(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 27 Márta 2020, chuir an chuideachta Arla Foods Ingredients Group P/S (“an t-iarratasóir”) iarratas ar údarú faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 chun oistéapontain bainne ó bhó-ainmhithe (“bmOPN”) a chur ar mhargadh an Aontais mar bhia núíosach. Chuir an t-iarratasóir iarraidh isteach i leith oistéapontain bainne ó bhó-ainmhithe le húsáid i mbainne foirmle do naíonáin agus i mbainne foirmle leantach do naíonáin mar a shainmhínítear i Rialachán (AE) Uimh. 609/2013 ó Pharlaimint na hEorpa agus ón gComhairle (3) agus i ndeochanna bainnebhunaithe a cheaptar do leanaí óga, ar leibhéil nach sáraíonn 151 mg/L sa táirge deiridh.

(4)

An 27 Márta 2020, rinne an t-iarratasóir iarraidh ar an gCoimisiún freisin chun sonraí dílseánaigh a chosaint le haghaidh deimhnithe anailísí agus baisc-thástála, tuarascálacha cobhsaíochta agus tuarascálacha maidir le staidéir gan foilsiú (4).

(5)

An 9 Deireadh Fómhair 2020, d’iarr an Coimisiún ar an Údarás Eorpach um Shábháilteacht Bia (“an tÚdarás”) measúnú a dhéanamh ar oistéapontain bainne ó bhó-ainmhithe mar bhia núíosach.

(6)

An 26 Eanáir 2022, ghlac an tÚdarás a thuairim eolaíoch maidir le Sábháilteacht oistéapontaine bainne ó bhó-ainmhithe mar Bhia Núíosach (5) i gcomhréir le hAirteagal 11 de Rialachán (AE) 2015/2283.

(7)

Sa tuairim eolaíoch uaidh, tháinig an tÚdarás ar an gconclúid go bhfuil oistéapontain bainne ó bhó-ainmhithe sábháilte faoi na coinníollacha úsáide atá beartaithe le haghaidh naíonán agus leanaí óga suas le 35 mhí d’aois ar leibhéil nach sáraíonn 151 mg/L. Dá bhrí sin, is leor na forais a sholáthraítear sa tuairim eolaíoch sin chun a shuí, i gcás ina n-úsáidtear oistéapontain bainne ó bhó-ainmhithe ar leibhéil nach sáraíonn 151 mg/L, agus í ceaptha lena húsáid i mbainne foirmle do naíonáin, i mbainne foirmle leantach do naíonáin agus i ndeochanna bainnebhunaithe a cheaptar do leanaí óga, go gcomhlíonann sí na coinníollacha maidir lena cur ar an margadh i gcomhréir le hAirteagal 12(1) de Rialachán (AE) 2015/2283.

(8)

Tagann an tuairim ón Údarás i ndiaidh measúnú sábháilteachta ar bhianna núíosacha, i gcomhréir le Rialachán (AE) 2015/2283, agus ní bhreithnítear léi an gcomhlíontar gach ceanglas eile de chuid an Aontais maidir le bia a chur ar mhargadh an Aontais. Dá bhrí sin, bainne foirmle do naíonáin agus bainne foirmle leantach do naíonáin ina bhfuil oistéapontain bainne ó bhó-ainmhithe, ní mór go gcomhlíonfaidh siad ceanglais Rialachán (AE) Uimh. 609/2013 agus Rialachán Tarmligthe (AE) 2016/127 ón gCoimisiún (6).

(9)

Sa tuairim eolaíoch uaidh, thug an tÚdarás dá aire freisin go raibh an chonclúid uaidh i ndáil le sábháilteacht an bhia núíosaigh bunaithe ar shonraí eolaíocha ó na deimhnithe anailísí agus baisc-thástála, ó thuarascálacha cobhsaíochta agus ó thuarascálacha maidir le staidéir gan foilsiú nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(10)

Dhearbhaigh an t-iarratasóir go raibh cearta tagartha dílseánaigh agus eisiacha aige ar na sonraí eolaíocha ó na deimhnithe anailíse agus baisc-thástála, ó thuarascálacha cobhsaíochta agus ó thuarascálacha maidir le staidéir gan foilsiú tráth a chuir sé an t-iarratas isteach, agus dhearbhaigh sé nach féidir leis na tríú páirtithe na sonraí sin a úsáid go dlíthiúil ná tagairt a dhéanamh dóibh

(11)

Rinne an Coimisiún measúnú ar an bhfaisnéis uile a chuir an t-iarratasóir ar fáil agus mheas sé go raibh cruthúnas leordhóthanach tugtha aige gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, ba cheart na sonraí eolaíocha a luadh cheana a chosaint i gcomhréir le hAirteagal 27(1) de Rialachán (AE) 2015/2283. Dá réir sin, níor cheart ach an t-iarratasóir a údarú chun oistéapontain bainne ó bhó-ainmhithe a chur ar an margadh laistigh den Aontas ar feadh tréimhse 5 bliana ó theacht i bhfeidhm an Rialacháin seo.

(12)

Mar sin féin, maidir le húdarú oistéapontaine bainne ó bhó-ainmhithe agus an tagairt do na sonraí eolaíocha atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh sin cur isteach ar údarú chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(13)

Ós rud é go dtagann an bia núíosach ó bhainne ó bhó-ainmhithe, rud a liostaítear in Iarscríbhinn II a ghabhann le Rialachán (AE) Uimh. 1169/2011 ó Pharlaimint na hEorpa agus ón gComhairle (7) mar cheann amháin de roinnt substaintí nó táirgí is cúis le hailléirgí nó le héadulaingtí ar bhia, ba cheart bianna ina bhfuil aonraíoch bunata próitéine bainne ó bhó-ainmhithe amhail oistéapontain bainne ó bhó-ainmhithe a lipéadú go hiomchuí de réir na gceanglas a leagtar síos in Airteagal 21 den Rialachán sin.

(14)

Is iomchuí go mbeadh an fhaisnéis dá dtagraítear in Airteagal 9(3) de Rialachán (AE) 2015/2283 san iontráil a bhaineann le hoistéapontain bainne ó bhó-ainmhithe ar liosta an Aontais de bhianna núíosacha.

(15)

Ba cheart oistéapontain bainne ó bhó-ainmhithe a chur ar liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(16)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,