaíoch nua le haghaidh fínéagar fíona. I gcomhréir le hAirteagal 80(3)(a), agus Airteagal 90(2) de Rialachán (AE) Uimh. 1308/2013, beidh éifeachtaí dlíthiúla leis na Rúin sin.

(11)Rinne saineolaithe eolaíocha agus teicniúla earnáil an fhíona plé fairsing ar na Dréachtrúin sin ó OIV. Cuireann siad le comhchuibhiú idirnáisiúnta na gcaighdeán fíona agus leagfar amach leo creat lena n‑áiritheofar iomaíocht chóir i dtrádáil tháirgí earnáil an fhíona. Dá bhrí sin, ba cheart tacú leo.

(12)Chun go mbeidh an tsolúbthacht is gá ann le linn na caibidlíochta roimh chruinniú Chomhthionól Ginearálta OIV an 9 Meitheamh 2023, ba cheart údarú a thabhairt do na Ballstáit ar comhaltaí de OIV iad aontú le hathruithe ar na dréachtrúin sin ó OIV ar choinníoll nach n‑athraítear a substaint leis na hathruithe sin,

TAR ÉIS AN CINNEADH SEO A GHLACADH:

Airteagal 1

Leagtar amach san Iarscríbhinn an seasamh atá le glacadh thar ceann an Aontais i gComhthionól Ginearálta OIV atá beartaithe don 9 Meitheamh 2023.

Airteagal 2

Déanfaidh Ballstáit an Aontais atá ina gcomhaltaí de OIV, ag gníomhú go comhpháirteach dóibh, an seasamh dá dtagraítear in Airteagal 1 a chur in iúl.

Airteagal 3

1.I gcás inar dóigh go ndéanfar difear, le faisnéis eolaíoch nua nó faisnéis theicniúil nua arna cur i láthair roimh chruinnithe OIV, nó lena linn, don seasamh dá dtagraítear in Airteagal 1, iarrfaidh na Ballstáit ar Comhaltaí de OIV iad go gcuirfear an vótáil i dTionól Ginearálta OIV ar athlá go dtí go mbunófar seasamh an Aontais ar bhonn na faisnéise nua sin.

2.Tar éis comhordúcháin agus in éagmais cinneadh eile ón gComhairle lena mbunaítear seasamh an Aontais, féadfaidh na Ballstáit ar Comhaltaí de OIV iad, ag gníomhú go comhpháirteach dóibh thar ceann an Aontais, aontú le hathruithe teicniúla ar na dréachtrúin dá dtagraítear san Iarscríbhinn nach n‑athraítear a substaint leo.

Airteagal 4

Dírítear an Cinneadh seo chuig na Ballstáit.

Arna dhéanamh sa Bhruiséil,

   Thar ceann na Comhairle

   An tUachtarán
   

(1)    Breithiúnas ón gCúirt Bhreithiúnais an 7 Deireadh Fómhair 2014, an Ghearmáin v an Chomhairle, C-399/12, ECLI:EU:C:2014:2258, mír 64.
(2)    Breithiúnas na Cúirte Breithiúnais an 7 Deireadh Fómhair 2014, an Ghearmáin v an Chomhairle, C-399/12, ECLI:EU:C:2014:2258, míreanna 61 go 64.
(3)    Rialachán (AE) Uimh. 1308/2013 ó Pharlaimint na hEorpa agus ón gComhairle an 17 Nollaig 2013 lena mbunaítear comheagraíocht na margaí i dtáirgí talmhaíochta agus lena n‑aisghairtear Rialacháin (CEE) Uimh. 922/72, (CEE) Uimh. 234/79, (CE) Uimh. 1037/2001 agus (CE) Uimh. 1234/2007 ón gComhairle (IO L 347, 20.12.2013, lch. 671).
(4)    Rialachán Tarmligthe (AE) 2019/934 ón gCoimisiún an 12 Márta 2019 lena bhforlíontar Rialachán (AE) Uimh. 1308/2013 ó Pharlaimint na hEorpa agus ón gComhairle a mhéid a bhaineann le limistéir fíonsaothrúcháin inar féidir an neart alcóil a mhéadú, cleachtais fhíoneolaíocha údaraithe agus srianta is infheidhme maidir le táirgeadh agus caomhnú táirgí fíniúna, an t‑íoschéatadán alcóil i gcás táirgí agus a ndiúscairt, agus foilsiú comhad de chuid OIV (IO L 149, 7.6.2019, lch. 1).