1.

Din it-talba għal deċiżjoni preliminari mressqa mill-Verwaltungsgericht Berlin (il-Qorti Amministrattiva ta’ Berlin, il-Ġermanja) tirrigwarda l-interpretazzjoni tal-Artikolu 3(h) u tal-Artikolu 10a tad-Direttiva 2003/87/KE ( 2 ) li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni kif ukoll tal-Artikolu 18(1)(ċ) u tat-tieni subparagrafu tal-Artikolu 18(2) tad-Deċiżjoni 2011/278/UE ( 3 ), li tiddetermina regoli tranżitorji għal allokazzjoni armonizzata mingħajr ħlas tal-kwoti.

2.

Din it-talba tressqet fil-kuntest ta’ tilwima bejn Ingredion Germany GmbH (iktar ’il quddiem “Ingredion” jew “ir-rikorrenti fil-kawża prinċipali”) u r-Repubblika Federali tal-Ġermanja, irrappreżentata mill-Umweltbundesamt (l-Uffiċċju Federali tal-Ambjent, il-Ġermanja), fir-rigward ta’ talba għall-allokazzjoni ta’ kwoti ta’ emissjonijiet mingħajr ħlas għal installazzjoni li għandha tiġi kklassifikata bħala “i[n]stallazzjoni li daħlet ġdida fis-suq” fis-sens tal-Artikolu 3(h) tad-Direttiva 2003/87 ( 4 ).

3.

F’dan il-kuntest, il-qorti tar-rinviju tistaqsi jekk, għall-finijiet li jiġi stabbilit in-numru annwali provviżorju ta’ kwoti mingħajr ħlas għal waħda mis-subinstallazzjonijiet li jikkostitwixxu din l-installazzjoni u li għaliha jeħtieġ li jiġi applikat parametru referenzjarju tal-fjuwil, il-fattur tal-użu tal-kapaċità applikabbli, imsemmi fl-Artikolu 18(1)(ċ) u fit-tieni subparagrafu tat-tieni paragrafu tal-Artikolu 18, huwiex limitat għal valur ta’ inqas minn 100 %.

4.

L-eżami ta’ din id-domanda jifforma parti minn sensiela twila ta’ ġurisprudenza dwar l-iskema għall-iskambju ta’ kwoti ta’ emissjonijiet tal-gass serra u dwar ir-regoli tranżitorji għall-allokazzjoni ta’ kwoti mingħajr ħlas ( 5 ), filwaqt li jagħti l-opportunità lill-Qorti tal-Ġustizzja tiddeċiedi għall-ewwel darba dwar l-iskema ddedikata għall-“installazzjonijiet li daħlu ġodda fis-suq”.

5.

Fi tmiem l-analiżi tiegħi, ser nipproponi lill-Qorti tal-Ġustizzja sabiex tiddeċiedi li, fil-kuntest ta’ din l-iskema, il-fattur tal-użu tal-kapaċità applikabbli għandu, għal subinstallazzjoni b’parametru referenzjarju ta’ fjuwil bħalma huwa dak operat, fiċ-ċirkustanzi tal-kawża prinċipali, minn Ingredion, ikun limitat għal valur ta’ inqas minn 100 %.

6.

L-Artikolu 3 tad-Direttiva 2003/87, intitolat “Id-definizzjonijiet”, jipprovdi:

“Għall-għanijiet ta’ din id-Direttiva għandhom japplikaw id-definizzjonijiet li ġejjin:

[…]

7.

Skont l-Artikolu 10a ta’ din id-direttiva, intitolat “Regoli tranżitorji madwar il-Komunità kollha għal allokazzjoni gratis armonizzata”:

“1.   Sal-31 ta’ Diċembru 2010, il-Kummissjoni għandha tadotta, miżuri ta’ implimentazzjoni sabiex ikunu applikabbli mal-Komunità kollha […]

[…]

Il-miżuri msemmija fl-ewwel subparagrafu għandhom, safejn ikun fattibbli, jiddeterminaw punti ta’ riferiment ex ante Komunitarji sabiex jiżguraw li l-allokazzjoni sseħħ b’mod li tagħti inċentivi għal tnaqqis fl-emissjonijiet ta’ gass serra u għal teknika ta’ effiċjenza fl-enerġija, billi tqis it-teknika l-aktar effiċjenti, […] u ma għandhiex tipprovdi inċentivi biex jiżdiedu l-emissjonijiet.

[…]

7.   Ħamsa fil-mija tal-kwantità totali tal-kwoti determinati taħt l-Artikoli 9 u 9a matul il-perjodu mill-2013 sal-2020 għandhomjiġu riżervati għal istallazzjonijiet li daħlu ġodda fis-suq, bħala l-massimu li jista’ jiġi allokat lill-istallazzjonijiet li daħlu ġodda fis-suq konformement mar-regoli adottati taħt il-paragrafu 1 ta’ dan l-Artikolu. […]

[…]

Sal-31 ta’ Diċembru 2010, il-Kummissjoni għandha tadotta regoli armonizzati għall-applikazzjoni tad-definizzjoni ta’ ‘istallazzjoni li daħlet ġdida fis-suq’, b’mod partikolari fir-rigward tad-definizzjoni tal-‘estensjonijiet sinifikanti’.

[…]”

8.

L-Artikolu 17 tad-Deċiżjoni 2011/278, intitolat “Applikazzjoni għal allokazzjoni mingħajr ħlas” jinkludi l-paragrafu 4, li huwa fformulat kif ġej:

“Għall-installazzjonijiet imsemmija fl-Artikolu 3(h) tad-Direttiva [2003/87], bl-eċċezzjoni tal-installazzjonijiet li kellhom estensjoni sinifikanti wara t-30 ta’ Ġunju 2011, l-Istati Membri għandhom jirrikjedu li l-operatur jiddetermina l-kapaċità installata inizjali ta’ kull subinstallazzjoni skont il-metodoloġija stabbilita fl-Artikolu 7(3) billi jintuża perjodu kontinwu ta’ 90 jum fuq il-bażi ta’ liema l-bidu tal-operazzjoni normali huwa ddeterminat bħala referenza. L-Istati Membri għandhom japprovaw din il-kapaċità installata inizjali ta’ kull subinstallazzjoni qabel jikkalkulaw l-allokazzjoni lill-installazzjoni.”

9.

L-Artikolu 18 ta’ din id-deċiżjoni, intitolat “Il-livelli ta’ attività”, jipprovdi:

“1.   Għal installazzjonijiet imsemmija fl-Artikolu 3(h) tad-Direttiva [2003/87], bl-eċċezzjoni ta’ installazzjonijiet li kellhom estenzjoni sinifikanti wara t-30 ta’ Ġunju 2011, l-Istati Membri għandhom jiddeterminaw il-livelli ta’ kull installazzjoni kif ġej:

[…]

[…]

2.   […]

Il-fattur tal-utilizzazzjoni tal-kapaċità applikabbli msemmi fil-paragrafi 1(b) sa (d) għandu jkun stabbilit mill-Istati Membri fuq il-bażi tal-informazzjoni ssostanzjata kif jixraq u vverifikata b’mod indipendenti rigward l-attività normali, il-manutenzjoni, iċ-ċiklu ta’ produzzjoni komuni, it-tekniki effiċjenti fl-użu tal-enerġija u l-utilizzazzjoni tipika maħsuba tal-kapaċità tal-installazzjoni fis-settur ikkonċernat meta mqabbel ma’ informazzjoni speċifika għas-settur.

[…]

3.   Għall-installazzjonijiet li kellhom estenzjoni sinifikanti tal-kapaċità wara t-30 ta’ Ġunju 2011, l-Istati Membri għandhom jiddeterminaw skont il-paragrafu 1 il-livelli ta’ attività biss għall-kapaċità miżjuda tas-subinstallazzjonijiet li għalihom tirrelata l-estensjoni sinifikanti tal-kapaċità.

Għall-installazzjonijiet li kellhom tnaqqis sinifikanti fil-kapaċità wara t-30 ta’ Ġunju 2011, l-Istati Membri għandhom jiddeterminaw skont il-paragrafu 1 il-livelli ta’ attività biss għall-kapaċità mnaqqsa tas-subinstallazzjonijiet li għalihom jirrelata t-tnaqqis sinifikanti fil-kapaċità.”

10.

L-Artikolu 19 ta’ din l-istess deċiżjoni, intitolat “L-allokazzjonijiet lill-installazzjonijiet li daħlu ġodda fis-suq”, jipprovdi li:

“1.   Għall-finijiet tal-allokazzjoni tal-kwoti tal-emissjonijiet lil installazzjonijiet li daħlu ġodda fis-suq, bl-eċċezzjoni tal-allokazzjonijiet lill-installazzjonijiet imsemmija fit-tielet inċiż tal-Artikolu 3(h) tad-Direttiva [2003/87], l-Istati Membri għandhom jikkalkulaw in-numru annwali preliminari tal-kwoti tal-emissjonijiet allokati mingħajr ħlas mal-bidu tal-attività normali tal-installazzjoni għal kull subinstallazzjoni separatament, kif ġej:

[…]

[…]

4.   L-Istati Membri għandhom jinnotifikaw lill-Kummissjoni mingħajr dewmien rigward l-ammont annwali preliminari totali ta’ kwoti ta’ emissjonijiet allokati mingħajr ħlas. L-allokazzjonijiet tal-emissjonijiet mir-riżerva tal-installazzjonijiet li daħlu ġodda fis-suq maħluqa skont l-Artikolu 10a(7) tad-Direttiva [2003/87] għandhom ikunu allokati fuq il-bażi ta’ min jiġi l-ewwel, jinqeda l-ewwel fir-rigward tal-irċevuta ta’ din in-notifika.

Il-Kummissjoni tista’ tirrifjuta l-ammont preliminari annwali totali tal-kwoti ta’ emissjonijiet allokati mingħajr ħlas għall-installazzjoni kkonċernata. Jekk il-Kummissjoni ma tirrifjutax dan l-ammont preliminari annwali totali tal-kwoti ta’ emissjonijiet allokati mingħajr ħlas, l-Istat Membru kkonċernat għandu jipproċedi għad-determinazzjoni tal-ammont annwali finali ta’ kwoti ta’ emissjonijiet allokati mingħajr ħlas.”

11.

L-Artikolu 9(1) tat-Treibhausgas-Emissionshandelsgesetz (il-Liġi dwar l-Iskambju ta’ Drittijiet ta’ Emissjoni ta’ Gassijiet Serra) tal-21 ta’ Lulju 2011 (BGBl. 2011 I, p. 1475), huwa fformulat kif ġej:

“(1)   L-operaturi tal-installazzjonijiet għandhom jirċievu allokazzjoni mingħajr ħlas ta’ drittijiet ta’ emissjonijiet skont il-prinċipji stabbiliti fl-Artikolu 10a […] tad-Direttiva [2003/87] […] u skont dawk stabbiliti fid-Deċiżjoni [2011/278] […]”.

12.

L-Artikolu 2 tal-Verordnung über die Zuteilung von Treibhausgas-Emissionberechtigungen in der Handelsperiode 2013 bis 2020 (ir-Regolament dwar l-Allokazzjoni tal-Kwoti ta’ Emissjoni ta’ Gassijiet Serra għall-Perijodu ta’ Skambju 2013 sal-2020), tas-26 ta’ Settembru 2011 (BGBl. 2011 I, p. 1921, iktar ’il quddiem iż-“ZuV 2020”), intitolat “Definizzjoni”, jipprovdi kif ġej:

“[…]

10.   Installazzjonijiet ġodda

L-installazzjonijiet li daħlu ġodda fis-suq kollha skont l-ewwel inċiż tal-Artikolu 3(h) tad-Direttiva [2003/87];

[…]”

13.

L-Artikolu 16 taż-ZuV 2020, intitolat “Applikazzjoni għall-allokazzjoni mingħajr ħlas ta’ drittijiet ta’ emissjoni”, jipprovdi:

“(1)   L-applikazzjonijiet għall-allokazzjoni mingħajr ħlas tal-installazzjonijiet li daħlu ġodda fis-suq għandhom jiġu ppreżentati f’terminu ta’ sena b’effett mill-bidu tal-operat normali tal-installazzjoni u, f’każ ta’ żieda sinjifikattiva fil-kapaċità, f’terminu ta’ sena b’effett mill-bidu tal-operat immodifikat.

[…]

(4)   B’deroga mill-Artikolu 4, il-kapaċità installata inizjali għall-installazzjonijiet ġodda tikkorrispondi, għal kull element ta’ allokazzjoni, għall-medja, estrapolata fuq sena kalendarja, tal-ikbar żewġ kwantitajiet mensili prodotti matul il-perijodu kontinwu ta’ 90 ġurnata li abbażi tiegħu jiġi stabbilit il-bidu tal-operat normali.

[…]”

14.

L-Artikolu 17 taż-ZuV 2020, intitolat “Livelli ta’ attività tal-installazzjonijiet li daħlu ġodda fis-suq”, jipprovdi:

(1)   Għall-elementi ta’ allokazzjoni tal-installazzjonijiet ġodda li għandhom jiġu stabbiliti skont l-Artikolu 3, il-livelli ta’ attività rilevanti għall-allokazzjoni tal-kwoti għandhom jiġu stabbiliti kif ġej:

[…]

[…]

(2)   Il-fattur tal-użu tal-kapaċità applikabbli msemmi fil-punti 2 sa 4 tal-paragrafu 1, għandu jiġi stabbilit abbażi tal-informazzjoni pprovduta mill-applikant fuq:

[…]” ( 6 )

15.

Skont l-Artikolu 18 taż-ZuV 2020, intitolat “Allokazzjoni għall-installazzjonijiet li daħlu ġodda fis-suq”:

“(1)   Għall-allokazzjoni ta’ kwoti lill-installazzjonijiet ġodda, l-awtorità kompetenti għandha tikkalkola n-numru annwali provviżorju ta’ kwoti li għandhom jiġu allokati mingħajr ħlas fil-bidu tal-operat normali tal-installazzjoni għas-snin li jifdal tal-perijodu ta’ skambju 2013 sa 2020 kif ġej u separatament għal kull element ta’ allokazzjoni:

[…]

[…]”

16.

Ir-rikorrenti fil-kawża prinċipali, Ingredion, topera installazzjoni f’Hamburg (il-Ġermanja) intiża għall-produzzjoni ta’ prodotti tal-lamtu ( 7 ). Din l-installazzjoni tinkludi, bħala subinstallazzjonijiet, apparat ta’ tisħin tal-arja u ġeneratur tal-fwar, li jużaw il-fwar u l-gass naturali sabiex jiġġeneraw sħana għall-produzzjoni tal-lamtu.

17.

Fit-8 ta’ Awwissu 2014, Ingredion talbet mingħand id-Deutsche Emissionshandelsstelle (id-Dipartiment Ġermaniż tal-Iskambju ta’ Kwoti ta’ Emissjonijiet, iktar ’il quddiem id-“DEHSt”) l-allokazzjoni ta’ kwoti ta’ emissjonijiet mingħajr ħlas għal dawn iż-żewġ subinstallazzjonijiet. Hija bbażat it-talba tagħha, għal waħda mill-imsemmija subinstallazzjonijiet, fuq parametru referenzjarju ta’ sħana u, għall-oħra, fuq parametru referenzjarju ta’ kombustibbli ( 8 ).

18.

Sabiex jiġi ddeterminat in-numru provviżorju ta’ kwoti ta’ emissjonijiet li minnu setgħet tibbenefika mingħajr ħlas is-subinstallazzjoni b’parametru referenzjarju ta’ kombustibbli, id-DEHSt, l-ewwel nett, ħa inkunsiderazzjoni fattur ta’ użu tal-kapaċità applikabbli ta’ 109 %. Fil-fatt, skont id-data pprovduta minn Ingredion, l-użu effettiv tal-kapaċità ta’ din is-subinstallazzjoni, matul il-perijodu li għadda bejn id-data tad-dħul fis-servizz regolari tal-installazzjoni, il-15 ta’ Awwissu 2013, u d-data tat-tressiq tal-preżentazzjoni tal-applikazzjoni għal allokazzjoni, l-20 ta’ Ġunju 2014, kien ogħla minn 100 % tal-kapaċità installata oriġinali tagħha ( 9 ).

19.

It-tieni nett, id-DEHSt qies li, peress li fid-deċiżjoni tagħha tal-24 ta’ Marzu 2015 ( 10 ), il-Kummissjoni kienet ċaħdet fattur ta’ użu tal-kapaċità applikabbli ta’ 100 % jew iktar għal tliet installazzjonijiet Ġermaniżi oħra, kien jeħtieġ għaldaqstant li wieħed jibbaża ruħu fuq fattur ta’ użu tal-kapaċità applikabbli ta’ 99.9 %, u mhux ta’ 109 %. Fuq din il-bażi, permezz ta’ deċiżjoni tal-1 ta’ Settembru 2015, hija ddeterminat in-numru ta’ kwoti ta’ emissjonijiet mingħajr ħlas allokati lil Ingredion għall-perijodu ta’ allokazzjoni bejn is-sena 2013 u s-sena 2020.

20.

Ir-rikorrenti fil-kawża prinċipali opponiet din id-deċiżjoni. L-oppożizzjoni tagħha ġiet miċħuda b’deċiżjoni tas-7 ta’ Lulju 2017, innotifikata fl-10 ta’ Lulju 2017. Id-DEHSt immotiva dan ir-rifjut billi invoka, minbarra d-deċiżjoni tal-Kummissjoni tal-24 ta’ Marzu 2015, dokumenti ta’ gwida ppubblikati minn din tal-aħħar ( 11 ).

21.

Permezz tar-rikors tagħha ppreżentat fid-9 ta’ Awwissu 2017 quddiem il-Verwaltungsgericht Berlin (il-Qorti Amministrattiva ta’ Berlin, il-Ġermanja), ir-rikorrenti fil-kawża prinċipali tenniet it-talba tagħha.

22.

Permezz ta’ deċiżjoni tat-28 ta’ Jannar 2019, id-DEHSt irtira d-deċiżjoni tiegħu tal-1 ta’ Settembru 2015 inkwantu l-applikazzjoni għall-allokazzjoni kienet tinkludi żball ta’ kalkolu għal dak li kien jikkonċerna s-subinstallazzjoni b’parametru referenzjarju ta’ kombustibbli. Minħabba dan l-iżball fil-kalkolu, Ingredion emendat ir-rikors tagħha fl-20 ta’ Jannar 2019.

23.

Il-qorti tar-rinviju tindika li s-soluzzjoni tal-kawża mressqa quddiemha tiddependi mill-kwistjoni dwar jekk, skont it-tieni subparagrafu tal-Artikolu 18(2) tad-Deċiżjoni 2011/278, il-fattur ta’ użu tal-kapaċità applikabbli jistax jilħaq valur ogħla jew ugwali għal 100 %, għas-subinstallazzjonijiet b’parametru referenzjarju ta’ kombustibbli li, bħal dik ta’ Ingredion, jappartjenu għall-iskema tal-“installazzjonijiet li daħlu ġodda fis-suq”.

24.

B’mod partikolari, din il-qorti tirrileva li l-formulazzjoni ta’ din id-dispożizzjoni ma ssemmix eventwali limitazzjoni tal-fattur ta’ użu tal-kapaċità applikabbli għal valur inqas minn 100 %. Hija tikkonstata li, fiċ-ċirkustanzi tal-kawża li tressqet quddiemha, l-applikazzjoni ta’ fattur ogħla tirriżulta minn informazzjoni kkorroborata u vverifikata b’mod indipendenti, li tirrigwarda mhux biss l-operat normali previst mis-subinstallazzjoni ta’ Ingredion, iżda wkoll l-operat effettiv tagħha sal-preżentazzjoni tal-applikazzjoni. Hija żżid li, b’kuntrast mal-installazzjonijiet eżistenti ( 12 ), il-perijodu ta’ referenza għall-operaturi l-ġodda jikkorrispondi, skont l-Artikolu 17(4) tad-Deċiżjoni 2011/278, għad-90 jum wara l-bidu tal-operat normali, u mhux għal perijodu ta’ erba’ snin ( 13 ).

25.

Madankollu, l-imsemmija qorti tosserva wkoll li paragun mal-operaturi l-ġodda li għandhom subinstallazzjonijiet b’parametru referenzjarju ta’ prodott juri li, għal dawn tal-aħħar, il-fattur ta’ użu tal-kapaċità standard applikabbli għalihom, skont l-Artikolu 18(1)(a) ta’ din id-deċiżjoni, fl-ebda każ ma jilħaq valur ta’ 100 % ( 14 ). Barra minn hekk, l-allokazzjoni ta’ kwoti mingħajr ħlas konformement mal-Artikolu 10a tad-Direttiva 2003/87 tiddevja temporanjament mill-prinċipju tal-irkantar tal-kwoti ( 15 ) stabbilit minn din id-direttiva, li jimmilita favur interpretazzjoni restrittiva tad-dispożizzjonijiet rilevanti.

26.

F’dawn iċ-ċirkustanzi, il-Verwaltungsgericht Berlin (il-Qorti Amministrattiva ta’ Berlin) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja:

“L-Artikolu 18(1)(c) u t-tieni subparagrafu tal-Artikolu 18(2) tad-Deċiżjoni [2011/278], moqri flimkien mal-Artikolu 3(h) u mal-Artikolu 10a tad-Direttiva [2003/87], għandhom jiġu interpretati fis-sens li, għal installazzjonijiet li jidħlu ġodda fis-suq, il-fattur ta’ użu tal-kapaċità applikabbli għal-livell ta’ attività relatat mal-fjuwil għandu jkun limitat għal valur ta’ inqas minn 100 %?”

27.

Osservazzjonijiet bil-miktub ġew ippreżentati lill-Qorti tal-Ġustizzja minn Ingredion, mir-Repubblika Federali tal-Ġermanja u mill-Kummissjoni Ewropea.

28.

Ingredion, ir-Repubblika Federali tal-Ġermanja, il-Gvern Ġermaniż u l-Kummissjoni kienu rrappreżentati waqt is-seduta għas-sottomissjonijiet orali, li nżammet fit-12 ta’ Marzu 2020.

29.

Din it-talba għal deċiżjoni preliminari tistieden essenzjalment lill-Qorti tal-Ġustizzja tiddetermina jekk, fil-kuntest tal-iskema ta’ allokazzjoni ta’ kwoti ta’ emissjonijiet mingħajr ħlas lill-“installazzjonijiet li daħlu ġodda fis-suq”, il-fattur ta’ użu tal-kapaċità applikabbli jistax, fir-rigward ta’ subinstallazzjoni b’parametru referenzjarju ta’ kombustibbli, ikun ogħla minn jew ugwali għal valur ta’ 100 %. Jekk ikun il-każ, dan il-fattur jippermetti, meta l-użu effettiv tal-kapaċità ta’ din is-subinstallazzjoni jeċċedi l-kapaċità installata inizjali tagħha, li jingħataw numru ikbar ta’ kwoti mingħajr ħlas.

30.

Infakkar li l-imsemmi fattur jippermetti, meta jiġi mmultiplikat bil-kapaċità installata inizjali ta’ subinstallazzjoni b’parametru referenzjarju ta’ kombustibbli, li jiġi kkalkolat il-livell ta’ attività relatat mal-kombustibbli. Skont l-Artikolu 19(1)(ċ) tad-Deċiżjoni 2011/278, in-numru annwali provviżorju ta’ kwoti ta’ emissjonijiet allokati mingħajr ħlas jiġi sussegwentement iddeterminat billi dan il-livell ta’ attività jiġi mmultiplikat bil-valur tal-parametru referenzjarju korrispondenti.

31.

F’dan ir-rigward, nikkonstata li għalkemm il-fattur ta’ użu tal-kapaċità applikabbli għandu, skont it-tieni subparagrafu tal-Artikolu 18(2) tad-Deċiżjoni 2011/278, “jkun stabbilit mill-Istati Membri fuq il-bażi tal-informazzjoni ssostanzjata kif jixraq u vverifikata b’mod indipendenti […] meta mqabbel ma’ informazzjoni speċifika għas-settur”, din id-dispożizzjoni min-naħa l-oħra ma tipprevedix limitazzjoni espliċita tal-valur ta’ dan il-fattur.

32.

Fl-osservazzjonijiet bil-miktub tagħhom u waqt is-seduta quddiem il-Qorti tal-Ġustizzja, il-partijiet ukoll esprimew din il-konstatazzjoni. Huma essenzjalment sostnew tliet argumenti differenti, li jistgħu jinġabru fil-qosor fit-termini li ġejjin.

33.

L-ewwel nett, Ingredion qieset li l-fattur ta’ użu tal-kapaċità applikabbli jista’ jiġi aġġustat għal valur ogħla minn 100 % meta, fuq perijodu li jmur lil hinn minn dak ta’ 90 jum mill-bidu tal-operat normali tal-installazzjoni, l-użu effettiv tal-kapaċità tas-subinstallazzjoni tagħha b’parametru referenzjarju ta’ kombustibbli jaqbeż il-kapaċità inizjali installata tagħha ( 16 ).

34.

It-tieni nett, ir-Repubblika Federali tal-Ġermanja u l-Gvern Ġermaniż qiesu, essenzjalment, li l-kwistjoni dwar jekk dan il-fattur huwiex limitat jew le għal valur inqas minn 100 % tiddependi essenzjalment mill-marġni ta’ diskrezzjoni li għandhom l-Istati Membri, skont it-tieni subparagrafu tal-Artikolu 18(2) tad-Deċiżjoni 2011/278, sabiex jiddeterminaw l-imsemmi fattur ( 17 ).

35.

It-tielet nett, il-Kummissjoni sostniet li, skont l-Artikolu 3(i) u l-Artikolu 20 ta’ din id-deċiżjoni, huma biss l-estensjonijiet sinjifikattivi ta’ kapaċità, jiġifieri l-estensjonijiet ta’ mill-inqas 10 % meta mqabbla mal-kapaċità installata inizjali, li setgħu jwasslu għal bidla fin-numru ta’ kwoti mingħajr ħlas allokati provviżorjament lil parteċipant ġdid. Il-fatt li l-fattur ta’ użu tal-kapaċità applikabbli jkun jista’ jintuża sabiex jittieħdu inkunsiderazzjoni estensjonijiet li, bħal fil-każ ta’ Ingredion, ma jaqbżux dan il-limitu ta’ 10 % u għalhekk ma jaqgħux taħt il-mekkaniżmu previst minn dawn id-dispożizzjonijiet, imur kontra l-istruttura u l-għanijiet tal-imsemmija deċiżjoni. Barra minn hekk, għas-subinstallazzjonijiet b’parametru referenzjarju ta’ prodott li jaqgħu taħt l-iskema applikabbli għall-“installazzjonijiet li daħlu ġodda fis-suq”, il-valur tal-fattur ta’ użu tal-kapaċità standard ikun dejjem inqas minn 100 %. Fid-dawl tal-prinċipju ta’ ugwaljanza fit-trattament bejn l-“installazzjonijiet li daħlu ġodda fis-suq”, l-istess għandu japplika fir-rigward tal-fattur ta’ użu tal-kapaċità applikabbli, għas-subinstallazzjonijiet b’parametru referenzjarju ta’ kombustibbli.

36.

Qabel kollox, ninnota li t-tħassib espress minn Ingredion jidhirli li huwa essenzjalment ibbażat fuq it-tul, fil-fehma tagħha qasir wisq, tal-perijodu ta’ referenza użat għall-kalkolu tal-kapaċità installata inizjali. Infakkar li, skont l-Artikolu 17(4) tad-Deċiżjoni 2011/278, dan il-perijodu jikkorrispondi għal 90 jum wara l-bidu tal-operat normali tal-installazzjoni ( 18 ).

37.

Fir-rigward tad-determinazzjoni tal-fattur ta’ użu tal-kapaċità applikabbli, id-dritt Ġermaniż jippermetti li jittieħed inkunsiderazzjoni l-operat effettiv tal-installazzjoni sal-preżentazzjoni tat-talba għal allokazzjoni ( 19 ). Ingredion tqis, essenzjalment, li l-valur ta’ dan il-fattur għandu għalhekk jirrifletti l-użu effettiv tal-kapaċità tas-subinstallazzjoni, kif ikun jidher fi tmiem dan il-perijodu (fil-każ ta’ Ingredion, bejn il-15 ta’ Awwissu 2013 u l-20 ta’ Ġunju 2014), jekk ikun il-każ, permezz ta’ valur ogħla minn 100 %, meta dan l-użu jeċċedi l-kapaċità installata inizjali.

38.

Fit-taqsimiet li ġejjin, ser nesponi r-raġunijiet li għalihom inqis, b’kuntrast ma’ Ingredion, li l-limitazzjoni tal-fattur ta’ użu tal-kapaċità applikabbli għal valur inqas minn 100 % hija neċessarja fid-dawl, l-ewwel nett, tal-formulazzjoni u tal-kuntest tal-ewwel subparagrafu tal-Artikolu 18(2) tad-Deċiżjoni 2011/278, li jirrigwarda l-fattur tal-kapaċità standard applikabbli għas-subinstallazzjonijiet b’parametru referenzjarju ta’ prodott (Taqsima B), it-tieni nett, tal-istruttura ġenerali ta’ din id-deċiżjoni (Taqsima Ċ) u, it-tielet nett, tal-għan globali u tal-għanijiet tas-sistema ta’ allokazzjoni provviżorja tal-kwoti (Taqsima D).

39.

Sussidjarjament, ser nagħmel xi rimarki dwar il-marġni ta’ diskrezzjoni li għandhom l-Istati Membri skont it-tieni subparagrafu tal-Artikolu 18(2) tal-imsemmija deċiżjoni, sabiex tingħata risposta għall-argumenti tar-Repubblika Federali tal-Ġermanja u tal-Gvern Ġermaniż (Taqsima E).

40.

Nikkonstata li, skont l-Artikolu 18(1)(a) u l-ewwel subparagrafu tal-Artikolu 18(2) tad-Deċiżjoni 2011/278, il-formula ta’ kalkolu applikabbli għall-finijiet tad-determinazzjoni tal-livell ta’ attività tas-subinstallazzjonijiet b’parametru referenzjarju ta’ prodott hija differenti minn dik applikabbli għas-subinstallazzjonijiet b’parametru referenzjarju ta’ sħana, kombustibbli jew emissjonijiet minn proċess ( 20 ). Fil-fatt, fil-każ tas-subinstallazzjonijiet b’parametru referenzjarju ta’ prodott, il-fattur ta’ użu tal-kapaċità applikabbli ma huwiex rilevanti u hemm lok li jittieħed bħala bażi l-fattur ta’ użu tal-kapaċità standard, li l-valur tiegħu huwa ddeterminat mill-Kummissjoni, b’mod konkret u preċiż ( 21 ).

41.

F’dan ir-rigward, nosserva, kif barra minn hekk irrilevat il-qorti tar-rinviju, li, skont id-Deċiżjoni 2013/447, fejn ġie ffissat dan il-fattur għas-snin 2013 sa 2020, il-valuri huma, għal kull wieħed mill-każijiet previsti, inqas minn 1 (u għalhekk minn 100 %) ( 22 ).

42.

Nammetti li għandi xi diffikultajiet sabiex nikkonċepixxi li l-fattur użat sabiex jiġi ddeterminat il-livell ta’ attività applikabbli għall-installazzonijiet li jidħlu ġodda fis-suq u, sussegwentement, in-numru ta’ kwoti provviżorji li għandhom jiġu allokati lil dawn tal-aħħar, jista’, fil-każ tas-subinstallazzjonijiet b’parametru referenzjarju ta’ kombustibbli, ikun ogħla minn valur ta’ 100 %, filwaqt li tali possibbiltà hija eskluża għas-subinstallazzjonijiet b’parametru referenzjarju ta’ prodott.

43.

Fil-fatt, minn naħa, inqis li l-prinċipju ta’ ugwaljanza fit-trattament bejn installazzjonijiet li daħlu ġodda fis-suq, li huwa essenzjalment sanċit fil-premessa 36 tad-Deċiżjoni 201/278 ( 23 ), jeżiġi, kif issostni r-Repubblika Federali tal-Ġermanja, li l-limiti imposti fuq il-valur tal-fattur użat sabiex jiġi ddeterminat il-livell ta’ attività jkunu l-istess għall-“installazzjoni li daħlu ġodda fis-suq”.

44.

Min-naħa l-oħra, mill-qari konġunt tad-definizzjonijiet mogħtija fl-Artikolu 3 (b) sa (d) u (h) tad-Deċiżjoni 2011/278 jirriżulta li l-metodu ta’ kalkolu ddefinit fl-ewwel subparagrafu tal-Artikolu 18(2) ta’ din id-deċiżjoni, għall-installazzjonijiet b’parametru referenzjarju ta’ prodott, għandu jitqies li huwa l-iktar wieħed preċiż. Kif spjegat il-Kummissjoni, il-fattur ta’ użu tal-kapaċità applikabbli jintuża biss meta ma jkunx possibbli li jiġi kkalkolat parametru referenzjarju ta’ prodott ( 24 ).

45.

Din l-interpretazzjoni hija kkorroborata mill-ġerarkija bejn il-parametri referenzjarji differenti li jistgħu japplikaw għal subinstallazzjoni partikolari, li hija espressament prevista fil-premessa 12 tad-Deċiżjoni 2011/278. Din il-premessa tipprovdi li l-metodi ta’ allokazzjoni ta’ kwoti mingħajr ħlas applikabbli għas-subinstallazzjonijiet b’parametru referenzjarju ta’ sħana jew ta’ kombustibbli jew emissjonijiet minn proċess jikkostitwixxu “tliet mudelli ta’ riżerva” fil-każijiet fejn ma kienx possibbli li jiġi kkalkolat parametru referenzjarju ta’ prodott.

46.

Għaldaqstant, jidhirli li jekk il-fattur ta’ użu tal-kapaċità standard ikun, skont id-Deċiżjoni 2013/447, inqas minn 1 (jew 100 %), dan għandu jkun ukoll il-każ fir-rigward tal-fattur ta’ użu tal-kapaċità applikabbli, għas-subinstallazzjonijiet b’parametru referenzjarju ta’ kombustibbli. Din il-limitazzjoni hija neċessarja sabiex tiġi ggarantita l-ugwaljanza fit-trattament fir-rigward tal-installazzjonijiet l-ġodda kollha u sabiex tiġi osservata l-ġerarkija bejn dawn il-parametri referenzjarji ( 25 ).

47.

Barra minn hekk, jidhirli li l-limitazzjoni tal-fattur ta’ użu tal-kapaċità applikabbli għal valur inqas minn 100 % hija neċessarja fid-dawl tal-istruttura ġenerali tad-Deċiżjoni 2011/278 u tal-metodi differenti ta’ kalkolu previsti minn din id-deċiżjoni, fil-qasam tal-allokazzjoni provviżorja ta’ kwoti mingħajr ħlas, għall-“installazzjonijiet eżistenti” ( 26 ) u għall-“installazzjonijiet li kienu suġġetti għal estensjoni sinjifikattiva fil-kapaċità” ( 27 ).

48.

Fir-rigward tal-“installazzjonijiet eżistenti”, nirrileva li dawn huma s-suġġett ta’ skema distinta minn dik applikabbli għall-“installazzjonijiet li jidħlu ġodda fis-suq”. Fil-każijiet fejn għandu jiġi applikat, fir-rigward tagħhom, parametru referenzjarju ta’ kombustibbli, in-numru annwali provviżorju ta’ kwoti mingħajr ħlas jikkorrispondi, kif jirriżulta mill-Artikolu 10(2)(b)(ii) tad-Deċiżjoni 2011/278, għall-valur tal-parametru referenzjarju tal-kombustibbli mmultiplikat bil-livell ta’ attività storiku relatat mal-kombustibbli għall-kombustibbli kkonsmati. Dan il-livell ta’ attività jikkorrispondi, essenzjalment, għall-valur medjan tal-konsum annwali storiku ta’ kombustibbli użati għal ċertu numru ta’ produzzjonijiet ( 28 ), matul perijodu ta’ referenza bejn l-1 ta’ Jannar 2005 u l-31 ta’ Diċembru 2008 jew bejn l-1 ta’ Jannar 2009 u l-31 ta’ Diċembru 2010 ( 29 ).

49.

Nosserva li dan il-perijodu ta’ referenza (minn sentejn sa erba’ snin) huwa ferm itwal minn dak ta’ 90 jum, stabbilit minn din id-deċiżjoni, sabiex tiġi ddeterminata l-kapaċità installata inizjali tal-installazzjonijiet li jidħlu ġodda fis-suq. Barra minn hekk, kif tirrileva ġustament il-Kummissjoni, il-kalkolu tal-livell ta’ attività tal-installazzjonijiet eżistenti jsir mingħajr ma jkun involut fattur paragunabbli ma’ dawk applikabbli għall-installazzjonijiet li jidħlu ġodda fis-suq.

50.

F’dan il-kuntest, wieħed jista’ jistaqsi dwar ir-rwol tal-fattur ta’ użu tal-kapaċità applikabbli, fir-rigward tas-subinstallazzjonijiet b’parametru referenzjarju ta’ kombustibbli li jaqgħu taħt l-iskema ta’ “installazzjonijiet li jidħlu ġodda fis-suq”. Dan huwa intiż, kif issostni Ingredion, sabiex jikkumpensa t-tul relattivament iqsar tal-perijodu ta’ referenza użat għall-kalkolu tal-kapaċità inizjali installata ta’ dawn is-subinstallazzjonijiet? ( 30 )

51.

Jien inqis li r-risposta għal din id-domanda għandha tkun fin-negattiv.

52.

Ċertament, it-tul ta’ żmien varjabbli tal-perijodi ta’ referenza meħuda inkunsiderazzjoni għall-installazzjonijiet eżistenti u għall-installazzjonijiet li jidħlu ġodda fis-suq iwassal għal probabbiltà ikbar għal dawn tal-aħħar milli għall-installazzjonijiet eżistenti li l-kapaċità installata inizjali tas-subinstallazzjoni tagħha ma tkunx rappreżentattiva tal-użu effettiv tal-kapaċità tagħhom. Skont l-approċċ irrakkomandat minn Ingredion, dan ir-riskju jista’ jiġi parzjalment ikkumpensat permezz tat-teħid inkunsiderazzjoni, fl-istadju tad-determinazzjoni tal-fattur ta’ użu tal-kapaċità applikabbli, ta’ data li tirriżulta minn perijodu itwal, li twassal sal-ġurnata tal-preżentazzjoni tal-applikazzjoni għal allokazzjoni, li tippermetti, jekk ikun il-każ, li jiżdied il-livell ta’ attività tas-subinstallazzjonijiet u, konsegwentement, in-numru ta’ kwoti allokati mingħajr ħlas.

53.

Madankollu, jidhirli li, anki jekk jiġi rifless, fil-valur tal-fattur ta’ użu tal-kapaċità applikabbli, l-użu effettiv ta’ kull subinstallazzjoni bejn tmiem il-perijodu ta’ referenza ta’ 90 jum u l-preżentazzjoni tal-applikazzjoni għal allokazzjoni ta’ kwoti, id-data miġbura fir-rigward tal-installazzjonijiet li jidħlu ġodda fis-suq ma tistax testendi fuq perijodu ugwali għal dak relatat mad-data storika ( 31 ) tal-installazzjonijiet eżistenti. Fil-fatt, peress li l-Artikolu 3(h) tad-Direttiva 2003/87 jipprevedi li l-kunċett ta’ “installazzjoni li daħlet ġdida fis-suq” jinkludi b’mod partikolari l-installazzjonijiet kollha li jkunu kisbu l-awtorizzazzjoni għall-emissjoni ta’ gassijiet serra għall-ewwel darba wara t-30 ta’ Ġunju 2011, huwa sempliċement impossibbli, fil-mument tal-preżentazzjoni tal-applikazzjoni għal allokazzjoni, li jiġi applikat fil-konfront tagħhom perijodu ta’ referenza twil daqs dak tal-installazzjonijiet eżistenti.

54.

Barra minn hekk u fuq kollox, l-Artikolu 17(4) tad-Deċiżjoni 2011/278, li jipprovdi li huwa previst il-perijodu qasir ta’ referenza ta’ 90 jum, ma jħalli ebda lok għall-ambigwità. Il-Kummissjoni ppreċiżat li hija kienet taf, fil-mument tal-adozzjoni ta’ din id-deċiżjoni, li l-operat normali previst tal-installazzjonijiet jew subinstallazzjonijiet li jkunu daħlu ġodda fis-suq ma kienx ser ikun għadu ntlaħaq fid-data li fiha jibda jiddekorri dan il-perijodu. Hija żiedet, ġustament, li l-possibbiltà li l-użu effettiv tal-kapaċità tal-installazzjoni jew subinstallazzjoni jeċċedi l-kapaċità installata inizjali użata sabiex jiġi ddeterminat in-numru provviżorju ta’ kwoti mingħajr ħlas allokati lill-“installazzjonijiet li jidħlu ġodda fis-suq”, kienet “konxjament aċċettata” ( 32 ) waqt l-adozzjoni tad-Deċiżjoni 2011/278, peress li din kienet tipprevedi, fl-Artikolu 3(n) tagħha, li dan il-perijodu ta’ referenza beda jiddekorri mill-mument meta l-installazzjoni laħqet l-40 % mill-kapaċità li għaliha kienet maħsuba.

55.

Fid-dawl ta’ dawn l-elementi, inqis, bħar-Repubblika Federali tal-Ġermanja, li żieda, fil-fattur ta’ użu tal-kapaċità applikabbli, għal valur ogħla jew ugwali għal 100 %, fil-każijiet fejn l-użu effettiv tal-kapaċità ta’ subinstallazzjoni bħal dik operata minn Ingredion tilħaq jew taqbeż il-kapaċità installata inizjali tagħha, tmur kontra l-għażla deliberata tal-leġiżlatur li jillimita l-perijodu ta’ referenza, użat sabiex tiġi ddeterminata din il-kapaċità installata inizjali, għal 90 jum wara l-bidu tal-operat normali tal-installazzjoni. Tali żieda twassal, fl-aħħar nett, sabiex jiġi kontradett il-kliem tal-Artikolu 17(4) ta’ din id-deċiżjoni, moqri flimkien mal-Artikolu 3(n) tagħha, peress li din twassal għall-istess riżultat bħal żieda fl-imsemmija kapaċità.

56.

Inżid li, kif sostnew ir-Repubblika Federali tal-Ġermanja u l-Kummissjoni, kull differenza fit-trattament bejn l-installazzjonijiet eżistenti u l-installazzjonijiet li jidħlu ġodda fis-suq jidhirli li, fi kwalunkwe każ, hija oġġettivament iġġustifikata ( 33 ), peress li n-numru annwali provviżorju ta’ kwoti ta’ emissjonijiet allokati mingħajr ħlas ma jiddependix mill-emissjonijiet reali tal-benefiċjarju, iżda mill-“parametri referenzjarji” teoretiċi kkalkolati mill-Kummissjoni mill-emissjonijiet ta’ 10 % tal-installazzjonijiet l-iktar effiċjenti, skont l-Artikolu 10a(2) tad-Direttiva 2003/87.

57.

Għalhekk, indidpendentement mill-iskema li taħtha taqa’ subinstallazzjoni (jiġifieri, l-iskema applikabbli għall-installazzjonijiet eżistenti jew l-iskema applikabbli għall-installazzjonijiet li jidħlu ġodda fis-suq), in-numru provviżorju ta’ kwoti mingħajr ħlas jiddependi fuq dawn il-parametri referenzjarji teoretiċi, li huma l-istess għall-installazzjonijiet eżistenti kif ukoll għall-installazzjonijiet li jidħlu ġodda fis-suq. Id-differenzi marbutin mal-elementi l-oħra involuti f’dan il-kalkolu joriġinaw min-nuqqas ta’ data storika affidabbli u permanenti għall-installazzjonijiet ġodda li bdew joperaw, u mill-ħtieġa li jibbażaw ruħhom, konsegwentement, fuq stima tal-livell ta’ attività tagħhom, sabiex jiġi ddeterminat in-numru provviżorju ta’ kwoti li huma jistgħu jibbenefikaw minnhom mingħajr ħlas.

58.

F’dan ir-rigward, għandi nenfasizza wkoll li l-Artikoli 20 u 21 tad-Deċiżjoni 2011/278 jipprevedu diġà l-applikazzjoni tal-istess formula ta’ kalkolu għall-installazzjonijiet eżistenti u għall-installazzjonijiet li bdew joperaw wara t-30 ta’ Ġunju 2011 ( 34 ), sakemm dawn tal-aħħar kienu s-suġġett ta’ bidla sinjifikattiva fil-kapaċità tagħhom, jiġifieri li jkunu għaddew minn “estensjoni sinifikanti tal-kapaċità jew tnaqqis sinifikanti tal-kapaċità” ( 35 ).

59.

Għalhekk, anki jekk jeżisti riskju ikbar, meħud mil-leġiżlatur, li l-livell ta’ attività ma jkunx rappreżentattiv tal-użu effettiv tal-kapaċità għall-installazzjonijiet li daħlu ġodda fis-suq meta mqabbla mal-installazzjonijiet eżistenti, kull differenza ta’ iktar minn 10 % tista’, eventwalment, tittieħed inkunsiderazzjoni, fid-dawl tal-Artikolu 20 tad-Deċiżjoni 2011/278 ( 36 ). F’dan il-każ, perijodu ta’ sitt xhur, u mhux biss ta’ 90 jum, ġie espressament stabbilit ukoll mil-leġiżlatur sabiex tiġi ddeterminata l-kapaċità miżjuda ( 37 ).

60.

Konsegwentement, inqis li minn eżami komparattiv tal-iskemi applikabbli għall-installazzjonijiet eżistenti u għall-installazzjonijiet li jidħlu ġodda fis-suq ma jistax jiġi dedott li l-fattur ta’ użu tal-kapaċità applikabbli għandu jkun, meta l-użu effettiv tal-kapaċità ta’ subinstallazzjoni b’parametru referenzjarju ta’ kombustibbli jilħaq jew jaqbeż il-kapaċità installata inizjali tagħha, ta’ valur ugwali jew ogħla minn 100 %. Għall-kuntrarju, ir-rieda espressa tal-leġiżlatur li jillimita l-perijodu ta’ referenza, għall-installazzjonijiet li jidħlu fis-suq, għal 90 jum wara l-bidu tal-operat normali tal-installazzjoni timmilita, fil-fehma tiegħi, u kif indikajt fil-punt 55 ta’ dawn il-konklużjonijiet, favur limitazzjoni tal-valur ta’ dan il-fattur taħt din il-perċentwali.

61.

Barra minn hekk, inqis li jkun kuntrarju għall-mekkaniżmu previst fl-Artikolu 20 tad-Deċiżjoni 2011/278, il-fatt li l-fattur ta’ użu tal-kapaċità applikabbli jkun jista’, fir-rigward tas-subinstallazzjonijiet b’parametru referenzjarju ta’ kombustibbli li jaqgħu taħt l-iskema applikabbli għall-“installazzjonijiet li daħlu ġodda fis-suq”, jilħaq jew jaqbeż il-valur ta’ 100 %, meta l-estensjoni tal-kapaċità tibqa’ inqas mil-limitu ta’ 10 % stabbilit f’din id-dispożizzjoni.

62.

Infakkar f’dan ir-rigward li, skont l-Artikolu 20 tad-Deċiżjoni 2011/278, in-numru ta’ kwoti ta’ emissjonijiet li għandhom jiġu allokati mingħajr ħlas sabiex tittieħed inkunsiderazzjoni l-estensjoni sinjifikattiva tal-kapaċità ta’ installazzjoni jiddependi, kif enfasizzat ir-Repubblika Federali tal-Ġermanja, miż-żewġ kundizzjonijiet previsti fl-Artikolu 3(i) ta’ din id-deċiżjoni.

63.

Għaldaqstant, minn naħa, irid ikun hemm bidla fiżika identifikabbli waħda jew iktar, li jkollha rabta mal-konfigurazzjoni teknika u mal-operat tas-subinstallazzjoni, iktar milli sempliċi sostituzzjoni ta’ linja ta’ produzzjoni eżistenti. Min-naħa l-oħra, is-subinstallazzjoni għandha tkun tista’ tiġi operata b’kapaċità ogħla b’minn tal-inqas 10 % tal-kapaċità installata inizjali tagħha qabel il-bidla jew ikollha livell ta’ attività nettament ogħla li jwassal għal allokazzjoni addizzjonali ta’ kwoti ta’ emissjonijiet ta’ iktar minn 50000 kwota fis-sena.

64.

Barra minn hekk, skont l-Artikolu 20(2) tad-Deċiżjoni 2011/278, “[l]-Istati Membri għandhom jirrikjedu li l-operatur jissottometti flimkien mal-applikazzjoni evidenza li turi li l-kriterji għal estensjoni sinifikanti tal-kapaċità ġew issodisfati”.

65.

F’dawn iċ-ċirkustanzi, inqis li, jekk, kif tallega Ingredion, il-fattur ta’ użu tal-kapaċità applikabbli seta’ jilħaq valur ogħla minn 100 %, sabiex jirrifletti, bħal fil-każ tas-subinstallazzjoni tiegħu, użu effettiv ikbar ta’ 9 % meta mqabbel mal-kapaċità installata inizjali ( 38 ), tali possibbiltà tkun inkonsistenti mar-rieda espressa tal-leġiżlatur li jippermetti aġġustament tan-numru ta’ kwoti allokati biss fil-każijiet fejn l-estensjoni tkun sinjifikattiva, jiġifieri ta’ mill-inqas 10 % meta mqabbla mal-kapaċità installata inizjali.

66.

Din l-intenzjoni tal-leġiżlatur jidhirli li hija inkluża b’mod ċar fil-premessa 35 tad-Deċiżjoni 2011/278, li tipprevedi li “[l]-investimenti f’estensjonijiet sinifikanti tal-kapaċità li jagħtu aċċess għar-riserva lill-installazzjonijiet li daħlu ġodda fis-suq […] ma għandhomx ikunu ambigwi u għandhom ikunu ta’ ċerta skala sabiex ikun evitat eżawriment bikri tar-riserva ta’ kwoti tal-emissjonijiet maħluqa għall-installazzjonijiet li daħlu ġodda fis-suq, biex ikun evitat xkiel għall-kompetizzjoni, biex ikun evitat kwalunkwe piż amministrattiv mhux xieraq u biex ikun żgurat trattament ugwali lill-installazzjonijiet fl-Istati Membri kollha” ( 39 ).

67.

Inżid li, waqt is-seduta quddiem il-Qorti tal-Ġustizzja, il-Kummissjoni kkonfermat li l-fattur ta’ użu tal-kapaċità applikabbli ma għandux iservi sabiex jittieħdu inkunsiderazzjoni l-eventwali estensjonijiet tal-kapaċità tal-installazzjoni, peress li dawn kienu diġà koperti mill-mekkaniżmu speċifiku, u mil-limiti, previsti fl-Artikolu 20 tad-Deċiżjoni 2011/278.

68.

Fid-dawl tal-kunsiderazzjonijiet preċedenti, jiena naqbel ma’ din il-pożizzjoni.

69.

Fid-dawl tal-iskemi applikabbli għall- “installazzjonijiet eżistenti” u għall-“installazzjonijiet li kienu s-suġġett ta’ estensjoni sinjifikattiva tal-kapaċità tagħhom”, inqis li l-fattur ta’ użu tal-kapaċità applikabbli għandu, skont l-istruttura ġenerali tad-Deċiżjoni 2011/278, ikun limitat għal valur inqas minn 100 % ( 40 ).

70.

Fit-taqsima li ġejja, ser nanalizza għaliex l-għanijiet tal-iskema ta’ allokazzjoni provviżorja ta’ kwoti ta’ emissjonijiet mingħajr ħlas, prevista minn din id-deċiżjoni u d-Direttiva 2003/87, jidher li jirreferu wkoll għal-limitazzjoni tal-fattur ta’ użu tal-kapaċità applikabbli għal valur inqas minn 100 %.

71.

Infakkar li, skont ġurisprudenza stabbilita tal-Qorti tal-Ġustizzja, għall-interpretazzjoni ta’ dispożizzjoni tad-dritt tal-Unjoni, hemm lok li jittieħdu inkunsiderazzjoni mhux biss il-kliem tagħha, iżda wkoll il-kuntest tagħha u l-għanijiet tal-leġiżlazzjoni li tifforma parti minnha ( 41 ).

72.

Fir-rigward tal-għan globali u tal-għanijiet tal-iskema ta’ allokazzjoni ta’ kwoti ta’ emissjonijiet mingħajr ħlas implimentata mill-Artikolu 10a tad-Direttiva 2003/87 u mid-Deċiżjoni 2011/278, nosserva li din l-iskema tidderoga mill-prinċipju tal-irkant tal-kwoti, li l-leġiżlatur qies li kienet ġeneralment “l-aktar [waħda] faċli u meqjus […] bħala s-sistema l-aktar effiċjenti ekonomikament” ( 42 ), fid-dawl tal-għan tat-“tnaqqis ta’ dawn l-emissjonijiet b’mod effettiv f’dak li jirrigwarda l-ispejjeż u l-effiċjenza ekonomika”, stabbilit fl-Artikolu 1 tad-Direttiva 2003/87 ( 43 ).

73.

F’dan il-kuntest, il-kwantità ta’ kwoti ta’ emissjonijiet allokati mingħajr ħlas hija, skont l-Artikolu 10a(11) tad-Deċiżjoni 2011/278, imnaqqsa gradwalment matul il-perijodu mis-sena 2013 sas-sena 2020, bil-għan li tintlaħaq it-tneħħija totali ta’ dawn il-kwoti mingħajr ħlas minn issa sas-sena 2027 ( 44 ). L-allokazzjoni ta’ kwoti ta’ emissjonijiet mingħajr ħlas, għall-finijiet ta’ perkors lejn it-tnaqqis tal-emissjonijiet ta’ gassijiet serra, hija għalhekk progressivament mistennija tkun ibbażata esklużivament fuq il-prinċipju tal-bejgħ bl-irkant.

74.

Għall-finijiet tal-implimentazzjoni ta’ dan l-għan, il-premessa 36 tad-Deċiżjoni 2011/278 tenfasizza n-numru limitat ta’ kwoti disponibbli fir-riżerva għall-installazzjonijiet li jidħlu ġodda ( 45 ). Barra minn hekk, it-tieni sentenza tal-ewwel subparagrafu tal-Artikolu 10a(7) tad-Direttiva 2003/87 tipprovdi li l-kwoti ta’ emissjonijiet irriżervati għall-installazzjonijiet li jidħlu fis-suq li ma jiġux allokati għandhom jiġu rkantati mill-Istati Membri.

75.

F’dan ir-rigward, il-Kummissjoni ppreċiżat ukoll li għalkemm, billi adottat id-Deċiżjoni 2011/278, hija ma kinitx għażlet li tikkumpensa l-użu ikbar tal-kapaċità ta’ subinstallazzjoni meta mqabbla mal-kapaċità inizjali installata tagħha billi tadatta l-valur tal-fattur ta’ użu tal-kapaċità applikabbli għal valur ogħla minn 100 %, dan kien preċiżament sabiex tinċentiva, f’tali sitwazzjoni, l-użu ta’ tekniki effikaċi sabiex jitnaqqsu l-emissjonijiet ta’ gassijiet serra jew, jekk ikun il-każ, l-akkwist ta’ numru ekwivalenti ta’ kwoti ta’ emissjonijiet, skont is-sistema ta’ skambju.

76.

Fid-dawl ta’ dawn il-fatturi, fil-fehma tiegħi ftit li xejn hemm dubju li l-għan globali u l-għanijiet tal-iskema ta’ allokazzjoni ta’ kwoti ta’ emissjoni mingħajr ħlas jeżiġu, l-istess bħall-indikazzjonijiet ipprovduti mill-ewwel subparagrafu tal-Artikolu 18(2) u l-istruttura ġenerali tad-Deċiżjoni 2011/278, li l-fattur ta’ użu tal-kapaċità applikabbli jkun strettament limitat għal valur inqas minn 100 % ( 46 ).

77.

Għar-raġunijiet li esponejt preċedentement, inqis li l-kwistjoni dwar jekk, għas-subinstallazzjonijiet b’parametru referenzjarju ta’ kombustibbli li jaqgħu taħt l-iskema applikabbli għall-“installazzjonijiet li daħlu ġodda fis-suq”, il-fattur ta’ użu tal-kapaċità applikabbli huwiex limitat għal valur inqas minn 100 %, għandha tiġi riżolta permezz ta’ interpretazzjoni kuntestwali u teleoloġika, ibbażata fuq l-istruttura ġenerali tad-Deċiżjoni 2011/278 u l-għan globali u fuq l-għanijiet tal-iskema ta’ allokazzjoni provviżorja ta’ kwoti mingħajr ħlas. Għalhekk, kif isostnu r-Repubblika Federali tal-Ġermanja u l-Gvern Ġermaniż, din il-kwistjoni ma taqax taħt il-marġni ta’ diskrezzjoni li għandhom l-Istati Membri, skont it-tieni subparagrafu tal-Artikolu 18(2) tad-Deċiżjoni 2011/278.

78.

F’dan ir-rigward, infakkar, għall-finijiet ta’ kompletezza, li, fir-rigward tal-allokazzjoni ta’ kwoti ta’ emissjonijiet mingħajr ħlas, il-leġiżlatur insista, fl-Artikolu 10a(1) tad-Direttiva 2003/87, fuq il-ħtieġa ta’ armonizzazzjoni kompleta, billi ppreveda li “[]l-Kummissjoni għandha tadotta, miżuri ta’ implimentazzjoni sabiex ikunu applikabbli mal-Komunità kollha li jkunu kompletament armonizzati għall-allokazzjoni tal-kwoti”.

79.

Kif indikajt preċedentement fil-konklużjonijiet tiegħi fil-kawża INEOS Köln ( 47 ), huwa fuq din il-bażi li l-Kummissjoni adottat id-Deċiżjoni 2011/278 u ftit li xejn hemm dubju, fil-fehma tiegħi, li din id-deċiżjoni, moqrija flimkien mal-Artikolu 10a tad-Direttiva 2003/87, twettaq armonizzazzjoni eżawrjenti tal-aspetti materjali tal-allokazzjoni ta’ kwoti mingħajr ħlas ( 48 ).

80.

B’mod partikolari, skont it-tieni subparagrafu tal-Artikolu 19(4) ta’ din id-deċiżjoni, huwa previst li l-Kummissjoni tista’ tirrifjuta l-kwantità annwali totali provviżorja ta’ kwoti ta’ emissjonijiet allokati mingħajr ħlas lil installazzjoni li tidħol ġdida fis-suq.

81.

Għaldaqstant, jidhirli li, anki jekk il-Qorti tal-Ġustizzja tiddeċiedi li tqis, bħalma għamlu r-Repubblika Federali tal-Ġermanja u l-Gvern Ġermaniż u kuntrarjament għall-approċċ li qiegħed nirrakkomanda, li l-Istati Membri jibqgħu liberi, fil-limiti stabbiliti fit-tieni subparagrafu tal-Artikolu 18(2) tal-imsemmija deċiżjoni, li jistabbilixxu l-fattur ta’ użu tal-kapaċità applikabbli għal valur ogħla minn 100 %, dawn tal-aħħar ma jistgħux jiġu kkritikati li jaqblu mal-pożizzjoni tal-Kummissjoni, inkluż meta din tirriżulta mill-applikazzjoni tal-istess deċiżjoni fil-kuntest ta’ installazzjonijiet speċifiċi (kif inhu l-każ fiċ-ċirkustanzi tal-kawża prinċipali ( 49 )), sakemm huma jkunu jistgħu jantiċipaw li din il-pożizzjoni ser tapplika wkoll fil-konfront ta’ installazzjonijiet oħra.

82.

Fid-dawl tal-kunsiderazzjonijiet preċedenti kollha, nipproponi lill-Qorti tal-Ġustizzja tagħti risposta għad-domanda preliminari magħmula mill-Verwaltungsgericht Berlin (il-Qorti Amministrattiva ta’ Berlin, il-Ġermanja) kif ġej:

L-Artikolu 18(1)(ċ) u t-tieni subparagrafu tal-Artikolu 18(2) tad-Deċiżjoni tal-Kummissjoni 2011/278/UE tas-27 ta’ April 2011 li tiddetermina regoli tranżitorji madwar l-Unjoni kollha għal allokazzjoni armonizzata mingħajr ħlas tal-kwoti tal-emissjonijiet skont l-Artikolu 10a tad-Direttiva 2003/87/KE tal-Parlament Ewropew u tal-Kunsill, moqrija flimkien mal-Artikolu 3(h) u mal-Artikolu 10a tad-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva 96/61/KE, kif emendata permezz tad-Direttiva 2009/29/KE tal-Parlament Ewropew u tal-Kunsill tat-23 ta’ April 2009, għandhom jiġu interpretati fis-sens li l-fattur ta’ użu tal-kapaċità applikabbli għal-livell ta’ attività relatat mal-kombustibbli għandu jkun limitat għal valur ta’ inqas minn 100 % għall-installazzjonijiet li jidħlu ġodda fis-suq.