(1)

Cuireadh iarraidh ar chlárú an tionscnaimh Eorpaigh ó na saoránaigh dar teideal ‘Éileamh chun an Comhaontú Comhlachais idir an tAontas Eorpach agus Iosrael a chur ar fionraí go hiomlán i bhfianaise sháruithe Iosrael ar chearta an duine’ faoi bhráid an Choimisiúin an 28 Deireadh Fómhair 2025.

(2)

Tháinig an iarraidh sin sna sála ar an iarraidh ar chlárú an tionscnaimh Eorpaigh ó na saoránaigh dar teideal ‘Comhaontuithe trádála a chur ar fionraí i gcás sárú ar chearta an duine agus ar an dlí idirnáisiúnta’ a cuireadh faoi bhráid an Choimisiúin an 30 Iúil 2025.

(3)

Maidir leis an iarraidh ar chlárú a cuireadh isteach an 30 Iúil 2025, chuir an Coimisiún in iúl don ghrúpa eagraithe, trí litir dar dáta an 28 Lúnasa 2025 (C(2025) 5818 final), agus de bhun Airteagal 6(4) de Rialachán (AE) 2019/788, gur comhlíonadh na ceanglais maidir le clárú a leagtar amach in Airteagal 6(3), an chéad fhomhír, pointí (a), (d) agus (e), den Rialachán sin agus nach raibh Airteagal 6(3), an chéad fhomhír, pointe (b) de infheidhme. Mhínigh an Coimisiún freisin, áfach, nár chomhlíon an tionscnamh an ceanglas a leagtar amach in Airteagal 6(3), an chéad fhomhír, pointe (c), de Rialachán (AE) 2019/788. Go háirithe, mhínigh an Coimisiún, gurb amhlaidh, cé go bhféadfadh sé gníomh dlí aonair cothrománach a mholadh lena ndéanfaí foráil maidir leis an bhféidearthacht catagóir comhaontuithe atá ann cheana a chur ar fionraí, nach bhféadfaidh an tAontas comhaontú a fhoirceannadh ach amháin ar bhonn cinneadh ón gComhairle a bhaineann go sonrach le gach comhaontú, i gcomhréir le hAirteagal 218(6) den Chonradh ar Fheidhmiú an Aontais Eorpaigh, de réir analaí.

(4)

Dá bhrí sin, chuir an Coimisiún na heagraithe ar an eolas de bhun Airteagal 6(4), an chéad fhomhír, de Rialachán (AE) 2019/788 go bhféadfaidís an tionscnamh a leasú chun measúnú an Choimisiúin a chur san áireamh, nó an tionscnamh tosaigh a choimeád ar bun, nó a tharraingt siar, i gcomhréir le hAirteagal 6(4), an dara fomhír, de Rialachán (AE) 2019/788.

(5)

An 28 Deireadh Fómhair 2025, chuir an grúpa eagraithe tionscnamh leasaithe isteach.

(6)

Is é is aidhm don tionscnamh leasaithe, de réir mar a chuir na heagraithe in iúl é, ‘a iarraidh ar an gCoimisiún an togra a chur ar aghaidh chuig an gComhairle chun an Comhaontú Comhlachais idir an tAontas agus Iosrael a chur ar fionraí go hiomlán’. In iarscríbhinn a ghabhann leis an tionscnamh leasaithe, tugtar tuilleadh sonraí maidir lena chúlra, leis an ábhar atá ann agus leis na cuspóirí a bhaineann leis.

(7)

Measann an Coimisiún go bhféadfadh sé togra a ghlacadh le haghaidh cinneadh ón gComhairle chun cur i bhfeidhm an Chomhaontaithe Comhlachais idir an tAontas agus Iosrael a chur ar fionraí ar bhonn Airteagal 218(9) den Chonradh ar Fheidhmiú an Aontais Eorpaigh.

(8)

Ar an gcúis sin, measann an Coimisiún nach bhfuil aon chuid den tionscnamh ann ar follas nach dtagann sí faoi chreat chumhachtaí an Choimisiúin togra a chur isteach le haghaidh gníomh dlí de chuid an Aontais chun na Conarthaí a chur chun feidhme.

(9)

Is conclúid é sin nach ndéanann difear don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha ba ghá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha.

(10)

Tá fianaise iomchuí curtha ar fáil ag an ngrúpa d’eagraithe go gcomhlíontar na ceanglais a leagtar síos in Airteagal 5(1) agus (2) de Rialachán (AE) 2019/788, agus go bhfuil na daoine teagmhála ainmnithe aige i gcomhréir le hAirteagal 5(3), an chéad fhomhír, den Rialachán sin.

(11)

Ní tionscnamh é ar follas é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais mar a leagtar amach in Airteagal 2 den Chonradh ar an Aontas Eorpach iad ná do na cearta a chumhdaítear i gCairt um Chearta Bunúsacha an Aontais Eorpaigh.

(12)

Dá bhrí sin, ba cheart an tionscnamh dar teideal ‘Éileamh chun an Comhaontú Comhlachais idir an tAontas Eorpach agus Iosrael a chur ar fionraí go hiomlán i bhfianaise sháruithe Iosrael ar chearta an duine’ a chlárú.

(13)

An chonclúid go gcomhlíontar na coinníollacha maidir le clárú faoi Airteagal 6(3) de Rialachán (AE) 2019/788, ní thugann sí le tuiscint go ndearbhaíonn an Coimisiún ar bhealach ar bith go bhfuil inneachar an tionscnaimh cruinn fíorasach, agus is é an grúpa d’eagraithe atá i mbun an tionscnaimh, agus an grúpa sin amháin, atá freagrach as an méid sin. Ní chuireann inneachar an tionscnaimh in iúl ach tuairimí an ghrúpa d’eagraithe, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé,