(1)

Fl-24 ta' Novembru 2004, tifqigħat tal-bluetongue feġġew fil-Portugall. L-apparizzjoni ta' din il-marda tista' tirrappreżenta riskju serju għall-popolazzjoni tal-bhejjem tal-Komunità.

(2)

Biex jiġi evitat it-tixrid tal-marda kemm jista' jkun malajr, il-Komunità għandha tikkontribwixxi finanzjarjament għan-nefqa eliġġibbli tal-Portugall fil-kuntest tal-miżuri ta' emerġenza meħuda biex tkun ikkumbattuta l-marda, kif previst fid-Deċiżjoni 90/424/KEE. Għalhekk, fil-15 ta' Settembru 2005, id-Deċiżjoni tal-Kummissjoni 2005/660/KE rigward il-kontribuzzjoni finanzjarja tal-Komunità fil-kuntest tal-miżuri ta' emerġenza meħuda biex tkun ikkumbattuta l-bluetongue fil-Portugall fl-2004 u fl-2005 (2) ġiet adottata.

(3)

Il-Kummissjoni adottat diversi deċiżjonijiet sabiex tiddemarka ż-żoni ta' protezzjoni u ta' sorveljanza u biex tistipola l-kundizzjonijiet li jirregolaw il-movimenti ta' l-annimali minn dawn iż-żoni, u l-aħħar waħda minn dawn hija d-Deċiżjoni 2005/393/KE tat-23 ta' Mejju 2003 dwar iż-żoni ta' protezzjoni u sorveljanza fir-rigward tal-bluetongue u l-kundizzjonijiet li japplikaw għall-movimenti minn u ġewwa dawn iż-żoni (3).

(4)

Mill-Ħarifa ta' l-2004 n-nuqqas eċċezzjonali ta' xita fil-Portugall affetwa serjament il-provvista ta' l-għalf u, b'konsegwenza ta' dan, il-possibiltajiet ta' nfiq addizzjonali għall-bdiewa kkawżat mit-tmigħ ta' l-annimali. Din is-sitwazzjoni hi ta' konsegwenza partikolari fil-Portugall peress li l-istabbilimenti li jispeċjalizzaw fit-twelid ta' annimali bovini u ovini jinsabu fiż-żoni li huma affettwati mir-restrizzjonijiet fuq il-movimenti ta' l-annimali, filwaqt li dawk li jispeċjalizzaw fit-tismin, li huma l-ħruġ naturali għall-annimali mrobbija f'tali stabbilimenti, jinsabu barra minn dawk iż-żoni.

(5)

Miżuri oħra ġew stabbiliti mill-Portugall bil-kollaborazzjoni ta' Spanja biex tkun ikkontrollata l-epidemija billi jitwettaq stħarriġ epidemjoloġiku u jitwettqu l-miżuri ta' sorveljanza għall-marda, inkluż testijiet fil-laboratorju għas-sorveljanza seroloġika u viroloġika fil-qafas ta' ttestjar ta' l-annimali qabel iċ-ċaqliq u s-sorveljanza entomoloġika.

(6)

Il-Portugall u Spanja pprovdew evidenza ta' kooperazzjoni bejn iż-żewġ Stati Membri biex jiġi evitat it-tixrid tal-marda billi jitwettqu l-miżuri ta' sorveljanza għall-marda.

(7)

Skond l-Artikolu 3(2) tar-Regolament tal-Kunsill (KE) Nru 1258/1999 tas-17 ta' Mejju 1999 dwar il-finanzjament tal-politika komuni agrikola (4), il-miżuri sanitarji tal-veterinarji u tal-pjanti li ttieħdu skond ir-regoli tal-Komunità huma ffinanzjati taħt it-Taqsima tal-Fond Ewropew Agrikolu ta' Gwida u Garanzija. Il-verifika ta' dawk il-miżuri taqa' fi ħdan l-Artikoli 8 u 9 ta' dak ir-Regolament.

(8)

Il-ħlas tal-kontribuzzjoni finanzjarja mill-Komunità għandu jkun suġġett għall-kundizzjoni li l-azzjonijiet pjanati fil-fatt twettqu u li l-awtoritajiet jipprovdu l-informazzjoni kollha meħtieġa fil-limitu ta' żmien stipulat.

(9)

Fil-25 ta' Frar 2005, il-Portugall issottometta l-istima inizjali ta' l-ispejjeż imġarrba fil-kuntest tal-miżuri ta' emerġenza l-oħra, inkluż il-miżuri ta' sorveljanza epidemjoloġika meħuda biex tkun ikkumbattuta l-marda. Din l-istima tal-miżuri ta' sorveljanza epidemjoloġika tammonta għal EUR 4 303 336.

(10)

Sakemm jitwettqu kontrolli fuq il-post mill-Kummissjoni, issa hu meħtieġ li jiġi ffissat l-ewwel ħlas parzjali tal-kontribuzzjoni finanzjarja tal-Komunità. Dak l-ewwel ħlas parzjali għandu jkun ta' 50 % tal-kontribuzzjoni tal-Komunità, stabbilit fuq il-bażi tan-nefqa eliġibbli stmata għall-miżuri ta' sorveljanza epidemjoloġika. Ikun xieraq ukoll li jiġu ffissati l-ammonti massimi li għandhom jiġu rrimborżati għall-ispejjeż tat-testijiet u tan-nases użati fil-qafas ta' dawn il-miżuri.

(11)

Il-Portugall issodisfa l-obbligi tekniċi u amministrattivi kollha tagħhom fir-rigward tal-miżuri previsti fl-Artikolu 3 tad-Deċiżjoni 90/424/KEE.

(12)

Il-miżuri previsti f'din id-Deċiżjoni huma konformi ma' l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,