(1)

Ir-Regolament tal-Kummissjoni (UE) Nru 142/2011 (2) jistabbilixxi r-regoli li jimplimentaw ir-Regolament (KE) Nru 1069/2009, inklużi l-parametri għat-trasformazzjoni ta' prodotti sekondarji mill-annimali f'bijogass jew kompost, kundizzjonijiet għat-tqegħid fis-suq ta' ikel għall-annimali domestiċi li jkun ġie impurtat u regoli għall-esportazzjoni ta' materjal tal-Kategorija 2.

(2)

L-Anness V tar-Regolament (UE) Nru 142/2011 jistabbilixxi l-istandards għat-trasformazzjoni ta' prodotti sekondarji mill-annimali f'bijogass u kompost. Skont il-punt 3(b) tat-Taqsima 2 tal-Kapitolu III tal-Anness V, l-awtoritajiet kompetenti jistgħu, f'ċerti kundizzjonijiet, jawtorizaw rekwiżiti speċifiċi minbarra dawk stabbiliti fil-Kapitolu III.

(3)

Madankollu, f'każijiet bħal dawn, ir-residwi tad-diġestjoni u l-kompost għandhom jitqiegħdu biss fis-suq fl-Istat Membru fejn ikunu ġew awtorizzati parametri alternattivi ta' trasformazzjoni. Sabiex l-awtorità kompetenti tiġi pprovduta bil-flessibilità meħtieġa fil-mod kif jiġu rregolati l-impjanti tal-bijogass u tal-kompost imsemmija fil-punt 3 tat-Taqsima 2 tal-Kapitolu III tal-Anness V tar-Regolament (UE) Nru 142/2011, huwa xieraq li jiġu esklużi mill-istandards stabbiliti fil-punt 2 tat-Taqsima 3 tal-Kapitolu III dawk ir-residwi ta' diġestjoni u l-kompost li għalihom l-Istat Membru diġà awtorizza parametri alternattivi ta' trasformazzjoni. L-Anness V tar-Regolament (UE) Nru 142/2011 għandu għaldaqstant jiġi emendat skont dan.

(4)

L-Istati Membri jistgħu jawtorizzaw l-importazzjoni ta' prodotti sekondarji tal-annimali u ta' prodotti derivati minn pajjiżi terzi awtorizzati biss. L-Istati Membri jistgħu jawtorizzaw l-importazzjoni ta' ikel mhux ipproċessat għall-annimali domestiċi li ġej minn prodotti sekondarji tas-sajd minn pajjiżi mhux tal-UE awtorizzati għall-importazzjoni ta' prodotti tas-sajd għall-konsum mill-bniedem skont l-Anness II tad-Deċiżjoni tal-Kummissjoni 2006/766/KE (3). Dan mhux il-każ għal importazzjonijiet ta' ikel ipproċessat għall-annimali domestiċi li ġej minn prodotti sekondarji tas-sajd. F'dak ir-rigward, l-importazzjoni ta' ikel ipproċessat għall-annimali domestiċi li ġej minn prodotti sekondarji tas-sajd huwa soġġett għal kundizzjonijiet iktar stretti mill-importazzjoni ta' ikel mhux ipproċessat għall-annimali domestiċi li ġej minn prodotti sekondarji tas-sajd. Huwa xieraq li tiġi awtorizzata l-importazzjoni ta' ikel ipproċessat għall-annimali domestiċi li ġej minn prodotti sekondarji tas-sajd mill-pajjiżi kollha mhux fl-UE li huma awtorizzati għall-importazzjoni ta' ikel mhux ipproċessat li ġej minn prodotti sekondarji tas-sajd. Għaldaqstant it-Tabella 2 tat-Taqsima 1 tal-Kapitolu II tal-Anness XIV tar-Regolament (UE) Nru 142/2011 għandha tiġi emendata skont dan.

(5)

L-esportazzjoni ta' demel ipproċessat iddestinat għall-inċinerazzjoni jew għar-rimi f'miżbla hija pprojbita. Madankollu, skont l-Artikolu 43(2) u (3) tar-Regolament (KE) Nru 1069/2009, l-esportazzjoni ta' dak il-materjal għall-użu f'impjanti tal-bijogass jew tal-ikkompostjar tista' tiġi permessa sakemm il-pajjiż tad-destinazzjoni huwa pajjiż membru tal-Organizzazzjoni għall-Kooperazzjoni u l-Iżvilupp Ekonomiċi (OECD). Sabiex tista' sseħħ l-esportazzjoni ta' demel ipproċessat u ta' fertilizzanti organiċi li fihom biss demel ipproċessat, huwa xieraq li jiġu stabbiliti r-regoli dwar l-esportazzjoni ta' dawk il-prodotti għal finijiet għajr l-inċinerazzjoni, ir-rimi fil-miżbliet, jew l-użu f'impjanti tal-bijogass jew tal-ikkompostjar f'pajjiżi li mhumiex membri tal-OECD. Dawk ir-regoli għandhom jistabbilixxu rekwiżiti tal-anqas ekwivalenti għar-rekwiżiti għat-tqegħid fis-suq ta' demel ipproċessat u ta' fertilizzanti organiċi li fihom biss demel ipproċessat. L-Anness XIV tar-Regolament (UE) Nru 142/2011 għandu għalhekk jiġi emendat skont dan.

(6)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,