(1)

Ag tús 2020, chuir an Coimisiún in iúl do na Páirtithe Conarthacha sa Choinbhinsiún Réigiúnach maidir le rialacha tionscnaimh fabhracha Uile-Eora-Mheánmhara (‘an Coinbhinsiún’) nárbh fhéidir le tromlach na bPáirtithe Conarthacha deimhnithe gluaiseachta a sholáthar chun críoch tionscnaimh fhabhraigh i bhfoirm chuí, is é sin, deimhnithe arna síniú de láimh, arna stampáil ag na húdaráis chustaim i ndúch fliuch nó san fhormáid pháipéir cheart, mar gheall ar phaindéim COVID-19, ar cuireadh teagmháil idir na húdaráis chustaim agus na hoibreoirí eacnamaíocha ar fionraí lena linn i gcás roinnt Páirtithe Conarthacha.

(2)

Mheas formhór na bPáirtithe Conarthacha go raibh sé iomchuí bearta eisceachtúla a ghlacadh chun cur chun feidhme iomlán na socruithe trádála fabhracha a chumhdaítear leis an gCoinbhinsiún a áirithiú. Bhí na bearta eisceachtúla sin infheidhme ar bhonn cómhalartach ag na Comhpháirtithe Trádála a bhain úsáid as na forálacha ábhartha sna rialacha tionscnaimh.

(3)

Le linn phaindéim COVID-19, d’fhorbair nó d’oiriúnaigh roinnt Páirtithe Conarthacha córais leictreonacha a bhí ann cheana chun deimhnithe a eisiúint go leictreonach chun cothromaíocht a bhaint amach idir an gá atá le solúbthacht agus an gá atá leis na ceanglais maidir le formáid na ndeimhnithe gluaiseachta a chomhlíonadh, ceanglais a áirítear i bhFoscríbhinn I a ghabhann leis an gCoinbhinsiún.

(4)

Iarradh ar údaráis chustaim na bPáirtithe Conarthacha glacadh le deimhnithe gluaiseachta chun críoch tionscnaimh fhabhraigh, ar deimhnithe iad a eisítear go leictreonach agus síniú digiteach, stampa digiteach nó séala digiteach de chuid na n-údarás inniúil orthu, nó cóip díobh i bhfoirm páipéir nó leictreonach (iad scanta nó ar fáil ar líne) bunaithe ar an tsolúbthacht dá bhforáiltear in Airteagal 24 d’Fhoscríbhinn I a ghabhann leis an gCoinbhinsiún.

(5)

Cuireadh iarraidh ó Pháirtí Conarthach amháin in iúl don Chomhchoiste, ag an gcruinniú dá chuid a tionóladh an 16 Meitheamh 2022, go gcoinneofaí na dea-chleachtais a tugadh isteach faoi na bearta eisceachtúla a glacadh le linn phaindéim COVID-19 chun go mbainfeadh na hoibreoirí eacnamaíocha tairbhe as digitiú deimhnithe gluaiseachta.

(6)

D’admhaigh na Páirtithe Conarthacha gur taithí dhearfach a bhí sa taithí a fuarthas maidir le deimhnithe gluaiseachta a eisítear go leictreonach a úsáid sa trádáil fhabhrach faoi na bearta eisceachtúla a glacadh de bharr phaindéim COVID-19 agus gheall siad go leanfaidís de na dea-chleachtais a tugadh isteach faoi bhearta eisceachtúla den sórt sin trí oibriú le chéile chun córas comhchoiteann a thabhairt isteach a bheadh bunaithe ar chruthúnais tionscnaimh a eisítear go leictreonach agus ar chomhar riaracháin leictreonach laistigh den réigiún Uile-Eora-Mheánmhara.

(7)

An t-aistriú chuig córas lena n-eisítear deimhnithe gluaiseachta go leictreonach agus lena ndéantar foráil maidir le comhar riaracháin leictreonach faoi chuimsiú an Choinbhinsiúin, measann na Páirtithe Conarthacha gurb é atá san aistriú sin an chéad chéim i dtreo cruthúnais tionscnaimh a dhigitiú go hiomlán ar scála réigiún Uile-Eora-Mheánmhara, go háirithe i bhfianaise theacht i bhfeidhm an leasaithe ar an gCoinbhinsiún le Cinneadh Uimh. 1/2023 ón gComhchoiste (2).

(8)

Le córais atá ceaptha chun deimhnithe gluaiseachta a eisiúint go leictreonach, ba cheart an deis a thabhairt d’údaráis chustaim na bPáirtithe Conarthacha barántúlacht na ndeimhnithe sin a sheiceáil láithreach.

(9)

An 7 Nollaig 2023, ghlac an Comhchoiste Moladh Uimh. 1/2023 (3) maidir le húsáid deimhnithe gluaiseachta a eisítear go leictreonach faoi chuimsiú an Choinbhinsiúin. Dá bhrí sin, chun creat dlíthiúil soiléir a sholáthar agus chun comhsheasmhacht a áirithiú maidir le húsáid deimhnithe gluaiseachta a eisítear go leictreonach i gcomhthéacs an aistrithe ó na rialacha atá ann faoi láthair sa Choinbhinsiún go dtí rialacha athbhreithnithe an Choinbhinsiúin, a thiocfaidh i bhfeidhm ón 1 Eanáir 2025, ba cheart, dá bhrí sin, Cinneadh Uimh. 1/2023 a leasú chun na ceanglais ghinearálta maidir le cruthúnais tionscnaimh a eisítear go leictreonach a chur san áireamh i rialacha athbhreithnithe an Choinbhinsiúin,