|
Iris Oifigiúil |
GA Sraith L |
|
2024/776 |
29.2.2024 |
CINNEADH CUR CHUN FEIDHME (AE) 2024/776 ÓN gCOMHAIRLE
an 26 Feabhra 2024
lena n-údaraítear an Pholainn rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, i gcomhréir le hAirteagal 19 de Threoir 2003/96/CE
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh,
Ag féachaint do Threoir 2003/96/CE ón gComhairle an 27 Deireadh Fómhair 2003 lena ndéantar athstruchtúrú ar chreat an Chomhphobail le haghaidh cáin a ghearradh ar tháirgí fuinnimh agus ar leictreachas (1), agus go háirithe Airteagal 19 di,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Le Cinneadh Cur Chun Feidhme (AE) 2023/1197 ón gComhairle (2), údaraíodh an Pholainn rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, i gcomhréir le hAirteagal 19 de Threoir 2003/96/CE. Chuaigh an t-údarú sin in éag an 30 Meitheamh 2023. |
|
(2) |
Le litir dar dáta an 30 Meitheamh 2023, d’iarr an Pholainn údarú chun leanúint de rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, i gcomhréir le hAirteagal 19 de Threoir 2003/96/CE, ar rátaí iad a thiteann faoi bhun na n-íosleibhéal cánachais dá dtagraítear in Airteagal 9 den Treoir sin. Sholáthair údaráis na Polainne faisnéis agus soiléirithe breise chun tacú leis an iarraidh an 8 Meán Fómhair 2023, agus an 5 agus an 13 Deireadh Fómhair 2023. D’iarr siad an t-údarú le haghaidh tréimhse 6 mhí, ón 1 Iúil 2023 go dtí an 31 Nollaig 2023. |
|
(3) |
Dar le húdaráis na Polainne, is é is aidhm do chur i bhfeidhm ráta laghdaithe cánach maolú a dhéanamh ar an tionchar diúltach a bheadh ann mar thoradh ar mhéadú ar na leibhéil chánachais mar gheall ar ráta malairte ard idir an euro agus an złoty, i gcomhréir le hAirteagal 13 de Threoir 2003/96/CE. Bheadh an laghdú sin ag freagairt don mhéid a d’eascródh as an difríocht sa ráta malairte tar éis an choigeartaithe bhliantúil arna dhéanamh i gcomhréir le hAirteagal 13 den Treoir sin. |
|
(4) |
Ní dócha go ndéanfaidh an t-údarú a iarradh saobhadh ar iomaíocht ná go gcuirfidh sé bac ar fheidhmiú cuí an mhargaidh inmheánaigh. I bhfianaise a ghiorra atá sé agus na n-imthosca eisceachtúla atá nasctha leis an staid gheopholaitiúil tá an t-údarú a iarradh iomchuí agus comhréireach. Leis an údarú, déantar na cuspóirí sonracha beartais dá dtagraítear in Airteagal 19(1) de Threoir 2003/96/CE, agus go háirithe beartas comhshaoil an Aontais, a chothromú leis an ngá atá ann inacmhainneacht fuinnimh a áirithiú do ghnólachtaí agus do theaghlaigh. Dhéanfadh an laghdú cánach na costais mhéadaithe fuinnimh a fhritháireamh go páirteach agus ní laghdú é atá i gcarnacht le laghduithe cánach de chineál ar bith eile. |
|
(5) |
Ba cheart a údarú don Pholainn, dá réir sin, leanúint de rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, faoi mar a iarradh. |
|
(6) |
De bhun Airteagal 19(2) de Threoir 2003/96/CE, tá gach údarú a dheonaítear faoin bhforáil sin le bheith teoranta ó thaobh ama de. Mar sin féin, chun nach ndéanfar dochar d’fhorbairtí ginearálta a dhéanfar amach anseo ar an gcreat dlíthiúil atá ann cheana, is iomchuí a fhoráil gur cheart, i gcás ina ndéanfadh an Chomhairle, ag gníomhú di ar bhonn Airteagal 113 nó ar bhonn aon fhorála ábhartha eile den Chonradh ar Fheidhmiú an Aontais Eorpaigh, córas modhnaithe ginearálta a thabhairt isteach chun cáin a ghearradh ar tháirgí fuinnimh agus ar leictreachas nach mbeadh an t-údarú seo comhoiriúnach leis, scoirfeadh an t-údarú seo d’fheidhm a bheith aige an lá a thiocfaidh an córas modhnaithe ginearálta sin chun bheith infheidhme. |
|
(7) |
Chun a áirithiú go rachfar i ngleic go rianúil leis na héifeachtaí díobhálacha do thomhaltóirí a bhíonn ag praghsanna arda táirgí fuinnimh, tráth a raibh an tionchar is mó acu de dheasca boilsciú ard agus ardú praghsanna, ba cheart a áirithiú go bhféadfaidh an Pholainn an laghdú cánach a chur i bhfeidhm, faoi mar a iarradh, le héifeacht ón 1 Iúil 2023. |
|
(8) |
Ní dochar an cinneadh seo do chur i bhfeidhm rialacha an Aontais maidir leis an Státchabhair, |
TAR ÉIS AN CINNEADH SEO A GHLACADH:
Airteagal 1
Údaraítear an Pholainn rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, faoi bhun na n-íosleibhéal cánachais dá dtagraítear in Airteagal 9 de Threoir 2003/96/CE.
Airteagal 2
Beidh feidhm ag an gCinneadh seo ón 1 Iúil 2023 go dtí an 31 Nollaig 2023.
I gcás ina ndéanfaidh an Chomhairle, áfach, ag gníomhú di ar bhonn Airteagal 113 nó aon fhorála ábhartha eile den Chonradh ar Fheidhmiú an Aontais Eorpaigh, córas modhnaithe ginearálta a thabhairt isteach lena ngearrfaí cáin ar tháirgí fuinnimh agus ar leictreachas nach mbeadh an t-údarú arna dheonú in Airteagal 1 den Chinneadh seo comhoiriúnach leis, áfach, scoirfidh an Cinneadh seo d’fheidhm a bheith aige an lá a thiocfaidh an córas modhnaithe ginearálta sin chun bheith infheidhme.
Airteagal 3
Dírítear an Cinneadh seo chuig Poblacht na Polainne.
Arna dhéanamh sa Bhruiséil, an 26 Feabhra 2024.
Thar ceann na Comhairle
An tUachtarán
D. CLARINVAL
(1) IO L 283, 31.10.2003, lch. 51.
(2) Cinneadh Cur Chun Feidhme (AE) 2023/1197 ón gComhairle an 19 Meitheamh 2023 lena n-údaraítear an Pholainn rátaí laghdaithe dleachta máil a chur i bhfeidhm maidir le hola bhreosla throm, gás nádúrtha, gual agus cóc, a úsáidtear mar bhreoslaí téimh, i gcomhréir le hAirteagal 19 de Threoir 2003/96/CE (IO L 158, 21.6.2023, lch. 71).
ELI: http://data.europa.eu/eli/dec_impl/2024/776/oj
ISSN 1977-0839 (electronic edition)