|
5.3.2014 |
MT |
Il-Ġurnal Uffiċjali tal-Unjoni Ewropea |
L 65/27 |
REGOLAMENT TAL-KUMMISSJONI (UE) Nru 206/2014
tal-4 ta’ Marzu 2014
li jemenda r-Regolament (UE) Nru 601/2012 fir-rigward tal-potenzjal għat-tisħin globali ta’ gassijiet serra li mhumiex CO2
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva tal-Kunsill 96/61/KE (1), u b’mod partikolari l-Artikolu 14(1) tagħha,
Billi:
|
(1) |
L-Anness VI tar-Regolament tal-Kummissjoni (UE) Nru 601/2012 (2) jiddetermina l-potenzjal għat-tisħin globali (GWP) ta’ gassijiet serra li mhumiex CO2. |
|
(2) |
Sabiex jiġi implimentat l-użu tal-Linji Gwida 2006 tal-IPCC għall-Inventarji Nazzjonali tal-Gassijiet Serra tal-Grupp Intergovernattiv ta’ Esperti dwar it-Tibdil fil-Klima, id-Deċiżjoni 15/CP.17 (3) tal-Konferenza tal-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) tiddetermina li mill-2015, u sakemm tittieħed deċiżjoni ulterjuri mill-Konferenza tal-Partijiet għall-UNFCCC, il-valuri tal-potenzjal ta’ effett serra (GWP) li għandhom jintużaw mill-Partijiet biex tiġi kkalkulata l-ekwivalenza tad-dijossidu tal-karbonju ta’ emissjonijiet antropoġeniċi minn fonti u tal-assorbiment minn bjar tal-gassijiet serra għandhom ikunu dawk imniżżla fl-Anness III tad-Deċiżjoni 15/CP.17. |
|
(3) |
Sabiex tiġi żgurata l-konsistenza tal-leġiżlazzjoni rilevanti tal-Unjoni mal-metodoloġiji użati fil-kuntest tal-proċess tal-UNFCCC, ir-Regolament (UE) Nru 601/2012 għandu jiġi emendat skont dan. |
|
(4) |
Skont l-Artikolu 13(1) tad-Direttiva 2003/87/KE, kwoti maħruġa mill-1 ta’ Jannar 2013 ‘il quddiem għandhom ikunu validi għall-emissjonijiet għal perjodu ta’ negozjar ta’ tmien snin, li jibda minn dik id-data. L-aġġustament tal-kwantità tal-kwoti li għandhom jinħarġu mill-1 ta’ Jannar 2013 skont l-Artikolu 9a(1) tal-istess Direttiva jiġi ddeterminat billi jiġu kkunsidrati l-valuri tal-potenzjal għat-tisħin globali (GWP) elenkati fl-Anness III tad-Deċiżjoni 15/CP.17 tal-Konferenza tal-Partijiet għall-UNFCCC. Minħabba li r-Regolament (UE) Nru 601/2012 japplika mill-1 ta’ Jannar 2013, dan ir-Regolament għandu japplika wkoll minn dik id-data sabiex tiġi żgurata l-konsistenza tad-dejta kollha dwar l-emissjonijiet ta’ gassijiet serra rrappurtata tul il-perjodu kollu ta’ negozjar ta’ tmien snin. |
|
(5) |
Il-miżuri stabbiliti f’dan ir-Regolament huma konformi mal-opinjoni tal-Kumitat dwar it-Tibdil fil-Klima, |
ADOTTAT DAN IR-REGOLAMENT:
Artikolu 1
L-Anness VI tar-Regolament (UE) Nru 601/2012 huwa emendat kif stabbilit fl-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu jibda japplika mill-1 ta’ Jannar 2013.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-4 ta’ Marzu 2014.
Għall-Kummissjoni
Il-President
José Manuel BARROSO
(1) ĠU L 275, 25.10.2003, p. 32.
(2) Ir-Regolament tal-Kummissjoni (UE) Nru 601/2012 tal-21 ta’ Ġunju 2012 dwar il-monitoraġġ u r-rapportar ta’ emissjonijiet ta’ gassijiet serra skont id-Direttiva 2003/87/KE tal-Parlament Ewropew u tal-Kunsil (ĠU L 181, 12.7.2012, p. 30).
(3) FCCC/CP/2011/9/Add.2, p. 23.
ANNESS
It-Tabella 6 tal-Anness VI tar-Regolament (UE) Nru 601/2012 għandha tinbidel b’dan li ġej:
“Tabella 6: Potenzjali għat-tisħin globali
|
Gass |
Potenzjal għat-tisħin globali |
|
N2O |
298 t CO2(e)/t N2O |
|
CF4 |
7 390 t CO2(e)/t CF4 |
|
C2F6 |
12 200 t CO2(e)/t C2F6” |