17.8.2021   

GA

Iris Oifigiúil an Aontais Eorpaigh

L 294/11


RIALACHÁN CUR CHUN FEIDHME (AE) 2021/1370 ÓN gCOIMISIÚN

an 6 Lúnasa 2021

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir, ar feadh tréimhse áirithe, leanúint air ag agairt na faisnéise sin i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir le tuairim an Choiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 6 Lúnasa 2021.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim


(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).


IARSCRÍBHINN

Tuairisc ar na hearraí

Aicmiú (Cód AC)

Cúiseanna

(1)

(2)

(3)

Earra plánach dronuilleogach (dar toise tuairim is 2,50 m 2,50 m) atá déanta d’fhabraic teicstíle fite éadrom (snáithíní de phoileistear 100 %), é clúdaithe ar thaobh amháin le plaistigh (PVC) nach léir don tsúil lom, agus zipeanna fuaite ar an gciumhais ar thrí thaobh de lena nascadh le puball.

I bhfianaise na faisnéise atá ar an bpacáistiú, tá le tuiscint gurb é earra atá ann taobh-bhalla le haghaidh pubaill. Allmhairítear leis féin é (gan aon díon, gan aon bhalla eile agus gan aon struchtúr taca in éineacht leis).

6307 90 98

Is le rialacha ginearálta 1 agus 6 maidir le léirmhíniú na hAinmníochta Comhcheangailte (RLG), le nóta 7(f) a ghabhann le Roinn XI agus le foclaíocht chóid AC 6307 , 6307 90 agus 6307 90 98 a chinntear an t-aicmiú.

Eisiatar an t-earra ó aicmiú mar tharpól faoi chód AC 6306 12 00 , de bhrí gur d’fhabraic throm a dhéantar tarpóil de ghnáth agus go n-úsáidtear iad chun earraí a chosaint ar dhrochaimsir (féach freisin Nóta Míniúcháin an Chórais Chomhchuibhithe (NMCC) a ghabhann le ceannteideal 6306 (1)). I bhfianaise na zipeanna atá fuaite leis an earra agus i bhfianaise an ábhair éadroim atá ann, is léir nach earra é atá oiriúnach/ceaptha lena úsáid mar tharpól atá faoi chód AC 6306 12 00 .

Ina theannta sin, ní féidir an t-earra a aicmiú mar phuball faoi chód AC 6306 22 00 de bharr, as siocair na saintréithe oibiachtúla atá aige, nach bhfuil saintréith riachtanach an earra iomláin (puball) aige de réir bhrí RLG 2(a). Ní léir ach an oiread i bhfianaise a shaintréithe oibiachtúla cé acu mar chuid de phuball, de ghaiséabó nó de tháirge éigin eile atá an t-earra le húsáid.

Baineann ceannteideal 6307 le hearraí rédhéanta eile d’fhabraic theicstíle de shórt ar bith, ar an gcoinníoll nach n-áirítear iad faoi cheannteidil eile de Roinn XI. Áirítear leis freisin braillíní cosantacha comhréidhe rédhéanta seachas tarpóil agus braillíní talún atá faoi cheannteideal 6306 (féach freisin an NMCC a ghabhann le ceannteideal 6307 , an chéad mhír agus an dara mír, (8)).

Dá bhrí sin, is faoi chód AC 6307 90 98 , mar earra rédhéanta de chineál eile, atá an t-earra le haicmiú.