|
30.1.2023 |
GA |
Iris Oifigiúil an Aontais Eorpaigh |
C 34/26 |
Foilsiú teachtaireachta maidir le leasú caighdeánach a fhormheas ar an tsonraíocht táirge le haghaidh ainm in earnáil an fhíona, dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún
(2023/C 34/10)
Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).
FORMHEAS LEASAITHE CHAIGHDEÁNAIGH A CHUR IN IÚL
“Rosé d’Anjou”
PDO-FR-A1007-AM02
Dáta teachtaireachta: 11 Samhain 2022
TUAIRISC AR AN LEASÚ FORMHEASTA AGUS NA CÚISEANNA LEIS
1. Cód Geografach Oifigiúil
Rinneadh na bardais a chuimsítear sa limistéar geografach agus sa limistéar atá díreach in aice láimhe a thabhairt cothrom le dáta i gcomhréir leis an Code officiel géographique [Cód Geografach Oifigiúil].
Ní dhéanann sé sin difear do theorainn an limistéir gheografaigh chríochaithe.
Leasaíodh pointí 6 agus 9 den doiciméad aonair.
2. Limistéar dáileachta críochaithe
Cuireadh leis an leasú seo na dátaí ar ar fhormheas an t-údarás náisiúnta ábhartha leasú ar an limistéar dáileachta críochaithe laistigh den limistéar geografach táirgthe. Déantar dáileachtaí a chríochú trí na dáileachtaí laistigh den limistéar geografach táirgthe a shainaithint, ar dáileachtaí iad atá oiriúnach chun an táirge a tháirgeadh ar táirge é a chumhdaítear leis an sonrúchán tionscnaimh faoi chosaint atá i gceist.
Ní dhéanann an leasú seo difear don doiciméad aonair.
3. Spásáil idir fíniúnacha
Athraíodh an spásáil íosta idir fíniúnacha sa ró céanna ó 1 m go dtí 0,90 m.
Is é cuspóir an leasaithe sin méadú ar dhlús plandála a cheadú gan an spásáil idir rónna fíniúnacha a athrú.
Cuireadh foráil speisialta leis le haghaidh fíniúnacha suite ar fhánaí níos géire ná 10 %, agus ceadaítear spásáil íosta idir plandaí 0,80 m.
Rinneadh an méid a cuireadh leis chun an cás ar leith ina chuirtear fíniúnacha ar fhánaí géara a chur san áireamh, cás ina éilítear socruithe speisialta le linn chéim an phlandaithe: rónna a chuirtear trasna na bhfánaí seachas ag rith suas iad.
Leasaíodh pointe 5 den doiciméad aonair.
4. Prúnáil
Ailíníodh na rialacha maidir le prúnáil leis na rialacha a bhaineann leis na sonrúcháin i limistéir Anjou Saumur in Val de Loire.
Tá an t-ailíniú beartaithe chun tuiscint níos fearr a thabhairt d’oibreoirí, agus chun cigireachtaí a shimpliú. Tugann an leasú féidearthacht do shaothróirí fíniúna a oiriúnú nuair a tharlaíonn sioc, atá ag tarlú níos déanaí agus níos déanaí sa bhliain.
Leasaíodh pointe 5 den doiciméad aonair.
5. Nasc
Leasaíodh an nasc chun tagairt a dhéanamh do 2021 in ionad 2018 agus chun líon na mbardas a athrú mar cumascadh cuid acu.
Leasaíodh pointe 8 den doiciméad aonair.
6. Bearta idirthréimhseacha
Scriosadh na bearta idirthréimhseacha atá imithe in éag.
Cuireadh beart idirthréimhseach leis mar gheall ar an gcríochadóireacht nua dáileachtaí i mbardais áirithe.
Níor leasaíodh an doiciméad aonair.
7. Lipéadú
Ailíníodh na rialacha maidir le lipéadú leis na rialacha a bhaineann leis na sonrúcháin i limistéir Anjou Saumur in Val de Loire. Is leasú eagarthóireachta amháin é sin.
Leasaíodh pointe 9 den doiciméad aonair.
8. Tagairt don chomhlacht cigireachta
Cuireadh foclaíocht úr ar an tagairt don chomhlacht cigireachta chun é a ailíniú leis an bhfoclaíocht a úsáidtear i sonraíochtaí táirge eile. Is leasú eagarthóireachta amháin é sin.
Ní cheanglaítear leis an leasú seo aon athrú a dhéanamh ar an doiciméad aonair.
9. Leasuithe eagarthóireachta
Rinneadh líon áirithe leasuithe eagarthóireachta ar an tsonraíocht.
Ní cheanglaítear leis na leasuithe sin aon leasú a dhéanamh ar an doiciméad aonair.
DOICIMÉAD AONAIR
1. Ainm(neacha)
Rosé d’Anjou
2. Cineál táisc gheografaigh
STFC – Sonrúchán Tionscnaimh faoi Chosaint
3. Catagóirí táirgí fíniúna
|
1. |
Fíon |
4. Tuairisc ar an bhfíon nó ar na fíonnta
TUAIRISC ACHOMAIR I SCRÍBHINN
Fíonta rosé socra atá iontu agus na saintréithe anailíseacha seo a leanas ag baint leo.
Tá neart alcóil nádúrtha íosta de 9,5 % de réir toirte ag na fíonta.
Tar éis iad a choipeadh, ní mór don mhéid siúcra coiptheach, glúcós agus fruchtós, sna fíonta a bheith 7 ngram in aghaidh an lítir ar a laghad.
Tar éis an tsaibhrithe, níor cheart neart alcóil iomlán na bhfíonta de réir toirte a bheith níos mó ná 12 %.
Maidir leis na méideanna d’aigéadacht so-ghalaithe, d’aigéadacht iomlán agus de mhéid iomlán dé-ocsaíde sulfair, is iad siúd na méideanna a leagtar síos i rialacháin an Aontais. Maidir le baisceanna d’fhíonta nach bhfuil i mbuidéal atá incháilithe i gcomhair an téarma “primeur” nó “nouveau” a bheith orthu, áfach, is gá go mbíonn leibhéil aigéadachta luainí nach mór ná 10,2 milleachoibhéisí in aghaidh an lítir.
Bíonn leibhéil éagsúla siúcraí coiptheacha agus milseachta ag na fíonta. Bíonn siad fíor-aramatach, agus saintréithe a gcineálacha fíonchaoire á léiriú ag gach ceann acu. Mar sin féin, bíonn torthaí iontu i bhfoirm éigin i gcónaí, amhail péitseog, sú talún nó citreas. Sa bhéal, tairgíonn na fíonta cothrom sofaisticiúil idir úire agus maothlachas. Is fada agus dian an dea-bholadh a bhíonn orthu.
|
Saintréithe anailíseacha ginearálta |
|
|
Uasmhéid nirt alcóil iomláin (mar % den toirt) |
|
|
Íosmhéid nirt alcóil iarbhír (mar % den toirt) |
9 |
|
Íosmhéid aigéadachta iomláine |
|
|
Uasmhéid aigéadachta luainí (mar mhilleachoibhéisí in aghaidh an lítir) |
|
|
Uasmhéid dé-ocsaíde sulfair iomláine (mar mhilleagraim in aghaidh an lítir) |
|
5. Cleachtais fíonóireachta
5.1. Cleachtais fhíon eolaíocha shonracha
1. Dlús plandaithe – Spásáil
An modh saothraithe
Is é 4 000 planda in aghaidh an heicteáir dlús plandála íosta na bhfíniúnacha. Ní mór don spásáil idir na rónna fíniúna gan a bheith níos mó ná 2,5 méadar, agus ní mór don spásáil idir plandaí sa ró chéanna a bheith 0,90 méadar ar a laghad. Bíonn buaint fíonchaoire incháilithe do shonrúchán tionscnaimh cláraithe má thagann siad ó dháileachtaí fíonghoirt ar a bhíonn spásáil idir 0,8 m agus 0,9 m idir plandaí sa ró céanna, i gcás ina mbíonn siad ar fhánaí níos géire ná 10 %.
I gcás ina bhfuil dlús plandála 3 300 planda in aghaidh an heicteáir ar a laghad ach níos lú na 4 000 planda in aghaidh an heicteáir sna dáileachtaí fíonghoirt, tá an bhuaint incháilithe do shonrúchán tionscnaimh cáilithe ar choinníoll go gcomhlíontar na rialacha maidir le treilísiú agus airde duilliúir a leagtar síos sa tsonraíocht seo. Ní mór don spásáil idir na rónna fíniúna ar na dáileachtaí sin gan a bheith níos mó ná 3 mhéadar, agus ní mór don spásáil idir plandaí sa ró céanna a bheith 1 mhéadar amháin ar a laghad.
2. Na rialacha maidir le prúnáil fíniúna agus le treilísiú
An modh saothraithe
Prúnáiltear na fíniúnacha agus 12 bhachlóg ar a mhéad in aghaidh an phlanda i gceist, gan beann ar cibé acu modh prúnála cána, prúnála spoir nó prúnála measctha a úsáidtear.
Féadtar na fíniúnacha a phrúnáil le dhá bhachlóg sa bhreis in aghaidh an phlanda, ar choinníoll nach bhfuil líon na ngéag ar a bhfuil torthaí in aghaidh an phlanda don bhliain níos mó ná 12 ag an gcéim feineolaíochta a chomhfhreagraíonn do 11 nó 12 dhuilleog (bachlóga blátha aonair).
Tá airde an duilliúir ar an treilís 0.6 méid an spásála idir na rónna ar a laghad. Tomhaistear an airde ó phointe is ísle an duilliúir, a shocraítear ag 0.4 méadar os cionn na talún ar a laghad, go dtí pointe is airde an cheannbhrait, a shocraítear ag 0.2 méadar os cionn airde na sreinge treilíse is airde ar a laghad.
I gcás dáileachtaí fíonghoirt a bhfuil an dlús plandála 3 300 ar a laghad ach níos lú ná 4 000 planda in aghaidh an heicteáir, beidh feidhm ag na rialacha treilíse breise seo a leanas: is ionann íosairde na gcuaillí treilíse os cionn na talún agus 1.9 méadar; tá ceithre leibhéal sreanga treilíse ann; is ionann íosairde na sreinge is airde agus 1.85 méadar os cionn na talún.
3. Uisciú
An modh saothraithe
Toirmisctear uisciú.
4. Cleachtas sonrach fíoneolaíochta
Toirmisctear an gualach fíonóireachta a úsáid cibé acu leis féin nó measctha in ullmhúcháin.
Toirmisctear sliseanna adhmaid a úsáid.
Tar éis an tsaibhrithe, níor cheart neart alcóil iomlán na bhfíonta de réir toirte a bheith níos mó ná 12 %.
Anuas ar na forálacha thuasluaite, is gá go gcomhlíonann na cleachtais fíoneolaíochta a bhaineann leis na fíonta sin na ceanglais a leagtar síos ar leibhéal an Aontais Eorpaigh agus sa Chód Tuaithe agus Iascaireachta Muirí.
5.2. Uastáirgeacht
75 heictilítear in aghaidh an heicteáir
6. Limistéar geografach críochaithe
Tarlaíonn gach céim den táirgeadh maidir le fíonta atá incháilithe do shonrúchán tionscnaimh cláraithe “Rosé d’Anjou” sa limistéar geografach ina n-áirítear na bardais seo a leanas, ar bhonn Chód Geografach Oifigiúil 2021:
|
— |
roinn Deux-Sèvres: Brion-près-Thouet, Loretz-d’Argenton, Louzy, Plaine-et-Vallées (críoch bhardas tarmligthe Oiron amháin), Saint-Cyr-la-Lande, Sainte-Verge, Saint-Martin-de-Mâcon, Saint-Martin-de-Sanzay, Thouars (críoch bhardais tarmligthe Mauzé-Thouarsais, Sainte-Radegonde agus iarbhardas Thouars amháin), Tourtenay, Val en Vignes (críoch bhardais tarmligthe Bouillé-Saint-Paul, Cersay agus Saint-Pierre-à-Champ amháin); |
|
— |
roinn Maine-et-Loire: Allonnes, Angers, Antoigné, Artannes-sur-Thouet, Aubigné-sur-Layon, Beaulieu-sur-Layon, Bellevigne-en-Layon, Bellevigne-les-Châteaux, Blaison-Saint-Sulpice, Bouchemaine, Brain-sur-Allonnes, Brissac Loire Aubance (críoch bhardais tarmligthe Alleuds, Brissac-Quincé, Charcé-Saint-Ellier-sur-Aubance, Chemellier, Coutures, Luigné, Saint-Rémy-la-Varenne, Saint-Saturnin-sur-Loire agus Vauchrétien amháin), Brossay, Cernusson, Chalonnes-sur-Loire, Champtocé-sur-Loire, Chaudefonds-sur-Layon, Chemillé-en-Anjou (críoch bhardais tarmligthe Chanzeaux, La Jumellière agus Valanjou amháin), Cizay-la-Madeleine, Cléré-sur-Layon, Le Coudray-Macouard, Courchamps, Denée, Dénezé-sous-Doué, Distré, Doué-en-Anjou, Épieds, Fontevraud-l’Abbaye, Les Garennes sur Loire, Gennes-Val-de-Loire (críoch bhardais tarmligthe Chênehutte-Trêves-Cunault, Gennes, Grézillé, Saint-Georges-des-Sept-Voies agus Le Thoureil amháin), Huillé-Lézigné (críoch bhardas tarmligthe Huillé amháin), Ingrandes-Le Fresne sur Loire (críoch iarbhardas tarmligthe Ingrandes amháin), Jarzé Villages (críoch bhardas tarmligthe Lué-en-Baugeois amháin), Louresse-Rochemenier, Lys-Haut-Layon, Mauges-sur-Loire (críoch bhardais tarmligthe La Chapelle-Saint-Florent, Le Mesnil-en-Vallée, Montjean-sur-Loire, La Pommeraye, Saint-Florent-le-Vieil, Saint-Laurent-de-la-Plaine agus Saint-Laurent-du-Mottay amháin), Mazé-Milon (críoch bhardas tarmligthe Fontaine-Milon amháin), Montilliers, Montreuil-Bellay, Montsoreau, Mozé-sur-Louet, Mûrs-Erigné, Orée d’Anjou (críoch bhardais tarmligthe Bouzillé, Champtoceaux, Drain, Landemont, Liré agus La Varenne amháin), Parnay, Passavant-sur-Layon, La Possonnière, Le Puy-Notre-Dame, Rives-de-Loir-en-Anjou (críoch bhardas tarmligthe Villevêque amháin), Rochefort-sur-Loire, Rou-Marson, Sainte-Gemmes-sur-Loire, Saint-Georges-sur-Loire, Saint-Germain-des-Prés, Saint-Just-sur-Dive, Saint-Macaire-du-Bois, Saint-Melaine-sur-Aubance, Saumur, Savennières, Soulaines-sur-Aubance, Souzay-Champigny, Terranjou, Tuffalun, Turquant, Les Ulmes, Val-du-Layon, Varennes-sur-Loire, Varrains, Vaudelnay; |
|
— |
roinn Vienne: Berrie, Curçay-sur-Dive, Glénouze, Pouançay, Ranton, Saint-Léger-de-Montbrillais, Saix, Ternay, Les Trois-Moutiers. |
Is féidir léarscáileanna den limistéar geografach a aimsiú ar shuíomh gréasáin na hInstitiúide Náisiúnta Tionscnaimh agus Cáilíochta (INAO).
7. Cineál/cineálacha fíniúna
Cabernet Franc N
Cabernet-Sauvignon N
Côt N - Malbec
Gamay N
Grolleau N
Grolleau Gris G
Pineau d’Aunis N
8. Tuairisc ar an nasc (na naisc)
1. Faisnéis maidir leis an limistéar geografach
a) Tuairisc ar na tosca nádúrtha is ábhartha don nasc
Luíonn an limistéar geografach le dhá phríomhfhoirmíocht gheolaíoch ina lonnaíonn fíonghoirt den chuid is mó de na dobharcheantair agus roinnt ardchlár: san iarthar, foirmíonn carraig bhonnlaigh Réamhchaimbriach agus Phailéasóch cuid den Mhasaíf Armarcach; san oirthear, chumhdaigh fostratam Méiseasóch agus Caenasóch an imchuach Pháras na carraig bhonnlaigh ársa. Déanann an saintréith gheolaíoch sin idirdhealú idir cuid thiar an limistéir gheografaigh agus an chuid thoir. Tá an chuid thiar suntasach mar gheall ar a fhosuithe scealla, scláta den chuid is mó, agus ar a dtugtar “Anjou noir” nó “Anjou dubh” go háitiúil. Tá an chuid thoir suntasach mar gheall ar a mharla cailceach (Saumur), ar a dtugtar “Anjou blanc” nó “Anjou bán” go háitiúil.
Agus naisc stairiúla le cúige ársa Anjou aige, ó 2021 cumhdaíonn an limistéar geografach leath theas roinn Maine-et-Loire (68 mbardas) agus imill thuaidh ranna Deux-Sèvres (11 bhardas) agus Vienne (9 mbardas).
Na dáileachtaí atá críochaithe go sonrach le haghaidh buaint fíonchaor, tá ithreacha acu a forbraíodh ó fhoirmíochtaí geolaíocha difriúla. Cé gur mór eatarthu go suntasach, bíonn na hithreacha bocht go ginearálta le cúltaiscí uisce teoranta. Bíonn airíonna teirmeacha maithe acu.
Tairbhíonn an limistéar geografach de chlíoma muirí measartha agus ní bhíonn ach éagsúlachtaí teochta beaga ann. Is é is cúis leis, i bpáirt, an ghaireacht choibhneasta don Aigéan Atlantach, agus i bpáirt ról an Loire agus a craobh-aibhneacha i rialú teochta. Is fachtóir freisin é an fíoras go gcuirtear fíniúnacha ar na cnoic. Tugann sé sin míniú ar an nath “douceur angevine” (aimsir chaoin Anjou), a thugann an tuairisc is fearr ar an ngeimhreadh, earrach agus fómhar fada, agus na tréimhsí teo sa samhradh a tharlaíonn go minic. Cosnaíonn na fánaí a bhfuil a n-aghaidheanna siar ó thuaidh agus soir ó dheas na fíniúnacha ó na gaotha aniar, a thugann taise throm leo go minic. Ar an gcaoi sin, uiscítear an limistéar geografach go spárálach, ag baint tairbhe as éifeacht foehn, agus na fánaí is airde Choletais agus Mauges ag soláthar foscadh ó cheonna na mara. Bíonn an bháisteach bhliantúil thart ar 585 mhilliméadar, i gcomparáid le 800 milliméadar in Choletais.
b) Tuairisc ar na tosca daonna is ábhartha maidir leis an nasc geografach
Is eol gur shaothraigh fíniúnacha ar bhonn leanúnach in Anjou ón gcéad chéad AD. Is ceantar den scoth le haghaidh saothrú fíniúnacha é, mar is léir ó na línte seo as dán le Apollonius (séú céad): “Tá baile ann nach bhfuil ró-fhada ón mBriotáin lonnaithe ar charraig ar a bhfuil plandálacha fairsinge atá saibhir i dtorthaí Ceres agus Bacchus agus ainm, Andecavi (Angers), a thagann ó logainm Gréigise”. D’fhorbair saothrú fíniúnacha sa limistéar Anjou le linn na Meánaoiseanna, faoi choimirce na mainistreacha lonnaithe ar bhruacha an Loire agus timpeall Angers. Tháinig cáil ar leith ar na fíonghoirt, áfach, ó na seachtú agus ochtú céadta ar aghaidh. A bhuí le tionchar Henri II agus Eleanor de Aquitaine, rinne na fíonta a mbealach chuig na boird ab uaisle.
D’fhorbair táirgeacht go suntasach ón 16ú céad amach le teacht ceannaithe na hÍsiltíre ag lorg fíona dá dtír agus dá gcoilíneachtaí. Cheannaigh na hÍsiltírigh soláthar fíona agus bhí an trádáil chomh bríomhar sa 18ú céad go ndearnadh abhainn Layon, a théann trasna an limistéir gheografaigh, inseolta chun iompar a éascú. D’fhág an ardmheas a bhí ar fhíonta Anjou go raibh an-tóir orthu agus chruthaigh cánacha éagsúla (ar fhíon i mbulc, ar chliathbhoscaí, cáin mhórdhíola, cáin mhiondíola, dleacht mháil, etc.). Bhí iarmhairtí diúltacha ag na cánacha sin ar thrádáil. Scrios an slad a rinne na cogaí in Vendée na fíonghoirt, a bheag nó a mhór. D’fhill rathúnas sa 19ú céad. In 1881, chumhdaigh na fíonghoirt achar dromchla de 45 000 heicteár, lena n-áirítear 10 000 heicteár a d’fhan in 1893 tar éis eipidéim phylloxera.
Tá an cháil ar an réigiún ar a dtugtar Anjou de bharr, go bunúsach, táirgeadh fíonta geala a dhéantar ó chineál Chenin B. Cuireadh cineál Cabernet Franc N agus Cabernet Sauvignon N rud beag ní ba dhéanaí áfach agus leath siad go suntasach tar éis ghéarchéim phylloxera. Ag tús an 20ú céad, díríodh iarrachtaí saothraithe fíona ar “rouget” a dhéanamh, an t-ainm áitiúil le haghaidh fíon éadrom a cuireadh ar an mbord i gcaiféanna. Ba é an chéad chéim maidir le hathruithe ar fhíonghoirt Anjou. In éineacht leis na cineálacha Grolleau N agus Grolleau Gris G, lena dtáirgtear fíonta éadroma “clairet”, arna gcomhlánú le cineálacha Gamay N agus Pineau d’Aunis N, chuir siad le forbairt táirgthe shuntasaigh fíonta rosé saintréitheacha, aitheanta faoi na sonrúcháin tionscnaimh faoi chosa “Cabernet d’Anjou” agus “Rosé d’Anjou”. Bhí an dara céim san athrú sin mar gheall ar an saineolas a fuair na saothróirí maidir leis an meascán fíniúnacha a bhainistiú. D’fhorbair táirgeadh fíonta dearga ó na 1960idí ar aghaidh, bunaithe ar fhaireachán agus ar anailís ar na meascáin chineálacha agus na suíomhanna plandála ab fhearr, in éineacht le measúnú ar an bpoitéinseal buainte agus an saineolas a fuarthas maidir le teicnící saothraithe fíona.
2. Faisnéis maidir le cáilíocht agus saintréithe an táirge
Bíonn leibhéil éagsúla siúcraí coiptheacha agus milseachta ag na fíonta rosé. Bíonn siad fíor-aramatach, agus saintréithe a gcineálacha fíonchaoire á léiriú ag gach ceann acu. Mar sin féin, bíonn torthaí iontu i bhfoirm éigin i gcónaí, amhail péitseog, sú talún nó citreas. Sa bhéal, tairgíonn na fíonta cothrom sofaisticiúil idir úire agus maothlachas. Is fada agus dian an dea-bholadh a bhíonn orthu.
3. Idirghníomhaíochtaí cúisíocha
Tugann saintréithe measctha an limistéir saothraithe fíniúnacha, lena n-áirítear a shuíomh thuaidh, a thírdhreach saintréitheach, a aeráid mheasartha shuntasach agus a gheolaíocht shonrach agus a phróifíl ithreach blas úr ar leith do na fíonta.
Soláthraíonn éagsúlacht na suíomhanna fíonghoirt agus a bpróifíl gheolaíoch agus ithreach éagsúil dálaí optamacha chun go n-éiríonn gach aon chineál fíniúna formheasta. Déanann na saothróirí fíona scrúdú agus anailís ar iompraíocht a gcuid fíniúnacha chun an suíomh ceart le haghaidh na bhfíonghort a shocrú.
Bíonn na cineálacha Grolleau N, Grolleau Gris G agus Pineau d’Aunis N lonnaithe sna cnoic agus ar na tailte cothroma gairbhéil ghainmhigh, agus úsáidtear iad chun fíonta torthaíochta rosé a tháirgeadh. Os a choinne sin, is fearr le cineálacha Cabernet Franc N agus Cabernet Sauvignon N ithreacha tanaí nó donna lena bhfuil soláthar uisce rialáilte. Táirgíonn siad sin fíonta rosé míne ar a mbíonn dea-bholadh marthanach.
9. Coinníollacha breise fíor-riachtanacha (pacáistiú, lipéadú, ceanglais eile)
API
Creat dlíthiúil
Reachtaíocht an Aontais
Cineál an choinníll bhreise
Maolú maidir le táirgeadh sa limistéar geografach críochaithe
Tuairisc ar an gcoinníoll
Sa limistéar atá díreach in aice láimhe, arna shainiú ag maolú maidir le táirgeadh agus le próiseáil fíonta atá incháilithe don shonrúchán tionscnaimh cláraithe “Rosé d’Anjou”, cuimsítear críoch na mbardas seo a leanas, ar bhonn Chód Geografach Oifigiúil 2021:
|
— |
roinn Indre-et-Loire: Saint-Nicolas-de-Bourgueil; |
|
— |
roinn Loire-Atlantique: Ancenis-Saint-Géréon (críoch bhardas tarmligthe Ancenis amháin), Le Loroux-Bottereau, Le Pallet, La Remaudière, Vair-sur-Loire (críoch bhardas tarmligthe Anetz amháin) agus Vallet; |
|
— |
roinn Maine-et-Loire: Orée d’Anjou (críoch bhardas tarmligthe Saint-Laurent-des-Autels amháin) agus Saint-Martin-du-Fouilloux. |
Lipéadú
Creat dlíthiúil
Reachtaíocht náisiúnta
An cineál coinníll bhreise:
Forálacha breise a bhaineann le lipéadú
Tuairisc ar an gcoinníoll:
Féadfar an téarma “primeur” (luath) nó “nouveau” (nua) a chur tar éis an tsonrúcháin i gcomhréir leis na rialacha a leagtar síos sa tsonraíocht.
Faoi rialacha an Aontais, féadfaidh na Ballstáit méid litreacha na dtéarmaí roghnacha a rialú. Ar na lipéid, ní fhéadfaidh siad a bheith níos mó, ar airde, ar leithead ná ar tiús, ná dhá oiread mhéid na litreacha lena gcruthaítear ainm an tsonrúcháin tionscnaimh chláraithe.
Is féidir an sonrúchán geografach “Val de Loire” a chur i ndiaidh ainm an tsonrúcháin tionscnaimh chláraithe, i gcomhréir leis na rialacha a leagtar síos sa tsonraíocht. Méid na litreacha d’ainm geografach “Val de Loire”, ní fhéadfaidh siad a bheith níos mó, ar airde ná ar leithead, ná dhá thrian de mhéid na litreacha lena gcruthaítear ainm an tsonrúcháin tionscnaimh chláraithe.
Ní cheadaítear an téarma “cabernet” ná trácht ar an gcineál Cabernet Sauvignon N ná Cabernet Franc N a bheith i gcur i láthair ná i dtuairisc na bhfíonta.
Ní mór do na fíonta atá incháilithe maidir leis an téarma “primeur” nó “nouveau” a bheith orthu bliain an fhíona a lua.
Féadfar aonad geografach níos lú a shonrú ar lipéid na bhfíonta, ar choinníoll gurb amhlaidh an méid seo a leanas: is suíomh cláraithe é; bíonn sé le feiceáil ar an dearbhú buainte. Na litreacha a úsáidfear chun ainm na háite a phriontáil, ní bheidh siad níos mó ná leath de mhéid na litreacha ina scríobhtar ainm an tsonrúcháin tionscnaimh chláraithe, ó thaobh airde ná leithid de.
Nasc chuig an tsonraíocht táirge
https://info.agriculture.gouv.fr/gedei/site/bo-agri/document_administratif-cea1d3f7-577f-445e-9e58-b708a8d13eb8