IL-KUMMISSJONI EWROPEA
Brussell, 4.11.2025
COM(2025) 684 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar in-nefqa tal-FAEG
Sistema ta’ Twissija Bikrija 1-6/2025
1.Proċedura tal-baġit tal-FAEG tal-2025
Fis-27 ta’ Novembru 2024, il-Parlament Ewropew adotta l-baġit ġenerali tal-Unjoni Ewropea tal-2025. Il-baġit għall-Fond Agrikolu Ewropew ta’ Garanzija (FAEG) jammonta għal EUR 39 975,9 miljun f’approprjazzjonijiet ta’ impenn u għal EUR 40 030,7 miljun f’approprjazzjonijiet ta’ pagament. Ir-raġuni għall-ammonti differenti għaż-żewġ tipi ta’ approprjazzjonijiet hija l-użu ta’ approprjazzjonijiet differenzjati għal ċerti miżuri implimentati direttament mill-Kummissjoni. Dawn huma prinċipalment relatati mal-miżuri ta’ promozzjoni għall-prodotti agrikoli u mal-miżuri ta’ strateġija tal-politika, ta’ koordinazzjoni u ta’ awditjar.
2.Dħul assenjat għall-FAEG
Abbażi tad-dispożizzjonijiet tal-Artikolu 45 tar-Regolament (UE) 2021/2116, id-dħul li joriġina mill-korrezzjonijiet finanzjarji fil-qafas tad-deċiżjonijiet dwar il-kontabbiltà u l-prestazzjoni kif ukoll mill-irregolaritajiet, jikkostitwixxi dħul assenjat għall-finanzjament tan-nefqa tal-FAEG.
Skont l-Artikolu 45(2), id-dħul assenjat jista’ jerġa’ jintuża biex ikopri l-ħtiġijiet ta’ finanzjament ta’ kwalunkwe nefqa tal-FAEG. Id-dħul assenjat miġbur u li jibqa’ ma jintużax matul is-sena finanzjarja jiġi riportat awtomatikament għas-sena finanzjarja ta’ wara
.
Il-baġit tal-FAEG tal-2025 jinkludi:
·l-istimi tal-Kummissjoni tal-ħtiġijiet ta’ finanzjament għall-miżuri tas-suq (inkluża r-riżerva għall-agrikoltura) u l-pagamenti diretti taħt ġestjoni kondiviża u nefqa oħra taħt ġestjoni diretta;
·l-istimi tad-dħul assenjat li għandu jinġabar matul is-sena finanzjarja;
·u r-riport tal-bilanċ tad-dħul assenjat li kien għadu disponibbli mis-sena finanzjarja ta’ qabel.
Fil-proposta tagħha għall-approprjazzjonijiet tal-baġit tal-FAEG tal-2025, il-Kummissjoni qieset id-dħul assenjat totali mistenni. Għall-baġit tal-2025, il-Kummissjoni talbet livell ta’ approprjazzjonijiet ikkalkulat billi jitnaqqas id-dħul assenjat stmat mill-ħtiġijiet stmati. L-Awtorità tal-Baġit adottat il-baġit tal-FAEG tal-2025 filwaqt li qieset id-dħul assenjat mistenni.
Meta ġie stabbilit il-baġit tal-2025, l-istima tal-Kummissjoni tad-dħul assenjat disponibbli kienet tammonta għal EUR 949,4, li minnhom, EUR 554,4 miljun kienu ġew riportati mill-Baġit tal-2024. Il-Kummissjoni qieset li dan l-ammont riportat u d-dħul stmat li jrid jinġabar fl-2025 meta talbet l-approprjazzjonijiet għall-appoġġ bażiku għall-introjtu għas-sostenibbiltà (il-partita 08 02 04 01). Is-somma tal-approprjazzjonijiet ivvutati għal din l-iskema u d-dħul assenjat stmat hija ta’ EUR 18 959 miljun.
Id-dħul assenjat eventwalment riportat mill-2024 kien marġinalment ogħla, u jammonta għal EUR 555,8 miljun.
3.Tabella tal-konsum proviżorju fit-30 ta’ April 2025
Dan ir-rapport jippreżenta l-implimentazzjoni proviżorja tal-baġit tal-2025 għall-FAEG fit-30 ta’ April 2025 u d-dettalji jinsabu fit-tabella hawn taħt.
Qed isir tqabbil bejn il-livell ta’ implimentazzjoni u l-profil tan-nefqa tas-sistema ta’ twissija bikrija li ġiet stabbilita f’konformità mal-Artikolu 19
tar-Regolament (UE) 2021/2116.
4.Kummenti dwar ir-riżerva għall-agrikoltura tal-2025
Il-Baġit tal-2025 jinkludi ammont ta’ EUR 646,7 miljun għar-riżerva għall-agrikoltura, inkluż riport ta’ EUR 366,5 miljun mill-Baġit tal-2024.
Sa issa, din is-sena baġitarja ġew adottati tliet miżuri, li jallokaw EUR 113,7 miljun.
In-nefqa totali magħmula għar-riżerva għall-agrikoltura sal-aħħar ta’ April, għall-miżuri adottati fis-sena finanzjarja 2024 b’data ta’ eliġibbiltà fis-sena finanzjarja 2025, tammonta għal EUR 191,8 miljun.
5.Kummenti dwar l-implimentazzjoni proviżorja tal-baġit tal-FAEG tal-2025
L-eżekuzzjoni proviżorja tal-approprjazzjonijiet tal-baġit tal-FAEG tal-2025, għall-perjodu sat-30 ta’ April 2025, hija kemxejn ogħla mill-profil tan-nefqa kkalkulat (2,6 punti perċentwali).
Għall-kuntrarju tas-snin finanzjarji preċedenti, in-nefqa għat-tipi ta’ interventi settorjali kumplessivi skont il-Pjanijiet Strateġiċi tal-PAK (08 02 02) turi devjazzjoni ’l fuq mill-profil.
Il-biċċa l-kbira tat-tipi ta’ interventi tal-pagamenti diretti skont il-Pjan Strateġiku tal-PAK (08 02 04) juru eżekuzzjoni tal-baġit li taqbeż l-aspettattivi.
Diġà huwa disponibbli dħul assenjat (6 2 0 0) ta’ EUR 685,7 miljun, u huwa mistenni li jinġabru ammonti addizzjonali matul is-sena finanzjarja.
Abbażi tad-data disponibbli sal-aħħar ta’ April, is-servizzi tal-Kummissjoni jassumu li l-approprjazzjonijiet ivvutati, flimkien mal-ammont tad-dħul assenjat mistenni li jkun disponibbli fi tmiem is-sena finanzjarja, se jkunu biżżejjed biex ikopru n-nefqa kollha.