CINNEADH (AE, Euratom) 2021/625ón gCOIMISIÚN
an 14 Aibreán 2021
maidir le bunú líonra na bpríomhdhéileálaithe agus sainiú na gcritéar incháilitheachta le haghaidh príomhshainorduithe agus comh-phríomhshainorduithe le haghaidh idirbhearta sindeacáite chun críoch gníomhaíochtaí iasachtaíochta ag an gCoimisiún thar ceann an Aontais agus an Chomhphobail Eorpaigh do Fhuinneamh Adamhach
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint don Chonradh ag bunú an Chomhphobail Eorpaigh do Fhuinneamh Adamhach,
Ag féachaint do Rialachán (AE, Euratom) 2018/1046 ó Pharlaimint na hEorpa agus ón gComhairle an 18 Iúil 2018 maidir leis na rialacha airgeadais is infheidhme maidir le buiséad ginearálta an Aontais (1),
De bharr an mhéid seo a leanas:
|
(1)
|
Chun cuidiú le haghaidh a thabhairt ar iarmhairtí eacnamaíocha agus sóisialta ghéarchéim COVID-19, tugtar de chumhacht don Choimisiún le Cinneadh (AE, Euratom) 2020/2053 (2) suas le EUR 750 000 milliún i bpraghsanna 2018 a fháil ar iasacht ar na margaí caipitil thar ceann an Aontais. I gcomhréir le Rialachán (AE) 2020/2094 ón gComhairle (3), is leis na hiasachtaí sin a mhaoineofar an téarnamh i ndiaidh ghéarchéim COVID-19. Cuirfidh an tAontas tacaíocht inaisíoctha agus tacaíocht neamh-inaisíoctha ar fáil faoi chláir éagsúla, agus tacóidh sé go háirithe le hinfheistíochtaí poiblí agus le hathchóirithe faoin tSaoráid Téarnaimh agus Athléimneachta a bunaíodh le Rialachán (AE) 2021/241 ó Pharlaimint na hEorpa agus ón gComhairle (4).
|
|
(2)
|
Tugadh de chumhacht don Choimisiún cheana féin gníomhú mar iasachtaí ar na margaí caipitil thar ceann an Aontais chun iasachtaí a mhaoiniú i gcomhair cúnamh airgeadais arna ndeonú i gcomhréir le Rialachán (AE) Uimh. 407/2010 ón gComhairle (5), Rialachán (CE) Uimh. 332/2002 ón gComhairle (6), agus na Cinntí ó Pharlaimint na hEorpa agus ón gComhairle lena gcuirtear cúnamh macrairgeadais ar fáil do thíortha éagsúla ar bhonn soláthair i gcomhréir, go háirithe, le Rialachán (CE, Euratom) Uimh. 480/2009 ón gComhairle (7), Cinneadh (AE) 2020/701 ó Pharlaimint na hEorpa agus ón gComhairle (8), agus Rialachán (AE) 2020/672 ón gComhairle (9).
|
|
(3)
|
Le Cinneadh 77/270/Euratom ón gComhairle (10), údaraítear don Choimisiún freisin cistí a fháil ar iasacht ar na margaí caipitil thar ceann an Chomhphobail Eorpaigh do Fhuinneamh Adamhach (Euratom) chun tionscadail infheistíochta áirithe a mhaoiniú in earnáil an fhuinnimh núicléach sna Ballstáit agus i roinnt tríú tíortha i Lár agus in Oirthear na hEorpa.
|
|
(4)
|
I gcomhréir le hAirteagal 282(3) den Rialachán Airgeadais, tháinig forálacha Theideal X den Rialachán Airgeadais maidir le cúnamh airgeadais i bhfeidhm an 1 Eanáir 2021.
|
|
(5)
|
Rachfar ar iontaoibh na margaí caipitil ar scála mór, agus déanfar eisiúint ar ardmhinicíocht. Tá acmhainneacht ionsúcháin na margaí caipitil finideach. Mar thoradh air sin, caithfidh eagrú na n-oibríochtaí cistithe a bheith solúbtha. I bhfianaise an mhéid sin, is gá don Choimisiún atreisiú a dhéanamh ar a inniúlacht iarraidh ar líonra cumasach cáilithe institiúidí creidmheasa urrúis fiachais a láithriú go príomhúil, na láithriúcháin sin a chur chun cinn agus, de réir mar a bheidh, seirbhísí airgeadais ábhartha a sholáthar, amhail comhairle margaidh chóir agus faisnéis a sholáthar.
|
|
(6)
|
Na príomhdhéileálaithe a ligtear isteach sa líonra, tá siad i dteideal páirt a ghlacadh i gceantanna a dhéanann an Coimisiún chun iasachtaí a fháil ar mhargaí caipitil. Cuireann an sainmhíniú ar na critéir incháilitheachta leis an taithí a fuarthas agus institiúidí creidmheasa á roghnú faoi chláir cúnaimh airgeadais atá ann cheana. Baintear leas freisin as dea-chleachtais eisitheoirí ceannasacha agus fornáisiúnta.
|
|
(7)
|
Chun iompar rianúil éifeachtúil gníomhaíochtaí iasachtaíochta agus bainistíochta fiach a bhaint amach, ba cheart feidhm a bheith ag na socruithe a bhaineann le líonra na bpríomhdhéileálaithe maidir le haon ghníomhaíocht iasachtaíochta de chuid an Choimisiúin.
|
|
(8)
|
Ba cheart d’institiúidí creidmheasa a bheith i dteideal a bheith ina gcomhaltaí de líonra na bpríomhdhéileálaithe má chomhlíonann siad na critéir incháilitheachta. Is é is aidhm dóibh sin feidhmíocht éifeachtúil fheidhm na bpríomhdhéileálaithe a ráthú, go háirithe oibríochtaí margaidh a dhéanamh go hinniúil agus gealltanais frithgheallta a chomhlíonadh. I ndáil leis sin, tá sé ríthábhachtach go léireoidh príomhdhéileálaithe incháilithe struchtúr láidir eagraíochtúil, inniúlacht ghairmiúil agus bainistíochta, gníomhaíocht shuntasach sa mhargadh maidir le heisiúint bannaí ceannasacha agus fornáisiúnta a fhrithghealladh, agus comhlíonadh an chreata rialála ábhartha, go háirithe maidir le ceanglais stuamachta an Aontais (11) agus maoirseacht orthu (12). I gcomhréir le prionsabal na trédhearcachta, ba cheart na critéir sin agus na cinntí lena nglactar le hinstitiúid creidmheasa mar phríomhdhéileálaí a fhoilsiú in Iris Oifigiúil an Aontais Eorpaigh.
|
|
(9)
|
Mar gheall ar chomhaltas i líonraí príomhdhéileálaithe arna n-oibriú ag Ballstát nó ag eisitheoir fornáisiúnta, tá an institiúid creidmheasa i dteideal a bheith rannpháirteach i gceantanna fiachais phoiblí an eisitheora sin. Léiriú iontaofa ar thaithí in oibríochtaí bainistíochta fiachais phoiblí atá i rannpháirtíocht rialta ghníomhach i nósanna imeachta ceantála ceannasacha nó fornáisiúnta. Dá bhrí sin, ba cheart incháilitheacht le haghaidh comhaltas i líonra príomhdhéileálaithe an Aontais a bheith faoin gcoinníoll go mbeadh Ballstát amháin ar a laghad nó líonra príomhdhéileálaithe nó sásra príomhdhéileála an eisitheora fhornáisiúnta Eorpaigh ina chomhalta de.
|
|
(10)
|
A luaithe a ligtear isteach iad ar líonra na bpríomhdhéileálaithe, ba cheart cead a bheith ag príomhdhéileálaithe an teideal “Comhalta de Líonra Príomh-Dhéileálaithe an Aontais Eorpaigh” a bheith orthu agus páirt a ghlacadh i ngach ceant ar urrúis fiachais de chuid an Aontais agus de chuid Euratom. Ba cheart do na déileálaithe sin íosmheán ualaithe de na méideanna arna gceantáil a cheannach agus oibleagáidí tuairiscithe áirithe a chomhlíonadh.
|
|
(11)
|
Ba cheart do na príomhdhéileálaithe cloí freisin leis na téarmaí agus na coinníollacha ginearálta lena rialaítear rannpháirtíocht i líonra na bpríomhdhéileálaithe, go háirithe cearta, gealltanais agus oibleagáidí na gcomhaltaí de líonra na bpríomhdhéileálaithe, an t-athbhreithniú bliantúil, oibleagáidí tuairiscithe, chomh maith le rialacha maidir le rialuithe, le fionraí comhaltais, le heisiamh ó líonra na bpríomhdhéileálaithe agus leis an bhféidearthacht tarraingt siar ó líonra na bpríomhdhéileálaithe.
|
|
(12)
|
Sa bhreis ar cheantanna, eisítear urrúis fiachais faoi na cláir iasachtaíochta dá dtagraítear faoi aithrisí (3) agus (4) trí shindeacáitiú nó láithrithe príobháideacha freisin. Chuige sin, is é an Coimisiún a cheapann na hinstitiúidí creidmheasa a chomhlíonann ceanglais incháilitheachta arna mbunú le haghaidh idirbhearta sindeacáite agus láithrithe príobháideacha chun críoch gach idirbhirt iasachtaíochta.
|
|
(13)
|
Comhaltaí de líonra na bpríomhdhéileálaithe, a cheannaíonn meánchéatadán ualaithe níos airde de na méideanna arna gceantáil ná mar a cheanglaítear le bheith ina gcomhaltaí de líonra na bpríomhdhéileálaithe agus a bhfuil sciar tánaisteach leordhóthanach den mhargadh acu in urrúis fiachais de chuid an Aontais agus de chuid Euratom, ba cheart dóibh a bheith incháilithe le bheith ina bpríomhbhainisteoirí agus ina gcomh-phríomhbhainisteoirí in idirbhearta sindeacáite. Ba cheart don ghrúpa déileálaithe sin é a ghabháil air féin leachtacht urrús fiachais de chuid an Aontais agus de chuid Euratom a chur chun cinn trí ghníomhaíocht cruthaithe margaidh, comhairle chothrom agus faisnéis mhargaidh a sholáthar don Choimisiún agus an tAontas agus eisiúintí Euratom a chur chun cinn le hinfheisteoirí.
|
|
(14)
|
Ba cheart na cúraimí a bhaineann le róil an phríomhbhainisteora agus an chomh-phríomhbhainisteora a mheas mar sheirbhísí airgeadais dá dtagraítear i gCaibidil 1, Roinn 2, pointe 11.1, pointe (j), d’Iarscríbhinn I a ghabhann le Rialachán (AE, Euratom) 2018/1046. Ceapadh príomhdhéileálaithe incháilithe ina gcomhaltaí den tsindeacáit le haghaidh idirbheart eisiúna sonrach, ba cheart, dá bhrí sin, é a bheith bunaithe ar nós imeachta idirbheartaithe gan fógra conartha a fhoilsiú roimh ré. Ba cheart seoladh iarrata ar thograí chuig déileálaithe incháilithe agus meastóireacht ar na tograí a fhaigheann an Coimisiún a bheith san áireamh sa nós imeachta sin.
|
|
(15)
|
Agus an ardmhinicíocht á cur san áireamh lena meastar a bhainfidh an Coimisiún leas as na margaí caipitil, is gá sásra rianúil tapa éifeachtúil a bhunú chun bainc a cheapadh mar phríomhbhainisteoirí agus comh-phríomhbhainisteoirí le haghaidh idirbhearta sindeacáite. Is gá, dá bhrí sin, bonn cothrom trédhearcach a chur ar fáil chun an iarraidh ar thograí a theorannú d’fhothacar de na príomhdhéileálaithe atá incháilithe le páirt a ghlacadh i sindeacáití. Tá gá leis an roghnú breise sin chun cothromaíocht a bhaint amach idir an gá atá le hiomaíocht sa nós imeachta soláthair maidir le seirbhísí chun tacú leis an tsindeacáit agus an gá atá le hidirbhearta atá íogair ó thaobh ama de a ullmhú go héifeachtúil, agus chun dúbláil a sheachaint in iarracht na bpríomhdhéileálaithe i leith tairiscintí ar shainorduithe sindeacáite. Ba cheart roghnú na mbanc sin a bheith bunaithe ar chritéir cháilíochtúla agus chainníochtúla, a bhaineann le cumas cruthaithe na bpríomhdhéileálaithe incháilithe tacú le heisiúint cheannasach agus fhornáisiúnta i mbunmhargaí agus i margaí tánaisteacha, agus a gcumas urrúis fiachais a dháileadh ar infheisteoirí. Leis an bpróiseas sin, ba cheart sásra uainíochta a chur ar fáil freisin lena n-áiritheofaí go mbeadh deis chothrom ar rannpháirtíocht thar gach príomhdhéileálaí incháilithe.
|
|
(16)
|
Agus an gá le leasanna airgeadais an Aontais a chosaint á chur san áireamh, ba cheart rialacha faireacháin a bhunú chun comhlíontacht na gcomhaltaí de líonra na bpríomhdhéileálaithe leis na hoibleagáidí a leagtar amach faoin gCinneadh seo agus le forálacha ábhartha eile is infheidhme a áirithiú, go háirithe na téarmaí agus coinníollacha ginearálta. Ba cheart baint a bheith ag an Oifig Eorpach Frith-Chalaoise (OLAF) leis an maoirseacht sin, i gcás inarb iomchuí.
|
|
(17)
|
Ní bhaineann roghnú contrapháirtithe airgeadais le gníomhaíochtaí iasachtaíochta agus bainistíochta fiachais a dhéantar trí institiúidí poiblí agus ardáin leictreonacha. Ar an gcúis sin, níor cheart feidhm a bheith ag an gCinneadh seo maidir leo,
|
TAR ÉIS AN CINNEADH SEO A GHLACADH:
CAIBIDIL 1
ÁBHAR, RAON FEIDHME AGUS SAINMHÍNITHE
Airteagal 1
1. Leis an gCinneadh seo, bunaítear líonra na bpríomhdhéileálaithe agus leagtar síos na critéir incháilitheachta agus na forálacha nós imeachta maidir le roghnú a chomhaltaí chomh maith le cearta agus oibleagáidí na gcomhaltaí sin.
2. Tá feidhm ag an gCinneadh seo maidir le haon ghníomhaíocht iasachtaíochta agus bainistíochta fiachais a dhéanann an Coimisiún thar ceann an Aontais agus Euratom, i gcás ina roghnaíonn an Coimisiún contrapháirtithe airgeadais príobháideacha.
Airteagal 2
Chun críocha an Chinnidh seo, tá feidhm ag na sainmhínithe seo a leanas:
|
(1)
|
ciallaíonn “ceant” próiseas eisiúna urrúis fiachais an Aontais agus Euratom bunaithe ar thairiscintí iomaíocha trí ardán ceantála ar an mbunmhargadh;
|
|
(2)
|
ciallaíonn “cláir iasachtaíochta” cláir an Aontais agus Euratom lena bhfuil baint ag gníomhaíochtaí iasachtaíochta ar na margaí airgeadais, go háirithe cúnamh airgeadais arna chinneadh i gcomhréir le Rialachán (AE) Uimh. 407/2010, Rialachán (CE) Uimh. 332/2002, na Cinntí ó Pharlaimint na hEorpa agus ón gComhairle lena gcuirtear cúnamh macrairgeadais ar fáil do thíortha éagsúla ar bhonn soláthair i gcomhréir le Rialachán (CE, Euratom) Uimh. 480/2009 nó Cinneadh (AE) 2020/701, mar aon le Rialachán (AE) 2020/672, clár Euratom faoi Chinneadh 77/270/Euratom, agus iasachtaíocht ar bhonn Airteagal 5 de Chinneadh (AE, Euratom) 2020/2053;
|
|
(3)
|
ciallaíonn “institiúid creidmheasa” institiúid creidmheasa mar a shainmhínítear in Airteagal 4, mír 1 (1), de Rialachán (AE) Uimh. 575/2013 ó Pharlaimint na hEorpa agus ón gComhairle (13);
|
|
(4)
|
ciallaíonn “urrúis fiachais” nótaí agus/nó ionstraimí airgeadais gearrthéarmacha, amhail billí státchiste, chomh maith le haon ionstraim airgeadais eile, arna n-eisiúint ag an Aontas agus/nó ag Euratom;
|
|
(5)
|
ciallaíonn “comhaltaí de líonra na bpríomhdhéileálaithe” aon institiúid creidmheasa a chomhlíonann na critéir incháilitheachta a leagtar amach in Airteagal 4 agus a áirítear sa liosta dá dtagraítear in Airteagal 11;
|
|
(6)
|
ciallaíonn “eisitheoir fornáisiúnta Eorpach” Banc Forbartha Chomhairle na hEorpa, an tSaoráid Eorpach um Chobhsaíocht Airgeadais, an Sásra Cobhsaíochta Eorpach, an Banc Eorpach Infheistíochta agus an Banc Nordach Infheistíochta;
|
|
(7)
|
ciallaíonn “cleamhnaí” aon eintiteas ar leis an ngrúpa céanna é mar a shainítear in Airteagal 2(12) de Threoir 2002/87/CÉ (14).
|
Airteagal 3
Bunú líonra na bpríomhdhéileálaithe
Is éard a bheidh i líonra príomhdhéileálaithe an Aontais (“líonra na bpríomhdhéileálaithe”) grúpa d’institiúidí creidmheasa a bheidh incháilithe le páirt a ghlacadh sna gníomhaíochtaí iasachtaíochta agus bainistíochta fiachais seo a leanas de chuid an Choimisiúin:
|
(a)
|
urrúis fiachais a láithriú ar na príomhmhargaí caipitil, go háirithe trí cheantanna agus idirbhearta sindeacáite;
|
|
(b)
|
leachtacht an Aontais agus urrúis fiachais Euratom a chur chun cinn ar na margaí airgeadais;
|
|
(c)
|
comhairle chóir agus faisnéis margaidh a sholáthar don Choimisiún;
|
|
(d)
|
láithriú urrúis fiachais an Aontais agus Euratom a chur chun cinn agus a fhorbairt.
|
CAIBIDIL 2
COMHALTAS I LÍONRA NA bPRÍOMHDHÉILEÁLAITHE
Airteagal 4
Critéir incháilitheachta le haghaidh líonra na bpríomhdhéileálaithe
Institiúidí creidmheasa a chomhlíonann na critéir seo a leanas, beidh siad incháilithe le haghaidh comhaltas i líonra na bpríomhdhéileálaithe:
|
(a)
|
má tá siad ina n-eintitis dhlíthiúla atá bunaithe agus a bhfuil a gceannoifig acu san Aontas nó i dtír de chuid an Limistéir Eorpaigh Eacnamaíoch;
|
|
(b)
|
má tá siad údaraithe gnó institiúide creidmheasa a dhéanamh san Aontas i gcomhréir le Treoir 2013/36/AE ó Pharlaimint na hEorpa agus ón gComhairle (15) agus má dhéanann údarás inniúil de chuid an Aontais maoirseacht orthu; agus
|
|
(c)
|
má tá siad ina gcomhaltaí de líonra príomhdhéileálaithe Eorpach ceannasach nó fornáisiúnta arna bhunú le bheith ina chontrapháirtí de chuid Ballstáit nó de chuid eisitheoir fornáisiúnta Eorpach. Chun críoch an Chinnidh seo, beartófar go mbeidh líonra príomhdhéileálaithe Eorpach ceannasach nó fornáisiúnta ina cheann de na heintitis seo a leanas:
|
(i)
|
líonra, grúpa nó córas eagraithe d’institiúidí airgeadais arna gceapadh ag eisitheoir ceannasach nó fornáisiúnta chun fónamh mar chontrapháirtí margaidh i gcreat bhainistiú an fhiachais phoiblí, a mbaineann a gcomhaltas de ghnáth le heisiúintí urrús fiachais phoiblí trí cheantanna;
|
|
(ii)
|
sásra príomhdhéileála atá comhionann go substaintiúil leis an líonra, an grúpa nó an córas eagraithe dá dtagraítear i bpointe (i).
|
|
Airteagal 5
Gabhfaidh comhaltaí de líonra na bpríomhdhéileálaithe na gealltanais seo a leanas orthu féin:
|
(a)
|
íosmheán ualaithe de 0,05 % de na méideanna a chuireann an tAontas agus/nó Euratom ar ceant a cheannach ar bhonn leathbhliantúil i gcomhréir le cuid A den Iarscríbhinn;
|
|
(b)
|
cloí leis an oibleagáid na méideanna a thrádáiltear ar urrúis fiachais an Aontais agus Euratom a thuairisciú don Choimisiún go cruinn, go tráthúil agus go hiomlán ar bhonn míosúil de réir na formáide comhchuibhithe tuairiscithe maidir le trádáil ar mhargadh tánaisteach fiachais cheannasaigh na hEorpa arna bunú ag an bhFochoiste um Margaí Fiachais Cheannasaigh de chuid Choiste Eacnamaíoch agus Airgeadais an Aontais Eorpaigh. Déanfar cáilíocht an tuairiscithe a mheasúnú go tráthrialta agus cuirfear na torthaí in iúl don phríomhdhéileálaí lena mbaineann. Cuirfear in iúl don phríomhdhéileálaí mura bhfuil na sonraí a sholáthraítear cruinn;
|
|
(c)
|
cóip shínithe de “Théarmaí agus coinníollacha ginearálta le haghaidh phríomhdhéileálaithe an Aontais Eorpaigh” (“GTC”) a chur isteach;
|
|
(d)
|
a áirithiú go ndéanfar athbhreithniú go ráithiúil ar na húdaruithe trádála a chuirfear ar fáil dá phearsanra trádála agus go mbeidh siad i bhfeidhm go bailí;
|
|
(e)
|
cloí le cleachtais agus eitic an mhargaidh, go háirithe
|
i.
|
Comhlíonfaidh príomhdhéileálaithe na rialacha iompair agus na caighdeáin is airde i gcleachtais an mhargaidh is infheidhme maidir lena gcuid oibríochtaí i ngnó ioncaim sheasta in EUR.
|
|
ii.
|
Maidir le hullmhacht, neodracht margaidh agus cur i bhfeidhm ordúil agus éifeachtúil, déanfaidh an Coimisiún meastóireacht ar iompar na bpríomhdhéileálaithe le linn idirbhearta sindeacáite agus oibríochtaí bainistíochta fiachais eile a bheith á ndéanamh;
|
|
iii.
|
Tabharfaidh gach príomhdhéileálaí fógra láithreach don Choimisiún faoi aon imeachtaí arna dtionscnamh ina choinne ag údarás inniúil de chuid Ballstáit maidir leis an ngníomhaíocht a dhéanann an príomhdhéileálaí mar institiúid creidmheasa. Tabharfaidh gach príomhdhéileálaí fógra don Choimisiún faoi aon bheart nó aon chinneadh a ghlacfar mar thoradh ar na himeachtaí sin;
|
|
iv.
|
Tabharfaidh gach príomhdhéileálaí fógra don Choimisiún láithreach má chiontaítear an príomhdhéileálaí nó ceann dá chleamhnaithe i gcúiseamh coiriúil, lena n-áirítear imghabháil cánach, nó má tá sé faoi réir smachtbhannaí riaracháin nó araíonachta, nó má chuirtear ar fionraí é nó má eisiatar é ó eagraíocht tionscail in aon Bhallstát;
|
|
v.
|
Cuirfidh na príomhdhéileálaithe agus a gcleamhnaithe bearta i bhfeidhm a bhaineann le frithsciúradh airgid (AML) agus maoiniú frithsceimhlitheoireachta (CTF) i gcomhréir leis na dlíthe agus rialacháin náisiúnta agus Aontais is infheidhme. Má shainaithníonn údarás inniúil de chuid Ballstáit aon easnaimh AML nó CTF nó má fhorchuireann sé aon smachtbhanna AML nó CTF, tabharfaidh na príomhdhéileálaithe fógra don Choimisiún láithreach agus tabharfaidh siad tuairisc faoina mbearta feabhais;
|
|
vi.
|
Áiritheoidh an príomhdhéileálaí nach ndéanfaidh sé idirbhearta a thabhairt i gcrích a bhaineann le hurrúis fiachais de chuid an Aontais agus Euratom, lena mbainfeadh aon chontrapháirtí atá ionchorpraithe nó bunaithe i dtír a áirítear ar liosta an Aontais de dhlínsí neamh-chomhoibríocha chun críoch cánach nó a shainaithnítear mar thríú tíortha ardriosca de bhun Airteagal 9(2) de Threoir (AE) Uimh. 2015/849 agus a liostaítear i Rialachán Tarmligthe (AE) 2016/1675 nó nach gcomhlíonann go héifeachtach na caighdeáin chánach de chuid an Aontais nó atá comhaontaithe go hidirnáisiúnta maidir le trédhearcacht agus malartú faisnéise agus sáruithe ar chórais smachtbhannaí, go háirithe bearta sriantacha faoi Airteagal 215 CFAE.
|
|
|
(f)
|
déileáil faoi rún leis an bhfaisnéis uile a fhaightear ón gCoimisiún.
|
Airteagal 6
Téarmaí agus coinníollacha ginearálta
1. Beidh feidhm ag GTC maidir le haon ghníomhaíocht iasachtaíochta agus bainistíochta fiachais a dhéanann an Coimisiún faoi na cláir iasachtaíochta faoin gCinneadh seo.
2. Déanfar an méid seo a leanas le GTC, i gcomhréir leis an gCinneadh seo:
|
(a)
|
sonraí na n-oibleagáidí a bhunú ar feadh fhad na rannpháirtíochta i líonra na bpríomhdhéileálaithe;
|
|
(b)
|
inneachar agus nós imeachta an athbhreithnithe bhliantúil a bhunú;
|
|
(c)
|
sonraí na n-oibleagáidí tuairiscithe a bhunú;
|
|
(d)
|
rialacha a bhunú maidir le rialuithe;
|
|
(e)
|
sonraí na rialacha agus an nós imeachta a bhunú maidir le comhaltas a chur ar fionraí, maidir leis an bhfionraí sin a bhaint, agus maidir le heisiamh ó líonra na bpríomhdhéileálaithe; agus
|
|
(f)
|
an fhéidearthacht tarraingt siar as líonra na bpríomhdhéileálaithe a rialáil.
|
3. Déanfar aon teorainn ama a ríomh mar seo a leanas:
|
(a)
|
i gcás ina sloinntear teorainn ama i laethanta nó i míonna ó dháta nó ó theagmhas áirithe, ní áireofar an lá ar a dtiteann an dáta sin nó ar a dtarlaíonn an teagmhas sin nó an mhí ina bhfuil an dáta sin nó ina dtarlaíonn an teagmhas sin mar lá nó mí laistigh den teorainn ama;
|
|
(b)
|
laethanta gnó amháin a bheidh sna teorainneacha ama arna sloinneadh i laethanta. Cinnfear laethanta gnó i gcomhréir le féilire na laethanta saoire poiblí agus bainc i Lucsamburg (https://www.abbl.lu/fr/topic/bank-holidays/);
|
|
(c)
|
tiocfaidh deireadh le teorainn ama a shloinntear i míonna nuair a rachaidh an lá sa mhí dheiridh in éag a chomhfhreagraíonn don lá céanna ar ar thit an dáta nó ar ar tharla an teagmhas ónar ríomhadh an teorainn ama.
|
|
(d)
|
más rud é, i dteorainn ama a shloinntear i míonna, nach lá sa mhí dheiridh é an lá ar ar cheart don tréimhse críochnú, críochnóidh an teorainn ama nuair a thiocfaidh deireadh le lá deiridh na míosa sin;
|
|
(e)
|
má théann am a shloinntear i míonna in éag ar lá saoire poiblí nó bainc, cuirfear síneadh leis go dtí deireadh an chéad lae gnó ina dhiaidh sin.
|
Airteagal 7
Cearta na gcomhaltaí de líonra na bpríomhdhéileálaithe
Tá comhaltaí de líonra na bpríomhdhéileálaithe i dteideal na gceart seo a leanas:
|
(a)
|
fógraíocht a dhéanamh orthu féin mar “Chomhalta de Líonra Príomh-Dhéileálaithe an Aontais Eorpaigh”;
|
|
(b)
|
páirt a ghlacadh agus tairiscint a dhéanamh in aon cheant ar urrúis fiachais de chuid an Aontais nó Euratom;
|
|
(c)
|
aiseolas maidir lena bhfeidhmíocht a fháil ar bhonn rialta, uair sa bhliain ar a laghad, go háirithe i ndáil lena rangú sna ceantanna agus sna margaí tánaisteacha; beidh an t-aiseolas sin bunaithe ar an bpróiseas meastóireachta inmheánach dá dtagraítear in Airteagal 11 le critéir oibiachtúla atá le cur in iúl do na príomhdhéileálaithe;
|
|
(d)
|
gan dochar do Chaibidil 3, a bheith incháilithe le haghaidh oibríochtaí bainistíochta fiachais, lena n-áirítear na hoibríochtaí seo a leanas:
|
(i)
|
láithrithe príobháideacha;
|
|
(ii)
|
idirbhearta athcheannaigh mar a shainítear in Airteagal 3(9) de Rialachán (AE) 2015/2365 ó Pharlaimint na hEorpa agus ón gComhairle (16);
|
|
(iii)
|
babhtálacha mar a shainítear i Roinn 1, pointe 10, d’Iarscríbhinn III a ghabhann le Rialachán Tarmligthe (AE) 2017/583 ón gCoimisiún (17).
|
|
|
(e)
|
An ceart éirí as a chomhaltas i líonra na bpríomhdhéileálaithe tráth ar bith trí fhógra a thabhairt don Choimisiún ina leith. Gabhfaidh éifeacht leis an tarraingt siar an chéad lá gnó den dara mí tar éis dháta an fhógra.
|
CAIBIDIL 3
PRÍOMHSHAINORDUITHE AGUS COMH-PHRÍOMHSHAINORDUITHE LE hAGHAIDH IDIRBHEARTA SINDEACÁITE
Airteagal 8
Critéir incháilitheachta le haghaidh príomhshainorduithe agus comh-phríomhshainorduithe le haghaidh idirbhearta sindeacáite
Tá comhaltaí de líonra na bpríomhdhéileálaithe incháilithe le feidhmiú mar phríomhbhainisteoirí agus comh-phríomhbhainisteoirí i gcomhair idirbhearta sindeacáite, faoi réir chomhlíonadh na gcritéar seo a leanas:
|
(a)
|
i gcás inar cheannaigh siad ar a laghad 2,00 % de na méideanna arna gceantáil ag an Aontas agus Euratom, ar mheán ualaithe bunaithe ar na trí cheant dheireanacha ar bhonn leanúnach;
|
|
(b)
|
i gcás ina bhfuil siad tar éis fianaise a sholáthar, bunaithe ar na sonraí idirbheartaíochta arna dtuairisciú i gcomhréir leis an gCinneadh seo, go bhfuil sciar 2,00 % den mhargadh ar a laghad acu in urrúis fiachais de chuid an Aontais agus Euratom ar na margaí tánaisteacha;
|
|
(c)
|
i gcás ina bhfuil siad tar éis comhaontú leis na téarmaí agus coinníollacha ginearálta le haghaidh príomhshainorduithe agus comh-phríomhshainorduithe le haghaidh idirbhearta sindeacáite, a d’fhéadfadh a bheith ina gcuid de GTC; agus
|
|
(d)
|
i gcás ina bhfuil siad tar éis comhaontú le sceideal na dtáillí.
|
Airteagal 9
Beidh feidhm ag sceideal na dtáillí dá dtagraítear i bpointe (d) d’Airteagal 8 maidir le hoibríochtaí iasachtaíochta agus bainistíochta fiachais. Le sceideal na dtáillí bunófar luach saothair a bheidh i gcomhréir leis na costais agus na rioscaí a thabhaíonn na príomhdhéileálaithe incháilithe agus oibríochtaí iasachtaíochta agus bainistíochta fiachais de chuid an Aontais agus Euratom á gcur i gcrích, agus cost-éifeachtúlacht á háirithiú don Aontas an tráth céanna agus aird á tabhairt ar shainiúlachtaí maidir le heisiúint fiachais de chuid an Aontais, go háirithe méideanna agus aibíochtaí. Déanfar tagairt do sceideal na dtáillí in iarscríbhinn a ghabhann leis na téarmaí agus coinníollacha ginearálta maidir le príomhshainorduithe agus comh-phríomhshainorduithe le haghaidh idirbhearta sindeacáite.
Airteagal 10
Maidir le comhaltaí de líonra na bpríomhdhéileálaithe a chomhlíonann na critéir incháilitheachta a leagtar síos in Airteagal 8, féadfar iad a roghnú ina bpríomhshainorduithe agus ina gcomh-phríomhshainorduithe le haghaidh idirbhearta sindeacáite ar bhonn an mheasúnaithe ar a dtiomantas aon cheann de na gníomhaíochtaí seo a leanas a dhéanamh:
|
(a)
|
ar bhonn na hiarrachta is fearr, leachtacht urrús fiachais de chuid an Aontais agus Euratom a chur chun cinn le gníomhaíocht cruthaithe margaidh, ag cur, ar an gcaoi sin, le praghas-aimsiú, le héifeachtúlacht an mhargaidh thánaistigh agus le cur i gcrích ordúil trádála;
|
|
(b)
|
comhairle agus faisnéis mhargaidh chothrom a chur ar fáil don Choimisiún d’fhonn na cláir iasachtaíochta a cheapadh agus a chur chun feidhme, agus, go háirithe, comhairle a chur ar fáil sula bhfoilseofar an clár cistithe agus i gcomhthéacs ullmhú na n-idirbheart bainistíochta fiachais faoi na cláir iasachtaíochta;
|
|
(c)
|
faisnéis a chur ar fáil go rialta don Choimisiún maidir le treochtaí an mhargaidh, le hanailís agus taighde ar fheidhmiú na margaí ioncaim sheasta agus, go háirithe, leis na ranna ceannasacha agus fornáisiúnta agus na gníomhaireachtaí;
|
|
(d)
|
láithriú urrúis fiachais an Aontais agus Euratom a chur chun cinn agus a fhorbairt laistigh de phobal éagsúlaithe leathan infheisteoirí mar chuid dá straitéis ghnó.
|
Airteagal 11
1. Roghnófar sindeacáití de bhun Chaibidil 1, Roinn 2, pointe 11.1, pointe (j), d’Iarscríbhinn I a ghabhann le Rialachán (AE, Euratom) 2018/1046 i nós imeachta idirbheartaithe gan fógra conartha a fhoilsiú roimh ré.
2. Seolfaidh an Coimisiún na hiarrataí ar thograí chuig foghrúpa de chomhaltaí incháilithe de líonra na bpríomhdhéileálaithe a chomhlíonann na critéir a leagtar síos in Airteagail 8 agus 10, agus tairiscint á sireadh ar rannpháirtíocht mar phríomhbhainisteoirí agus comh-phríomhbhainisteoirí.
3. Roghnú an fhoghrúpa de phríomhdhéileálaithe incháilithe a ndéanfar an iarraidh ar thograí a sheoladh chucu, bunófar é ar chritéir cháilíochtúla agus chainníochtúla oibiachtúla, a bhaineann le cumas cruthaithe na bpríomhdhéileálaithe incháilithe tacú le heisiúint cheannasach agus fhornáisiúnta i mbunmhargaí agus i margaí tánaisteacha, agus a gcumas urrúis fiachais a dháileadh ar infheisteoirí. Áireofar sna critéir sin freisin measúnú ar fheidhmíocht na ngníomhaíochtaí a liostaítear in Airteagal 10. Cuirfidh an Coimisiún critéar uainíochta chun feidhme chun a áirithiú go n-iarrfar go rialta ar na comhaltaí incháilithe uile de líonra na bpríomhdhéileálaithe freagairt ar iarrataí ar thograí.
4. Déanfar na tograí a gheofar ó na comhaltaí incháilithe dá dtagraítear i mír 2 a mheas ar bhonn sraith bhreise de chritéir cháilíochtúla agus chainníochtúla oibiachtúla agus i bhfianaise bunú sindeacáite, arb é a chomhdhéanamh an teaglaim is fearr bainisteoirí is féidir chun idirbheart ar leith a chur i gcrích ar an mbealach is fearr.
5. Na critéir maidir le hiarrataí ar thograí a tharchur agus maidir le meastóireacht a dhéanamh ar na tograí a gheofar, cuirfear in iúl iad d’fhoghrúpa chomhaltaí líonra na bpríomhdhéileálaithe mar aon leis an iarraidh ar thograí.
CAIBIDIL 4
IARRATAS AR CHOMHALTAS AGUS BUNÚ AN LIOSTA DE CHOMHALTAÍ LÍONRA NA bPRÍOMHDHÉILEÁLAITHE AGUS FAIREACHÁN
Airteagal 12
Iarratas ar chomhaltas agus liosta na bpríomhdhéileálaithe
1. Cuirfidh institiúidí creidmheasa leasmhara iarratas ar chomhaltas i líonra na bpríomhdhéileálaithe faoi bhráid an Choimisiúin trí bhíthin an fhoirm iarratais agus an seicliosta atá i gceangal maidir leis na critéir iontrála atá ar fáil ar shuíomh gréasáin an Choimisiúin a líonadh agus a chur isteach.
2. Áireofar cruthúnas go bhfuil Airteagail 4 agus 5 á gcomhlíonadh in iarratais ar iontráil i líonra na bpríomhdhéileálaithe. Chuige sin, tá an fhianaise agus na doiciméid tacaíochta atá le cur isteach mionsonraithe san fhoirm iarratais agus sna hiarscríbhinní a ghabhann léi.
3. I gcás foirm iarratais neamhiomlán, faisnéis neamhiomlán nó sonraí neamhleora, féadfar a iarraidh ar an iarratasóir an fhaisnéis bhreise is gá a chur isteach. Mura gcuirtear an fhaisnéis bhreise riachtanach ar fáil laistigh de sprioc-am sonraithe, diúltófar an fhoirm iarratais.
4. Má sholáthraítear faisnéis nó doiciméid atá bréagach, míthreorach nó mícheart le linn an phróisis iarratais, ní cheadófar iontráil i líonra na bpríomhdhéileálaithe nó, de réir mar a bheidh, b’fhéidir go mbeadh eisiamh ó líonra na bpríomhdhéileálaithe mar thoradh air i gcomhréir le hAirteagal 15 den Chinneadh seo.
5. San fhoirm iarratais, dearbhóidh gach príomhdhéileálaí go nglacann sé le GTC, agus ar an gcaoi sin admhóidh sé a nádúr ceangailteach agus a ghealltanas dóibh.
6. Síneoidh ionadaí cuí-údaraithe de chuid an phríomhdhéileálaí an fhoirm iarratais agus GTC agus déanfaidh sé GTC a inisiliú ar gach leathanach freisin, ionadaí ar ionadaí é atá de chumhacht aige, bunaithe ar na dlíthe is infheidhme de chuid na dlínse ábhartha agus ar na doiciméid chorparáideacha ábhartha, gealltanas a thabhairt go bailí thar ceann an phríomhdhéileálaí sin chun críoch chomhlíonadh na n-oibleagáidí agus na ngníomhaíochtaí faoi GTC. Chun na críche sin, soláthrófar sliocht as clár ábhartha na gcuideachtaí nuair a bheidh an fhoirm iarratais á cur isteach.
7. Déanfar aon chumarsáid, aon fhógra nó aon fhaisnéis a bhaineann leis an gCinneadh seo agus le GTC ag seoladh an fhógra arna thoghadh ag príomhdhéileálaithe san fhoirm iarratais dá gcuid agus díreofar iad ar an duine a ainmnítear ann mar “chomhordaitheoir”.
Airteagal 13
Iontráil i líonra na bpríomhdhéileálaithe
1. Laistigh de dhá mhí, ar a dhéanaí, ó thíolacadh an iarratais ábhartha a ghlacfar an cinneadh maidir le cé acu iarratasóir a áireamh ar liosta na bpríomhdhéileálaithe nó gan é a áireamh. Má iarrtar ar iarratasóir faisnéis bhreise a chur isteach i gcomhréir le mír 3 d’Airteagal 12, déanfar an teorainn ama maidir le cinneadh a bhaineann leis an iarratasóir sin a chur ar fionraí go dtí an dáta a gcuirfear isteach an fhaisnéis bhreise sin. Má chuireann an t-iarratasóir in iúl don Choimisiún go measann sé go bhfuil an t-iarratas comhlánaithe, glacfar an cinneadh laistigh de dhá mhí. Cuirfear an cinneadh in iúl don iarratasóir.
Luafar sa chinneadh maidir le neamhiontráil na cúiseanna ar a bhfuil sé bunaithe.
2. Déanfar liosta nuashonraithe de chomhaltaí de líonra na bpríomhdhéileálaithe a fhoilsiú uair sa bhliain in Iris Oifigiúil an Aontais Eorpaigh.
3. D’fhonn an t-athbhreithniú bliantúil a dhéanamh, iarrfar ar na príomhdhéileálaithe ionadaíocht a dhéanamh don Choimisiún agus dearbhú a thabhairt dó go gcomhlíonann siad fós na critéir incháilitheachta go léir maidir leis an gcomhaltas a leagtar síos in Airteagal 4.
Airteagal 14
Féadfaidh an Coimisiún fíoruithe a dhéanamh, nó féadfaidh sé tríú páirtí a cheapadh chun iad a dhéanamh, chun comhlíonadh an Chinnidh seo ag comhaltaí de líonra na bpríomhdhéileálaithe a sheiceáil. Comhoibreoidh comhaltaí de líonra na bpríomhdhéileálaithe leis na fíoruithe sin agus éascóidh siad a n-iompar, go háirithe tríd an bhfaisnéis agus na sonraí is gá a chur ar fáil chomh maith le rochtain orthu.
Déanfaidh gach comhalta de líonra na bpríomhdhéileálaithe na nithe seo a leanas:
|
(a)
|
an teorainn riosca a socraíodh do ghníomhaíocht trádála urrúis fiachais an Aontais agus Euratom a chur ar fáil don Choimisiún i gcomhréir leis na téarmaí agus coinníollacha ginearálta dá dtagraítear in Airteagal 5, pointe (c), le haghaidh phríomhdhéileálaithe an Aontais;
|
|
(b)
|
fógra a thabhairt don Choimisiún faoi aon íosghrádú ag an Údarás Eorpach um Urrúis agus Margaí atá aitheanta ag gníomhaireachtaí rátála san Aontas;
|
|
(c)
|
fógra a thabhairt gan mhoill don Choimisiún maidir le haon neamh-chomhlíonadh sáraitheach i ndáil le haon chritéar incháilitheachta a leagtar síos in Airteagal 4.
|
Trí ghlacadh le GTC, tugann an príomhdhéileálaí toiliú d’iniúchtaí agus d’fhíorú a d’fhéadfadh a bheith ann maidir leis na sonraí a tharchuirtear chuig an gCoimisiún faoi chuimsiú a chuid oibleagáidí tuairiscithe, go háirithe maidir leis na sonraí a úsáidfear chun measúnú a dhéanamh ar a fheidhmíocht ar an margadh tánaisteach.
Airteagal 15
Fionraí agus eisiamh ó líonra na bpríomhdhéileálaithe
1. Is féidir comhaltas an phríomhdhéileálaí i líonra na bpríomhdhéileálaithe a chur ar fionraí sna cásanna seo a leanas:
|
(a)
|
i gcás ina ndéantar imeachtaí a thionscnamh i gcoinne príomhdhéileálaí dá dtagraítear i bhfomhír (iii) de phointe (e) d’Airteagal 5;
|
|
(b)
|
i gcás ina ndéantar nós imeachta a thionscnamh, a bhféadfadh scor comhaltais sa líonra nó an sásra dá dtagraítear i bpointe (c) d’Airteagal 4 a bheith mar thoradh air;
|
Iarrfar ar phríomhdhéileálaí le fógra réamhfhionraithe a chuid barúlacha a chur isteach laistigh de theorainn ama nach lú ná 7 lá ón bhfógra a fháil. Tiocfaidh an cinneadh maidir le fionraí i bhfeidhm an chéad lá gnó tar éis dháta an fhógra don phríomhdhéileálaí neamh-chomhlíontach.
Féadfar an fionraí a bhaint arna hiarraidh sin ón bpríomhdhéileálaí atá ar fionraí. Cuirfidh an príomhdhéileálaí fianaise leordhóthanach isteach, de réir mar is infheidhme, nach bhfuil na himeachtaí dá dtagraítear faoi phointe (a) den chéad fhomhír ar feitheamh a thuilleadh ná nár eascair smachtbhanna de chineál ar bith astu i gcoinne an déileálaí ar fionraí nó nach bhfuil an nós imeachta dá dtagraítear faoi phointe (b) den chéad fhomhír ar feitheamh a thuilleadh ná nár eascair scor comhaltais sa líonra ná sa sásra dá dtagraítear i bpointe (c) d’Airteagal 4 as. Déanfar an fhianaise a chuirfear i láthair a mheasúnú agus déanfar cinneadh ina leith laistigh de 15 lá oibre ón iarraidh a fháil.
2. Déanfar príomhdhéileálaí a eisiamh ó líonra na bpríomhdhéileálaithe sna cásanna seo a leanas:
|
(a)
|
i gcás nach gcomhlíonann príomhdhéileálaí aon cheann de na coinníollacha dá dtagraítear in Airteagal 4;
|
|
(b)
|
i gcás ina ndéantar príomhdhéileálaí a eisiamh de bhun Airteagail 135 go 142 de Rialachán (AE, Euratom) Uimh. 1046/2018 ó Pharlaimint na hEorpa agus ón gComhairle (18).
|
3. Beidh feidhm ag an nós imeachta seo a leanas maidir leis an eisiamh ó líonra na bpríomhdhéileálaithe i gcásanna a leagtar síos faoi mhír 2:
|
(a)
|
iarrfar ar an bpríomhdhéileálaí le fógra réamheisiaimh a bharúlacha a chur isteach laistigh de theorainn ama nach lú ná 7 lá ón dáta a bhfaighfear an fógra;
|
|
(b)
|
cuirfear an cinneadh maidir le heisiamh in iúl don phríomhdhéileálaí. Gabhfaidh an cinneadh maidir le heisiamh éifeacht an chéad lá gnó tar éis dháta a fhógra don phríomhdhéileálaí eisiata.
|
4. Féadfar príomhdhéileálaí a eisiamh ó líonra na bpríomhdhéileálaithe sna cásanna seo a leanas:
|
(a)
|
neamhchomhlíonadh oibleagáidí a leagtar síos faoi Airteagal 5;
|
|
(b)
|
gealltanas maidir le sárú dá dtagraítear in Airteagal 30 de Rialachán (AE) 596/2014 ó Pharlaimint na hEorpa agus ón gComhairle (19), mar a cinneadh i gcinneadh críochnaitheach arna ghlacadh ag údarás inniúil ábhartha;
|
|
(c)
|
cinneadh críochnaitheach arna dhéanamh ag an údarás inniúil mar thoradh ar aon imeacht dá dtagraítear faoi fhomhír (v) de phointe (e) d’Airteagal 5, nó a bhaineann le dlíthe agus rialacháin AML agus CTF;
|
|
(d)
|
neamhchomhlíonadh fhomhír (vi) de phointe (e) d’Airteagal 5; nó
|
|
(e)
|
nochtadh faisnéise, atá faoi réir oibleagáid rúndachta faoi phointe (f) d’Airteagal 5.
|
5. Beidh feidhm ag an nós imeachta seo a leanas maidir leis na cásanna a leagtar síos faoi mhír 4:
|
(a)
|
Gheobhaidh an príomhdhéileálaí lena mbaineann fógra ina sonrófar na forais atá le neamhchomhlíonadh agus ina leagfar síos teorainn ama maidir le barúlacha a chur isteach nach giorra ná 7 lá ón dáta a bhfaighidh an príomhdhéileálaí an fógra.
|
|
(b)
|
Agus na barúlacha a cuireadh isteach, más ann dóibh, á gcur san áireamh, gheobhaidh an príomhdhéileálaí fógra rabhaidh, ina n-iarrfar air na bearta ceartaitheacha ábhartha a dhéanamh chun comhlíonadh na gcritéar agus/nó na n-oibleagáidí ábhartha a athbhunú agus/nó a áirithiú.
|
|
(c)
|
Cuirfidh an príomhdhéileálaí na bearta ceartaitheacha a bhfuil sé ar intinn aige a ghlacadh in iúl, laistigh de sprioc-am socraithe, nach giorra ná seachtain amháin ón dáta a bhfaighfear an fógra rabhaidh.
|
|
(d)
|
Mura gcuirfear aon fhaisnéis in iúl laistigh den teorainn ama dá dtagraítear faoi mhír (c), gheobhaidh an príomhdhéileálaí fógra rabhaidh den dara huair, ina n-iarrfar air na bearta ceartaitheacha dá dtagraítear i mír (b) a dhéanamh. Beidh feidhm mutatis mutandis ag mír (c).
|
|
(e)
|
Cuirfidh an príomhdhéileálaí fianaise leordhóthanach ar fáil gur cuireadh na bearta ceartaitheacha chun feidhme laistigh de sprioc-am socraithe nach giorra ná mí amháin ón dáta a gcuirfear an fógra rabhaidh dá dtagraítear i bpointe (b) in iúl. I gcás nach gcuirtear aon fhianaise ar fáil nó nach gcuirtear fianaise leordhóthanach ar fáil, déanfar an fógra réamheisiaimh a dhíriú ar an bpríomhdhéileálaí mar aon leis an iarraidh barúlacha a chur isteach laistigh de theorainn ama nach lú ná 7 lá ón bhfógra a fháil. Agus na barúlacha a cuireadh isteach, más ann dóibh, á gcur san áireamh, féadfar cinneadh a dhéanamh an príomhdhéileálaí neamh-chomhlíontach a eisiamh ó líonra na bpríomhdhéileálaithe.
|
|
(f)
|
Luafar sa chinneadh maidir le heisiamh na cúiseanna ar a bhfuil an t-eisiamh bunaithe.
|
|
(g)
|
Gabhfaidh an cinneadh maidir le heisiamh éifeacht an chéad lá gnó tar éis dháta a fhógra don phríomhdhéileálaí eisiata.
|
6. Maidir le comhaltas a chur ar fionraí de bhun mhír 1, maidir le heisiamh ó chomhaltas de bhun mhíreanna 2 go 6 agus maidir le héirí as comhaltas i líonra na bpríomhdhéileálaithe de bhun phointe (e) d’Airteagal 7, ní bheidh aon éifeacht acu ar chearta ná ar oibleagáidí an phríomhdhéileálaí lena mbaineann i ndáil le conarthaí a tugadh i gcrích roimh an dáta éifeachtach maidir le heisiamh, fionraí nó éirí as, faoi seach.
7. Ní bheidh fionraí oibleagáidí faoi phointe (f) d’Airteagal 5 agus faoi Airteagal 14 i gceist leis an bhfionraí.
CAIBIDIL 5
FORÁLACHA IDIRTHRÉIMHSEACHA
Airteagal 16
Tar éis dháta foilsithe an liosta i gcomhréir le hAirteagal 13, agus go dtí go mbeidh dóthain sonraí ar fáil ag an gCoimisiún chun measúnú a dhéanamh ar chomhlíonadh na gcritéar incháilitheachta faoi Airteagal 8, beidh gach comhalta de líonra na bpríomhdhéileálaithe a chomhlíonann na critéir incháilitheachta faoi Airteagal 4 incháilithe don phríomhshainordú agus don chomh-phríomhshainordú.
Beidh feidhm ag an gCinneadh seo maidir le gníomhaíochtaí iasachtaíochta agus bainistíochta fiachais an Choimisiúin a sheolfar tar éis dháta chéadfhoilsithe an liosta i gcomhréir le hAirteagal 13. Go dtí an dáta sin, ceapfar déileálaithe chun críche gníomhaíochtaí iasachtaíochta agus bainistíochta fiachais ar bhonn an chreata oibríochtúil inmheánaigh atá i bhfeidhm faoi na cláir iasachtaíochta atá ann cheana.
Airteagal 17
Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.
Arna dhéanamh sa Bhruiséil, 14 Aibreán 2021.
Thar ceann an Choimisiúin
An tUachtarán
Ursula VON DER LEYEN
(1)
IO L 193, 30.7.2018, lch. 1.
(2) Cinneadh (AE, Euratom) 2020/2053 ón gComhairle an 14 Nollaig 2020 maidir le córas acmhainní dílse an Aontais Eorpaigh agus lena n-aisghairtear Cinneadh 2014/335/AE, Euratom (IO L 424, 15.12.2020, lch. 1).
(3) Rialachán (AE) 2020/2094 ón gComhairle an 14 Nollaig 2020 lena mbunaítear Ionstraim Théarnamh de chuid an Aontais Eorpaigh chun tacú leis an téarnamh i ndiaidh ghéarchéim COVID-19 (IO L 433 I, 22.12.2020, lch. 23).
(4) Rialachán (AE) 2021/241 ó Pharlaimint na hEorpa agus ón gComhairle an 12 Feabhra 2021 lena mbunaítear an tSaoráid Téarnaimh agus Athléimneachta (IO L 57, 18.2.2021, lch. 17).
(5) Rialachán (AE) Uimh. 407/2010 ón gComhairle an 11 Bealtaine 2010 lena mbunaítear Sásra Cobhsaíochta Airgeadais Eorpach (IO L 118, 12.5.2010, lch. 1).
(6) Rialachán (CE) Uimh. 332/2002 ón gComhairle an 18 Feabhra 2002 lena mbunaítear saoráid a sholáthraíonn cúnamh airgeadais meántéarmach faoi chomhair chomhardú íocaíochtaí na mBallstát (IO L 53, 23.2.2002, lch. 1).
(7) Rialachán (CE, Euratom) Uimh. 480/2009 ón gComhairle an 25 Bealtaine 2009 lena mbunaítear Ciste Ráthaíochta do ghníomhaíochtaí seachtracha (IO L 145, 10.6.2009, lch. 10).
(8) Cinneadh (AE) 2020/701 ó Pharlaimint na hEorpa agus ón gComhairle an 25 Bealtaine 2020 maidir le cúnamh macrairgeadais a sholáthar do chomhpháirtithe um méadú agus comhpháirtithe comharsanachta i gcomhthéacs phaindéim COVID-19 (IO L 165, 27.5.2020, lch. 31).
(9) Rialachán (AE) 2020/672 ón gComhairle an 19 Bealtaine 2020 maidir le bunú ionstraime Eorpaí le haghaidh tacaíocht shealadach chun rioscaí dífhostaíochta a mhaolú i gcás éigeandála (SURE) ag eascairt as ráig COVID-19 (IO L 159, 20.5.2020, lch. 1).
(10) Cinneadh 77/270/Euratom ón gComhairle an 29 Márta 1977 ag cumhachtú don Choimisiún iasachtaí Euratom a eisiúint chun rannchuidiú le stáisiúin núicléacha a mhaoiniú (IO L 88, 6.4.1977, lch. 9).
(11) Féach, go háirithe, Rialachán (AE) Uimh. 575/2013 ó Pharlaimint na hEorpa agus ón gComhairle an 26 Meitheamh 2013 maidir le ceanglais stuamachta i gcomhair institiúidí creidmheasa agus gnólachtaí infheistíochta agus lena leasaítear Rialachán (AE) Uimh. 648/2012 (IO L 176, 27.6.2013, lch. 1).
(12) Féach, go háirithe, Rialachán (AE) Uimh. 468/2014 ón mBanc Ceannais Eorpach an 16 Aibreán 2014 lena mbunaítear an creat le haghaidh comhar laistigh den Sásra Aonair Maoirseachta idir an Banc Ceannais Eorpach agus údaráis inniúla náisiúnta agus leis na húdaráis náisiúnta ainmnithe (Creat-Rialachán SAM) (IO L 141, 14.5.2014, lch. 1) agus Rialachán (AE) Uimh. 1024/2013 ón gComhairle an 15 Deireadh Fómhair 2013 lena dtugtar cúraimí sonracha don Bhanc Ceannais Eorpach maidir le beartais a bhaineann le maoirseacht stuamachta ar institiúidí creidmheasa (IO L 287, 29.10.2013, lch. 63).
(13) Rialachán (AE) Uimh. 575/2013 ó Pharlaimint na hEorpa agus ón gComhairle an 26 Meitheamh 2013 maidir le ceanglais stuamachta i gcomhair institiúidí creidmheasa agus gnólachtaí infheistíochta, agus lena leasaítear Rialachán (AE) Uimh. 648/2012 (IO L 176, 27.6.2013, lch. 1).
(14) Treoir 2002/87/CE ó Pharlaimint na hEorpa agus ón gComhairle an 16 Nollaig 2002 maidir le maoirseacht fhorlíontach ar institiúidí creidmheasa, ar ghnóthais árachais agus ar ghnólachtaí infheistíochta in ilchuideachta airgeadais agus lena leasaítear Treoracha 73/239/CEE, 79/267/CEE, 92/49/CEE, 92/96/CEE, 93/6/CEE agus 93/22/CEE ón gComhairle, agus Treoracha 98/78/CE agus 2000/12/CE ó Pharlaimint na hEorpa agus ón gComhairle (IO L 35, 11.2.2003).
(15) Treoir 2013/36/AE ó Pharlaimint na hEorpa agus ón gComhairle an 26 Meitheamh 2013 maidir le rochtain ar ghníomhaíocht na n-institiúidí creidmheasa agus ar mhaoirseacht stuamachta ar institiúidí creidmheasa agus ar ghnólachtaí infheistíochta, lena leasaítear Treoir 2002/87/CE agus lena n-aisghairtear Treoracha 2006/48/CE agus 2006/49/CE (IO L 176, 27.6.2013, lch. 338).
(16) Rialachán (AE) 2015/2365 ó Pharlaimint na hEorpa agus ón gComhairle an 25 Samhain 2015 maidir le trédhearcacht idirbheart maoinithe urrús agus athúsáide agus lena leasaítear Rialachán (AE) Uimh. 648/2012 (IO L 337, 23.12.2015, lch. 1).
(17) Rialachán Tarmligthe (AE) 2017/583 ón gCoimisiún an 14 Iúil 2016 lena bhforlíontar Rialachán (AE) Uimh. 600/2014 ó Pharlaimint na hEorpa agus ón gComhairle maidir le margaí in ionstraimí airgeadais a mhéid a bhaineann le caighdeáin theicniúla rialála maidir le ceanglais trédhearcachta le haghaidh ionaid trádála agus gnólachtaí infheistíochta i leith bannaí, táirgí airgeadais struchtúraithe, lamháltais astaíochtaí agus díorthach (IO L 87, 31.3.2017, lch. 229).
(18) Rialachán (AE, Euratom) 2018/1046 ó Pharlaimint na hEorpa agus ón gComhairle an 18 Iúil 2018 maidir leis na rialacha airgeadais is infheidhme maidir le buiséad ginearálta an Aontais, lena leasaítear Rialacháin (AE) Uimh. 1296/2013, (AE) Uimh. 1301/2013, (AE) Uimh. 1303/2013, (AE) Uimh. 1304/2013, (AE) Uimh. 1309/2013, (AE) Uimh. 1316/2013, (AE) Uimh. 223/2014, (AE) Uimh. 283/2014, agus Cinneadh Uimh. 541/2014/AE agus lena n-aisghairtear Rialachán (AE, Euratom) Uimh. 966/2012, (IO L 193, 30.7.2018, lch. 1).
(19) Rialachán (AE) Uimh. 596/2014 ó Pharlaimint na hEorpa agus ón gComhairle an 16 Aibreán 2014 maidir le drochúsáid mhargaidh (an rialachán maidir le drochúsáid mhargaidh) agus lena n-aisghairtear Treoir 2003/6/CE ó Pharlaimint na hEorpa agus ón gComhairle agus Treoracha 2003/124/CE, 2003/125/CE agus 2004/72/CE ón gCoimisiún (IO L 173, 12.6.2014, lch. 1).
