|
11.8.2021 |
MT |
Il-Ġurnal Uffiċjali tal-Unjoni Ewropea |
L 288/19 |
REGOLAMENT TA’ IMPLIMENTAZZJONI TAL-KUMMISSJONI (UE) 2021/1324
tal-10 ta’ Awwissu 2021
li jemenda r-Regolament (KE) Nru 1597/2002 fir-rigward tal-format għas-sottomissjoni ta’ listi nazzjonali tal-materjal bażiku ta’ materjal riproduttiv tal-foresta
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 1999/105/KE tat-22 ta’ Diċembru 1999 dwar il-marketing ta’ materjali riproduttivi tal-foresti (1), u b’mod partikolari l-Artikolu 10(3) tagħha,
Billi:
|
(1) |
Ir-Regolament tal-Kummissjoni (KE) Nru 1597/2002 (2) jistabbilixxi format standardizzat għall-Istati Membri biex jissottomettu listi nazzjonali ta’ materjal bażiku ta’ materjal riproduttiv tal-foresta lill-Kummissjoni. |
|
(2) |
Riċentement, il-Kummissjoni żviluppat sistema ta’ informazzjoni għas-sottomissjoni elettronika ta’ dawk il-listi nazzjonali, imsejħa Sistema ta’ Informazzjoni dwar il-Materjal Riproduttiv tal-Foresta (FOREMATIS). Il-FOREMATIS tippermetti lill-Istati Membri biex jippubblikaw il-listi nazzjonali tagħhom fuq is-sit web tal-Kummissjoni. |
|
(3) |
Minħabba dak l-iżvilupp tekniku, jenħtieġ li l-format tal-listi nazzjonali previsti fir-Regolament (KE) Nru 1597/2002 jiġi sostitwit b’dak tal-FOREMATIS. |
|
(4) |
Għaldaqstant jenħtieġ li r-Regolament (KE) Nru 1597/2002 jiġi emendat skont dan. |
|
(5) |
Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Ir-Regolament (KE) Nru 1597/2002 huwa emendat kif ġej:
|
(1) |
l-Artikolu 1 huwa sostitwit b’dan li ġej: “Artikolu 1 Il-lista nazzjonali msemmija fl-Artiklu 10(2) tad-Direttiva 1999/105/KE għandha tiġi sottomessa minn kull Stat Membru permezz tal-format tas-Sistema ta’ Informazzjoni dwar il-Materjal Riproduttiv tal-Foresta tal-Kummissjoni (*1) u f’konformità miegħu. (*1) https://ec.europa.eu/forematis/”;" |
|
(2) |
l-Anness huwa mħassar. |
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-10 ta’ Awwissu 2021.
Għall-Kummissjoni
Il-President
Ursula VON DER LEYEN
(1) ĠU L 11, 15.1.2000, p. 17.
(2) Ir-Regolament tal-Kummissjoni (KE) Nru 1597/2002 tas-6 ta’ Settembru 2002 li jistabbilixxi regoli dettaljati għall-applikazzjoni tad-Direttiva tal-Kunsill 1999/105/KE f’dak li għandu x’jaqsam il-format ta’ listi nazzjonali tal-materjal bażiku ta’ materjal riproduttiv tal-foresta (ĠU L 240, 7.9.2002, p. 34).