(1)

Ainmniúchán an chuibhreannais atá á bhainistiú ag Servicio Madrileño de Salud (SERMAS) mar shaotharlann tagartha de chuid an Aontais, ainmniúchán a rinneadh le Rialachán Cur Chun Feidhme (AE) 2023/2713 ón gCoimisiún (2), ba cheart é a cheartú chun na fondúireachtaí a bhaineann le comhaltaí den chuibhreannas a chuimsiú ann, chun riar na ranníocaíochta ón Aontas a dheonaítear don tsaotharlann tagartha sin de chuid an Aontais a éascú i gcomhréir le hAirteagal 100(6) de Rialachán (AE) 2017/746.

(2)

I gcomhréir le hAirteagal 100(1) de Rialachán (AE) 2017/746, i mí Feabhra 2025 sheol an Coimisiún glao ar iarratais le haghaidh shaotharlanna tagartha an Aontais Eorpaigh i raonta feidhme éagsúla ainmniúcháin dá dtagraítear in Airteagal 1(1) de Rialachán Cur Chun Feidhme (AE) 2022/944 ón gCoimisiún (3). Bhain an chéad bhabhta den ghlao le ceithre raon feidhme ainmniúcháin agus ba é an 6 Meitheamh 2025 an sprioc-am a bhí ag gabháil leis chun iarratas a dhéanamh chuig an gCoimisiún.

(3)

Mar fhreagairt ar ghlao mhí Feabhra 2025, chuir na Ballstáit iarratais ar ainmniú isteach agus rinne bord roghnúcháin arna bhunú ag seirbhísí an Choimisiúin meastóireacht orthu.

(4)

Chuir an bord roghnúcháin san áireamh na critéir le haghaidh shaotharlanna tagartha an Aontais Eorpaigh a leagtar síos in Airteagal 100(4) de Rialachán (AE) 2017/746 mar aon le hAirteagail 1 go 9 de Rialachán Cur Chun Feidhme (AE) 2022/944.

(5)

Nuair a ainmnítear saotharlann tagartha de chuid an Aontais, de réir Airteagal 48(5) de Rialachán (AE) 2017/746, agus Ranna 4.11 agus 4.12. d’Iarscríbhinn IX, mar aon le Roinn 5.4. d’Iarscríbhinn X, agus Roinn 5.1. d’Iarscríbhinn XI a ghabhann le Rialachán (AE) 2017/746, ní mór do shaotharlann tagartha an Aontais fíorú feidhmíochta agus baisc-thástáil a dhéanamh ar fheistí in aicme D i gcomhréir le hAirteagal 100(2), pointí (a) agus (b), faoi seach, den Rialachán sin. Dá bhrí sin, chun infhaighteacht leordhóthanach sheirbhísí shaotharlann tagartha an Aontais Eorpaigh a áirithiú, chuir an bord roghnúcháin acmhainneacht chomhchoiteann na saotharlann iarrthach maidir le fíorú feidhmíochta agus baisc-thástáil san áireamh freisin.

(6)

Tar éis don nós imeachta roghnúcháin a bheith curtha i gcrích, ba cheart na saotharlanna rathúla a ainmniú mar shaotharlanna tagartha an Aontais Eorpaigh, agus a raon feidhme ainmniúcháin a shonrú.

(7)

Chun deimhneacht dhlíthiúil agus intuarthacht nósanna imeachta um measúnú comhréireachta a áirithiú, níor cheart do shaotharlanna tagartha nua-ainmnithe an Aontais Eorpaigh an cúram a leagtar amach in Airteagal 100(2), pointe (a) de Rialachán (AE) 2017/746 a dhéanamh ach amháin maidir le feistí a dtaisctear an t-iarratas foirmiúil ar mheasúnú comhréireachta ina leith tar éis feidhm a bheith ag ainmniú shaotharlanna tagartha an Aontais Eorpaigh chun críoch na gcúraimí a leagtar amach in Airteagal 100(2) den Rialachán sin.

(8)

Dá bhrí sin, ba cheart Rialachán Cur Chun Feidhme (AE) 2023/2713 a leasú agus a cheartú dá réir sin.

(9)

Foráiltear le hAirteagal 100(5) de Rialachán (AE) 2017/746 go mbunóidh saotharlanna tagartha an Aontais Eorpaigh líonra chun a modhanna oibre a chomhordú agus a chomhchuibhiú a mhéid a bhaineann le tástáil agus measúnú, rud a bhfuil gá leis chun na cúraimí a leagtar amach in Airteagal 100(2) den Rialachán sin a dhéanamh. Thairis sin, mar thoradh ar shaotharlanna tagartha nua an Aontais Eorpaigh a ainmniú agus ar a rannpháirtíocht i measúnú comhréireachta, ní mór do mhonaróirí agus do chomhlachtaí faoina dtugtar fógra na próisis atá acu cheana maidir le measúnú comhréireachta ar fheistí a oiriúnú. Ionas go mbeidh am leordhóthanach ag saotharlanna tagartha nua-ainmnithe an Aontais Eorpaigh páirt a ghlacadh sa líonra agus a modhanna oibre a chomhordú agus a chomhchuibhiú, agus ag monaróirí agus comhlachtaí faoina dtugtar fógra a bpróisis a oiriúnú, maidir le cur i bhfeidhm ainmniú shaotharlanna tagartha nua-ainmnithe an Aontais Eorpaigh chun críocha na gcúraimí dá dtagraítear in Airteagal 100(2) de Rialachán (AE) 2017/746, ba cheart é a chur siar go dtí dáta is faide anonn,