(1)

L-Artikolu 29(1) tad-Direttiva 96/23/KE jirrikjedi li l-pajjiżi terzi li minnhom l-Istati Membri huma awtorizzati jimportaw l-annimali u l-prodotti tal-annimali koperti minn dik id-Direttiva, jissottomettu pjanijiet ta’ monitoraġġ tar-residwi li jipprovdu l-garanziji meħtieġa (“il-pjanijiet”). Il-pjanijiet jenħtieġ li jinkludu mill-inqas il-gruppi ta’ residwi u s-sustanzi elenkati fl-Anness I ta’ dik id-Direttiva.

(2)

Id-Deċiżjoni tal-Kummissjoni 2011/163/UE (2) tapprova l-pjanijiet sottomessi minn ċerti pajjiżi terzi fir-rigward tal-annimali u l-prodotti tal-annimali speċifikati elenkati fl-Anness ta’ dik id-Deċiżjoni (“il-lista”).

(3)

Il-Bożnija-Ħerzegovina ssottomettiet pjan għall-akkwakultura lill-Kummissjoni, li jkopri biss il-ħut bil-pinen. Għalhekk jenħtieġ li mal-lista tiżdied speċifikazzjoni li tillimita l-approvazzjoni għall-akkwakultura għall-ħut bil-pinen biss.

(4)

Il-Botswana hija inkluża fil-lista għall-bhejjem tal-ifrat, għaż-żwiemel u għall-kaċċa mrobbija. Madankollu, dak il-pajjiż terz informa lill-Kummissjoni li mhux se jesporta aktar żwiemel ħajjin u kaċċa mrobbija lejn l-Unjoni. Għalhekk jenħtieġ li l-entrata għall-Botswana għall-ekwini u għall-kaċċa mrobbija titneħħa mil-lista.

(5)

Iran issottometta pjan għall-akkwakultura lill-Kummissjoni, li jkopri biss il-krustaċji. Għalhekk jenħtieġ li mal-lista tiżdied speċifikazzjoni li tillimita l-approvazzjoni għall-akkwakultura għall-krustaċji biss.

(6)

Ir-Repubblika tal-Unjoni tal-Myanmar issottomettiet pjan għall-għasel lill-Kummissjoni. Dak il-pjan jagħti biżżejjed garanziji u jenħtieġ li jiġi approvat. Għalhekk jenħtieġ li fil-lista tiġi inkluża entrata għall-Myanmar għall-għasel.

(7)

New Caledonia hija inkluża fil-lista għall-bhejjem tal-ifrat, għall-akkwakultura, għall-kaċċa salvaġġa, għall-kaċċa mrobbija u għall-għasel. Madankollu, dak il-pajjiż terz informa lill-Kummissjoni li mhux se jesporta aktar laħam taċ-ċanga u kaċċa salvaġġa lejn l-Unjoni u li l-pjan għall-akkwakultura jkopri biss il-krustaċji. Għalhekk jenħtieġ li l-entrata għal New Caledonia għall-bhejjem tal-ifrat u għall-kaċċa salvaġġa titneħħa mil-lista u li mal-lista tiżdied speċifikazzjoni li tillimita l-approvazzjoni għall-akkwakultura għall-krustaċji biss.

(8)

Sierra Leone ssottomettiet pjan għall-għasel lill-Kummissjoni. Dak il-pjan jagħti biżżejjed garanziji u jenħtieġ li jiġi approvat. Għalhekk jenħtieġ li fil-lista tiġi inkluża entrata għal Sierra Leone għall-għasel.

(9)

Is-Suriname huwa inkluż fil-lista ta’ approvazzjoni għall-akkwakultura. Madankollu, is-Suriname informa lill-Kummissjoni li mhux se jesporta aktar prodotti tal-akkwakultura lejn l-Unjoni. Għalhekk jenħtieġ li l-entrata għas-Suriname għall-akwakultura titneħħa mil-lista.

(10)

Bħalissa t-Tuneżija hija inkluża fil-lista ta’ approvazzjoni għat-tjur, għall-akkwakultura u għall-kaċċa salvaġġa. Dak il-pajjiż terz issottometta pjan għat-tjur lill-Kummissjoni li ma jipprovdix biżżejjed garanziji u pjan għall-akkwakultura, li jkopri biss il-ħut bil-pinen. Għalhekk jenħtieġ li l-entrata għat-Tuneżija li tikkonċerna t-tjur titneħħa mil-lista u li mal-lista tiżdied speċifikazzjoni li tillimita l-approvazzjoni għall-akkwakultura għall-ħut bil-pinen biss.

(11)

Filwaqt li l-Kosovo (*) ma pprovdiex pjan għat-tjur, il-Kosovo pprovda garanziji fir-rigward tal-materja prima tat-tjur li toriġina mill-Istati Membri jew minn pajjiżi terzi li huma approvati biex jesportaw tali materja prima lejn l-Unjoni Ewropea. Għalhekk jenħtieġ li tiżdied entrata fil-lista għall-Kosovo għat-tjur bin-nota f’qiegħ il-paġna xierqa.

(12)

Għaldaqstant jenħtieġ li d-Deċiżjoni 2011/163/UE tiġi emendata skont dan.

(13)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,