(1)

Le Rialachán (AE) 2021/953, leagtar síos creat chun deimhnithe idir-inoibritheacha COVID-19 i ndáil le vacsaíniú, tástáil agus téarnamh (“Deimhniú Digiteach COVID AE”) a eisiúint agus a fhíorú agus chun go nglacfaí leo, ionas go n-éascófar do na sealbhóirí a gceart chun saorghluaiseachta a fheidhmiú le linn phaindéim COVID-19. Rannchuidítear freisin le héascú a dhéanamh ar dheireadh a chur de réir a chéile agus ar mhodh comhordaithe le srianta ar an tsaorghluaiseacht a chuir na Ballstáit i bhfeidhm, i gcomhréir le dlí an Aontais, chun leathadh SARS-CoV-2 a theorannú.

(2)

Le Rialachán (AE) 2021/953, déantar foráil maidir le glacadh le deimhnithe COVID-19 a eisíonn tríú tíortha do shaoránaigh den Aontas agus dá mbaill teaghlaigh i gcás ina gcinneann an Coimisiún go n-eisítear na deimhnithe COVID-19 sin i gcomhréir le caighdeáin ar cheart a mheas go bhfuil siad coibhéiseach leis na caighdeáin a bhunaítear de bhun an Rialacháin sin. Thairis sin, i gcomhréir le Rialachán (AE) 2021/954 ó Pharlaimint na hEorpa agus ón gComhairle (2), ní mór do na Ballstáit na rialacha a leagtar síos i Rialachán (AE) 2021/953 a chur i bhfeidhm maidir le náisiúnaigh tríú tír nach dtagann faoi raon feidhme an Rialacháin sin, ach atá ag fanacht go dleathach nó a bhfuil cónaí orthu go dleathach ar a gcríoch agus atá i dteideal taisteal chuig Ballstáit eile i gcomhréir le dlí an Aontais. Dá bhrí sin, aon fhionnachtain choibhéise a leagtar síos sa Chinneadh seo, ba cheart feidhm a bheith aici maidir le deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong do shaoránaigh den Aontas agus dá mbaill teaghlaigh. Mar an gcéanna, ar bhonn Rialachán (AE) 2021/954, tá feidhm ag na fionnachtana coibhéise sin freisin maidir le deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong do náisiúnaigh tríú tír atá ag fanacht go dleathach nó a bhfuil cónaí orthu go dleathach ar chríoch na mBallstát faoi na coinníollacha a leagtar síos sa Rialachán sin.

(3)

An 5 Iúil 2022, chuir Sainréigiún Riaracháin Hong Cong faisnéis mhionsonraithe ar fáil don Choimisiún maidir le heisiúint deimhnithe idir-inoibritheacha COVID-19 i ndáil le vacsaíniú, tástáil agus téarnamh faoin gcóras darb ainm “COVID-19 Electronic Vaccination and Testing Record System (eVT) [Córas Taifeadta Leictreonach i ndáil le Vacsaíniú agus Tástáil COVID-19]”. Chuir Sainréigiún Riaracháin Hong Cong an Coimisiún ar an eolas go measann sé go bhfuil a dheimhnithe COVID-19 á n-eisiúint i gcomhréir le caighdeán agus córas teicneolaíochta atá idir-inoibritheach leis an gcreat iontaoibhe a bhunaítear le Rialachán (AE) 2021/953, caighdeán agus córas teicneolaíochta lena bhféadfar barántúlacht, bailíocht agus sláine na ndeimhnithe a fhíorú. I dtaca leis sin, chuir Sainréigiún Riaracháin Hong Cong an Coimisiún ar an eolas go bhfuil na sonraí dá dtagraítear san Iarscríbhinn a ghabhann le Rialachán (AE) 2021/953 san áireamh sna deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong i gcomhréir le “COVID-19 Electronic Vaccination and Testing Record System (eVT) [Córas Taifeadta Leictreonach i ndáil le Vacsaíniú agus Tástáil COVID-19]”.

(4)

Chuir Sainréigiún Riaracháin Hong Cong in iúl don Choimisiún freisin go nglacann sé le deimhnithe i ndáil le vacsaíniú, tástáil agus téarnamh arna n-eisiúint ag na Ballstáit agus ag tíortha sa Limistéar Eorpach Eacnamaíoch i gcomhréir le Rialachán (AE) 2021/953.

(5)

An 23 Samhain 2022, i ndiaidh iarraidh a fháil ó Shainréigiún Riaracháin Hong Cong, rinne an Coimisiún tástálacha teicniúla a léirigh go bhfuil na deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong i gcomhréir le “COVID-19 Electronic Vaccination and Testing Record System (eVT)[Córas Taifeadta Leictreonach i ndáil le Vacsaíniú agus Tástáil COVID-19]”, go bhfuil na deimhnithe sin idir-inoibritheach leis an gcreat iontaoibhe a bhunaítear le Rialachán (AE) 2021/953, rud a fhágann gur féidir barántúlacht, bailíocht agus sláine na ndeimhnithe a fhíorú. Dheimhnigh an Coimisiún freisin go bhfuil na sonraí is gá san áireamh sna deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong i gcomhréir le “COVID-19 Electronic Vaccination and Testing Record System (eVT) [Córas Taifeadta Leictreonach i ndáil le Vacsaíniú agus Tástáil COVID-19]”.

(6)

Ina theannta sin, chuir Sainréigiún Riaracháin Hong Cong an Coimisiún ar an eolas go n-eisíonn sé deimhnithe vacsaínithe idir-inoibritheacha faoi láthair i ndáil le vacsaíní COVID-19 Comirnaty agus Corona Vac.

(7)

Chuir Sainréigiún Riaracháin Hong Cong an Coimisiún ar an eolas freisin go n-eisíonn sé deimhnithe tástála idir-inoibritheacha i ndáil le tástálacha aimpliúcháin aigéid núicléasaigh.

(8)

Thairis sin, chuir Sainréigiún Riaracháin Hong Cong an Coimisiún ar an eolas go n-eisíonn sé deimhnithe idir-inoibritheacha i ndáil le téarnamh.

(9)

Ina theannta sin, chuir Sainréigiún Riaracháin Hong Cong an Coimisiún ar an eolas nach bpróiseálfar na sonraí pearsanta a áirítear sna deimhnithe nuair a dhéanfaidh fíoraitheoirí i Sainréigiún Riaracháin Hong Cong na deimhnithe a fhíorú ach amháin chun stádas vacsaínithe, toradh tástála nó stádas téarnaimh an tsealbhóra a fhíorú agus a dheimhniú, agus nach gcoinneofar na sonraí ina dhiaidh sin, cé is moite de shonraí sláinte daoine a fhaigheann toradh dearfach ar theacht isteach dóibh, rud a dhéanfaí a thaifeadadh mar chuid den imscrúdú eipidéimeolaíoch.

(10)

Dá réir sin, comhlíontar na heilimintí is gá chun a shuí go measfar go bhfuil na deimhnithe COVID-19 arna n-eisiúint ag Sainréigiún Riaracháin Hong Cong i gcomhréir le “COVID-19 Electronic Vaccination and Testing Record System (eVT) [Córas Taifeadta Leictreonach i ndáil le Vacsaíniú agus Tástáil COVID-19]” coibhéiseach leis na deimhnithe arna n-eisiúint i gcomhréir le Rialachán (AE) 2021/953.

(11)

Dá bhrí sin, na deimhnithe COVID-19 i ndáil le vacsaíniú, tástáil agus téarnamh arna n-eisiúint ag Sainréigiún Riaracháin Hong Cong i gcomhréir le “COVID-19 Electronic Vaccination and Testing Record System (eVT)”, ba cheart glacadh leo faoi na coinníollacha dá dtagraítear in Airteagail 5(5), 6(5) agus 7(8) de Rialachán (AE) 2021/953.

(12)

Chun go mbeidh an Cinneadh seo oibríochtúil, ba cheart Sainréigiún Riaracháin Hong Cong a nascadh leis an gcreat iontaoibhe maidir le Deimhniú Digiteach COVID AE a bhunaítear le Rialachán (AE) 2021/953.

(13)

Chun leas an Aontais a chosaint, go háirithe i réimse na sláinte poiblí, féadfaidh an Coimisiún a chumhachtaí a úsáid chun cur i bhfeidhm an Chinnidh seo a chur ar fionraí nó é a aisghairm, i gcás nach gcomhlíontar na coinníollacha in Airteagal 8(2) de Rialachán (AE) 2021/953 a thuilleadh.

(14)

Chun Sainréigiún Riaracháin Hong Cong a nascadh leis an gcreat iontaoibhe maidir le Deimhniú Digiteach COVID AE a luaithe is féidir a bhunaítear le Rialachán (AE) 2021/953, ba cheart an Cinneadh seo teacht i bhfeidhm lá a fhoilsithe in Iris Oifigiúil an Aontais Eorpaigh.

(15)

Na bearta dá bhforáiltear sa Chinneadh seo, is bearta iad atá i gcomhréir leis an tuairim ón gCoiste a bhunaítear le hAirteagal 14 de Rialachán (AE) 2021/953,