(1)

Fl-14 ta’ Awwissu 2020, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet ta’ prodotti tal-aluminju llaminati ċatti (“AFRPS” jew “il-prodott li qed jiġi investigat”) li joriġinaw mir-Repubblika tal-Poplu taċ-Ċina (“ir-RPĊ” jew il-“pajjiż ikkonċernat”) abbażi tal-Artikolu 5 tar-Regolament bażiku (2).

(2)

F’konformità mal-Artikolu 19a tar-Regolament bażiku, fil-15 ta’ Marzu 2021, il-Kummissjoni pprovdiet lill-partijiet b’sommarju tad-dazji provviżorji proposti u bid-dettalji dwar il-kalkolu tal-marġnijiet tad-dumping u tal-marġnijiet adegwati sabiex jitneħħa d-dannu għall-industrija tal-Unjoni. Il-partijiet interessati ġew mistiedna jikkummentaw dwar l-akkuratezza tal-kalkoli fi żmien tlett ijiem. It-tliet produtturi esportaturi inklużi fil-kampjun ipprovdew kummenti (3). Il-Kummissjoni qieset il-kummenti u kkoreġiet l-iżbalji fil-kalkoli, fejn xieraq.

(3)

Fit-12 ta’ April 2021, il-Kummissjoni imponiet dazju anti-dumping provviżorju permezz tar-Regolament ta’ Implimentazzjoni tal-Kummissjoni (UE) 2021/582 (4) (“ir-Regolament provviżorju”).

(4)

Wara l-iżvelar tal-fatti u tal-kunsiderazzjonijiet essenzjali li abbażi tagħhom ġie impost dazju anti-dumping provviżorju (“żvelar provviżorju”), l-ilmentaturi, il-produtturi esportaturi inklużi fil-kampjun, produttur esportatur mhux inkluż fil-kampjun, diversi utenti fis-settur tal-iskambjaturi tas-sħana tal-karozzi u utent downstream wieħed, utent wieħed fis-settur tal-fojl, żewġ utenti fis-settur tal-kapaċitaturi elettrostatiċi, utent wieħed fis-settur tal-pannelli komposti tal-aluminju, utent wieħed fis-settur tal-venetian blinds u l-fornitur tiegħu, negozjant mhux relatat, importatur, l-Assoċjazzjoni Ewropea għall-Fornituri tal-Karozzi, l-assoċjazzjoni Ewropea tal-manifatturi awtomobilistiċi u l-Gvern tar-Repubblika tal-Poplu taċ-Ċina (“GTĊ”) għamlu sottomissjonijiet bil-miktub li bihom qasmu l-fehmiet tagħhom dwar is-sejbiet provviżorji. Żewġ produtturi esportaturi talbu u rċevew aktar dettalji dwar il-kalkolu tal-marġnijiet tad-dannu tagħhom.

(5)

Il-partijiet li talbu li jinstemgħu ngħataw din l-opportunità. Il-Kummissjoni organizzat seduti mat-tliet produtturi esportaturi inklużi fil-kampjun, mal-ilmentaturi, mal-Kumpanija B, ma’ żewġ utenti fis-settur tal-iskambjaturi tas-sħana tal-karozzi, ma’ utent wieħed fis-settur tal-fojl, ma’ utent wieħed fis-settur tal-kapaċitaturi elettrostatiċi tal-aluminju, ma’ negozjant mhux relatat, ma’ importatur mhux relatat u ma’ assoċjazzjoni ta’ distributuri indipendenti (EURANIMI). Fuq talba ta’ Nanshan Group (“Nanshan”), saret seduta ta’ smigħ bejn Nanshan u l-Uffiċjal tas-Seduta għall-proċedimenti kummerċjali.

(6)

Il-Kummissjoni pproponiet li torganizza seduta ta’ smigħ ma’ partijiet li għandhom interessi avversi attivi fis-settur tal-Prodotti llaminati ċatti tal-iskambjaturi tas-sħana tal-karozzi (“AHEX AFRP”); jiġifieri Valeo Systèmes Thermiques SAS u kumpaniji relatati (“Valeo”) u produttur tal-Unjoni. Madankollu, din il-parti tal-aħħar ma qablitx li tipparteċipa. Valeo ddispjaċiha għall-imġiba tal-produttur tal-Unjoni u argumentat li jenħtieġ li l-argumenti ta’ Valeo dwar (in-nuqqas ta’) l-eżistenza tal-kapaċità fis-suq tal-Unjoni jkollhom valur ogħla bħala evidenza, minħabba li Valeo stess ma kinitx irrifjutat li tiffaċċja lill-produttur tal-Unjoni inkwistjoni.

(7)

Kif għarfet Valeo, is-smigħ mal-partijiet b’interessi avversi jista’ jiġi organizzat biss meta ż-żewġ partijiet jaqblu dwar tali seduta. Kif previst mill-Artikolu 6(6), il-fatt li parti tirrifjuta li tipparteċipa f’tali seduta ma għandux ikun ta’ preġudizzju. Għalhekk, l-affermazzjoni ta’ Valeo ġiet miċħuda.

(8)

Wara l-iżvelar definittiv, il-partijiet li talbu li jinstemgħu ngħataw opportunità li jinstemgħu. Il-Kummissjoni organizzat seduti ta’ smigħ mat-tliet produtturi esportaturi inklużi fil-kampjun, ma’ żewġ utenti fis-settur tal-iskambjaturi tas-sħana tal-karozzi u ma’ importatur mhux relatat wieħed. Saret ukoll seduta ta’ smigħ bejn Jiangsu Alcha Aluminum Group Co., Ltd. (“Jiangsu Alcha”) u l-Uffiċjal tas-Seduta għall-proċedimenti kummerċjali fuq talba ta’ dan l-esportatur.

(9)

Il-Kummissjoni kompliet tfittex u tivverifika l-informazzjoni kollha li qieset neċessarja għas-sejbiet finali tagħha. F’dan ir-rigward, hija qieset li l-kumpanija Nilo Asia PTE Ltd/Lodec Metall-Handel Niederlassung Bremen der O. Wilms GMBH (“Nilo”), li kienet ippreżentat lilha nnifisha bħala importatur mhux relatat, kienet fil-fatt negozjant. F’dan il-kuntest, it-tweġiba għall-kwestjonarju ta’ din il-kumpanija ma ġietx ikkunsidrata għas-sejbiet definittivi. Madankollu, din il-kumpanija baqgħet titqies bħala parti interessata u kompliet tikkoopera fl-investigazzjoni.

(10)

Meta wieħed iqis li l-partijiet interessati kellhom biżżejjed żmien sabiex jipprovdu kummenti dwar il-kummenti ta’ partijiet oħrajn u bl-eċċezzjoni tat-tweġibiet għat-talbiet għal informazzjoni mill-Kummissjoni, il-Kummissjoni ma kkunsidratx is-sottomissjonijiet ippreżentati wara s-17 ta’ Ġunju 2021 għas-sejbiet definittivi tagħha.

(11)

Fit-13 ta’ Lulju 2021, il-Kummissjoni informat lill-partijiet interessati kollha dwar il-fatti u l-kunsiderazzjonijiet essenzjali li abbażi tagħhom kien biħsiebha timponi dazju anti-dumping definittiv fuq l-importazzjonijiet ta’ prodotti llaminati ċatti tal-aluminju li joriġinaw mir-Repubblika tal-Poplu taċ-Ċina (l-“iżvelar finali”). Barra minn hekk, il-partijiet interessati rċevew żvelar addizzjonali fit-13 ta’ Awwissu 2021 (“l-ewwel żvelar finali addizzjonali”) u fit-3 ta’ Settembru 2021 (“it-tieni żvelar finali addizzjonali”) Il-partijiet kollha ngħataw perjodu li matulu setgħu jikkummentaw dwar l-iżvelar finali.

(12)

Wara l-iżvelar definittiv, Airoldi Metalli S.p.a. (“Airoldi”), iddikjarat li d-drittijiet tad-difiża tagħha kienu nkisru peress li ma kellhiex l-opportunità li tikkummenta dwar id-dokumenti miżjuda mal-fajl mhux kunfidenzjali jum qabel ma ġew żvelati s-sejbiet definittivi u allegatament tqiesu fid-dokument ġenerali tal-iżvelar tal-informazzjoni. Abbażi ta’ dan, hija talbet l-irtirar tad-dokument ġenerali tal-iżvelar tal-informazzjoni.

(13)

F’dan ir-rigward, għandu l-ewwel jiġi nnotat li, kif imsemmi fil-premessa (10), bl-eċċezzjoni tad-dokument t21.004671, is-sottomissjonijiet kollha msemmija minn Airoldi ma ġewx ikkunsidrati għad-dokument ġenerali tal-iżvelar tal-informazzjoni fid-dawl tal-preżentazzjoni mhux fil-ħin tagħhom. F’dak li għandu x’jaqsam mal-affermazzjonijiet imqajmin fid-dokument t21.004671, kif jista’ jidher fil-premessa (527), dawn huma tal-istess natura bħall-affermazzjonijiet magħmulin minn partijiet interessati oħrajn inkluża Airoldi. Fuq din il-bażi, tqies li ma kien hemm l-ebda ksur tad-drittijiet tad-difiża ta’ Airoldi. Barra minn hekk, wara l-iżvelar definittiv, Airoldi kellha l-opportunità li tikkummenta dwar id-dokumenti ppreżentati mhux fil-ħin imsemmijin minn Airoldi fis-sottomissjoni tagħha.

(14)

Fit-28 ta’ Lulju 2021, il-Kummissjoni talbet lill-produtturi, lill-importaturi, lill-utenti u lill-assoċjazzjonijiet tagħhom tal-Unjoni jipprovdu informazzjoni dwar l-iżviluppi ta’ wara l-PI sabiex tkun tista’ ssir valutazzjoni skont l-Artikolu 14(4) fi żmien debitu.

(15)

Il-kummenti ppreżentati mill-partijiet interessati ġew ikkunsidrati u tqiesu fejn xieraq f’dan ir-Regolament.

(16)

Fil-premessa (35) tar-Regolament provviżorju, il-Kummissjoni rreferiet għal kampjun ta’ tliet produtturi tal-Unjoni li jirrappreżentaw 35 % tal-produzzjoni tal-Unjoni. Dak il-perċentwal kien ibbażat fuq id-data tal-EU28.

(17)

Kif previst fit-Taqsima 1.9, is-sejbiet definittivi ta’ din l-investigazzjoni huma bbażati fuq id-data tal-EU27. Barra minn hekk, kif imsemmi fil-premessa (191), ċerti prodotti ġew esklużi mill-ambitu tal-prodott. Fuq dik il-bażi, it-tliet produtturi tal-Unjoni kienu jirrappreżentaw aktar minn 38 % tal-produzzjoni tal-Unjoni. Għalhekk, il-kampjun baqa’ rappreżentattiv.

(18)

Wara l-iżvelar provviżorju, produttur wieħed tal-Unjoni li ma huwiex fil-kampjun ippreżenta talba għall-anonimità. Il-ġustifikazzjoni għal din it-talba kienet li din il-parti interessata hija mħassba dwar esponiment pubbliku dirett li jagħmel ħsara għall-interessi tagħha f’pajjiżi oħrajn. Fuq il-bażi tal-elementi pprovduti fit-talba sensittiva tagħha, it-talba għall-anonimità ġiet aċċettata. Ma wasal l-ebda kumment.

(19)

Fin-nuqqas ta’ kummenti dwar din it-taqsima, il-premessa (43) tar-Regolament provviżorju hija kkonfermata.

(20)

Minbarra l-kontroverifiki remoti (“RCCs”) imsemmijin fil-premessa (48) tar-Regolament provviżorju, il-Kummissjoni wettqet RCC addizzjonali tal-utent Amcor Flexibles Singen GmbH (“Amcor”) ibbażata f’Singen, il-Ġermanja.

(21)

Esportatur wieħed, Southwest Aluminium (Group) Co., Ltd (“SWA”) sostna li l-perjodu ta’ investigazzjoni (“PI”) kien affettwat mill-pandemija tal-COVID-19 u ma setax jitqabbel mas-snin l-oħrajn tal-perjodu kkunsidrat.

(22)

Il-Kummissjoni qieset l-impatt tal-pandemija tal-COVID-19 fl-analiżi tagħha u indirizzat il-kummenti li rċeviet f’dan ir-rigward fit-Taqsima 5.1.2.2 tar-Regolament provviżorju u fit-Taqsima 5.2.2 ta’ dan ir-Regolament. Fuq din il-bażi, din l-affermazzjoni ġiet miċħuda.

(23)

Fin-nuqqas ta’ kummenti ulterjuri rigward il-PI u l-perjodu kkunsidrat, il-premessa (49) tar-Regolament provviżorju ġiet ikkonfermata.

(24)

Mill-1 ta’ Jannar 2021, ir-Renju Unit tal-Gran Brittanja u l-Irlanda ta’ Fuq (“ir-Renju Unit”) ma baqgħux jagħmlu parti mill-Unjoni Ewropea. Għalhekk, dan ir-regolament huwa bbażat fuq data għall-Unjoni Ewropea mingħajr ir-Renju Unit (“EU27”). Għalhekk, il-Kummissjoni talbet lill-ilmentatur u lill-produtturi tal-Unjoni inklużi fil-kampjun sabiex jissottomettu ċerti partijiet tat-tweġibiet oriġinali tagħhom għall-kwestjonarju b’data għall-EU27 biss. L-ilmentatur u l-produtturi tal-Unjoni inklużi fil-kampjun issottomettew id-data mitluba. Peress li d-differenza bejn l-indikaturi makroekonomiċi ppubblikati fir-Regolament provviżorju u d-data makroekonomika għall-EU27 hija dovuta għall-esklużjoni tad-data minn produttur wieħed tar-Renju Unit, ċerti tabelli f’dan ir-Regolament huma pprovduti f’meded sabiex ma tiġix żvelata informazzjoni kunfidenzjali relatata ma’ dak il-produttur.

(25)

Fir-rigward tad-dumping, il-bejgħ għall-esportazzjoni tal-produtturi esportaturi inklużi fil-kampjun lejn l-EU27 biss tqies li jikkalkula l-marġnijiet tad-dumping definittivi.

(26)

Fl-aħħar nett, għall-valutazzjoni tal-interess tal-Unjoni, il-Kummissjoni stħarrġet ukoll l-impatt tal-ħruġ tar-Renju Unit fuq it-tweġibiet għall-kwestjonarju sottomessi minn importaturi u minn utenti mhux relatati, jiġifieri Nova Trading S.A., Airoldi, TitanX Engine Cooling AB (“TitanX”), Multilaque SAS, Valeo, Company A u Amcor Flexibles Singen GmbH u rċeviet data aġġornata, fejn applikabbli.

(27)

Fit-12 ta’ Jannar 2021, permezz ta’ nota għall-fajl (5) ,, il-Kummissjoni informat lill-kumpaniji u lill-assoċjazzjonijiet mir-Renju Unit li ma kinux se jibqgħu jikkwalifikaw bħala partijiet interessati fi proċedimenti ta’ rimedju kummerċjali. L-ebda parti interessata ma rreaġixxiet għal din in-nota.

(28)

L-investigazzjoni żvelat li l-miżuri anti-dumping fuq l-AFRPs u l-miżuri kontra ċ-ċirkomvenzjoni fuq l-importazzjonijiet ta’ ċertu fojl tal-aluminju imposti bir-Regolament ta’ Implimentazzjoni tal-Kummissjoni (UE) 2017/2213 (6) jirkbu ftit fuq xulxin f’termini tad-definizzjoni tal-prodott għal żewġ kodiċijiet TARIC, jiġifieri taħt 7607119044 u 7607119071. Għalkemm it-trikkib huwa estremament minuri u jkopri biss kojls minn 0,03 mm sa 0,045 mm meta ppreżentati b’tal-anqas żewġ saffi, ikun illegali li jiġu applikati b’mod simultanju u kumulattiv żewġ dazji anti-dumping differenti fuq l-istess prodott. Għalhekk, il-Kummissjoni ddeċidiet li tikkoreġi l-ambitu tal-prodott tal-miżuri inkwistjoni sabiex issolvi din il-kwistjoni u tneħħi l-kojls minn 0,03 mm sa 0,045 mm meta jiġu ppreżentati b’tal-anqas żewġ saffi. Din il-korrezzjoni ma għandha l-ebda impatt materjali fuq l-analiżi tas-sejbiet tal-investigazzjoni.

(29)

Konsegwentement, il-prodotti tal-aluminju li jaqgħu taħt il-kodiċijiet TARIC 7607119044 u 7607119071 ġew esklużi mill-ambitu tal-prodott.

(30)

Kif indikat fil-premessi minn (61) sa (105) tar-Regolament provviżorju, diversi partijiet ippreżentaw talbiet għall-esklużjoni tal-prodott fir-rigward tal-prodotti li ġejjin: stokk ta’ tubi mgħottija, pjanċi miksija, pinen miksija u pinen mhux miksija għall-użu fil-manifattura ta’ skambjaturi tas-sħana tal-karozzi tal-aluminju bbrejżjat u fil-manifattura ta’ berrieda tal-batteriji tal-vetturi elettriċi (“HEX AFRPs tal-karozzi”); kojls tal-aluminju għall-produzzjoni ta’ kojls miksijin u ta’ pannelli komposti tal-aluminju (“ACP”); folji litografiċi; folji tal-batteriji; fojl tal-aluminju konvertitur ta’ gauge minn 30 sa 60 mikroni (“ACF-30-60”) u AFRPs għall-użu fil-manifattura ta’ paletti għall-venetian blinds.

(31)

Wara l-iżvelar provviżorju, diversi partijiet ipprovdew kummenti dwar is-sejbiet provviżorji tal-Kummissjoni li huma indirizzati f’din it-taqsima ta’ hawn taħt. Barra minn hekk, erba’ utenti oħrajn; jiġifieri Amcor Flexibles Singen GmbH (“Amcor”), Hitachi ABB Power grids (“Hitachi”), TDK Foil Italy S.p.A. (“TDK IT”) u TDK Hungary Components Kft (“TDK HU”) ippreżentaw talbiet addizzjonali għal eżenzjoni tal-prodott relatati mal-prodotti li ġejjin: stokk tal-fojl, AFRPs għall-użu fil-produzzjoni ta’ transformers tal-enerġija u AFRPs għall-użu fil-produzzjoni ta’ kapaċitaturi elettrolitiċi tal-aluminju.

(32)

Valeo sostniet li s-sottomissjonijiet ippreżentati mill-assoċjazzjoni European Aluminium (“EA”) u mill-Kumpanija B wara l-iżvelar provviżorju ma ġewx sottomessi b’mod puntwali ħlief għad-dokument t21.003825. Fuq il-bażi tat-Taqsimiet 7.ii u 8.ii tan-Notifika ta’ Bidu, Valeo ssottomettiet li l-iskadenza sabiex jiġu sottomessi kummenti dwar sottomissjonijiet ta’ partijiet oħrajn u sabiex jiġu sottomessi elementi fattwali ġodda kienet tikkoinċidi u kellha tiġi stabbilita għall-10 ta’ Mejju 2021 f’dak li għandu x’jaqsam mas-sottomissjonijiet tagħha. Fuq din il-bażi, hija sostniet li jenħtieġ li s-sottomissjonijiet ta’ EA u tal-Kumpanija B ippreżentati wara din id-data jiġu injorati għas-sejbiet definittivi.

(33)

Il-Kummissjoni ċaħdet din l-affermazzjoni. F’konformità mat-Taqsima 8, l-aħħar paragrafu tan-Notifika ta’ Bidu u mat-Taqsima 5.7 tal-istess Notifika, l-aħħar paragrafu, il-Kummissjoni kienet talbet lil EA u lill-Kumpanija B jissottomettu informazzjoni addizzjonali (7) fil-forma ta’ aġġornamenti ta’ informazzjoni diġà sottomessa jew ta’ evidenza ta’ sostenn fir-rigward ta’ ċerti talbiet u biċċiet ta’ informazzjoni. L-informazzjoni addizzjonali kienet neċessarja għall-valutazzjoni xierqa tal-affermazzjonijiet minn partijiet oħrajn. Fir-rigward tat-twaqqit tal-kummenti ta’ EA, il-Kummissjoni kienet tat estensjoni tal-iskadenza sat-28 ta’ Mejju 2021 wara li rċeviet talba debitament sostanzjata (8). Għalhekk, dawn il-kummenti ġew ippreżentati sal-iskadenza mitluba.

(34)

Fil-11 ta’ Ġunju 2021, Valeo pprovdiet kummenti dwar id-dokumenti ta’ partijiet oħrajn t21.003825, t21.004224, t21.004298 u t21.004304. Peress li dawn id-dokumenti kienu disponibbli fi TRON aktar minn 7 ijiem qabel is-sottomissjoni ta’ Valeo, il-Kummissjoni qieset li ma kinux ġew ippreżentati b’mod puntwali.

(35)

Wara l-iżvelar definittiv, Valeo sostniet li r-raġunament tal-Kummissjoni li tikkunsidra l-kummenti tagħha tal-11 ta’ Ġunju bħala ppreżentati b’mod mhux puntwali kien kontradittorju, mhux issostanzjat u jikser id-drittijiet tad-difiża ta’ Valeo. B’mod partikolari, hija argumentat li l-Kummissjoni qieset is-sottomissjoni bħala ppreżentata b’mod mhux puntwali iżda xorta waħda indirizzat il-kummenti tagħha b’tali mod li Valeo ma setgħetx tikkunsidra jekk il-kummenti kinux tqiesu ammissibbli fis-sħuħija tagħhom u kkunsidrati mill-Kummissjoni. Barra minn hekk, Valeo rreferiet għat-tip ta’ dokumenti ppreżentati minn EA u mill-Kumpanija B; jiġifieri “Kummenti”, “Rapport tas-seduta / Sottomissjoni”, “Sottomissjoni” u “Tweġibiet”. Hija sostniet li l-iskadenza ta’ 7 ijiem sabiex tikkummenta dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji msemmijin fil-Punt 8.ii tan-notifika ta’ bidu ma kinitx tapplika għas-sottomissjoni tagħha li kien fiha tweġibiet għat-tweġibiet u kummenti dwar l-informazzjoni ġdida sottomessa.

(36)

F’dan ir-rigward, il-Kummissjoni qieset li l-iskadenza ta’ 7 ijiem imsemmija fil-punt 8.ii tan-notifika ta’ bidu kienet tapplika bl-istess mod kemm għall-kummenti dwar is-sottomissjonijiet tal-partijiet l-oħrajn kif ukoll għat-tweġibiet għall-kummenti magħmulin minn partijiet oħrajn. F’dan ir-rigward speċifiku, il-Kummissjoni kkonfermat li s-sottomissjoni ta’ Valeo ma ġietx ippreżentata b’mod puntwali. Fi kwalunkwe każ, kif imsemmi fil-premessa (10), il-Kummissjoni qieset is-sottomissjonijiet kollha riċevuti sas-17 ta’ Ġunju 2021. Meta wieħed iqis li, għalhekk, il-Kummissjoni qieset il-kummenti ta’ Valeo tal-11 ta’ Ġunju, u tat lil Valeo opportunità sabiex tikkummenta dwar is-sejbiet tal-Kummissjoni f’dan ir-rigward, il-Kummissjoni ma qisitx li nkisru d-drittijiet tad-difiża ta’ Valeo. Għalhekk, din l-affermazzjoni ġiet miċħuda.

(37)

Valeo argumentat ukoll li l-Kumpanija B allegatament ingħatat estensjoni ġeneruża ħafna u twila mingħajr ġustifikazzjoni tal-iskadenza ta’ 7 ijiem. F’dan ir-rigward, ta’ min jinnota li t-tweġibiet tal-Kumpanija B ġew ippreżentati fi ħdan l-iskadenza ta’ 7 ijiem sabiex tikkummenta dwar il-kummenti tal-partijiet l-oħrajn ladarba dawn tal-aħħar kienu disponibbli fil-fajl miftuħ, u li ma ngħatat l-ebda estensjoni tal-iskadenza. Għalhekk, din l-affermazzjoni ġiet miċħuda.

(38)

Valeo argumentat ukoll li l-Kummissjoni ċċitat ċerti dokumenti li ma kinux ippubblikati b’mod uffiċjali u affermat li dan kien jirrappreżenta ksur tad-drittijiet proċedurali tagħha peress li hija qieset is-sottomissjoni ta’ EA (t21.004221) bħala mhux puntwali, inammissibbli u, għalhekk, ma kienx jistħoqqilha subtweġiba. Barra minn hekk, Valeo rreferiet għat-Taqsima 9 tan-Notifika ta’ Bidu u qieset li EA kienet ġiet iffavorita b’mod arbitrarju u diskriminatorju meta l-iskadenza tagħha sabiex tikkummenta dwar il-kummenti tal-partijiet l-oħra ġiet estiża bi 18-il jum filwaqt li partijiet oħrajn ġeneralment ingħataw estensjonijiet ta’ 7 ijiem.

(39)

L-affermazzjoni ta’ Valeo dwar id-disponibbiltà ta’ ċerti dokumenti nstabet li kienet leġittima peress li d-dokumenti msemmijin ma kinux saru disponibbli, b’mod involontarju, bħala parti mill-fajl miftuħ għall-partijiet wara l-iżvelar definittiv. Sadanittant, dawn id-dokumenti żdiedu mal-fajl miftuħ. Fir-rigward tal-affermazzjoni ta’ Valeo relatata mal-inammissibbiltà tal-kummenti u mal-valutazzjoni tagħha ta’ dawn il-kummenti, il-Kummissjoni nnotat li Valeo kellha biżżejjed żmien sabiex tipprovdi kummenti dwar il-kummenti ta’ partijiet oħrajn, inkluża s-sottomissjoni ta’ EA, u li fil-fatt hija kkummentat dwar sottomissjonijiet oħrajn ippreżentati diversi jiem wara s-sottomissjoni ta’ EA. Barra minn hekk, il-Kummissjoni tivvaluta kull talba għal estensjoni tal-iskadenza individwalment peress li r-raġunijiet għat-talba ta’ tali estensjonijiet huma speċifiċi għall-kumpaniji u l-Kummissjoni qieset li ċ-ċirkostanzi mressqin minn EA kienu ta’ natura li jippermettu l-estensjoni tal-iskadenza mitluba. Fil-fatt, il-Kummissjoni ma rrifjutat l-ebda talba għal estensjoni tal-iskadenza fil-qafas tal-kummenti wara l-iżvelar definittiv. F’dan ir-rigward, il-Kummissjoni ma qisitx li kienet iffavorixxiet lil EA b’mod arbitrarju u diskriminatorju. Għalhekk, dawn l-affermazzjonijiet ġew miċħudin.

(40)

Wara l-iżvelar definittiv, Valeo talbet lill-Kummissjoni tikkunsidra s-sottomissjonijiet tagħha li saru bejn il-11 ta’ Ġunju u l-11 ta’ Lulju 2021. (9) Il-Kummissjoni qablet u dawn il-kummenti ġew ikkunsidrati.

(41)

Fuq l-istess nota, TitanX affermat, wara l-iskadenza sabiex tikkummenta dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, li l-kummenti sottomessi mill-Kumpanija B (10) ma ġewx ippreżentati b’mod puntwali u ma setgħux jiġu vverifikati. Hija stiednet lill-Kummissjoni sabiex tibbaża s-sejbiet tagħha fuq l-informazzjoni ppreżentata mill-partijiet interessati sal-10 ta’ Mejju 2021. Jekk il-Kummissjoni tibbaża s-sejbiet tagħha fuq is-sottomissjoni mhux puntwali tal-Kumpanija B, TitanX affermat li jenħtieġ li l-Kummissjoni tikkunsidra wkoll l-informazzjoni li hija ppreżentat bħala tweġiba għall-argumenti tal-Kumpanija B. Barra minn hekk, TitanX affermat ukoll li s-sottomissjoni tal-Kumpanija B kisret id-drittijiet tad-difiża ta’ partijiet interessati oħrajn peress li ma identifikatx id-dokumenti li kienet qed twieġeb jew il-kumpanija fil-mira ta’ dawn il-kummenti.

(42)

F’dan il-kuntest, u kif imsemmi fil-premessa (10), il-Kummissjoni ma qisitx is-sottomissjonijiet ippreżentati wara s-17 ta’ Ġunju għall-iżvelar definittiv tagħha. Madankollu, sabiex jiġu żgurati d-drittijiet tad-difiża tal-partijiet interessati kollha, il-kummenti ta’ TitanX ippreżentati fil-21 ta’ Ġunju 2021 ġew ikkunsidrati, fejn xieraq, bħala kummenti wara l-iżvelar finali. Għalhekk, il-Kummissjoni kkonfermat li hija qieset is-sottomissjonijiet kollha magħmulin mill-partijiet interessati f’dan ir-Regolament.

(43)

F’dak li għandu x’jaqsam mad-drittijiet tad-difiża, il-Kummissjoni ma qisitx li s-sottomissjoni tal-Kumpanija B kisret id-drittijiet tad-difiża ta’ partijiet oħrajn. Għall-kuntrarju, is-sottomissjoni tal-Kumpanija B, billi ma identifikatx b’mod speċifiku partijiet interessati oħrajn, żgurat li s-sigrieti kummerċjali, li l-iżvelar tagħhom jista’ jkun ta’ detriment għal kwalunkwe parti jew għat-tnejn li huma, ma ġewx żvelati. Barra minn hekk, meta wieħed iqis li n-numru ta’ partijiet għal din l-investigazzjoni attivi fis-settur tal-AHEX AFRP huwa limitat u meta wieħed iqis li l-kummenti sottomessi mill-Kumpanija B kienu speċifiċi biżżejjed sabiex jippermettu lil partijiet oħrajn jifhmu b’mod raġonevoli s-sustanza tagħhom, il-Kummissjoni ma qisitx li tali kummenti kisru d-drittijiet tad-difiża ta’ partijiet interessati oħrajn. Fuq din il-bażi, din l-affermazzjoni ġiet miċħuda.

(44)

Wara l-iżvelar provviżorju, waslu kummenti mingħand tliet utenti, l-assoċjazzjoni tal-fornituri tal-karozzi, l-Assoċjazzjoni tal-manifatturi tal-karozzi Ewropej (ACEA), BMW, esportatur wieħed mhux inkluż fil-kampjun, Shanghai Huafon Aluminium Corporation (“Huafon”), u EA.

(45)

Diversi partijiet affermaw li l-AHEX AFRPs u AFRPs ta’ komoditajiet oħrajn li jaqgħu fl-ambitu jappartjenu għal klassijiet differenti ta’ prodotti peress li għandhom karatteristiċi differenti f’termini ta’ ligi, ta’ proċessi differenti ta’ riċerka u ta’ żvilupp u ta’ validazzjoni. Il-produttur esportatur Huafon afferma li 95 % tal-HVACR (11) u applikazzjonijiet oħrajn ma jużawx l-ibbrejżjar bħala teknoloġija ta’ tgħaqqid għal HEX AFRPs u kienu jirriżultaw minn proċess ta’ manifattura differenti. Huwa sostna wkoll li l-applikazzjonijiet tal-HEX fl-HVACR u f’segment ieħor ma jużawx pinen miksija u stokk ta’ tubi mgħottija. L-istess produttur esportatur afferma li sehem għoli ħafna tal-bejgħ tal-AFRP fl-Ewropa jikkonsisti fi prodotti standard kif iddefiniti fl-ilment li jikkontradixxi d-dikjarazzjoni tal-Kummissjoni fil-premessa (69) tar-Regolament provviżorju li l-biċċa l-kbira tal-AFRPs għandhom l-ispeċifikazzjonijiet tagħhom stess skont l-applikazzjoni jew ir-rekwiżiti tal-utent finali kkonċernat. Huafon żied li l-produtturi tal-Unjoni ma kinux ippreparati sabiex jipprovdu l-prodotti uniċi li jesportaw.

(46)

Dawn il-partijiet affermaw ukoll li dawn id-differenzi jwasslu għal nuqqas ta’ interkambjabbiltà.

(47)

Il-Kummissjoni rreferiet għall-valutazzjoni inizjali tagħha li l-AHEX AFRPs jikkondividu l-istess karatteristiċi kimiċi, tekniċi u fiżiċi bażiċi ma’ AFRPs oħrajn li jaqgħu fil-kamp ta’ applikazzjoni tal-investigazzjoni (ara l-premessi (67) sa (68) tar-Regolament provviżorju). Barra minn hekk, dawn il-prodotti huma simili għal HEX AFRPs, li jaqgħu wkoll fil-kamp ta’ applikazzjoni tal-investigazzjoni. Dawn jintużaw għal applikazzjonijiet oħrajn bħal HVACR li huma magħmulin minn ligi simili (kemm jekk miksijin kif ukoll jekk le) u jiġu mmanifatturati bl-istess tagħmir tal-produzzjoni. Barra minn hekk, kif imsemmi fil-premessa (73) tar-Regolament provviżorju u kkonfermat minn EA, l-AHEX AFRPs ma humiex l-uniċi prodotti mibjugħin lill-fornituri tal-karozzi tal-Grad 1 (li huma l-akbar fis-suq), li, fost ħafna prodotti oħrajn jeħtieġ li jgħaddu minn proċess ta’ riċerka u ta’ żvilupp u ta’ validazzjoni.

(48)

L-affermazzjonijiet ta’ Huafon relatati mal-HVACR ma ġewx issostanzjati. Fi kwalunkwe każ, l-evidenza fil-fajl turi li l-AHEX AFRPs u l-HVACR AFRPs jikkondividu l-istess karatteristiċi kimiċi, tekniċi u fiżiċi bażiċi u li jiġu mmanifatturati bl-użu tal-istess tagħmir tal-produzzjoni. Barra minn hekk, is-sorsi disponibbli għall-pubbliku (12) jikkontradixxu l-affermazzjoni li l-HVACR AFRPs ma jużawx l-ibbrejżjar bħala teknoloġija tat-tgħaqqid. Barra minn hekk, Huafon ma pprovda l-ebda evidenza ta’ sostenn għall-affermazzjoni li sehem għoli ħafna tal-bejgħ tal-AFRPs fl-Ewropa kien jikkonsisti minn prodotti standard u lanqas li l-prodotti tiegħu ma setgħux jiġu mmanifatturati mill-industrija tal-Unjoni jew jiġu ssostitwiti bi prodotti oħrajn.

(49)

F’dak li għandu x’jaqsam mal-interkambjabbiltà, il-Kummissjoni rreferiet għall-premessa (70) tar-Regolament provviżorju. B’mod simili għal prodotti oħrajn li jaqgħu taħt l-ambitu, l-AHEX AFRPs jistgħu ma jkunux interkambjabbli ma’ AFRPs oħrajn peress li jista’ jkollhom l-ispeċifikazzjonijiet tagħhom stess skont l-applikazzjoni jew ir-rekwiżiti tal-utent finali kkonċernat. Madankollu, kif indikat minn EA, dan ma jagħmilhomx uniċi u ma jimplikax li ma għandhomx l-istess karatteristiċi fiżiċi, kimiċi u tekniċi bażiċi bħal prodotti oħrajn li jaqgħu fi ħdan il-kamp ta’ applikazzjoni tal-investigazzjoni. F’dak ir-rigward, EA argumentat ukoll li l-AHEX AFRPs huma interkambjabbli ma’ HEX AFRPs oħrajn peress li huma simili fil-kompożizzjoni kimika u/jew fir-rigward tal-ispeċifikazzjonijiet tagħhom fi ħdan it-tolleranzi tekniċi rilevanti għall-applikazzjonijiet speċifiċi. Fuq din il-bażi, dawn l-affermazzjonjiet ġew miċħudin.

(50)

TitanX u Valeo saħqu li, f’konformità mal-ġurisprudenza eżistenti (13), jenħtieġ li l-Kummissjoni ma tattribwixxix importanza deċiżiva għall-eżistenza ta’ karatteristiċi fiżiċi, tekniċi u kimiċi bażiċi allegatament identiċi taż-żewġ klassijiet tal-prodott. L-istess partijiet affermaw ukoll li l-Kummissjoni naqset milli tispjega liema elementi oħrajn huma deċiżivi sabiex tikkonkludi dwar l-eżistenza tal-istess karatteristiċi bażiċi bejn iż-żewġ klassijiet ta’ prodotti.

(51)

Sa mill-bidu nett, irid jitfakkar li r-Regolament bażiku ma jiddefinixxix direttament il-kunċett tal-“prodott ikkonċernat” u li l-Kummissjoni għandha diskrezzjoni konsiderevoli f’dan il-qasam, dment biss li “[l-]kundizzjoni li tirrigwarda l-omoġenità tal-prodott taħt kunsiderazzjoni ma għandhiex tiġi totalment imneħħija mill-interpretazzjoni tar-Regolament bażiku”. (14) Barra minn hekk, il-ġurisprudenza li fuqha bbażaw il-partijiet interessati tiddikjara li l-karatteristiċi fiżiċi, tekniċi u kimiċi huma “naturalment importanti” iżda mhux neċessarjament għandhom prijorità. Fil-fatt, hemm firxa ta’ fatturi li tista’ tiddependi fuqhom il-Kummissjoni, iżda dawn huma indikattivi u l-Kummissjoni hija obbligata tiddetermina l-prodott ikkonċernat billi tuża dawk il-kriterji kollha. Huwa importanti li minn dan bilfors isegwi li l-prodotti li ma jkunux identiċi jistgħu jinġabru flimkien taħt l-istess definizzjoni tal-prodott ikkonċernat, u l-eżami ta’ jekk prodott speċifiku ġiex inkluż b’mod validu għandu jkun ibbażat fuq il-karatteristiċi tal-prodott ikkonċernat kif iddefiniti mill-Kummissjoni. (15) Fl-analiżi tagħha f’dan il-każ, il-Kummissjoni ma bbażatx biss fuq il-fatt li l-AHEX AFRPs għandhom l-istess karatteristiċi fiżiċi, tekniċi u kimiċi bażiċi bħal AFRPs oħrajn. Tabilħaqq, il-Kummissjoni stabbiliet li:

(52)

Fuq dik il-bażi, l-affermazzjoni ta’ TitanX u ta’ Valeo ġiet miċħuda.

(53)

Diversi partijiet affermaw li l-valutazzjoni tal-Kummissjoni dwar il-kapaċità tal-produzzjoni tal-Unjoni kienet ibbażata fuq fatti żbaljati u kienet nieqsa minn motivazzjoni. Huma indikaw li l-konklużjonijiet ma kinux appoġġati minn evidenza rreġistrata jew ma kinux motivati biżżejjed u li partijiet interessati oħrajn ma setgħux jikkummentaw dwar it-tali data.

(54)

TitanX u Valeo affermaw li l-Kummissjoni ma misshiex iddependiet fuq id-deċiżjoni tad-DĠ COMP rigward l-akkwist minn Gränges ta’ Impexmetal peress li t-tali deċiżjoni kienet tassumi l-preżenza ta’ partijiet fornituri oħrajn inklużi produtturi Ċiniżi u s-sitwazzjoni fis-suq tal-AHEX AFRPs inbidlet b’mod sinifikanti peress li l-fornituri tal-UE ma għandhomx il-kapaċità disponibbli u l-fornituri Ċiniżi ma għadhomx jirrappreżentaw għażla ta’ provvista vijabbli wara l-impożizzjoni tal-miżuri tal-AD.

(55)

Is-sejba tal-Kummissjoni li l-industrija tal-Unjoni għandha kapaċità suffiċjenti sabiex tissodisfa d-domanda kurrenti kif imsemmi fil-premessa (75) tar-Regolament provviżorju ma hijiex ibbażata biss fuq id-deċiżjoni tal-Kummissjoni dwar il-fużjoni ta’ Gränges u ta’ Impexmetal (16). Tabilħaqq, kienet ibbażata wkoll fuq informazzjoni oħra (17) li diġà kienet fil-fajl meta l-Kummissjoni waslet għall-konklużjonijiet provviżorji tagħha (u kkonfermata mid-deċiżjoni tal-Kummissjoni msemmija aktar ’il fuq). Barra minn hekk, hija bbażat fuq informazzjoni addizzjonali pprovduta wara l-iżvelar provviżorju li kkonfermat u appoġġat il-valutazzjoni provviżorja tal-Kummissjoni. Ta’ min jinnota li l-partijiet interessati kellhom l-opportunità li jikkummentaw dwar informazzjoni ġdida bħal din (18).

(56)

Valeo sostniet ukoll li l-Kummissjoni injorat l-informazzjoni estensiva li tindika nuqqas ta’ kapaċità disponibbli fir-Regolament provviżorju. Valeo u TitanX ipprovdew ukoll dokumenti addizzjonali li jindikaw żieda fil-ħinijiet għat-tlestija tal-proċessi u fil-problemi ta’ kapaċità fil-forma ta’ estratti mill-posta elettronika. F’dan ir-rigward, l-industrija tal-Unjoni argumentat li l-ħinijiet għat-tlestija tal-proċess ftit itwal u l-problemi temporanji ta’ kapaċità kienu marbutin mal-irkupru f’daqqa u b'saħħtu ta’ wara l-COVID. Dan wassal għal żieda ġenerali fid-domanda. Elementi oħrajn, bħal nuqqas ta’ kontejners fir-RPĊ, ikkontribwew ukoll għal żieda addizzjonali fid-domanda fl-UE. L-industrija tal-Unjoni spjegat ukoll li l-volumi mitlubin marru lil hinn mill-volumi miftehmin u li, meta titqies is-sitwazzjoni ta’ wara l-COVID, tali żieda fid-domanda ma setgħetx tiġi assorbita minnufih mingħajr ma tiżdied il-forza tax-xogħol. Sabiex tagħmel dan, l-industrija tal-Unjoni affermat li kienet teħtieġ viżibbiltà fit-terminu medju fil-forma ta’ kuntratti ffirmati, u mhux ordnijiet immedjati, sabiex jiġu ddeterminati l-volumi mistennijin u l-forza tax-xogħol meħtieġa. Barra minn hekk, l-industrija tal-Unjoni pprovdiet spjegazzjonijiet sodisfaċenti li juru li ċerti estratti minn posta elettronika pprovduti mill-utenti jistgħu jiġu interpretati ħażin bħala li jindikaw nuqqas strutturali ta’ kapaċità iżda li fil-fatt kienu relatati ma’ sitwazzjoni ta’ nuqqas temporanju.

(57)

Wara l-iżvelar definittiv, Valeo affermat li ma setgħetx tingħata tort talli talbet volumi li jmorru lil hinn mill-ftehimiet kuntrattwali u li hemm ħtieġa dejjem akbar għal AHEX AFRP minħabba l-isplużjoni fid-domanda fis-settur tal-mobilità elettrika. Valeo żiedet ukoll li l-inabbiltà tal-industrija tal-Unjoni li tadatta malajr għad-domanda dejjem akbar kienet l-aktar sinjal ċar tal-limitazzjonijiet ewlenin u strutturali tal-kapaċità li qed taffaċċja l-industrija tal-Unjoni.

(58)

F’dan ir-rigward, anki jekk jitqiesu l-allegazzjonijiet dwar l-iżviluppi ta’ wara l-PI, il-Kummissjoni qieset li l-industrija tal-Unjoni kienet qed tadatta għaż-żieda fid-domanda u li l-limitazzjonijiet tal-kapaċità kienu ta’ natura temporanja. Tabilħaqq, dawk l-allegazzjonijiet urew li l-utenti kienu qed jinnegozjaw kuntratti ġodda mal-industrija tal-Unjoni. Fuq din il-bażi, din l-affermazzjoni ġiet miċħuda.

(59)

Barra minn hekk, l-industrija tal-Unjoni argumentat li l-utenti ewlenin tal-AHEX AFRPs li affermaw nuqqas ta’ kapaċità ma ssottomettewx talbiet għal kwotazzjonijiet li jappartjenu għal volumi addizzjonali li kellhom jiġu kkonsenjati b’mod supplimentari għall-volumi tal-kuntratti diġà eżistenti għall-maġġoranza tal-fornituri tal-AHEX AFRPs. Din l-affermazzjoni twaqqa’ n-nuqqas ta’ kapaċità disponibbli. Fi kwalunkwe każ, il-Kummissjoni osservat li mill-informazzjoni fil-fajl jidher li ċerti utenti jistgħu jakkwistaw jew qed jippjanaw li jakkwistaw kwantitajiet addizzjonali mill-industrija tal-Unjoni. Konsegwentement, il-Kummissjoni ċaħdet l-affermazzjoni li l-industrija tal-Unjoni ma għandhiex biżżejjed kapaċità tal-produzzjoni.

(60)

Wara l-iżvelar definittiv, Valeo spjegat li l-fatt li ma kinitx nediet talbiet formali għall-kwotazzjonijiet kien marbut mal-bosta rifjuti li kienet affaċċjat u, għalhekk, kienet qed tistenna tweġiba negattiva. Barra minn hekk, Valeo argumentat li hija kienet involuta f’negozjati għall-konsenja ta’ AHEX AFRPs ma’ produttur tal-Unjoni.

(61)

F’dan ir-rigward, il-Kummissjoni qieset li l-kumment ta’ Valeo kien spekulattiv u ma setax jitqies bħala evidenza ta’ sostenn relatata mat-talbiet għall-kwotazzjonijiet. Il-Kummissjoni nnotat ukoll li n-negozjati li għalihom irreferiet Valeo ma kinux relatati ma’ volumi addizzjonali iżda ma’ tiġdid tal-kuntratt wara l-PI u, għalhekk, dawk l-allegazzjonijiet ġew miċħudin.

(62)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, TitanX affermat li t-termini tal-kuntratt il-ġdid tagħha kienu anqas favorevoli mill-kuntratti preċedenti u li l-kuntratt il-ġdid ma solviex il-problemi li rriżultaw mid-dħul fis-seħħ ta’ dazji anti-dumping provviżorji. Barra minn hekk, hija argumentat li l-kuntratt il-ġdid ma jindirizzax bis-sħiħ il-problema tal-provvista peress li TitanX ikollha tkompli takkwista bi prezzijiet artifiċjalment għoljin mir-RPĊ għal perjodu ta’ żmien partikolari.

(63)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, Valeo tenniet li l-produtturi tal-Unjoni ma għandhomx il-kapaċità li jissodisfaw id-domanda kollha tal-UE għal AHEX AFRPs u pprovdiet dokumenti sensittivi li jiddeskrivu ċerti problemi tal-kapaċità u mġibiet kummerċjali.

(64)

Wara l-iżvelar definittiv, TitanX sostniet li jenħtieġ li l-problema tal-kapaċità li qed taffaċċja l-industrija tal-Unjoni ma titqiesx bħala temporanja fid-dawl tad-durata tagħha. Hija rrapportat problemi riċenti oħrajn li għandhom impatt fuq il-katina tal-provvista tagħha u lmentat dwar l-imġiba opportunistika u abbużiva ta’ ċerti produtturi ewlenin tal-Unjoni.

(65)

Wara l-iżvelar definittiv, Valeo sostniet li r-raġunijiet invokati mill-Kummissjoni sabiex tirrifjuta l-affermazzjoni ta’ Valeo ta’ nuqqas ta’ kapaċità (rkupru ta’ wara l-COVID, kostijiet tan-nol u nuqqas ta’ disponibbiltà ta’ materja prima) ma kinux jindirizzaw il-ħafna każijiet iddokumentati b’mod uffiċjali li allegatament jindikaw il-problemi kroniċi u sistemiċi ta’ kapaċità esperjenzati mill-produtturi tal-Unjoni.

(66)

F’dan ir-rigward, anki jekk tikkunsidra l-allegazzjonijiet dwar l-iżviluppi ta’ wara l-PI, il-Kummissjoni qieset li, minħabba d-durata tagħha, is-sitwazzjoni deskritta minn TitanX u minn Valeo ma kinitx ta’ natura sistemika, kronika jew strutturali, iżda pjuttost sitwazzjoni temporanja li tippermetti lill-industrija tal-Unjoni taġġusta għas-sitwazzjoni l-ġdida tas-suq f’kuntest ta’ rkupru ekonomiku b’saħħtu ta’ wara l-COVID. Dan huwa pprovat ukoll mis-sitwazzjoni deskritta fil-premessa (61) li tindika problema temporanja marbuta mal-impożizzjoni ta’ miżuri anti-dumping provviżorji. Għalhekk, il-Kummissjoni kkonfermat is-sejbiet tagħha fuq il-bażi tal-evidenza matul il-PI u ċaħdet din l-affermazzjoni.

(67)

Fir-rigward tal-problemi l-oħrajn imsemmijin, anki jekk titqies l-informazzjoni dwar l-iżviluppi ta’ wara l-PI, il-Kummissjoni ma qisitx li dawn ikunu jikkorrispondu għal żviluppi anormali fir-relazzjonijiet kummerċjali b’mod ġenerali iżda pjuttost għal prattiki ta’ negozjar f’perjodu ta’ tensjoni fis-suq. Għalhekk, is-sejbiet li saru fuq il-bażi tal-evidenza matul il-PI jibqgħu l-istess. Fi kwalunkwe każ, kif imsemmi fil-premessa (552), jenħtieġ li jitfakkar li l-iskop tal-miżuri anti-dumping huwa li jirrestawraw kundizzjonijiet ġusti u ekwi, bir-riżultat tagħhom li normalment ikun żieda fil-prezzijiet fis-suq tal-Unjoni.

(68)

Barra minn hekk, kif imsemmi fil-premessa (56), il-Kummissjoni ma invokatx raġunijiet bħall-kostijiet tan-nol u n-nuqqas ta’ disponibbiltà ta’ materja prima sabiex tirrifjuta l-affermazzjoni ta’ Valeo dwar in-nuqqas ta’ kapaċità. Kif imsemmi fil-premessa (152), it-tali elementi ntużaw sabiex jispjegaw iż-żieda riċenti fil-prezzijiet, u mhux in-nuqqas ta’ kapaċità. Għall-kuntrarju, il-Kummissjoni qagħdet fuq l-irkupru ekonomiku ta’ wara l-COVID sabiex tispjega s-sitwazzjoni attwali tas-suq. Fuq din il-bażi, dawn l-affermazzjonjiet ġew miċħudin.

(69)

Wara l-iżvelar definittiv, Valeo sostniet ukoll li l-Kummissjoni naqset milli tikkunsidra l-evidenza uffiċjali kollha u naqset milli tipprovdi motivazzjoni suffiċjenti u konsistenti b’appoġġ għas-sejbiet tagħha dwar il-kapaċità tal-AHEX AFRP. Hija żiedet li l-Kummissjoni għandha obbligu li tikkunsidra d-data uffiċjali kuntrarja kollha u tiddeċiedi liema għandha l-ogħla valur evidenzjarju. B’mod partikolari, Valeo l-ewwel ilmentat dwar is-sommarji pubbliċi allegatament b’nuqqasijiet “estremi” ta’ ċerti dokumenti (19) użati mill-Kummissjoni għas-sejbiet tagħha. F’dan ir-rigward, Valeo qieset li l-użu ta’ tali informazzjoni riklassifikata kien jikkostitwixxi ksur tad-drittijiet tad-difiża ta’ Valeo. Barra minn hekk, Valeo affermat li l-użu ta’ 54 % tal-kapaċità tal-produzzjoni rrapportat mill-industrija tal-Unjoni għall-AHEX AFRPs fl-2020 kien jikkontradixxi l-allegati problemi “temporanji” ta’ kapaċità affaċċjati fl-ewwel parti tal-2021 u ma setax jiġi spjegat mill-“irkupru f’daqqa u b’saħħtu ta’ wara l-COVID”. F’dan ir-rigward, Valeo indikat id-dannu li l-industrija tal-Unjoni kkawżat lilha nnifisha meta allegatament ma setgħetx tforni fl-2021 filwaqt li kellha tali rata ta’ użu tant baxxa fl-2020.

(70)

Il-Kummissjoni ma qablitx u qieset li kienet qieset l-evidenza uffiċjali rilevanti kollha sabiex toħroġ konklużjonijiet sinifikattivi u imparzjali bbażati fuq motivazzjonijiet suffiċjenti u konsistenti. L-ewwel nett, il-Kummissjoni qieset li l-verżjoni miftuħa tad-dokumenti li bbażat fuqhom kienet tinkludi sommarju tal-informazzjoni sensittiva li ppermettiet lill-partijiet interessati kollha jkollhom fehim raġonevoli tagħhom. Il-Kummissjoni nnotat ukoll li Valeo ma talbitx verżjoni miftuħa riveduta ta’ dawn id-dokumenti. F’dan ir-rigward, il-Kummissjoni ma qisitx li d-drittijiet tad-difiża ta’ Valeo nkisru. F’dak li għandu x’jaqsam mar-rata ta’ użu tal-kapaċità u l-allegat dannu kkawżat mill-industrija fuqha nnifisha, l-ewwel jenħtieġ li jiġi nnotat li, kif imsemmi fil-premessa (117), il-Kummissjoni ma bbażatx fuq is-sottomissjoni tal-EA li turi użu ta’ 54 % tal-kapaċità fl-2020 sabiex tivvaluta l-kapaċità tal-produzzjoni iżda bbażat b’mod konservattiv fuq il-vjeġġi mill-industrija tal-Unjoni. Barra minn hekk, ta’ min jinnota li l-kontradizzjoni deskritta minn Valeo tikkorrispondi għal sentejn differenti (2020 vs 2021) meta s-sitwazzjoni ekonomika kienet differenti b’mod sinifikanti, li jwassal għal livelli differenti ħafna ta’ tkabbir u ta’ domanda għall-AFRPs.

(71)

Barra minn hekk, TitanX ikkontestat xi dikjarazzjonijiet magħmulin mill-Kumpanija B rigward allegati diffikultajiet sabiex takkwista mir-RPĊ minħabba fatturi bħan-nuqqas ta’ kontejners jew diffikultajiet fil-provvista relatati mal-fornituri Ċiniżi. Hija kkontestat ukoll id-dikjarazzjonijiet li s-sitwazzjoni tal-konsenji tal-Kumpanija B kienet tjiebet u li l-produtturi tal-HEX ma kinux eżawrixxew l-għażliet sabiex isibu sorsi addizzjonali minn produtturi oħrajn tal-Unjoni jew li l-volumi mitlubin għall-2022 kienu jkunu aktar baxxi milli fl-2021.

(72)

Il-Kummissjoni qieset li l-allegazzjonijiet mhux appoġġati u kontradittorji magħmulin mill-Kumpanija B u t-tweġibiet sussegwenti minn TitanX kienu relatati ma’ elementi speċifiċi għall-kumpanija f’relazzjoni kummerċjali li l-Kummissjoni ma setgħetx tivverifika.

(73)

Valeo argumentat ukoll li EA kienet ingannat lill-Kummissjoni dwar il-kapaċità disponibbli tagħha b’sottomissjonijiet foloz f’dan ir-rigward. EA sostniet li l-allegazzjonijiet ta’ Valeo dwar is-sottomissjonijiet tagħha kienu foloz u inaċċettabbli. Hija argumentat ukoll li dawn l-affermazzjonijiet ma kinux issostanzjati b’evidenza fil-fajl miftuħ. Il-Kummissjoni kkonfermat il-kumment ta’ EA u ċaħdet l-affermazzjoni ta’ Valeo f’dan ir-rigward.

(74)

Diversi partijiet interessati affermaw li l-investimenti tal-industrija tal-Unjoni ma jkunux biżżejjed sabiex jissodisfaw iż-żieda mbassra fid-domanda xprunata mill-bidla minn vetturi b’magna ta’ kombustjoni interna (“ICE”) għal vetturi elettriċi/ibridi sal-2026. Fl-istess kuntest, ACEA qieset li ż-żieda fid-domanda se taggrava l-problemi ta’ kapaċità.

(75)

TitanX sostniet li hemm nuqqas ta’ kapaċità disponibbli għall-provvista ta’ AHEX AFRPs għall-manifattura ta’ soluzzjonijiet għat-tkessiħ tas-sistema tal-motopropulsjoni għall-vetturi kummerċjali. Id-domanda għat-tali prodott hija mistennija tikber fl-2021 u x-xejra hija mistennija li tkompli fl-2022.

(76)

F’dan ir-rigward, Valeo u l-industrija tal-Unjoni pprovdew il-projezzjoni tal-konsum tagħhom sal-2026 f’dak li għandu x’jaqsam mal-AHEX AFRPs. Dawn il-projezzjonijiet kienu bbażati fuq in-numru ta’ vetturi ħfief għal kull tip ta’ magna li għandhom jiġu prodotti u fuq il-piż li l-AHEX AFRPs se jirrappreżentaw għal kull tip ta’ magna (kombustjoni interna, elettrika, ibrida sħiħa, ibrida plug-in, ibrida ħafifa, eċċ.).

(77)

Fuq il-bażi tal-projezzjoni tal-industrija tal-Unjoni, il-konsum / id-domanda tal-AHEX AFRP huma mistennijin jiżdiedu minn [195 – 215] (20) elf tunnellata fl-2019 għal [220 – 270] elf tunnellata fl-2026, li jikkorrispondu għal żieda ġenerali ta’ 28 %. Fil-kalkoli dettaljati tagħha, l-industrija tal-Unjoni pprovdiet il-piż tal-AHEX AFRP għal kull karozza (fuq il-bażi tal-intelliġenza tas-suq ipprovduta mill-membri ta’ European Aluminium) u l-volum mistenni tal-produzzjoni tal-vetturi skont it-tip ta’ magna (fuq il-bażi ta’ Ducker Frontier / LMC Automotive (21) Awwissu 2020) b’mod trasparenti. Min-naħa tagħha, Valeo indikat biss li l-kapaċità totali disponibbli tal-Unjoni, bħala medja, tkun 17 % anqas mid-domanda matul il-perjodu 2021-2027 mingħajr ma pprovdiet informazzjoni oħra li dwarha setgħu jikkummentaw partijiet oħrajn.

(78)

Kif imsemmi fil-premessa (34), is-sottomissjoni tal-11 ta’ Ġunju 2021 ta’ Valeo ma ġietx ippreżentata b’mod puntwali u parti mill-kummenti mqajmin kienu relatati ma’ dokument dwar il-projezzjonijiet tal-kapaċità u tal-provvista (22) miżjud mal-fajl minn EA qabel l-iżvelar provviżorju, u li għalih Valeo diġà kellha aċċess.

(79)

Fil-kummenti l-oħrajn tagħha, Valeo qablet mal-volum tal-konsum għas-sena 2019 u qieset li dan kien validu għas-sena 2021 ukoll. Madankollu, Valeo qieset li l-qsim minn EA tal-volum tal-produzzjoni bejn ICE u vetturi ibridi oħrajn (madwar 50 % vs 50 %) ma kinitx korretta peress li s-sehem ta’ vetturi ibridi jkun ħafna ogħla fl-2026 (madwar 73 % vs 27 %). F’dan ir-rigward, hija rreferiet għal IHS Markit, kumpanija tal-intelliġenza tas-suq allegatament ikkonsultata mill-industrija tal-karozzi kollha u li użat fil-projezzjoni tagħha (23). Madankollu, ma setax jiġi aċċertat li l-informazzjoni kienet ipprovduta minn IHS. Fi kwalunkwe każ, il-kalkoli ta’ Valeo tas-sehem ta’ vetturi ICE fl-2026 fuq il-bażi tal-projezzjoni ta’ EA ma humiex akkurati. Tabilħaqq, il-projezzjoni ta’ EA hija li l-vetturi ICE se jirrappreżentaw 40 % (u mhux 50 %) tal-produzzjoni. Barra minn hekk, l-affermazzjoni ta’ Valeo li l-projezzjoni tal-produzzjoni totali ta’ EA tkun ta’ madwar 16-il miljun vettura fl-2026 hija żbaljata wkoll peress li EA rrapportat output totali ta’ madwar 20 miljun għal dak il-perjodu.

(80)

Meta kienet qed tfittex sors ieħor ta’ informazzjoni, il-Kummissjoni kkonsultat artiklu ppubblikat minn Boston Consulting group (“BCG”) (24), ipprovdut mill-Assoċjazzjoni Ewropea tal-fornituri tal-karozzi (CLEPA), li kkonferma li s-sehem ta’ vetturi mhux ICE se jiżdied fis-snin li ġejjin. Skont dan is-sors, is-sehem mis-suq projettat tal-vetturi ICE (diżil u petrol) se jonqos għal 36 % fl-2025; jiġifieri ħafna eqreb għaċ-ċifra ta’ EA milli għal ta’ Valeo. Konsegwentement, il-Kummissjoni sabet li l-projezzjonijiet ta’ EA tal-iżviluppi futuri tas-suq fir-rigward ta’ ICE jirriflettu aktar mill-qrib dawk li bħalissa huma mistennijin li jkunu x-xejriet futuri fil-ħames snin li ġejjin.

(81)

Valeo sostniet ukoll li EA qieset li l-vetturi ICE u ibridi jeħtieġu volum ugwali ta’ AHEX AFRPs li allegatament jikkontradixxi l-informazzjoni kondiviża bejn il-Kumpanija B u Valeo, li tindika piż u ħtieġa akbar tal-AHEX AFRP għal vetturi ibridi milli għal vetturi ICE.

(82)

F’dan ir-rigward, l-ewwel jenħtieġ li jiġi nnotat li EA fil-fatt għamlet distinzjoni fil-konsum ta’ AHEX AFRPs bejn vetturi ICE u vetturi ibridi u qieset li bħala medja l-vetturi ibridi jkunu jeħtieġu aktar AHEX AFRPs milli vetturi ICE. It-tieni, l-informazzjoni kondiviża bejn il-produttur tal-Unjoni, jiġifieri l-Kumpanija B, u Valeo ma tistax titqies rappreżentattiva tad-differenza attwali bejn il-vetturi ICE standard u vetturi ibridi. Tabilħaqq, din l-informazzjoni tirreferi biss għal prodott partikolari li juża l-AHEX AFRPs (chiller) u l-kwantitajiet imsemmijin jirrappreżentaw biss parti insinifikanti mill-volum tax-xiri ta’ Valeo għas-sena 2019 jew għall-PI. Barra minn hekk, ma setax jiġi stabbilit l-impatt tad-daqs tal-proġett u ta’ żieda potenzjali fin-numru ta’ biċċiet ordnati mill-utent OEM downstream. It-tielet, l-investigazzjoni żvelat li l-piż tal-AHEX AFRPs għal kull mudell ivarja skont it-tip ta’ vettura ibrida (ibrida ħafifa / plug-in / sħiħa). Fil-fatt, il-vetturi ibridi ħfief jeħtieġu biss ftit aktar AHEX AFRP mill-vetturi ICE u se jirrappreżentaw sehem kbir mill-vetturi mhux ICE sal-2026. Fuq din il-bażi u fin-nuqqas ta’ kummenti oħrajn dwar il-kwantità ta’ AHEX AFRPs meħtieġa għal kull tip ta’ vettura, il-Kummissjoni qieset li l-istima ta’ EA dwar il-proporzjon tal-konsum għal tipi differenti ta’ vetturi kienet raġonevoli.

(83)

F’dak li għandu x’jaqsam mal-kapaċità eżistenti u mal-investimenti addizzjonali fil-kapaċità, xi partijiet affermaw li jenħtieġ li l-Kummissjoni ma testrapolax id-data tal-produttur tal-Unjoni inkluż fil-kampjun Elval għall-industrija kollha tal-Unjoni. Barra minn hekk, Valeo sostniet li, fuq il-bażi ta’ “data akkurata u konservattiva ħafna”, il-pjan ta’ investiment ippreżentat mill-Kumpanija B ma kienx biżżejjed sabiex ikopri d-domanda prevista għal AHEX AFRPs bejn l-2022 u l-2025, fuq il-bażi tal-projezzjoni tal-konsum tagħha. Min-naħa tagħha, il-CLEPA affermat li l-industrija tal-Unjoni ma ssostanzjatx l-investimenti tagħha sabiex tespandi l-kapaċità b’evidenza konvinċenti jew b’motivazzjoni suffiċjenti. Valeo affermat ukoll li d-dikjarazzjoni tal-Kumpanija B li bħalissa qed toqrob lejn il-kapaċità massima tal-park tal-makkinarju kienet f’kunflitt mal-użu tal-kapaċità rrapportat ippreżentat fid-dokument t21.004224 fejn il-Kumpanija B tirrapporta previżjoni ta’ użu ta’ [80-88 %] tal-kapaċità għall-2021.

(84)

L-ewwel nett, ta’ min jinnota li l-Kummissjoni ma estrapolatx id-data ta’ Elval lill-industrija tal-Unjoni u kkunsidrat it-tali informazzjoni għal Elval biss. Barra minn hekk, fir-rigward tad-data tal-Kumpanija B, Valeo bbażat fuq suppożizzjoni mhux akkurata relatata mal-allokazzjoni tal-kapaċità tal-produzzjoni għall-AHEX AFRPs. Fil-fatt hija qieset l-allokazzjoni ta’ [60-70 %] għal HEX applikabbli biss fl-2021, għall-perjodu kollu tal-2022-2026 filwaqt li l-Kumpanija B indikat li l-kapaċità installata addizzjonali tiġi allokata għal HEX skont il-kundizzjonijiet kummerċjali iżda tal-anqas tikber mad-domanda. Billi għamlet dan, Valeo ssottovalutat bi [30-40 %] l-installazzjoni ta’ kapaċità addizzjonali għall-prodotti HEX.

(85)

Wara l-kummenti tal-CLEPA, il-Kummissjoni talbet lill-industrija tal-Unjoni sabiex tikkomplementa l-informazzjoni sensittiva diġà disponibbli fil-fajl fil-forma ta’ tweġibiet għall-kwestjonarju, ta’ esibiti mill-missjonijiet u ta’ dokumenti sensittivi oħrajn b’evidenza addizzjonali disponibbli għal partijiet oħrajn kif ukoll sabiex tiċċara ċerti ċifri u tagħmel ċerti korrezzjonijiet. L-informazzjoni addizzjonali pprovduta minn EA (25) u mill-Kumpanija B (26) ikkonfermat is-sejbiet provviżorji.

(86)

Barra minn hekk, il-Kummissjoni naqset milli tara l-kontradizzjoni bejn it-tbassir tal-użu tal-kapaċità u d-dikjarazzjoni tal-Kumpanija B. Tabilħaqq, għall-kuntrarju tal-affermazzjoni ta’ Valeo, il-Kumpanija B ma tiddikjarax li hija tinsab fi stat ta’ kapaċità sħiħa, iżda li bħalissa qed toqrob lejn tali użu tal-kapaċità filwaqt li t-tbassir tal-użu ta’ [80-88] % tal-kapaċità huwa relatat mas-sena 2021 kollha kemm hi; jiġifieri jenħtieġ li s-sitwazzjoni f’mument partikolari (meta l-Kumpanija B bħalissa qed toqrob lejn il-kapaċità sħiħa) ma tiġix estrapolata u ma titqabbilx ma’ previżjoni relatata ma’ sena sħiħa.

(87)

Fil-qosor, il-Kummissjoni ġabret il-previżjonijiet tad-domanda u tal-provvista (“FC”) li ġejjin għas-snin 2021 u 2026.

Tabella 1

Provvista u domanda għall-AHEX AFRP fl-UE (1 000 tunnellata)

(88)

Is-sorsi għall-valuri ta’ hawn fuq huma dawn li ġejjin. Għat-tabella ta’ hawn fuq, id-domanda kienet ibbażata fuq il-projezzjoni tal-konsum ta’ EA (27) adattata għall-qsim ta’ BCG bejn vetturi ICE u mhux ICE. Il-projezzjoni tal-konsum ta’ Valeo (28) ġiet irrapportata bħala sottomessa.

(89)

Wara l-iskadenza sabiex tikkummenta dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, Valeo pprovdiet ċifri tat-tbassir riveduti bbażati fuq rapport tas-suq ta’ Mejju 2021 mid-ditta tar-riċerka IHS Markit. Fuq il-bażi ta’ dan ir-rapport u tal-piż tal-AHEX AFRPs projettat ta’ Valeo għal kull tip ta’ magna tal-karozzi, Valeo affermat li d-domanda kienet se tilħaq it-[320 – 350] elf tunnellata fl-2026 wara żieda mistennija fil-produzzjoni tal-karozzi u aċċellerazzjoni fix-xejra ta’ elettrifikazzjoni. Fuq din il-bażi, hija sostniet li l-projezzjoni tad-domanda ta’ EA kienet qed tissottovaluta d-domanda futura saħansitra aktar u tenniet li l-industrija tal-Unjoni ma setgħetx tissodisfa d-domanda attwali u pprovdiet skambji tal-posta elettronika f’dan ir-rigward. Valeo tenniet ukoll li l-investimenti ppjanati tal-industrija tal-Unjoni ma kinux biżżejjed sabiex jissodisfaw id-domanda futura.

(90)

Wara l-iżvelar definittiv, Valeo kkontestat ukoll id-dipendenza tal-Kummissjoni fuq l-artiklu ta’ BCG sabiex tirrifjuta l-istimi tad-domanda għall-AHEX AFRPs futuri għal diversi raġunijiet u qieset li l-istima tad-domanda tal-Kummissjoni kienet skaduta u jenħtieġ li tiġi rriveduta fid-dawl tat-tbassir il-ġdid ipprovdut.Barra minn hekk, Valeo rreferiet għall-pakkett leġiżlattiv “Lest għall-mira ta’ 55 %” skont il-Patt Ekoloġiku Ewropew bħala żvilupp importanti li ma ġiex ikkunsidrat fi previżjonijiet oħrajn u li kien jinkludi speċifikament proposti li għandhom l-għan li jnaqqsu l-emissjonijiet netti ta’ gassijiet serra u li jnaqqsu l-emissjonijiet medji ta’ karozzi ġodda b’55 % mill-2030 u b’100 % mill-2035 meta mqabblin mal-2021. F’dan il-kuntest, hija argumentat li l-projezzjoni tad-domanda tat-Tabella 1 u tal-premessa (87) kienet obsoleta u li l-projezzjonijiet futuri jiżdiedu b’mod sinifikanti bħala riżultat tal-Patt Ekoloġiku. F’dan il-kuntest, hija talbet lill-Kummissjoni tuża l-previżjoni tad-domanda ta’ Valeo fuq il-bażi tar-rapport tal-IHS Markit ta’ Mejju 2021 li wera żieda aktar mgħaġġla fid-domanda futura għal AHEX AFRPs mir-rapporti pprovduti qabel minn Valeo jew minn EA. Barra minn hekk, Valeo argumentat li IHS Markit kienet sors aħjar minn Ducker u minn LMC Automotive (“LMC”), li kienet aktar aġġornata (fiż-żmien tas-sottomissjoni) u kienet aċċessibbli għal partijiet oħrajn (permezz ta’ verżjonijiet mhux kunfidenzjali sinifikattivi jew max-xiri).

(91)

L-affermazzjoni mtennija ta’ Valeo (ara l-premessa (89)) li l-industrija tal-Unjoni ma setgħetx tiffaċċja d-domanda attwali diġà kienet indirizzata fil-premessi (64) sa (66).

(92)

Minbarra l-kummenti ta’ Valeo dwar l-eżistenza ta’ informazzjoni aktar aġġornata, EA ntalbet tipprovdi previżjoni aġġornata tad-domanda. Il-previżjoni tad-domanda pprovduta minn EA kienet ibbażata fuq żewġ sorsi; Previżjoni tal-Produzzjoni ta’ Vetturi Ħfief ta’ IHS Markit tal-5 ta’ Lulju 2021 u DuckerFrontier (Mejju 2021) fuq il-bażi ta’ LMC Automotive Q1/2021. Id-data ta’ IHS Markit kienet dettaljata ħafna u kienet tinkludi l-volumi ta’ produzzjoni previsti għal kull pajjiż tal-produzzjoni, u b’hekk tippermetti l-identifikazzjoni tal-volum li għandu jiġi prodott fl-Unjoni. Is-sett tad-data ta’ LMC automotive Q1/2021 ma kienx relatat mas-suq tal-Unjoni biss u ġie aġġustat ’l isfel fuq il-bażi tat-tbassir tal-produzzjoni ta’ IHS Markit tal-5 ta’ Lulju 2021 sabiex jikkorrispondi mal-EU27. Barra minn hekk, id-data ta’ LMC Automotive ntużat ukoll sabiex tiġi stabbilita l-qasma bejn it-tipi differenti ta’ magni. Fuq il-bażi ta’ din l-istatistika aġġornata u fuq il-bażi tal-piż tal-AHEX AFRP għal kull tip ta’ magna tal-karozzi ta’ EA, EA pproġettat li d-domanda se tiżdied minn [188 – 195] elf tunnellata fl-2019 għal [222 – 263] elf tunnellata fl-2026.

(93)

Wara s-sottomissjoni ta’ EA, Valeo kkummentat li l-limitu aktar baxx għall-2026 kien taħt id-domanda stmata mill-Kummissjoni fit-Tabella 1 u li dan il-valur kien illoġiku fid-dawl tat-tkabbir mistenni fid-domanda minħabba l-elettrifikazzjoni tas-settur tal-karozzi.

(94)

F’dan ir-rigward, il-Kummissjoni nnotat li, għall-kuntrarju tal-projezzjonijiet tad-domanda preċedenti, l-aħħar projezzjoni ta’ EA kienet relatata esklussivament mal-EU27, li spjegat għaliex, minkejja li wriet żieda sinifikanti fid-domanda, il-projezzjoni bdiet minn livell aktar baxx. Għalhekk, il-Kummissjoni qieset li l-istima ta’ EA kienet loġika peress li wriet żieda fid-domanda matul il-perjodu 2019 – 2026 f’konformità max-xejra ta’ elettrifikazzjoni.

(95)

Valeo sostniet ukoll li s-sorsi użati minn EA seħħet qabel it-tħabbira tal-Kummissjoni dwar il-pakkett “Lesti għall-Mira ta’ 55 %” tal-Patt Ekoloġiku tal-14 ta’ Lulju 2021 u li EA kienet konxja minn dik it-tħabbira, iżda li EA ma kinitx qieset dak l-element fl-istima tagħha tad-domanda. Fuq il-bażi ta’ dan, hija argumentat li EA ma kkooperatx kemm verament setgħet. Barra minn hekk, Valeo talbet lill-Kummissjoni tistma d-domanda futura jew fuq il-bażi tar-rapport ta’ IHS Markit imsemmi fil-premessa (90) wara li taġġornah ’il fuq sabiex tqis l-impatt tal-Patt Ekoloġiku jew fuq il-bażi tal-istatistika aġġornata li għadha kif ġiet ippreżentata ta’ LMC Automotive (29) tad-29 ta’ Lulju 2021 li allegatament ikkunsidrat l-impatt tal-Patt Ekoloġiku. Fuq din il-bażi, l-istima tad-domanda ta’ Valeo għall-2026 laħqet it-[340 – 380] elf tunnellata.

(96)

Il-Kummissjoni qieset li EA kienet ikkooperat kemm verament setgħet peress li EA kienet użat l-aktar statistika riċenti ta’ IHS Markit li kellha għad-dispożizzjoni tagħha. Fi kwalunkwe każ, skont Valeo u “assoċjazzjoni ewlenija fl-industrija”, IHS Markit hija sors aħjar minn Ducker u LMC. Barra minn hekk, il-Kummissjoni qieset li l-informazzjoni pprovduta minn EA kienet riċenti biżżejjed sabiex tiġi stmata d-domanda futura bl-aktar mod akkurat possibbli. Barra minn hekk, Valeo ma pprovdietx evidenza li turi li t-tħabbira tal-Patt Ekoloġiku ma kinitx antiċipata minn ditti tar-riċerka bħal IHS Markit jew LMC, speċjalment meta jitqies li huma jipproduċu rapporti bħal dawn fuq bażi regolari u li t-tħabbira tal-Patt Ekoloġiku sempliċiment ifformalizzat dak li l-esperti tas-suq kienu diġà antiċipaw minn qabel (30). Barra minn hekk, kif indikat minn Valeo, previżjonijiet futuri preċiżi fi kwalunkwe każ ikunu soġġetti għal diskussjonijiet mal-klijenti OEM tagħha sabiex jiġu ddeterminati l-ħtiġijiet futuri.

(97)

Il-Kummissjoni qieset ukoll it-tbassir l-aktar reċenti pprovdut minn Valeo iżda rrifjutatu billi l-analiżi tal-informazzjoni mogħtija minn Valeo msemmija fil-premessi (89) u (95), u li kienet appoġġata b’data sottostanti fil-kummenti tagħha dwar l-iżvelar definittiv, uriet li l-istimi tad-domanda tagħha (kemm jekk ibbażati fuq IHS Markit jew LMC) kienu sopravalutati peress li ma kinux relatati mal-installazzjoni tal-magni jew mal-produzzjoni tal-karozzi fl-Unjoni, iżda kienu jinkludu wkoll l-installazzjoni tal-magni jew il-produzzjoni tal-karozzi f’pajjiżi oħrajn bħar-Renju Unit, ir-Russja u t-Turkija. Fil-fatt, ir-rapporti ta’ IHS Markit użati minn Valeo ssopravalutaw l-installazzjoni annwali tal-magni fl-Unjoni b’aktar minn 18 % matul il-perjodu 2021-2026. Filwaqt li r-rapporti ta’ LMC ipprovduti ma kinux jippermettu li ssir distinzjoni għal kull pajjiż tal-produzzjoni tal-karozzi, kienu jirreferi b’mod ċar għal ambitu ġeografiku akbar mill-Unjoni peress li kienu jinkludu pajjiżi tas-CIS u preżumibbilment pajjiżi oħrajn, bħar-Renju Unit u t-Turkija, fejn il-produzzjoni tal-karozzi sseħħ fi kwantitajiet sinifikanti. Fuq din il-bażi, tqies li l-ambitu ġeografiku ta’ din l-istatistika kien wiesa’ wisq u jenħtieġ li ma jintużax sabiex tiġi vvalutata d-domanda tal-AHEX AFRP fl-Unjoni. F’dan il-kuntest, il-Kummissjoni qieset li d-domanda mbassra pprovduta minn EA, kif imsemmi fil-premessa (103), kienet aktar xierqa peress li kienet relatata mal-UE biss u, kienet ibbażata fuq rapport riċenti biżżejjed ta’ IHS Markit, Li, kif imsemmi fil-premessa (90), Valeo tqis bħala sors aħjar minn Ducker u LMC.

(98)

Wara l-iżvelar definittiv, TitanX sostniet li t-tbassir tad-domanda tal-Kummissjoni kien obsolet u ma kienx iqis il-vetturi kummerċjali. Hija rreferiet għall-Patt Ekoloġiku Ewropew u għall-proposti leġiżlattivi mħabbrin li għandhom l-għan li jnaqqsu l-emissjonijiet ta’ gassijiet serra b’mod ġenerali u fis-settur tal-karozzi b’mod partikolari. F’dan il-kuntest, hija affermat li l-miri l-ġodda tal-emissjonijiet ikunu jżidu r-rata tal-elettrifikazzjoni fl-industrija tal-karozzi u jwasslu għal żieda fid-domanda għall-AHEX AFRPs. F’dan ir-rigward, hija stiednet lill-Kummissjoni tikkunsidra l-previżjoni tad-domanda ta’ Valeo msemmija fil-premessa (89)(104).

(99)

F’dak li għandu x’jaqsam mal-affermazzjoni ta’ TitanX relatata mal-vetturi kummerċjali, kif imsemmi fil-premessa (115), il-Kummissjoni qieset biss 85 % tal-volum medju tal-vjeġġi lejn l-UE ddestinat għat-trasport sabiex tivvaluta b’mod konservattiv id-domanda għall-vetturi ħfief biss. Bħala tali, il-15 % li jifdal kienu jinkludu vjeġġi destinati għal vetturi kummerċjali. Fin-nuqqas ta’ kwalunkwe informazzjoni li tindika konklużjonijiet differenti f’dan ir-rigward jew evidenza dwar id-domanda futura għall-vetturi kummerċjali, tqies li l-industrija tal-Unjoni kellha kapaċità suffiċjenti sabiex taqdi d-domanda għal dan is-settur partikolari. Għalhekk, din l-affermazzjoni ġiet miċħuda.

(100)

Wara l-iżvelar addizzjonali, Valeo u CLEPA kkontestat l-approċċ tal-Kummissjoni li teskludi l-produzzjoni tal-karozzi f’pajjiżi bħat-Turkija, ir-Russja u r-Renju Unit mill-kalkoli tagħha. F’dan ir-rigward, Valeo argumentat fuq il-bażi tal-istatistika tal-Eurostat u tar-rekords tagħha stess li hemm esportazzjonijiet sinifikanti ta’ komponenti tal-HEX lejn ir-Russja, it-Turkija u r-Renju Unit. Barra minn hekk, hija argumentat li hemm produzzjoni limitata ħafna tal-komponenti tal-HEX f’dawn il-pajjiżi u li dawn il-pajjiżi jiddependu ħafna fuq l-importazzjonijiet mill-Unjoni. Min-naħa tagħha, il-CLEPA saħqet li l-produzzjoni tal-vetturi barra mill-Unjoni hija responsabbli għal sehem sinifikanti tal-produzzjoni mill-fornituri tal-karozzi fl-UE u li hemm kapaċità limitata tal-produzzjoni għall-AHEX barra mill-UE. Il-CLEPA affermat ukoll li s-sehem tal-partijiet tal-UE jew tal-valur miżjud tal-UE f’vetturi prodotti fir-Renju Unit, fir-Russja jew fit-Turkija kien sinifikanti. Għalhekk, il-CLEPA affermat li l-esportazzjonijiet jiġġeneraw dħul sinifikanti għall-fornituri tal-karozzi tal-UE u li jenħtieġ li l-produzzjoni tal-fornituri tal-karozzi ma tiġix iddeterminata biss mill-produzzjoni tal-vetturi fl-UE nnifisha, iżda wkoll mir-reġjun usa’. Fuq din il-bażi, Valeo u l-CLEPA argumentaw li jenħtieġ li d-domanda għall-AHEX AFRPs tkun ibbażata fuq il-ħtiġijiet attwali tal-produtturi tal-AHEX, irrispettivament mid-destinazzjoni tal-prodotti tagħhom. Barra minn hekk, Valeo argumentat li kieku ma jiġux ikkunsidrati l-AHEX iddestinati għall-esportazzjoni, l-interess tal-Unjoni ma jkunx analizzat kif xieraq.

(101)

Kif imsemmi fil-premessa (145), il-Kummissjoni għarfet l-eżistenza ta’ esportazzjonijiet ta’ komponenti tal-HEX minn ċerti produtturi tal-AHEX. Madankollu, il-Kummissjoni ma qablitx mal-fatt li l-produzzjoni tal-karozzi f’dawn il-pajjiżi jenħtieġ li titqies fit-totalità tagħha għall-valutazzjoni tad-domanda fl-UE. Tabilħaqq, l-affermazzjoni li tali pajjiżi kienu jiddependu ħafna fuq l-importazzjonijiet mill-Unjoni ma kinitx issostanzjata b’evidenza ta’ sostenn. Kif irrikonoxxut minn Valeo, l-istatistika tal-Eurostat ma kinitx relatata esklussivament mal-AHEX u kienet tinkludi prodotti oħrajn. Filwaqt li rrikonoxxiet l-eżistenza tal-kapaċità tal-produzzjoni tal-AHEX f’dawn il-pajjiżi, Valeo ma kkwantifikatx il-kapaċità tal-produzzjoni tal-produtturi domestiċi tal-AHEX li semmiet. Barra minn hekk, ma setax jiġi eskluż li dawn is-swieq ma jiġux fornuti minn fornituri domestiċi tal-AHEX (31) minbarra dawk ikkwotati minn Valeo jew minn produtturi tal-AHEX mhux tal-UE. Fuq din il-bażi, il-Kummissjoni qieset li Valeo ma kinitx uriet li l-produtturi tal-AHEX li jinsabu fl-Unjoni kienu qed jipprovdu lil dawn il-pajjiżi b’tali proporzjonijiet li tali swieq kienu qed jiddependu ħafna fuq il-produtturi tal-Unjoni ta’ AHEX. Barra minn hekk, il-Kummissjoni qieset li l-affermazzjonijiet tal-CLEPA ma kinux speċifiċi biżżejjed peress li ma kinux relatati b’mod partikolari mal-AHEX iżda pjuttost mal-attivitajiet ta’ esportazzjoni tal-fornituri tal-karozzi b’mod ġenerali.

(102)

Fuq il-bażi tal-elementi fil-fajl, il-Kummissjoni rrikonoxxiet l-eżistenza ta’ ċerti rabtiet kummerċjali bejn il-produtturi tal-AHEX li jinsabu fl-Unjoni u l-manifatturi tal-karozzi f’pajjiżi bħar-Russja, it-Turkija u r-Renju Unit. Madankollu, fin-nuqqas ta’ informazzjoni speċifika li tippermetti l-identifikazzjoni tal-esportazzjonijiet tal-AHEX lejn dawn il-pajjiżi, il-Kummissjoni ma setgħetx tibbaża s-sejbiet tagħha fuq l-ambitu ġeografiku msemmi minn Valeo fid-domanda projettata tagħha għall-AHEX AFRP. Fi kwalunkwe każ, il-Kummissjoni qieset li jenħtieġ li d-domanda fis-suq tal-Unjoni tkun ibbażata primarjament fuq il-produzzjoni tal-karozzi fl-Unjoni, speċjalment fid-dawl tal-Patt Ekoloġiku, li jikkonċerna l-Unjoni b’mod esklussiv. Barra minn hekk, l-analiżi tad-domanda kif ippreżentata fil-premessa (127) u tal-provvista kif ippreżentata fit-Tabella 1 xorta waħda tippermetti lill-industrija tal-Unjoni tipprovdi kwantitajiet addizzjonali neċessarji għall-produzzjoni tal-AHEX li għandhom jiġu esportati. Barra minn hekk, il-produtturi tal-AHEX fl-Unjoni jistgħu japplikaw għal awtorizzazzjoni għall-importazzjoni ta’ AFRPs taħt il-proċedura ta’ proċessar attiv li, jekk jingħata mill-awtoritajiet doganali f’konformità mal-leġiżlazzjoni doganali, ikun jippermettilhom sabiex imbagħad jesportaw l-AHEX li jirriżultaw mingħajr ma jkunu soġġetti għad-dazji anti-dumping. Għalhekk, il-piż u l-impatt finanzjarju fuq l-attivitajiet ta’ esportazzjoni tal-produtturi tal-AHEX ikunu limitati ħafna. Fuq din il-bażi, l-affermazzjonijiet ta’ Valeo u tal-CLEPA ġew miċħudin u l-Kummissjoni qieset li l-interess tal-Unjoni kien ġie vvalutat kif xieraq.

(103)

Fit-12 ta’ Awwissu 2021, EA pprovdiet previżjoni aġġornata tad-domanda għall-AHEX AFRP ibbażata fuq rapport aktar dettaljat tal-Produzzjoni tal-vetturi ħfief ta’ IHS Markit li jidentifika t-tipi ta’ magni. Dak ir-rapport inħareġ fl-istess ħin bħar-rapport tal-5 ta’ Lulju 2021 imsemmi fil-premessa (91) u dawn ir-rapporti kienu konsistenti. Fuq dik il-bażi, it-tbassir finali aktar baxx ta’ EA żdied minn 222 għal 232 elf tunnellata. It-tbassir ta’ EA bbażat fuq DuckerFrontier / LMC Automotive Q1/2021 baqa’ identiku għal 263 elf tunnellata.

(104)

Meta qabblet IHS Markit tal-5 ta’ Lulju 2021 mal-qsim tad-29 ta’ Lulju 2021 ta’ LMC għal kull tip ta’ magna, il-Kummissjoni osservat li d-data ta’ LMC, li allegatament ikkunsidrat il-pakkett leġiżlattiv “Lesti għall-Mira ta’ 55 %”, xorta waħda kienet tipprevedi sehem ħafna ogħla għal ICE (40 %) għas-sena 2026 mid-data ta’ IHS Markit tal-5 ta’ Lulju (22 %) ippubblikata qabel it-tħabbira tal-pakkett leġiżlattiv “Lesti għall-Mira ta’ 55 %” u użata minn EA għall-projezzjoni tagħha.

(105)

Fuq il-bażi ta’ dan ta’ hawn fuq, il-Kummissjoni qieset li kien diffiċli li jiġi previst il-livell tad-domanda tal-AHEX AFRP għall-2026 bi grad għoli ta’ akkuratezza peress li għad hemm numru ta’ inċertezzi fir-rigward tal-implimentazzjoni tal-pakkett leġiżlattiv “Lesti għall-Mira ta’ 55 %” dwar l-elettrifikazzjoni tal-mobilità u b’mod partikolari, il-produzzjoni ta’ karozzi ħfief. Fi kwalunkwe każ, il-Kummissjoni qieset li l-previżjonijiet ta’ EA fuq talba, kemm jekk ibbażati fuq l-aħħar data ta’ IHS Markit disponibbli kif irrakkomandat minn Valeo jew fuq il-valuri ogħla tad-data ta’ LMC, kienu raġonevoli.

(106)

Wara l-iżvelar addizzjonali, Valeo kkummentat li l-osservazzjonijiet tal-Kummissjoni relatati mad-data ta’ LMC tad-29 ta’ Lulju 2021 ma kinux korretti. Valeo indikat li d-data ta’ LMC ma kinitx relatata biss mal-EU27, iżda qieset ukoll l-isforzi aktar bil-mod tal-elettrifikazzjoni tal-karozzi fit-Turkija u fir-Russja, li jirriżultaw min-nuqqas ta’ leġiżlazzjoni ekwivalenti għall-Patt Ekoloġiku. Fuq din il-bażi, Valeo affermat li d-data ta’ LMC kienet kompluta u affidabbli, u għalhekk missha tqieset mill-Kummissjoni. Barra minn hekk, hija affermat li l-Kummissjoni ma ppreżentatx data rilevanti relatata mas-sehem ta’ vetturi ICE, elettriċi u ibridi u li l-Kummissjoni jenħtieġ li tikkunsidra d-data ta’ LMC fil-valutazzjoni tagħha tad-domanda prevista għal AHEX AFRPs għar-raġunijiet li, filwaqt li IHS Markit hija l-aktar sors awtorevoli, id-data ta’ LMC hija l-unika data uffiċjali li tikkwantifika l-impatt tat-tħabbira tal-Patt Ekoloġiku.

(107)

Fin-nuqqas ta’ data ta’ LMC disponibbli għal kull pajjiż tal-produzzjoni, il-Kummissjoni ma kinitx f’pożizzjoni li tikkonferma l-kummenti ta’ Valeo relatati ma’ rata aktar bil-mod ta’ elettrifikazzjoni fir-Russja u fit-Turkija allegatament ikkunsidrati minn LMC. Fi kwalunkwe każ, kif imsemmi fil-premessi (97) u (101), il-Kummissjoni qieset li l-ambitu ġeografiku tad-data ta’ LMC ma kienx adattat sabiex tiġi vvalutata d-domanda domestika; li l-informazzjoni pprovduta minn EA kienet riċenti biżżejjed sabiex tiġi stmata d-domanda futura; u li hemm indikazzjonijiet li l-esperti tas-suq kienu antiċipaw it-tħabbira tal-Patt Ekoloġiku. Barra minn hekk, Valeo ma pprovdietx evidenza li turi li t-tħabbira tal-Patt Ekoloġiku ma kinitx antiċipata minn ditti tar-riċerka bħal IHS Markit. Fin-nuqqas ta’ data xierqa ta’ LMC; jiġifieri limitata għall-EU27, il-Kummissjoni għalhekk qieset id-data ta’ IHS Markit tal-5 ta’ Lulju bħala l-aktar bażi riċenti u l-aktar xierqa għall-valutazzjoni tad-domanda ta’ AHEX AFRP fl-2026. Barra minn hekk, il-Kummissjoni tinnota wkoll li Valeo ma tistax tikkunsidra lil IHS bħala sors aktar awtorevoli minn LMC u mbagħad titlob lill-Kummissjoni tuża d-data ta’ LMC, speċjalment meta l-ambitu ġeografiku tagħha ma huwiex adegwat. Fuq din il-bażi, din l-affermazzjoni ġiet miċħuda.

(108)

Wara żvelar addizzjonali, Valeo pprovdiet ukoll simulazzjonijiet ġodda dwar il-projezzjonijiet tal-kapaċità u tal-investimenti tal-industrija tal-Unjoni fuq il-bażi tad-data ta’ LMC tad-29 ta’ Lulju 2021. Valeo affermat li l-industrija tal-Unjoni ma setgħetx tissodisfa d-domanda futura fil-perjodu 2021-2027 anke jekk il-volumi tal-produzzjoni tal-karozzi tnaqqsu bi 18 %.

(109)

F’dan ir-rigward, ta’ min jinnota li tali sottomissjoni ta’ simulazzjonijiet ġodda saret wara l-iskadenza għall-kummenti dwar l-iżvelar definittiv u li l-iżvelar addizzjonali ma kienx relatata mal-kapaċità jew mal-investimenti tal-Unjoni. Fuq din il-bażi, dawn l-elementi ma setgħux jiġu kkunsidrati. Fi kwalunkwe każ, kif stabbilit fil-premessa (107), id-data ta’ LMC ma setgħetx tiġi aċċettata. Barra minn hekk, il-Kummissjoni qieset li d-data ta’ LMC, anki meta mnaqqsa bi 18 %, xorta ssopravalutat id-domanda mbassra tal-EU27 b’mod sinifikanti. Fil-fatt, fuq il-bażi tal-aħħar data ta’ IHS Markit (il-5 ta’ Lulju 2021), il-produzzjoni f’pajjiżi mhux tal-UE matul il-perjodu 2021-2027 kienet tirrappreżenta bejn 26,8 u 30,5 % tal-produzzjoni tal-karozzi tal-UE, għall-kuntrarju ta’ 18 %. Fuq il-bażi ta’ dan li ntqal hawn fuq, din l-affermazzjoni ġiet miċħuda.

(110)

Wara l-iżvelar addizzjonali, Valeo u l-CLEPA affermaw li l-konklużjoni tal-Kummissjoni li d-domanda tal-Unjoni tista’ tiġi assorbita mill-kapaċità mbassra tal-industrija tal-Unjoni u mill-importazzjonijiet projettati minn pajjiżi terzi kienet ivvizzjata minn nuqqas ta’ motivazzjoni u ma kienet appoġġata minn ebda analiżi kwantitattiva. B’mod aktar speċifiku, Valeo sostniet li, għall-kuntrarju tad-dokument ta’ żvelar ġenerali, l-iżvelar addizzjonali ma kienx fiha sommarju ekwivalenti għat-Tabella 1, li ma kienx jippermetti lil Valeo teżerċita kif xieraq id-drittijiet tad-difiża tagħha u tikkummenta dwar il-kapaċità suffiċjenti fl-UE sabiex tissodisfa d-domanda tal-AHEX AFREPs. Barra minn hekk, Valeo sostniet li l-iżvelar addizzjonali ma kienx jindirizza “għexieren ta’ ittri elettroniċi u evidenza oħra sottomessi minn Valeo” fir-rigward tar-rifjut ripetut mill-produtturi tal-Unjoni li jfornu kwantitajiet suffiċjenti ta’ AHEX AFRPs. Billi ma vvalutatx kif xieraq it-tali evidenza, Valeo affermat li l-iżvelar addizzjonali kien ivvizzjat minn motivazzjoni insuffiċjenti u minn żball manifest ta’ valutazzjoni tal-fatti.

(111)

F’dan ir-rigward, il-Kummissjoni qieset li d-dokument ta’ żvelar addizzjonali kien fih informazzjoni dettaljata biżżejjed dwar is-sottomissjonijiet li saru wara d-dokument ta’ żvelar ġenerali u li l-partijiet faċilment setgħu jirreferu għas-sottomissjonijiet oriġinali tal-partijiet. Barra minn hekk, id-dokument ta’ żvelar addizzjonali, kif rifless fil-premessi (92) u (98), irrapporta l-aħħar domanda mbassra għall-AHEX AFRP kif sottomessa minn EA. Il-Kummissjoni kienet użat informazzjoni li kienet disponibbli għall-partijiet u Valeo setgħet sempliċiment tissostitwixxi d-domanda prevista, li tinsab fit-Tabella 1 għas-sena 2026, bl-informazzjoni li tinsab fid-dokument ta’ żvelar addizzjonali, li wkoll kienet tirreferi għas-sottomissjonijiet minn EA. Għalhekk, il-Kummissjoni qieset li l-iżvelar addizzjonali kien fiha l-motivazzjoni u l-analiżi kwantitattiva neċessarji. F’dak li għandu x’jaqsam mad-drittijiet tad-difiża ta’ Valeo, il-Kummissjoni qieset li l-iżvelar addizzjonali kien dettaljat biżżejjed sabiex jippermetti lil Valeo teżerċita d-drittijiet tad-difiża tagħha. Barra minn hekk, l-iżvelar addizzjonali dwar il-kapaċità tal-industrija tal-Unjoni ma kien fih l-ebda element ġdid li ma kienx diġà disponibbli fil-fajl miftuħ.

(112)

Barra minn hekk, il-Kummissjoni qieset li l-evidenza pprovduta minn Valeo fir-rigward tad-diffikultajiet fil-provvista ma kinitx tiġġustifika żvelar addizzjonali peress li n-natura ta’ dawk l-affermazzjonijiet ma kinitx ġdida. Dawk l-affermazzjonijiet diġà ġew indirizzati fil-premessa (91).

(113)

Valeo affermat ukoll li s-sejbiet tal-iżvelar addizzjonali kienu illoġiċi u ma kellhomx motivazzjoni suffiċjenti u adegwata. Essenzjalment, hija affermat li peress li l-Kummissjoni kienet ikkonkludiet li l-industrija tal-Unjoni ma jkollhiex biżżejjed kapaċità sabiex tissodisfa domanda ta’ [295 – 315] (32) elf tunnellata, ma setgħetx tassorbi domanda ogħla bbażata fuq il-projezzjonijiet ta’ Valeo sa [340 – 380] (33) elf tunnellata. Fuq din il-bażi, hija affermat li l-Kummissjoni kienet qed tinjora l-impatt tal-Patt Ekoloġiku.

(114)

Kif imsemmi fil-premessa (97), il-Kummissjoni qieset li l-projezzjonijiet preċedenti u tal-aħħar domanda ta’ Valeo ma kinux ibbażati fuq ambitu ġeografiku xieraq u ssopravalutaw b’mod sinifikanti l-produzzjoni tal-karozzi fl-Unjoni u, konsegwentement, id-domanda għall-AHEX AFRPs fl-Unjoni. Fuq il-bażi tal-aħħar ċifri tal-produzzjoni tal-karozzi mbassrin u bl-użu tal-ambitu ġeografiku xieraq kif imsemmi fil-premessa (98), il-Kummissjoni qieset li l-istimi ta’ EA li jvarjaw minn 232 sa 263 elf tunnellata kienu raġonevoli. Fuq din il-bażi u fuq il-bażi tal-istimi tal-kapaċità tal-industrija tal-Unjoni u tal-importazzjonijiet minn pajjiżi terzi, il-Kummissjoni kkonkludiet li jkun hemm kapaċità suffiċjenti sabiex tassorbi ż-żieda fid-domanda kemm jekk l-importazzjonijiet mir-RPĊ jibqgħu fis-suq kif ukoll jekk le. Fuq din il-bażi, din l-affermazzjoni ġiet miċħuda.

(115)

L-importazzjonijiet miċ-Ċina ta’ AHEX AFRPs kienu bbażati fuq is-sottomissjoni ta’ Valeo. L-importazzjonijiet mit-Turkija ġew ivvalutati fuq il-bażi tal-verifika minn EA tal-esibit Nru 11 li jipprovdi vjeġġi fl-istess format bħad-dokument t21.004336. Sabiex tinżamm interpretazzjoni konservattiva, 85 % biss tal-volum medju tal-vjeġġi lejn l-UE ddestinati għat-trasport għas-snin 2017-2019 tqies li jirrappreżenta l-AHEX AFRPs mhux maħsubin għal vetturi ħfief.

(116)

Wara l-iżvelar definittiv, Valeo qajmet dubji dwar il-volumi tal-importazzjoni mit-Turkija iżda ma speċifikatx għal liema raġuni u lanqas ma ppreżentat kwalunkwe evidenza li ssostni l-affermazzjonijiet tagħha. Kif imsemmi fil-premessa (89), tali volum tal-importazzjoni ġie vvalutat b’mod konservattiv fuq il-bażi ta’ vjeġġi mit-Turkija lejn l-UE kif irrapportati lil EA. Fuq din il-bażi, din l-affermazzjoni ġiet miċħuda.

(117)

Il-kapaċità tal-Unjoni kienet ibbażata fuq is-sottomissjoni tal-EA relatata ma’ vjeġġi tal-AFRP għall-produzzjoni tal-HEX fis-settur tat-trasport. Dan huwa approċċ pjuttost konservattiv peress li l-produzzjoni u l-kapaċità attwali jistgħu jkunu ħafna ogħla mill-vjeġġi. Fuq l-istess nota, 85 % biss tal-volum medju tal-vjeġġi fl-UE ddestinati għat-trasport għas-snin 2017-2019 tqies li jirrappreżenta l-AHEX AFRPs mhux maħsubin għal vetturi ħfief. Iċ-ċifra tal-kapaċità ta’ Valeo ttieħdet mill-istess sottomissjoni.

(118)

Wara l-iżvelar definittiv, EA sostniet li l-Kummissjoni ma misshiex iddependiet fuq id-data dwar il-vjeġġi li tikkorrispondi għall-bejgħ tagħha iżda pjuttost fuq il-kapaċità kif sottomessa lill-Kummissjoni li kienet tammonta għal [400 – 450] elf tunnellata fil-PI (34).

(119)

Bħala tweġiba għal dawk il-kummenti, Valeo u TitanX affermaw li l-kapaċità rrapportata ma tidhirx fil-fajl mhux kunfidenzjali, li l-preżentazzjoni tard ta’ tali informazzjoni ma ppermettitilhomx jikkummentaw dwar il-kontenut tagħha u li ma kinitx tinkludi spjegazzjoni sinifikattiva dwar il-metodoloġija użata ħlief li l-informazzjoni nġabret mill-membri ta’ EA. Barra minn hekk, huma xeħtu dubju fuq ir-relazzjoni bejn is-sottomissjoni msemmija minn EA u ċerti sottomissjonijiet preċedenti (35). Barra minn hekk, huma affermaw li l-kapaċità rrapportata kellha tqis il-validazzjoni tal-produtturi bi programmi ewlenin tal-HEX. Fuq din il-bażi, hija affermat li n-nuqqas ta’ spjegazzjonijiet dettaljati fil-fajl miftuħ kiser id-drittijiet tad-difiża tagħhom. Barra minn hekk, Valeo u TitanX affermaw li l-kapaċità rrapportata ma kinitx realistika fid-dawl tal-użu baxx tal-kapaċità rrapportat għall-PI u tal-problemi temporanji ta’ kapaċità sussegwenti li kienu affaċċjati matul l-ewwel nofs tal-2021 li wasslu għal imġiba allegatament opportunistika u abbużiva fl-ipprezzar mill-industrija tal-Unjoni. Fuq din il-bażi, Valeo u TitanX appoġġaw l-approċċ tal-Kummissjoni f’dak li għandu x’jaqsam mal-kapaċità.

(120)

F’dan ir-rigward, il-Kummissjoni qieset li l-kapaċità rrapportata minn EA ma kinitx tqis il-kapaċità normalment allokata għal AFRPs tal-HEX oħrajn immanifatturati mill-industrija tal-Unjoni jew għal prodotti oħrajn immanifatturati bl-istess tagħmir. Peress li l-Kummissjoni ma bbażatx fuq id-dokument t21.004414 għas-sejbiet tagħha, il-Kummissjoni ma qisitx li nkisru d-drittijiet tad-difiża ta’ Valeo jew ta’ TitanX, għalkemm ammettiet li l-verżjoni mhux kunfidenzjali tad-dokument ma kienx fiha sommarju sinifikattiv tal-kontenut sensittiv tiegħu. Fuq din il-bażi u sabiex tirrapporta l-kapaċità tal-produzzjoni fuq bażi konservattiva, il-Kummissjoni kkonfermat l-approċċ tagħha u bbażat l-istima tal-kapaċità tagħha fuq il-vjeġġi fl-Unjoni. Konsegwentement, l-affermazzjoni ta’ EA ġiet miċħuda.

(121)

Wara l-iżvelar addizzjonali, Valeo argumentat li, f’konformità mal-metodoloġija tal-Kummissjoni għall-valutazzjoni tad-domanda tas-suq, jenħtieġ li l-valutazzjoni tal-kapaċità tal-industrija tal-Unjoni teskludi l-AHEX AFRPs li fl-aħħar mill-aħħar tintuża fil-produzzjoni tal-karozzi f’pajjiżi mhux tal-UE.

(122)

Kif spjegat fil-premessa (117), il-kapaċità tal-Unjoni ġiet ivvalutata b’mod konservattiv fuq il-bażi tal-vjeġġi destinati għas-suq tal-Unjoni. Meta wieħed iqis li dan l-indikatur jirrifletti b’mod konservattiv il-kwantità li l-industrija tal-Unjoni kienet kapaċi twassal għas-suq tal-Unjoni, il-Kummissjoni ma qisitx li jenħtieġ li tali kwantità tiġi rriveduta ’l isfel sabiex jitqies is-sehem tal-AHEX esportati lejn pajjiżi mhux tal-UE u prodotti mill-AFRPs immanifatturati mill-industrija tal-Unjoni. Fi kwalunkwe każ, Valeo ma pprovdietx il-kwantità tal-HEX immanifatturati fl-Unjoni li ġiet esportata lejn pajjiżi mhux tal-UE. Fuq din il-bażi, din l-affermazzjoni ġiet miċħuda.

(123)

Il-kapaċità addizzjonali projettata li tiżdied mill-industrija tal-Unjoni ġiet stabbilita kemm fuq il-bażi tas-sottomissjoni ta’ Valeo msemmija fil-premessa (88), fuq is-sottomissjoni tal-Kumpanija B dwar din il-kwistjoni speċifika appoġġata minn evidenza konkreta dwar proġetti ta’ investiment kif ukoll (36) fuq l-informazzjoni vverifikata tal-produttur tal-Unjoni kkonċernat inkluż fil-kampjun.

(124)

Wara l-iżvelar definittiv, Valeo qajmet dubji dwar l-investimenti f’kapaċità addizzjonali tal-industrija tal-Unjoni għas-snin 2022 u 2023 u sostniet li ma kinitx se tkun kompletament operazzjonali qabel l-2024 minħabba provi, ottimizzazzjoni tat-tagħmir u tneħħija tal-konġestjonijiet. Valeo qajmet ukoll dubji dwar l-allokazzjoni tal-investiment għal AHEX AFRPs.

(125)

Madankollu, dawn l-affermazzjonijiet ma kinux issostanzjati. Fi kwalunkwe każ, l-industrija tal-Unjoni indikat li l-kapaċità tagħha ssegwi l-evoluzzjoni tad-domanda tas-suq u li tkun allokata l-kapaċità addizzjonali għall-AHEX AFRPs jekk ikun hemm kundizzjonijiet tas-suq ekwu.

(126)

Fuq il-bażi tat-tbassir konservattiv ta’ hawn fuq, il-Kummissjoni qieset li l-industrija tal-Unjoni kellha kapaċità suffiċjenti sabiex tissodisfa d-domanda attwali u li kien hemm kapaċità ta’ riżerva suffiċjenti. F’dak li għandu x’jaqsam mad-domanda futura, il-Kummissjoni kkonkludiet li, meta titqies il-kapaċità addizzjonali, ikun hemm biżżejjed provvista sabiex tiġi assorbita ż-żieda fid-domanda kemm jekk l-importazzjonijiet mir-RPĊ jibqgħu fis-suq kif ukoll jekk le. Fi kwalunkwe każ, jista’ jkun mistenni li xi importazzjonijiet mir-RPĊ ikomplu bi prezzijiet mhux dannużi.

(127)

. Il-Kummissjoni osservat ukoll li d-domanda għas-sena 2026, ibbażata fuq id-data ta’ IHS Markit għall-EU27 tal-5 ta’ Lulju 2021 u fuq l-istima interna ta’ Valeo għall-piż tal-AHEX AFRP għal kull tip ta’ magna, xorta waħda tkun aktar baxxa mill-materjal disponibbli fis-suq tal-Unjoni kemm jekk fornit mill-industrija tal-Unjoni kif ukoll jekk jiġi akkwistat minn pajjiżi terzi.

(128)

Meta qieset it-tbassir tal-konsum ta’ Valeo, filwaqt li fl-istess ħin tikkoreġi l-projezzjonijiet tal-kapaċità addizzjonali kif spjegat fil-premessa (118) aktar ’il fuq, il-Kummissjoni kkonkludiet li jkun hemm nuqqas materjali li kieku l-importazzjonijiet mir-RPĊ kellhom jieqfu kompletament. Madankollu, dan in-nuqqas ikun ħafna anqas (5,5 %) min-nuqqas previst minn Valeo għall-perjodu 2022-2027 (17 %) jew għas-sena 2026 (21,7 %). Fi kwalunkwe każ, jekk l-importazzjonijiet mir-RPĊ ikomplu fl-istess kwantitajiet, dan in-nuqqas jispiċċa. Fuq il-bażi ta’ dan ta’ hawn fuq, l-affermazzjonijiet relatati mal-kapaċità, mal-investimenti u man-nuqqas materjali fid-dawl taż-żieda fid-domanda ġew miċħudin.

(129)

L-utenti u l-assoċjazzjoni tagħhom, appoġġati mill-ACEA, affermaw li l-Kummissjoni ma vvalutatx kif xieraq l-impatt tal-miżuri fid-dawl tan-nuqqas ta’ kapaċità disponibbli. Huma affermaw li anke jekk tkun disponibbli l-kapaċità, il-validazzjoni tkun ostaklu għal żmien qasir u li ma setgħux jissostitwixxu malajr l-importazzjonijiet mir-RPĊ bi provvista Ewropea. Fuq din il-bażi, huma affermaw ukoll li kienu skoperti għal riskju kummerċjali sinifikanti u għat-telf ta’ opportunitajiet ta’ negozju. F’dan ir-rigward, il-CLEPA żiedet ukoll li ċerti proġetti globali tal-klijenti, fejn tiġi prodotta l-istess parti, jeħtieġu l-istess kontribut materjali sabiex tiġi żgurata l-konsistenza tal-prestazzjoni tal-programm. Madankollu, din l-affermazzjoni ma ġietx issostanzjata b’evidenza ta’ sostenn relatata mal-AHEX AFRPs. Fl-istess rigward, l-ACEA affermat li l-livell ta’ miżuri provviżorji jżid b’mod sinifikanti l-kostijiet tal-manifattura.

(130)

Valeo indikat li sostituzzjoni rapida ma kinitx possibbli peress li, skont it-tbassir tal-provvista tal-AHEX AFRPs tal-2021 tagħha, il-ligi Ċiniżi vvalidati ma humiex disponibbli fis-suq tal-Unjoni u ma jeżisti l-ebda sors alternattiv. Barra minn hekk, Valeo u diversi partijiet oħrajn affermaw li s-sorsi doppji (jiġifieri l-istess prodott ikun iggarantit simultanjament minn aktar minn fornitur wieħed) spiss ma jkunux aċċettati mill-klijenti.

(131)

Il-Kummissjoni osservat li għal diversi ligi speċifiċi b’sehem importanti ta’ xirjiet minn Valeo, din tal-aħħar kienet akkwistathom f’dawn l-aħħar snin mingħand produttur tal-Unjoni u kienet sussegwentement issostitwiethom bi prodotti bl-istess speċifikazzjonijiet tekniċi mir-RPĊ. Barra minn hekk, il-Kummissjoni kellha evidenza fil-fajl li l-produttur tal-Unjoni inkwistjoni għandu l-kapaċità neċessarja li jforni dan il-prodott speċifiku u ma jkunx jeħtieġ validazzjoni kompletament ġdida mill-utent. Barra minn hekk, l-allegazzjoni ta’ Valeo kienet ibbażata fuq previżjoni tal-provvista tal-2021 filwaqt li l-informazzjoni pprovduta għall-perjodu ta’ investigazzjoni (2019 u 2020) ma kienet tappoġġa l-affermazzjoni tagħha. Konsegwentement, il-Kummissjoni ċaħdet l-affermazzjoni li l-ligi inkwistjoni ma baqgħux jistgħu jiġu akkwistati mis-suq tal-Unjoni.

(132)

L-evidenza fil-fajl uriet li ċerti klijenti jeħtieġu sorsi doppji u li ċerti utenti jsibu soluzzjonijiet alternattivi għax-xirjiet tagħhom ta’ AHEX AFRPs meta jaffaċċjaw problemi tal-konsenja. Dan huwa appoġġat ukoll mill-bażi ta’ data ta’ previżjoni tal-provvista ta’ Valeo għas-snin 2019 u 2020 li tindika l-fatt li sehem sinifikanti tal-materjal fornit miċ-Ċina kellu t-tieni sors validat fl-UE f’dawk is-snin. Sorsi doppji huma evidenza ulterjuri li l-istess ligi u materjali huma vvalidati għall-fornituri Ċiniżi u tal-Unjoni fl-istess ħin.

(133)

EA kkonfermat ukoll li l-bidla mill-akkwist miċ-Ċina għall-akkwist mill-Unjoni kienet diġà qed isseħħ fl-2021, inkluż minn xi klijenti kbar. Barra minn hekk, hija indikat li l-biċċa l-kbira tal-materjal miċ-Ċina importat bħalissa inizjalment kien jiġi pprovdut mill-industrija tal-Unjoni qabel ma ġie ssostitwit minn fornituri b’kost baxx. Din hija evidenza ulterjuri li s-sostituzzjoni tal-importazzjonijiet mir-RPĊ bil-provvista mill-industrija tal-Unjoni tista’ sseħħ malajr. Barra minn hekk, EA indikat li l-bidla tal-fornituri ma tiħux ħafna żmien u tiswiex ħafna flus iżda hija r-riżultat ta’ proċess ta’ normalizzazzjoni tal-ipprezzar wara li jiġu imposti l-miżuri anti-dumping.

(134)

Barra minn hekk, fir-rigward tal-ligi ekwivalenti, Valeo affermat li r-raġuni għad-diskrepanza bejn l-2019/2020 u l-2021 kienet marbuta mal-akkwist u mal-iżvilupp ta’ pjanċi tat-tkessiħ tal-batteriji u affermat li tali informazzjoni hija kruċjali għall-valutazzjoni tal-impatt tal-validazzjoni. Fir-rigward tas-sorsi doppji, Valeo affermat li, minkejja l-aġġustament tal-Kummissjoni, anqas minn [SENSITTIV] % tal-AHEX AFRPs akkwistati mir-RPĊ kellhom it-tieni sors ivvalidat fl-UE.

(135)

Fir-rigward tas-sostituzzjoni u tal-validazzjoni, l-ewwel jenħtieġ li jitfakkar li l-utenti tal-AHEX AFRP xtraw il-maġġoranza tal-AFRPs tagħhom fl-UE matul il-perjodu kkunsidrat u wkoll wara dak il-perjodu, skont id-data ta’ wara l-PI disponibbli għall-Kummissjoni.

(136)

Fir-rigward ta’ ligi ekwivalenti, ta’ min jinnota li, filwaqt li jenħtieġ li d-data ta’ wara l-PI ma tiġix injorata, jenħtieġ li s-sejbiet ta’ din l-investigazzjoni jkunu bbażati primarjament fuq data li tappartjeni għall-perjodu ta’ investigazzjoni. L-informazzjoni disponibbli relatata ma’ utent wieħed uriet li maġġoranza kbira tal-ligi mixtrijin kellhom ekwivalenti fl-UE għas-snin 2019 u 2020. Għas-sena 2021, il-perċentwal ta’ ligi mixtrija fir-RPĊ li kellhom ekwivalenti fl-UE naqas, bħala konsegwenza tal-iżvilupp ta’ AFRPs tal-pjanċi tat-tkessiħ tal-batteriji akkwistati mir-RPĊ, iżda xorta kienu jirrappreżentaw aktar minn nofs il-volum mixtri mir-RPĊ. Meta wieħed iqis ir-rekord storiku li jappartjeni għall-PI u d-data l-aktar reċenti, il-Kummissjoni ċaħdet l-affermazzjoni ta’ Valeo li “ligi Ċiniżi vvalidati ma humiex disponibbli fis-suq tal-Unjoni”.

(137)

Fir-rigward tas-sorsi doppji, il-Kummissjoni qieset li l-evidenza fil-fajl imsemmija fil-premessa (132) u s-sehem sinifikanti tal-AHEX AFRPs li kellhom sorsi doppji kienu evidenza suffiċjenti li tikkontradixxi l-affermazzjoni li “s-sorsi doppji ma jkunux aċċettati mill-klijenti”.

(138)

Wara l-iżvelar definittiv, TitanX tenniet li l-kapaċità tagħha li tikseb AHEX AFRPs minn produtturi oħrajn kienet serjament indebolita minn ostakli għall-validazzjoni li ma setgħux jingħelbu fit-terminu qasir. Fin-nuqqas ta’ elementi evidenzjarji ġodda f’dan ir-rigward jew ta’ kummenti dwar is-sejbiet tal-Kummissjoni, din l-affermazzjoni ġiet miċħuda.

(139)

L-utenti u l-assoċjazzjoni tagħhom, appoġġati mill-ACEA, affermaw ukoll li s-sitwazzjoni fis-suq tal-Istati Uniti hija differenti mis-sitwazzjoni fl-UE peress li ma hemm l-ebda kapaċità disponibbli fl-UE jew f’pajjiżi oħrajn, u li l-proċess ta’ rieżami amministrattiv tal-Istati Uniti joffri aktar flessibbiltà li ma hijiex irreplikata fir-Regolament bażiku.

(140)

L-ewwel nett, kif imsemmi fil-premessi (126) u (127), il-Kummissjoni kkonkludiet li l-industrija tal-Unjoni kellha biżżejjed kapaċità sabiex tassorbi d-domanda attwali u futura dment li jipprevalu l-kundizzjonijiet tas-suq.

(141)

It-tieni, minkejja li l-liġijiet tal-Istati Uniti u tal-UE dwar it-TDI ivarjaw, ir-Regolament bażiku jipprevedi l-eżistenza ta’ rieżamijiet interim skont l-Artikolu 11(3) li jippermettu reviżjoni tal-miżuri fis-seħħ f’ċerti ċirkostanzi. L-Artikolu 11(8) tar-Regolament bażiku jipprevedi wkoll li d-dazji anti-dumping jistgħu jiġu rrimborżati dment li jiġu ssodisfati ċerti kundizzjonijiet.

(142)

Fuq il-bażi ta’ dan ta’ hawn fuq, l-affermazzjonijiet relatati mal-validazzjoni, mas-sostituzzjoni, mas-sorsi doppji u mad-differenzi mis-suq tal-Istati Uniti ġew miċħudin.

(143)

L-utenti u l-assoċjazzjoni tagħhom affermaw ukoll li d-dazji jkollhom impatt materjali fuq is-sitwazzjoni finanzjarja tagħhom u li ma setgħux jassorbu żieda fil-kost marbuta ma’ dazji anti-dumping sinifikanti jew ma’ kostijiet ta’ validazzjoni fid-dawl tas-sitwazzjoni finanzjarja tagħhom. L-utent MAHLE GmbH (“Mahle”) żied li l-Kummissjoni kienet assumiet ħażin li kienet profittabbli fis-sitwazzjoni ta’ qabel il-COVID.

(144)

EA indikat li l-livell tal-miżuri anti-dumping kien raġonevoli u seta’ jwassal għal kundizzjonijiet ekwi sabiex jerġgħu jiġu stabbiliti l-kundizzjonijiet normali tal-kompetizzjoni.

(145)

Il-Kummissjoni osservat li l-livell tal-miżuri definittivi huwa aktar baxx minn dawk provviżorji. Barra minn hekk, l-investigazzjoni żvelat li l-utenti kienu prinċipalment qed jakkwistaw l-AHEX AFRPs tagħhom mill-UE. Fuq din il-bażi, hija qieset li l-miżuri jkollhom biss impatt limitat fuq is-sitwazzjoni finanzjarja tal-utenti. F’dak li għandu x’jaqsam ma’ Mahle, fin-nuqqas ta’ tweġiba għall-kwestjonarju, il-Kummissjoni ma kinitx f’pożizzjoni li tivvaluta l-impatt tal-miżuri fuq is-sitwazzjoni finanzjarja tagħha. Barra minn hekk, l-informazzjoni kondiviża minn Valeo dwar l-impatt tal-miżuri kienet tinvolvi ċerti nuqqasijiet u l-impatt tagħhom kien sopravalutat. L-investigazzjoni żvelat ukoll li sehem sinifikanti mill-volumi tal-bejgħ tal-utent magħmulin mill-AHEX AFRPs miksubin mir-RPĊ ġie esportat lejn pajjiżi mhux tal-UE. Konsegwentement, huwa raġonevoli li wieħed jistenna li dawk l-importazzjonijiet jistgħu jikkwalifikaw taħt ir-reġim ta’ proċessar attiv u b’hekk jiġi evitat il-ħlas ta’ dazji anti-dumping u jitnaqqas l-impatt tal-kostijiet addizzjonali assoċjati. Barra minn hekk, kif muri fil-premessi (130) sa (133), l-utenti jistgħu jevitaw il-kostijiet tal-validazzjoni billi jiksbu l-materjali bħalissa mixtrijin mir-RPĊ minn fornituri vvalidati fl-UE jew billi jaqilbu volumi addizzjonali minn sorsi Ċiniżi għal sorsi Ewropej għall-AHEX AFRPs li għandhom sorsi doppji. Fuq din il-bażi, dawn l-affermazzjonjiet ġew miċħudin.

(146)

Wara l-iżvelar definittiv, TitanX affermat li l-valutazzjoni tal-impatt tal-miżuri kienet difettuża peress li, anki b’dazji aktar baxxi, il-miżuri anti-dumping ikollhom konsegwenzi finanzjarji serji għall-operazzjonijiet tagħha. F’dan ir-rigward, hija pprovdiet kalkoli li juru l-impatt tal-miżuri fuq il-profittabbiltà tagħha.

(147)

Wara l-analiżi ta’ dawn il-kalkoli, deher li TitanX ma kinitx illimitat il-valutazzjoni tal-impatt tagħha għall-impożizzjoni tal-miżuri. Tabilħaqq, hija kienet qieset ukoll żieda fil-prezz fis-suq tal-Unjoni fil-kalkoli tagħha għall-perjodu ta’ investigazzjoni u għall-perjodu ta’ wara l-perjodu ta’ investigazzjoni. Madankollu, tali żidiet fil-prezzijiet jew ma seħħewx fil-PI jew ma kellhomx jiġu kkunsidrati għall-perjodu kollu wara l-perjodu ta’ investigazzjoni. Fuq din il-bażi, il-Kummissjoni qieset li TitanX kienet issopravalutat l-impatt tal-miżuri. Fi kwalunkwe każ, l-impatt tal-miżuri u taż-żieda fil-prezz ma tqiesx sinifikanti.

(148)

F’dak li għandu x’jaqsam mal-impatt tal-miżuri, jenħtieġ li jitqies li l-eżistenza ta’ miżuri anti-dumping għandha l-għan li terġa’ tistabbilixxi kundizzjonijiet ekwi li jippermettu kummerċ ġust. Barra minn hekk, kif imsemmi fil-premessa (447) tar-Regolament provviżorju, il-Kummissjoni kkonkludiet li l-impożizzjoni ta’ miżuri ma tmurx kontra l-interess tal-utenti attivi fis-settur tal-HEX tal-karozzi. Barra minn hekk, ta’ min jinnota li l-livell tal-miżuri anti-dumping ġie rrivedut ’l isfel fl-iżvelar definittiv.

(149)

Wara l-iżvelar definittiv, Valeo affermat li l-Kummissjoni ma żvelatx il-fatti li fuqhom hija bbażat il-motivazzjoni tagħha sabiex tiddikjara li l-kalkoli ta’ Valeo kien fihom ċerti nuqqasijiet u kienu qed jissopravalutaw l-impatt tal-miżuri. F’dan ir-rigward, hija pprovdiet analiżi riveduta tal-profittabbiltà u ddikjarat li l-impatt fuq il-profittabbiltà kellu jiġi vvalutat għal kull sit ta’ Valeo li jimmanifattura l-AHEX u li kien irrilevanti li wieħed iħares lejn il-profittabbiltà tal-grupp Valeo.

(150)

Il-Kummissjoni kkonfermat li l-kalkoli ta’ Valeo kienu qed jissopravalutaw l-impatt tal-miżuri. Pereżempju, ma kkunsidrawx il-fatt li, kif spjegat fil-premessa (145), Valeo tista’ tirrikorri sabiex timporta AFRPs skont ir-reġim ta’ proċessar attiv sabiex tnaqqas l-impatt tal-miżuri anti-dumping. Għalhekk, il-Kummissjoni kkonfermat il-valutazzjoni tagħha kif imsemmi fil-premessa (145), jiġifieri li l-miżuri jkollhom biss impatt limitat fuq is-sitwazzjoni finanzjarja tal-utenti.

(151)

Il-CLEPA u Mahzle affermaw, għall-kuntrarju tal-analiżi tal-Kummissjoni dwar il-kapaċità disponibbli fir-Regolament provviżorju, li l-livell tal-prezzijiet kien żdied b’allegat 30 %. Mahle affermat ukoll li hemm domanda għolja għall-istokk tal-fojl u nuqqas ta’ kapaċità tal-produzzjoni. Fid-dawl tal-allegat nuqqas ta’ kapaċità tal-produzzjoni disponibbli u tal-impożizzjoni ta’ dazji anti-dumping, Mahle esprimiet it-tħassib tagħha dwar żieda strutturali fil-prezzijiet. Diversi partijiet affermaw ukoll li d-dazji jkollhom impatt detrimentali fuq il-katina tal-provvista. Il-CLEPA affermat li l-użu tal-vetturi elettriċi u l-irkupru ekonomiku jaċċennaw in-nuqqasijiet fil-kapaċità u jipperikolaw l-irkupru u l-iżvilupp ta’ industrija tal-manifattura tal-karozzi tal-UE b’saħħitha wara li d-dħul u l-marġnijiet naqsu fl-aħħar snin. Hija argumentat ukoll li l-manifatturi tal-AHEX jirriskjaw li ma jkunux jistgħu jissodisfaw l-obbligi kuntrattwali tagħhom mal-klijenti tagħhom jew li jaraw il-marġnijiet tagħhom jixxejnu mill-kostijiet akbar. Valeo żiedet li l-isforzi ta’ elettrifikazzjoni mill-industrija tal-karozzi tal-UE ma jistgħux isiru mingħajr ma din tikkomplementa x-xirjiet tagħha mill-industrija tal-Unjoni b’importazzjonijiet mir-RPĊ. Għal Mahle, l-impożizzjoni ta’ dazji anti-dumping tkun toħloq żvantaġġ kompetittiv għall-fornituri tal-karozzi tal-UE. Il-kumpanija tenniet li ma tistax tittrasferixxi ż-żieda mistennija fil-prezzijiet lill-klijenti tagħha. BMW indikat li l-impożizzjoni tal-miżuri tkun twassal għal tfixkil fil-katina tal-provvista tagħha fid-dawl tal-proċeduri twal u għaljin ta’ validazzjoni tal-materjali li għandhom isiru sabiex teqleb għal fornituri alternattivi. Eventwalment, l-ACEA affermat li l-industrija tal-karozzi diġà kienet soġġetta għal diversi miżuri oħrajn li jwasslu għal piżijiet finanzjarji addizzjonali għall-OEMs bħall-miżuri ta’ salvagwardja tal-azzar, li jagħmlu ħsara lill-kompetittività tagħhom fis-swieq domestiċi u tal-esportazzjoni.

(152)

EA indikat li ż-żieda riċenti fil-prezz kienet dovuta għal diversi fatturi bħaż-żieda fil-prezzijiet tal-materja prima għal-ligi u għaċ-ċangaturi, nuqqas fil-kontejners fit-tbaħħir internazzjonali, żieda fil-kostijiet tan-nol u ż-żieda qawwija u f’daqqa wara l-COVID fid-domanda fis-setturi industrijali kollha. Barra minn hekk, EA qieset li filwaqt li l-prezzijiet x’aktarx kienu influwenzati mill-impożizzjoni ta’ miżuri provviżorji, iż-żieda fil-prezzijiet mhux bilfors tkun marbuta ma’ nuqqas ta’ kapaċità u jenħtieġ li ma titqiesx bħala kwistjoni strutturali, iżda pjuttost sitwazzjoni temporanja li hija mistennija tgħaddi malli s-sitwazzjoni tad-domanda u tal-provvista tinnormalizza wara l-perjodu inizjali ta’ tensjoni fis-suq. F’dan il-kuntest, EA kienet indikat ukoll li l-livell tal-miżuri anti-dumping kien maħsub sabiex jillivella l-kundizzjonijiet ekwi u jerġa’ jirrestawra l-kundizzjonijiet normali tal-kompetizzjoni. Barra minn hekk, EA affermat li l-kapaċità ma tkunx problema f’dak li għandu x’jaqsam mal-appoġġ għall-iżvilupp tal-elettrifikazzjoni tal-karozzi sa fejn huma kkonċernati l-AHEX AFRPs peress li ċerta kapaċità addizzjonali diġà kienet ġiet installata jew kienet qed tiġi installata progressivament sabiex l-industrija tal-Unjoni tkun tista’ tissodisfa d-domanda dejjem akbar.

(153)

Il-Kummissjoni kkonkludiet li l-miżuri definittivi jkollhom biss impatt limitat fuq is-sitwazzjoni finanzjarja tal-utenti. Barra minn hekk, kif imsemmi fil-premessi (131) sa (133), is-sostituzzjoni tal-importazzjonijiet miċ-Ċina bi provvista mill-industrija tal-Unjoni tista’ sseħħ relattivament malajr peress li ċerti produtturi tal-Unjoni vvalidati kienu jfornu l-AHEX AFRPs fil-passat u peress li jeżisti issorsjar doppju fl-UE. Barra minn hekk, kif analizzat fil-premessi (87) sa (127), huwa probabbli li l-kapaċità kurrenti u futura tal-industrija tal-Unjoni tkun biżżejjed sabiex tissodisfa domanda dejjem akbar. Fuq din il-bażi, il-Kummissjoni qieset li ma kien hemm l-ebda raġuni konvinċenti sabiex l-AHEX AFRPs jiġu esklużi għal raġunijiet ta’ interess tal-Unjoni.

(154)

EA sostniet li ċerti utenti kienu qed jużaw AFRPs bi prezz baxx miċ-Ċina sabiex jikkompetu kontra produtturi oħrajn li jużaw materjal Ewropew li jwassal għal erożjoni tal-prezzijiet fis-suq tal-Unjoni. F’dan il-kuntest, EA naqset milli tifhem kif utent jista’ jsostni li hemm nuqqas ta’ kapaċità, meta skont l-istħarriġ riċenti ta’ EA, huma tassew ftit il-produtturi tal-Unjoni li rċevew talba għal kwotazzjoni għal volumi addizzjonali fl-2021 minbarra l-volumi ggarantiti fil-kuntratti eżistenti. Hija żiedet ukoll li l-allegat nuqqas futur ta’ kapaċità fid-dawl taż-żieda fid-domanda ma tqisx l-espansjonijiet tal-kapaċità addizzjonali eżegwiti jew imħabbrin minn 2 produtturi oħrajn tal-Unjoni.

(155)

F’dan ir-rigward, Valeo affermat li l-affermazzjoni ta’ EA li l-utenti tal-AHEX AFRPs, inkluża Valeo, kienu qed jikkontribwixxu għall-erożjoni tal-prezzijiet mill-fornituri Ċiniżi ma kinitx korretta. B’appoġġ għall-affermazzjoni tagħha, Valeo pprovdiet estratt tal-evoluzzjoni storika tal-prezzijiet u tal-volum tal-AHEX AFRPs ipprovduti mill-produtturi tal-Unjoni lil Valeo għall-perjodu 2017-2022. Barra minn hekk, Valeo tenniet li kienet teħtieġ ftehimiet fit-tul sabiex tiżgura provvista bla xkiel mal-OEMs tal-karozzi u li l-produtturi tal-Unjoni deliberatament ma kinux lesti li jfornu jew li ma kellhomx il-kapaċità meħtieġa. Valeo indikat ukoll id-dewmien riċenti fil-provvista ma’ produttur wieħed tal-Unjoni.

(156)

EA affermat ukoll li kwalunkwe nuqqas ta’ kapaċità jkun marbut ma’ prattiki ta’ dumping li ma jħallux lill-produtturi tal-Unjoni jallokaw il-kapaċità għall-produzzjoni tal-AHEX AFRPs. F’dak li għandu x’jaqsam mad-dewmien riċenti fil-provvista, issir referenza għall-premessa (56) li fiha EA pprovdiet spjegazzjonijiet għal dan id-dewmien.

(157)

Fir-rigward tal-erożjoni tal-prezzijiet, l-evidenza pprovduta minn Valeo b’appoġġ għat-tweġiba tagħha nstabet li kienet frammentarja u, għalhekk, inkonklużiva. Fil-fatt, l-analiżi ta’ Valeo hija bbażata fuq numru limitat ta’ fornituri tal-Unjoni, u l-konklużjonijiet huma bbażati fuq perjodu li jmur lil hinn mill-perjodu kkunsidrat li jintemm f’Ġunju 2020 u, għalhekk, huma potenzjalment affettwati minn din l-investigazzjoni (bidu, impożizzjoni ta’ miżuri provviżorji). Barra minn hekk, ma tqisx l-evoluzzjoni tad-domanda. Għall-kuntrarju, it-tweġiba għall-kwestjonarju ta’ Valeo turi li s-sehem relattiv tax-xirjiet mir-RPĊ żdied bejn l-2019 u l-perjodu ta’ investigazzjoni. Barra minn hekk, kif imsemmi fit-Taqsima 7.1, ġew stabbiliti marġnijiet sinifikanti ta’ bejgħ taħt il-prezz li jikkonfermaw l-eżistenza ta’ erożjoni tal-prezzijiet. Fuq din il-bażi, l-affermazzjoni ta’ Valeo ġiet miċħuda.

(158)

Fir-rigward tal-miri tal-emissjonijiet ta’ gassijiet serra, il-CLEPA affermat li l-miżuri jkunu jillimitaw l-investimenti fl-innovazzjoni li jfittxu li jilħqu għanijiet diġitali u ekoloġiċi stabbiliti mill-Unjoni Ewropea u b’mod partikolari l-iżvilupp ta’ katina Ewropea tal-provvista ta’ batteriji tal-karozzi.

(159)

Kif imsemmi fil-premessa (145), il-miżuri huma mistennijin ikollhom biss impatt limitat fuq l-utenti minħabba s-sehem tal-AHEX AFRPs akkwistati mir-RPĊ u l-livell tal-miżuri. Fuq din il-bażi, jenħtieġ li jkollhom impatt limitat fuq l-investimenti deskritti.

(160)

Fl-istess kuntest, EA indikat li x-xiri ta’ AFRPs tal-UE jkun ta’ għajnuna għall-industriji tal-karozzi u awtomotivi f’termini ta’ tnaqqis tal-impronta tal-karbonju tagħhom u rreferiet għall-premessi (78), (451) u (452) tar-Regolament provviżorju fejn ġie konkluż b’mod provviżorju li l-industrija tal-Unjoni kienet qed tikkontribwixxi sabiex jintlaħqu l-miri tal-emissjonijiet tal-UE permezz tal-użu dejjem akbar tagħha ta’ materjal riċiklat u billi bħala medja tiġġenera kważi tliet darbiet anqas CO2 milli fir-RPĊ meta tipproduċi l-AFRPs.

(161)

EA xeħtet ukoll dubju dwar ir-raġunament ta’ ċerti utenti tal-AHEX AFRPs li jakkwistaw mir-RPĊ minħabba li dan kien imur kontra l-ambizzjoni tal-UE li tikseb il-Patt Ekoloġiku Ewropew fid-dawl tal-impronta tal-karbonju aktar baxxa tal-produzzjoni primarja tal-aluminju fl-UE. Hija rreferiet ukoll għall-esperjenza tal-passat fis-settur tal-pannelli solari, li bata minn importazzjonijiet li kienu l-oġġett ta’ dumping wara li ffavoriet “strateġija ta’ provvista miċ-Ċina” fuq terminu qasir minflok ma żammet katina tal-valur b’saħħitha fl-UE.

(162)

F’dan ir-rigward, Valeo sostniet li kienet qed tixtri biss kwantitajiet limitati ta’ materjal li joriġina mir-RPĊ u li ma kinitx qed tixtri AHEX AFRPs irħas u niġġiesa mir-RPĊ. Valeo argumentat ukoll li, bl-istrateġija tagħha, kienet qed tappoġġa l-elettrifikazzjoni rivoluzzjonarja tal-mobilità u tgħin ukoll fl-ilħuq tal-objettivi ambjentali tal-UE.

(163)

Madankollu, Valeo ma pprovdiet l-ebda evidenza dwar l-impronta tal-karbonju tal-fornituri tagħha jew biċċa evidenza oħra li tikkontradixxi l-valutazzjoni tal-Kummissjoni f’dan ir-rigward. Barra minn hekk, filwaqt li jista’ jkun li Valeo qed tixtri kwantitajiet limitati ta’ AHEX AFRPs mill-pajjiż ikkonċernat, is-sehem tax-xirjiet tagħha mir-RPĊ kien qed jiżdied f’dawn l-aħħar snin.

(164)

Wara l-iżvelar definittiv, TitanX affermat li l-miri l-ġodda tal-emissjonijiet tal-Kummissjoni u r-rwol li għandha taqdi l-industrija tal-karozzi tal-UE kienu jiġġustifikaw l-esklużjoni tal-AHEX AFRPs għal raġunijiet ta’ interess tal-Unjoni.

(165)

F’dan ir-rigward, issir referenza għall-premessi (160) u (161) li jikkonfermaw li x-xiri tal-AFRPs fl-UE jkun ta’ għajnuna għall-industriji tal-karozzi u awtomotivi f’termini ta’ tnaqqis tal-impronta tal-karbonju tagħhom.

(166)

Fid-dawl ta’ din l-analiżi dettaljata, il-Kummissjoni kkonfermat is-sejbiet provviżorji tagħha kif stabbiliti fit-taqsima 2.3.1 tar-Regolament provviżorju u ma eskludietx l-AHEX AFRPs mill-kamp ta’ applikazzjoni ta’ din l-investigazzjoni.

(167)

Kif stabbilit fit-Taqsima 2.3.2 tar-Regolament provviżorju, il-Kummissjoni kienet eskludiet il-kojls tal-aluminju għall-produzzjoni ta’ kojls miksija u ta’ ACP mill-ambitu tal-prodott. EA affermat li d-definizzjoni tal-prodott eżentat b’mod provviżorju ma kinitx speċifika biżżejjed. Fil-fehma tagħha, il-Kumpanija utent A ma kinitx ipprovdiet informazzjoni teknika dettaljata li tippermetti lil partijiet oħra jipprovdu kummenti sinifikattivi, u b’hekk illimitat id-drittijiet tad-difiża tagħhom.

(168)

Il-Kumpanija A wieġbet li d-definizzjoni pprovduta kienet speċifika biżżejjed u pprovdiet evidenza li ċerti produtturi tal-Unjoni ma setgħux jipproduċu prodotti b’dawk l-ispeċifikazzjonijiet. Fuq din il-bażi, hija kkonkludiet li l-karatteristiċi tekniċi jirriżultaw fi prodott speċifiku ħafna. Il-Kummissjoni qieset li s-sottomissjonijiet kemm ta’ EA kif ukoll tal-Kumpanija A kienu sinifikattivi, kienu jippermettu għal fehim raġonevoli tal-informazzjoni sensittiva u li d-drittijiet tad-difiża taż-żewġ partijiet kienu rrispettati.

(169)

EA affermat ukoll li l-Kumpanija A ma kinitx ippreżentat it-talba tagħha fil-ħin. Il-Kummissjoni osservat li l-Kumpanija A kienet għamlet it-talba fi stadju bikri ħafna tal-proċedimenti. Ġiet ukoll issostanzjata kif xieraq u ppreżentata fil-ħin biżżejjed sabiex il-Kummissjoni setgħet tiġbor l-informazzjoni rilevanti kollha bl-għan li tasal għal konklużjonijiet sinifikattivi.

(170)

EA kkontestat ukoll is-sejba provviżorja li l-industrija tal-Unjoni ma jkollhiex il-kapaċità li tipproduċi l-volumi meħtieġa tal-prodott eżentat bl-istandards tekniċi u tal-kwalità mitlubin. Hija pprovdiet dikjarazzjonijiet minn ħames produtturi tal-Unjoni li affermaw li għandhom it-tagħmir rilevanti sabiex jimmanifatturaw il-prodott eżentat b’mod provviżorju b’mhux aktar minn restrizzjoni waħda fuq il-wisa’, u żiedet li produtturi oħrajn jistgħu jipproduċu l-prodott eżentat b’mod provviżorju fl-UE. Barra minn hekk, EA pprovdiet dikjarazzjonijiet minn erba’ produtturi tal-ACP li jistgħu jakkwistaw il-materjal eżentat fi kwantitajiet suffiċjenti u, għalhekk, ma jaffaċċjawx l-istess problemi bħall-Kumpanija A.

(171)

Il-Kumpanija A aċċettat li ċerti produtturi fl-UE jistgħu jimmanifatturaw il-prodott eżentat. Madankollu, hija enfasizzat li ma tistax takkwistah fi kwantitajiet suffiċjenti fl-UE. Kien hemm bżonn li jiġu akkwistati ċerti volumi tal-prodott eżentat mir-RPĊ minħabba n-nuqqas ta’ provvista u ż-żminijiet itwal konsegwenti ta’ tlestija tal-proċess fl-UE u f’pajjiżi oħrajn. Hija ssostanzjat l-affermazzjonijiet tagħha b’evidenza ta’ sostenn addizzjonali u rreferiet għall-evidenza diġà pprovduta li turi l-inkapaċità ta’ ċerti produtturi li jimmanifatturaw il-prodott eżentat minħabba restrizzjonijiet tekniċi jew l-inkapaċità li jakkwistaw il-prodott eżentat fi kwantitajiet suffiċjenti.

(172)

Barra minn hekk, il-Kumpanija A argumentat ukoll li wħud mid-dikjarazzjonijiet magħmulin mill-produtturi tal-Unjoni ma kinux preċiżi peress li ma jistgħux jipprovdu l-prodott eżentat b’mod provviżorju jew li huma speċjalizzati fi prodotti oħrajn. Fil-fehma tagħha, dawn id-dikjarazzjonijiet jikkonfermaw li l-produtturi Ewropej ma għandhom l-ebda pjan li jinvestu f’kapaċità addizzjonali.

(173)

EA kkontradixxiet lill-Kumpanija A, billi ddikjarat li hemm biżżejjed kapaċità fis-suq tal-Unjoni. Hija affermat ukoll li l-konsenji mdewmin huma relatati ma’ ordnijiet li jmorru lil hinn mill-ftehimiet konklużi. F’dak li għandu x’jaqsam mad-dewmien, il-Kummissjoni nnotat li l-evidenza fil-fajl ikkonfermat li ċertu/i produttur(i) tal-Unjoni li ma setax/setgħux jissodisfa(w) ir-rekwiżiti tekniċi tal-Kumpanija A kellu/kellhom jirrimborża(w)ha għal vjeġġi mhux konformi u, għalhekk, ma jistax/jistgħux iforni/u lill-Kumpanija A. Għalhekk, il-Kumpanija A ma kellha l-ebda għażla ħlief li titlob kwantitajiet addizzjonali mingħand fornituri oħrajn.

(174)

Il-Kumpanija A wieġbet li erbgħa mill-ħames produtturi tal-ACP għandhom sors garantit ta’ provvista minħabba raġunijiet storiċi, ġeografiċi, kuntrattwali jew ta’ parteċipazzjoni azzjonarja / sjieda u li għandhom interess vestit li jillimitaw il-kompetizzjoni minn produttur ieħor tal-ACP fl-UE. Il-Kumpanija A argumentat ukoll li d-disa’ kumpaniji li pprovdew dikjarazzjonijiet huma membri ta’ EA, u xi wħud minnhom huma rrappreżentati fil-kumitat eżekuttiv ta’ EA, li ftit li xejn iħalli dubju dwar il-pożizzjoni tagħhom dwar it-talba għall-esklużjoni.

(175)

Il-Kumpanija A affermat ukoll li jenħtieġ li d-dikjarazzjonijiet ipprovduti mill-produtturi tal-ACP jiġu miċħuda minħabba li ma humiex partijiet interessati rreġistrati, li ma kkooperawx mal-investigazzjoni u ma ssostanzjawx id-dikjarazzjonijiet tagħhom b’evidenza ta’ sostenn.

(176)

Il-Kummissjoni kkonfermat li d-dikjarazzjonijiet ta’ ċerti produtturi tal-AFRP ma kinux appoġġati minn evidenza suffiċjenti. Hija sabet ukoll li ma kinux jirriflettu bis-sħiħ il-kapaċità teknika tagħhom. Filwaqt li xi produtturi tal-AFRP tabilħaqq jistgħu jimmanifatturaw il-prodott eżentat, oħrajn ma setgħux jissostanzjaw id-dikjarazzjonijiet tagħhom b’elementi addizzjonali fil-fajl. Għall-kuntrarju, dawn il-produtturi ma jistgħux jissodisfaw ir-rekwiżiti tal-ispeċifikazzjoni tal-Kumpanija A u pprovdew AFRPs li għandhom karatteristiċi differenti mill-prodott eżentat.

(177)

EA affermat li l-prodott eżentat ikopri prattikament il-firxa sħiħa għall-istokk taż-żebgħa u li l-volum kopert mill-prodott eżentat skont l-Artikolu 2.2 tar-Regolament provviżorju jkun jirrappreżenta ferm aktar mit-2 % imsemmi fir-Regolament provviżorju u, fil-fatt, [300 000 - 600 000] (37) tunnellata. Wara l-iżvelar provviżorju, EA ppreżentat stima għall-konsum tal-kojl tal-aluminju għall-użu fil-produzzjoni ta’ kojls miksijin meta sussegwentement jintużaw fil-produzzjoni tal-ACPs. Stima bħal din tammonta għal [52 000 - 68 000] (38) tunnellata; jiġifieri qrib l-istima tal-Kummissjoni fil-premessa (87) tar-Regolament provviżorju. Il-Kumpanija A kkummentat li l-istima tal-konsum tal-Kummissjoni ma tikkorrispondix għall-prodott eżentat użat għall-produzzjoni tal-ACPs peress li l-karatteristiċi tekniċi speċifiċi ta’ dak il-prodott huma stretti ħafna u xi produtturi tal-ACPs jużaw l-AFRPs miksijin. Fl-istess ħin, il-Kumpanija A ddikjarat li l-konsum tagħha għall-produzzjoni tal-ACPs kien aktar baxx mill-aħħar stima pprovduta minn EA. Billi l-konsum fl-Unjoni ma huwiex limitat biss għax-xiri li sar mill-Kumpanija A, il-Kummissjoni qieset li l-istima pprovduta fil-premessa (87) tar-Regolament provviżorju tirrifletti b’mod raġonevoli l-konsum tal-AFRPs għall-produzzjoni tal-ACPs b’mod ġenerali.

(178)

Minbarra l-affermazzjoni tal-Kumpanija A relatata ma’ nuqqas ġenerali ta’ kapaċità, EA argumentat li ma hemm l-ebda nuqqas ta’ kapaċità strutturali fl-UE kif muri mir-rata ta’ użu tal-kapaċità rrapportata fir-Regolament provviżorju u li d-diffikultajiet kurrenti tal-provvista huma marbutin mal-pandemija tal-Covid-19.

(179)

Il-Kumpanija A kkummentat ukoll li, fid-dawl tan-nuqqas ta’ provvista fis-suq tal-Unjoni, l-eżistenza ta’ dazji anti-dumping tkun ta’ detriment għall-attività tagħha u tikkomprometti l-vijabbiltà tagħha.

(180)

Il-Kummissjoni vverifikat li l-Kumpanija A kienet qed taffaċċja diffikultajiet sinifikanti fil-provvista mal-prodott li kien eżentat b’mod provviżorju. Kif issostanzjat mill-Kumpanija A, hemm limitazzjonijiet tekniċi u tal-kwalità f’dak li tista’ timmanifattura l-industrija tal-Unjoni. Barra minn hekk, ċerti produtturi integrati tal-Unjoni (li jipproduċu kemm l-AFRP, il-kojls miksija kif ukoll l-ACP) iridu jillimitaw il-provvista tagħhom lill-Kumpanija A għal raġunijiet ta’ kompetizzjoni u/jew ta’ integrazzjoni vertikali. Dawn iż-żewġ fatturi ewlenin jillimitaw id-disponibbiltà tal-prodotti eżentati fis-suq tal-Unjoni. Barra minn hekk, l-informazzjoni fil-fajl tindika l-fatt li sorsi mhux tal-UE ma joffrux alternattiva suffiċjenti f’termini ta’ volum jew ta’ kwalità. Għalhekk, il-Kummissjoni kkonkludiet li l-Kumpanija A ma tistax takkwista l-prodott eżentat b’mod provviżorju fi kwantitajiet suffiċjenti fis-suq tal-Unjoni jew minn sorsi oħrajn.

(181)

L-Artikolu 2(2) tar-Regolament provviżorju ppreveda li jenħtieġ li l-prodott deskritt fl-Artikolu 1(1) jiġi eżentat mid-dazju anti-dumping provviżorju jekk jiġi importat għall-użu fil-produzzjoni ta’ kojls miksija u ta’ pannelli komposti tal-aluminju. F’dan ir-rigward, il-Kumpanija A jew kwalunkwe utent ieħor fis-suq ma pprovdiex biżżejjed evidenza li kienet direttament ikkonċernata mill-importazzjonijiet tal-ARFPs għall-produzzjoni ta’ kojls miksijin matul il-PI. Barra minn hekk, l-investigazzjoni żvelat li l-konsum tal-AFRPs fis-settur tal-kojls miksijin kien ħafna aktar sinifikanti minn dak fis-settur tal-ACP. Għalhekk, jeżisti r-riskju li l-karatteristiċi tekniċi tal-prodott eżentat b’mod provviżorju jsiru n-norma f’dan is-settur u jiġu importati fi kwantitajiet akbar, u b’hekk potenzjalment jagħmlu ħsara lill-industrija tal-Unjoni. Barra minn hekk, filwaqt li l-Kumpanija A għandha diffikultajiet sabiex tixtri l-ARFPs għall-produzzjoni ta’ kojls miksijin fi kwantitajiet suffiċjenti, xorta tista’ tikseb parti sinifikanti mill-ħtiġijiet tagħha fl-UE.

(182)

Barra minn hekk, l-investigazzjoni żvelat li l-karatteristiċi tekniċi tal-prodott eżentat b’mod provviżorju jvarjaw skont l-użu; jiġifieri, il-produzzjoni ta’ kojls miksijin jew il-produzzjoni ta’ pannelli komposti tal-aluminju.

(183)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, EA tenniet l-affermazzjoni tagħha dwar id-disponibbiltà tal-prodott ikkonċernat fl-Unjoni u rreferiet għad-data makroekonomika sottomessa wara t-talba tal-Kummissjoni li allegatament uriet li hemm kapaċità suffiċjenti fis-suq tal-Unjoni. Barra minn hekk, hija sostniet li l-AFRPs għall-użu fl-ACPs u l-AFRPs għall-użu f’kojls miksijin għandhom l-istess deskrizzjoni tal-prodott u li d-deskrizzjoni provviżorja tal-prodott ħolqot trikkib u konfużjoni bejn iż-żewġ prodotti. Hija tenniet ukoll l-affermazzjoni tagħha relatata mad-daqs tas-suq tal-kojls miksijin li diġà saret referenza għalih fil-premessa (177) u indikat li l-Kumpanija A kienet qed tixtri l-prodott inkwistjoni għal ħafna snin fl-Unjoni u rreferiet għad-dikjarazzjonijiet minn produtturi oħrajn tal-ACP li diġà saret referenza għalihom fil-premessa (170) u indirizzati fil-premessi (175) u (176). Barra minn hekk, EA rreferiet għal sorsi oħrajn ta’ provvista mingħajr ma speċifikat liema.

(184)

F’dan ir-rigward, l-ewwel jenħtieġ li jiġi nnotat li d-data makroekonomika pprovduta minn EA nstabet li ma kinitx akkurata u ġiet aġġustata mill-Kummissjoni meta stabbiliet indikaturi tad-dannu definittivi f’konformità mal-informazzjoni fil-fajl dwar il-kapaċità teknika tagħha.

(185)

L-affermazzjoni ta’ EA li tirreferi għad-differenza bejn l-AFRPs għall-użu fl-ACPs u l-AFRPs ma qisitx l-aħħar deskrizzjoni tal-prodott kif previst fl-Artikolu 2(2). Barra minn hekk, meta jitqies li t-talba għall-esklużjoni tal-Kumpanija A hija bbażata fuq proċedura doganali ta’ użu aħħari skont l-Artikolu 254 tar-Regolament (UE) Nru 952/2013 tal-Parlament Ewropew u tal-Kunsill (39) (“il-Kodiċi Doganali tal-Unjoni”), il-fatt li dawn il-prodotti jkollhom l-istess deskrizzjoni tqies irrilevanti. Fuq din il-bażi, din l-affermazzjoni ġiet miċħuda.

(186)

Il-fatt li l-Kumpanija A ilha ħafna snin tixtri l-prodott inkwistjoni fl-Unjoni ma nstabx li jikkontradixxi l-valutazzjoni tal-Kummissjoni li l-prodott inkwistjoni ma kienx disponibbli fi kwantitajiet suffiċjenti fis-suq tal-Unjoni. Fin-nuqqas ta’ informazzjoni aktar preċiża dwar sorsi oħrajn ta’ provvista, din l-affermazzjoni ġiet miċħuda wkoll.

(187)

Wara l-iżvelar definittiv, il-Kumpanija A affermat li l-problema tad-disponibbiltà kienet tapplika kemm għall-AFRPs użati fil-produzzjoni ta’ kojls miksijin kif ukoll għall-produzzjoni tal-ACPs u tenniet it-talba tagħha li l-AFRPs użati fil-produzzjoni ta’ kojls miksijin jenħtieġ li jiġu eżentati mill-ġbir tad-dazji anti-dumping. Barra minn hekk, hija tenniet li ċerti fornituri tal-Unjoni ma setgħux iwasslu l-kwantitajiet miftiehma jew kienu qed jiffaċċjaw problemi ta’ kwalità fir-rigward tal-AFRPs eżentati.

(188)

Filwaqt li l-Kummissjoni ammettiet li l-problema tad-disponibbiltà kienet tapplika għaż-żewġ applikazzjonijiet, il-Kummissjoni diġà ċċarat fil-premessa (181) għaliex jenħtieġ li l-eżenzjoni ma tapplikax għall-AFRPs użati fil-produzzjoni ta’ kojls miksijin. Fin-nuqqas ta’ aktar kummenti f’dan ir-rigward, din l-affermazzjoni ġiet miċħuda.

(189)

Wara l-iżvelar definittiv, EA xeħtet dubju dwar id-deċiżjoni tal-Kummissjoni li tnaqqas il-kapaċità tal-produzzjoni rrapportata minn ċerti produtturi tal-Unjoni fir-rigward tal-prodott eżentat u affermat li ċerti limitazzjonijiet li jikkonċernaw il-wisa’ tal-medda esterna ma jappoġġawx tnaqqis bħal dan tal-kapaċità tal-produzzjoni. Barra minn hekk, EA sostniet li anke l-kapaċità tal-produzzjoni mnaqqsa kkoreġuta mill-Kummissjoni tkun biżżejjed sabiex tforni lis-suq tal-Unjoni bil-kwantitajiet neċessarji. EA affermat ukoll li n-nuqqas ta’ sorsi alternattivi mhux tal-UE ma kienx appoġġat minn evidenza fil-fajl disponibbli għal partijiet oħrajn u kellu jiġi injorat f’konformità mal-Artikolu 19(3) tar-Regolament bażiku. Fl-aħħar nett, EA tenniet l-affermazzjoni tagħha li l-produtturi l-oħra kollha tal-ACP fl-Unjoni ddikjaraw li kapaċi jiksbu l-kwantitajiet neċessarji fl-Unjoni.

(190)

Wara l-kummenti ta’ EA, il-Kumpanija A kkonfermat l-akkuratezza tal-valutazzjoni tal-Kummissjoni tal-kapaċità tal-industrija tal-Unjoni għall-AFRPs użati fil-produzzjoni tal-ACPs irrispettivament mil-limitazzjonijiet fuq il-wisa’ tal-medda esterna u reġgħet irreferiet għall-problemi tal-kwalità. Kif spjegat fl-iżvelar speċifiku mibgħut lil EA, l-informazzjoni relatata mal-prodott eżentat ippreżentat minn EA ġiet ikkoreġuta fuq il-bażi ta’ sottomissjonijiet minn partijiet oħrajn li jixhdu li dawn il-produtturi ma setgħux jissodisfaw l-ispeċifikazzjonijiet meħtieġa jew ma kinux jipproduċu l-prodott inkwistjoni. Barra minn hekk, kif spjegat fil-premessi (174) sa (180), filwaqt li ma huwiex miċħud li ċerti produtturi tal-AFRP tabilħaqq jistgħu jimmanifatturaw il-prodott eżentat, ċerti produtturi integrati tal-Unjoni (li jipproduċu l-AFRPs, il-kojls miksijin u l-ACP kollha) iridu jillimitaw il-provvista tagħhom lill-Kumpanija A għal raġunijiet ta’ kompetizzjoni u/jew ta’ integrazzjoni vertikali, u b’hekk iwasslu għal disponibbiltà insuffiċjenti fis-suq tal-Unjoni. F’dak li għandu x’jaqsam ma’ sorsi mhux tal-UE, jenħtieġ li jiġi nnotat li l-informazzjoni fil-fajl ma setgħetx tinġabar fil-qosor f’verżjoni mhux kunfidenzjali mingħajr ma jiġu żvelati sigrieti kummerċjali li setgħu jkunu ta’ detriment għall-partijiet ikkonċernati. Fi kwalunkwe każ, EA ma pprovdietx evidenza li tindika l-eżistenza tal-kapaċità disponibbli f’pajjiżi mhux tal-UE. Eventwalment, il-fatt li produtturi oħrajn tal-ACP allegatament setgħu jakkwistaw l-AFRPs tagħhom fl-Unjoni ma nstabx li jikkontradixxi s-sejbiet tal-Kummissjoni li jindikaw disponibbiltà insuffiċjenti tal-prodott inkwistjoni u r-rekwiżiti tal-kwalità tiegħu. Fuq din il-bażi, l-affermazzjonijiet ta’ EA ġew miċħudin.

(191)

Fuq din il-bażi, il-Kummissjoni kkonfermat is-sejbiet provviżorji tagħha li kien fl-interess tal-Unjoni li l-prodott inkwistjoni jiġi eżentat mill-ġbir tad-dazji anti-dumping, iżda li tiġi limitata l-eżenzjoni għall-AFRPs biss użati fil-produzzjoni tal-pannelli komposti tal-aluminju.

(192)

Wara l-iżvelar provviżorju, Xiamen Xiashun Aluminium Foil Co., Ltd. (“Xiamen Xiashun”) ikkontestat iċ-ċaħda tat-talba tagħha indirizzata fil-premessi (89)-(92) tar-Regolament provviżorju li jenħtieġ li l-folji litografiċi u l-folji tal-batteriji jiġu esklużi mill-kamp ta’ applikazzjoni tal-investigazzjoni. Hija affermat li dawn il-prodotti ma jvarjawx mill-prodotti elenkati fil-premessa (57) tar-Regolament provviżorju u li kienu esklużi mill-kamp ta’ applikazzjoni tal-investigazzjoni diġà fin-Notifika ta’ Bidu. Il-prodotti diġà esklużi għandhom ukoll l-istess karatteristiċi kimiċi, peress li huma magħmulin minn aktar minn 95 % ta’ aluminju pur, b’mod simili għal AFPRs oħrajn.

(193)

Xiamen Xiashun tenniet ukoll l-affermazzjonijiet imqajmin fil-premessa (89) tar-Regolament provviżorju fir-rigward tal-karatteristiċi fiżiċi u kimiċi, il-gauge, il-proċess tal-produzzjoni u l-applikazzjoni.

(194)

EA kkonfermat li l-folji litografiċi u l-fojls tal-batteriji jaqgħu taħt id-definizzjoni tal-prodott u għandhom l-istess karatteristiċi kimiċi bażiċi bħal AFRPs oħrajn, peress li huma magħmulin minn aktar minn 95 % ta’ aluminju pur, b’mod simili għal AFPRs oħrajn. Huma r-riżultat tal-istess proċess ta’ manifattura bħal AFRPs oħrajn. EA affermat ukoll li dawn ġew inklużi fl-ilment minħabba li huma prodotti minn numru ta’ produtturi tal-UE li kienu qed jaffaċċjaw prezzijiet dannużi u oġġett ta’ dumping baxxi ħafna miċ-Ċina.

(195)

F’dan ir-rigward, il-Kummissjoni osservat li l-ambitu tal-prodott ta’ din l-investigazzjoni kien iddefinit b’mod korrett mill-ilmentaturi peress li kien ikopri prodotti li għalihom kien hemm biżżejjed evidenza ta’ importazzjonijiet oġġett ta’ dumping li jikkawżaw dannu għall-industrija tal-Unjoni. Fuq din il-bażi u fin-nuqqas ta’ elementi ġodda, din l-affermazzjoni ġiet miċħuda.

(196)

Wara l-iżvelar definittiv, Xiamen Xiashun tenniet l-affermazzjonijiet sottomessi fl-istadju tal-bidu. Fin-nuqqas ta’ elementi ġodda u peress li dawn l-affermazzjonijiet diġà ġew indirizzati fil-premessi (89) sa (92) tar-Regolament provviżorju, u l-affermazzjonijiet ulterjuri ta’ Xiamen Xiashun ġew indirizzati fil-premessa (195), dawn id-dikjarazzjonijiet ġew miċħudin.

(197)

Fin-nuqqas ta’ kwalunkwe kumment ieħor, il-konklużjonijiet l-oħrajn kollha fit-Taqsima 2.3.3. tar-Regolament provviżorju ġew ikkonfermati.

(198)

It-talba inizjali sabiex jiġi eskluż l-ACF-30-60 minn Nanshan ġiet indirizzata fil-premessi (93) sa (102) tar-Regolament provviżorju. Wara l-iżvelar provviżorju, Nanshan tenniet l-affermazzjoni tagħha li l-prodott li qed jiġi investigat u l-ACF-30-60 huma differenti fuq il-bażi ta’ numru ta’ fatturi bħall-karatteristiċi tekniċi u fiżiċi essenzjali, l-użu finali u l-applikazzjoni, il-proċess tal-produzzjoni u l-kanali ta’ distribuzzjoni. Hija tenniet ukoll li dawn il-prodotti ma humiex interkambjabbli u ma humiex f’kompetizzjoni ma’ xulxin. Hija argumentat li, skont il-ġurisprudenza stabbilita (40), l-ebda fattur ma huwa aktar deċiżiv minn ieħor meta jiġi vvalutat jekk prodott ikunx distint mill-prodotti l-oħrajn koperti mill-kamp ta’ applikazzjoni ta’ investigazzjoni. Indikat ukoll li s-suq tal-ACF tal-Unjoni huwa strett ħafna b’disponibbiltà limitata mill-produtturi tal-Unjoni fix-xhur li ġejjin.

(199)

B’reazzjoni għall-kummenti ta’ Nanshan, EA sostniet li l-AFRPs inkwistjoni huma jew jistgħu jiġu prodotti fl-UE u jaqgħu fi ħdan id-deskrizzjoni tal-prodott.

(200)

Fir-rigward tal-kompetizzjoni bejn l-ACF-30-60 u l-prodotti l-oħrajn koperti mill-kamp ta’ applikazzjoni tal-investigazzjoni, jenħtieġ li l-ewwel jitfakkar li l-ACF-30-60 taqa’ taħt id-definizzjoni tal-prodott kif definit fil-premessi minn (55) sa (58) tar-Regolament provviżorju. L-ewwel nett, l-ACF-30-60 u prodotti oħrajn koperti mill-kamp ta’ applikazzjoni tal-investigazzjoni għandhom l-istess karatteristiċi fiżiċi, kimiċi u tekniċi bażiċi, u l-prodott jaqa’ fil-kamp ta’ applikazzjoni tal-investigazzjoni. Barra minn hekk, fil-valutazzjoni provviżorja tagħha, il-Kummissjoni ma llimitatx il-valutazzjoni tagħha għal fattur partikolari biss peress li qagħdet fuq diversi fatturi bħall-karatteristiċi bażiċi, il-funzjoni, il-proċess tal-produzzjoni, u l-użu finali sabiex tivvaluta jekk l-ACF-30-60 kienx kopert mill-kamp ta’ applikazzjoni tal-investigazzjoni. L-affermazzjoni relatata mad-disponibbiltà limitata tal-ACF-30-60 fis-suq tal-Unjoni ma kinitx issostanzjata b’biżżejjed evidenza ta’ sostenn.

(201)

Wara l-iżvelar definittiv, Nanshan tenniet l-affermazzjoni mqajma fl-istadju proviżorju. Indikat ukoll li l-karatteristiċi taż-żewġ naħat tal-prodott inkwistjoni jvarjaw, li jwassal għal proċess tal-produzzjoni differenti b’tagħmir tal-ogħla livell ta’ żvilupp tekniku u jwassal għal użu finali differenti. Barra minn hekk, Nanshan sostniet li l-introduzzjoni ta’ miżuri anti-dumping ikollha impatt detrimentali fuq l-utenti minħabba nuqqas serju ta’ provvista fl-Unjoni. Nanshan appoġġat it-tali affermazzjoni b’dikjarazzjonijiet mill-utenti li rrapportaw diffikultajiet fl-akkwist f’dawn l-aħħar xhur (wara l-PI) u fix-xhur li ġejjin. F’dan ir-rigward, hija indikat ukoll il-fatt li produttur minnhom tal-Unjoni kien waqqaf il-produzzjoni tiegħu tal-prodott inkwistjoni sabiex jiffoka fuq prodotti oħrajn. Fin-nuqqas ta’ sorsi alternattivi ta’ provvista, Nanshan affermat li l-importazzjonijiet Ċiniżi kienu kruċjali għall-utenti mhux integrati.

(202)

F’dan ir-rigward, issir referenza għall-premessi (93) sa (102) tar-Regolament provviżorju u għall-premessa (200) ta’ hawn fuq fejn ġew indirizzati l-affermazzjonijiet inizjali ta’ Nanshan. Barra minn hekk, il-Kummissjoni nnotat li l-ACF-30-60 ma huwiex l-uniku prodott kopert mill-kamp ta’ applikazzjoni ta’ dan il-proċediment li għandu naħat b’karatteristiċi differenti, peress li l-HEX AFRPs ukoll jippreżentaw karatteristika bħal din.

(203)

Anke jekk jitqiesu l-elementi ta’ wara l-PI, il-Kummissjoni qieset li s-sitwazzjoni deskritta minn Nanshan u minn żewġ utenti ma indikat l-ebda nuqqas strutturali ta’ kapaċità, iżda, minflok, sitwazzjoni temporanja dovuta għall-irkupru ekonomiku ġenerali ta’ wara l-COVID fejn id-domanda żdiedet b’mod sinifikanti f’perjodu ta’ żmien qasir sabiex l-industrija tal-Unjoni issa teħtieġ li taġġusta għas-sitwazzjoni l-ġdida tas-suq. F’dan il-kuntest, ma ġiex ikkunsidrat li l-introduzzjoni tal-miżuri anti-dumping ikollha impatt detrimentali fuq l-utenti finali. Fi kwalunkwe każ, l-utenti li pprovdew kummenti ma pprovdewx tweġiba għall-kwestjonarju. Għalhekk, ma setax jiġi vvalutat sa liema punt dawn ikunu affettwati mill-miżuri. Għalhekk, din l-affermazzjoni ġiet miċħuda.

(204)

Għaldaqstant, il-Kummissjoni kkonfermat il-konklużjonijiet tagħha milħuqin fit-Taqsima 2.3.4 tar-Regolament provviżorju.

(205)

It-talba inizjali minn OPL System AB (“OPL”) sabiex jiġu esklużi l-paletti għall-venetian blinds ġiet indirizzata fil-premessi (103) u (104) tar-Regolament provviżorju.

(206)

OPL tenniet li l-industrija tal-Unjoni ma tipproduċix u ma hijiex kapaċi tipproduċi AFRPs skont l-ispeċifikazzjonijiet ta’ OPL. Hija enfasizzat li l-użu ta’ prodott ta’ kwalità inferjuri jkun jagħmel ħsara lit-tagħmir tagħha u l-prodotti lesti ma jkunux jikkorrispondu għar-rekwiżiti tal-klijenti tagħha.

(207)

OPL irreferiet għall-oġġezzjonijiet għall-kwota tariffarja tagħha għall-2016 minn 4 produtturi differenti tal-Unjoni, li allegatament ma jipproduċux u ma humiex kapaċi jipproduċu AFRPs skont l-ispeċifikazzjonijiet ta’ OPL. F’dan ir-rigward, hija affermat li minkejja l-iskambji kummerċjali ma’ xi wħud mill-4 kumpaniji, l-ebda waħda ma pprovdiet kampjuni lil OPL. Madankollu, it-tali affermazzjonijiet ma kinux appoġġati minn evidenza ta’ sostenn għal xi kumpaniji ħlief waħda. Fl-istess ħin, OPL argumentat li l-ebda wieħed mill-produtturi tal-Unjoni ma seta’ jipproduċi l-prodott inkwistjoni. Madankollu, bl-eċċezzjoni ta’ produttur wieħed, OPL ma ssostanzjatx l-affermazzjoni li hija kienet talbet provvisti jew li l-produtturi tal-Unjoni kienu rrifjutaw li jfornu u / jew indikaw li ma setgħux jipproduċu l-prodott inkwistjoni, sal-iskadenza għall-kummenti dwar l-iżvelar provviżorju jew sal-iskadenza għall-kummenti dwar il-kummenti ta’ partijiet oħrajn wara l-iżvelar provviżorju.

(208)

EA tenniet li l-industrija tal-Unjoni kapaċi tipproduċi AFRPs skont l-ispeċifikazzjonijiet ta’ OPL u ssottomettiet dikjarazzjonijiet li ċerti produtturi tal-Unjoni setgħu jfornu l-prodott inkwistjoni. Hija xeħtet ukoll dubju dwar l-affermazzjoni li OPL kienet ikkuntattjat lil diversi produtturi tal-Unjoni hekk kif indikat li l-ebda kumpanija mill-industrija tal-Unjoni ma kienet irċeviet xi talba għal kwotazzjoni reċentement, jew li kienu għaddejjin diskussjonijiet.

(209)

Filwaqt li d-dikjarazzjonijiet magħmulin minn produttur wieħed tal-Unjoni jistgħu jiġu kkontestati, il-Kummissjoni stabbiliet li tal-anqas produttur wieħed tal-Unjoni kapaċi jipproduċi AFRPs skont l-ispeċifikazzjonijiet ta’ OPL.

(210)

L-evidenza pprovduta minn OPL fi ħdan l-iskadenzi stabbiliti rigward il-kapaċità tal-industrija tal-Unjoni li tipproduċi, u l-fatt li hija kkuntattjat lill-produtturi tal-Unjoni hija limitata għal produttur wieħed biss tal-Unjoni, u l-affermazzjonijiet ta’ OPL fil-biċċa l-kbira ma humiex issostanzjati minn evidenza ta’ sostenn. Barra minn hekk, l-evidenza pprovduta għall-produttur ikkonċernat kopriet perjodu wara l-impożizzjoni ta’ miżuri provviżorji. Minħabba l-effett potenzjali ta’ dawk il-miżuri provviżorji fuq l-imġiba tal-atturi tas-suq, il-Kummissjoni ma qisitx din il-biċċa evidenza bħala prova affidabbli biżżejjed ta’ rifjut ta’ produzzjoni jew ta’ provvista minn dak il-produttur ladarba jiġu imposti l-miżuri definittivi u l-kundizzjonijiet normali tas-suq jiġu rrestawrati bis-sħiħ. Tabilħaqq, fil-mument li l-Kummissjoni timponi miżuri provviżorji, huwa raġonevoli li wieħed jistenna li l-produtturi tal-Unjoni jistgħu jiddeċiedu li jipposponu d-dħul f’relazzjoni kuntrattwali fit-tul sakemm ikun ċar jekk humiex se jiġu imposti dazji definittivi u f’liema livell. Barra minn hekk, minkejja li s-sottomissjonijiet kien fihom affermazzjonijiet li produtturi oħrajn tal-Unjoni ma ridux jew ma setgħux ifornu lil OPL, dawn l-affermazzjonijiet ma kinux appoġġati minn xi evidenza. Fi kwalunkwe każ, jista’ jkun raġonevolment mistenni li l-importazzjonijiet se jkomplu mir-RPĊ minħabba l-livell tal-miżuri definittivi.

(211)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, OPL ipprovdiet diversi skambji bil-posta elettronika ma’ produtturi tal-Unjoni li ntalbu jikkonfermaw jekk setgħux jimmanifatturaw AFPRs skont l-ispeċifikazzjonijiet ta’ OPL. Fuq din il-bażi, OPL affermat li, bl-eċċezzjoni ta’ produttur wieħed tal-Unjoni li huwa lest li jipprovdi AFRPs bi prova, l-ebda wieħed mill-produtturi tal-Unjoni ma kien f’pożizzjoni li jimmanifattura l-AFRPs skont l-ispeċifikazzjonijiet tagħha.

(212)

L-investigazzjoni żvelat li l-konklużjoni li waslet għaliha OPL li l-produtturi tal-Unjoni ma setgħux jimmanifatturaw AFRPs skont l-ispeċifikazzjonijiet tagħha ma kinitx sostnuta minn evidenza peress li l-iskambji bil-posta elettronika wrew li ċerti produtturi kienu lesti jidħlu f’relazzjoni kummerċjali ma’ OPL. Barra minn hekk, deher li l-ispeċifikazzjonijiet mitlubin minn OPL fir-rigward tal-kompożizzjoni kimika kienu aktar stretti mill-ispeċifikazzjonijiet ipprovduti fit-talba għall-esklużjoni tagħha. Fuq din il-bażi, din l-affermazzjoni ġiet miċħuda.

(213)

Fuq din il-bażi, it-talba ta’ OPL għall-esklużjoni ġiet miċħuda u l-Kummissjoni kkonfermat il-konklużjonijiet tagħha milħuqin fit-taqsima 2.3.5 tar-Regolament provviżorju.

(214)

Wara l-iżvelar provviżorju, Hitachi affermat li l-impożizzjoni ta’ miżuri anti-dumping kien qed ikollha impatt detrimentali fuq is-settur usa’ tal-elettriku fl-UE. Hija affermat li bosta mill-fornituri tal-AFRPs tagħha kienu qed jesperjenzaw nuqqas ta’ kapaċità li jwassal għal nuqqas ta’ materjal fis-suq tal-Unjoni. Hitachi indikat ukoll li dan l-iżvilupp kien jikkoinċidi mal-impożizzjoni ta’ miżuri anti-dumping provviżorji ta’ AFPRs li joriġinaw mir-RPĊ. Konsegwentement, hija affermat li kienet qed tesperjenza dewmien fil-produzzjoni li dalwaqt kien se jaffettwa l-konsenji tagħha. Barra minn hekk, hija affermat li d-domanda għall-AFRPs fis-settur tat-transformers tal-potenza se tiżdied bħala konsegwenza tal-evoluzzjoni tal-qafas regolatorju f’dan is-settur (41). Fuq din il-bażi, hija talbet eżenzjoni mill-miżuri anti-dumping għall-industrija tat-transformers. Hija affermat ukoll li tali eżenzjonijiet diġà ngħataw lill-manifatturi tal-laned tax-xorb, tal-karozzi u tal-inġenji tal-ajru. Hija argumentat ukoll li jenħtieġ li tingħata eżenzjoni simili lis-settur tat-transformers fuq il-bażi tal-prinċipju tan-nondiskriminazzjoni u meta jitqies is-sehem li l-AFRPs jirrappreżentaw fil-prodotti finali tagħhom.

(215)

EA affermat li l-problemi kurrenti dwar il-kapaċità u l-konsenji ma kinux relatati mal-impożizzjoni ta’ miżuri anti-dumping peress li huma direttament marbuta mal-irkupru ekonomiku enormi ta’ wara l-COVID. Hija affermat ukoll li dan kien fenomenu dinji li affettwa lil ħafna industriji li lanqas biss huma soġġetti għal dazji anti-dumping. Żiedet ukoll li l-utenti tal-AFRPs fl-UE li kisbu volumi mill-produtturi Ewropej permezz ta’ kuntratti fit-tul ma għandhomx problemi ta’ provvista.

(216)

Il-Kummissjoni osservat li l-ebda waħda mill-affermazzjonijiet magħmulin minn Hitachi ma kienet issostanzjata b’evidenza ta’ sostenn ħlief għall-bidla fil-qafas regolatorju. Barra minn hekk, meta wieħed iqis it-talba għall-eżenzjoni u l-affermazzjoni dwar in-nondiskriminazzjoni, il-Kummissjoni osservat li l-manifatturi tal-laned tax-xorb, tal-karozzi u tal-inġenji tal-ajru qatt ma ġew inklużi fil-kamp ta’ applikazzjoni tal-investigazzjoni. Għalhekk, ma ngħatat l-ebda eżenzjoni għal dawk il-prodotti. Għalhekk, il-Kummissjoni ma tistax tifhem kif Hitachi tista’ tiġi ddiskriminata. Fi kwalunkwe każ, jista’ jkun raġonevolment mistenni li l-importazzjonijiet se jkomplu mir-RPĊ minħabba l-livell tal-miżuri definittivi. Għaldaqstant, il-Kummissjoni ċaħdet it-talba.

(217)

Wara l-iżvelar provviżorju, l-utenti TDK IT u TDK HU ressqu kummenti li fihom talbu l-esklużjoni tal-aluminju anodiku b’vultaġġ baxx u b’vultaġġ għoli, tal-fojl tat-tabs u tal-fojl tal-aluminju katodiku għall-użu fil-produzzjoni ta’ kapaċitaturi elettrolitiċi tal-aluminju, mill-kamp ta’ applikazzjoni tal-investigazzjoni. Huma saħqu li dawn l-AFRPs għandhom karatteristiċi fiżiċi, tekniċi u kimiċi distinti (purità, ligi, struttura kristallizzata u proprjetajiet tal-ossidu), li jeħtieġu teknoloġija tal-produzzjoni speċifika (l-ebda tidwib) u li l-industrija tal-Unjoni ma għandhiex kapaċità tal-produzzjoni disponibbli għal dan il-prodott. Barra minn hekk, huma affermaw ukoll li dawn il-prodotti jintużaw biss għall-produzzjoni ta’ kapaċitaturi elettrolitiċi tal-aluminju, li għandhom prezzijiet ogħla u li l-volumi importati jirrappreżentaw parti żgħira mill-konsum fl-Unjoni tal-AFRPs. Fil-fehma tagħhom, l-esklużjoni ta’ tali prodotti ma tkunx tikkawża dannu għall-industrija tal-Unjoni filwaqt li l-miżuri anti-dumping ikollhom impatt negattiv fuq il-prestazzjoni finanzjarja tagħha.

(218)

EA affermat li l-AFRPs involuti jistgħu jiġu prodotti fl-UE jew fiż-Żona Ekonomika Ewropea (“ŻEE”) u jaqgħu fi ħdan id-deskrizzjoni tal-prodott. Hija żiedet ukoll li prodotti bħal dawn ġew immanifatturati fl-UE u li xi produtturi qed jippjanaw li jerġgħu jibdew il-produzzjoni.

(219)

Bi tweġiba għas-sottomissjoni ta’ EA, TDK IT ikkontestat il-fatt li l-AFRPs inkwistjoni huma disponibbli fl-UE. Hija affermat ukoll li dawn il-prodotti speċifiċi ma baqgħux disponibbli sa mit-tieni nofs tal-2018 u rreferiet għal dikjarazzjoni minn produttur tal-Unjoni. Hija affermat ukoll li l-AFRPs ikkonsenjati mill-industrija tal-Unjoni fil-passat kienu qrib il-limitu minimu ta’ kwalità aċċettabbli u li d-domanda tal-klijenti issa teħtieġ prodotti ta’ grad ogħla li dan il-produttur ma setax jimmanifattura meta waqqaf il-produzzjoni tiegħu. Hija żiedet li, jekk il-produzzjoni terġa’ tibda, il-materjal ikollu jgħaddi minn proċess twil ta’ validazzjoni doppja (ma’ TDK u mal-klijenti tagħha) qabel ma jkun jista’ jerġa’ jintuża.

(220)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, EA tenniet l-affermazzjoni tagħha dwar id-disponibbiltà tal-prodott ikkonċernat fl-Unjoni jew fiż-ŻEE. Hija żiedet ukoll li l-industrija tal-Unjoni kellha twaqqaf il-produzzjoni tagħha tal-prodotti inkwistjoni fl-Unjoni minħabba kompetizzjoni inġusta mill-produtturi esportaturi Ċiniżi. F’kundizzjonijiet ta’ kompetizzjoni ġusta, hija ddikjarat li diversi produtturi fl-Unjoni jkunu f’pożizzjoni li jfornu dawn il-prodotti fis-suq tal-Unjoni. Fuq din il-bażi, hija kkonkludiet li jkun kontra l-interess tal-Unjoni li dawn il-prodotti li joriġinaw miċ-Ċina jiġu eżentati peress li tali eżenzjoni tkun qed tipperpetwa sitwazzjoni inġusta u ddgħajjef serjament l-isforzi riċenti tal-produtturi tal-Unjoni sabiex jipproduċu dawn il-prodotti fl-Unjoni.

(221)

Wara l-kummenti ta’ EA sottomessi wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, TDK HU sostniet li l-prodotti li kienet timporta kienu differenti minn dawk importati mit-TDK IT f’termini ta’ proċessar u ta’ kwalità, tal-valur, tal-kodiċi doganali u tal-użu aħħari. Hija affermat ukoll li ż-żewġ prodotti ma humiex prodotti simili peress li l-prodott importat minn TDK IT huwa fojl tal-aluminju mhux maħdum li għad irid jiġi pproċessat filwaqt li l-prodott importat minn TDK HU diġà jkun ipproċessat u jkun għad irid jinbena f’kapaċitaturi elettrolitiċi tal-aluminju mingħajr proċessar ulterjuri.

(222)

Barra minn hekk, hija żiedet li l-kummenti ta’ EA kienu relatati biss ma’ fojl tal-aluminju ta’ purità għolja użat għall-produzzjoni ta’ fojl tal-anodu u tat-tabs b’vultaġġ għoli għal kapaċitaturi elettrolitiċi tal-aluminju u mhux ma’ folji tal-aluminju u ma’ folji tal-aluminju b’vultaġġ baxx/għoli importati minn TDK HU, u li EA ma kienet ipprovdiet l-ebda evidenza sinifikattiva u ssostanzjata dwar id-disponibbiltà attwali jew futura tal-prodott tal-aħħar importat minn TDK HU.

(223)

TDK HU ddikjarat ukoll li l-prodott li jista’ jiġi prodott mill-industrija tal-Unjoni jew fiż-ŻEE ma jikkorrispondix għall-prodott li tuża, fid-dawl tal-karatteristiċi tiegħu.

(224)

Wara l-kummenti ta’ EA riflessi fil-premessa (220), TDK IT issottomettiet li l-produtturi allegatament kapaċi jimmanifatturaw il-prodotti inkwistjoni jew ma kinux jissodisfaw l-istandards tal-kwalità meħtieġa jew ma kinux jimmanifatturaw il-prodott li qed jiġi investigat iżda pjuttost qatgħat; jiġifieri prodott nofsu lest użat għall-manifattura tal-prodott li qed jiġi investigat.

(225)

TDK IT affermat ukoll li l-kummenti ta’ EA relatati mal-kompetizzjoni inġusta kienu vagi u ma kinux appoġġati minn evidenza u li s-suq rilevanti ma huwiex xprunat mill-prezz iżda mill-kwalità. Barra minn hekk, hija kkontestat il-kummenti ta’ EA relatati mal-interess tal-Unjoni, fuq il-bażi ta’ nuqqas ta’ sors effettiv u stabbli ta’ provvista fis-suq tal-Unjoni. Dan ikun iwassal għal żieda fil-kostijiet u jimmina l-effiċjenza tal-utenti downstream.

(226)

Wara l-iskadenza għall-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tas-sejbiet provviżorji, l-Assoċjazzjoni Ġermaniża tal-Manifatturi Elettriċi u Elettroniċi (“ZVEI”) appoġġat l-affermazzjonijiet ta’ TDK HU u ta’ TDK IT dwar in-nuqqas ta’ disponibbiltà tal-prodott fl-Unjoni u saħqet fuq il-ħtieġa li tiġi żgurata provvista stabbli lill-klijenti tagħhom fl-industriji tal-elettronika tal-karozzi u industrijali u dwar l-impatt negattiv li l-miżuri jkollhom fuq il-kompetittività tagħhom fir-rigward ta’ fornituri mhux tal-UE. Minbarra ċ-Ċina, ZVEI identifikat lill-Ġappun bħala sors ieħor ta’ provvista għall-prodotti inkwistjoni.

(227)

Wara l-iżvelar definittiv, TDK HU ddikjarat li l-Kummissjoni ma kinitx eżaminat l-affermazzjonijiet tagħha relatati mad-disponibbiltà tal-prodotti li teħtieġ matul l-istadju provviżorju. Hija tenniet li l-prodotti li tuża ma ġewx prodotti fl-UE għal madwar ħames snin. B’mod aktar speċifiku, hija affermat li l-fojls tal-aluminju katodiku u l-fojls tal-aluminju anodiku b’vultaġġ baxx ma humiex prodotti fl-UE u li, filwaqt li ċerti fojls tal-aluminju anodiku b’vultaġġ għoli jiġu prodotti fl-UE, dawn il-prodotti ma jikkonformawx mal-ispeċifikazzjonijiet fiżiċi, kimiċi jew tekniċi tagħha. Barra minn hekk, hija affermat li jkun meħtieġ investiment sinifikanti (kemm f’termini ta’ żmien kif ukoll f’termini finanzjarji) sabiex titkompla l-produzzjoni fl-UE.

(228)

TDK HU argumentat ukoll li l-produtturi tal-Unjoni ma opponewx it-talba għall-esklużjoni tagħhom fuq il-bażi ta’ oġġezzjonijiet sinifikattivi u fondati sew. Hija argumentat li EA kienet fixklet il-prodotti importati minn TDK IT u minn TDK HU, li allegatament huma differenti, u li ma pprovdietx evidenza li hemm jew dalwaqt se jkun hemm produzzjoni tal-prodotti li teħtieġ TDK HU. Fuq din il-bażi, hija sostniet li l-Kummissjoni ma vvalutatx is-sottomissjonijiet ta’ TDK HU u ta’ EA f’dettall suffiċjenti u, għalhekk, ma indirizzatx it-talba tagħha b’mod imparzjali jew ġust matul l-istadju provviżorju.

(229)

Barra minn hekk, TDK HU ddikjarat li l-Kummissjoni ma vvalutatx il-possibbiltà li tiġi applikata l-proċedura doganali tal-użu finali skont l-Artikolu 254 tal-Kodiċi Doganali tal-Unjoni. Fil-fehma tat-TDK HU, l-applikazzjoni ta’ proċedura doganali bħal din ma tikkawżax ħsara lill-industrija tal-Unjoni u fil-fatt isservi lill-produtturi tal-kapaċitaturi stabbiliti fl-UE.

(230)

Wara l-iżvelar definittiv, TDK IT tenniet li l-prodott li tuża jeħtieġ grad għoli ta’ purità li jagħmel il-prodott uniku f’termini ta’ proprjetajiet tekniċi u mhux komparabbli ma’ prodotti tal-aluminju llaminati ċatti oħrajn. F’dan ir-rigward, hija rreferiet għal sors ta’ parti terza. (42) Barra minn hekk, TDK IT affermat li l-fojl tal-aluminju b’purità għolja prodott fl-Unjoni ma kienx adegwat jew ma kienx jeżisti sabiex l-impożizzjoni ta’ dazji anti-dumping tinterrompi l-provvista ta’ fojl tal-aluminju b’purità għolja u toħloq disturbi fis-suq tal-Unjoni peress li l-uniku produttur tal-Unjoni telaq mis-suq 2018 minħabba l-kwalità batuta tal-prodotti tagħha u jkun hemm bżonn ta’ sentejn sa tliet snin sabiex jerġa’ jibda l-produzzjoni. Fl-aħħar nett, TDK IT affermat ukoll li l-uniku produttur tal-Unjoni ta’ fojl tal-aluminju ta’ purità għolja jaħdem skont ftehim ta’ tolling u, għalhekk, ma jkunx sid il-prodott użat minn TDK IT.

(231)

Fuq il-bażi tal-informazzjoni fil-fajl, il-Kummissjoni stabbiliet li l-AFRPs inkwistjoni jaqgħu fl-ambitu tal-prodott kif definit fin-Notifika ta’ Bidu u fil-premessi (55) sa (58) tar-Regolament provviżorju. Għandhom l-istess karatteristiċi fiżiċi, tekniċi u kimiċi bażiċi bħal AFRPs oħrajn peress li huma magħmulin minn aktar minn 95 % ta’ aluminju pur b’mod simili għal AFPRs oħrajn. Barra minn hekk, il-biċċa l-kbira tal-AFRPs għandhom l-ispeċifikazzjonijiet tagħhom stess skont l-applikazzjoni jew ir-rekwiżiti tal-utent aħħari kkonċernat. Il-fatt li l-AFRPs inkwistjoni għandhom ċertu livell ta’ purità, huma magħmulin minn ċerti ligi, għandhom struttura kristallina speċifika jew ċerti proprjetajiet tal-ossidu ma jfissirx li ma għandhomx l-istess karatteristiċi kimiċi, tekniċi u fiżiċi bażiċi bħal AFRPs oħrajn.

(232)

F’dak li għandu x’jaqsam mal-proċess ta’ manifattura, il-Kummissjoni stabbiliet li l-AFRPs inkwistjoni għandhom fil-biċċa l-kbira l-istess proċess ta’ manifattura kif deskritt fil-premessa (56) tar-Regolament provviżorju u fil-biċċa l-kbira jużaw l-istess tagħmir tal-manifattura bħal AFRPs oħrajn. Il-fatt li l-AFRPs inkwistjoni jużaw tagħmir speċifiku ma huwiex uniku peress li AFRPs oħrajn, li huma parti mill-ambitu tal-prodott, ukoll jista’ jkollhom tagħmir dedikat speċifiku (bħal stazzjon tal-kisi jew tagħmir tal-qtugħ).

(233)

Il-Kummissjoni nnotat ukoll li kien hemm fehmiet diverġenti dwar id-disponibbiltà ta’ dan il-prodott fis-suq tal-Unjoni u ma kinitx konvinta mill-elementi fil-fajl li kien hemm riskju strutturali fit-tul ta’ nuqqas ta’ provvista. Fi kwalunkwe każ, jista’ jkun raġonevolment mistenni li l-importazzjonijiet se jkomplu mir-RPĊ minħabba l-livell tal-miżuri definittivi.

(234)

Il-Kummissjoni jiddispjaċiha li TDK IT u TDK HU ma kinux ipprovdew tweġibiet għall-kwestjonarju bħala utenti u li huma rreġistraw bħala partijiet interessati biss wara l-iżvelar provviżorju. F’dan il-kuntest, il-Kummissjoni setgħet tivvaluta biss l-affermazzjoni u s-sitwazzjoni ta’ dawn il-kumpaniji fuq il-bażi tal-informazzjoni mhux kompluta li huma pprovdew bħala parti mill-kummenti tagħhom għall-iżvelar provviżorju. Għalhekk, il-Kummissjoni ma rċeviet l-ebda tweġiba għall-kwestjonarju jew biżżejjed informazzjoni puntwali li setgħet tivverifika u, għalhekk, ma setgħetx tivvaluta s-sehem tal-AFRPs fil-kost totali tal-produzzjoni taż-żewġ kumpaniji u l-impatt potenzjali li l-miżuri anti-dumping jista’ jkollhom fuq in-negozju tagħhom u l-profittabbiltà.

(235)

Wara l-iżvelar definittiv, TDK HU kkontestat il-fatt li l-Kummissjoni ma kinitx irċeviet biżżejjed informazzjoni puntwali u li ma setgħetx tivvaluta l-affermazzjoni u s-sitwazzjoni tagħha għar-raġuni li kienet ipprovdiet kummenti bil-miktub dwar l-iżvelar provviżorju lill-Kummissjoni sal-iskadenza meħtieġa u tliet sottomissjonijiet sussegwenti, li lkoll fihom informazzjoni sinifikattiva dwar l-attivitajiet tagħha. Fuq l-istess nota, TDK HU ddispjaċiha li, għalkemm ġiet mistiedna tagħmel dan, il-Kummissjoni ma kkuntattjathiex sabiex titlob informazzjoni addizzjonali / ġustifikazzjoni sabiex tivvaluta t-talba tagħha u ssolvi l-kontradizzjonijiet.

(236)

Kif previst fil-punt 5.5 tan-Notifika ta’ Bidu, il-partijiet interessati kollha ġew mistidnin jipprovdu informazzjoni dwar il-valutazzjoni tal-interess tal-Unjoni fi żmien 37 jum mid-data ta’ bidu ta’ dan il-proċediment jew f’format liberu jew billi jimlew kwestjonarju disponibbli għall-partijiet kollha mid-data ta’ bidu. Il-punt 5.5 tan-notifika ta’ bidu jispeċifika wkoll li l-informazzjoni sottomessa tiġi kkunsidrata biss jekk tkun appoġġata minn evidenza fattwali fiż-żmien tas-sottomissjoni.

(237)

F’dan ir-rigward, l-ewwel jenħtieġ li jiġi nnotat li l-ebda waħda miż-żewġ kumpaniji ma pprovdiet informazzjoni dwar il-valutazzjoni tal-interess tal-Unjoni fi żmien l-iskadenza ta’ 37 jum. It-tieni, la TDK HU u lanqas TDK IT ma ppreżentaw tweġiba għall-kwestjonarju tal-utenti li kienet tippermetti lill-Kummissjoni tiġbor l-informazzjoni meqjusa neċessarja fi żmien xieraq, titlob informazzjoni addizzjonali jekk ikun hemm bżonn, tivverifika l-informazzjoni riċevuta u tivvaluta l-affermazzjonijiet fuq il-bażi ta’ informazzjoni vverifikata. F’dan il-każ, il-Kummissjoni kellha biss informazzjoni mhux ivverifikata frammentarja li ma kinitx sottomessa puntwalment, li kienet differenti b’mod sinifikanti mis-sett standard ta’ data mitlub fit-tweġiba għall-kwestjonarju. Tali informazzjoni ma kinitx tippermetti li ssir valutazzjoni xierqa tal-impatt potenzjali li jista’ jkollhom il-miżuri anti-dumping fuq l-attivitajiet ta’ TDK HU jew ta’ TDK IT. Fin-nuqqas ta’ tweġiba għall-kwestjonarju ppreżentata puntwalment, il-Kummissjoni qieset li l-oneru tal-prova kien jaqa’ fuq il-kumpaniji li ssottomettew it-talbiet wara l-iżvelar provviżorju, mhux fuq il-Kummissjoni li kienet stiednet lill-partijiet jipparteċipaw fl-investigazzjoni sa mill-bidu nett kif previst fil-Punt 5.5 tan-Notifika ta’ Bidu.

(238)

Konsegwentement, il-Kummissjoni ma kellhiex informazzjoni essenzjali dwar id-disponibbiltà tal-prodotti inkwistjoni fl-Unjoni u barra minnha u ma setgħetx tivvaluta la jekk il-prodotti inkwistjoni kinux diġà qed jinkisbu jew setgħux jinkisbu minn pajjiżi oħrajn. Konsegwentement, il-Kummissjoni lanqas ma setgħet tivvaluta l-possibbiltà li tapplika l-proċedura doganali tal-użu finali skont l-Artikolu 254 tal-Kodiċi Doganali tal-Unjoni.

(239)

Kollox ma’ kollox, u b’referenza għall-affermazzjonijiet ta’ TDK HU u ta’ TDK IT riflessi fil-premessi (227) sa (228), il-Kummissjoni qieset li n-nuqqas ta’ tweġibiet għall-kwestjonarju li normalment ikun fihom informazzjoni relatata ma’ elementi bħas-sorsi tal-provvista; ix-xirjiet; il-bejgħ fl-Unjoni u barra minnha; u s-sehem tal-prodott li qed jiġi investigat bħala parti mill-kost totali u mill-profittabbiltà; ma kienx jippermetti lill-Kummissjoni twettaq valutazzjoni sinifikattiva tal-affermazzjonijiet ta’ TDK HU u ta’ TDK IT fuq il-bażi ta’ sett standard ta’ informazzjoni suffiċjenti ppreżentata puntwalment. F’dan il-kuntest, il-Kummissjoni qieset li aġixxiet b’diliġenza u b’imparzjalità billi indirizzat l-affermazzjonijiet u l-kummenti kollha li għalihom kellha biżżejjed informazzjoni għad-dispożizzjoni tagħha. L-istess loġika tapplika għall-affermazzjoni ta’ TDK HU msemmija fil-premessa (229).

(240)

Fuq il-bażi ta’ dan ta’ hawn fuq, l-affermazzjonijiet ta’ TDK HU u ta’ TDK IT ġew miċħudin.

(241)

Wara l-iżvelar provviżorju, l-utent Amcor issottometta kummenti u talab eżenzjoni għall-użu finali tal-istokk tal-fojl għal raġunijiet ta’ interess tal-Unjoni. Huwa afferma li qed jaffaċċja diffikultajiet fl-akkwist ta’ stokk tal-fojl minħabba l-kapaċità limitata allegata ta’ materja prima fl-UE u madwar id-dinja. Xiamen Xiashun appoġġat it-talba ta’ Amcor. Barra minn hekk, hija sostniet ukoll li l-istokk tal-fojl u AFRPs oħrajn huma prodotti differenti peress li għandhom karatteristiċi fiżiċi u tekniċi, proċessi ta’ produzzjoni, użu finali u applikazzjonijiet differenti.

(242)

EA wieġbet li Amcor ma kisibx volumi fl-Ewropa minn kmieni biżżejjed u li s-sitwazzjoni li qed jaffaċċja hija biss problema ta’ terminu qasir peress li s-suq ma antiċipax id-domanda għolja kurrenti marbuta mal-irkupru ekonomiku ta’ wara l-COVID. Hija affermat ukoll li jenħtieġ li s-sitwazzjoni ta’ Amcor ma titqabbilx ma’ produtturi oħrajn tal-fojl peress li n-negozju ewlieni ta’ Amcor huwa l-produzzjoni tal-imballaġġ, u mhux l-illaminar tal-fojl.

(243)

Għall-Kummissjoni, l-affermazzjonijiet relatati ma’ karatteristiċi fiżiċi u tekniċi, mal-proċessi tal-produzzjoni, mal-użu finali u mal-applikazzjonijiet differenti ma kinux issostanzjati b’evidenza ta’ sostenn. Barra minn hekk, minkejja t-tħabbira tal-miżuri, Amcor ma kienx talab żieda fil-volum kuntrattwali mal-fornituri tal-Unjoni tiegħu u lanqas ma kien fittex li jiffirma kuntratt ta’ terminu medju ma’ fornituri potenzjali oħrajn tal-UE. Barra minn hekk, id-dazji definittivi huma aktar baxxi minn dawk provviżorji, u l-entità ġuridika “Amcor Singen Rolling GmbH” xorta tkun profittabbli b’mod raġonevoli anke jekk jiġu imposti miżuri anti-dumping. Tabilħaqq, hija kisbet livelli ta’ profitt suffiċjenti matul u qabel il-PI; hemm indikazzjonijiet ċarissimi li tista’ tittrasferixxi parti mill-kost tad-dazju jew il-kost kollu lill-klijent tagħha; u għandha attivitajiet sinifikanti ta’ esportazzjoni downstream li jippermettu l-importazzjoni tal-prodott ikkonċernat taħt ir-reġim ta’ proċessar attiv. Barra minn hekk, dan l-aħħar ġew imposti dazji anti-dumping provviżorji fuq l-importazzjonijiet tal-fojl ta’ konvertituri tal-aluminju li joriġinaw mir-Repubblika tal-Poplu taċ-Ċina (43) li huma parti mill-portafoll tal-prodotti downstream tagħha. Fl-aħħar nett, filwaqt li hemm ħafna kumpaniji oħrajn attivi fis-settur tal-fojl, Amcor kien l-unika kumpanija li rreġistrat bħala parti interessata, ipprovdiet kummenti u talbet eżenzjoni tal-użu aħħari. Għalhekk, deher li t-tħassib ta’ Amcor ma kienx kondiviż minn utenti oħrajn fis-settur. Abbażi ta’ dan, din it-talba ġiet miċħuda.

(244)

Wara l-iżvelar definittiv, Amcor ilmenta li l-Kummissjoni ma kinitx indirizzat it-talba tiegħu sabiex teskludi l-istokk tal-fojl mill-ambitu tal-prodott f’dak l-iżvelar. Fl-istess sett ta’ kummenti, Amcor irtira t-talba tiegħu għall-esklużjoni tal-istokk tal-fojl mill-ambitu tal-prodott u għall-eżenzjoni tal-użu aħħari. Barra minn hekk, Amcor afferma li, għall-kuntrarju tas-sejba tal-Kummissjoni, huwa kien ikkuntattja lill-produtturi tal-Unjoni sabiex jikseb stokk tal-fojl mingħandhom.

(245)

Fid-dawl tal-kummenti ta’ Amcor u, b’mod partikolari, tal-irtirar tat-talba tiegħu, il-Kummissjoni ma qisitx li huwa neċessarju li tiġi vvalutata t-talba għall-esklużjoni tal-prodott ta’ Amcor. Fir-rigward tal-kuntatti ta’ Amcor mal-produtturi tal-Unjoni, jenħtieġ li jiġi nnotat li filwaqt li Ammor tabilħaqq ikkuntattja lill-produtturi tal-Unjoni, il-kuntatti tiegħu kienu limitati għal numru żgħir biss minnhom. Għalhekk, il-maġġoranza l-kbira tal-produtturi tal-Unjoni li jistgħu jkunu sors alternattiv validu ta’ provvista ma ġewx ikkuntattjati. Fuq din il-bażi, l-affermazzjonijiet ta’ Amcor ġew miċħudin.

(246)

Wara l-iżvelar definittiv, Xiamen Xiashun affermat li s-sottomissjonijiet tagħha rigward id-differenzi fil-karatteristiċi tal-istokk tal-fojl baqgħu indirizzati b’mod insuffiċjenti mill-premessi (303) u (306) tar-Regolament provviżorju li l-Kummissjoni kienet għamlet referenza għalihom. B’mod aktar speċifiku, Xiamen Xiashun irreferiet għad-differenzi fil-liga, fil-kompożizzjoni kimika u fl-ispeċifikazzjonijiet tekniċi bħall-gauge u l-ittemprar u l-proċessi tal-produzzjoni. Barra minn hekk, l-istess esportatur afferma li fatturi oħrajn bħall-grupp tal-prodotti, it-tip ta’ ligi u l-proċess tal-manifattura kienu ġew ikkunsidrati meta ġiet ivvalutata t-talba għall-esklużjoni li tappartjeni għall-AHEX AFRPs u li jenħtieġ li l-istokk tal-fojl jiġi vvalutat fid-dawl tal-istess fatturi.

(247)

Il-Kummissjoni ma qablitx ma’ dik l-affermazzjoni. L-elementi ppreżentati fil-premessi (303) sa (306) tar-Regolament provviżorju indirizzaw l-affermazzjoni ta’ Xiamen Xiashun u rreferew b’mod preċiż għall-fatt li “huma magħmula mill-istess ligi jew minn ligi simili u għandhom l-istess irfinar, ittemprar u ħxuna simili bħal AFRPs oħra”. Barra minn hekk, l-istokk tal-fojl huwa r-riżultat tal-istess proċess tal-produzzjoni, imsemmi fil-premessa (56) tar-Regolament provviżorju, bħal AFRPs oħrajn.

(248)

Meta wieħed iqis li l-oneru tal-provi jaqa’ fuq il-partijiet li jitolbu esklużjoni, ta’ min jinnota li, għall-kuntrarju tal-każ tal-AHEX AFRPs, Xiamen Xiashun ma ssottomettietx affermazzjonijiet speċifiċi relatati ma’ elementi bħall-grupp ta’ prodotti. Fuq din il-bażi, il-Kummissjoni ma vvalutatx aspetti bħal dawn għat-talba ta’ Xiamen Xiashun relatata mal-istokk tal-fojl. Fuq din il-bażi, dawn l-affermazzjonjiet ġew miċħudin.

(249)

Xiamen Xiashun argumentat li l-istruttura tal-PCN użata f’din l-investigazzjoni ma tkunx tippermetti l-identifikazzjoni tal-istokk tal-fojl separatament mill-prodotti l-oħrajn li għandhom karatteristiċi differenti u b’mod speċifiku użi differenti ħafna mill-istokk tal-fojl. Fil-fehma tagħha, l-użu tal-istruttura tal-PCN għad-determinazzjoni tal-valur normali, għad-determinazzjoni tal-prezzijiet tal-produtturi tal-UE għat-twaqqigħ tal-prezzijiet u għall-bejgħ bi prezz imwaqqa’ u t-tqabbil konsegwenti mal-mudelli esportati tagħha jrendu paragun mhux preċiż ta’ sitwazzjonijiet mhux paragunabbli. B’mod partikolari, hija affermat li pprovdiet evidenza prima facie għal differenza allegata fil-prezz bejn il-fojl PP Cap u l-istokk tal-fojl u ħeġġet lill-Kummissjoni tinvestiga l-eżistenza ta’ tali differenzi allegati fil-prezzijiet. Barra minn hekk, hija staqsiet ukoll jekk wieħed mill-mudelli li kienet tesporta tqabbilx mal-ilqugħ tas-sħana tal-karozzi.

(250)

Il-Kummissjoni fakkret li kienet tgawdi minn diskrezzjoni kbira dwar kif għandha tibni n-numri ta’ kontroll tal-prodotti sabiex tagħmel paragun ġust bejn il-prodotti esportati u l-produzzjonijiet magħmulin mill-industrija tal-Unjoni. Meta ġie stabbilit il-PCN f’dan il-każ, dan il-paragun ġust ġie żgurat bis-sħiħ.

(251)

L-ewwel nett, ir-Regolament provviżorju (44) kkonkluda li l-istokk tal-fojl kellu l-istess karatteristiċi kimiċi, tekniċi u fiżiċi bażiċi bħal AFRPs oħrajn u li jaqa’ fi ħdan id-definizzjoni tal-ambitu tal-prodott. It-tieni, il-produtturi tal-Unjoni inklużi fil-kampjun biegħu l-istokk tal-fojl fi kwantitajiet sinifikanti f’livell ta’ prezz simili bħall-fojl PP Cap matul il-perjodu ta’ investigazzjoni, u b’hekk ikkonfermaw in-nuqqas ta’ differenza sinifikanti fil-prezz bejn dawn iż-żewġ prodotti. L-investigazzjoni kkonfermat ukoll li l-AFRPs għall-ilqugħ tas-sħana tal-karozzi ma kinux imqabblin mal-mudell li kienet tesporta Xiamen Xiashun.

(252)

Wara l-iżvelar definittiv, l-istess esportatur ilmenta li l-Kummissjoni ma kinitx ġabret data dwar il-prezzijiet għall-bejgħ tal-istokk tal-fojl mill-produtturi tal-Unjoni sabiex tkun tista’ tqabbilhom mal-prezzijiet tal-esportazzjoni tagħha. F’dan ir-rigward, hija indikat li l-Kummissjoni ma ġabret l-ebda informazzjoni bħal din minħabba li Xiamen Xiashun ma kinitx ipprovdiet evidenza għall-allegata differenza fil-prezz. Barra minn hekk, hija indikat li l-Kummissjoni missha investigat din il-kwistjoni sabiex tiżgura paragun oġġettiv u ġust u talbet lill-Kummissjoni tiżvela l-medda tal-prezzijiet għall-fojl PP Cap mibjugħ mill-industrija tal-Unjoni b’appoġġ għad-dikjarazzjoni tagħha. Barra minn hekk, hija talbet lill-Kummissjoni tikkonferma li l-istokk tal-fojl ta’ Xiamen Xiashun ma tqabbilx ma’ xi tip ieħor ta’ AFRP għall-fini tal-kalkoli tat-twaqqigħ tal-prezz u tal-bejgħ taħt il-prezz.

(253)

L-ewwel jenħtieġ li jiġi ċċarat li l-Kummissjoni ġabret l-informazzjoni meqjusa neċessarja fuq il-bażi tal-prattika standard tagħha, jiġifieri billi talbet, f’dan il-każ, lill-produtturi tal-Unjoni inklużi fil-kampjun jimlew il-kwestjonarju tal-produtturi tal-Unjoni li jirrikjedi li l-produtturi tal-Unjoni inklużi fil-kampjun jipprovdu elenku tal-bejgħ tranżazzjoni, tranżazzjoni li jidentifika t-tipi ta’ prodotti bl-użu ta’ struttura speċifika tal-PCN, li taħtha jista’ jiġi kklassifikat l-istokk tal-fojl. L-informazzjoni miġbura mill-industrija tal-Unjoni kienet tinkludi l-bejgħ tal-istokk tal-fojl. Għalhekk, il-Kummissjoni ma qablitx mal-affermazzjoni li ma ġabritx data dwar il-prezzijiet għall-bejgħ tal-istokk tal-fojl mill-produtturi tal-Unjoni.

(254)

It-tieni, kif imsemmi fil-premessa (333) tar-Regolament provviżorju, Xiamen Xiashun ma pprovdietx evidenza fir-rigward tad-differenza allegata fil-prezzijiet bejn l-applikazzjonijiet differenti (stokk tal-pinen, PP cap u folja litografika) meta ssottomettiet it-talba tagħha jew fi stadju aktar tard tal-proċediment. Fi kwalunkwe każ, kif imsemmi fil-premessa (251), il-Kummissjoni investigat il-kwistjoni u kkonfermat li ma kien hemm l-ebda differenza sinifikanti fil-prezzijiet bejn dawn iż-żewġ prodotti.

(255)

Skont it-talba ta’ Xiamen Xiashun għal dettalji addizzjonali, ta’ min jinnota li d-differenza fil-prezzijiet bejn il-PP cap u l-istokk tal-fojl mitlubin mill-industrija tal-Unjoni kienet tvarja bejn 0 u 10 % skont il-klijent tal-istokk tal-fojl u bħala medja kienet aktar baxxa minn [2 – 6] (45) %. F’dak li għandu x’jaqsam mat-talba ta’ Xiamen Xiashun dwar l-użu aħħari, Xiamen Xiashun ma pprovdiet l-ebda evidenza prima facie li, għal PCNs speċifiċi, użi finali differenti jwasslu għal prezzijiet differenti sinifikanti. F’dan il-kuntest, il-Kummissjoni qieset li l-PCN kien jirrifletti kif xieraq il-karatteristiċi rilevanti tal-AFRPs sabiex jiġi żgurat paragun ġust u ċaħdet l-affermazzjonijiet ta’ Xiamen Xiashun.

(256)

Għalhekk, il-Kummissjoni kkonkludiet li l-istruttura tal-PCN kienet tirrifletti kif xieraq il-karatteristiċi tal-istokk tal-fojl li jippermettu paragun ġust ta’ dan il-prodott ma’ prodotti oħrajn bl-istess struttura tal-PCN. Fuq din il-bażi, din l-affermazzjoni ġiet miċħuda.

(257)

Il-Kummissjoni kkonfermat il-konklużjonijiet stabbiliti fil-premessi (60) sa (105) tar-Regolament provviżorju, kif riveduti fil-premessa (191) aktar ’il fuq.

(258)

Wara l-iżvelar provviżorju, l-ilmentatur, il-GTĊ, it-tliet produtturi esportaturi inklużi fil-kampjun u Airoldi kkummentaw dwar is-sejbiet provviżorji dwar id-dumping.

(259)

Il-GTĊ u Xiamen Xiashun ikkummentaw dwar in-nuqqas ta’ distorsjonijiet sinifikanti fiċ-Ċina.

(260)

L-ewwel nett, il-GTĊ qal li l-kontenut tar-rapport dwar iċ-Ċina u l-modi kif jintuża kellhom nuqqasijiet fattwali u legali serji. Skont il-GTĊ, il-kontenut ma kienx rappreżentattiv, kien jiġbed lejn naħa waħda, u ’l bogħod mir-realtà. Id-dokument ta’ ħidma ttratta l-vantaġġi kompetittivi leġittimi tal-kumpaniji Ċiniżi u d-differenzi istituzzjonali normali bejn iċ-Ċina u l-Ewropa bħala l-bażi għad-determinazzjoni ta’ distorsjoni sinifikanti tas-suq. Barra minn hekk, il-GTĊ afferma li bl-aċċettazzjoni tal-applikazzjoni għall-investigazzjoni ppreżentata mill-industriji domestiċi bbażata fuq ir-rapport tal-pajjiż, il-Kummissjoni pprovdiet lill-industrija tagħha b’vantaġġi inġusti, li kienu ugwali għas-sentenzi li jsiru qabel il-proċess. Minbarra dan, il-GTĊ afferma li s-sostituzzjoni tal-investigazzjonijiet b’rapporti ma kinitx konformi mal-ispirtu legali fundamentali tal-ekwità u l-ġustizzja.

(261)

Bi tweġiba għall-affermazzjoni dwar in-nuqqasijiet fattwali fir-rapport tal-pajjiż, il-Kummissjoni tinnota li r-rapport tal-pajjiż huwa dokument komprensiv ibbażat fuq evidenza oġġettiva estensiva, inklużi l-leġiżlazzjoni, ir-regolamenti u dokumenti oħrajn ta’ politika uffiċjali ppubblikati mill-GTĊ, rapporti ta’ partijiet terzi minn organizzazzjonijiet internazzjonali, studji akkademiċi u artikli minn akkademiċi, u sorsi indipendenti affidabbli oħrajn. Dan sar disponibbli għall-pubbliku f’Diċembru 2017 sabiex kwalunkwe parti interessata jkollha biżżejjed opportunità sabiex twieġeb, tissupplimenta jew tikkummenta dwaru u dwar l-evidenza li huwa bbażat fuqha. Il-GTĊ qagħad lura milli jipprovdi kwalunkwe tali tweġiba jew kumment dwar is-sustanza u l-evidenza li tinsab fir-rapport sa minn meta ħareġ f’Diċembru 2017.

(262)

Rigward l-argument tal-GTĊ li jissuġġerixxi l-ħruġ ta’ rapport tal-pajjiż issostitwixxa l-investigazzjoni attwali, il-Kummissjoni fakkret li skont l-Artikolu 2(6a)(e), jekk il-Kummissjoni tqis li l-evidenza ppreżentata mill-ilmentatur dwar id-distorsjonijiet sinifikanti hija suffiċjenti, hija tista’ tibda l-investigazzjoni fuq din il-bażi. Madankollu, id-determinazzjoni dwar l-eżistenza u l-impatt reali ta’ distorsjonijiet sinifikanti u l-użu konsegwenti tal-metodoloġija stabbilita mill-Artikolu 2(6a)(a) iseħħu fiż-żmien tal-iżvelar provviżorju u/jew definittiv bħala riżultat ta’ investigazzjoni. L-eżistenza u l-impatt ta’ distorsjonijiet sinifikanti ma humiex ikkonfermati fl-istadju tal-bidu kif iddikjarat mill-GTĊ, iżda biss wara investigazzjoni fil-fond, u b’hekk dan l-argument huwa miċħud.

(263)

It-tieni, il-GTĊ ikkummenta li l-Kummissjoni ħarġet biss dokumenti ta’ ħidma tal-persunal għal ftit pajjiżi magħżulin, li kien biżżejjed sabiex jitqajjem tħassib dwar it-trattament tan-nazzjon l-aktar iffavorit u t-trattament nazzjonali (“NT”). Barra minn hekk, il-GTĊ afferma li l-Kummissjoni qatt ma ppubblikat standard ċar u prevedibbli għall-għażla tal-pajjiżi jew tas-setturi sabiex jippubblikaw ir-rapporti.

(264)

Il-Kummissjoni fakkret li, kif previst fl-Artikolu 2(6a)(c) tar-Regolament bażiku, għandu jiġi prodott rapport tal-pajjiż għal kwalunkwe pajjiż biss fejn il-Kummissjoni jkollha indikazzjonijiet fondati tal-eżistenza possibbli ta’ distorsjonijiet sinifikanti f’ċertu pajjiż jew settur f’dak il-pajjiż. Wara l-approvazzjoni tad-dispożizzjonijiet il-ġodda tal-Artikolu 2(6a) tar-Regolament bażiku f’Diċembru 2017, il-Kummissjoni kellha dawn l-indikazzjonijiet ta’ distorsjonijiet sinifikanti għaċ-Ċina. Il-Kummissjoni ppubblikat ukoll rapport dwar id-distorsjonijiet fir-Russja u ma teskludix li rapporti oħrajn jiġu wara. Peress li l-maġġoranza tal-każijiet tal-investigazzjoni għad-difiża tal-kummerċ (“TDI”) kienu jikkonċernaw iċ-Ċina u peress li kien hemm indikazzjonijiet serji ta’ distorsjonijiet f’dak il-pajjiż, kien l-ewwel pajjiż li għalih il-Kummissjoni abbozzat rapport. Ir-Russja hija l-pajjiż bit-tieni l-aktar każijiet ta’ TDI, u għalhekk kien hemm raġunijiet oġġettivi għall-Kummissjoni sabiex tħejji rapporti dwar dawk iż-żewġ pajjiżi f’din l-ordni.

(265)

Barra minn hekk, kif intqal aktar ’il fuq, ir-rapporti ma humiex obbligatorji sabiex jiġi applikat l-Artikolu 2(6a). L-Artikolu 2(6a)(c) jiddeskrivi l-kundizzjonijiet sabiex il-Kummissjoni toħroġ rapporti tal-pajjiżi, madankollu skont l-Artikolu 2(6a)(d) l-ilmentaturi ma humiex obbligati jużaw ir-rapport u, skont l-Artikolu 2(6a)(e), lanqas l-eżistenza ta’ rapport tal-pajjiż ma hija kundizzjoni sabiex tinbeda investigazzjoni skont l-Artikolu 2(6a). Fil-fatt, skont l-Artikolu 2(6a)(e), biżżejjed evidenza li turi distorsjonijiet sinifikanti fi kwalunkwe pajjiż ikkawżati mill-ilmentaturi li jissodisfaw il-kriterji tal-Artikolu 2(6a)(b) hija biżżejjed sabiex tinbeda l-investigazzjoni fuq dik il-bażi. Għalhekk, ir-regoli li jikkonċernaw distorsjonijiet sinifikanti speċifiċi għall-pajjiż japplikaw għall-pajjiżi kollha mingħajr ebda distinzjoni, u irrispettivament mill-eżistenza ta’ rapport tal-pajjiż. Għalhekk, skont id-definizzjoni, ir-regoli dwar id-distorsjonijiet tal-pajjiżi ma jiksrux it-trattament tan-nazzjon l-aktar iffavorit. Għalhekk, il-Kummissjoni ċaħdet dawn l-affermazzjonijiet.

(266)

It-tielet, il-GTĊ żied li f’termini tal-NT, il-kunċett ta’ distorsjonijiet tas-suq jew ta’ standards korrispondenti ma kienx jeżisti fil-leġiżlazzjoni tal-UE dwar is-suq intern jew dwar il-kompetizzjoni minbarra fir-Regolamenti bażiċi. Għalhekk, il-GTĊ argumenta li l-Kummissjoni ma kellha l-ebda awtorità f’termini tad-dritt internazzjonali u lanqas xi leġiżlazzjoni u prattika taħt il-kompetenza esklussiva tagħha fis-suq intern jew ir-regolament tal-kompetizzjoni sabiex tinvestiga d-distorsjonijiet fiċ-Ċina.

(267)

Il-Kummissjoni bbażat il-metodoloġija tagħha f’din l-investigazzjoni fuq id-dispożizzjoni tal-Artikolu 2(6a) tar-Regolament bażiku. Huwa legalment irrilevanti li liġijiet Ewropej oħrajn ma jużawx il-kunċett ta’ distorsjonijiet sinifikanti, peress li huwa speċifiku għall-qasam tal-anti-dumping, li huwa rregolat bir-regoli skont il-Ftehim tad-WTO dwar l-Anti-Dumping. Meta tittieħed azzjoni kontra l-importazzjonijiet, ma hemm l-ebda rekwiżit skont il-Ftehim dwar l-Anti-Dumping li jiġu vvalutati l-kundizzjonijiet tas-suq domestiku lil hinn mill-analiżi tad-dannu stabbilita. Fi kwalunkwe każ, is-suq tal-Unjoni huwa kkaratterizzat minn ambjent tas-suq ħieles kompetittiv ħafna, b’mod partikolari bis-saħħa tal-liġijiet stretti tal-Unjoni dwar l-għajnuna mill-Istat u l-kompetizzjoni. Għalhekk, din l-affermazzjoni ġiet miċħuda.

(268)

Barra minn hekk, il-GTĊ ikkummenta li l-Kummissjoni applikat regoli u standards diskriminatorji kontra kumpaniji Ċiniżi meta kienu f’sitwazzjonijiet simili bħall-kumpaniji tal-UE, inklużi iżda mhux limitati għal standards inġusti ta’ evidenza u ta’ oneru tal-provi. Fl-istess ħin, il-Kummissjoni ma evalwatx jekk l-UE jew l-Istati Membri kellhomx distorsjonijiet tas-suq. Dan is-sett ta’ prattiki affettwa serjament l-affidabbiltà u l-leġittimità tal-analiżi u l-konklużjonijiet tal-Kummissjoni dwar il-kwistjonijiet ewlenin fl-investigazzjonijiet anti-dumping fir-rigward tal-kalkolu tad-dumping u tad-dannu. Għalhekk, huwa biżżejjed li jitqajjem tħassib dwar ksur potenzjali tal-obbligi ta’ trattament nazzjonali skont ir-regoli tad-WTO.

(269)

Il-GTĊ ma pprovda l-ebda evidenza li turi li l-kumpaniji tal-UE jkunu soġġetti għal distorsjonijiet paragunabbli ma’ dawk tal-kompetituri Ċiniżi tagħhom u għalhekk ikunu f’sitwazzjoni simili. Fi kwalunkwe każ, il-kunċett ta’ distorsjonijiet sinifikanti huwa rilevanti fil-kuntest tad-determinazzjoni tal-valur normali għad-determinazzjoni tad-dumping, filwaqt li dan il-kunċett huwa legalment irrilevanti għall-industrija tal-Unjoni fil-kuntest speċifiku tal-investigazzjonijiet anti-dumping. Għalhekk, din l-affermazzjoni tqieset bħala mhux issostanzjata u legalment irrilevanti.

(270)

Ir-raba’, il-GTĊ issottometta li d-dispożizzjonijiet tal-Artikolu 2(6a) tar-Regolament bażiku huma inkonsistenti mal-Artikolu 2.2 tal-ADA, li jipprovdi lista eżawrjenti ta’ sitwazzjonijiet fejn il-valur normali jista’ jinbena u ma humiex inklużi fih distorsjonijiet sinifikanti. Il-GTĊ asserixxa wkoll li l-użu ta’ data minn pajjiż rappreżentattiv xieraq jew ta’ prezzijiet internazzjonali sabiex jinbena l-valur normali skont l-Artikolu 2(6a) kien ukoll inkonsistenti mal-Artikolu 6.1(b) tal-GATT u l-Artikolu 2.2 tal-ADA, speċjalment l-Artikolu 2.2.1.1. Il-GTĊ argumenta wkoll li r-regoli tad-WTO kienu jeħtieġu l-użu tal-kost tal-produzzjoni fil-pajjiż tal-oriġini flimkien ma’ ammont raġonevoli għall-kostijiet amministrattivi, tal-bejgħ u ġenerali u għall-profitti meta jinbena l-valur normali. Madankollu, l-Artikolu 2(6a) tar-Regolament Bażiku AD wessa’ l-ambitu tas-sorsi ta’ data sabiex jinkludi l-kostijiet ta’ produzzjoni u l-bejgħ f’pajjiż rappreżentattiv xieraq, jew prezzijiet, kostijiet jew valuri referenzjarji internazzjonali. Dan kien lil hinn mill-ambitu tar-regoli tad-WTO skont il-GTĊ. Għalhekk, irrispettivament minn jekk ir-Regolament bażiku tal-UE 2(5) huwiex konformi mar-regoli tad-WTO jew le, jenħtieġ li l-Kummissjoni ma tibnix il-valur normali meta jkun hemm l-hekk imsejħin “distorsjonijiet tas-suq” fuq il-bażi tal-awtorizzazzjoni tal-Artikolu 2(6a) tar-Regolamenti bażiċi.

(271)

Il-Kummissjoni tqis li d-dispożizzjonijiet tal-Artikolu 2(6a) huma konsistenti mal-obbligi tad-WTO tal-Unjoni Ewropea. Hija l-fehma tal-Kummissjoni li, f’konformità mal-kjarifiki tal-Korp tal-Appell f’DS473 EU-Biodiesel (Argentina), id-dispożizzjonijiet tar-Regolament bażiku li japplikaw b’mod ġenerali fir-rigward tal-Membri kollha tad-WTO, b’mod partikolari t-tieni subparagrafu tal-Artikolu 2(5), jippermettu l-użu ta’ data minn pajjiż terz, aġġustata kif xieraq meta tali aġġustament ikun neċessarju u ssostanzjat. Għalhekk, il-Kummissjoni ċaħdet din l-affermazzjoni.

(272)

Il-GTĊ qal li, f’dan il-każ, il-Kummissjoni injorat direttament ir-rekords tal-esportaturi Ċiniżi, li kien inkonsistenti mal-Artikolu 2.2.1.1 tal-ADA. Il-GTĊ argumenta li l-Korp tal-Appell f’EU-Biodiesel (Argentina) (DS473) u l-bord f’EU-Cost Adjustment Methodologies II (Russia) (DS494) asserixxew li skont l-Artikolu 2.2.1.1 tal-Ftehim dwar l-Anti-Dumping, sakemm ir-rekords miżmumin mill-esportatur jew mill-produttur li qed jiġi investigat kienu jikkorrispondu — f'limiti aċċettabbli — b’mod preċiż u affidabbli, għall-kostijiet attwali kollha mġarrbin mill-produttur jew mill-esportatur partikolari għall-prodott investigat, jenħtieġ li l-awtorità tal-investigazzjoni tuża dawn ir-rekords sabiex tiddetermina l-kost tal-produzzjoni tal-produtturi investigati.

(273)

Il-Kummissjoni fakkret li t-tilwimiet DS473 u DS494 ma kinux jikkonċernaw l-applikazzjoni tal-Artikolu 2(6a) tar-Regolament bażiku, li huwa l-bażi legali rilevanti għad-determinazzjoni tal-valur normali f’din l-investigazzjoni. Dan it-tilwim kien jikkonċerna wkoll sitwazzjonijiet fattwali differenti mis-sitwazzjoni fattwali li tikkonċerna l-eżistenza ta’ distorsjonijiet sinifikanti. Għalhekk, din l-affermazzjoni ġiet miċħuda.

(274)

Fl-aħħar nett, il-GTĊ qal li l-investigazzjoni mwettqa mill-Kummissjoni fuq il-bażi tal-Artikolu 2(6a) tar-Regolament bażiku f’dan il-każ kellha standards doppji. Skont il-GTĊ, il-Kummissjoni rrifjutat li taċċetta d-data tal-kostijiet tal-esportaturi Ċiniżi minħabba li kien hemm distorsjonijiet sinifikanti tas-suq fis-suq Ċiniż, iżda aċċettat id-data tal-pajjiż rappreżentattiv u użatha sabiex tissostitwixxi d-data tal-produtturi Ċiniżi mingħajr ebda evalwazzjoni dwar jekk jistax ikun hemm distorsjonijiet tas-suq li jaffettwaw din id-data li tiġi ssostitwita. Dan, skont il-GTĊ, huwa prova ta’ “standards doppji”. Il-GTĊ sostna li dan l-approċċ naqas milli jiggarantixxi l-affidabbiltà tal-kostijiet rilevanti fil-pajjiż rappreżentattiv magħżul. Barra minn hekk, kien impossibbli li verament jiġi rifless il-kost tal-produtturi fil-pajjiż tal-oriġini.

(275)

Barra minn hekk, il-GTĊ żied li skont il-GTĊ, kien hemm ukoll inizjattivi ta’ żvilupp fl-UE u fl-istati membri li huma simili għall-pjanijiet ta’ ħames snin taċ-Ċina, bħall-Istrateġija Industrijali l-Ġdida u l-Industrija Ġermaniża 4.0 eċċ. Skont sorsi uffiċjali, fis-suq intern tagħha fl-2017-2020, l-industrija tal-aluminju tal-UE bbenefikat minn aktar minn 200 miżura ta’ għajnuna mill-Istat varji, ipprovduti mill-Istati Membri tal-UE u awtorizzati mill-Kummissjoni.

(276)

Il-Kummissjoni fakkret li matul l-investigazzjoni l-Kummissjoni qieset jekk kienx hemm elementi fil-fajl li juru l-eżistenza ta’ kwalunkwe distorsjoni preżenti fil-pajjiżi rappreżentattivi, jiġifieri wkoll fir-rigward tal-materja prima ewlenija użata għall-produzzjoni tal-prodott ikkonċernat, pereżempju jekk humiex soġġetti għal restrizzjonijiet fuq l-esportazzjoni. Barra minn hekk, matul l-investigazzjoni hemm opportunità biżżejjed biex il-partijiet kollha jikkummentaw dwar l-adegwatezza tal-pajjiżi rappreżentattivi potenzjali kkunsidrati mill-Kummissjoni. B’mod partikolari, il-Kummissjoni tippubblika żewġ noti għall-fajl dwar l-adegwatezza tal-pajjiżi rappreżentattivi possibbli u għażla preliminari ta’ pajjiż xieraq għall-investigazzjoni. Dawn in-noti huma disponibbli għall-partijiet kollha għall-kummenti tagħhom. F’dan il-każ ukoll, il-GTĊ u l-partijiet l-oħrajn kollha kellhom il-possibbiltà li jagħtu prova li l-pajjiżi rappreżentattivi possibbli kkunsidrati kienu affettwati minn distorsjonijiet sinifikanti u, għalhekk, ma kinux adattati għall-investigazzjoni.

(277)

Il-Kummissjoni tinnota li skont l-Artikolu 2(6a)(b) tar-Regolament bażiku, l-impatt potenzjali ta’ wieħed jew aktar mill-elementi distortivi elenkati f’din id-dispożizzjoni jiġi analizzat fir-rigward tal-prezzijiet u tal-kostijiet fil-pajjiż esportatur. L-istruttura tal-kostijiet u l-mekkaniżmi għall-formazzjoni tal-prezzijiet fi swieq oħrajn, inklużi kwistjonijiet relatati ma’ appoġġ finanzjarju ġeneriku u mhux issostanzjat, bħall-appoġġ ġeneriku u mhux issostanzjat allegatament mogħti fl-UE, ma għandhom l-ebda rilevanza affattu fil-kuntest ta’ dan il-proċediment (anki jekk ikunu preżenti, quod non (46)). Għalhekk, din l-affermazzjoni kienet infondata u ġiet miċħuda.

(278)

Xiamen Xiashun issottomettiet numru ta’ kummenti fir-rigward tal-eżistenza ta’ distorsjonijiet sinifikanti.

(279)

L-ewwel nett, Xiamen Xiashun innotat fil-premessa (142) tar-Regolament provviżorju, li ssir referenza għal artiklu fuq l-internet li fih jingħad li Xiamen Xiashun tippromwovi b’mod attiv il-bini tal-partit u l-ħidma tat-trade unions. Xiamen Xiashun ikkummentat li dan l-artiklu jenħtieġ li jiġi interpretat b’tali mod li jfisser biss li Xiamen Xiashun qed tiffaċilita l-possibbiltà għall-ħaddiema tagħha fit-trade unions kemm jekk ikunu membri tal-partit kif ukoll jekk le sabiex iwettqu l-attivitajiet tagħhom fi ħdan il-kumpanija. Madankollu, Xiamen Xiashun enfasizzat li l-kliem “teħid ta’ deċiżjonijiet” ma jfissirx li l-membri tal-partit jew tat-trade unions għandhom xi jedd fuq il-ġestjoni u fuq il-governanza tal-kumpanija, jew fuq l-iffissar tal-ipprezzar tax-xirjiet ta’ materja prima jew tal-bejgħ ta’ prodotti. Bħala riżultat ta’ dan, jenħtieġ li ma tinħareġ l-ebda konklużjoni ta’ kontroll tal-gvern jew ta’ distorsjoni tas-suq fuq il-bażi ta’ dawn il-kliem.

(280)

Barra minn hekk, Xiamen Xiashun opponiet is-sejbiet magħmulin mill-Kummissjoni fil-premessa (142) tar-Regolament provviżorju, u spjegat li l-fatt li hemm membri tal-partit fil-kumpanija ma jfissirx li huma qed jikkontrollaw il-kumpanija. Xiamen Xiashun osservat li hija legalment obbligata tippermetti lill-membri tal-partit jorganizzaw attivitajiet ta’ bini tal-partit, iżda dan ma jfissirx li l-membri tal-partit għandhom xi influwenza fuq il-kumpanija. Hija żiedet li kull persuna tista’ tappartjeni għal reliġjon jew għal partit politiku tal-għażla tagħha u dan ma għandu l-ebda effett fuq it-teħid tad-deċiżjonijiet fil-kumpanija. Barra minn hekk, hija enfasizzat li l-fatt li hemm attivitajiet ta’ bini tal-partit organizzati fil-kumpanija ma jfissirx li hemm membri tas-CCP fost il-maniġment tal-kumpanija. Fl-aħħar nett, Xiamen Xiashun spjegat li t-traduzzjoni tal-Kummissjoni tal-“bini tal-partit” hija ħażina u li l-attivitajiet tal-membri tas-CCP fi ħdan il-kumpanija huma prinċipalment dawk relatati mal-istudju tal-politiki tal-gvern, billi jipprovdu l-opinjoni u l-pariri tagħhom lill-organizzazzjoni tal-partit tagħhom, jew xi drabi anki xi attivitajiet ta’ divertiment. Hija żiedet li ma kien hemm xejn uffiċjali li jindika li s-CCP qed jikkontrolla l-kumpaniji rispondenti. Xiamen Xiashun irrepetiet dawk il-kummenti wara l-iżvelar definittiv.

(281)

Il-Kummissjoni osservat li, l-ewwel nett, l-attivitajiet tal-kumitat tal-partit attiv f’Xiamen Xiashun huma deskritti b’mod ċar bħala ta’ “teħid ta’ deċiżjonijiet” fl-artiklu kkwotat fil-premessa (142) tar-Regolament provviżorju. L-artiklu ma janalizzax u lanqas ma jinterpreta fid-dettall x’jinvolvi dan it-“teħid ta’ deċiżjonijiet”. Madankollu, il-Kummissjoni tfakkar li skont l-ewwel u t-tieni inċiżi tal-Artikolu 2(6a), żewġ elementi li jindikaw l-eżistenza ta’ distorsjonijiet f’pajjiż huma: “is-suq inkwistjoni huwa servut f’miżura sinifikanti minn intrapriżi li joperaw taħt is-sjieda, kontroll jew superviżjoni politika jew gwida tal-awtoritajiet tal-pajjiż esportatur” u “[l-]preżenza tal-istat f’ditti li jippermettu lill-istat jinterferixxi fir-rigward tal-prezzijiet jew kostijiet”. L-involviment tal-kumitat tal-partit fit-“teħid ta’ deċiżjonijiet” f’Xiamen Xiashun jaqa’ taħt iż-żewġ kriterji. Ir-rekwiżit li l-preżenza tal-Istat fil-kumpanija tinterferixxi mal-prezzijiet u mal-kostijiet ma jfissirx li l-Istat jistabbilixxi direttament il-prezzijiet tal-oġġetti mibjugħin, iżda li, minflok, minħabba l-preżenza u l-involviment tal-membri tal-partit fil-kumpanija, il-kumpanija tista’ tistenna trattament u appoġġ aktar favorevoli mill-awtoritajiet, li indirettament ikollu impatt fuq il-kostijiet u fuq il-prezzijiet tagħha. Barra minn hekk, il-preżenza ta’ membri tal-Partit Komunista Ċiniż (“CCP”) fil-kumpanija u l-fatt li l-kumpanija tiffaċilita l-attivitajiet ta’ bini tal-partit u l-involviment tagħhom fit-“teħid ta’ deċiżjonijiet” huma indikatur ċar, u mhux konġettura kif ippreżentata minn Xiamen Xiashun wara l-iżvelar definittiv, li l-kumpanija ma hijiex indipendenti mill-Istat, u tista’ tkun qed taġixxi f’konformità mal-politika tas-CCP aktar milli mal-forzi tas-suq. Għalhekk, dan l-argument huwa miċħud.

(282)

Billi tabilħaqq kull impjegat għandu d-dritt li jappartjeni għar-reliġjon jew għall-partit politiku tal-għażla tiegħu, fiċ-Ċina s-sitwazzjoni hija differenti, peress li ċ-Ċina hija stat b’partit wieħed u s-CCP huwa ugwali għall-Istat u għall-gvern tiegħu (47). Għalhekk, il-preżenza ta’ membri tas-CCP f’kumpanija, li jorganizzaw attivitajiet regolari ta’ “bini tal-partit” u li għandhom drittijiet ta’ “teħid ta’ deċiżjonijiet”, kif diskuss fil-premessi (279) u (281) aktar ’il fuq, hija ugwali għal preżenza tal-istat fil-kumpanija. Fir-rigward tal-attivitajiet tal-kumitat tal-partit, il-Kummissjoni l-ewwel tixtieq tispjega li l-attivitajiet ta’ “bini tal-partit” jintużaw mill-Kummissjoni fis-sens ta’ “attivitajiet għat-tisħiħ tal-ispirtu tal-partit fil-kumpanija”, jew “l-iżvilupp ta’ attivitajiet relatati mal-partijiet sabiex tiġi żgurata tmexxija kumplessiva tal-partit” f’konformità mal-linji gwida uffiċjali (48). Il-Kummissjoni tfakkar li kif diġà ġie spjegat fil-premessa (281) aktar ’il fuq, il-kumitati tal-partit preżenti fil-kumpanija għandhom tal-anqas effett indirett, għalkemm tal-anqas potenzjalment distorsiv, minħabba l-interkonnessjoni mill-qrib bejn l-istat u l-partit CCP fiċ-Ċina.

(283)

It-tieni, Xiamen Xiashun ikkontestat il-konklużjoni tal-Kummissjoni fil-premessa (209) tar-Regolament provviżorju li l-entità Xiamen Xiashun hija soġġetta għal distorsjonijiet fil-pajjiż kollu b’rabta mal-manodopera. Xiamen Xiashun argumentat li l-pagi tagħha huma ogħla b’mod sinifikanti minn dawk tal-kompetituri tagħha. Barra minn hekk, Xiamen Xiashun osservat li l-oneru tal-provi mqiegħed fuq il-produtturi esportaturi sabiex jirribattu l-preżunzjoni de facto allegata tal-eżistenza ta’ “distorsjonijiet sinifikanti” tant sar tqil li huwa impossibbli sabiex kwalunkwe kumpanija individwali ġġarrbu. Xiamen Xiashun osservat li, fil-prattika, dan ifisser li: i) ma huwiex ċar għalkollox kif, u permezz ta’ liema evidenza, kumpanija individwali tista’ tirribatti l-preżunzjoni li l-elementi ta’ kost tagħha, bħall-kostijiet lavorattivi, huma distorti; u ii) anke jekk tiġi pprovduta evidenza fattwali speċifika li turi b’mod komparattiv differenzi sinifikanti fil-kostijiet bejn il-produtturi esportaturi, dan ma jwassalx lill-Kummissjoni sabiex tqajjem dubji dwar is-sejba prima facie tagħha fir-rigward tal-eżistenza ta’ “distorsjonijiet sinifikanti”.

(284)

Il-Kummissjoni fakkret li, kif instab fit-taqsima 3.3.1.7 tar-Regolament provviżorju, il-pagi fiċ-Ċina huma distorti, fost l-oħrajn minħabba r-restrizzjonijiet tal-mobilità minħabba r-restrizzjonijiet tas-sistema ta’ reġistrazzjoni tal-unitajiet domestiċi (hukou), kif ukoll minħabba n-nuqqas ta’ preżenza ta’ trade unions indipendenti u n-nuqqas ta’ negozjar kollettiv. Billi s-sejbiet tal-Kummissjoni fit-taqsima 3.3.1.7 jindikaw il-preżenza ta’ distorsjonijiet orizzontali u madwar il-pajjiż fis-suq tax-xogħol Ċiniż, is-serjetà ta’ dawk id-distorsjonijiet wasslet għall-konklużjoni li l-pagi fiċ-Ċina ma humiex affidabbli. Ma hemm l-ebda element fil-fajl li fuq il-bażi tiegħu jista’ jiġi stabbilit b’mod pożittiv li l-kostijiet tal-pagi domestiċi ta’ dan il-produttur esportatur ma kinux affettwati mid-distorsjonijiet fis-suq tax-xogħol. L-ewwel nett, dan il-produttur esportatur ma ppreżenta l-ebda evidenza ta’ kif dawn id-distorsjonijiet orizzontali ma jaffettwawx il-kostijiet lavorattivi tiegħu, pereżempju billi wera li l-persunal tiegħu ma kienx affettwat mis-sistema hukou, li kien hemm trade unions indipendenti u kien hemm negozjar kollettiv. Barra minn hekk, ma kien hemm l-ebda evidenza li l-pagi tiegħu kienu ogħla minn dawk tal-kompetituri tiegħu, peress li ma ssottomettiex data f’dan ir-rigward.

(285)

Wara l-iżvelar definittiv, Xiamen Xiashun issottomettiet li kienet argumentat li l-pagi tagħha kienu ogħla b’mod sinifikanti minn dawk tal-kompetituri tagħha. Il-kumpanija rreferiet għal dikjarazzjoni minn wieħed mill-verifikaturi tal-Kummissjoni matul l-RCC li fiha esprima is-sorpriża li l-pagi ta’ Xiamen Xiashun kienu għoljin. Dan wassal għal talba għal aktar informazzjoni dwar il-livelli tal-pagi, segwita mis-sottomissjoni ta’ informazzjoni minn Xiamen Xiashun għas-sodisfazzjon tal-verifikaturi. Għalhekk, skont il-kumpanija, il-Kummissjoni kellha d-data neċessarja kollha sabiex tiddetermina u tqabbel il-livelli tal-pagi ta’ Xiamen Xiashun. Il-Kummissjoni ttenni li l-livell attwali tal-pagi ta’ kull produttur esportatur li kkoopera huwa informazzjoni kunfidenzjali. Fi kwalunkwe każ, din l-affermazzjoni ma tbiddilx il-konklużjoni diġà ddikjarata fl-iżvelar definittiv li ċertu livell ta’ pagi meta mqabbla mal-pagi tal-kompetituri fl-istess negozju ma jindikax per se li d-distorsjonijiet orizzontali madwar il-pajjiż kollha preżenti fis-suq tax-xogħol fir-RPĊ ma jaffettwawx il-livell tal-pagi ta’ dan il-produttur esportatur. Fi kliem ieħor, anki jekk il-pagi għal dan il-produttur esportatur kienu ogħla minn dawk tal-kompetituri tiegħu, dan ma jfissirx li tali livell ta’ pagi ma huwiex affettwat mid-distorsjonijiet fis-suq tax-xogħol fir-RPĊ.

(286)

Fir-rigward tal-affermazzjoni li ma huwiex possibbli li l-produtturi esportaturi jirribattu preżunzjoni de facto allegata tal-eżistenza ta’ distorsjonijiet sinifikanti, imtennija wara l-iżvelar definittiv, il-Kummissjoni ma taqbilx ħafna ma’ din l-asserzjoni mhux issostanzjata. L-ewwel nett, ma teżisti l-ebda preżunzjoni de facto intenzjonata, minħabba li l-Kummissjoni f’kull investigazzjoni tivvaluta f’dettall kbir l-eżistenza ta’ distorsjonijiet sinifikanti li jaffettwaw il-prodott li qed jiġi investigat u l-produtturi esportaturi kkonċernati, filwaqt li tqis, b’mod ekwu, l-evidenza kollha disponibbli fil-fajl. Barra minn hekk, jekk ikun hemm affermazzjonijiet li d-distorsjonijiet orizzontali ma jaffettwawx ċerti kostijiet domestiċi skont it-tielet inċiż tal-Artikolu 2(6a)(a), il-Kummissjoni tanalizzahom bir-reqqa, kif juri b’mod ċar it-tul tal-analiżijiet f’din l-investigazzjoni u fl-investigazzjonijiet l-oħrajn kollha li jikkonċernaw ir-RPĊ. Jekk kien hemm evidenza fil-fajl li Xiamen Xiashun ma kinitx affettwata mid-distorsjonijiet madwar il-pajjiż kollu preżenti fis-suq tax-xogħol Ċiniż, il-Kummissjoni ċertament tuża l-kost lavorattiv tal-kumpanija stess f’konformità mat-tielet inċiż tal-Artikolu 2(6a)(a) tar-Regolament bażiku.

(287)

It-tielet, Xiamen Xiashun ikkummentat, u tenniet wara l-iżvelar definittiv, li l-fatt li l-Kummissjoni sistematikament tinjora l-kostijiet lavorattivi tal-produtturi esportaturi Ċiniżi, huwa prova li l-Artikolu 2(6a) tar-Regolament bażiku huwa inkompatibbli mal-Artikolu 2.2, mal-Artikolu 2.2.1.1. u mal-Artikolu 2.2.2. tal-Ftehim tad-WTO dwar l-Anti-Dumping (“ADA”). Dan minħabba li l-Artikolu 2(6a) tar-Regolament bażiku jipprevedi li l-kostijiet u l-prezzijiet għandhom jiġu injorati b’mod sistematiku, mingħajr ma jiġi eżaminat jekk il-kundizzjonijiet stabbiliti fl-Artikolu 2.2 tal-ADA humiex issodisfati.

(288)

Il-Kummissjoni tfakkar li f’kull investigazzjoni l-partijiet kollha jkollhom l-opportunità li jipprovdu evidenza dwar l-elementi rilevanti kollha, inkluża l-allegazzjoni li ċerti fatturi tal-produzzjoni ma humiex distorti, f’konformità mat-tielet inċiż tal-Artikolu 2(6a) tar-Regolament bażiku. Kif spjegat fil-premessi (284) u (286) aktar ’il fuq, il-Kummissjoni ma tirrifjutax b’mod sistematiku l-kostijiet lavorattivi tal-produtturi esportaturi Ċiniżi, iżda tanalizza d-data fid-dettall f’kull każ li fih parti tagħmel talba dwar in-nuqqas ta’ distorsjonijiet sabiex tivverifika jekk produttur esportatur jkunx qed jiġi affettwat mid-distorsjonijiet sinifikanti. L-istess approċċ japplika għall-kostijiet amministrattivi, tal-bejgħ u ġenerali u għall-profitti. Għalhekk, l-affermazzjoni ġiet miċħuda.

(289)

Ir-raba’, Xiamen Xiashun osservat li fil-premessa (198) tar-Regolament provviżorju, il-Kummissjoni indikat li Xiamen Xiashun irċeviet ċerti premjijiet jew rikonoxximenti formali, li jfisser li kienet meħtieġa tissodisfa r-rekwiżiti ta’ eliġibbiltà sabiex tirċevihom, fosthom li ssegwi l-linja uffiċjali tal-GTĊ u tikkonforma mal-istrateġiji u mal-politiki governattivi uffiċjali. Xiamen Xiashun enfasizzat li dawn ir-rikonoxximenti huma biss unuri li rċeviet il-kumpanija u, filwaqt li l-kumpanija kellha bżonn tissodisfa xi rekwiżiti, ma kinitx ikkontrollata mill-gvern. Xiamen Xiashun żiedet li ma kien hemm l-ebda evidenza uffiċjali li tindika li hija ngħatat struzzjonijiet mill-gvern sabiex tistabbilixxi prezz tax-xiri għall-materja prima jew il-prezz tal-bejgħ tal-prodott tagħha li jmur kontra l-kundizzjonijiet tas-suq. Wara l-iżvelar definittiv, Xiamen Xiashun iddikjarat li l-Kummissjoni ma tindikax b’liema mod Xiamen Xiashun segwiet strettament il-linja tal-gvern jew anki jekk ibbenifikatx minn appoġġ governattiv dirett jew indirett marbut ma’ dawn ir-rikonoxximenti. Mill-perspettiva ta’ Xiamen Xiashun, xejn fid-data sottomessa jew fil-verifika mill-uffiċjali tal-Kummissjoni ma jippermetti lill-Kummissjoni tikkonkludi li l-kumpanija kienet issegwi strettament il-linja tal-gvern jew kisbet xi benefiċċji relatati.

(290)

Kif diġà ġie spjegat mill-Kummissjoni fil-premessa (198) tar-Regolament provviżorju, il-premjijiet u t-titli miksubin minn Xiamen mhux biss jirrikonoxxu l-kisbiet ta’ din il-kumpanija, iżda wkoll jirrikjedu b’mod ċar li din tkun allinjata mal-politika uffiċjali tal-gvern. Kif muri mill-kwotazzjonijiet fil-premessa (198) tar-Regolament provviżorju, huma biss il-kumpaniji li jsegwu strettament il-linja tal-gvern li huma eliġibbli għall-premji miksubin minn Xiamen Xiashun, bħat-titlu Impriża Ewlenija ta’ Fujian. Wara l-iżvelar definittiv, Xiamen Xiashun ma pprovdiet l-ebda evidenza li tikkontradixxi dawn il-konklużjonijiet.

(291)

Il-ħames, Xiamen Xiashun ikkummentat li fil-premessa (205) tar-Regolament provviżorju, il-Kummissjoni indikat li Xiamen Xiashun stabbiliet impriża konġunta ma’ impriża tal-istat (“SOEs”), u kkonkludiet li kienet qed tikkoopera mill-qrib mal-Istat Ċiniż u li d-distorsjonijiet madwar il-pajjiż kollu jikkonċernaw ukoll lill-fornituri tagħha. Xiamen Xiashun iddikjarat li huwa komuni ħafna madwar id-dinja li l-kumpaniji privati jagħmlu negozju ma’ impriżi tal-istat jew ma’ aġenziji tal-gvern, u ma jfissirx li l-parti l-oħra hija mġiegħla ċċedi l-kontroll tan-negozju lill-gvern. Fil-każ ta’ Xiamen Xiashun, l-impriża konġunta mal-SOE titħaddem biss skont l-Istatut ta’ Assoċjazzjoni u d-Dritt tal-Kumpaniji taċ-Ċina. Xiamen Xiashun enfasizzat li ma kien hemm l-ebda evidenza uffiċjali li tissuġġerixxi li l-gvern qed jikkontrolla u jidderieġi l-iffissar tal-prezzijiet tal-prodotti, il-provvista u d-domanda tal-materja prima, kif ukoll l-operat ta’ kuljum tal-impriża konġunta.

(292)

Filwaqt li l-Kummissjoni taqbel li l-impriżi konġunti bejn l-impriżi privati u dawk tal-Istat huma komuni ħafna fid-dinja, ir-rwol tal-SOEs fiċ-Ċina huwa speċifiku ħafna, kif deskritt fit-Taqsima 3.3.1.3 tar-Regolament provviżorju. Illustrazzjoni pertinenti addizzjonali tal-effett distorsiv tal-SOEs fiċ-Ċina dwar il-prezzijiet u l-kostijiet hija l-kwotazzjoni minn artiklu ppubblikat fuq il-paġna uffiċjali tal-istat Ċiniż, li jgħid: “L-iżvilupp fuq skala kbira tal-impriżi tal-istat fit-teknoloġija ewlenija u fl-industriji strateġiċi bbenefika u appoġġa lill-impriżi privati f’ħafna aspetti, bħall-inklużività tal-prezzijiet, it-trasferiment tat-talenti, it-tixrid tat-teknoloġija, u s-salvataġġ kapitali.” (49) Il-“benefiċċju”, l-“appoġġ”, l-“inklużività tal-prezzijiet” u s-“salvataġġ kapitali” imsemmijin fl-artiklu jindikaw b’mod ċar effett distorsiv tal-kooperazzjoni bejn l-SOEs u l-impriżi privati fis-suq Ċiniż. Wara l-iżvelar definittiv, Xiamen Xiashun tenniet il-kummenti tagħha iżda ma pprovdiet l-ebda evidenza li tikkontradixxi l-konklużjonijiet tal-Kummissjoni.

(293)

Airoldi ssottomettiet kumment dwar ir-Rapport. Airoldi qalet li l-Artikolu 2(6a)(c) tar-Regolament bażiku stabbilixxa r-rekwiżit li d-dokument inkwistjoni jrid ikun rapport u jrid jiġi adottat b’mod formali mill-Kummissjoni Ewropea. Airoldi argumentat ukoll li r-rapport kellu jsir pubbliku u jkun aġġornat. Għalhekk, skont Airoldi, id-dokument li fuq il-bażi tiegħu saret din l-investigazzjoni u ppubblikat fuq is-sit web tad-DĠ TRADE, ma kienx aġġornat, u kien sempliċi dokument ta’ ħidma tal-persunal tal-Kummissjoni, nieqes mill-karatteristiċi formali u sostantivi sabiex jitqies bħala rapport formali tal-Kummissjoni Ewropea. Barra minn hekk, bħala kwistjoni tad-Dritt Istituzzjonali tal-UE, tali rapport kellu jiġi ppubblikat fil-lingwi uffiċjali kollha tal-Unjoni Ewropea f’Il-Ġurnal Uffiċjali tal-Unjoni Ewropea. Barra minn hekk, Airoldi talbet li d-DĠ TRADE jipprovdilha verżjoni Taljana ta’ dan id-dokument u l-ħarġa ta’ Il-Ġurnal Uffiċjali fejn ġie ppubblikat. Fl-istess ħin, Airoldi nnotat li r-rapport dwar iċ-Ċina kien ippubblikat fuq is-sit web tad-DĠ TRADE bil-lingwa Ingliża biss. Għalhekk, ir-rapport taċ-Ċina kien illegali u kellu jiġi injorat.

(294)

Airoldi kkwotat numru ta’ raġunijiet għaliex jenħtieġ li tingħata aċċess għar-Rapport bit-Taljan. L-ewwel, Airoldi ddikjarat li r-Regolament tal-Kunsill KEE Nru 1 tal-1958 li jiddetermina l-lingwi li għandhom jintużaw mill-Komunità Ekonomika Ewropea jagħti lill-kumpaniji u liċ-ċittadini Ewropej id-dritt li jiksbu kopja ta’ dan id-dokument jew li jaċċessawh fil-lingwi uffiċjali nazzjonali tagħhom li huma wkoll lingwi uffiċjali tal-Unjoni Ewropea. It-tieni, Airoldi argumentat li r-Rapport huwa marbut mal-Artikolu 2 tar-Regolament bażiku u huwa msemmi speċifikament fih. Għalhekk, huwa dokument li jimplimenta d-dispożizzjonijiet sostantivi ta’ dan l-Artikolu tar-Regolament bażiku u, għaldaqstant, jeħtieġ li jiġi ppubblikat fil-lingwi Uffiċjali kollha tal-Unjoni Ewropea. It-tielet, Airoldi ddikjarat li n-nuqqas ta’ verżjoni bil-lingwa Taljana tar-Rapport, li huwa l-biċċa l-kbira tal-evidenza f’dan il-każ, jikkostitwixxi ksur tar-Regolament Nru 1/1958 li jinqara flimkien mal-Artikoli 21, 22 u 41 tal-Karta tad-Drittijiet Fundamentali. Barra minn hekk, skont Airoldi, hija għandha d-dritt ta’ aċċess għar-Rapport bil-lingwa Taljana fuq il-bażi tad-dispożizzjonijiet legali li ġejjin: L-Artikolu 2 tat-Trattat dwar l-Unjoni Ewropea (TUE), fejn tingħata importanza kbira lir-rispett għad-drittijiet tal-bniedem u għan-nondiskriminazzjoni; L-Artikolu 3 tat-TUE li jiddikjara li l-UE “għandha tirrispetta r-rikkezza tad-diversità kulturali u lingwistika tagħha”; L-Artikolu 165(2) tat-Trattat dwar il-Funzjonament tal-Unjoni Ewropea (TFUE) li jenfasizza li “[l-]azzjoni tal-Unjoni għandha tkun immirata lejn [...] l-iżvilupp tad-dimensjoni Ewropea fl-edukazzjoni, partikolarment permezz tat-tagħlim u t-tixrid tal-lingwi ta' l-Istati Membri”, filwaqt li tiġi rrispettata bis-sħiħ id-diversità kulturali u lingwistika (l-Artikolu 165(1) tat-TFUE). Fl-aħħar nett, Airoldi argumentat li l-Karta tad-Drittijiet Fundamentali tal-UE tipprojbixxi d-diskriminazzjoni fuq il-bażi tal-lingwa (l-Artikolu 21) u tixħet obbligu fuq l-Unjoni li tirrispetta d-diversità lingwistika (l-Artikolu 22). L-ewwel regolament, li jmur lura għall-1958, li jiddetermina l-lingwi li għandhom jintużaw mill-eks-Komunità Ekonomika Ewropea, ġie emendat wara l-adeżjonijiet sussegwenti fl-UE, u jiddefinixxi l-lingwi uffiċjali tal-Unjoni, flimkien mal-Artikolu 55(1) tat-TUE.

(295)

Il-Kummissjoni nnotat li l-Artikolu 2(6a)(c) tar-Regolament bażiku ma jippreskrivix format speċifiku għar-rapporti dwar distorsjonijiet sinifikanti, u lanqas dik id-dispożizzjoni ma tiddefinixxi mezz għall-pubblikazzjoni. Il-Kummissjoni fakkret li r-rapport huwa dokument tekniku bbażat fuq il-fatti użat biss fil-kuntest tal-investigazzjonijiet tad-difiża tal-kummerċ. Għalhekk, ir-rapport jinħareġ b’mod xieraq bħala dokument ta’ ħidma tal-persunal tal-Kummissjoni peress li huwa purament deskrittiv u ma jesprimi l-ebda opinjoni, preferenza jew ġudizzju politiku. Dan ma jaffettwax il-kontenut tiegħu, jiġifieri s-sorsi oġġettivi ta’ informazzjoni dwar l-eżistenza ta’ distorsjonijiet sinifikanti fl-ekonomija Ċiniża rilevanti għall-fini tal-applikazzjoni tal-Artikolu 2(6a)(c) tar-Regolament bażiku.

(296)

Billi d-dispożizzjonijiet tal-Artikolu 2(6a)(c) ma jippreskrivux format speċifiku li fih jeħtieġ li jiġi ppubblikat rapport tal-pajjiż, u lanqas il-mezz ta’ pubblikazzjoni tiegħu, il-pubblikazzjoni tar-rapport taċ-Ċina bħala dokument ta’ ħidma tal-persunal, tip ta’ dokument li ma jeħtieġx traduzzjoni fil-lingwi Ewropej kollha, u lanqas il-pubblikazzjoni formali f’Il-Ġurnal Uffiċjali, hija konformi mar-regoli rilevanti. Fi kwalunkwe każ, il-Kummissjoni ma qablitx mal-argument li, f’dan il-każ, id-drittijiet tad-difiża ta’ Airoldi kienu affettwati meta ma rċevietx traduzzjoni Taljana tar-Rapport. Tabilħaqq, Airoldi kienet qajmet din il-kwistjoni biss fi stadju tard ħafna tal-investigazzjoni, u, sa dak l-istadju, kemm Airoldi kif ukoll l-avukati tagħha kienu użaw l-Ingliż b’suċċess, u fit-tul, kemm f’komunikazzjonijiet bil-miktub kif ukoll verbali. Il-Kummissjoni fakkret in-natura ta’ dak id-dokument, li ma huwiex Regolament ta’ implimentazzjoni, u kkonfermat il-pożizzjoni tagħha.

(297)

Fir-rigward tal-argument li r-Rapport kien skadut, il-Kummissjoni tfakkar li sa issa ma ġiet ipprovduta l-ebda evidenza li turi li r-rapport huwa skadut. Għall-kuntrarju, il-Kummissjoni nnotat b’mod partikolari li l-evidenza u d-dokumenti ta’ politika ewlenin li jinsabu fir-Rapport, inklużi l-pjanijiet rilevanti ta’ ħames snin u l-leġiżlazzjoni applikabbli għall-prodott li qed jiġi investigat kienu għadhom rilevanti matul il-PI, u li la Airoldi u lanqas il-partijiet l-oħrajn ma taw prova li dan ma kienx għadu l-każ.

(298)

Fir-Regolament provviżorju, il-Kummissjoni għażlet lit-Turkija bħala l-pajjiż rappreżentattiv f’konformità mal-Artikolu 2(6a) tar-Regolament bażiku. Id-dettalji dwar il-metodoloġija użata għall-għażla ġew stabbiliti fl-Ewwel u fit-Tieni nota magħmulin disponibbli għall-partijiet fil-fajl miftuħ fil-5 ta’ Ottubru 2020 u fil-25 ta’ Novembru 2020 (“l-Ewwel Nota” u “it-Tieni Nota”), u fil-premessi (225) sa (267) tar-Regolament provviżorju.

(299)

Airoldi qieset li nkisru d-drittijiet tad-difiża tagħha. Fil-fehma tagħha, l-informazzjoni pprovduta mill-Kummissjoni fl-istadju proviżorju ma kinitx tippermetti lill-partijiet jifhmu liema data, konklużjoni u metodoloġija ġew estrapolati mill-investigazzjoni dwar l-estrużjonijiet tal-aluminju, u f’liema stadju tal-proċedura din saret.

(300)

Il-Kummissjoni ma qablitx. Kif deskritt fil-premessa (226) tar-Regolament provviżorju, il-metodoloġija għall-għażla tal-pajjiż rappreżentattiv ġiet spjegata fid-dettall fl-Ewwel u fit-Tieni Nota magħmulin disponibbli għall-partijiet interessati kollha. Barra minn hekk, il-Kummissjoni kienet spjegat ir-raġunijiet għall-għażla tat-Turkija bħala l-pajjiż xieraq, u liema parametri referenzjarji ntużaw sabiex jinbena l-valur normali fil-premessi minn (225) sa (267) tar-Regolament provviżorju. Għalhekk, il-Kummissjoni qieset li l-informazzjoni pprovduta lill-partijiet ippermettiet lill-partijiet jifhmu d-dettall kollu inkluż dwar liema data, konklużjoni u metodoloġija ġew estrapolati mill-investigazzjoni dwar l-estrużjonijiet tal-aluminju. Għalhekk, hija ċaħdet din l-affermazzjoni.

(301)

Wara l-iżvelar definittiv, Airoldi żiedet li r-relazzjoni bejn iż-żewġ investigazzjonijiet (dik kurrenti u dik dwar l-estrużjonijiet tal-aluminju) kienet is-suġġett ta’ sejbiet speċifiċi tal-Uffiċjal tas-Seduta li ċċaraw bil-miktub li d-data ta’ investigazzjoni waħda ma tistax titqabbel u tintuża f’investigazzjoni oħra. Għalhekk, l-użu tad-data dwar l-estrużjonijiet tal-aluminju kiser l-aspettattivi leġittimi ta’ Airoldi u d-drittijiet tad-difiża tagħha. Fuq din il-bażi, Airoldi talbet li jenħtieġ li d-data mill-investigazzjoni dwar l-estrużjonijiet tal-aluminju ma tiġix invokata fl-investigazzjoni attwali dwar il-prodotti tal-aluminju llaminati ċatti. Airoldi talbet ukoll żvelar addizzjonali tal-metodoloġija ta’ kif id-data ġiet “importata” mill-investigazzjoni dwar l-estrużjonijiet tal-aluminju.

(302)

Il-Kummissjoni nnotat li r-rapport tal-Uffiċjal tas-Seduta semma li ż-“żewġ investigazzjonijiet ma jaħdmux b’mod parallel” u “ma tista’ tinħareġ l-ebda linja parallela bejn iż-żewġ każijiet”. Dan irrefera għall-fatt li l-investigazzjoni dwar l-estrużjonijiet tal-aluminju kienet bdiet diversi xhur qabel. Dan kien ifisser li l-iżvelar finali tat-22 ta’ Diċembru 2020 seħħ qabel il-ftehim bejn l-UE u r-Renju Unit. Għaldaqstant, l-analiżi provviżorja tad-dannu fil-każ tal-estrużjonijiet tal-aluminju kienet ibbażata fuq data tal-EU28, filwaqt li l-investigazzjoni dwar prodotti tal-aluminju llaminati ċatti kienet ibbażata biss fuq data tal-EU27 sa mill-bidu tagħha. Għalhekk, l-Uffiċjal tas-Seduta ma ħa l-ebda pożizzjoni li qatt ma tista’ tintuża data minn każ wieħed f’każ ieħor.

(303)

Il-Kummissjoni nnotat ukoll li d-data mill-proċediment tal-estrużjonijiet tal-aluminju użata wkoll f’dan il-proċediment kienet tikkonċerna esklussivament il-livell ta’ profitt u l-SG&A tal-produtturi tal-estrużjonijiet tal-aluminju fil-pajjiż rappreżentattiv magħżul fiż-żewġ proċedimenti, jiġifieri t-Turkija. Din id-data hija skont id-definizzjoni “disponibbli fil-pront” skont it-tifsira tal-Artikolu 2(6a)(a) tar-Regolament bażiku, jiġifieri, disponibbli fid-dominju pubbliku, aktar milli data speċifika riċevuta skont it-tifsira tal-Artikolu 19(6) tar-Regolament bażiku. Barra minn hekk, għall-iżvelar definittiv, il-Kummissjoni kompliet tivverifika u aġġornat id-data disponibbli għall-produtturi tal-estrużjoni tal-aluminju fil-pajjiż rappreżentattiv sabiex tiżgura li dawn kienu jikkoinċidu l-aktar mill-qrib mal-perjodu ta’ investigazzjoni ta’ dan il-proċediment.

(304)

Il-Kummissjoni spjegat fid-dettall fir-Regolament provviżorju li fin-nuqqas ta’ data disponibbli fil-pront mill-produtturi tal-prodott ikkonċernat fil-pajjiż rappreżentattiv, jiġifieri t-Turkija, il-Kummissjoni kienet intitolata li tiddependi fuq data minn settur li huwa simili mill-qrib u li għalih kienet disponibbli informazzjoni dwar l-SG&A u l-profitt. Barra minn hekk, għall-kuntrarju tal-asserzjoni ta’ Airoldi, kif spjegat fil-premessa (300), il-Kummissjoni pprovdiet spjegazzjoni dettaljata dwar il-metodoloġija tagħha għall-“importazzjoni” u għall-proċessar tad-data rilevanti fl-Ewwel u fit-Tieni Noti għall-fajl, kif ukoll fir-regolament provviżorju. Il-livell ta’ dettall u ta’ informazzjoni ppermetta lill-partijiet kollha jifhmu r-raġunijiet sottostanti li wasslu għall-konklużjoni li d-data dwar l-SG&A u l-profitt tal-kumpaniji fis-settur tal-estrużjonijiet tal-aluminju kienet l-aktar parametru referenzjarju xieraq fiċ-ċirkostanzi partikolari. Il-Kummissjoni qieset li ma kien meħtieġ l-ebda żvelar addizzjonali u, għalhekk, ċaħdet l-affermazzjoni.

(305)

Airoldi affermat ukoll li l-Kummissjoni żbaljat fl-għażla tat-Turkija bħala pajjiż rappreżentattiv xieraq. Fil-fehma tagħha, il-fatt li t-Turkija hija parti minn Unjoni Doganali mal-Unjoni Ewropea influwenza l-valutazzjoni tad-dumping li għandha titwettaq skont ir-Regolament bażiku. Airoldi qieset ukoll li t-Turkija ma kinitx tissodisfa l-istandards tal-protezzjoni soċjali u ambjentali.

(306)

Instab li t-Turkija hija l-aktar pajjiż rappreżentattiv xieraq fuq il-bażi tad-disponibbiltà u tal-kwalità tad-data. Il-fatt li kien hemm Unjoni Doganali mat-Turkija ma kienx jimmina l-adegwatezza tat-Turkija bħala pajjiż rappreżentattiv għall-fini li jiġu stabbiliti prezzijiet u kostijiet mingħajr distorsjoni. Fid-dawl tas-sejbiet tal-Kummissjoni fil-premessi minn (229) sa (243) tar-Regolament provviżorju, u fin-nuqqas ta’ kull affermazzjoni li tinvalida dik is-sejba, ma kinitx iġġustifikata analiżi tal-istandards tal-protezzjoni soċjali u ambjentali.

(307)

Wara l-iżvelar provviżorju, Xiamen Xiashun, Nanshan Group u Airoldi kkontestaw l-għażla tal-Kummissjoni li tuża d-data tal-kumpaniji li jipproduċu estrużjonijiet tal-aluminju bħala l-parametru referenzjarju għall-kostijiet tal-bejgħ, ġenerali u amministrattivi (“SG&A”) u għall-profitt. Fil-fehma tagħhom, l-estrużjonijiet tal-aluminju ma kinux simili għall-AFRPs u kien hemm differenzi sostanzjali bejn iż-żewġ prodotti f’termini tal-użu, tal-kost tal-produzzjoni u tal-fatturi tal-produzzjoni tagħhom. Xiamen Xiashun argumentat ukoll li d-differenzi influwenzaw il-profitt u l-SG&A tal-kumpaniji, u għalhekk, jenħtieġ li ma jintużawx il-profitt u l-SG&A tal-kumpaniji li jipproduċu l-estrużjonijiet tal-aluminju sabiex jiġi ddeterminat il-valur normali. Nanshan Group u Xiamen Xiashun tennew l-istess affermazzjoni wara l-iżvelar definittiv. B’mod partikolari, Xiamen Xiashun ikkwotat Regolament tal-Kummissjoni li fih il-Kummissjoni bbażat il-valutazzjoni tagħha tas-settur simili fuq similaritajiet fil-proċess tal-produzzjoni, fil-fatturi tal-produzzjoni, u fil-kostijiet tal-produzzjoni (50). Hija argumentat ukoll li l-fatt li ż-żewġ prodotti kienu prodotti mill-istess kumpaniji ma kienx rilevanti.

(308)

Fin-nuqqas ta’ data li turi livell raġonevoli ta’ SG&A u ta’ profitti tal-produtturi tal-prodott ikkonċernat f’pajjiż/i rappreżentattiv(i) potenzjali skont l-Artikolu 2(6a)(a), l-aħħar subparagrafu tar-Regolament bażiku, il-Kummissjoni tista’, jekk ikun neċessarju, tikkunsidra wkoll il-produtturi li jimmanifatturaw prodott fl-istess kategorija ġenerali u/jew settur tal-prodott li qed jiġi investigat. F’dawn is-sitwazzjonijiet, għalkemm ċerti karatteristiċi, użi finali, proċessi tal-produzzjoni u kostijiet tal-produzzjoni jistgħu ma jkunux identiċi, dawn l-aspetti jridu jitqiesu b’mod ġenerali sabiex jiġi ddeterminat jekk prodott jew settur jaqax fl-istess kategorija ġenerali u/jew settur tal-prodott li qed jiġi investigat. Il-każ dwar l-alkoħols tal-polivinil imsemmi minn dawn il-partijiet jikkonferma li f’dak il-każ li l-Kummissjoni wiżnet ukoll l-elementi rilevanti kollha relatati mal-prodott ikkonċernat u l-eqreb prodotti upstream u downstream, u għażlet l-eqreb prodott fuq din il-bażi. Fi kwalunkwe każ, il-Kummissjoni fakkret li l-Artikolu 2(6a)(a) sempliċiment jirrikjedi li l-Kummissjoni tistabbilixxi l-kostijiet korrispondenti tal-produzzjoni u tal-bejgħ, kif ukoll livell raġonevoli ta’ SG&A u ta’ profitti, f’pajjiż rappreżentattiv xieraq, mingħajr ma jobbliga l-użu ta’ kumpaniji li jipproduċu eżattament l-istess prodott bħall-prodott ikkonċernat.

(309)

Il-Kummissjoni qieset li għalkemm ippreżentat f’forom differenti, u minkejja differenzi oħrajn indikati minn Xiamen Xiaschun, il-prodotti tal-aluminju llaminati ċatti u l-estrużjonijiet tal-aluminju huma prodotti bl-istess materja prima bażika, l-aluminju. Barra minn hekk, l-estrużjonijiet, flimkien mal-prodotti llaminati ċatti tal-aluminju, huma kkunsidrati bħala prodotti tal-aluminju nofshom lesti, u b’hekk jappartjenu għall-istess kategorija ġenerali ta’ prodotti. Barra minn hekk, kif spjegat fil-premessa (239) tar-Regolament provviżorju, kemm l-estrużjonijiet tal-aluminju kif ukoll il-prodotti llaminati ċatti kienu f’xi każijiet immanifatturati fl-istess kumpanija, jew fl-istess grupp. Dan huwa l-każ, pereżempju, ta’ wieħed mill-produtturi esportaturi inklużi fil-kampjun, Nanshan Group.

(310)

Barra minn hekk, kemm l-estrużjonijiet tal-aluminju kif ukoll il-prodotti tal-aluminju llaminati ċatti jaqgħu taħt l-istess kategorija ġenerali “manifattura ta’ metalli bażiċi” u huma kklassifikati taħt l-istess kodiċi NACE (kodiċi NACE 24), kategorija ta’ prodotti li tinkludi, taħt il-kodiċijiet 24.42 u 24.53, kemm prodotti llaminati ċatti kif ukoll prodotti estrużi (51). Din il-kategorija ntużat ukoll sabiex jiġi stabbilit parametru referenzjarju għall-kostijiet lavorattivi (ara l-premessa (260) tar-Regolament provviżorju).

(311)

Aktar importanti minn hekk, filwaqt li kkritikaw l-għażla tal-estrużjonijiet tal-aluminju, il-produtturi esportaturi naqsu milli jipproponu kwalunkwe prodott u/jew settur alternattiv li huwa l-aktar simili għall-produtturi tal-AFRPs b’data finanzjarja disponibbli u bi profitt raġonevoli minn pajjiż/i rappreżentattiv(i) xieraq/xierqa. Fil-fehma tal-Kummissjoni, il-kumpaniji użati f’din l-investigazzjoni kienu rappreżentattivi ta’ grupp usa’ ta’ prodotti tal-aluminju b’rabtiet ċari mal-prodott ikkonċernat, inklużi prodotti llaminati. Kif spjegat fil-premessa (310), il-kumpaniji kkunsidrati bħala xierqa fil-kuntest tal-Artikolu 2(6a)(a) tar-Regolament bażiku spiss kienu jipproduċu aktar minn prodott wieħed. F’dan il-każ, id-data finanzjarja tal-produtturi tal-estrużjonijiet identifikati kienet disponibbli biss f’livell aggregat. Għalhekk, id-data finanzjarja disponibbli għall-kumpaniji tal-estrużjonijiet tal-aluminju hija rappreżentattiva b’mod strett mhux biss tas-sitwazzjoni fis-suq tal-estrużjonijiet, iżda wkoll f’dak li jirrigwarda s-suq għal grupp ta’ prodotti usa’, inklużi prodotti llaminati. Għalhekk, il-Kummissjoni ċaħdet dawn l-affermazzjonijiet u sostniet li d-data dwar l-SG&A u l-profitt tal-kumpaniji fis-settur tal-estrużjonijiet tal-aluminju kienet tikkostitwixxi parametru referenzjarju xieraq.

(312)

Il-Kummissjoni stabbiliet id-dettalji dwar is-sorsi użati sabiex jiġi stabbilit il-valur normali fil-premessi (244) sa (267) tar-Regolament provviżorju. Wara l-pubblikazzjoni tar-Regolament provviżorju, diversi partijiet għamlu affermazzjonijiet dwar is-sorsi differenti użati sabiex jiġi ddeterminat il-valur normali.

(313)

Jiangsu Alcha sostniet li sabiex jiġi stabbilit il-valur normali ta’ wieħed mill-fatturi tal-produzzjoni tagħha, il-wajer tal-aluminju, il-Kummissjoni kienet użat il-valur normali tal-wajers tal-karbonju tat-titanju li kien aktar għali.

(314)

Il-Kummissjoni fakkret li l-kodiċi SA għal dan il-fattur ta’ produzzjoni (HS 7605) ġie pprovdut mill-kumpanija nnifisha. Hija nnotat ukoll li d-deskrizzjoni korrispondenti tal-kodiċi SA fl-estratt mill-bażi ta’ data tal-GTA żvelata lill-partijiet flimkien man-Nota tal-5 ta’ Ottubru 2020 irreferiet għall-wajer tal-karbonju tat-titanju. Madankollu, skont in-Nomenklatura Magħquda (52), il-kodiċi SA kien jikkorrispondi għall-wajer tal-aluminju, jew għal wajer li, fih, l-aluminju huwa l-komponent li jiddefinixxi. Għalhekk, il-Kummissjoni kkonkludiet li minkejja d-deskrizzjoni mhux akkurata tal-kodiċi fil-bażi ta’ data tal-GTA, il-kodiċi SA u l-valur surrogat korrispondenti li ntuża sabiex jinbena l-valur normali għal Jiangsu Alcha kienu relatati mal-wajer tal-aluminju u, għalhekk, kienu korretti.

(315)

Nanshan Group qies li l-approċċ tal-Kummissjoni li tuża l-bażi ta’ data tal-GTA ma kienx xieraq, peress li valuri surrogati aktar preċiżi kienu disponibbli għall-pubbliku. Huwa qies li f’konformità mal-Artikolu 2(6a) tar-Regolament bażiku, jenħtieġ li l-Kummissjoni tuża bħala valuri surrogati “[l-]prezzijiet, il-kostijiet, jew il-valuri ta' riferiment internazzjonali mingħajr distorsjoni”. Nanshan Group ikkontesta b’mod partikolari l-valuri tal-GTA għall-faħam bituminuż, għat-trab tal-alumina, għall-kojl illaminat bis-sħana u bil-kesħa u għall-pjanċa llaminata bis-sħana. Huwa ssuġġerixxa li jintużaw prezzijiet referenzjarji alternattivi bbażati fuq ir-rapport tal-IHS dwar il-faħam bituminuż (53) (għall-faħam bituminuż), fuq il-prezzijiet tas-saldu tal-alumina ta’ LME (54) (għat-trab tal-alumina), u fuq ir-rapport ta’ CRU (għall-kojl u għall-pjanċa llaminati bil-kesħa/bis-sħana).

(316)

Bi tweġiba għall-kummenti li saru minn Nanshan Group, l-ilmentatur oppona li juża l-prezzijiet referenzjarji alternattivi ssuġġeriti minn Nanshan Group. Huwa sab li, għall-kuntrarju tal-prezzijiet fil-GTA, is-sorsi ssuġġeriti minn Nanshan Group ma kinux jirriflettu dak li produttur fit-Turkija fil-fatt iħallas għall-fattur tal-produzzjoni. Fil-fehma tiegħu, id-data fit-tliet sorsi kienet markaturi (fil-każ tar-rapport tal-HIS dwar il-faħam bituminuż), indiċijiet (fil-każ tal-prezzijiet ta’ LME) jew prezzijiet referenzjarji (fil-każ tar-rapport ta’ CRU) li jirriflettu d-dinamika tas-suq. Barra minn hekk, dawn il-markaturi, l-indiċijiet jew il-prezzijiet ma kinux jinkludu primjums differenti li l-partijiet jistgħu jżidu b’mod supplimentari għal dawn il-prezzijiet.

(317)

Fir-rigward tal-faħam bituminuż, Nanshan tenniet li l-kwantità importata fil-GTA ġiet minn żewġ pajjiżi biss. Għalhekk, il-materjal tad-data kien negliġibbli u ma ppermettiex id-determinazzjoni tal-kontenut kaloriku tal-faħam. Fil-fehma tiegħu, il-Kummissjoni missha użat id-data mir-rapport tal-IHS dwar il-faħam bituminuż. Nanshan Group għamel l-istess affermazzjoni wara l-iżvelar tas-sejbiet definittivi.

(318)

Il-Kummissjoni sostniet li ma kien hemm l-ebda evidenza konvinċenti sabiex jiġi kkunsidrat li l-prezz fil-bażi ta’ data tal-GTA ma kienx rappreżentattiv ta’ prezz tas-suq jew tat-tip partikolari ta’ faħam, jew li l-prezz fil-bażi ta’ data kien ikun sostanzjalment differenti li kieku l-volum tal-importazzjonijiet kien ogħla. Għalhekk, il-Kummissjoni kkonfermat is-sejbiet tagħha fil-premessi (258) u (259) tar-Regolament provviżorju li l-prezz tal-importazzjonijiet tal-faħam għat-Turkija fuq il-bażi tal-bażi ta’ data tal-GTA kien prezz referenzjarju xieraq għall-faħam bituminuż.

(319)

Fir-rigward tat-trab tal-alumina, Nanshan Group qies li l-bażi ta’ data tal-GTA kienet tinkludi prinċipalment importazzjonijiet ta’ alumina mhux metallurġika peress li kienet importata fit-Turkija minn pajjiżi li ma humiex il-produtturi tal-alumina metallurġika (55). Fil-fehma tiegħu, il-prezzijiet bejn it-tipi differenti ta’ alumina varjaw b’mod sinifikanti u t-tip ta’ alumina rrapportat fil-GTA rriżulta f’valur surrogat għoli b’mod anormali. Minflok, Nanshan Group ippropona li jintuża l-prezz tas-saldu tal-alumina ta’ LME.

(320)

Il-Kummissjoni analizzat l-affermazzjoni u sabet li din kienet iġġustifikata. Fid-dawl tar-raġunijiet ippreżentati minn Nanshan Group, il-Kummissjoni qieset li l-prezz tat-trab tal-alumina importat fit-Turkija ma kienx rappreżentattiv tal-fattur tal-produzzjoni użat minn Nanshan Group.

(321)

Madankollu, l-evidenza fil-fajl u l-informazzjoni sottomessi mill-partijiet ma ppermettietx lill-Kummissjoni tikkonkludi li l-prezzijiet ta’ LME fil-fatt kienu jirrappreżentaw prezz tas-suq mingħajr distorsjoni. Skont Nanshan Group, il-prezz ta’ LME kien jirrifletti l-valur tas-suq tat-trab tal-alumina filwaqt li l-ilmentatur qies li dawn il-prezzijiet kienu biss indiċijiet li magħhom il-partijiet iżidu primjums differenti. Għalhekk, minkejja li l-LME ġeneralment ma tiġix skartata bħala sors sabiex jiġi stabbilit parametru referenzjarju xieraq, il-Kummissjoni ddeċidiet, fid-dawl tad-dubji speċifiċi tal-każ deskritti fil-premessa (317), li tiddetermina l-parametru referenzjarju tat-trab tal-alumina fuq il-bażi tal-valur referenzjarju tal-likwidu tal-aluminju, billi tnaqqas il-kostijiet tal-proċessar effettivament imġarrbin minn Nanshan. Fi kwalunkwe każ, ma kienx hemm differenza sinifikanti fil-valur bejn il-valur użat u l-prezz ta’ LME.

(322)

Nanshan Group tenna wkoll il-kumment tiegħu dwar l-użu ta’ parametri referenzjarji għall-kojl illaminat bil-kesħa, għall-kojl illaminat bis-sħana, u għall-pjanċa llaminata bis-sħana. Fil-fehma tiegħu, l-importazzjonijiet fit-Turkija ta’ dawn il-prodotti kienu jinkludu prodotti użati għal partijiet tal-inġenji tal-ajru u għall-industrija tal-karozzi, esklużi mill-ambitu tal-prodott. Għalhekk, fil-fehma tiegħu, il-valuri referenzjarji li rriżultaw kienu għoljin b’mod mhux raġonevoli. Bħala alternattiva, Nanshan Group ippropona li juża l-prezzijiet fis-suq tal-Unjoni għal ftit pajjiżi tal-Unjoni indikati fir-rapport ta’ CRU. It-Turkija importat kwantitajiet sinifikanti tal-prodotti llaminati mill-Unjoni, u għalhekk, il-prezzijiet fit-Turkija fil-fehma tagħha kienu influwenzati ħafna mill-prezzijiet applikati fl-Unjoni. B’riżultat ta’ dan, il-prezzijiet domestiċi Torok kienu konsistenti mal-prezzijiet tal-Unjoni u l-prezzijiet fir-rapport ta’ CRU fil-fehma tiegħu jkunu parametru referenzjarju rappreżentattiv li jista’ jintuża sabiex jinbena l-valur normali.

(323)

Il-Kummissjoni aċċettat l-affermazzjoni li l-prezzijiet fl-Unjoni jkunu jikkostitwixxu parametru referenzjarju xieraq għal dawn il-fatturi speċifiċi tal-produzzjoni f’dan il-każ. Madankollu, hija qieset li ma setgħetx tuża l-valuri indikati fir-rapport ta’ CRU. Il-kategoriji tal-prodotti użati fir-rapport ma kinux speċifikati b’mod ċar u r-rapport ma deherx li kien fih prezzijiet relatati ma’ kojls illaminati bis-sħana. Il-Kummissjoni kienet nieqsa wkoll minn informazzjoni dwar jekk u liema primjums il-partijiet iżidu ma’ dawn il-prezzijiet. Għal din ir-raġuni, il-Kummissjoni ddeċidiet li, minflok, tiddependi fuq id-data attwali u vverifikata dwar il-prezzijiet tal-bejgħ għall-kojls illaminati bis-sħana, għall-kojls illaminati bil-kesħa u għall-pjanċi llaminati bis-sħana li kienet irċeviet mingħand il-produtturi tal-Unjoni inklużi fil-kampjun f’din l-investigazzjoni. Din id-data kienet tikkostitwixxi data rappreżentattiva u akkurata ħafna relatata mal-bejgħ ta’ dawn il-prodotti matul il-PI fl-Unjoni. Għalhekk, il-Kummissjoni stabbiliet il-parametru referenzjarju rilevanti fuq il-bażi tal-prezzijiet ivverifikati tal-industrija tal-Unjoni fil-livell mill-fabbrika għal kull wieħed minn dawn il-fatturi ta’ produzzjoni.

(324)

Wara l-iżvelar finali, Nanshan Group tenna li l-Kummissjoni setgħet tuża l-prezzijiet fir-rapport ta’ CRU direttament, peress li dawn kienu jikkostitwixxu prezzijiet ta’ tranżazzjonijiet attwali, li jinkludu primjums. Huwa argumenta li r-rapport semma l-prezz tal-materja prima għall-produzzjoni tal-kojls illaminati bil-kesħa. Peress li l-materja prima għall-produzzjoni tal-kojl illaminat bil-kesħa kienet il-kojl illaminat bis-sħana, il-Kummissjoni missha ħadet dan il-prezz tal-materja prima bħala l-valur referenzjarju għall-kojl illaminat bis-sħana. Barra minn hekk, fil-fehma tiegħu, ir-rapport bħala tali kien jikkostitwixxi sors affidabbli ta’ informazzjoni peress li saret referenza għalih f’ġurisdizzjonijiet oħrajn, b’mod partikolari fl-Istati Uniti.

(325)

Il-Kummissjoni fakkret li hija ma ċaħditx l-użu tar-rapport ta’ CRU per se u li aċċettat ukoll l-affermazzjoni li l-prezzijiet tal-Unjoni kienu jikkostitwixxu parametru referenzjarju rappreżentattiv. Madankollu, il-Kummissjoni kellha għad-dispożizzjoni tagħha d-data attwali u vverifikata dwar il-prezzijiet tal-bejgħ għat-tliet kategoriji tal-fatturi ta’ produzzjoni (kojls illaminati bis-sħana, kojls illaminati bil-kesħa u pjanċi llaminati bis-sħana) Li kienet tikkostitwixxi data rappreżentattiva u akkurata relatata mal-bejgħ ta’ dawn il-prodotti matul il-PI fl-Unjoni. Għalhekk, l-użu ta’ din id-data kien jikkostitwixxi, fil-fehma tiegħu, parametru referenzjarju aktar xieraq mill-użu tal-prezzijiet imsemmijin fir-rapport ta’ CRU.

(326)

Il-Kummissjoni ma qablitx ukoll li l-prezzijiet tal-kojls illaminati bis-sħana jkunu direttament disponibbli mir-rapport. Ir-rapport irrefera biss għall-materja prima għall-kojls illaminati bil-kesħa, mingħajr ma speċifika liema stadju tal-proċess tal-produzzjoni u x’materja prima kien jirreferi għaliha (56). Għalhekk, il-Kummissjoni qieset li l-użu bħala parametru referenzjarju ta’ prezzijiet ivverifikati tal-industrija tal-Unjoni fil-livell mill-fabbrika għal kull wieħed minn dawn il-fatturi ta’ produzzjoni kien aktar preċiż, peress li l-prezz li għandu jintuża bħala l-parametru referenzjarju kien relatat b’mod ċar mal-fattur korrett ta’ produzzjoni. Għalhekk, hija ċaħdet din l-affermazzjoni.

(327)

Nanshan Group lanqas ma qabel mal-parametru referenzjarju għar-ruttam. Fil-fehma tiegħu, jenħtieġ li l-prezz referenzjarju tar-ruttam jiġi ddeterminat billi bħala bażi jintuża l-parametru referenzjarju għall-ingotti tal-aluminju. Il-Grupp tenna l-istess affermazzjoni wara l-iżvelar definittiv.

(328)

Fir-Regolament provviżorju, il-Kummissjoni spjegat il-metodoloġija tagħha u għaliex iddeċidiet li tuża l-valur referenzjarju mill-bażi ta’ data tal-GTA minflok ma użat il-valur referenzjarju għall-ingotti tal-aluminju. Billi Nanshan Group ma pprovda l-ebda evidenza ġdida dwar għaliex il-Kummissjoni ma setgħetx tuża l-valur fil-bażi ta’ data tal-GTA, il-Kummissjoni ċaħdet l-affermazzjoni u sostniet is-sejbiet tagħha kif imsemmijin fil-premessi minn (254) sa (255) tar-Regolament provviżorju.

(329)

Nanshan Group u Xiamen Xiashun argumentaw ukoll li fir-Regolament provviżorju, il-Kummissjoni qieset b’mod espliċitu li l-prezz ta’ materja prima ewlenija waħda minn fost oħrajn, l-ingotti tal-aluminju, instab li kien mingħajr distorsjoni għall-finijiet tal-Artikolu 7(2a) tar-Regolament bażiku, u li dan semma li l-prezz tax-xiri għall-ingotti mħallas mill-produtturi esportaturi inklużi fil-kampjun “ma kienx ferm inqas mill-prezz ta’ riferiment internazzjonali rappreżentattiv”  (57). Għalhekk, fil-fehma tagħhom, il-Kummissjoni missha użat il-prezz attwali mħallas mill-produttur esportatur għall-ingotti minflok ma użat valur (referenzjarju) surrogat.

(330)

Il-Kummissjoni fakkret li l-kalkolu tal-valur normali u l-valutazzjoni relatata mal-applikazzjoni tar-regola tad-dazju inferjuri kienu analiżijiet differenti bbażati fuq Artikoli differenti tar-Regolament bażiku. Il-valur normali ġie ddeterminat f’konformità mal-Artikolu 2(6)(a) tar-Regolament bażiku. F’konformità ma’ dan l-Artikolu, il-Kummissjoni sabet li s-settur tal-aluminju fir-RPĊ kien affettwat minn distorsjonijiet sinifikanti (il-premessi (223) sa (224) tar-Regolament provviżorju), u għalhekk, il-valur normali kellu jinbena fuq il-bażi tal-kost tal-produzzjoni u tal-bejgħ li jirrifletti prezzijiet jew parametri referenzjarji mingħajr distorsjoni.

(331)

Min-naħa l-oħra, skont l-Artikolu 7(2a) tar-Regolament bażiku, il-Kummissjoni eżaminat “jekk dazju aktar baxx mill-marġni tad-dumping ikunx biżżejjed biex jelimina l-ħsara.” Skont dan l-Artikolu, il-Kummissjoni eżaminat, fost punti oħrajn, jekk il-prezz ta’ materja prima (f’dan il-każ ta’ ingotta) kienx “sinifikament aktar baxx meta mqabbel mal-prezzijiet fis-swieq internazzjonali rappreżentattivi.” Filwaqt li l-konklużjonijiet li ntlaħqu skont l-Artikolu 2(6)(a) kienu bbażati fuq is-sitwazzjoni fil-pajjiż partikolari u fuq il-kunsiderazzjoni ta’ ħafna fatturi differenti, l-investigazzjoni skont l-Artikolu 7(2a) hija aktar limitata u hija mwettqa fil-kuntest tad-determinazzjoni tal-applikabbiltà tar-regola tad-dazju inferjuri. Għalhekk, l-eżitu tal-eżami skont l-Artikolu 7(2a) ma ħalliex impatt fuq il-konklużjonijiet milħuqin mill-Kummissjoni fil-premessi (223) sa (224) tar-Regolament provviżorju. Għalhekk, il-Kummissjoni ċaħdet din l-affermazzjoni.

(332)

Wara l-iżvelar definittiv, Nanshan Group irrepeta l-affermazzjoni tiegħu. Huwa argumenta li skont l-Artikolu 2(6a)(a), jenħtieġ li d-distorsjonijiet jiġu stabbiliti b’mod pożittiv, u l-valutazzjoni għandha ssir għal kull produttur esportatur separatament. Dan kien jeħtieġ evidenza li l-ingotti tal-aluminju jinxtraw bi prezzijiet li ma jirriflettux il-prezz referenzjarju. Nanshan Group indika li l-prezz tax-xiri tiegħu huwa ogħla mill-prezz ta’ LME, u għalhekk, fil-fehma tiegħu jista’ jiġi stabbilit b’mod pożittiv li l-prezz ma kienx distort.

(333)

Xiamen Xiashun tenniet li, jekk minħabba d-distorsjonijiet sinifikanti, ma jistgħux jintużaw il-prezzijiet u l-kostijiet domestiċi, l-istess Artikolu jsemmi l-kostijiet korrispondenti tal-produzzjoni u tal-bejgħ f’pajjiż rappreżentattiv xieraq jew “il-prezzijiet, il-kostijiet, jew il-valuri ta’ riferiment internazzjonali mingħajr distorsjoni”. Hija argumentat ukoll li l-Kummissjoni rrikonoxxiet li l-prezzijiet domestiċi Ċiniżi għall-ingotti tal-aluminju kienu simili għall-prezzijiet fis-swieq internazzjonali rappreżentattivi, u li dan irid ifisser ukoll li kwalunkwe distorsjoni sinifikanti ma affettwatx il-livell tal-prezzijiet tal-ingotti. Għaldaqstant, ma kien hemm l-ebda raġuni sabiex il-prezzijiet attwali saldati minn Xiamen Xiashun jiġu ssostitwiti bil-prezzijiet tal-importazzjonijiet fit-Turkija.

(334)

Il-Kummissjoni fakkret li l-konklużjonijiet milħuqin skont l-Artikolu 2(6)(a) kienu bbażati fuq diversi fatturi. Dawn jinkludu valutazzjoni tal-impatt potenzjali ta’ element wieħed jew aktar elenkat(i) fl-Artikolu 2(6a)(b) tar-Regolament bażiku, bħal pereżempju l-ordni pubbliku, l-interferenza tal-awtoritajiet pubbliċi fis-swieq, il-preżenza tal-istat fid-ditti eċċ. Il-valutazzjoni ġenerali dwar l-eżistenza ta’ distorsjonijiet tista’ tqis ukoll il-kuntest ġenerali u s-sitwazzjoni fil-pajjiż. B’kuntrast ma’ dan, skont l-Artikolu 7(2a) tar-Regolament bażiku, il-Kummissjoni tivvaluta biss il-livell tal-prezzijiet ta’ input speċifiku fis-suq domestiku u jekk il-livell tal-prezzijiet ta’ tali input domestikament huwiex “sinifikament aktar baxx” meta mqabbel ma’ parametru referenzjarju internazzjonali sabiex jiġi ġġustifikat in-nuqqas ta’ applikazzjoni tar-regola tad-dazju inferjuri. Dan il-paragun tal-prezzijiet domestiċi u internazzjonali skont l-Artikolu 7(2a) għandu skop u kuntest differenti mill-kalkolu tal-valur normali fuq il-bażi tal-Artikolu 2(6a) tar-Regolament bażiku. Ma kien hemm l-ebda evidenza fil-fajl li tappoġġa sejba ta’ stabbiliment pożittiv skont it-tielet inċiż tal-Artikolu 2(6a)(a) li l-prezz tal-ingotti tal-aluminju mixtrijin minn produttur esportatur wieħed jew aktar ma kienx affettwat mid-distorsjonijiet sinifikanti u, għalhekk, kien jiġġustifika l-użu tal-prezzijiet domestiċi tal-ingotti f’dak il-kuntest. Fir-rigward tas-sors tal-prezz mingħajr distorsjoni tal-fatturi ta’ produzzjoni, ir-Regolament bażiku jiddikjara li dan jista’ jkun jew f’pajjiż rappreżentattiv xieraq skont l-ewwel inċiż tal-Artikolu 2(6a)(a), jew stabbilit b’referenza għal prezzijiet, għal kostijiet jew għal parametri referenzjarji internazzjonali mingħajr distorsjoni skont it-tieni inċiż tal-Artikolu 2(6a)(a). Ma kien hemm l-ebda evidenza fil-fajl jew raġuni konvinċenti oħra għall-użu ta’ dawn tal-aħħar fuq dak tal-ewwel fil-kuntest tal-kostruzzjoni jew tal-valur normali. Għalhekk, il-Kummissjoni sostniet li l-eżitu tal-eżami skont l-Artikolu 7(2a) ma kellux impatt fuq il-konklużjonijiet milħuqin mill-Kummissjoni skont l-Artikolu 2(6)(a), u li l-Kummissjoni qagħdet b’mod korrett fuq il-prezzijiet f’pajjiż rappreżentattiv xieraq. Għalhekk, il-Kummissjoni ċaħdet din l-affermazzjoni.

(335)

Nanshan Group u Xiamen Xiashun argumentaw ukoll li jenħtieġ li l-Kummissjoni ma tapplikax dazji fuq l-importazzjoni fir-rigward ta’ materjali li l-produtturi esportaturi jipproduċu huma stess, jew jixtru fir-RPĊ. Fil-fehma tagħhom, l-applikazzjoni tad-dazju fuq l-importazzjoni kienet tmur kontra r-raġunament tal-Artikolu 2(6a)(a) tar-Regolament bażiku sabiex jinħolqu mill-ġdid il-kostijiet attwali li kienet iġġarrab kumpanija teoretika f’pajjiż b’ekonomija mhux distortiva. It-tielet paragrafu ta’ dik il-previżjoni jirrikjedi li “[l-]valutazzjoni għandha ssir separatament għal kull esportatur u produttur”. Din kienet tinvolvi, skont Nanshan Group, li l-valur normali ma jistax jiġi kkalkolat b’mod astratt, iżda jrid ikun ibbażat fuq is-sitwazzjoni konkreta tal-kumpaniji investigati. Nanshan Group irrefera għar-Regolament tal-Kummissjoni (UE) 2019/915 tal-4 ta’ Ġunju li fih il-Kummissjoni semmiet li l-objettiv ta’ dan l-Artikolu kien li “jinstabu l-fatturi mhux distorti korrispondenti kollha tal-produzzjoni jew kemm jista’ jkun fatturi li ntużaw mill-produtturi Ċiniżi kooperattivi u l-ammonti kollha possibbli mhux distorti għall-ispejjeż ġenerali tal-manifattura, l-SG&A u l-profitti” (58). Konsegwentement, Nanshan Group qies li l-inklużjoni tad-dazji tal-importazzjoni għall-materja prima li l-kumpaniji Ċiniżi jixtru f’pajjiżhom ma tistax titqies bħala raġonevoli skont it-tifsira ta’ (u l-ħsieb wara) din id-dispożizzjoni. Xiamen Xiashun argumentat ukoll li d-dazju fuq l-importazzjoni kellu jikkumpensa l-VAT li ma tiġix imposta mill-pajjiżi esportaturi, sabiex il-prezz tal-esportazzjoni jkun komparabbli mal-prezz domestiku, li fuqu tapplika l-VAT. Għalhekk, għall-kalkolu tal-valur normali, jenħtieġ li ma jiżdiedx id-dazju fuq l-importazzjoni.

(336)

Wara l-iżvelar definittiv, Xiamen Xiashun tenniet li jenħtieġ li l-Kummissjoni ma tqisx id-dazju fuq l-importazzjoni meta tikkalkola l-valur referenzjarju. Hija argumentat ukoll li l-awtorità investigattiva tal-Istati Uniti ma żiditx id-dazji fuq l-importazzjoni. Hija qalet li l-kostijiet fil-pajjiż rappreżentattiv iridu jkunu dawk li jikkorrispondu għall-elementi tal-kost imġarrbin fiċ-Ċina, fejn ma jkun hemm l-ebda dazju fuq l-importazzjoni għall-merkanzija prodotta lokalment. Għalhekk, jenħtieġ li d-dazji fuq l-importazzjoni ma jiġux ikkunsidrati.

(337)

Il-Kummissjoni fakkret li l-Artikolu 2(6a) jippermetti lill-Kummissjoni tistabbilixxi l-valur normali fuq il-bażi ta’ kostijiet u ta’ prezzijiet mingħajr distorsjoni f’pajjiż rappreżentattiv, f’dan il-każ it-Turkija. Fin-nuqqas ta’ data disponibbli dwar il-prezzijiet domestiċi fil-pajjiżi rappreżentattivi possibbli (f’dan il-każ fit-Turkija), tiġi applikata d-data dwar il-prezzijiet tal-importazzjoni li hija disponibbli fil-pront għall-Kummissjoni. Sabiex tinkiseb indikazzjoni raġonevoli li tirrappreżenta prezz domestiku mingħajr distorsjoni fis-suq domestiku tal-pajjiż rappreżentattiv magħżul, jeħtieġ li jiġu aġġustati l-prezzijiet tal-importazzjoni identifikati biż-żieda tad-dazji fuq l-importazzjoni rilevanti, minħabba li dawn jaffettwaw il-prezz attwali fis-suq domestiku. Il-prattika tal-awtorità investigattiva tal-Istati Uniti ma hijiex rilevanti għas-sejbiet skont ir-Regolament bażiku, minħabba li l-oqfsa u l-prattiki legali rispettivi huma differenti. Għalhekk, il-Kummissjoni ċaħdet din l-affermazzjoni.

(338)

Jiangsu Alcha affermat li l-kost lavorattiv referenzjarju użat sabiex jiġi stabbilit il-valur normali fl-istadju proviżorju (ta’ 60,08 RMB/siegħa) kien f’kunflitt mal-valur ta’ 42,21 RMB/siegħa msemmi fil-premessa (248) tar-Regolament provviżorju.

(339)

Il-Kummissjoni ċċarat li l-valur ta’ 42,21 RMB/siegħa msemmi fil-premessa (248) tar-Regolament provviżorju kien żball klerikali. Il-parametru referenzjarju korrett għall-kostijiet lavorattivi użat fl-istadju tal-kalkoli provviżorji meta nħadem il-valur normali kien ta’ 60,08 RMB/siegħa. Għalhekk, il-kalkolu provviżorju tal-marġni tad-dumping kien korrett.

(340)

Wara l-iżvelar provviżorju u definittiv, Nanshan Group ikkontesta l-għażla tal-Kummissjoni li tiddetermina l-kostijiet lavorattivi fuq il-bażi tal-kodiċi NACE għall-attività ekonomika C.24 – manifattura tal-metall bażiku. Fil-fehma tiegħu, għal tliet kumpaniji tal-Grupp li joperaw upstream mill-produzzjoni tal-prodott ikkonċernat, il-Kummissjoni missha użat il-kostijiet lavorattivi taħt il-kodiċi C25.50 – l-ifforġar, l-ippressar, l-istampar u l-laminazzjoni tal-metall, il-metallurġija tat-trab (59), peress li l-fażi tal-laminazzjoni kienet fil-fehma tiegħu l-aktar pass importanti fil-proċess tal-manifattura tal-prodott li qed jiġi investigat.

(341)

Il-Kummissjoni l-ewwel osservat li l-attivitajiet tal-produtturi esportaturi (kif ukoll tal-produtturi tal-Unjoni) kienu differenti skont il-livell ta’ integrazzjoni tagħhom – xi kumpaniji bħal Nanshan Group bdew il-proċess tal-produzzjoni mit-trab tal-alumina filwaqt li xi oħrajn, bħal pereżempju Jiangsu Alcha, f’xi każijiet kienu qed jixtru kojls illaminati bil-kesħa għal proċessar ulterjuri. Għalhekk, l-ambitu tal-attivitajiet kien differenti bejn il-kumpaniji.

(342)

It-tieni, il-kodiċi NACE C.24, li l-Kummissjoni użat sabiex tistabbilixxi l-kostijiet lavorattivi kien jinkludi attivitajiet għall-irfinar tal-metall f’ingotti (60). Barra minn hekk, il-kodiċi NACE C24.42 kien jinkludi speċifikament il-produzzjoni tal-aluminju, inkluża l-produzzjoni tal-fojl tal-aluminju (61) (inkluża l-fażi tal-laminazzjoni). Għalhekk, il-Kummissjoni qieset li sabiex tistabbilixxi l-parametru referenzjarju għall-kostijiet lavorattivi, kien aktar akkurat li tuża l-kodiċi NACE C24. Għalhekk, hija ċaħdet din l-affermazzjoni.

(343)

Nanshan Group argumenta wkoll li r-rata tal-kambju li użat il-Kummissjoni kienet differenti mir-rati li l-Kummissjoni stess kienet ipprovdiet lill-produttur esportatur bħala anness għall-kwestjonarju li għandu jintuża għall-finijiet tal-investigazzjoni, u li, għalhekk, il-valuri referenzjarji kienu għoljin. Il-Kummissjoni analizzat l-affermazzjoni u sabet li kienet ġustifikata. Għalhekk, reġgħet ikkalkolat il-valuri billi użat ir-rati tal-kambju pprovduti fil-kwestjonarju. Il-valur referenzjarju l-ġdid huwa ta’ 59,97 RMB/siegħa.

(344)

Nanshan Group afferma li sabiex jiġi stabbilit il-parametru referenzjarju għall-elettriku, il-Kummissjoni missha użat data mill-Eurostat, li fil-fehma tagħha kienet aktar akkurata mid-data nazzjonali Torka użata mill-Kummissjoni peress li kienet teskludi l-VAT u taxxi oħrajn li jistgħu jiġu rkuprati.

(345)

Il-Kummissjoni eżaminat l-affermazzjoni u sabet li d-data tal-Eurostat relatata mat-Turkija kienet ibbażata fuq data li kienet ġejja mill-istatistika nazzjonali Torka, għalkemm ippreżentata b’mod differenti. Madankollu, għall-kuntrarju tad-data disponibbli mill-istatistika nazzjonali Torka, id-data disponibbli għall-pubbliku tal-Eurostat kienet tkopri l-perjodu ta’ investigazzjoni kollu. Għalhekk, il-Kummissjoni aċċettat l-affermazzjoni u stabbiliet il-parametru referenzjarju għall-elettriku fuq il-bażi tad-data disponibbli għall-pubbliku fil-Eurostat.

(346)

Nanshan Group argumenta wkoll li l-Kummissjoni qieset medda ta’ konsum waħda għall-kumpaniji kollha ta’ Nanshan Group filwaqt li l-volumi tal-elettriku kkonsmat minn kull kumpanija fil-grupp kienu jvarjaw. Il-Kummissjoni aċċettat l-affermazzjoni u kkalkolat mill-ġdid il-valur normali billi użat il-valur ta’ referenza rilevanti li jikkorrispondi għall-konsum ta’ kull waħda mill-kumpaniji fil-Grupp.

(347)

Nanshan Group afferma li sabiex jiġi stabbilit il-parametru referenzjarju għall-gass, il-Kummissjoni missha użat data tal-Eurostat, li fil-fehma tagħha kienet aktar akkurata mid-data nazzjonali Torka użata mill-Kummissjoni peress li kienet teskludi l-VAT u taxxi oħrajn li jistgħu jiġu rkuprati.

(348)

Il-Kummissjoni qieset li ma kien hemm l-ebda bażi sabiex tikkunsidra li d-data nazzjonali Torka ma tkunx akkurata. Din id-data, li kopriet il-perjodu ta’ investigazzjoni kollu, ġiet ipprovduta direttament mill-awtoritajiet Torok, u, b’kuntrast mad-data mill-Eurostat, hija pprovdiet ukoll informazzjoni u prezzijiet fl-unità meħtieġa (m3). Barra minn hekk, din id-data kienet teskludi taxxi bħall-VAT. Għalhekk, il-Kummissjoni ċaħdet l-affermazzjoni.

(349)

Nanshan Group argumenta wkoll li l-Kummissjoni qieset medda ta’ konsum waħda għall-kumpaniji kollha ta’ Nanshan Group. Madankollu, il-volumi ta’ gass ikkonsmat minn kull kumpanija fil-grupp varjaw. Il-Kummissjoni aċċettat l-affermazzjoni u kkalkolat mill-ġdid il-valur normali billi użat il-valur ta’ referenza rilevanti li jikkorrispondi għall-konsum ta’ kull waħda mill-kumpaniji fil-Grupp.

(350)

Nanshan Group argumenta li l-Kummissjoni missha eskludiet il-kostijiet tal-ilma fir-reġjun ta’ Istanbul sabiex tistabbilixxi l-parametru referenzjarju għall-ilma. Hija indikat li l-ebda waħda mill-kumpaniji li d-data tagħhom intużat sabiex jiġu stabbiliti l-kostijiet mingħajr distorsjoni tal-SG&A u l-profitt ma kienet tinsab f’dan ir-reġjun.

(351)

Il-Kummissjoni vvalutat mill-ġdid id-data disponibbli għall-pubbliku li kienet użat inizjalment sabiex tistabbilixxi l-parametru referenzjarju (62). Hija sabet li, għall-kuntrarju tal-affermazzjoni ta’ Nanshan Group, l-ebda waħda mit-tariffi użati sabiex jiġi stabbilit kost medju għall-ilma ma kienet relatata speċifikament mar-reġjun ta’ Istanbul. B’mod aktar preċiż, waħda mit-tariffi disponibbli għall-pubbliku għall-ilma kienet tariffa mħallsa mill-industrija fil-pajjiż kollu, u t-tnejn l-oħrajn kienu tariffi speċifiċi għal żewġ żoni industrijali (minn ħafna) fit-Turkija. Għalhekk, il-Kummissjoni qieset li t-tariffa xierqa li għandha tintuża bħala l-parametru referenzjarju sabiex tistabbilixxi l-kostijiet tal-ilma tal-industrija kienet it-tariffi relatati mal-medja tat-tariffi industrijali fit-Turkija u li għandha teskludi t-tariffi applikabbli fiż-żewġ żoni industrijali.

(352)

Fil-kummenti tiegħu dwar is-sejbiet provviżorji, Nanshan Group afferma li l-Kummissjoni missha għażlet waħda mid-diversi kumpaniji indikati minn Nanshan Group li allegatament kienu jipproduċu l-prodott li qed jiġi investigat minflok kumpaniji mis-settur tal-estrużjoni tal-aluminju sabiex tistabbilixxi l-parametru referenzjarju għal SG&A mingħajr distorsjoni. Huwa qies ukoll li l-Kummissjoni użat data skaduta mill-2018.

(353)

Il-Kummissjoni ma sabet l-ebda data finanzjarja reċenti u disponibbli għall-pubbliku għal xi waħda mis-sitt kumpaniji indikati minn Nanshan Group. Barra minn hekk, għar-raġunijiet spjegati fil-premessi (307) sa (311) u fin-nuqqas ta’ data finanzjarja alternattiva, il-Kummissjoni sostniet li d-data tal-kumpaniji attivi fis-settur tal-estrużjoni tal-aluminju kienet tikkostitwixxi parametru referenzjarju xieraq.

(354)

Wara l-iżvelar provviżorju u definittiva, Xiamen Xiashun u Nanshan Group ikkontestaw ukoll id-deċiżjoni tal-Kummissjoni li tinjora d-data ta’ produttur Tork ta’ prodotti llaminati ċatti tal-aluminju, “PMS Metal” (63) minħabba li l-profitt tiegħu kien qrib il-punt ta’ ekwilibriju. Fil-fehma tiegħu, dan ikkontradixxa l-approċċ tal-Kummissjoni meħud fl-investigazzjoni dwar l-estrużjonijiet tal-aluminju, fejn il-Kummissjoni, meta stabbiliet valur raġonevoli għall-SG&A u għall-profitt, qieset il-kumpaniji profittabbli kollha irrispettivament mil-livell ta’ profitt tagħhom, u dment li ma kinux qed jagħmlu t-telf (64). Xiamen Xiashun tenniet l-istess affermazzjoni wara l-iżvelar definittiv. Għal Xiamen Xiashun, il-fatt li kumpanija jkollha profitt baxx ħafna ma kienx raġuni suffiċjenti sabiex tiġi eskluża. Barra minn hekk, hija argumentat li ma kien hemm l-ebda bażi sabiex jiġi kkunsidrat li medja ta’ profitt ta’ diversi kumpaniji kienet aktar rappreżentattiva minn data ta’ kumpanija waħda. Barra minn hekk, hija argumentat li l-Kummissjoni użat data mill-2018 iżda fl-istess ħin, hija rrifjutat li tuża d-data ta’ PMS Metal li għaliha kienet teżisti data li tikkoinċidi mal-PI.

(355)

Il-Kummissjoni fakkret li l-produttur Tork identifikat fl-Ewwel Nota għall-fajl kienet l-unika kumpanija b’data disponibbli għall-pubbliku f’dak iż-żmien. Barra minn hekk, id-data disponibbli ma kinitx rapporti finanzjarji sħaħ u kienet biss tirkeb parzjalment biss fil-PI. Fuq il-bażi ta’ dawn l-elementi kollha flimkien u tal-fatt li l-profitt ta’ din il-kumpanija kien viċin ħafna il-punt ta’ ekwilibriju, il-Kummissjoni kkonkludiet li tali data ma setgħetx titqies bħala rappreżentattiva tas-settur.

(356)

Il-Kummissjoni nnotat ukoll li, kif stabbilit fl-Artikolu 2(6a)(a) tar-Regolament bażiku, “[il-]valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Profitt qrib il-punt ta’ ekwilibriju ma jistax jitqies raġonevoli. Fil-prinċipju, l-użu ta’ data finanzjarja miġbura u ponderata ta’ basket ta’ kumpaniji huwa aktar adegwat mill-eżami tal-prestazzjoni ta’ produttur uniku għall-finijiet li jinstab ammont raġonevoli għall-SG&A u għall-profitt. Għalhekk, fil-fehma tal-Kummissjoni, l-esklużjoni ta’ kumpaniji individwali ma kinitx inkonsistenti mal-approċċ tagħha li tikkalkola medja ponderata ta’ diversi kumpaniji li jipproduċu estrużjonijiet tal-aluminju li rrapportaw profitt. B’kuntrast ma’ dan, peress li d-data kienet tirrifletti s-sitwazzjoni finanzjarja ta’ diversi kumpaniji, il-medja ponderata tagħhom tqieset bħala rappreżentattiva tal-kumpaniji attivi fis-settur. Għalhekk, il-Kummissjoni ċaħdet din l-affermazzjoni.

(357)

Wara l-iżvelar definittiv, Nanshan Group argumenta wkoll li l-Kummissjoni setgħet tuża d-data ta’ Asaş Aluminyum li tinsab fl-investigazzjoni l-oħra li għaddejja dwar il-fojl tal-konvertituri tal-aluminju. Nanshan Group tenna wkoll li jenħtieġ li l-Kummissjoni tibbaża s-sejbiet tagħha fuq l-aktar data riċenti.

(358)

Il-Kummissjoni fakkret li fl-investigazzjoni msemmija, il-Kummissjoni ma qisitx id-data ta’ Asaş Aluminyum minħabba li l-profitt tal-kumpanija fl-2019 kien qrib il-punt ta’ ekwilibriju (65). Għar-raġunijiet spjegati fil-premessa (357), il-Kummissjoni sostniet li d-data tal-kumpaniji li għandhom profitt qrib il-punt ta’ ekwilibriju ma setgħetx titqies bħala parametru referenzjarju xieraq.

(359)

Il-livell kombinat ta’ SG&A u ta’ profitt użat fir-Regolament provviżorju kien ibbażat fuq data għas-sena 2018. Il-Kummissjoni vverifikat id-disponibbiltà ta’ data aktar reċenti għall-SG&A u għall-profitt fil-pajjiż rappreżentattiv għall-2019. Din id-data kienet disponibbli biss għal tlieta mill-ħames kumpaniji magħżulin b’mod provviżorju u wriet li l-livell ikkombinat tal-SG&A u tal-profitti żdied b’mod marġinali ħafna biss fl-2019. Dan ma jkollux impatt notevoli fuq il-valur normali maħdum. Fid-dawl ta’ dan, u fin-nuqqas ta’ kwalunkwe kumment ieħor mill-partijiet interessati fir-rigward tal-kostijiet ġenerali tal-manifattura, tal-livelli tal-SG&A u tal-profitt, il-Kummissjoni żammet il-livelli elenkati fir-Regolament provviżorju.

(360)

Meta titqies l-informazzjoni kollha ppreżentata mill-partijiet interessati, il-fatturi ta’ produzzjoni u s-sorsi tagħhom li ġejjin ġew identifikati fir-rigward tat-Turkija sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 2

Fatturi ta’ produzzjoni u sorsi ta’ informazzjoni

(361)

Id-dettalji tal-kalkolu tal-valur normali ġew stabbiliti fil-premessi (268) sa (276) tar-Regolament provviżorju.

(362)

Nanshan Group tenna l-affermazzjoni tiegħu li l-valur normali għall-Grupp jenħtieġ li jiġi kkalkulat b’mod konsolidat, jiġifieri jenħtieġ li l-Kummissjoni tikkunsidra biss li tissostitwixxi l-prezzijiet tal-fatturi ta’ produzzjoni li l-Grupp kien qed jixtri fil-bidu tal-proċess ta’ produzzjoni minn parti mhux relatata bil-prezzijiet referenzjarji. Il-kumpanija qieset li minkejja li kienu entitajiet legalment distinti, il-kumpaniji tal-Grupp jifformaw parti minn unità waħda minn perspettiva ekonomika peress li (i) huma kkontrollati mill-istess entità u hemm trikkib sinifikanti fil-grupp f’termini kemm tal-bordijiet tad-diretturi kif ukoll tal-livell maniġerjali, (ii) ilkoll jinsabu fl-istess park industrijali u (iii) il-proċess tal-produzzjoni huwa estremament integrat, bl-output ta’ kumpanija waħda li jikkostitwixxi l-input għall-oħra. Barra minn hekk, il-kumpaniji individwali jidhru għall-klijenti mhux relatati bħala entità waħda wkoll, b’sit web waħda, b’marka waħda, u b’ċentru ta’ kuntatt wieħed. Nanshan afferma li l-kunċett ma kienx ristrett għal-liġi dwar id-difiża tal-kummerċ, u għamel referenza għal diversi kawżi tal-Qorti, fejn il-kunċett tal-entità ekonomika waħda ġie elaborat aktar. Fil-fehma tiegħu, is-sejbiet tal-Kummissjoni jwasslu għal diskriminazzjoni peress li jinjoraw id-differenzi fost l-esportaturi inklużi fil-kampjun. Bħala eżempju ta l-kumpanija Xiamen Xiashun soġġetta għall-aktar marġni tad-dumping baxx. Skont Nanshan Group, dan huwa biss minħabba li Xiamen Xiashun tipproduċi l-prodott li qed jiġi investigat mill-ingotti tal-aluminju taħt l-istess entità legali.

(363)

Fil-fehma ta’ Nanshan, il-metodoloġija kisret ukoll id-dispożizzjonijiet tal-Artikolu 2(6a) tar-Regolament bażiku li jirreferi għall-“kostijiet korrispondenti ta’ produzzjoni u bejgħ f’pajjiż rappreżentattiv xieraq”. Fil-fehma ta’ Nanshan, il-kostijiet tal-produzzjoni korrispondenti tagħha ma kinux dawk ta’ materja prima intermedja, iżda l-ewwel materja prima fil-katina tal-produzzjoni tal-aluminju, jiġifieri l-boksajt u l-faħam. Fil-fehma ta’ Nanshan, id-dispożizzjoni kienet tawtorizza biss lill-Kummissjoni sabiex tinjora l-kostijiet tal-materjal minn fornituri mhux relatati.

(364)

Il-Kummissjoni vvalutat mill-ġdid id-dikjarazzjoni u l-evidenza fil-fajl. Madankollu, kif spjegat fil-premessa (272) tar-Regolament provviżorju, il-metodu ferm stabbilit tal-Kummissjoni huwa li tistabbilixxi valur normali (u marġni tad-dumping) għal kull entità investigata li tirrappreżenta produttur esportatur separatament. Fil-fehma tal-Kummissjoni, jekk id-diversi kumpaniji fi Grupp jikkostitwixxux entità ekonomika waħda jew le ma huwiex rilevanti għall-istabbiliment tal-valur normali skont l-Artikolu 2(6a) tar-Regolament bażiku skont metodu differenti. Jekk jinstab li l-prezzijiet u l-kostijiet ikunu distorti fiċ-Ċina fir-rigward tal-prodott ikkonċernat kif ukoll tal-inputs tiegħu, l-inputs magħmulin mill-kumpanija relatata fi ħdan il-Grupp ikunu affettwati wkoll minn dawk is-sejbiet. Għalhekk, dawk l-inputs, irrispettivament minn jekk kinux akkwistati minn fornitur relatat, jenħtieġ li jiġu aġġustati f’dan il-kuntest. Barra minn hekk, il-Kummissjoni ma qisitx il-metodu diskriminatorju – fil-fehma tagħha, huwa rrifletta l-kompożizzjoni attwali tal-Grupp, u l-fatt li l-kumpaniji fi ħdan il-Grupp kienu entitajiet legali separati. Għalhekk, fil-fehma tal-Kummissjoni, il-kostijiet tal-produzzjoni “korrispondenti” imsemmijin fl-Artikolu 2(6a) tar-Regolament bażiku kienu l-kostijiet imġarrbin minn kull waħda mill-entitajiet legali individwalment u affettwati mid-distorsjonijiet sinifikanti. Għaldaqstant, il-Kummissjoni ċaħdet l-affermazzjoni.

(365)

Fuq din il-bażi, il-Kummissjoni kkonfermat is-sejbiet provviżorji tagħha u l-metodu ta’ kif ikkalkolat il-valur normali kif stabbilit fil-premessi (268) sa (276) tar-Regolament provviżorju.

(366)

Wara l-iżvelar finali, Nanshan Group tenna l-affermazzjoni tiegħu li l-Kummissjoni missha applikat il-kunċett tal-entità ekonomika unika meta bniet il-valur normali għall-kumpaniji tal-Grupp. Huwa argumenta li l-Kummissjoni diġà kienet applikat dan il-kunċett meta interpretat il-valur normali f’każijiet preċedenti. Huwa rrefera b’mod partikolari għad-Deċiżjoni ta’ Implimentazzjoni tal-Kummissjoni (UE) 2017/957 (68). Barra minn hekk, Nanshan Group qies li l-Grupp kien jissodisfa l-kriterji rilevanti kollha. Fil-fehma tiegħu, billi tikkunsidra biss fatturi ta’ produzzjoni mixtrijin minn partijiet mhux relatati u mhux il-bejgħ ristrett bejn l-entitajiet relatati, il-Kummissjoni tkun tkopri l-fatturi distorti kollha ta’ produzzjoni mixtrijin mill-Grupp. Fl-aħħar nett, Nanshan Group tenna li huwa kkunsidra l-metodu tal-Kummissjoni diskriminatorju peress li kien jikser il-prinċipju ta’ trattament ugwali billi ma jikkunsidrax li l-Grupp kien integrat vertikalment.

(367)

Il-Kummissjoni qieset li d-Deċiżjoni tal-Kummissjoni ta’ hawn fuq ma tikkostitwixxix preċedent rilevanti. L-ewwel nett, hija nnotat li f’dik id-Deċiżjoni tal-Kummissjoni, l-affermazzjoni li jiġi applikat il-kunċett ta’ entità ekonomika waħda ġiet miċħuda skont il-merti. Barra minn hekk, il-qafas legali u ċ-ċirkostanzi fattwali kienu differenti. F’Aċidu Tereftaliku, l-affermazzjoni kienet relatata ma’ fornitur tal-materja prima, u l-produttur esportatur talab li jitnaqqas il-profitt tal-fornitur tiegħu għall-fini tal-kalkolu tal-valur normali. Madankollu, f’dan il-każ, il-kumpaniji ta’ Nanshan Group li talbu li jiġu ttrattati bħala entità ekonomika waħda huma produtturi tal-prodott ikkonċernat li għalihom il-Kummissjoni trid tistabbilixxi marġnijiet tad-dumping individwali. Kif spjegat fil-premessa (272) tar-Regolament provviżorju, il-Kummissjoni tistabbilixxi valur normali (u marġni tad-dumping) għal kull entità investigata li tirrappreżenta produttur esportatur separatament. Għalhekk, il-Kummissjoni qieset li huwa xieraq li l-valur normali maħdum jiġi bbażat fuq il-fatturi ta’ produzzjoni mixtrijin mill-entitajiet legali differenti ta’ Nanshan Group individwalment.

(368)

Id-dettalji tal-kalkolu tal-prezz tal-esportazzjoni ġew stabbiliti fil-premessi (277) sa (279) tar-Regolament provviżorju. Fin-nuqqas ta’ kwalunkwe kumment fir-rigward ta’ din it-taqsima, il-Kummissjoni kkonfermat il-konklużjonijiet provviżorji tagħha

(369)

Id-dettalji dwar it-tqabbil tal-valur normali u tal-prezz tal-esportazzjoni ġew stabbiliti fil-premessi (280) sa (283) tar-Regolament provviżorju.

(370)

Xiamen Xiashun qalet li sabiex tiddetermina l-prezz tal-esportazzjoni għal wieħed mill-klijenti tagħha, il-Kummissjoni missha qieset il-kostijiet tal-kreditu attwali mġarrbin minflok ma tikkalkolahom fuq il-bażi tat-termini tal-pagament miftiehma. Hija argumentat li, għall-kuntrarju ta’ klijenti oħrajn, ir-relazzjoni ma’ dan il-klijent kienet soġġetta għal kuntratt mal-bank tagħha, li fil-qafas tiegħu l-bank talab biss lill-kumpanija l-kostijiet ta’ kreditu attwali li ġarrab.

(371)

Il-Kummissjoni vvalutat l-affermazzjoni. Il-kostijiet ta’ kreditu kienu wieħed mill-elementi diskussi fin-negozjar tal-prezzijiet, u l-prezz (tal-esportazzjoni) ġie stabbilit meta ġew innegozjati t-termini. Għalhekk, huma l-kundizzjonijiet innegozjati, li jinkludu t-termini tal-ħlas, li affettwaw l-iffissar tal-livell tal-prezzijiet, u, għalhekk, id-determinazzjoni tal-prezz tal-esportazzjoni. Barra minn hekk, il-prezz ma jinbidilx b’mod retroattiv jekk, għal tranżazzjoni partikolari, ikun hemm differenza bejn it-termini ta’ ħlas innegozjati u dawk attwali. Għalhekk, il-Kummissjoni ċaħdet l-affermazzjoni.

(372)

Jiangsu Alcha affermat li l-kalkolu tal-marġni tad-dumping tagħha kien ibbażat fuq l-istruttura ħażina tal-PCN u kien fih żbalji sinifikanti. B’mod partikolari, qabel l-iżvelar, Jiangsu Alcha sostniet li sabiex tikkalkola l-marġni tad-dumping u tal-bejgħ taħt il-prezz, il-Kummissjoni użat informazzjoni pprovduta minn Jiangsu Alcha fuq il-bażi ta’ struttura tal-PCN skaduta, u mhux fuq l-istruttura tal-PCN (ikkoreġuta) ikkomunikata lill-partijiet bin-Nota għall-fajl tad-9 ta’ Settembru 2020. Jiangsu Alcha affermat li l-Kummissjoni missha indirizzat l-iżball wara l-iżvelar minn qabel, u kkoreġiet il-kalkoli qabel ma ppubblikat il-miżuri provviżorji. Fil-fehma tagħha, in-nuqqas mill-Kummissjoni li tipprovdi kalkoli kkoreġuti jikser l-Artikolu 19a(1) tar-Regolament bażiku.

(373)

Il-Kummissjoni sostniet il-fehma kkomunikata lill-kumpanija wara l-iżvelar minn qabel li l-possibbiltà li jiġu kkoreġuti l-kalkoli fl-iżvelar minn qabel f’konformità mal-Artikolu 19a kienet limitata għall-akkuratezza tal-kalkoli, u għal żbalji klerikali fl-għadd, fit-tnaqqis, jew f’funzjoni aritmetika oħra, għal żball li jirriżulta minn ikkopjar mhux akkurat, minn duplikazzjoni, minn applikazzjoni ta’ unitajiet inkonsistenti ta’ rati ta’ kejl jew ta’ konverżjoni u għal kwalunkwe tip simili ieħor ta’ żbalji klerikali. Il-verifika tal-istruttura korretta tal-PCN tal-kumpanija kienet teħtieġ verifika addizzjonali tad-data tal-esportazzjoni tal-kumpanija u, għalhekk, ma kinitx relatata mal-akkuratezza tal-kalkoli u mat-tip ta’ żbalji li jistgħu jiġu kkoreġuti wara l-iżvelar minn qabel.

(374)

Għalhekk, il-Kummissjoni eżaminat l-affermazzjoni flimkien mal-affermazzjonijiet l-oħrajn wara r-Regolament provviżorju. Ikkonfermat li l-klassifikazzjoni inizjali tat-tipi ta’ prodotti minn Jiangsu Alcha ma kinitx korretta. Għalhekk, il-Kummissjoni issostitwiet il-kodiċijiet żbaljati tal-PCN b’kodiċijiet korretti. Il-bidla ma kellhiex impatt fuq il-kalkolu tal-marġni tad-dumping. Madankollu, il-Kummissjoni kkoreġiet il-kalkoli tal-marġni tal-bejgħ taħt il-prezz kif xieraq (ara l-premessi (564) sa (566)).

(375)

Nanshan Group ikkunsidra wkoll li l-SG&A u l-profitt tal-kumpaniji Torok kienu jinkludu allowances bħat-trasport u l-assigurazzjoni. Għalhekk, f’konformità mal-Artikolu 2(10) tar-Regolament bażiku u sabiex jiġi żgurat paragun ġust, jenħtieġ li l-Kummissjoni tagħmel aġġustamenti.

(376)

Il-Kummissjoni qieset li, l-ewwel nett, ma kien hemm l-ebda element fil-fajl li jippermettilha tikkonkludi li l-SG&A u l-profitt tal-kumpaniji Torok kienu jinkludu t-trasport u l-assigurazzjoni, u, għalhekk, li l-valuri kienu jinkludu kostijiet differenti mill-istess valuri kkunsidrati għall-produtturi esportaturi Ċiniżi. Għalhekk, ma kien hemm l-ebda bażi sabiex il-Kummissjoni tagħmel aġġustament bħal dan. Fin-nuqqas ta’ evidenza dwar id-differenzi, il-Kummissjoni qieset li l-valuri dwar l-SG&A u l-profitt kemm tal-kumpaniji Torok kif ukoll tal-produtturi esportaturi Ċiniżi kienu fl-istess livell u kienu jippermettu paragun ġust.

(377)

Minħabba li l-Kummissjoni aċċettat xi kummenti mill-partijiet interessati sottomessi wara l-iżvelar provviżorju, hija kkalkolat il-marġnijiet tad-dumping mill-ġdid kif xieraq.

(378)

Kif spjegat fil-premessa (289) tar-Regolament provviżorju, il-livell ta’ kooperazzjoni f’dan il-każ huwa baxx. Wara l-bidliet introdotti fil-volum tal-importazzjonijiet mill-pajjiż ikkonċernat kif spjegat fit-Taqsima 4.5 hawn taħt, din il-konklużjoni ġiet ikkonfermata peress li l-esportazzjonijiet tal-produtturi esportaturi li kkooperaw kienu jikkostitwixxu biss madwar 65 % tal-esportazzjonijiet totali lejn l-Unjoni matul il-perjodu ta’ investigazzjoni. Għalhekk, il-Kummissjoni qieset li kien xieraq li tistabbilixxi l-marġni tad-dumping għall-pajjiż kollu applikabbli għall-produtturi esportaturi kollha l-oħrajn li ma kkooperawx fil-livell tal-ogħla marġni tad-dumping stabbilit għal tip ta’ prodott mibjugħ fi kwantitajiet rappreżentattivi mill-produttur esportatur bl-ogħla marġni tad-dumping misjub. Il-marġni tad-dumping stabbilit b’dan il-mod kien ta’ 88 %.

(379)

Il-marġnijiet tad-dumping definittiv espressi bħala perċentwal tal-prezz tal-kost, tal-assigurazzjoni u tan-nol (CIF) fil-fruntiera tal-Unjoni, bid-dazju mhux imħallas, huma kif ġej:

(380)

Il-kalkoli tal-marġnijiet tad-dumping individwali, inklużi l-korrezzjonijiet u l-aġġustamenti li saru wara l-kummenti mill-partijiet interessati sottomessi wara l-iżvelar provviżorju, ġew żvelati lill-produtturi esportaturi inklużi fil-kampjun.

(381)

Kif indikat fil-premessi (291) sa (293) tar-Regolament provviżorju, is-sejbiet provviżorji ġew stabbiliti fuq il-bażi tal-EU-28 bl-eċċezzjoni tal-kalkolu tal-marġni tat-twaqqigħ tal-prezz. Madankollu, is-sejbiet definittivi ta’ din l-investigazzjoni kienu bbażati fuq data tal-EU27 (ara t-Taqsima 1.9 aktar ’il fuq). Kif imsemmi fil-premessa (292) tar-Regolament provviżorju, produttur wieħed tal-Unjoni inkluż fil-kampjun tal-prodott li qed jiġi investigat kien attiv fir-Renju Unit matul il-perjodu kkunsidrat u d-data tiegħu ntużat sabiex jiġu ddeterminati l-makroindikaturi provviżorji fuq il-bażi tal-EU28. Għalhekk, u sabiex tiġi żgurata l-kunfidenzjalità tad-data ta’ dan il-produttur, ċerti makroindikaturi ġew ippreżentati bl-użu ta’ meded għal sejbiet definittivi.

(382)

Barra minn hekk, wara l-konklużjonijiet dwar l-ambitu tal-prodott, id-data li tappartjeni għall-AFRPs għall-użu fil-produzzjoni tal-ACPs kif deskritt fl-Artikolu 2(2) aktar ’il quddiem ġiet eskluża mill-analiżi tad-dannu.

(383)

Il-produzzjoni totali tal-Unjoni matul il-perjodu ta’ investigazzjoni kienet stabbilita għal madwar 1 792 606 tunnellata. Il-Kummissjoni stabbiliet iċ-ċifra fuq il-bażi tad-data tal-produzzjoni tal-Unjoni ta’ EA, li ġiet ikkontroverifikata għall-affidabbiltà u għall-kompletezza mal-informazzjoni pprovduta mill-produtturi tal-Unjoni inkluża d-data tal-produtturi tal-Unjoni inklużi fil-kampjun. Kif indikat fil-premessa (35) tar-Regolament provviżorju u fil-premessa (17), fil-kampjun intgħażlu tliet produtturi tal-Unjoni li wara l-bidliet magħmulin jirrappreżentaw 38 % tal-produzzjoni totali tal-Unjoni tal-prodott simili.

(384)

Fin-nuqqas ta’ kwalunkwe kumment fir-rigward tad-definizzjoni tal-industrija tal-Unjoni u ta’ bidliet oħrajn fir-rigward tal-produzzjoni tal-industrija tal-Unjoni, ġew ikkonfermati l-konklużjonijiet fil-premessi (294) u (295) tar-Regolament provviżorju.

(385)

Wara l-iżvelar provviżorju, TitanX u Valeo tennew l-affermazzjonijiet tagħhom li l-AHEX AFRPs jistħoqqilhom analiżi separata tad-dannu peress li dawn il-prodotti ma għandhomx l-istess karatteristiċi fiżiċi, tekniċi u kimiċi bażiċi. Huma affermaw ukoll li jenħtieġ li EA tipprovdi mikroindikaturi u makroindikaturi separati għal dan is-settur. B’mod simili, Huafong affermat li l-Kummissjoni missha wettqet analiżi speċifika għas-segmenti għall-AHEX AFRPs minħabba d-differenza allegata fil-prezzijiet bejn HEX AFRPs u prodotti oħrajn.

(386)

Fin-nuqqas ta’ elementi ġodda u peress li dawn l-affermazzjonijiet ġew indirizzati fir-Regolament provviżorju, issir referenza għall-premessi (300) sa (302). Għalhekk, din l-affermazzjoni ġiet miċħuda.

(387)

Wara l-iżvelar provviżorju, Xiamen Xiashun tenniet li d-differenza allegata fil-prezzijiet bejn il-fojl PP Cap u l-istokk tal-fojl kienet teħtieġ analiżi speċifika għas-segmenti u reġgħet irreferiet għar-rapport tal-Korp tal-Appell dwar HP-SSST (69).

(388)

Kif indikat fil-premessa (251) aktar ’il fuq, il-Kummissjoni stabbiliet li, għall-kuntrarju tal-affermazzjoni ta’ Xiamen Xiashun, ma hemm l-ebda differenza sinifikanti fil-prezz bejn il-prezz tal-fojl PP Cap u l-istokk tal-fojl. Fuq din il-bażi, is-sejbiet li saru fil-premessa (306) tar-Regolament provviżorju kkonfermaw li analiżi speċifika għas-segmenti ma kinitx iġġustifikata.

(389)

Wara l-iżvelar definittiv, Xiamen Xiashun tenniet li l-istokk tal-fojl kien prodott speċifiku li jenħtieġ li ma jitħallatx ma’ AFRPs oħrajn. Hija pprovdiet ukoll kummenti addizzjonali dwar ir-Regolament provviżorju li affermaw li n-nuqqas ta’ isem Xiamen Xiashun fil-lista ta’ produtturi esportaturi magħrufin missu wassal għal eżami aktar bir-reqqa dwar jekk l-ilmentatur kellux verament il-ħsieb li jimmira l-istokk tal-fojl u affermat li l-ilmentatur kien identifika dan il-prodott bħala kategorija speċjali tal-prodott fl-ilment.

(390)

L-istess esportatur żied li, li kieku l-prodotti tiegħu tqabblu ma’ kwalunkwe AFRP ieħor u li kieku l-assenza ta’ differenza sinifikanti fil-prezzijiet imsemmija fil-premessa (390) ma setgħetx tiġi appoġġata, dan ma jagħtix prova tal-indikazzjoni tal-Kummissjoni fil-premessa (306) tar-Regolament provviżorju li “b’kuntrast mar-rapport tal-Korp tal-Appell dwar l-HP-SSST, fil-każ attwali, ma hemm l-ebda differenza sinifikanti fil-prezz bejn l-istokk tal-fojl u AFRPs oħra li kienet tiddistingwi b’mod inekwivoku dan il-prodott minn AFRPs oħra.” Xiamen Xiashun affermat ukoll li, għall-kuntrarju tal-konklużjoni provviżorja tal-Kummissjoni, l-istess rapport tal-Korp tal-Appell talab analiżi segmentata meta jkun hemm differenzi sinifikanti fil-prezzijiet bejn żewġ segmenti.

(391)

Barra minn hekk, Xiamen Xiashun żiedet li, għall-kuntrarju ta’ AFRPs oħrajn li jvarjaw minħabba fatturi xprunati mid-domanda, il-prezz tal-istokk tal-fojl ma jvarjax ħafna ħlief għall-impatt tal-LME. Barra minn hekk, dan l-esportatur tenna l-affermazzjoni tiegħu li l-materjal tal-fojl huwa materja prima għal-laminazzjoni tal-fojl; jiġifieri ma huwiex prodott tal-użu finali, u li l-istokk tal-fojl huwa differenti minn kwalunkwe folja u pjanċa komuni oħrajn li huma soġġetti għal din l-investigazzjoni.

(392)

L-affermazzjoni relatata mal-assenza ta’ isem Xiamen Xiashun mill-ilment diġà ġiet indirizzata fil-premessa (304) tar-Regolament provviżorju, u l-Kummissjoni ma qablitx mad-dikjarazzjoni li ma eżaminatx l-affermazzjoni ta’ Xiamen Xiashun bir-reqqa. Id-diversi aspetti tal-affermazzjoni tagħha ġew indirizzati u l-Kummissjoni wettqet ħidma investigattiva addizzjonali fir-rigward tal-attivitajiet tal-klijenti tal-industrija tal-Unjoni li jixtru l-istess PCNs bħal dawk esportati minn Xiamen Xiashun, kif imsemmi fil-premessi (251) u (390). Barra minn hekk, l-ilment ma ppreżentax l-istokk tal-fojl bħala kategorija speċjali tal-prodott. Għall-kuntrarju, kien elenkat bħala wieħed mit-tipi ewlenin tal-prodott koperti mill-ilment fl-istess livell bħall-folji u l-kojls, il-pjanċi jew l-istokk tal-pinen.

(393)

Fir-rigward tar-referenza għar-rapport tal-Korp tal-Appell dwar HP-SSST, jenħtieġ li l-ewwel jiġi nnotat li jekk il-prodotti ta’ Xiamen Xiashun tqabblux ma’ prodotti oħrajn huwa irrilevanti, peress li Xiamen Xiashun ma wrietx li tali prodotti kienu jappartjenu għal segment tal-prodott differenti b’mod inekwivoku (ara l-premessi (303) sa (306) tar-Regolament provviżorju), jew li kienu jeżistu differenzi sinifikanti fil-prezzijiet bejn l-istokk tal-fojl u AFRPs oħrajn ikklassifikati taħt l-istess kodifikazzjoni tal-prodott. Fil-fatt, Xiamen Xiashun ma ssostanzjatx l-affermazzjoni tagħha b’evidenza ta’ sostenn, filwaqt li l-investigazzjoni żvelat li ma kien hemm l-ebda differenza sinifikanti fil-prezzijiet bejn l-istokk tal-fojl u AFRPs oħrajn ikklassifikati bl-użu tal-istess kodifikazzjoni tal-prodott. It-tieni, id-differenza fil-prezz imsemmija fil-premessa (255) ma hijiex komparabbli ma’ dik osservata fil-każ ta’ HP-SSST, fejn id-differenzi fil-prezzijiet laħqu l-100 jew il-200 %, kif imsemmi fil-premessa (302) tar-Regolament provviżorju. Għalhekk, meta wieħed iqis li ċ-ċirkostanzi huma differenti; jiġifieri li l-istokk tal-fojl ma jagħmilx parti minn segment differenti tal-prodott u ma hemm l-ebda differenza sinifikanti fil-prezzijiet, il-Kummissjoni ma aġixxietx b’mod li jmur kontra l-approċċ segwit fir-rapport tal-Korp tal-Appell ta’ HP-SSST.

(394)

F’dak li għandu x’jaqsam mal-fluttwazzjonijiet fil-prezzijiet, l-ewwel jenħtieġ li jiġi nnotat li l-affermazzjoni ta’ Xiamen Xiashun ma kinitx issostanzjata b’evidenza ta’ sostenn. Fi kwalunkwe każ, l-investigazzjoni żvelat li, b’mod simili għal AFRPs oħrajn bħall-AHEX AFRPs jew l-AFRPs għall-użu fil-produzzjoni tal-ACPs, l-istokk tal-fojl normalment jinbiegħ taħt kuntratti fuq terminu medju sa twil fejn il-prezz tal-konverżjoni ma jvarjax ħafna, jekk qatt ivarja. Madankollu, l-evidenza fil-fajl turi li l-bidliet fil-kundizzjonijiet tas-suq ikollhom impatt ugwali fuq l-istokk tal-fojl u fuq l-AFPRs l-oħrajn koperti mill-kamp ta’ applikazzjoni ta’ din l-investigazzjoni meta jiġġeddu l-kuntratti. F’dak li għandu x’jaqsam mal-affermazzjoni relatata mal-fatt li l-istokk tal-fojl huwa materja prima, issir referenza għall-premessa (306) tar-Regolament provviżorju fejn diġà ġiet indirizzata din l-affermazzjoni. Fir-rigward tal-paragun ma’ folji u ma’ pjanċi komuni, tqies li l-PCN kien jippermetti li ssir distinzjoni bejn dawn il-prodotti u l-istokk tal-fojl peress li l-PCN kien jidentifika elementi bħall-ħxuna u l-forma tal-AFRP.

(395)

Fuq il-bażi ta’ dan li ntqal hawn fuq, dawn l-affermazzjonijiet ġew miċħudin.

(396)

Wara l-iżvelar definittiv, Xiamen Xiashun ikkummentat dwar l-evoluzzjoni ta’ ċerti makroindikaturi għall-AFRPs tal-istokk tal-fojl kif previst mill-industrija tal-Unjoni. Peress li l-Kummissjoni ma qagħditx fuq tali informazzjoni għas-sejbiet definittivi tagħha, dawk il-kummenti ma ġewx indirizzati.

(397)

Wara l-iżvelar provviżorju, Airoldi tenniet it-talba tagħha għal analiżi speċifika għas-segmenti li tippermetti distinzjoni bejn prodotti ttrattati bis-sħana (ligi ibsin) u prodotti mhux ittrattati bis-sħana (ligi rotob) u żiedet ukoll li l-wisa’ tal-pjanċi u tal-folji kienet kruċjali sabiex tiġi ddefinita s-sitwazzjoni tas-suq. F’dan il-kuntest, hija affermat li l-produtturi tal-Unjoni għandhom limitazzjonijiet f’dak li għandu x’jaqsam mal-wisa’ tal-pjanċi / tal-folji u żiedet li kien hemm nuqqas ta’ kapaċità tal-produzzjoni u nuqqas ta’ materja prima għall-pjanċi tal-aluminju ttrattati bis-sħana fl-UE u, għalhekk, dawn il-prodotti jiġu kienu importati fi kwantitajiet sinifikanti fl-2019 mir-RPĊ, mill-Eġittu u min-Norveġja.

(398)

Fin-nuqqas ta’ kwalunkwe element ġdid li jikkonċerna t-talba għal analiżi speċifika għas-segmenti bejn ligi ibsin u rotob, ġew ikkonfermati fil-premessa (308), il-konklużjonijiet provviżorji li ħarġu. F’dak li għandu x’jaqsam mal-wisa’ tal-folji / tal-pjanċi, Airoldi ma pprovdiet l-ebda evidenza li kien hemm nuqqas ta’ provvista għal folji / għal pjanċi ta’ aktar minn 1 500 mm. Mill-fajl isegwi li tal-anqas żewġ produtturi tal-Unjoni għandhom it-tagħmir rilevanti sabiex jipproduċu folji / pjanċi usa’ minn 1 500 mm jew saħansitra 2 000 mm. Anke li kieku l-industrija tal-Unjoni ma kinitx f’pożizzjoni li timmanifattura l-prodott inkwistjoni fi kwantitajiet suffiċjenti, hemm produtturi f’pajjiżi terzi oħrajn bħal fit-Turkija li jistgħu jimmanifatturaw u jfornu lis-suq tal-Unjoni b’tali prodott. Fuq din il-bażi, din l-affermazzjoni ġiet miċħuda.

(399)

Fin-nuqqas ta’ kwalunkwe kumment ieħor fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi (296) sa (308) tar-Regolament provviżorju.

(400)

Il-Kummissjoni stabbiliet il-konsum tal-Unjoni fuq il-bażi tad-data ta’ European Aluminium għall-bejgħ fis-suq tal-Unjoni flimkien mad-data dwar l-importazzjonijiet mill-Eurostat kif stabbilit fit-Taqsima 4.5.1 ta’ hawn taħt.

(401)

Fl-EU27, il-konsum tal-Unjoni żviluppa kif ġej:

Tabella 3

Konsum tal-Unjoni (tunnellati)

(402)

Il-konsum tas-suq ħieles fl-Unjoni naqas bi 11 % matul il-perjodu kkunsidrat. Mill-2017 sal-2018, is-suq tal-Unjoni żdied b’1 % minn madwar 2,35 għal 2,45 miljun tunnellata qabel ma fl-2019 naqas b’4 punti perċentwali u kompla jonqos għal 2,1-2,2 miljun tunnellata fil-perjodu ta’ investigazzjoni. Il-konsum totali tal-Unjoni segwa xejra simili b’żieda ħafifa fl-2018 segwita minn tnaqqis fl-2019, li kompla fil-perjodu ta’ investigazzjoni bħala konsegwenza tal-pandemija tal-COVID-19, bi tnaqqis kumplessiv b’10 % matul il-perjodu kkunsidrat. Konsegwentement, wara l-bidliet fl-istatistika dwar l-importazzjonijiet, is-sejbiet dwar ix-xejriet fil-konsum fit-Taqsima 4.4. tar-Regolament provviżorju huma kkonfermati filwaqt li t-tnaqqis huwa kemxejn aktar evidenti.

(403)

Wara l-iżvelar provviżorju, importatur minnhom, Airoldi, afferma li l-konsum kien sottovalutat u li l-produzzjoni tal-UE kienet tammonta għal 5,6 – 5,8 miljun tunnellata u li l-importazzjonijiet mir-RPĊ ma setgħux jammontaw għal 10 %.

(404)

Madankollu, Airoldi ma ssostanzjatx l-affermazzjonijiet tagħha b’evidenza ta’ sostenn. Fi kwalunkwe każ, jidher li Airoldi bbażat l-affermazzjoni tagħha b’rabta mal-produzzjoni fuq ambitu usa’ tal-prodott; jiġifieri tinkludi prodotti mhux koperti minn din l-investigazzjoni. Fuq din il-bażi, din l-affermazzjoni ġiet miċħuda.

(405)

Wara l-iżvelar definittiv, SWA kkontesta ċ-ċifri tal-konsum tal-Unjoni rrapportati fit-Tabella 3 u afferma li s-“suq ta’ referenza” kien jaqbeż it-3,6 miljun tunnellata. Airoldi sostniet dak il-kumment.

(406)

Fin-nuqqas ta’ evidenza jew ta’ kalkoli ta’ sostenn, din l-affermazzjoni ġiet miċħuda.

(407)

Wara l-iżvelar definittiv, Xiamen Xiashun talbet li l-Kummissjoni tispjega jekk l-istatistika riveduta dwar l-importazzjoni tqisitx għall-kalkolu tal-konsum tal-Unjoni tal-prodott li qed jiġi investigat u, jekk iva, kif. Fittxet kjarifika dwar kif iċ-ċifri tal-konsum tal-Unjoni kienu nbidlu bejn l-iżvelar provviżorju u definittiv. Xiamen Xiashun staqsiet ukoll kif id-data dwar is-suq ristrett kienet baqgħet l-istess.

(408)

F’dan ir-rigward, issir referenza għall-premessi (383) u (384) li jsemmu li l-Kummissjoni bbażat is-sejbiet definittivi tagħha fuq data tal-EU27 u eskludiet ċerti AFRPs għall-użu fil-produzzjoni tal-ACPs mill-kamp ta’ applikazzjoni. Barra minn hekk, il-Kummissjoni qieset ukoll il-kummenti ta’ Xiamen Xiashun kif imsemmijin fil-premessa (390). Barra minn hekk, issir referenza għall-premessa (413) relatata mal-proċessar attiv. Barra minn hekk, ta’ min jinnota li l-iżvelar definittiv bi żball irrefera għat-Taqsima 4.2 minflok għat-Taqsima 4.5.1 f’dan ir-rigward.

(409)

L-informazzjoni relatata mas-suq ristrett ma kinitx affettwata mill-bidliet imsemmijin fil-premessi (383) u (384).

(410)

Wara l-iżvelar provviżorju, Xiamen Xiashun sostniet li l-Kummissjoni ma vvalutatx il-volumi u l-prezzijiet tal-importazzjoni b’mod akkurat peress li l-metodoloġija użata ma teskludix il-prodotti li jaqgħu taħt ex kodiċijiet mhux koperti mill-investigazzjoni.

(411)

Kif indikat fil-premessa (320) tar-Regolament provviżorju, il-Kummissjoni kompliet l-investigazzjoni tagħha dwar l-importazzjonijiet taħt ir-reġim ta’ proċessar attiv u b’mod partikolari l-kodiċi NM 7606 11 99. L-investigazzjoni żvelat li sehem kbir minn dawn l-importazzjonijiet ma kienx relatat mal-prodott li qed jiġi investigat. Għalhekk, dawk l-importazzjonijiet ġew esklużi mill-kalkolu tal-istatistika dwar l-importazzjoni.

(412)

Barra minn hekk, fid-dawl tal-kummenti riċevuti, il-Kummissjoni vvalutat mill-ġdid l-istatistika dwar l-importazzjoni u stabbiliet il-volum tal-importazzjonijiet fuq il-bażi ta’ data aġġustata tal-Eurostat bl-użu tal-metodoloġija spjegata lill-partijiet interessati u disponibbli fil-fajl (70). F’dan il-kuntest, hija eskludiet ukoll l-importazzjonijiet ta’ prodotti eżentati mid-dazju anti-dumping definittiv kif iddefiniti fl-Artikolu 2(2). Il-Kummissjoni vverifikat u kkonfermat l-istimi tal-ilmentatur fir-rigward tal-proporzjon tal-prodott ikkonċernat f’volumi u f’valuri importati taħt il-kodiċijiet NM indikati fin-Notifika ta’ Bidu u sussegwentement emendati bin-Notifika li emendat in-Notifika ta’ bidu (71).

(413)

Wara l-iżvelar definittiv, Xiamen Xiashun talbet kjarifika dwar kif il-Kummissjoni vverifikat l-akkuratezza tad-data statistika użata għall-valutazzjoni tal-importazzjonijiet mill-pajjiż ikkonċernat u b’mod partikolari l-akkuratezza tal-intelliġenza tas-suq użata minn EA. Barra minn hekk, hija staqsiet kif EA seta’ kellha aċċess għall-informazzjoni dwar l-importazzjonijiet fil-livell TARIC u lmentat dwar il-kunfidenzjalità mitluba f’ħafna aspetti. Kollox ma’ kollox, Xiamen Xiashun indikat li ma setgħetx tikkummenta u teżerċita d-drittijiet tad-difiża tagħha fuq il-bażi tal-informazzjoni fil-fajl. Barra minn hekk, Xiamen Xiashun indikat is-sottomissjoni tard tal-informazzjoni.

(414)

F’dan ir-rigward, ta’ min jinnota li l-Kummissjoni tgawdi minn diskrezzjoni dwar kif tivvaluta l-akkuratezza tal-informazzjoni li tirċievi. Fi kwalunkwe każ, kif jista’ jidher mill-fajl miftuħ, EA għamlet l-ewwel sottomissjoni (72) tal-istatistika dwar l-importazzjoni wara talbiet mill-Kummissjoni (73). Wara dik is-sottomissjoni, il-Kummissjoni analizzat l-informazzjoni li rċeviet billi vvalutat ir-razzjonalità tas-suppożizzjonijiet u tal-aġġustamenti magħmulin minn EA għal kull kodiċi NM u żgurat li l-informazzjoni sottomessa relatata esklussivament mal-kamp ta’ applikazzjoni tal-investigazzjoni kif definit mill-kodiċijiet TARIC differenti li nħolqu fil-bidu u fi matul il-proċediment. Bħala segwitu għall-kummenti tal-Kummissjoni (74), EA pprovdiet l-ewwel verżjoni sensittiva riveduta tal-istatistika tagħha dwar l-importazzjoni (75). Wara l-kummenti sensittivi addizzjonali mill-Kummissjoni (76), EA pprovdiet statistika riveduta dwar l-importazzjoni filwaqt li qieset il-kummenti tal-Kummissjoni. Dik l-istatistika ddaħħlet fil-fajl tal-każ flimkien ma’ noti ta’ spjegazzjoni relatati mal-metodoloġija applikata. Imbagħad, dik id-data, kif imsemmija fil-premessa (414), intużat sabiex jiġu stabbiliti l-importazzjonijiet tal-prodott li qed jiġi investigat. Fuq il-bażi ta’ dan ta’ hawn fuq, il-Kummissjoni qieset li vvalutat l-istatistika dwar l-importazzjoni kif ipprovduta minn EA bid-diliġenza neċessarja. L-informazzjoni fil-livell tal-kodiċi TARIC inkisbet minn EA wara talba motivata f’konformità mal-Artikolu 14(6) tar-Regolament bażiku (77).

(415)

Fir-rigward tal-eżerċitar tad-drittijiet tad-difiża, il-Kummissjoni qieset li l-informazzjoni pprovduta minn EA kienet dettaljata biżżejjed sabiex tippermetti fehim raġonevoli tal-informazzjoni sensittiva u tal-metodoloġija applikata (78). F’dan il-kuntest, il-Kummissjoni nnotat li l-ebda parti interessata ma kkummentat dwar il-kwalità tal-verżjoni mhux kunfidenzjali tal-informazzjoni sottomessa qabel ma ntużat bħala bażi għall-istabbiliment tal-volum tal-importazzjoni u tal-prezzijiet tal-importazzjoni. Fir-rigward tal-allegata sottomissjoni tard tal-informazzjoni, qed issir referenza għall-premessa (416) li tagħti dettalji dwar is-sekwenza tat-talba għal informazzjoni u tas-sottomissjonijiet u turi li EA ssottomettiet l-informazzjoni wara t-talba tal-Kummissjoni. Fuq din il-bażi, dawn l-affermazzjonjiet ġew miċħudin.

(416)

Minbarra l-analiżi tal-importazzjonijiet kumplessivi, il-Kummissjoni analizzat ukoll b’mod separat l-importazzjonijiet taħt il-proċessar attiv, minħabba s-sehem sinifikanti ta’ dawn tal-aħħar fil-każ inkwistjoni.

(417)

L-importazzjonijiet mill-pajjiż ikkonċernat fl-EU27 żviluppaw kif ġej:

Tabella 4

Volum u sehem mis-suq tal-importazzjonijiet

(418)

L-importazzjonijiet mill-pajjiż ikkonċernat żdiedu bid-doppju bejn l-2017 u l-2019 u laħqu l-201 928 tunnellata qabel ma naqsu bi 15,2 % bejn l-2019 u l-perjodu ta’ investigazzjoni. B’mod ġenerali, l-importazzjonijiet mir-RPĊ tal-AFRPs żdiedu b’70 % matul il-perjodu kkunsidrat.

(419)

L-importazzjonijiet mill-pajjiż ikkonċernat taħt proċessar attiv żdiedu b’mod sinifikanti fl-2018 u laħqu d-29 254 tunnellata qabel ma naqsu bi ftit fl-2019 u fi proporzjonijiet akbar fil-perjodu ta’ investigazzjoni. B’mod ġenerali, l-importazzjonijiet miċ-Ċina tal-AFRPs taħt ir-reġim ta’ proċessar attiv żdiedu b’49 % matul il-perjodu kkunsidrat.

(420)

L-importazzjonijiet mill-pajjiż ikkonċernat minbarra l-proċessar attiv żdiedu b’mod sinifikanti bejn l-2017 u l-2019 minn 86 033 tunnellata għal 175 829 tunnellata. Fil-perjodu ta’ investigazzjoni, naqsu b’26 751 tunnellata. B’mod ġenerali, dawn l-importazzjonijiet żdiedu b’73 % matul il-perjodu kkunsidrat.

(421)

Is-sehem mis-suq tal-importazzjonijiet mill-pajjiż ikkonċernat l-ewwel żdied minn 4,1 -4,5 % fl-2017 għal 8,7 – 9,1 % fl-2019 u, għalhekk, segwa direzzjoni opposta għall-iżvilupp tal-konsum matul l-istess perjodu. Fil-PI, is-sehem mis-suq naqas bi ftit għal 8 - 8,4 %. B’mod ġenerali, is-sehem mis-suq tal-importazzjonijiet mill-pajjiż ikkonċernat żdied bi 3.9 punti perċentwali matul il-perjodu tkkunsidrat, ekwivalenti għal żieda ta’ 90 %.

(422)

Is-sehem mis-suq tal-importazzjonijiet taħt ir-reġim ta’ proċessar attiv mill-pajjiż ikkonċernat żdied minn 0,4 – 0,8 % fl-2017 u għal 0,9 - 1,3 % fil-PI.

(423)

Is-sehem mis-suq tal-importazzjonijiet eskluż il-proċessar attiv mill-pajjiż ikkonċernat żdied minn 3,5 - 3,9 % fl-2017 għal 7,5 - 7,9 % fl-2019. Fil-PI, wara tnaqqis f’dawn l-importazzjonijiet u, b’mod aktar estiż, fil-konsum, is-sehem mis-suq tal-importazzjonijiet eskluż il-proċessar attiv naqas għal 6,9 - 7,3 %. B’mod ġenerali, dan is-sehem mis-suq żdied b’94 % matul il-perjodu kkunsidrat.

(424)

Wara l-iżvelar definittiv, Airoldi affermat li l-Kummissjoni ma għamlitx distinzjoni fi ħdan l-importazzjonijiet taħt il-proċessar attiv bejn id-diversi għażliet ta’ proċessar attiv u affermat li huma biss l-importazzjonijiet li sussegwentement ġew esportati li misshom ġew ikkunsidrati fl-istatistika dwar l-importazzjonijiet u fil-kalkoli tad-dannu.

(425)

F’dan ir-rigward, tqies li jenħtieġ li l-importazzjonijiet kollha taħt il-proċessar attiv jitqiesu irrispettivament mill-“għażla ta’ proċessar attiv”. Tabilħaqq, kif imsemmi fil-premessa (491), tali importazzjonijiet għandhom impatt fuq is-sitwazzjoni tal-industrija tal-Unjoni fis-sens li jirrappreżentaw volum mitluf f’termini kemm ta’ bejgħ kif ukoll ta’ produzzjoni. Fuq din il-bażi, din l-affermazzjoni ġiet miċħuda.

(426)

Il-Kummissjoni stabbiliet il-prezzijiet tal-importazzjonijiet fuq il-bażi tad-data tal-Eurostat, billi użat il-metodoloġija msemmija fil-premessa (414).

(427)

Il-prezz medju ponderat tal-importazzjonijiet mill-pajjiż ikkonċernat fl-EU27 żviluppa kif ġej:

Tabella 5

Prezzijiet tal-importazzjonijiet mill-pajjiż ikkonċernat (EUR/tunnellata)

(428)

Il-prezzijiet medji tal-importazzjonijiet miċ-Ċina naqsu bi 8 % matul il-perjodu kkunsidrat minn EUR 2 426 għal EUR 2 235 kull tunnellata. Dawk il-prezzijiet baqgħu b’mod sinifikanti taħt il-prezzijiet tal-bejgħ tal-Unjoni matul il-perjodu tkkunsidrat, kif muri fit-Tabella 9.

(429)

Il-prezz tal-importazzjoni taħt il-proċessar attiv segwa tendenza kontinwa ’l isfel u naqas b’6 % matul il-perjodu taħt kunsiderazzjoni.

(430)

Il-prezz tal-importazzjonijiet eskluż il-proċessar segwa tendenza simili u naqas kontinwament, hekk kif beda b’EUR 2 445/tunnellata fl-2017 u laħaq l-EUR 2 243 fil-PI (-8 %).

(431)

Fl-2018, għall-kuntrarju tal-evoluzzjoni tal-prezz tal-aluminju ta’ LME (+2 %), il-prezz tal-importazzjonijiet mill-pajjiż ikkonċernat naqas bi 2 %. Dan il-perjodu jikkoinċidi wkoll mal-perjodu meta l-importazzjonijiet mill-pajjiż ikkonċernat żdiedu b’mod sostanzjali. Il-prezz tal-importazzjonijiet mill-pajjiż ikkonċernat, nett mill-prezz tal-aluminju ta’ LME, l-ewwel naqas b’14 % fl-2018 qabel ma żdied fl-2019 u fil-PI sabiex laħaq żieda kumplessiva ta’ 4 %.

(432)

Wara l-iżvelar provviżorju, Jiangsu Alcha pprovdiet kummenti relatati mal-kalkolu tal-marġni tal-bejgħ taħt il-prezz tagħha kif indikat fil-premessa (374). Minbarra dawk il-kummenti u bidliet żgħar relatati mal-livell ta’ profitt miksub minn importaturi mhux relatati fl-UE użati sabiex jiġi stabbilit il-prezz tal-esportazzjoni għall-finijiet tal-Artikolu 2(9) tar-Regolament bażiku, il-marġni medju ponderat tat-twaqqigħ tal-prezz għall-produtturi esportaturi inklużi fil-kampjun li kkooperaw ġie rivedut u issa jvarja minn 4,4 % sa 9,3 % għall-importazzjonijiet mill-pajjiż ikkonċernat fis-suq tal-Unjoni. It-twaqqigħ tal-prezz medju ponderat li nstab kien ta’ 7 %.

(433)

Kif previst fit-Taqsima 1.9, l-ambitu ġeografiku ta’ din l-investigazzjoni kellu jiġi emendat. Għalhekk, l-ilmentatur u l-produtturi tal-Unjoni inklużi fil-kampjun issottomettew ċerti partijiet tat-tweġibiet oriġinali tagħhom għall-kwestjonarju b’data għall-EU27 biss. Barra minn hekk, fid-dawl tal-eżenzjoni provviżorja ta’ ċerti AFRPs għall-użu fil-produzzjoni tal-ACPs, l-ilmentatur u l-produtturi tal-Unjoni inklużi fil-kampjun intalbu jipprovdu data li permezz tagħha l-AFRPs għall-użu fil-produzzjoni tal-ACPs kif iddefiniti fl-Artikolu 2(2) jiġu ppreżentati separatament.

(434)

Għalhekk, il-Kummissjoni bbażat id-determinazzjonijiet tad-dannu definittivi tagħha fuq il-bażi tal-EU27 wara l-esklużjoni tad-data li tappartjeni għall-AFRPs għall-użu fil-produzzjoni tal-ACPs kif iddefiniti fl-Artikolu 2(2).

(435)

Wara l-iżvelar definittiv, Airoldi affermat li l-informazzjoni li tinsab fl-ilment ippreżentat minn EA ma kinitx ġiet ivverifikata bir-reqqa u ma kinitx korretta.

(436)

F’dan ir-rigward, ta’ min jinnota li, kif indikat fil-punt 5.2 tan-Notifika ta’ Bidu, l-iskadenza sabiex jiġu pprovduti kummenti dwar l-ilment għaddiet 37 jum wara d-data tal-pubblikazzjoni ta’ din in-notifika. Għalhekk, din l-affermazzjoni ġiet miċħuda fid-dawl tal-preżentazzjoni mhux puntwali tagħha. Fi kwalunkwe każ, il-kriterju legali skont l-Artikolu 5(3) tar-regolament bażiku ma jikkonċernax minnu nnifsu l-akkuratezza u l-adegwatezza tal-evidenza, iżda s-suffiċjenza tal-evidenza sabiex tinbeda l-investigazzjoni. (80) Fl-aħħar mill-aħħar, Airoldi naqset milli tipproduċi xi evidenza li tikkontradixxi d-determinazzjoni tal-Kummissjoni li l-ilment kien fih biżżejjed evidenza sabiex tinbeda l-investigazzjoni.

(437)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Produzzjoni, kapaċità tal-produzzjoni u użu tal-kapaċità

(438)

Matul il-perjodu kkunsidrat, il-volum tal-produzzjoni tal-industrija tal-Unjoni naqas bi 11 %, filwaqt li l-kapaċità tal-produzzjoni żdiedet bi 2 %. Konsegwentement, l-użu tal-kapaċità naqas bi 13 %, minn 91,3 % fl-2017 għal 79,8 % fil-perjodu ta’ investigazzjoni.

(439)

Xiamen Xiashun sostniet li t-tnaqqis fl-użu tal-kapaċità kien l-aktar notevoli fil-perjodu ta’ investigazzjoni u kien relatat ma’ tnaqqis fil-volum tal-esportazzjonijiet mill-industrija tal-Unjoni fl-istess perjodu. Hija affermat li fin-nuqqas ta’ tnaqqis fl-esportazzjonijiet, l-użu tal-kapaċità kien jilħaq it-78 %. Xiamen Xiashun affermat li t-tnaqqis fil-kapaċità kien marbut ma’ tnaqqis fil-volum tal-esportazzjonijiet.

(440)

Kif jidher fit-Tabella 6, l-użu tal-kapaċità naqas minn 91,3 % għal 79,8 % matul il-perjodu kkunsidrat. Anke li kieku l-impatt tat-tnaqqis fil-volum tal-esportazzjonijiet kellu jiġi nnewtralizzat; jiġifieri l-esportazzjonijiet kienu jibqgħu fl-istess livell fil-perjodu ta’ investigazzjoni, l-użu tal-kapaċità xorta kien jonqos għal 82,7 %, jew 9 % anqas mill-2017. Fuq din il-bażi, din l-affermazzjoni ġiet miċħuda.

(441)

Wara l-iżvelar definittiv, Xiamen Xiashun talbet kjarifika dwar id-differenza bejn id-data ppreżentata fir-Regolament provviżorju u l-iżvelar definittiv fir-rigward tat-Tabella 6 - Produzzjoni, kapaċità tal-produzzjoni u użu tal-kapaċità - u xeħtet dubju fuq il-fatt li d-differenzi kienu relatati biss mal-aġġustamenti msemmijin fil-premessi (435) u (436).

(442)

F’dan ir-rigward, il-Kummissjoni kkonfermat li d-differenzi huma relatati mal-aġġustamenti msemmijin aktar ’il fuq u mal-korrezzjoni magħmula fil-makroindikaturi ta’ EA, kif imsemmi fil-premessa (190). Fi kwalunkwe każ, ix-xejriet riflessi fiż-żewġ dokumenti jsegwu l-istess evoluzzjoni.

(443)

Il-volum ta’ bejgħ u s-sehem mis-suq tal-industrija tal-Unjoni żviluppaw kif ġej:

Tabella 7

Volum tal-bejgħ u sehem mis-suq

(444)

Il-bejgħ totali fl-UE segwa xejra ’l isfel matul il-perjodu kkunsidrat (-12 %) u kien diġà naqas b’5 % fl-2019.

(445)

Kif imsemmi fil-premessa (298) tar-Regolament provviżorju, parti żgħira ħafna mill-produzzjoni totali tal-produtturi tal-Unjoni kienet destinata għas-suq kaptiv. Din il-parti kienet tirrappreżenta anqas minn 1,6 % tal-konsum tal-Unjoni.

(446)

Il-bejgħ totali fis-suq ħieles mill-industrija tal-Unjoni naqas bi kważi 200 000 tunnellata matul il-perjodu kkunsidrat. Filwaqt li l-konsum kien żdied għall-ogħla livell tiegħu fl-2018 (+ 2 %), dak il-bejgħ diġà wera xejra ’l isfel (-2 %) li kompliet fl-2019 u fil-perjodu ta’ investigazzjoni. Il-bejgħ ġenerali fis-suq ħieles tal-UE naqas b’14 %.

(447)

Is-sehem mis-suq tal-bejgħ fis-suq ħieles tal-industrija tal-Unjoni naqas minn 66,6 - 67 % fl-2017 għal 64,6 - 65 % fil-perjodu ta’ investigazzjoni. Wara tnaqqis ta’ 4 % fl-2018, l-irkupru ħafif segwenti wassal għal tnaqqis kumplessiv ta’ 3 % fis-sehem mis-suq.

(448)

F’kuntest ta’ tnaqqis fil-konsum, l-industrija tal-Unjoni mhux biss tilfet il-volumi tal-bejgħ iżda wkoll is-sehem mis-suq fis-suq ħieles.

(449)

Għall-EU27, l-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(450)

L-impjiegi naqsu b’7 % matul il-perjodu kkunsidrat hekk kif l-industrija tal-Unjoni ppruvat tiżgura s-sostenibbiltà tagħha u tallinjaha mal-kundizzjonijiet fis-suq domestiku.

(451)

Konsegwentement, fl-2018, il-produttività tagħha l-ewwel tjiebet ftit minn 222 għal 238 tunnellata/FTE qabel ma naqset wara t-tnaqqis fil-volum tal-produzzjoni. Kumplessivament, il-produzzjoni ddeterjorat b’5 % tul il-perjodu kkunsidrat.

(452)

Il-marġnijiet kollha tad-dumping kienu ogħla b’mod sinifikanti mil-livell de minimis. L-impatt tad-daqs tal-marġnijiet effettivi tad-dumping fuq l-industrija tal-Unjoni kien sostanzjali, meta jitqiesu l-volum u l-prezzijiet tal-importazzjonijiet mill-pajjiż ikkonċernat.

(453)

Din hija l-ewwel investigazzjoni anti-dumping dwar il-prodott ikkonċernat. Għalhekk, ma kien hemm l-ebda data disponibbli sabiex jiġu vvalutati l-effetti ta’ dumping possibbli fil-passat.

(454)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni u l-kostijiet tal-produzzjoni tagħhom żviluppaw kif ġej matul il-perjodu kkunsidrat:

Tabella 9

Prezzijiet tal-bejgħ u kost tal-produzzjoni fl-Unjoni

(455)

Il-prezzijiet tal-bejgħ fis-suq tal-Unjoni lil partijiet mhux relatati (is-suq ħieles) l-ewwel żdiedu minn 2 812 għal EUR 2 912/tunellata fl-2018. Imbagħad naqas b’5 punti perċentwali fl-2019 qabel naqas għal EUR 2 703/tunnellata fil-perjodu ta’ investigazzjoni.

(456)

Il-kost unitarju korrispondenti tal-produzzjoni segwa xejra simili fejn l-ewwel żdied b’5 % għal EUR 2 872/tunnellata qabel ma naqas progressivament għal EUR 2 750/tunnellata fil-PI b’żieda ġenerali ta’ 1 % matul il-perjodu kkunsidrat.

(457)

Wara l-iżvelar provviżorju, Xiamen Xiashun sostniet li l-prezz tal-importazzjoni tal-importazzjonijiet mir-RPĊ nett mill-prezz ta’ referenza ta’ 3 Xhur ta’ LME Aluminium (“il-prezz tal-konverżjoni Ċiniż”) żdied matul il-perjodu kkunsidrat filwaqt li l-prezz tal-bejgħ tal-industrija tal-Unjoni nett mill-prezz ta’ referenza ta’ 3 Xhur ta’ LME Aluminium (“il-prezz tal-konverżjoni tal-UE) żdied b’mod kostanti u b’hekk xejjen is-sejba tal-Kummissjoni li l-prezzijiet tal-industrija tal-Unjoni segwew xejra ta’ tnaqqis allinjata mal-evoluzzjoni tal-prezz ta’ LME Aluminium.

(458)

It-Tabella 9 turi li l-prezz tal-konverżjoni tal-industrija tal-Unjoni żdied b’10 % matul il-perjodu kkunsidrat. Din is-sejba hija konformi mal-konklużjonijiet meħudin fil-premessa (355) tar-Regolament provviżorju li jindikaw li l-industrija tal-Unjoni adattat it-taħlita ta’ prodotti tagħha sabiex iżżid il-bejgħ tagħha ta’ prodotti b’valur miżjud għoli. Fid-dawl ta’ din l-evoluzzjoni u kif iddikjarat fil-premessa (356) tar-Regolament provviżorju, il-kost tal-produzzjoni tal-industrija tal-Unjoni żdied ukoll kif jidher fit-Tabella 9 tar-Regolament provviżorju u fit-Tabella 9 aktar ’il fuq. F’din it-tabella, wieħed jista’ jara li l-kost tal-konverżjoni tal-industrija tal-Unjoni (jiġifieri l-kost tal-produzzjoni nett mill-prezz ta’ LME Aluminium) żdied progressivament matul il-perjodu kkunsidrat u b’mod kumplessiv b’25 %. Kif diġà ssemma fil-premessa (371) tar-Regolament provviżorju, iż-żieda fil-kostijiet tal-konverżjoni b’25 % u ż-żieda fil-prezzijiet tal-konverżjoni b’10 % biss juru li l-industrija tal-Unjoni ma rnexxilhiex iżżid il-prezzijiet sal-istess punt li l-kostijiet kienu qed jiżdiedu minħabba t-trażżin tal-prezzijiet ikkawżat mill-importazzjonijiet miċ-Ċina (f’termini kemm ta’ volumi kif ukoll ta’ prezzijiet baxxi) li xeħtu pressjoni ’l isfel fuq il-prezzijiet tal-industrija tal-Unjoni.

(459)

Il-fatt li l-prezz tal-konverżjoni Ċiniż żdied juri li l-produtturi Ċiniżi esportaw progressivament aktar u aktar prodotti b’valur miżjud għoli lejn l-UE li kienu f’kompetizzjoni kbira mal-industrija tal-Unjoni. Kif imsemmi fil-premessa (434), dawn l-importazzjonijiet instabu li waqqgħu l-prezzijiet tal-industrija tal-Unjoni b’medja ta’ 7 % fil-perjodu ta’ investigazzjoni. Fuq din il-bażi, din l-affermazzjoni ġiet miċħuda.

(460)

Wara l-iżvelar provviżorju, Xiamen Xiashun sostniet li l-argument relatat mat-trażżin tal-prezzijiet stabbilit fir-Regolament provviżorju kien mingħajr raġuni valida fid-dawl taż-żieda limitata fil-kost tal-produzzjoni (+1 % matul il-perjodu kkunsidrat) u taż-żieda parallela fil-prezz tal-konverżjoni tal-industrija tal-Unjoni (+10 %).

(461)

Fir-rigward ta’ din l-affermazzjoni, jenħtieġ li l-prezz tal-konverżjoni tal-industrija tal-Unjoni jitqabbel ma’ kost korrispondenti; jiġifieri l-kost tal-konverżjoni tal-industrija tal-Unjoni li huwa wkoll nett mill-prezz ta’ LME Aluminium. Kif imsemmi fil-premessa (460), dan il-paragun juri li l-industrija tal-Unjoni ma setgħetx tikseb iż-żieda mistennija fil-prezz marbuta mal-prodotti b’valur miżjud ogħla li kienet qed taqleb għalihom, minħabba t-trażżin tal-prezzijiet ikkawżat mill-importazzjonijiet miċ-Ċina (f’termini kemm ta’ volumi kif ukoll ta’ prezzijiet baxxi). Fuq din il-bażi, din l-affermazzjoni ġiet miċħuda.

(462)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(463)

Matul il-perjodu kkunsidrat, il-kostijiet lavorattivi medji għal kull impjegat żdiedu bi kważi 5 %.

(464)

Il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Inventarji

(465)

L-istokks tal-għeluq baqgħu f’livell raġonevoli matul il-perjodu kkunsidrat. Peress li l-industrija tal-AFRPs ġeneralment topera fuq bażi ta’ produzzjoni skont l-ordni, dan l-indikatur huwa ta’ inqas importanza fl-analiżi ġenerali tad-dannu.

(466)

Il-perċentwal tal-istokkijiet tal-għeluq espress fuq il-produzzjoni juri żieda ġenerali li hija prinċipalment dovuta għat-tnaqqis fil-volum tal-produzzjoni.

(467)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabbiltà, fluss tal-flus, investimenti u redditu fuq l-investimenti

(468)

Il-profittabbiltà żviluppat billi segwiet xejra ’l isfel matul il-perjodu kkunsidrat u naqset minn 3,1 % fl-2017 għal -1,8 % fil-perjodu ta’ investigazzjoni.

(469)

Kif spjegat fil-premessi (457), (458) u (460), il-kostijiet tal-produtturi tal-Unjoni żdiedu aktar mill-prezzijiet tagħhom, li wassal għat-tnaqqis fil-profittabbiltà tal-industrija tal-Unjoni. L-industrija tal-Unjoni ma setgħetx iżżid il-prezzijiet bl-istess mod li bih kienu qed jiżdiedu l-kostijiet minħabba t-trażżin tal-prezzijiet ikkawżat mill-importazzjonijiet miċ-Ċina (f’termini kemm ta’ volumi kif ukoll ta’ prezzijiet baxxi). Tabilħaqq, matul il-perjodu kkunsidrat, il-prezzijiet Ċiniżi kienu konsistentement baxxi u ferm taħt il-prezzijiet tal-industrija tal-Unjoni (ara t-Tabelli 5 u 9), u llimitaw iż-żidiet fil-prezzijiet li kienu jkunu mistennijin fil-kuntest ta’ bidla fit-taħlita tal-prodotti (aktar prodotti ta’ valur miżjud għoli). Dan irriżulta fi trażżin tal-prezzijiet u fi tnaqqis fil-profittabbiltà. Fil-perjodu ta’ investigazzjoni, it-trażżin tal-prezzijiet kompla. Tabilħaqq, filwaqt li l-prezzijiet Ċiniżi żdiedu bi ftit, baqgħu ferm taħt il-livell tal-prezzijiet miksub mill-industrija tal-Unjoni. Evidenza ta’ dan huma wkoll il-marġnijiet sinifikanti ta’ twaqqigħ tal-prezz iddikjarati fil-premessa (434).

(470)

Ix-xejra fil-fluss tal-flus nett żviluppat b’mod negattiv matul il-perjodu kkunsidrat f’konformità mal-evoluzzjoni tal-profittabbiltà. Matul il-perjodu kkunsidrat, il-fluss tal-flus naqas b’54 %.

(471)

L-investimenti żdiedu b’117 % matul il-perjodu kkunsidrat. Dawn kienu xprunati mit-tnedija tal-pjanijiet ta’ investiment minn żewġ produtturi tal-Unjoni inklużi fil-kampjun. L-investimenti saru sabiex ikun hemm titjib fl-effiċjenza u sabiex in-negozji jitmexxew lejn prodotti b’valur miżjud għoli u enfasi fuq il-klijent. Dan tqies bħala essenzjali għall-produtturi inklużi fil-kampjun sabiex iżommu l-kompetittività fis-suq u jkunu jistgħu jsegwu l-aħħar żviluppi tal-prodott u joffru prodotti ta’ kwalità.

(472)

Nilo rreferiet għall-premessa (415) tar-Regolament provviżorju u affermat li ma ratx l-evidenza li tindika l-fatt li l-industrija tal-Unjoni hija dinamika u żiedet b’mod sinifikanti l-investimenti tagħha. Indikat ukoll li l-investimenti murijin mill-imtieħen tal-UE huma relatati mal-manutenzjoni aktar milli ma’ faċilitajiet ġodda tal-produzzjoni filwaqt li l-produtturi tal-aluminju Ċiniżi investew f’kapaċità addizzjonali billi użaw tagħmir Ewropew.

(473)

F’dan ir-rigward, issir referenza għat-Tabella 12 tar-Regolament provviżorju u għat-Tabella 12 aktar ’il fuq li turi li l-industrija tal-Unjoni investiet ammonti sinifikanti fil-prodott li qed jiġi investigat. Kif indikat fil-premessa (473), l-industrija tal-Unjoni mhux biss investiet fil-manutenzjoni iżda wkoll u primarjament f’titjib fl-effiċjenza, fi prodotti b’valur miżjud għoli u f’enfasi fuq il-klijenti. Dan huwa pprovat ukoll mill-komunikazzjonijiet tal-produtturi tal-Unjoni inklużi fil-kampjun dwar investimenti bħal dawn (81).

(474)

Wara l-iżvelar definittiv, SWA affermat li l-produtturi tal-Unjoni kellhom b’mod sistematiku EBITDA pożittiv għal snin sħaħ u li ma ġarrbux dannu mill-importazzjonijiet Ċiniżi. Airoldi sostniet dak il-kumment.

(475)

Fin-nuqqas ta’ evidenza ta’ sostenn dwar tali livelli ta’ EBITDA u r-rabta tagħhom mal-bejgħ tal-prodott li qed jiġi investigat lil klijenti mhux relatati fl-Unjoni, din l-affermazzjoni kellha tiġi miċħuda.

(476)

Ir-redditu fuq l-investimenti huwa l-profitt f’perċentwal tal-valur kontabilistiku nett tal-investimenti. Dan żviluppata b’mod negattiv matul il-perjodu kkunsidrat minn 12.4 % fl-2017 għal -2,5 % fil-PI. Dan l-iżvilupp isegwi t-tnaqqis fil-profittabbiltà tal-industrija tal-Unjoni.

(477)

Matul il-perjodu kkunsidrat, l-importazzjonijiet tal-AFRPs miċ-Ċina żdiedu b’mod sinifikanti kemm f’termini assoluti (+ 70 %) kif ukoll f’termini relattivi (+ 3.9 punti perċentwali fis-sehem mis-suq) filwaqt li l-konsum fl-UE naqas b’10 %. Iż-żieda fl-importazzjonijiet kienet tikkonċerna kemm l-importazzjonijiet taħt il-proċessar attiv kif ukoll l-importazzjonijiet minbarra l-proċessar attiv. Il-prezzijiet tal-importazzjonijiet Ċiniżi kienu konsistentement baxxi u b’mod sinifikanti taħt il-prezzijiet tal-industrija tal-Unjoni matul il-perjodu kkunsidrat. Matul il-perjodu ta’ investigazzjoni, il-prezzijiet tal-importazzjonijiet tal-produtturi esportaturi fil-kampjun waqqgħu l-prezzijiet tal-Unjoni b’medja ta’ 7 %. Irrispettivament mit-twaqqigħ tal-prezzijiet speċifiku li nstab fir-rigward tal-produtturi esportaturi inklużi fil-kampjun, il-Kummissjoni osservat ukoll li l-prezzijiet Ċiniżi kienu konsistentement baxxi u b’mod sinifikanti taħt il-prezzijiet tal-industrija tal-Unjoni matul il-perjodu kkunsidrat kollu (ara t-Tabelli 4 u 8). L-industrija tal-Unjoni ma setgħetx iżżid il-prezzijiet tal-konverżjoni bl-istess mod li bih kienu qed jiżdiedu l-kostijiet minħabba l-pressjoni ’l isfel ikkawżata mill-importazzjonijiet miċ-Ċina (f’termini kemm ta’ volumi kif ukoll ta’ prezzijiet baxxi).

(478)

Il-biċċa l-kbira tal-indikaturi makroekonomiċi wrew xejra negattiva matul il-perjodu kkunsidrat bħall-produzzjoni, l-użu tal-kapaċità, il-volum tal-bejgħ fis-suq tal-Unjoni, is-sehem mis-suq, l-impjiegi u l-produttività. Il-kapaċità u l-bejgħ / l-użu ristrett biss urew xejra pożittiva. B’mod simili, il-biċċa l-kbira tal-indikaturi mikroekonomiċi wrew xejra negattiva matul il-perjodu kkunsidrat bħall-prezzijiet tal-bejgħ fis-suq ħieles tal-UE, il-kost tal-produzzjoni, il-kostijiet lavorattivi, il-profittabbiltà, il-fluss tal-flus u r-redditu fuq l-investimenti. L-investimenti biss urew xejra pożittiva wara li l-produtturi inklużi fil-kampjun għamlu investimenti sabiex iżommu l-kompetittività u jsegwu l-aħħar żviluppi tal-prodott. Barra minn hekk, ħlief għall-produttività, l-istess indikaturi tad-dannu żviluppaw ukoll b’mod negattiv meta wieħed iħares lejn il-perjodu 2017-2019, jiġifieri, qabel il-bidu tal-pandemija tal-COVID-19.

(479)

L-industrija tal-Unjoni adattat it-taħlita tal-prodotti tagħha sabiex tiżgura marġnijiet aħjar fuq prodotti b’valur miżjud ogħla matul il-perjodu kkunsidrat filwaqt li żżomm volum suffiċjenti sabiex tnaqqas il-kostijiet fissi tagħha. F’dan il-kuntest, il-kostijiet tal-industrija tal-Unjoni żdiedu b’mod naturali. Barra minn hekk, l-industrija tal-Unjoni ma setgħetx tibbenefika miż-żieda fil-konsum fl-2018 u kellha tnaqqas il-kostijiet fissi tagħha fuq volum tal-produzzjoni aktar baxx (-11 %) li kkontribwixxa għal żieda ġenerali fil-kostijiet tal-produzzjoni (1 %) filwaqt li l-prezz tal-aluminju ta’ 3 xhur ta’ LME kien naqas (-12 %). F’dak li għandu x’jaqsam mal-prezzijiet tal-bejgħ, l-industrija tal-Unjoni affaċċjat ukoll kompetizzjoni qawwija fis-swieq ta’ valur miżjud ogħla u ma setgħetx iżżid il-prezzijiet tagħha għal-livell mistenni (-4 %). Fid-dawl tal-iżviluppi fil-kostijiet u fil-prezzijiet, il-profittabbiltà ddeterjorat b’mod progressiv u qalbet għal sitwazzjoni ta’ telf diġà fl-2019 qabel ma s-sitwazzjoni aggravat fil-perjodu ta’ investigazzjoni.

(480)

Wara l-iżvelar provviżorju, l-ACEA talbiet lill-Kummissjoni sabiex tqis l-evoluzzjoni tal-prezz tal-aluminju wara t-tmiem tal-perjodu ta’ investigazzjoni fil-valutazzjoni tad-dannu għall-industrija tal-Unjoni.

(481)

Billi l-analiżi tas-sitwazzjoni tad-dannu hija limitata għall-perjodu kkunsidrat kif imsemmi fil-premessa (49) tar-Regolament provviżorju, din l-affermazzjoni ma tqisitx valida u, għalhekk, ġiet miċħuda.

(482)

Kif spjegat fit-Taqsima 1.9, il-ħruġ tar-Renju Unit mill-Unjoni Ewropea involva reviżjoni tal-indikaturi mikroekonomiċi u makroekonomiċi u ta’ ftit data oħra. Barra minn hekk, ċerti prodotti eżentati mid-dazju anti-dumping definittiv kif iddefiniti fl-Artikolu 2(2) ġew esklużi mill-analiżi. Madankollu, id-differenzi bejn it-Tabelli 3-12 tar-Regolament provviżorju u t-Tabelli 2-11 ta’ dan ir-Regolament huma insinifikanti, f’termini kemm ta’ unitajiet kif ukoll ta’ xejriet. Il-livelli ta’ twaqqigħ tal-prezz baqgħu sinifikanti. Konsegwentement, il-Kummissjoni kkonkludiet li l-ħruġ tar-Renju Unit u l-esklużjoni ta’ ċerti prodotti ma jbiddlux il-konklużjoni dwar id-dannu milħuqa fir-Regolament provviżorju.

(483)

Wara l-iżvelar definittiv, Airoldi affermat li l-indikaturi tad-dannu bħall-produzzjoni u l-profittabbiltà kienu inkonsistenti mal-informazzjoni disponibbli għall-pubbliku relatata ma’ ċerti produtturi tal-Unjoni.

(484)

F’dan ir-rigward, ta’ min jinnota li l-informazzjoni disponibbli għall-pubbliku msemmija minn Airoldi ma kinitx relatata mal-prestazzjoni tal-industrija tal-Unjoni fis-suq tal-Unjoni fir-rigward tal-prodotti kkonċernati minn din l-investigazzjoni iżda ma’ ambitu tal-prodott ferm akbar, u kienet tkopri wkoll swieq barra l-Unjoni Ewropea. F’xi okkażjonijiet, l-informazzjoni kienet relatata wkoll mal-prestazzjoni tal-grupp li għalih kien jappartjeni l-produttur tal-Unjoni, f’livell globali. Fid-dawl tad-differenza fl-ambitu tal-prodott u dak ġeografiku, din l-affermazzjoni ġiet miċħuda.

(485)

Fuq il-bażi ta’ dak li ntqal hawn fuq, il-Kummissjoni kkonkludiet li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(486)

Il-GTĊ afferma li jenħtieġ li l-prestazzjoni batuta tal-industrija tal-Unjoni fir-rigward ta’ xi indikaturi ma tiġix attribwita għall-importazzjonijiet miċ-Ċina li s-sehem mis-suq tagħhom, kif stabbilit fir-Regolament provviżorju, żdied biss minn 5,5 % għal 8,5 %, u b’hekk baqa’ taħt l-10 % meta jiġu esklużi l-importazzjonijiet taħt il-proċessar attiv, iżda pjuttost għal kostijiet għoljin tal-produzzjoni u għal domanda batuta fl-UE u barra minnha.

(487)

Il-Kummissjoni fakkret li l-analiżi tad-dannu hija bbażata fuq valutazzjoni olistika tal-indikaturi kollha. Kif spjegat fil-premessa (423), l-importazzjonijiet mill-pajjiż ikkonċernat żdiedu f’termini kemm assoluti kif ukoll relattivi f’perjodu meta l-konsum fis-suq tal-Unjoni kien qed jonqos. Bħala tali, l-importazzjonijiet mill-pajjiż ikkonċernat ma segwewx ix-xejra tal-konsum f’perjodu li fih id-domanda kienet qed tonqos u, b’hekk, żiedu l-pressjoni fuq l-industrija tal-Unjoni. Barra minn hekk, dawn l-importazzjonijiet saru bi prezzijiet dannużi kif muri mil-livell tal-marġnijiet ta’ twaqqigħ tal-prezz li nstabu u kkawżaw trażżin tal-prezzijiet. Fir-rigward tal-kostijiet tal-produzzjoni, kif spjegat fil-premessi (458) sa (460), dawn żdiedu bħala konsegwenza tal-bidla tal-industrija tal-Unjoni għal prodotti ta’ valur miżjud ogħla u minħabba l-volum ta’ bejgħ mitluf marbut maż-żieda fl-importazzjonijiet mill-pajjiż ikkonċernat li bihom żdiedu l-kostijiet fissi tal-industrija tal-Unjoni għal kull unità. Fid-dawl ta’ dawn l-elementi, din l-affermazzjoni ġiet miċħuda.

(488)

Xiamen Xiashun affermat li l-Kummissjoni qieset li l-importazzjonijiet taħt ir-reġim ta’ proċessar attiv ikkawżaw dannu iżda ma pprovdiet l-ebda evidenza f’dan ir-rigward. Hija affermat ukoll li l-iżvilupp tal-prestazzjoni tal-esportazzjonijiet tal-industrija tal-Unjoni kien allinjat mal-iżvilupp tal-importazzjonijiet taħt ir-reġim ta’ proċessar attiv.

(489)

L-ewwel nett ta’ min jinnota li kif irrapportat fit-Tabella 4, il-volum tal-importazzjonijiet taħt il-proċessar attiv ġie rivedut ’l isfel u issa jirrappreżenta sehem limitat tal-importazzjonijiet mill-pajjiż ikkonċernat. It-tieni, l-importazzjonijiet taħt ir-reġim ta’ proċessar attiv żdiedu matul il-perjodu kkunsidrat u saru bi prezzijiet aktar baxxi mill-prezz tal-bejgħ tal-industrija tal-Unjoni lil klijenti mhux relatati. Fi kwalunkwe każ, dawn l-importazzjonijiet kellhom impatt fuq is-sitwazzjoni tal-industrija tal-Unjoni fis-sens li jirrappreżentaw volum mitluf f’termini kemm ta’ bejgħ kif ukoll ta’ produzzjoni. Bħala tali, dawn il-volumi addizzjonali kienu jippermettu lill-industrija tal-Unjoni tifrex il-kostijiet fissi tagħha fuq volum akbar u, b’hekk, ittejjeb is-sitwazzjoni tal-kostijiet u tal-profitt tagħha. Fuq din il-bażi, din l-affermazzjoni ġiet miċħuda.

(490)

Għalkemm il-prestazzjoni tal-esportazzjoni tal-industrija tal-Unjoni kif murija fit-Tabella 14 segwiet xejra simili bħall-importazzjonijiet mill-pajjiż ikkonċernat taħt il-proċessar attiv, iż-żieda assoluta bejn l-2017 u l-2019, u t-tnaqqis fil-PI ma jistgħux jitqabblu mal-evoluzzjoni tal-importazzjonijiet taħt il-proċessar attiv fl-istess perjodu. Tabilħaqq, il-bidliet fil-volum esportat huma ħafna aktar sinifikanti. Barra minn hekk, il-fatt li ċerti AFRPs jiġu importati taħt il-proċessar attiv ma jfissirx li l-prodott esportat jaqa’ wkoll fi ħdan il-kamp ta’ applikazzjoni ta’ din l-investigazzjoni. Fuq din il-bażi, din l-affermazzjoni ġiet miċħuda.

(491)

Xiamen Xiashun issottomettiet li l-importazzjonijiet mir-RPĊ komplew jonqsu wara l-perjodu ta’ investigazzjoni u li l-prezzijiet tal-importazzjoni segwew xejra ’l fuq fl-istess perjodu.

(492)

Billi l-analiżi tas-sitwazzjoni tad-dannu hija limitata għall-perjodu kkunsidrat kif imsemmi fil-premessa (49) tar-Regolament provviżorju, din l-affermazzjoni ġiet miċħuda.

(493)

Wara l-iżvelar definittiv, SWA affermat li l-Kummissjoni missha analizzat l-informazzjoni dwar ir-riċerka tas-suq ipprovduta minn Harbour jew minn CRU, u li kienet tasal għall-konklużjoni li s-swieq ilhom aktar minn 10 snin joperaw f’kompetizzjoni sħiħa u f’konformità mar-regoli. Airoldi sostniet dak il-kumment.

(494)

Peress li din l-affermazzjoni kienet vaga u ma kienx fiha l-informazzjoni dwar ir-riċerka tas-suq li qed issir referenza għaliha, ġiet miċħuda.

(495)

Wara l-iżvelar provviżorju, Xiamen Xiashun tenniet l-affermazzjoni tagħha li t-tnaqqis fil-produzzjoni u fil-bejgħ għall-produtturi tal-Unjoni kien relatat mat-tnaqqis fil-konsum, speċjalment fil-perjodu ta’ investigazzjoni. Xiamen Xiashun affermat ukoll li l-Kummissjoni ffokat fuq l-iżvilupp fl-2019 u injorat l-iżvilupp fil-PI, jiġifieri fir-rigward tal-importazzjonijiet minn pajjiżi oħrajn, meta vvalutat l-evoluzzjoni tas-sehem mis-suq tal-bejgħ fis-suq ħieles tal-industrija tal-Unjoni.

(496)

Kif diġà ssemma fil-premessi minn (390) u (391) tar-Regolament provviżorju u kkonfermat mill-istatistika aġġornata dwar l-importazzjoni, huwa mfakkar li l-importazzjonijiet mir-RPĊ żdiedu b’aktar mid-doppju bejn l-2017 u l-2019. Barra minn hekk, filwaqt li l-konsum naqas fl-2019, l-importazzjonijiet mir-RPĊ komplew jiżdiedu u b’hekk kellhom impatt negattiv fuq is-sitwazzjoni tal-industrija tal-Unjoni kif muri minn diversi indikaturi. Filwaqt li s-sehem mis-suq tal-importazzjonijiet mir-RPĊ naqas bi ftit minn 8,7 – 9,1 % fl-2019 għal 8 – 8,4 % fil-PI, l-importazzjonijiet mir-RPĊ żdiedu b’mod ġenerali b’70 % matul il-perjodu kkunsidrat u baqgħu f’livell sinifikanti fil-PI. Barra minn hekk, anki jekk l-importazzjonijiet mir-RPĊ saru bi prezzijiet ogħla fil-PI, instab li dawn il-prezzijiet waqqgħu l-prezzijiet tal-industrija tal-Unjoni b’medja ta’ 7 %. Filwaqt li ma jistax jiġi miċħud li l-konsum naqas fil-PI u affettwa s-sitwazzjoni tal-industrija tal-Unjoni, element bħal dan ma jistax ikisser ir-rabta kawżali meta titqies il-preżenza dejjem akbar tal-importazzjonijiet mill-pajjiż ikkonċernat li jidħlu fis-suq tal-Unjoni bi prezzijiet li jwaqqgħu b’mod sinifikanti l-prezzijiet tal-industrija tal-Unjoni u l-impatt li tali importazzjonijiet kellhom fuq l-industrija tal-Unjoni matul il-perjodu 2017-2019 u fil-PI.

(497)

F’dak li għandu x’jaqsam mal-importazzjonijiet minn pajjiżi terzi, filwaqt li kisbu sehem mis-suq fil-PI, dawn juru xejra ’l isfel matul il-perjodu kkunsidrat (-1,9 punt perċentwali). Barra minn hekk, kif indikat fil-premessa (505), il-prezz medju ta’ dawn l-importazzjonijiet kien kontinwament ogħla mill-prezz medju tal-importazzjoni mill-pajjiż ikkonċernat. Fuq din il-bażi, tqies li l-importazzjonijiet minn pajjiżi terzi ma jkissrux ir-rabta kawżali.

(498)

Wara l-iżvelar definittiv, Xiamen Xiashun affermat li l-produzzjoni, l-użu tal-kapaċità u l-bejgħ naqsu biss b’mod sostanzjali meta l-konsum naqas b’mod sinifikanti; jiġifieri fil-PI. Fuq din il-bażi, hija qieset li t-tnaqqis fil-konsum kien tali li jtaffi r-rabta kawżali bejn l-importazzjonijiet miċ-Ċina u l-indikaturi ekonomiċi tal-industrija tal-Unjoni.

(499)

Kif imsemmi fil-premessa (498), l-importazzjonijiet mir-RPĊ żdiedu b’aktar mid-doppju bejn l-2017 u l-2019, u kellhom impatt negattiv fuq il-maġġoranza l-kbira tal-indikaturi tad-dannu inklużi l-produzzjoni, l-użu tal-kapaċità u l-bejgħ, iżda wkoll fuq indikaturi oħrajn bħall-profittabbiltà, il-fluss tal-flus u l-kost lavorattiv. Dak l-impatt seħħ qabel ma l-konsum naqas fil-PI. Fuq din il-bażi, din l-affermazzjoni ġiet miċħuda.

(500)

Fin-nuqqas ta’ kwalunkwe kumment ieħor fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi (386) sa (391) tar-Regolament provviżorju.

(501)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (392) sa (395) tar-Regolament provviżorju.

(502)

Il-volum tal-importazzjonijiet minn pajjiżi terzi oħrajn żviluppa kif ġej matul il-perjodu kkunsidrat:

Tabella 13

Importazzjonijiet minn pajjiżi terzi

(503)

Matul il-perjodu kkunsidrat, l-importazzjonijiet minn pajjiżi għajr il-pajjiż ikkonċernat naqsu bi 17 %; is-sehem mis-suq tagħhom naqas minn 28,7 – 29,1 % għal 26,8 – 27,2 %. Il-prezz medju ta’ dawn l-importazzjonijiet kien kontinwament ogħla mill-prezz medju tal-importazzjoni mill-pajjiż ikkonċernat.

(504)

L-importazzjonijiet mill-Iżvizzera naqsu bi 22 % matul il-perjodu kkunsidrat. Is-sehem mis-suq tagħhom segwa wkoll xejra ’l isfel (-0,6 %). Il-prezz medju tal-importazzjonijiet mill-Iżvizzera naqas iżda baqa’ ferm ogħla mill-prezz tal-importazzjonijiet mill-pajjiż ikkonċernat.

(505)

L-importazzjonijiet mit-Turkija żdiedu b’10 % matul il-perjodu kkunsidrat. Is-sehem mis-suq tagħhom segwa wkoll xejra ’l fuq ukoll (+1,2 %). Il-prezz medju tal-importazzjonijiet mit-Turkija naqas ukoll iżda baqa’ ferm ogħla mill-prezz tal-importazzjonijiet mill-pajjiż ikkonċernat.

(506)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (396) sa (402) tar-Regolament provviżorju.

(507)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (403) sa (407) tar-Regolament provviżorju.

(508)

Il-volum u l-prezzijiet tal-esportazzjonijiet tal-industrija tal-Unjoni lil partijiet mhux relatati żviluppaw kif ġej matul il-perjodu kkunsidrat:

Tabella 14

Prestazzjoni tal-esportazzjonijiet

(509)

Il-produtturi tal-Unjoni żiedu l-volumi tal-esportazzjoni mill-2017 għall-2019 qabel ma naqsu b’mod sinifikanti fil-PI. B’mod ġenerali, il-volum tal-esportazzjonijiet naqas b’4 % matul il-perjodu kkunsidrat u baqa’ taħt iż-2 miljun tunnellata fl-2019. B’mod ġenerali, il-volumi esportati mill-industrija tal-Unjoni kienu jirrappreżentaw anqas minn 6 % tal-volum ta’ bejgħ tagħha fis-suq ħieles tal-Unjoni.

(510)

Kif indikat fil-premessa (413) tar-Regolament provviżorju, fl-isfond tal-kontribut tagħhom għall-produzzjoni u għall-bejgħ totali tal-industrija tal-Unjoni, u meta wieħed iżomm f’moħħu l-prezz għoli tal-esportazzjonijiet tal-industrija tal-Unjoni lejn pajjiżi terzi u l-volum stabbli tagħhom, huwa konkluż li l-prestazzjoni tal-esportazzjoni ma kkontribwietx għad-dannu materjali mġarrab mill-industrija tal-Unjoni.

(511)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (408) sa (413) tar-Regolament provviżorju.

(512)

Wara l-iżvelar definittiv, Xiamen Xiashun affermat li l-Kummissjoni naqset milli tqis li ż-żieda fil-prezz tal-konverżjoni mill-produtturi tal-Unjoni inklużi fil-kampjun taħt iż-żieda fil-kost tal-konverżjoni tal-produzzjoni setgħet ġiet ikkawżata minn fatturi oħrajn minbarra l-importazzjonijiet miċ-Ċina bħal tagħmir tal-produzzjoni skadut u linji tal-produzzjoni ineffiċjenti. F’dan ir-rigward, hija żiedet ukoll li l-investimenti tard fit-titjib fl-effiċjenza ma ppermettietx lill-industrija taffaċċja tnaqqis sinifikanti fil-konsum.

(513)

Il-Kummissjoni qieset dawn l-elementi u indirizzat il-kummenti f’dan ir-rigward fil-premessi (414) sa (421) tar-Regolament provviżorju. F’dak li għandu x’jaqsam mal-affermazzjoni relatata mal-investimenti, il-Kummissjoni qieset li l-investimenti fit-titjib fl-effiċjenza u fil-prodotti b’valur miżjud ogħla kif deskritti fit-Tabella 12 u fil-premessa (473) ippermettew lill-industrija tillimita d-dannu kkawżat mill-importazzjonijiet oġġett ta’ dumping iżda ma setgħux jiġġieldu ż-żieda ġenerali fl-importazzjonijiet u fis-sehem mis-suq mill-importazzjonijiet Ċiniżi matul il-perjodu kkunsidrat.

(514)

Fin-nuqqas ta’ kummenti addizzjonali fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi (414) sa (421) tar-Regolament provviżorju.

(515)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (422) sa (423) tar-Regolament provviżorju.

(516)

Fin-nuqqas ta’ kummenti fir-rigward ta’ din it-taqsima, il-Kummissjoni kkonfermat il-konklużjonijiet tagħha stabbiliti fil-premessi minn (424) sa (426) tar-Regolament provviżorju.

(517)

Fuq il-bażi ta’ dak li ntqal hawn fuq u fin-nuqqas ta’ kwalunkwe kumment ieħor, il-Kummissjoni kkonkludiet li l-ebda wieħed mill-fatturi, analizzati b’mod individwali jew kollettiv, ma naqqas ir-rabta kawżali bejn l-importazzjonijiet oġġett ta’ dumping u d-dannu mġarrab mill-industrija tal-Unjoni bl-effett li tali rabta ma tibqax ġenwina u sostanzjali, li jikkonferma l-konklużjoni fil-premessi (427) sa (428) tar-Regolament provviżorju.

(518)

L-ebda parti ma kkontestat li l-miżuri jkunu fl-interess tal-industrija tal-Unjoni. Għaldaqstant, il-konklużjonijiet stabbiliti fil-premessi (429) sa (433) tar-Regolament provviżorju ġew ikkonfermati.

(519)

Wara l-iżvelar provviżorju, l-importatur Airoldi afferma li, minkejja sehem mis-suq ta’ bejn 80 u 85 % għall-produtturi tal-Unjoni u meta wieħed iqis sehem mis-suq ta’ bejn wieħed u ieħor 4 - 5 % għall-importazzjonijiet mill-pajjiż ikkonċernat, l-industrija tal-Unjoni qagħdet fuq l-istrumenti għad-difiża tal-kummerċ sabiex issaħħaħ il-pożizzjoni tagħha fis-suq. Airoldi talab ukoll analiżi tas-sitwazzjoni kompetittiva fis-suq tal-Unjoni fid-dawl tal-allegat numru baxx ta’ operaturi fis-suq tal-Unjoni u l-fatt li l-importazzjonijiet mir-RPĊ ġew allegatament esklużi mis-suq. Airoldi indika wkoll numru ta’ argumenti relatati ma’ prodotti estrużi.

(520)

F’dan ir-rigward, l-investigazzjoni żvelat li, għall-kuntrarju ta’ dak li ġie ddikjarat minn dan l-importatur mhux relatat, u kif imsemmi fit-Tabella 7, is-sehem mis-suq tal-industrija tal-Unjoni kien ferm inqas mill-80-85 % affermati u fil-fatt kien jammonta għal 64,6 - 65 % fil-PI. B’mod simili, is-sehem mis-suq tal-importazzjonijiet mill-pajjiż ikkonċernat kien ferm ogħla mill-4-5 % ikkwotati u żdied minn 4,1 – 4,5 % fl-2017 għal 8,0 – 8,4 % fil-PI. Barra minn hekk, kif indikat fil-premessa (458) tar-Regolament provviżorju, ma hemm l-ebda indikazzjoni fil-fajl dwar l-imġiba antikompetittiva preżenti jew futura jew oligopolija abbużiva mill-industrija tal-Unjoni. Konsegwentement, il-Kummissjoni ma identifikat l-ebda interess prevalenti sabiex twettaq analiżi bħal din.

(521)

Barra minn hekk, filwaqt li l-miżuri anti-dumping jista’ jkollhom effett importanti fuq is-suq, ma jimplikawx li ċertu prodott ma jistax jidħol aktar fis-suq tal-Unjoni. L-iskop tal-applikazzjoni tad-dazji anti-dumping ma huwiex li jiġu esklużi l-importazzjonijiet mill-pajjiż ikkonċernat iżda li jiġu stabbiliti kundizzjonijiet ekwi billi tiġi rrestawrata l-kompetizzjoni ġusta. Peress li din l-investigazzjoni ma tikkonċernax prodotti estrużi, l-affermazzjonijiet relatati ma’ dawn il-prodotti ma ġewx indirizzati f’dan ir-Regolament.

(522)

In-negozjant Nilo u l-utent Airoldi affermaw ukoll li s-sitwazzjoni ta’ wara l-PI, ikkaratterizzata minn żieda fil-prezzijiet u minn nuqqas temporanju ta’ materjal, kienet qed tiffavorixxi lil ftit produtturi u telimina lil kumpaniji oħrajn fl-Unjoni bħal importaturi u distributuri mis-suq. Madankollu, dawn il-partijiet ma pprovdewx evidenza fir-rigward tal-fatt li l-importaturi u d-distributuri ġew eliminati mis-suq. Fuq il-bażi ta’ dan li ntqal hawn fuq, dawn l-affermazzjonijiet ġew miċħudin.

(523)

Wara l-iżvelar definittiv, Airoldi ddikjara li, għall-kuntrarju tas-sejba tal-Kummissjoni, huwa pprovda lill-Kummissjoni b’lista dettaljata tal-prezzijiet u b’ħarsa ġenerali dettaljata lejn id-dinamika tas-suq tal-aluminju.