1

Lena iarratas, iarrann an Coimisiún Eorpach ar an gCúirt Bhreithiúnais:

–

a dhearbhú, ós rud é nár glacadh bearta chun cosc a chur ar mhí-úsáid conarthaí ar théarma seasta i ndiaidh a chéile le haghaidh foireann ionaid riaracháin, theicniúil agus chúnta (‘foireann RTC’) atá fostaithe i bhforais oideachais phoiblí, gur mhainnigh Poblacht na hIodáile a hoibleagáidí a chomhlíonadh faoi Chlásal 5 den Chreat‑Chomhaontú maidir le hobair ar théarma seasta, a tugadh i gcrích an 18 Márta 1999 (‘an Creat‑Chomhaontú’), atá san Iarscríbhinn a ghabhann le Treoir 1999/70/CE ón gComhairle an 28 Meitheamh 1999 maidir leis an gCreat‑Chomhaontú maidir le hobair ar théarma seasta arna thabhairt i gcrích ag ETUC, UNICE agus CEEP (IO 1999 L 175, lch. 43), agus

–

a ordú do Phoblacht na hIodáile na costais a íoc.

An dlí lena mbaineann

Dlí an Aontais Eorpaigh

2

Foráiltear le Clásal 5(1) den Chreat‑Chomhaontú maidir le hobair ar théarma seasta, dar teideal ‘Bearta chun cosc a chur ar mhí-úsáid’, mar a leanas:

Dlí na hIodáile

3

Foráiltear le hAirteagal 554 de decreto legislativo n. 297 – Approvazione del testo unico delle disposizioni legislative vigenti in materia di istruzione, relative alle scuole di ogni ordine e grado (Foraithne Reachtach Uimh. 297, lena leagtar síos na forálacha reachtacha is infheidhme maidir leis na dlíthe maidir leis an múinteoireacht agus scoileanna ar gach cineál agus ar gach leibhéal) an 16 Aibreán 1994 (GURI Uimh. 115 an 19 Bealtaine 1994, gnáthfhorlíonadh Uimh. 79) (‘Foraithne Reachtach Uimh. 297/1994’), mar a leanas:

4

Foráiltear le hAirteagal 4 de legge n. 124 – Disposizioni urgenti in materia di personale scolastico (Dlí Uimh. 124 lena leagtar síos forálacha práinneacha maidir le foireann scoile) an 3 Bealtaine 1999 (GURI Uimh. 107 an 10 Bealtaine 1999, ‘Dlí Uimh. 124/1999’), dar teideal ‘Poist teagaisc soláthair’, mar a leanas:

5

Foráiltear le hAirteagal 1 de decreto ministeriale n. 430 – Regolamento recante norme sulle modalità di conferimento delle supplenze al personale amministrativo, tecnico ed ausiliario ai sensi dell’articolo 4 della legge 3 maggio 1999, n. 124 (Foraithne Aireachta Uimh. 430 lena leagtar síos na rialacha maidir le poist teagaisc soláthair d’fhoireann riaracháin, theicniúil agus chúnta a shannadh i gcomhréir le hAirteagal 4 de Dhlí Uimh. 12, an 3 Bealtaine 1999) an 13 Nollaig 2000 (GURI Uimh. 19 an 24 Eanáir 2001), dar teideal ‘Infhaighteacht post agus cineálacha post teagaisc soláthair’, mar a leanas:

6

Foráiltear le hAirteagal 36 de decreto legislativo n. 165 – Norme generali sull’ordinamento del lavoro alle dipendenze delle amministrazioni pubbliche (Foraithne Reachtach Uimh. 165 lena leagtar síos rialacha ginearálta maidir le heagrú oibre i riaracháin phoiblí) an 30 Márta 2001 (GURI Uimh. 106 an 9 Bealtaine 2001, gnáthfhorlíonadh Uimh. 112; ‘Foraithne Reachtach Uimh. 165/2001’), dar teideal ‘Foireann ar chonarthaí ar théarma seasta nó atá fostaithe faoi chaidrimh fostaíochta solúbtha’, mar a leanas:

7

Leagtar síos le Foraithne Reachtach Uimh. 81/2015, i gCaibidil III, dar teideal ‘Obair ar théarma seasta’, uastréimhse le haghaidh conarthaí fostaíochta ar théarma seasta (Airteagal 19), mar aon le huaslíon athnuachaintí (Airteagal 21). Faoi Airteagal 29(2)(c), ní bheidh feidhm ag Caibidil III maidir le ‘conarthaí ar théarma seasta arna dtabhairt i gcrích le [foireann RTC] chun poist teagaisc soláthair a shannadh [...]’, ós rud é go bhforáiltear le mír 4 den Airteagal sin ‘go mbeidh feidhm ag forálacha Airteagal 36 d’Fhoraithne Reachtach [Uimh. 165/2001]’.

8

Tugadh isteach le legge n. 107 – Riforma del sistema nazionale di istruzione e formazione e delega per il riordino delle disposizioni legislative vigenti (Dlí Uimh. 107 maidir le hathchóiriú ar an gcóras náisiúnta oideachais agus oiliúna agus tarmligean na gcumhachtaí chun na forálacha dlí i bhfeidhm a athchóiriú) an 13 Iúil 2015 (GURI Uimh. 162 an 15 Iúil 2015; ‘Dlí Uimh. 107/2015’), in Airteagal 1(131) de, uastréimhse 36 mhí, fiú mura bhfuil siad i ndiaidh a chéile, le haghaidh conarthaí fostaíochta ar théarma seasta d’fhoireann teagaisc agus RTC i bhforais oideachais phoiblí. Rinneadh an fhoráil sin a aisghairm le hAirteagal 4a de decreto-legge n. 87 – Disposizioni urgenti per la dignità dei lavoratori e delle imprese (Dlí Foraithne Uimh. 87 lena leagtar síos forálacha práinneacha maidir le dínit oibrithe agus gnóthas) an 12 Iúil 2018 (GURI Uimh. 161 an 13 Iúil 2018; ‘Dlí Foraithne Uimh. 87/2018’).

An nós imeachta réamhdlíthíochta

9

An 26 Iúil 2019, sheol an Coimisiún litir fógra fhoirmiúil chuig Poblacht na hIodáile, inar chuir sé a amhras in iúl maidir le, inter alia, comhlíonadh roinnt forálacha náisiúnta is infheidhme maidir le foireann ionaid RTC atá fostaithe i bhforais oideachais phoiblí le Clásal 5 den Chreat‑Chomhaontú, a mhéid a bhaineann le mí-úsáid conarthaí ar théarma seasta.

10

D’fhreagair Poblacht na hIodáile na gearáin agus na ceisteanna a ardaíodh sa litir fógra fhoirmiúil sin trí roinnt teachtaireachtaí. Tar éis teachtaireacht an 29 Samhain 2019, sheol an Coimisiún litir fógra fhoirmiúil bhreise chuig an mBallstát sin an 3 Nollaig 2020, ar thug an Ballstát sin freagra uirthi, inter alia, le litreacha an 6 Aibreán agus an 21 Meán Fómhair 2021.

11

An 19 Aibreán 2023, chuir an Coimisiún tuairim réasúnaithe chuig Poblacht na hIodáile inar, inter alia, choinnigh sé a sheasamh nach gcomhlíontar Clásal 5 den Chreat‑Chomhaontú le reachtaíocht na hIodáile a mhéid a bhaineann le foireann ionaid RTC a chosaint ar mhí-úsáid conarthaí ar théarma seasta, agus d’iarr sé ar Phoblacht na hIodáile na bearta is gá a dhéanamh chun an Clásal sin a chomhlíonadh laistigh de 2 mhí tar éis di an tuairim sin a fháil.

12

Ina freagra an 8 Feabhra 2024 ar an tuairim réasúnaithe sin, chuir Poblacht a hIodáile a heasaontas le seasamh an Choimisiúin in iúl arís.

13

Ós rud é nach ndeachaigh an freagra sin i bhfeidhm air, thionscain an Coimisiún na himeachtaí seo mar gheall ar mhainneachtain oibleagáidí a chomhlíonadh.

Breithniú ar an gcaingean

14

Lena chaingean, líomhnaíonn an Coimisiún gur mhainnigh Poblacht na hIodáile a hoibleagáidí faoi Chlásal 5(1) den Chreat‑Chomhaontú a chomhlíonadh trí mhainneachtain bearta a dhéanamh chun cosc a chur ar mhí-úsáid conarthaí ar théarma seasta i ndiaidh a chéile le haghaidh foireann ionaid RTC atá fostaithe i bhforais oideachais phoiblí.

Argóintí na bpáirtithe

15

Maíonn an Coimisiún, sa chéad áit, nach ann, faoi dhlí na hIodáile, d’aon bheart arna ghlacadh faoi Chlásal 5(1)(b) agus (c) den Chreat‑Chomhaontú a bhaineann le huastréimhse iomlán conarthaí fostaíochta ar théarma seasta a d’fhéadfaí a thabhairt i gcrích le foireann ionaid RTC nó le líon athnuachaintí na gconarthaí sin. Leanann sé ó Airteagal 36(5-quinquies) d’Fhoraithne Reachtach Uimh. 165/2001 agus Airteagal 29(2)(c) d’Fhoraithne Reachtach Uimh. 81/2015 nach bhfuil feidhm ag na forálacha lena leagtar síos uastréimhse agus uaslíon na gconarthaí ar théarma seasta a fhéadfaidh údaráis phoiblí a thabhairt i gcrích chun a bhfoireann a earcú maidir le conarthaí arna dtabhairt i gcrích le foireann RTC atá fostaithe i bhforais oideachais phoiblí. Thairis sin, dá mba rud é, roimhe sin, gur leagadh síos teorainneacha i ndáil leis sin le hAirteagal 1(131) de Dhlí Uimh. 107/2015, dhéanfaí an fhoráil sin a aisghairm le Dlí Foraithne Uimh. 87/2018.

16

Sa dara háit, áitíonn an institiúid sin nach bhfuil bearta i ndlí na hIodáile amhail na bearta dá dtagraítear i gClásal 5(1)(a) den Chreat‑Chomhaontú, a bhaineann le cúiseanna oibiachtúla lena dtugtar údar le conarthaí fostaíochta ar théarma seasta le foireann RTC atá fostaithe i bhforais oideachais phoiblí a athnuachan.

17

I ndáil leis sin, ar an gcéad dul síos, níl aon tagairt i bhforálacha Airteagal 4(1) agus (11) de Dhlí Uimh. 124/1999, lena gceadaítear foireann RTC a earcú chun poist fholmha agus shaora a líonadh in oideachas poiblí ar bhonn sealadach, do cheanglas, amhail ceanglas solúbthachta a bhaineann go sonrach leis an oideachas poiblí, a d’fhéadfadh a bheith nasctha le coincheap na gcúiseanna oibiachtúla de réir bhrí Chlásal 5(1)(a) den Chreat‑Chomhaontú. Ina theannta sin, is cosúil go dtagann na figiúirí a d’fhoilsigh an Ministero dell’Istruzione (an Aireacht Oideachais, an Iodáil) maidir le forbairt dhaonra na scoile agus comhdhéanamh an lucht saothair salach ar cheanglas den sórt sin a bheith ann. Cé go bhfuil laghdú leanúnach tagtha ar líon na ndaltaí ó scoilbhliain 2017/2018, níor tháinig ach méadú ar líon agus ar chion fhoireann RTC atá fostaithe ar théarma seasta le linn na tréimhse céanna.

18

Baineann an Coimisiún de thátal as sin, cé gur féidir a shamhlú go bhféadfadh an reachtaíocht náisiúnta atá i gceist, go teoiriciúil, a bheith bunaithe ar chúis oibiachtúil amhail ceanglas solúbthachta a bhaineann le saintréithe sonracha na scoile poiblí, nach ann do cheanglas den sórt sin sa chleachtas.

19

Ar an dara dul síos, agus in aon chás, ní leor cúis oibiachtúil a bheith ann chun a shuíomh go gcomhlíontar Clásal 5(1)(a) den Chreat‑Chomhaontú leis an reachtaíocht náisiúnta atá i gceist, ós rud é, i bhfianaise na dtreoracha a tugadh i mbreithiúnas an 26 Samhain 2014, Mascolo agus páirtithe eile (C‑22/13, C‑61/13 go C‑63/13 agus C‑418/13, EU:C:2014:2401), go nglactar leis, le comhlíonadh den sórt sin, go gceadaítear leis an reachtaíocht sin critéir oibiachtúla thrédhearcacha a shainaithint chun a fhíorú an gcomhlíontar fíor-ghá agus prionsabal na comhréireachta le conarthaí ar théarma seasta arna dtabhairt i gcrích le foireann ionaid RTC a athnuachan.

20

Mar sin féin, ní cheadaítear critéir den sórt sin a shainaithint leis an reachtaíocht náisiúnta atá i gceist. Os a choinne sin, is é an gnáth-mhodh earcaithe chun foireann RTC a earcú ar bhonn conarthaí ar théarma seasta. Chun páirt a ghlacadh i gcomórtais arna n‑eagrú chun poist bhuana a líonadh d’fhoireann ionaid RTC, ní mór do na daoine lena mbaineann a bheith fostaithe ar dtús faoi chonarthaí ar théarma seasta agus seirbhís 2 bhliain ar a laghad a bheith acu, rud atá ag teacht salach go follasach ar an mbonn ar a bhfuil an Creat‑Chomhaontú bunaithe, ar dá réir is iad conarthaí fostaíochta neamhiata foirm ghinearálta an chaidrimh fostaíochta. Ina theannta sin, ní eagraítear na comórtais sin de réir amlíne sonrach, sa mhéid go bhfuil siad faoi réir srianta buiséadacha agus go mbraitheann siad, thairis sin, ar imeacht nádúrtha ball foirne tionachta.

21

Dá bhrí sin, de réir an Choimisiúin, déantar foireann ionaid RTC a earcú trí bhíthin conarthaí ar théarma seasta gan an reachtaíocht náisiúnta is infheidhme lena bhforáiltear do chúiseanna oibiachtúla de réir bhrí Chlásal 5(1)(a) den Chreat‑Chomhaontú, ós rud é, os a choinne sin, go gceadaítear leis an reachtaíocht sin conarthaí den sórt sin a úsáid chun freastal ar riachtanais bhuana agus inmharthana. Ina fhreagra, tugann an Coimisiún faoi deara, sa chomhthéacs sin, gur aithin Poblacht na hIodáile féin é sin ina cosaint, agus í ag dearbhú go n‑earcaítear foireann RTC ar théarma seasta chun dul i ngleic le ‘ganntanais struchtúracha’ foirne.

22

Sa tríú háit, agus ar mhaithe le hiomláine, cuireann an Coimisiún in iúl freisin, dá measfadh Poblacht na hIodáile go dtagann eagrú roinnt comórtas le blianta beaga anuas faoin gcoincheap ‘bearta dlíthiúla comhionanna’ de réir bhrí Chlásal 5(1)(a) den Chreat‑Chomhaontú, gur gá a mheas nach bhfuil in eagrú den sórt sin ach beart aonuaire lenar féidir, ar a mhéad, deireadh a chur, ar bhealaí áirithe, le staid mhí-úsáideach a tharla cheana, gan é a bheith de chineál a chuirfeadh cosc ar mhí-úsáid conarthaí fostaíochta ar théarma seasta i ndáil le foireann RTC atá fostaithe i bhforais oideachais phoiblí. Is amhlaidh atá i gcás na ndréachtreachtaíochta dá dtagraíonn Poblacht na hIodáile, a bhfuil a gcur i bhfeidhm teoranta do scoilbhlianta áirithe.

23

Measann Poblacht na hIodáile, óna taobh féin, gur chomhlíon sí na hoibleagáidí a eascraíonn as Clásal 5(1) den Chreat‑Chomhaontú.

24

Sa chéad áit, tugann an Ballstát sin faoi deara go dtugtar rochtain ar phoist bhuana san oideachas poiblí trí bhíthin na nósanna imeachta roghnúcháin dá dtagraítear in Airteagal 554 d’Fhoraithne Reachtach Uimh. 297/1994, atá oscailte go heisiach d’fhoireann RTC neamh-thionachta a bhfuil ar a laghad 2 bhliain seirbhíse acu agus ina gcuirtear an taithí a fuarthas san áireamh. Dá bhrí sin, ceadaítear leis an tseirbhís a gcuirtear i gcrích faoi chonradh ar théarma seasta an taithí sin a chur san áireamh agus rannchuidítear le conradh neamhiata a thabhairt i gcrích. Sin é an fáth ar ceapadh an scéim sin i gcónaí ar bhealach a spreagfadh athdhéanamh conarthaí ar théarma seasta arna dtabhairt i gcrích le foireann ionaid RTC, a mhéid a d’éascódh athdhéanamh den sórt sin rochtain ar stádas buan. Ar an gcaoi chéanna, rinneadh cinneadh an uastréimhse 36 mhí a leagadh síos roimhe sin do chonarthaí den sórt sin in Airteagal 1(131) de Dhlí Uimh. 107/2015 a aisghairm le Dlí Foraithne Uimh. 87/2018.

25

Sa dara háit, cuirtear san áireamh le sásra earcaithe den sórt sin gnéithe sonracha an chórais scoile, eadhon an éagsúlacht shuntasach éilimh ar fhoireann RTC ar bhonn líon na ndaltaí atá cláraithe sna scoileanna agus sna limistéir gheografacha éagsúla agus ar bhonn an dlúthnaisc idir líon riachtanach fhoireann RTC agus méid dhaonra na ndaltaí. Is cúiseanna oibiachtúla iad na gnéithe sonracha sin de réir bhrí Chlásal 5(1)(a) den Chreat‑Chomhaontú.

26

Sa chomhthéacs sin, cuireann Poblacht na hIodáile in iúl, ar an gcéad dul síos, nach ndealraíonn sé go gceanglaítear leis an bhforáil sin cúiseanna oibiachtúla den sórt sin a chumhdach i ndlí substainteach.

27

Ar an dara dul síos, is é is cúis leis an méadú ar fhoireann RTC dá dtagraíonn an Coimisiún an gá atá leis an nganntanas struchtúrach foirne a leigheas i gcóras lena n‑éilítear uainíocht foirne. I ndáil leis sin, cuireann an Ballstát sin in iúl, áfach, ina athfhreagra, nár cheart a argóint a thuiscint sa chaoi gurb ionann go bhfuil ganntanas struchtúrach na foirne sin, ann féin, agus cúis oibiachtúil de réir bhrí Chlásal 5(1)(a) den Chreat‑Chomhaontú.

28

Sa tríú háit, chuir an Aireacht Oideachais, le linn na mblianta 2019 go 2021, teorainn le húsáid conarthaí fostaíochta ar théarma seasta maidir le foireann RTC trí nósanna imeachta earcaithe éagsúla a chur chun feidhme. Ina theannta sin, maidir le scoilbhliain 2023/2024, údaraíodh dó 9 975 ball foirne ar chonarthaí buana san iomlán a earcú, a leagtar amach mar a leanas: 2 163 chúntóir riaracháin, 717 gcúntóir theicniúla, 7 066 bhall foirne thacaíochta scoile, 13 bhall foirne thacaíochta theicniúla scoile (arna sannadh d’oibríochtaí talmhaíochta), 8 bhfostaí seomra cótaí, 4 chócaire agus 4 altra.

29

Sa cheathrú háit, tugann Poblacht na hIodáile faoi deara, gan a cosaint a tharscaoileadh, go bhfuil leasuithe á n‑ullmhú aici ar an reachtaíocht is infheidhme atá beartaithe chun fíordheis a thabhairt do gach ball foirne ionaid RTC atá fostaithe i bhforais oideachais phoiblí a bpoist a choinneáil trí na poist bhuana uile atá folamh faoi láthair a líonadh láithreach, de mhaolú ar na gnáthnósanna imeachta chun foireann RTC a earcú. Ina theannta sin, tá córas nua aicmithe ghairmiúil d’fhoireann RTC á ullmhú, lena n‑áirítear sásraí nua maidir le dul chun cinn agus earcú. Ba cheart aon athchóiriú a d’fhéadfaí a dhéanamh ar shásraí earcaithe, áfach, a bheith mar thoradh ar phróiseas idirphlé leis na comhpháirtithe sóisialta agus le riaracháin eile lena mbaineann.

30

Dá bhrí sin, iarrann Poblacht na hIodáile ar an gCúirt Bhreithiúnais caingean an Choimisiúin a dhíbhe toisc í a bheith gan bhunús nó, mar mhalairt air sin, bac a chur ar na himeachtaí de bhun Airteagal 55 de Rialacha Nós Imeachta na Cúirte Breithiúnais, ionas go mbeidh sí in ann na leasuithe reachtacha is gá a ghlacadh laistigh de thréimhse réasúnta ama.

Measúnú na Cúirte

31

Ba cheart a thabhairt faoi deara go gceanglaítear le Clásal 5 den Chreat‑Chomhaontú, arb é is aidhm dó ceann de chuspóirí atá á saothrú leis an gCreat‑Chomhaontú sin a chur chun feidhme, eadhon teorainneacha a chur ar úsáid conarthaí nó caidrimh fostaíochta ar théarma seasta i ndiaidh a chéile, ar na Ballstáit, i mír 1 de, ceann amháin ar a laghad de na bearta a liostaítear a ghlacadh ar bhealach atá éifeachtach agus ceangailteach, i gcás nach bhfuil bearta dlíthiúla comhionanna sa dlí náisiúnta. Baineann na bearta a liostaítear i bpointe 1(a) go (c) den Chlásal sin, a bhfuil trí cinn díobh ann, le cúiseanna oibiachtúla lena dtugtar údar le conarthaí nó caidrimh fostaíochta den sórt sin a athnuachan, le huastréimhse iomlán na gconarthaí nó na gcaidreamh fostaíochta i ndiaidh a chéile sin agus le líon na n‑athnuachan de na conarthaí nó na caidrimh sin, faoi seach (breithiúnas an 19 Márta 2020, Sánchez Ruiz agus páirtithe eile, C‑103/18 agus C‑429/18, EU:C:2020:219, mír 83 agus an cásdlí dá dtagraítear).

32

Tá corrlach lánroghnach ag na Ballstáit i ndail leis sin, ós rud é go bhfuil sé de rogha acu ceann amháin nó níos mó de na bearta a leagtar amach i gClásal 5(1)(a) go (c) a roghnú, nó fiú bearta dlíthiúla comhionanna atá ann cheana (breithiúnas an 25 Deireadh Fómhair 2018, Sciotto, C‑331/17, EU:C:2018:859, mír 33 agus an cásdlí dá dtagraítear).

33

Sa chás seo, sa chéad áit, maidir leis na bearta dá bhforáiltear i gClásal 5(1)(b) agus (c) den Chreat‑Chomhaontú, a bhaineann le huastréimhse iomlán conarthaí ar théarma seasta agus le líon na n‑athnuachan de na conarthaí sin, sonraíonn an Coimisiún, gan Poblacht na hIodáile a bheith ag teacht salach air, nach ann do bhearta den sórt sin i ndlí na hIodáile maidir le foireann RTC atá fostaithe i bhforais oideachais phoiblí. Cuireann sé in iúl, sa chomhthéacs sin, nach bhfuil forálacha dhlí na hIodáile lena leagtar síos uastréimhse agus uaslíon na gconarthaí ar théarma seasta a údaraítear d’údaráis phoiblí a thabhairt i gcrích chun a bhfoireann a earcú infheidhme go sainráite maidir le conarthaí arna dtabhairt i gcrích le foireann RTC den sórt sin, cé gur aisghaireadh an fhoráil lenar foráladh roimhe sin d’uastréimhse 36 mhí do chonarthaí den sórt sin in 2018.

34

Chun agóid a dhéanamh i gcoinne dhearbhuithe an Choimisiúin, tugann Poblacht na hIodáile faoi deara, cé gur aisghaireadh an fhoráil lena bhforáiltear d’uastréimhse 36 mhí do chonarthaí fostaíochta ar théarma seasta arna dtabhairt i gcrích le foireann RTC atá i gceist, go raibh sé beartaithe le haisghairm den sórt sin i ndáiríre a chur ar chumas na foirne sin taithí a fháil trí chonarthaí fostaíochta ar théarma seasta a thabhairt i gcrích arís agus arís eile agus, dá bhrí sin, a chur leis an seans go ndeonófar stádas buan dóibh ag céim níos déanaí, a dhéanfaí, go háirithe, ar bhonn na taithí a fuarthas ar an gcaoi sin.

35

Ní mór a thabhairt faoi deara nach ndeimhnítear le hargóint den sórt sin ach easpa bearta, i ndlí na hIodáile, chun teorainn a chur le huastréimhse nó le líon na gconarthaí fostaíochta ar théarma seasta a fhéadfar a thabhairt i gcrích le foireann RTC atá i gceist agus, dá bhrí sin, easpa bearta chun cosc a chur ar mhí-úsáid conarthaí fostaíochta ar théarma seasta i ndiaidh a chéile de réir bhrí Chlásal 5(1)(b) agus (c) den Chreat‑Chomhaontú.

36

Sna himthosca sin, ba cheart scrúdú a dhéanamh, sa dara háit, an bhforáiltear le dlí na hIodáile, maidir le conarthaí fostaíochta ar théarma seasta arna dtabhairt i gcrích le foireann ionaid RTC, don bheart dá dtagraítear i gClásal 5(1)(a) den Chreat‑Chomhaontú, maidir le cúiseanna oibiachtúla lena dtugtar údar le conarthaí nó caidrimh fostaíochta ar théarma seasta a athnuachan.

37

I ndáil leis sin, chinn an Chúirt Bhreithiúnais cheana féin nach mór an coincheap ‘cúiseanna oibiachtúla’ a thuiscint mar thagairt d’imthosca sonracha agus nithiúla ar saintréithe de ghníomhaíocht ar leith iad agus, dá réir sin, go bhféadfadh sé údar a thabhairt sa chomhthéacs sonrach sin le conarthaí fostaíochta ar théarma seasta i ndiaidh a chéile a úsáid. D’fhéadfadh na imthosca sin a bheith mar thoradh, go háirithe, ar chineál ar leith na gcúraimí ar lena ndéanamh a tugadh conarthaí den sórt sin i gcrích agus ar shaintréithe bunúsacha na gcúraimí sin nó, de réir mar a bheidh, ar chuspóir dlisteanach beartais shóisialta de chuid Ballstáit a shaothrú (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, mír 87 agus an cásdlí dá dtagraítear).

38

Os a choinne sin, níl foráil náisiúnta nach n‑údaraítear léi ach dul i muinín conarthaí fostaíochta ar théarma seasta i ndiaidh a chéile ar bhealach ginearálta agus teibí le riail reachta nó le reachtaíocht thánaisteach i gcomhréir leis na ceanglais mar a luaitear sa mhír roimhe seo den bhreithiúnas seo. Ní cheadaítear le foráil den sórt sin, ar de chineál foirmiúil amháin í, critéir oibiachtúla thrédhearcacha a shainaithint chun a fhíorú an gcomhlíontar fíor-ghá le conarthaí den sórt sin a athnuachan, an bhféadfar an cuspóir atá á shaothrú a bhaint amach agus an bhfuil gá leis chun na críche sin. Dá bhrí sin, tá fíorbhaol ann go mbeidh mí-úsáid an chineáil sin conarthaí mar thoradh ar fhoráil den sórt sin agus, dá réir sin, níl sí comhoiriúnach le cuspóir agus éifeachtúlacht an Chreat‑Chomhaontaithe (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, mír 88 agus an cásdlí dá dtagraítear).

39

Sa chás seo, is léir ó na mínithe arna dtabhairt ag an gCoimisiún go mbaineann a cháineadh go príomha le forálacha Airteagal 4(1) agus (11) de Dhlí Uimh. 124/1999, a bhí i gceist freisin sa chás as ar eascair breithiúnas an 26 Samhain 2014, Mascolo agus páirtithe eile (C‑22/13, C‑61/13 go C‑63/13 agus C‑418/13, EU:C:2014:2401), agus ar dá réir, arna léamh le chéile, is féidir poist foirne RTC ‘gur folamh agus saor iad roimh an 31 Nollaig’ den scoilbhliain a líonadh le poist teagaisc soláthair bliantúla, ‘go dtí go gcuirfí imeachtaí comórtais i gcrích chun foireann [...] tionachta a earcú’.

40

I ndáil leis sin, ar an gcéad dul síos, cé nach ndealraíonn sé, sa chás seo, go bhfuil Poblacht na hIodáile ag brath, mar chúis oibiachtúil de réir bhrí Chlásal 5(1)(a) den Chreat‑Chomhaontú, ar an ngá, ar bhonn sealadach, atá le poist atá beartaithe d’fhoireann tionachta a líonadh, is é sin le rá, go dtí go gcuirfear na nósanna imeachta iomaíochta chun foireann den sórt sin a earcú i gcrích, ní mór a mheabhrú, mar sin féin, i bhfianaise na n‑argóintí a chuir an Coimisiún chun cinn i ndáil leis sin agus d’fhoclaíocht Airteagal 4(1) de Dhlí Uimh. 124/1999, ina dtagraítear go sainráite don ghá sin, gur chinn an Chúirt Bhreithiúnais cheana féin go bhféadfadh údar a thabhairt le húsáid conarthaí ar théarma seasta i ndiaidh a chéile le gá den sórt sin (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, mír 96).

41

É sin ráite, d’fhonn a mheas go bhfuil údar le reachtaíocht náisiúnta atá beartaithe chun gá den sórt sin a chur san áireamh ar chúis oibiachtúil, ní mór do na húdaráis inniúla a bheith in ann, agus an reachtaíocht sin á cur i bhfeidhm acu go nithiúil, critéir oibiachtúla thrédhearcacha a shainaithint chun a fhíorú an gcomhlíontar fíor-ghá go hiarbhír le conarthaí ar théarma seasta a athnuachan, an bhféadfar an cuspóir atá á shaothrú a bhaint amach agus an bhfuil gá leis chun na críche sin, agus é á shonrú nach féidir údar a thabhairt leis an reachtaíocht sin faoi Chlásal 5(1)(a) den Chreat‑Chomhaontú má cheadaítear leis an athnuachan sin riachtanais a chumhdach nach bhfuil, i ndáiríre, de chineál sealadach ach, os a choinne sin, de chineál seasta agus buan (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, míreanna 99 agus 100 agus an cásdlí dá dtagraítear).

42

Sa chomhthéacs sin, maíonn an Coimisiún, gan Poblacht na hIodáile a bheith ag teacht salach air, ar thaobh amháin, nach leagtar síos leis an reachtaíocht náisiúnta atá i gceist aon teorainn ama shonrach chun nósanna imeachta iomaíochta a eagrú, a shonraíonn sé atá faoi réir srianta buiséadacha agus atá, thairis sin, ag brath ar imeacht nádúrtha na foirne tionachta. Ar an taobh eile, tugann an institiúid sin faoi deara go bhfuil an fhéidearthacht d’fhoireann ionaid RTC páirt a ghlacadh i gcomórtais den sórt sin, ina theannta sin, faoi réir an choinníll go bhfuil ar a laghad 2 bhliain seirbhíse curtha i gcrích ag na baill foirne sin i gcomhlíonadh a ngníomhaíochta ar théarma seasta, rud a dheimhnigh an Ballstát sin féin, thairis sin, trí thagairt a dhéanamh d’Airteagal 554 d’Fhoraithne Reachtach Uimh. 297/1994 maidir le, inter alia, ceapachán buan trí chomórtais a eagrú, a leagtar síos coinníoll den sórt sin i mír 2.

43

Léirítear leis na gnéithe sin, nár chuir Poblacht na hIodáile ina gcoinne, nó nár admhaigh sí iad fiú, go gcomhlíontar ceanglais an Chreat‑Chomhaontaithe leis an reachtaíocht náisiúnta atá i gceist, cé go gcuirtear teorainn fhoirmiúil léi ar úsáid conarthaí fostaíochta ar théarma seasta chun poist teagaisc soláthair a chur ar fáil le haghaidh poist fholmha agus shaora i scoileanna arna mbainistiú ag an Stát go dtí tréimhse shealadach a chríochnaíonn ar nósanna imeachta iomaíochta a chur i gcrích, ní féidir a dheimhniú di féin go gcomhlíontar cur i bhfeidhm nithiúil na cúise oibiachtúla sin, i bhfianaise ghnéithe sonracha na ngníomhaíochta lena mbaineann agus na gcoinníollacha faoina ndéantar í, ach, os a choinne sin, go gceadaítear, de shárú ar Chlásal 5(1)(a) den Chreat‑Chomhaontú, conarthaí den sórt sin a athnuachan chun riachtanais a chumhdach nach riachtanais shealadacha iad ach riachtanais seasta agus bhuana iad (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, míreanna 108 agus 109).

44

Go háirithe, ós rud é, faoi Airteagal 554(2) d’Fhoraithne Reachtach Uimh. 297/1994, nach mór d’fhoireann RTC, d’fhonn a bheith in ann páirt a ghlacadh i gcomórtais a bhféadfadh ceapachán buan a bheith mar thoradh orthu agus, dá bhrí sin, post buan a bheith acu, an coinníoll a chomhlíonadh maidir le ‘seirbhís 2 bhliain ar a laghad a bheith acu [...] i ndualgais a fhreagraíonn do na dualgais sin a n‑eagraítear na comórtais ina leith’, is dócha, ann féin agus beag beann ar chineál éiginnte agus neamh-intuartha eagrú na gcomórtas sin, go méadófar an baol go mbainfí mí-úsáid as conarthaí ar théarma seasta i ndiaidh a chéile sa mhéid, le linn na tréimhse 2 bhliain ar a laghad sin, go bhféadfar conarthaí den sórt sin a athnuachan gan é a bheith riachtanach a áirithiú go bhfuil gá le hathnuachan den sórt sin sealadach agus nach bhfuil sé seasta agus buan.

45

Sna himthosca sin, ní féidir a mheas, sa chás seo, gur ‘cúis oibiachtúil’ é an gá atá le poist bhuana a líonadh ar bhonn sealadach go dtí go gcuirfear na nósanna imeachta iomaíochta a eagraítear chun foireann tionachta a earcú i gcrích, dá dtagraítear in Airteagal 4(1) de Dhlí Uimh. 124/1999, lena dtugtar údar le hathnuachan conarthaí fostaíochta ar théarma seasta arna dtabhairt i gcrích le foireann RTC atá fostaithe i bhforais oideachais phoiblí, i gcomhréir leis na ceanglais a eascraíonn as Clásal 5(1)(a) den Chreat‑Chomhaontú.

46

Ar an dara dul síos, maidir leis an ngá atá le solúbthacht a bhaineann go sonrach leis an oideachas poiblí, ar a bhfuil Poblacht na hIodáile ag brath, ní mór a mheabhrú gur chinn an Chúirt Bhreithiúnais cheana féin go bhféadfar gá den sórt sin, go háirithe sa mhéid a bhaineann sé le cothromaíocht idir líon na n‑oibrithe i bpoist oideachais phoiblí agus líon na ndaltaí, a chur san áireamh freisin, i bprionsabal, mar ‘chúis oibiachtúil’ de réir bhrí Chlásal 5(1)(a) den Chreat‑Chomhaontú (breithiúnas an 26 Samhain 2014, Mascolo agus páirtithe eile, C‑22/13, C‑61/13 go C‑63/13 agus C‑418/13, EU:C:2014:2401, míreanna 94 agus 95).

47

É sin ráite, cé gur féidir a shamhlú, sa chás seo, go bhfuil Airteagal 4(2) agus (3) de Dhlí Uimh. 124/1999 mar chuid den ghá sin le solúbthacht maidir le foireann RTC a earcú, a mhéid a bhaineann na forálacha sin leis an bhféidearthacht poist shaora a líonadh go sealadach, seachas iad siúd atá folamh, níl aon fhianaise i bhforálacha mhíreanna 1 agus 11 den Airteagal sin, dá dtagraítear i mír 39 den bhreithiúnas seo agus a bhaineann le poist fholmha agus shaora atá beartaithe d’fhoireann RTC, áfach, a d’fhéadfadh a thabhairt le tuiscint go bhfuil siad beartaithe go hiarbhír chun gá le solúbthacht den sórt sin a chomhlíonadh, nó, fós féin, chun na coinníollacha a shainmhíniú lena rialaítear an fhéidearthacht conarthaí fostaíochta ar théarma seasta i ndiaidh a chéile a thabhairt i gcrích leis an bhfoireann sin.

48

Sna himthosca sin, fiú má shaothraítear leis an reachtaíocht náisiúnta atá i gceist an cuspóir ar a bhfuil Poblacht na hIodáile ag brath, eadhon an gá atá le solúbthacht a bhaineann go sonrach leis an oideachas poiblí a chur san áireamh, ní chomhlíontar na ceanglais maidir le soiléireacht agus beachtas nach mór a bheith ina saintréith de bhearta trasuite náisiúnta le staid dhlíthiúil fhoireann RTC a eascraíonn as an reachtaíocht sin, mar a cuireadh faoi bhráid na Cúirte Breithiúnais.

49

Ní féidir le cuspóir den sórt sin an reachtaíocht sin a chur i gcomhréir le Clásal 5(1)(a) den Chreat‑Chomhaontú, ós rud é nach féidir a léiriú go bhfuil imthosca sonracha agus nithiúla ann ar saintréithe den ghníomhaíocht atá i gceist iad agus, dá réir sin, údar a thabhairt, sa chomhthéacs sonrach sin, le conarthaí fostaíochta ar théarma seasta i ndiaidh a chéile a úsáid, i gcomhréir leis an gcásdlí dá dtagraítear i mír 37 den bhreithiúnas seo (féach, de réir analaí, breithiúnas an 26 Feabhra 2015, an Coimisiún v Lucsamburg, C‑238/14, EU:C:2015:128, mír 50).

50

Is amhlaidh is mó é sin, sa chás seo, ós rud é go bhfuil na poist fholmha agus shaora lena mbaineann Airteagal 4(1) agus (11) de Dhlí Uimh. 124/1999 beartaithe le bheith líonta ag foireann tionachta agus, dá bhrí sin, nach bhfuil siad de chineál sealadach, a priori, ach de chineál buan.

51

Dá bhrí sin, ní féidir glacadh leis an ngá atá le solúbthacht a bhaineann go sonrach leis an oideachas poiblí, mar a áitíonn Poblacht na hIodáile, sa chás seo, chun a mheas go bhforáiltear leis an reachtaíocht náisiúnta atá i gceist, i gcomhréir le Clásal 5(1)(a) den Chreat‑Chomhaontú, ‘cúis oibiachtúil’ lena dtugtar údar le conarthaí fostaíochta ar théarma seasta a tugadh i gcrích le foireann RTC atá fostaithe i bhforais oideachais phoiblí a athnuachan.

52

Sa tríú háit, maidir le ‘bearta dlíthiúla comhionanna’ a d’fhéadfadh a bheith ann, i ndlí na hIodáile, de réir bhrí Chlásal 5(1) den Chreat‑Chomhaontú, ba cheart a mheabhrú go bhfuil sé beartaithe leis an nath sin aon bheart den dlí náisiúnta a chumhdach atá beartaithe, amhail na bearta a leagtar síos leis an gClásal sin, chun cosc éifeachtach a chur ar mhí-úsáid conarthaí nó caidrimh fostaíochta ar théarma seasta i ndiaidh a chéile (breithiúnas an 23 Aibreán 2009, Angelidaki agus páirtithe eile, C‑378/07 go C‑380/07, EU:C:2009:250, mír 76 agus an cásdlí dá dtagraítear).

53

Sa chás seo, ní mór a shonrú, cé go dtugann an Coimisiún aghaidh ar an bhféidearthacht go bhféachfadh Poblacht na hIodáile le brath ar bhearta dlíthiúla comhionanna den sórt sin a ghlacadh, ar an bhforas gur eagraigh sí, le blianta beaga anuas, sraith comórtas lenar féidir stádas buan a dheonú do roinnt oibrithe a bhaineann le foireann RTC, níl aon rud le tabhairt le fios go raibh sé beartaithe ag an mBallstát sin brath go hiarbhír ar eagrú na gcomórtas sin mar ‘bheart dlíthiúil comhionann’.

54

É sin ráite, agus in aon chás, is fíor gur chinn an Chúirt Bhreithiúnais go bhfuil an eagrú, laistigh de na teorainneacha ama riachtanacha maidir le nósanna imeachta roghnúcháin atá beartaithe chun poist arna líonadh go cinntitheach ag oibrithe ar théarma seasta, de chineál a chuirfeadh cosc ar stádas neamhchinnte na n‑oibrithe sin a bheith buan, trína áirithiú go líonfar go cinntitheach na poist atá acu go tapa. Dá bhrí sin, d’fhéadfadh cosc a chur ar mhí-úsáid a eascraíonn as úsáid caidreamh fostaíochta ar théarma seasta i ndiaidh a chéile le beart den sórt sin agus, dá bhrí sin, d’fheadfadh sé a bheith ina ‘bheart dlíthiúil comhionann’ (féach, chuige sin, breithiúnas an 19 Márta 2020, Sánchez Ruiz agus páirtithe eile, C‑103/18 agus C‑429/18, EU:C:2020:219, míreanna 93 go 95).

55

Mar sin féin, mar a chuir an Coimisiún in iúl, gan Poblacht na hIodáile a bheith ag teacht salach air, is cosúil, sa chás seo, nár eagraíodh na comórtais a eagraíodh le déanaí chun stádas buan a dheonú d’fhoireann RTC laistigh de thréimhsí sonracha a leagadh síos chun na críche sin, ach, os a choinne sin, ar bhonn ad hoc agus neamh-intuartha, amhail na cinn dá dtagraítear i mír 42 den bhreithiúnas seo, agus mar thoradh air sin nach féidir a mheas, ar chúiseanna atá cosúil leo siúd a leagtar amach i míreanna 43 agus 44 den bhreithiúnas seo, gur ‘beart dlíthiúil comhionann’ iad de réir bhrí Chlásal 5(1) den Chreat‑Chomhaontú (féach, chuige sin, breithiúnas an 19 Márta 2020, Sánchez Ruiz agus páirtithe eile, C‑103/18 agus C‑429/18, EU:C:2020:219, mír 98).

56

Sa cheathrú háit agus ar deireadh, a mhéid a mheasann Poblacht na hIodáile gur cheart an nós imeachta a chur ar fionraí go dtí go nglacfar leasuithe reachtacha áirithe le linn an ullmhúcháin lena n‑áirítear sásraí nua maidir le dul chun cinn agus earcú fhoireann RTC agus a d’fhéadfadh, dar léi, deireadh a chur le haon sárú a d’fhéadfadh a bheith ann maidir le Clásal 5(1) den Chreat‑Chomhaontú, ní féidir go n‑éireoidh le hargóint den sórt sin. I ndáil leis sin, is leor a mheabhrú, de réir cásdlí socair, nach mór an cheist ar mhainnigh Ballstát a oibleagáidí a chomhlíonadh a chinneadh faoi threoir na staide atá i réim sa Bhallstát ag deireadh na tréimhse a leagtar síos sa tuairim réasúnaithe (breithiúnas an 14 Aibreán 2005, an Coimisiún v Lucsamburg, C‑519/03, EU:C:2005:234, mír 18 agus an cásdlí dá dtagraítear), eadhon, sa chás seo, an 19 Meitheamh 2023.

57

Ní mór a mheas, dá bhrí sin, nach bhforáiltear leis an reachtaíocht náisiúnta atá i gceist d’aon cheann de na bearta dá bhforáiltear i gClásal 5(1)(a) go (c) den Chreat‑Chomhaontú, nó nach bhfuil bearta dlíthiúla comhionanna inti de réir bhrí na forála sin. Dá bhrí sin, tá bunús maith leis an gcaingean a thionscain an Coimisiún.

58

I bhfianaise na mbreithnithe go léir roimhe seo, ní mór a mheas, trí mhainneachtain bearta a dhéanamh chun cosc a chur ar mhí-úsáid conarthaí ar théarma seasta i ndiaidh a chéile le haghaidh foireann ionaid RTC atá fostaithe i bhforais oideachais phoiblí, gur mhainnigh Poblacht na hIodáile a hoibleagáidí faoi Chlásal 5 den Chreat‑Chomhaontú a chomhlíonadh.

Costais

59

Faoi Airteagal 138(1) de na Rialacha Nós Imeachta, ordófar don pháirtí caillteach na costais a íoc má tá iarraidh ina leith sin sna pléadálacha. Ós rud é go bhfuil iarratas déanta ag an gCoimisiún go n‑íocfaidh Poblacht na hIodáile na costais agus gur mhainnigh Poblacht na hIodáile a hoibleagáidí a chomhlíonadh, ní mór a ordú di na costais a íoc.

1.

Ós rud é nár glacadh bearta chun cosc a chur ar mhí-úsáid conarthaí ar théarma seasta i ndiaidh a chéile le haghaidh foireann ionaid riaracháin, theicniúil agus chúnta atá fostaithe i bhforais oideachais phoiblí, gur mhainnigh Poblacht na hIodáile a hoibleagáidí a chomhlíonadh faoi Chlásal 5 den Chreat‑Chomhaontú maidir le hobair ar théarma seasta, a tugadh i gcrích an 18 Márta 1999, atá san Iarscríbhinn a ghabhann le Treoir 1999/70/CE ón gComhairle an 28 Meitheamh 1999 maidir leis an gCreat‑Chomhaontú maidir le hobair ar théarma seasta arna thabhairt i gcrích ag ETUC, UNICE agus CEEP.

2.

Ordaítear do Phoblacht na hIodáile na costais a íoc.